Zechariah 3

Shilluk DC Bible © Bible Society in South Sudan, 2011

← Chapter 2 Jump to: Chapter 4 →

1Anyudhi yɑn Jöcwø, Ókwër-ɑ Dwøng yi Jwøng-ɑ Ácwɑ̈ɑ̈j, e cung-ɑ́ɑ̀ bøli wëywöni Jwøng-ɑ Ácwɑ̈ɑ̈j, o Cethɑn ócungø kì buti Jöcwø, e dwɑdd-ɑ gøønyi gøn.

2Aköbbi Cethɑn yi wëywöni Jwøng-ɑ Ácwɑ̈ɑ̈j kinni, “Yï ócɑy yi Jwøng-ɑ Ácwɑ̈ɑ̈j, Cethɑn! Jwøng-ɑ Ácwɑ̈ɑ̈j ɑ mɑɑr Yerusɑlem. Jɑɑl, pɑ ni lonh ywɑ̈ɑ̈j wɑ̈g kì mɑc?”

3Jöcwø ɑ́bëëd e ócungø kì bøli wëywödø, e rug-ɑ ógudh mø cödhø.

4Aköbbi wëywödd møg-ɑ cungi kì buti wëywönɑni yi en kinni, “Kɑ̈ɑ̈lu ógudh-ɑ cödhø wɑ̈g kì ree.” Codhe ɑköbbe Jöcwø kinni, “Lidh, orøgí ɑ́kɑ̈ɑ̈lɑ wɑ̈g, o yï nëngɑ ki ógudh mø nyɑ̈n møg rug yi yïn.”

5Aköbbe gïn kinni kïdhi gen wïj Jöcwø ki wëëni me dhïw. Codhe, ɑkïdhi gen wïje ki wëëni, kɑ ree lunyi gen ki ógudh mø nyɑ̈n e wëywöni Jwøng-ɑ Ácwɑ̈ɑ̈j ócungø kì kenyɑni ceth.

6Aköbbi Jöcwø yi wëywönɑni kinni,

7Wïlɑ̈bø Jwøng-ɑ Ácwɑ̈ɑ̈j ɑ́kööb kinni, “Keløg ciggɑ ómïdhi yi yïn ceth, kɑ gïg-ɑ ɑ́köbbɑ yïn gwøg yi yïn, yï óbëëd yïn ɑ́ jɑngi Kengɑ geki gølɑ bëne, kɑ kwɑ̈jjí lïngɑ ni kenyi lïngɑ kwɑ̈jji wëywödd møg-ɑ nyi cungi kì bølɑ.

8Lïng Jöcwø, yïn ɑ bɑ Ókwër-ɑ Dwøng, kɑ wu lïng wun, wun ɑ ókwërr-ɑ kyeelø, wu bɑ ngïjjì kipe gïn-ɑ ócwöb dhuki megø, mɑ́ bɑ̈ngɑ ónyodhɑ, ɑ cwøl ɑ́ bɑɑd yɑdh.

9Bøli Jöcwø cïbɑ’ cïbø ki tungi kït me nyingi ngëdde bɑ ɑ́bïryew. Kïnɑni köme ótwïggɑ ki gwedd, o orøøg pönhï rɑ̈ɑ̈jɑ’ wɑ̈g ki cyɑ̈ng ɑ́kyel yøw.

10Keny-ɑ óbëën cyɑ̈ngɑni, ngɑɑn tyëng-ɑ cyɑ̈gi ki en ócwøle, o ge bëëd gen ki mër, ge ótyegø yi bɑ̈ggi oløg.”

← Chapter 2 Jump to: Chapter 4 →