Daniel 1

Shan

Jump to: Chapter 2 →

1ၼႂ်းပီႊဢၼ် ယေႃးယၵိမ်း ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃ ပီႊတႃႉတီႉယႃႉၼၼ်ႉ ၼေႇပူႉၶတ်ႉၼေႇၸႃႇ ၶုၼ်ႁေႃၶမ်း ပႃႇပူႉလုၼ်ႇ ၶီႇသိုၵ်းမႃးၵႃႈတီႈ ဝဵင်း ယေႇရူႉသလႅမ်ႇ လႄႈ လွမ်ႉဝဵင်းဝႆႉဢေႃႈ။-

2ထႃႇဝရႃႉၽြႃး ဢဝ် ယေႃးယၵိမ်း ဢိၵ်ႇတင်း ၶိူင်ႈပိူင်ပိၵ်ႈမၢၼ်ႇၸဝ်ႈၵမ်ႈၽွင်ႈ ဢၢပ်ႈပၼ်ၵႃႈၼႂ်းမိုဝ်းမၼ်း ၼၼ်ႉလႄႈ မၼ်းဢဝ် ၸိူဝ်းၼၼ်ႉ ၵႂႃႇၵႃႈတီႈၵျွင်းၽြႃးမၼ်း ဢၼ်မီးၵႃႈၼႂ်းဝဵင်း သီႉၼႃႉ ၼၼ်ႉ သေလႄႈ သႂၢင်းသႂ်ႇဝႆႉၵႃႈၼႂ်း တိူၵ်ႈၽၼ်ႇတႃႇၽြႃးမၼ်းဢေႃႈ။-

3မိူဝ်ႈၼၼ်ႉ ၶုၼ်ႁေႃၶမ်း ႁွင်ႉဢဝ် ဢႃႇသပေးၼတ်ႉ ၵေႃႉဢၼ်လႆႈဢုပ်ႉၵႃႈၼိူဝ် ၵူၼ်းထိင်းၼၢင်းၼၼ်ႉလႄႈ မီးဢမိင်ႉႁႂ်ႈမၼ်း လိူၵ်ႈၵဵပ်းဢဝ် ၵႃႈၼႂ်းၸိူဝ်ႉၸဝ်ႈၶိူဝ်းၶုၼ် ဢိၵ်ႇတင်း ၵႃႈၼႂ်းမူးမၢတ်ႈၽွင်းမိူင်း မဵဝ်း ဢီႉသရေႇလႃႉ ၼၼ်ႉ ၵမ်ႈၽွင်ႈ-

4ဢၼ်ဝႃႈၽူႈမၢဝ်ႇ ဢၼ်ၵၢင်းလွတ်ႈတင်းလၢၵ်ႈၶၼႃႇ ဢၼ်ဢမ်ႇလီလႄႈ မီးႁၢင်ႈၽၢင်ဢၼ်ႁၢင်ႈလီႁၢင်ႈငၢမ်း၊ ဢၼ်ၸၢင်ႈမေႃ တၢင်းၵတ်ႉတၢင်းၶၼ်ယူႇ၊ ၸၢပ်ႈလူၺ်ႈၺၢၼ်ႇဢၼ်လီယူႇ၊ ၸၵ်းၽႄႁူႉဢတၢတ်ႈပိင်ႇၺႃႇ ၵူႈၸိူဝ်ႉၵူႈပိူင် ယူႇသေလႄႈ တၢတ်ႈၼိူင်ႇလႆႈ ႁႂ်ႈလႆႈၸုၵ်းၶႃးၸႃး ယူႇၵႃႈၼႂ်းႁေႃၸဝ်ႈ ၸိူဝ်းၼၼ်ႉ မႃးႁႂ်ႈသွၼ်ဢဝ်တၢင်းၸၢင်ႈတၢင်းမေႃ ဢိၵ်ႇတင်း ၵႂၢမ်းၽႃႇသႃႇ ၶႃႇလတေး ၼၼ်ႉဢေႃႈ။-

5ၶုၼ်ႁေႃၶမ်းၸီႇယၢင်ႇဝႆႉ ႁႂ်ႈဢဝ်ပုၼ်ႈတႃႇယေႈဝၼ်းယေႈဝၼ်း ၵႃႈၼႂ်းတၢင်းၵိၼ်တၢင်းၶူပ်း ၶုၼ်ႁေႃၶမ်း ဢိၵ်ႇတင်း ၵႃႈၼႂ်းၼမ်ႉၸပိတ်ႈဢၼ်ၶုၼ်ၼၼ်ႉ သူတ်ႉၵိၼ်ၼၼ်ႉ ပၼ်တီႈၶဝ်ၵူႈဝၼ်းလႄႈ လဵင်ႉလူၶဝ်သၢမ်ပီႊသေယဝ်ႉ၊ ႁႂ်ႈၶဝ်လႆႈၸုၵ်းၶႃးၸႃးယူႇ ၵႃႈတီႈၽၢႆႇၼႃႈ ၶုၼ်ႁေႃၶမ်းဢေႃႈ။-

6ၼႂ်းၶဝ်ၼၼ်ႉပႃး တၢၼ်ႇယေႇလႃႉ၊ ႁႃႇၼၼီႉ၊ မီႉသေႇလႃႉ၊ ဢႃႇၸရီႉ ဢၼ်ပဵၼ် ၵူၼ်းမဵဝ်း ယူႉတႃႉ ဢေႃႈ။-

7ၵေႃႉဢၼ်လႆႈဢုပ်ႉၵႃႈၼိူဝ် ၵူၼ်းထိင်းၼၢင်းၼၼ်ႉ တၢင်ႇၸိုဝ်ႈပၼ်သဵင်တီႈၶဝ်ၼၼ်ႉလႄႈ၊ တၢၼ်ႇယေႇလႃႉ ၸိုင် လႆႈၸိုဝ်ႈ ပေႇလတႃႉသႃႇၸႃႇ၊ ႁႃႇၼၼီႉ ၸိုင်လႆႈၸိုဝ်ႈ သႃႇတရႅၵ်ႉ၊ မီႉသေႇလႃႉ ၸိုင် လႆႈၸိုဝ်ႈ မေႇသႅၵ်ႉ၊ ဢႃႇၸရီႉ ၸိုင်လႆႈၸိုဝ်ႈ ဢႃႇပေႇတၼေႇၵေႃး ဢေႃႈ။-

8တၢၼ်ႇယေႇလႃႉ ၸမ်ႉ၊ မီးတၢင်းၵျၢမ်ႇတၢင်းပွင် တၵ်းဢမ်ႇႁႂ်ႈတူဝ်ၸဝ်ႈၵဝ်ႇ ၵူဝ်ႈၵိူၵ်ႇလူၺ်ႈ တၢင်းၵိၼ်တၢင်းၶူပ်း ၶုၼ်ႁေႃၶမ်း ဢိၵ်ႇတင်း ၼမ်ႉၸပိတ်ႈဢၼ်ၶုၼ်ၼၼ်ႉ သူတ်ႉၵိၼ်ၼၼ်ႉၵူဝ်ႈၵိူၵ်ႇ ဝႃႈၼႆလႄႈ၊ ယွၼ်းဢၶႂၢင်ႉတီႈ ၵေႃႉဢၼ်လႆႈဢုပ်ႉၵႃႈၼိူဝ် ၵူၼ်းထိင်းၼၢင်းၼၼ်ႉ ႁႂ်ႈတူဝ်မၼ်း ဢမ်ႇလႆႈၵူဝ်ႈၵိူၵ်ႇဢေႃႈ။-

9ပိၵ်ႉသမ်ႉ ၽြႃးပဵၼ်ၸဝ်ႈ ပွင်ႁဵတ်းပွင်မႄး ႁႂ်ႈ တၢၼ်ႇယေႇလႃႉ လႆႈထူပ်းၵျေးၸူး ဢိၵ်ႇတင်း တၢင်းဢၼ်ႁၵ်ႉဢဵတ်းလူ သိုဝ်ႈၼႃႈတႂ်ႈတႃ ၵေႃႉဢၼ် လႆႈဢုပ်ႉၵႃႈၼိူဝ်ၵူၼ်းထိင်းၼၢင်းၼၼ်ႉသေၵေႃႈ၊-

10ၵေႃႉဢၼ် လႆႈဢုပ်ႉၵႃႈၼိူဝ်ၵူၼ်းထိင်းၼၢင်းၼၼ်ႉ လၢတ်ႈတီႈ တၢၼ်ႇယေႇလႃႉ လႄႈဝႃႈ၊ ၵဝ်ၵူဝ်ႁႄ ၸဝ်ႈၵဝ်ၶုၼ်ႁေႃၶမ်း ဢၼ်ၸီႇယၢင်ႇဝႆႉ တၢင်းၵိၼ်တၢင်းၶူပ်းသူ ၼၼ်ႉဢေႃႈ။ ၵွပ်ႈပိူဝ်ႈ ၸိူဝ်ႉၼင်ႇႁိုဝ်လႄႈ မၼ်းၸဝ်ႈ တၵ်းလႆႈ ႁၼ်ၼႃႈသူ ပဵၼ်ဢၼ် ႁၢင်ႈၸႃႉႁၢင်ႈႁၢႆႉ လိူဝ်တွၼ်းၼႃႇသေ ၽူႈမၢဝ်ႇဢၼ်ဢသၢၵ်ႈဢရွႆႇ တၢၼ်ႇပဵင်းၵၼ် တင်းသူၼၼ်ႉၼင်ႇႁိုဝ်။ ပေႃးပဵၼ်ၸိူဝ်ႉၼင်ႇၼၼ်ၸိုင်၊ သူတၵ်းႁႂ်ႈၵွၵ်းႁူဝ်ၵဝ်ၼႆႉ ပဵၼ်ဢၼ်ယေႃႇဢၼ်သေပုၼ်ႈသူ တီႈၶုၼ်ႁေႃၶမ်းဢေႃႈ၊ ဝႃႈၼင်ႇၼႆဢေႃႈ။-

11မိူဝ်ႈၼၼ်ႉ တၢၼ်ႇယေႇလႃႉ လၢတ်ႈတီႈၸတေႃႇၵႄး ဢၼ် ၵေႃႉဢၼ် လႆႈဢုပ်ႉၵႃႈၼိူဝ် ၵူၼ်းထိင်းၼၢင်းၼၼ်ႉ ၶၢၼ်းဝႆႉ ႁႂ်ႈလႆႈ လူတူၺ်း တၢၼ်ႇယေႇလႃႉ၊ ႁႃႇၼၼီႉ၊ မီႉသေႇလႃႉ၊ ဢႃႇၸရီႉ ၸိူဝ်းၼၼ်ႉ ၼၼ်ႉလႄႈဝႃႈ၊-

12ၸၢမ်းတူၺ်းၶႃႈၸဝ်ႈႁဝ်း ၸိူဝ်းၼႆႉ သိပ်းဝၼ်းတဵမ်တဵမ်လႄႈ ႁႂ်ႈၶဝ်ပၼ်ၽၵ်းယိူဝ်ႈၽၵ်းၶဵဝ် ဢိၵ်ႇတင်း ၼမ်ႉၵူၺ်း ပုၼ်ႈဢၼ်ႁဝ်းၶႃႈတၵ်းၵိၼ် သေၵမ်း။-

13လိုၼ်းၼၼ်ႉ ႁႂ်ႈၸႅတ်ႈတူၺ်းၼႃႈႁဝ်းၶႃႈ တင်းၼႃႈၽူႈမၢဝ်ႇ ဢၼ်ၵိၼ်တၢင်းၵိၼ်တၢင်းၶူပ်း ၶုၼ်ႁေႃၶမ်း ၸိူဝ်းၼၼ်ႉ ၵႃႈတီႈ ၽၢႆႇၼႃႈၸဝ်ႈႁဝ်းသေၵမ်း။ ၶႅၼ်းတေႃႈ ၸီႇယၢင်ႇတီႈၶႃႈၸဝ်ႈႁဝ်း ၸိူဝ်းၼႆႉ ၸွမ်းၵႃႈၼင်ႇဢၼ် ၸဝ်ႈႁဝ်းႁၼ်ၼၼ်ႉ သေၵမ်း၊ ဝႃႈၼင်ႇၼႆသေယဝ်ႉ၊-

14မၼ်းၼၼ်ႉ ႁပ်ႉတုင်းဢဝ်လွင်ႈတၢင်းၼၼ်ႉလႄႈ ၸၢမ်းတူၺ်းၶဝ်သိပ်းဝၼ်းဢေႃႈ။-

15ၸေးသိပ်းဝၼ်းသေယဝ်ႉ၊ ၼႃႈၶဝ်ၼၼ်ႉ ယဵင်ႈၶႅၼ်းပဵၼ်ဢၼ်ႁၢင်ႈလီလႄႈ ပီးလီမၼ်းလီလိူဝ်တွၼ်းၼႃႇသေ ၼႃႈၽူႈမၢဝ်ႇ ဢၼ်ၵိၼ် တၢင်းၵိၼ်တၢင်းၶူပ်း ၶုၼ်ႁေႃၶမ်း ၸိူဝ်းၼၼ်ႉ ယူႇဢေႃႈ။-

16မိူဝ်ႈၼၼ်ႉ ၸတေႃႇၵႄးၼၼ်ႉ ၼုၵ်ႈသိမ်းဢဝ် တၢင်းၵိၼ်တၢင်းၶူပ်းၶဝ် ဢိၵ်ႇတင်း ၼမ်ႉၸပိတ်ႈ ပုၼ်ႈဢၼ်ၶဝ်တၵ်းၵိၼ်ၼၼ်ႉလႄႈ ဢဝ်ၽၵ်းယိူဝ်ႈ ၽၵ်းၶဵဝ်ၵူၺ်း လဵင်ႉလူၶဝ်ဢေႃႈ။-

17ၽြႃးပဵၼ်ၸဝ်ႈ ဢဵတ်းလူပၼ် တၢင်းၵတ်ႉတၢင်းၶၼ် ဢိၵ်ႇၺၢၼ်ႇ ဢၼ်ၶုတ်းမူင်ႇၸီးၸွင်လႄႈႁူႉ ဢတၢတ်ႈပိင်ႇၺႃႇ ဢၼ်လၢၵ်ႇလၢႆး ၵူႈၸိူဝ်ႉၵူႈပိူင်လႆႈၼၼ်ႉ တီႈၵူၼ်းဢွၼ်ႇသီႇၵေႃႉ ၼၼ်ႉဢေႃႈ။ တၢၼ်ႇယေႇလႃႉ ၵေႃႈ ပျေႉၸုမ်ႇဝႆႉတင်းၺၢၼ်ႇပိင်ႇၺႃႇ ဢၼ်ႁူႉပျႃႇတိၵ်ႈရူႇပႃႇရူင်ႇ ဢိၵ်ႇတင်း တၢင်းဢၼ်ၼွၼ်းၽၼ်ႁၼ် တင်းလၢႆ လႆႈၼၼ်ႉဢေႃႈ။-

18မိူဝ်ႈဢၼ် မိုဝ်ႉဝၼ်းဢၼ် ၶုၼ်ႁေႃၶမ်းၶၢၼ်းဝႆႉ ႁႂ်ႈလႆႈဢဝ်ၶဝ်သႂၢင်း ၶဝ်ႈၵႃႈၼႂ်းႁေႃၶမ်းၼၼ်ႉ ၸေးယဝ်ႉၼၼ်ႉၸိုင်၊ ၵေႃႉဢၼ်လႆႈဢုပ်ႉၵႃႈၼိူဝ်ၵူၼ်းထိင်းၼၢင်းၼၼ်ႉ ႁွင်ႉဢဝ်ၵူၼ်းဢွၼ်ႇ ၸိူဝ်းၼၼ်ႉ သႂၢင်းၶဝ်ႈၵႃႈတီႈၽၢႆႇၼႃႈ ၼေႇပူႉၶတ်ႉၼေႇၸႃႇ ဢေႃႈ။-

19ၶုၼ်ႁေႃၶမ်း တိူင်ႇပၢင်ႇတွင်ႈထၢမ်ၵၼ် တင်းၶဝ်ၼၼ်ႉသေယဝ်ႉ၊ ၵေႃႉဢၼ် မိူၼ်ၵၼ်တင်း တၢၼ်ႇယေႇလႃႉ၊ ႁႃႇၼၼီႉ၊ မီႉသေႇလႃႉ၊ ဢႃႇၸရီႉ ၸိူဝ်းၼၼ်ႉ ဢမ်ႇမီးၵႃႈၼႂ်းၶဝ် တင်းသဵင်ႈတင်းလူင်ၼၼ်ႉ သေၵေႃႉသေၵူၼ်း။ ပိူဝ်ႈၼႆလႄႈ ၶဝ်လႆႈဢရႃႇ ဢၼ်ၸုၵ်းၶႃးၸႃးယူႇ ၵႃႈတီႈၽၢႆႇၼႃႈ ၶုၼ်ႁေႃၶမ်းဢေႃႈ။-

20ၼႂ်းလွင်ႈတၢင်းဢၼ် ၸၢပ်ႈသႅင်ႇၵၼ်တင်း ဢတၢတ်ႈပိင်ႇၺႃႇ ၵႃႈဢၼ်ၶုၼ်ႁေႃၶမ်း တွင်ႈထၢမ်လူၺ်ႈ လွင်ႈမၼ်းတၢင်းမၼ်း တီႈၶဝ်ၼၼ်ႉ မၼ်းထူပ်းႁၼ်လွင်ႈဢၼ်ၶဝ်ၼၼ်ႉ ယဵင်ႈၶႅၼ်း ၸၢင်ႈမေႃလိူဝ်တွၼ်းၼႃႇသေ မႃႇၵူႉပိင်ႇၺႃႇသီႉ ဢိၵ်ႇတင်း မေႃပေႇတၢင်ႇ ၵႃႈဢၼ်မီးၵႃႈၼႂ်းမိူင်းၸဝ်ႈ ၵူႈတီႈၵူႈလႅၼ်ၼၼ်ႉ သိပ်းပုၼ်ႈၼၼ်ႉဢေႃႈ။-

21တၢၼ်ႇယေႇလႃႉ ၼၼ်ႉ မီးယူႇတေႃႇထိုင်ႁွတ်ႈၶုၼ်လူင် ၵူႉရူႉ ၸၢမ်ႇႁၢင်ႈၸၢမ်ႇႁေႃ ပီႊပထမႃႉၼၼ်ႉဢေႃႈ။

Jump to: Chapter 2 →