Daniel 11 — Shan

1ၼႂ်းပီႊဢၼ် ၶုၼ်လူင် တႃႇရီႉ မဵဝ်း မေႇတီႉ ၸၢမ်ႇႁၢင်ႈၸၢမ်ႇႁေႃ ပီႊပထမႃႉၼၼ်ႉ၊ ၵဝ်ၸုၵ်းယူႇ ႁႂ်ႈလႆႈပၼ်ႁႅင်း တီႈမၼ်းလႄႈ ႁႂ်ႈမၼ်း မၼ်ႈၶိူင်ႇၼႅၼ်ႈၼႃဢေႃႈ။-

2မိူဝ်ႈလဵဝ်ၼႆႉၸမ်ႉ၊ ၵဝ်တၵ်းၼႄပျႃး လွင်ႈတၢင်းဢၼ် မၢၼ်ႇမႅၼ်ႈၸိုဝ်ႈၸႂ်ႈၼၼ်ႉ တီႈမႂ်းဢေႃႈ။ တူၺ်းလူး။ ၶုၼ်ႁေႃၶမ်း တၵ်းပေႃႇမႃး ၵႃႈၼႂ်းမိူင်း ပေႇရသီႉ ၼၼ်ႉ သၢမ်ပႃးလူးၵွၼ်ႇဢေႃႈ။ ၶုၼ်ႁေႃၶမ်း ၸတုၵ်ႉထႃႉၸမ်ႉ၊ တၵ်းမၢၵ်ႈမီးလိူဝ်တွၼ်းၼႃႇသေ ၶဝ်ၵႃႈမီးၼၼ်ႉဢေႃႈ။ မိူဝ်ႈဢၼ်မၢၵ်ႈမီး ၸိူဝ်ႉၼင်ႇၼၼ်လႄႈ ႁႅင်းယႂ်ႇမႃးယဝ်ႉၼၼ်ႉၸိုင်၊ မၼ်းတၵ်း တိုၵ်းယူင်းၸူဝ်းဢဝ် ၵူၼ်းတင်းသဵင်ႈတင်းလူင် ႁႂ်ႈလႆႈႁဵတ်း တၢင်းၽိတ်းတေႃႇ ၵူၼ်းမိူင်း ႁေႇလသႃႉ ဢေႃႈ။

3မိူဝ်ႈၼၼ်ႉ ၶုၼ်ႁေႃၶမ်း ဢၼ်တၼ်းၶူဝ်းယႂ်ႇၼႃႇပႃးၼိုင်ႈ တၵ်းပေႃႇမႃးလႄႈ ပႃးတင်းဢႃႇၼႃႇၸဝ်ႈ ဢၼ်ယႂ်ႇၼႃႇ သေလႄႈ လႆႈဢုပ်ႉပိူင်ႇလႄႈ ႁဵတ်းၸွမ်းၵႃႈၼင်ႇဢၼ် ဢလူဝ်ႇမၼ်းမီးဢေႃႈ။-

4ပႃးၼၼ်ႉ ပေႃႇမႃးသေယဝ်ႉ၊ သိုင်ႇၸိုင်ႈဝၢၼ်ႈမိူင်းမၼ်း တၵ်းႁၵ်းပုတ်း ပဵၼ်ပွတ်းပဵၼ်တွၼ်ႈၵႂႃႇလႄႈ လႆႈၶၢမ်ႇတၢင်းဢၼ် ၽႄမႅင်ႇပၼ် ၵႃႈတႂ်ႈၽႃႉၵၢင်ႁၢဝ် သီႇၼႃႈဢေႃႈ။ ၼႂ်းဝႃႈၼၼ်သေၵေႃႈ ဢမ်ႇၽႄမႅင်ႇပၼ်တီႈ ၸိူဝ်ႉၸဝ်ႈၶိူဝ်းၶုၼ်မၼ်း။ ဢမ်ႇၸွမ်းလူၺ်ႈ ဢႃႇၼႃႇမၼ်းသေလႄႈ ဢုပ်ႉပိူင်ႇ။ သိုင်ႇၸိုင်ႈဝၢၼ်ႈမိူင်းမၼ်း တၵ်းလႆႈၶၢမ်ႇတၢင်းဢၼ် ထွတ်ႇထူၺ်ႈၼုၵ်ႈထွၼ်ပႅတ်ႈလႄႈ ပိူၼ်ႈဢၼ်ပဵၼ် ၼွၵ်ႈသေ ၸိူဝ်ႉၸဝ်ႈၶိူဝ်းၶုၼ် မၼ်းၼၼ်ႉ ၸိူဝ်းၼၼ်ႉ တၵ်းဢွၼ်ၵၼ်လႆႈဢေႃႈ။-

5မိူဝ်ႈၼၼ်ႉ ၶုၼ်ႁေႃၶမ်း မိူင်းတၢင်းၸၢၼ်းၼၼ်ႉ တၼ်းၶူဝ်းယႂ်ႇလႄႈ ၵႃႈၼႂ်းၶုၼ်မၼ်းၸိူဝ်းၼၼ်ႉ ၶုၼ်ပႃးၼိုင်ႈ တၼ်းၶူဝ်းတၵ်းယႂ်ႇၼႃႇ သေမၼ်းလႄႈ လႆႈပဵၼ်ၶုၼ်ႁေႃၶမ်းဢေႃႈ။ ဢႃႇၼႃႇမၼ်းၼၼ်ႉ တၵ်းပဵၼ် ဢႃႇၼႃႇဢၼ်ယႂ်ႇၵႂၢင်ႈၼႃႇ လူင်လၢင်ဢေႃႈ။-

6မိူဝ်ႈဢၼ် ပူၼ်ႉၶူပ်ႇပီႊၼီႈမိူင်း ၵမ်ႈၽွင်ႈၵႂႃႇယဝ်ႉ ၼၼ်ႉၸိုင်၊ ႁဵတ်းၵေႃႉႁဵတ်းသေႈၵၼ်ဢေႃႈ။ လုၵ်ႈယိင်းၶုၼ်ႁေႃၶမ်း မိူင်းတၢင်းၸၢၼ်းၼၼ်ႉ တၵ်းႁွတ်ႈထိုင် ၵႃႈတီႈၶုၼ်ႁေႃၶမ်း မိူင်းတၢင်းႁွင်ႇ ႁႂ်ႈပဵၼ်တၢင်းဢၼ်ထုၵ်ႇမေႃ ပေႃးၵႂၢမ်းၵၼ်ဢေႃႈ။ ၼႂ်းဝႃႈၼၼ် သေၵေႃႈ၊ ႁႅင်းၶႅၼ်ႁႅင်းမိုဝ်းမၼ်းၼၼ်ႉ ဢမ်ႇလႆႈတႄႇ။ ၶုၼ်ၼၼ်ႉ ဢိၵ်ႇတင်း ၶႅၼ်မိုဝ်းမၼ်းၵေႃႈ ဢမ်ႇလႆႈတႄႇ။ မႄႈယိင်းၼၼ်ႉ ဢိၵ်ႇတင်း ၶဝ်ၸိူဝ်းဢၼ် ဢဝ်မၼ်းမႃး တင်းၵေႃႉဢၼ် ၵိူတ်ႇလဵင်ႉမၼ်း တင်းၵေႃႉဢၼ် ၸွႆႈထႅမ်ၵမ်ႉထွၵ်ႈမၼ်း ၼႂ်းၶိင်ႇၵႃႇလႃႉၼၼ်ႉ ၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ် ဢၢပ်ႈပၼ်တီႈဢၼ်သုမ်း ဢၼ်ၸွမ်းဢေႃႈ။-

7ၵေႃႉဢၼ်ပဵၼ်ႁုၼ်ႈပဵၼ်ငူင်း ဢၼ်တႅၵ်ႇဢွၵ်ႇၵႃႈတီႈ ႁၢၵ်ႈမႄႈယိင်းၼၼ်ႉ ၵေႃႉၼိုင်ႈ လႆႈပုတ်ႈတီႈပုတ်ႈႁွႆးပေႃႈမႄႈမၼ်း သေယဝ်ႉ၊ တၵ်းၶီႇသိုၵ်းမႃးလႄႈ ႁွတ်ႈထိုင်ၵႃႈတီႈဝဵင်း ဢၼ်မၼ်ႈၶိူင်ႇ ၶုၼ်ႁေႃၶမ်း မိူင်းတၢင်းႁွင်ႇ သေလႄႈ၊ တိုၵ်းတေႃးၵူၼ်းဝဵင်းလႄႈ ပႄႉၼႅင်ႇဢေႃႈ။-

8မၼ်းတၵ်း သိမ်းဢဝ်ၽြႃးၶဝ်၊ ရုၵ်ႈထူႉဢၼ်သွၼ်းလေႃႇၶဝ်၊ ၶိူင်ႈငိုၼ်းၶိူင်ႈၶမ်း ဢၼ်ထိူၵ်ႈၵႃႈထိူၵ်ႈၶၼ်ၶဝ် တင်းလၢႆ ၵႂႃႇၵႃႈတီႈ မိူင်း ဢေႇၵိပ်ႉတူႉ ဢေႃႈ။ ႁိုင်တၢၼ်ႇတၢၼ်ႇသေယဝ်ႉ၊ မၼ်းတၵ်းလႆႈ ၽၢတ်ႇယၢၼ်သေ ၶုၼ်ႁေႃၶမ်း မိူင်းတၢင်းႁွင်ႇလႄႈ ယူႇၶေႃၶေႃ ဢေႃႈ။-

9လႆႈသမ်ႉ ပိၵ်ႉသမ်ႉ ၶုၼ်ႁေႃၶမ်း မိူင်းတၢင်းႁွင်ႇၼၼ်ႉ တၵ်းၶီႇၸူးၵႃႈတီႈ မိူင်းၶုၼ်ႁေႃၶမ်း၊ မိူင်းတၢင်းၸၢၼ်းသေၵေႃႈ မၼ်းတၵ်းလႆႈ ၶိုၼ်းမိူဝ်းၵႂႃႇၵႃႈတီႈ မိူင်းမၼ်းဢေႃႈ။-

10လုၵ်ႈၸၢႆးမၼ်း ၸိူဝ်းၼၼ်ႉ တၵ်းသမ်ႉဢွၼ်ၵၼ်လုၵ်ႉ တိုၵ်းသိုၵ်းလႄႈ ႁႂ်ႈမုၵ်ႉၸိူဝ်းပူဝ်ႇပႃႇ ၵူၼ်းသိုၵ်း ဢၼ်ယႂ်ႇၼမ်ၼႃႇ ၸူႉၵၼ်တုမ်ၵၼ်ဢေႃႈ။ လုၵ်ႈၸၢႆးမၼ်းၵေႃႉၼိုင်ႈ တၵ်းမႃးယူႇတိၵ်းတိၵ်းလႄႈ ထူမ်ႈႁူမ်ႇယဵပ်ႇၶၢမ်ႈဢေႃႈ။ လႆႈသမ်ႉ မၼ်းတၵ်းၶိုၼ်းမႃးလႄႈ တိုၵ်းတေႃးထႅင်ႈတေႃႇထိုင်ႁွတ်ႈ တိူၵ်ႈတီႈတိုၵ်းသိုၵ်း မၼ်းၼၼ်ႉဢေႃႈ။-

11ၶုၼ်ႁေႃၶမ်း မိူင်းတၢင်းၸၢၼ်းၼၼ်ႉ တၵ်းၶူမ်ၸႂ်ၶူမ်ၶေႃး ယူႇသေလႄႈ ႁႄႉႁပ်ႉတိုၵ်းတေႃး ၶုၼ်ႁေႃၶမ်း မိူင်းတၢင်းႁွင်ႇဢေႃႈ။ မၼ်းတၵ်း ၸီႇယၢင်ႇႁႂ်ႈမုၵ်ႉၸိူဝ်း ပူဝ်ႇပႃႇၵူၼ်းသိုၵ်း ၼမ်ၼႃႇလူင်လၢင် ၸူႉၵၼ်တုမ်ၵၼ်လႄႈ မုၵ်ႉၸိူဝ်း ပူဝ်ႇပႃႇၵူၼ်းသိုၵ်း ၼမ်ၼႃႇ လူင်လၢင်ၼၼ်ႉ တၵ်းလႆႈၶၢမ်ႇတၢင်းဢၼ် မၼ်းဢုပ်ႉပိူင်ႇဢေႃႈ။-

12မုၵ်ႉၸိူဝ်း ပူဝ်ႇပႃႇ ၵူၼ်းသိုၵ်း ၼမ်ၼႃႇလူင်လၢင်ၼၼ်ႉ ၸႂ်ယႂ်ႇၸႂ်သုင်လႄႈ၊ ၸႂ်မႃႇၼႃႉဢွၵ်ႇယူႇ သေလႄႈ ပိၵ်ႉသမ်ႉမၼ်း ယႃႉပႅတ်ႈ ၵူၼ်းၼမ်ၼႃႇ ပဵၼ်ႁဵင်ပဵၼ်မိုၼ်ႇဢမ်ႇၵႃးသေၵေႃႈ မၼ်းတၵ်းဢမ်ႇႁႂ်ႈဢႃႇၼႃႇ မၼ်းတႄႇလႆႈ။-

13ၶုၼ်ႁေႃၶမ်း မိူင်းတၢင်းႁွင်ႇၼၼ်ႉ တၵ်းသမ်ႉၶိုၼ်းမႃးလႄႈ ၸီႇယၢင်ႇႁႂ်ႈမုၵ်ႉၸိူဝ်းပူဝ်ႇပႃႇ ၵူၼ်းသိုၵ်း ၼမ်ၼႃႇလူင်လၢင် ၸူႉၵၼ်တုမ်ၵၼ်ၼမ်ၼႃႇ လိူဝ်တွၼ်းၼႃႇသေ မုၵ်ႉၸိူဝ်းဢွၼ်တၢင်း ၼၼ်ႉလႄႈ ပေႃးပူၼ်ႉၶူပ်ႇပီႊ ၼမ်တၢၼ်ႇတၢၼ်ႇယဝ်ႉၸိုင်၊ တၵ်းပႃးဢဝ် တင်းပူဝ်ႇပႃႇၵူၼ်းသိုၵ်းၼမ်ၼႃႇ ဢိၵ်ႇတင်း ၸေးၸိမ်ႇၼမ်ၼႃႇမႃး ဢမၢၼ်ႇၶၼ်ပဵၼ်ဢေႃႈ။-

14ၼႂ်းၶိင်ႇၵႃႇလႃႉၼၼ်ႉ ၶဝ်ၸိူဝ်းဢၼ် ႁဵတ်းတၢင်းၽိတ်း ဝႆႉတီႈၶုၼ်ႁေႃၶမ်းမိူင်း တၢင်းၸၢၼ်းၼၼ်ႉ တၵ်းမီးၼမ်ၼႃႇဢေႃႈ။ ၵူၼ်း ပုင်ႇၵၢၼ်ႇဢၼ်ပဵၼ် ၵူၼ်းမဵဝ်းလဵဝ်ၵၼ် တင်းမႂ်းၸိူဝ်းၼၼ်ႉ တၵ်းဢွၼ်ၵၼ်လုၵ်ႉ ႁႂ်ႈလႆႈ ႁႂ်ႈပျႃႇတိၵ်ႈ ရူႇပႃႇရူင်ႇ ပျေႉၸုမ်ႇဢေႃႈ။ ၶဝ်တၵ်း ႁွတ်ႈထိုင် တၢင်းလူႉတၢင်းလႅဝ်ဢေႃႈ။-

15ၶုၼ်ႁေႃၶမ်း မိူင်းတၢင်းႁွင်ႇၼၼ်ႉ တၵ်းၶီႇမႃးလႄႈ ၵေႃႇႁဵတ်း တဵင်ႁဵတ်း တႅၼ်ႈလိၼ် သေလႄႈ ယႃႉဝဵင်းဢၼ်မၼ်ႈၶိူင်ႇ ပႅတ်ႈဢေႃႈ။ လၢၵ်ႈၼၢၵ်ႈၶုၼ်ႁေႃၶမ်း မိူင်းတၢင်းၸၢၼ်း တင်းလၢႆ၊ ၵူၼ်းသိုၵ်းမၼ်းဢၼ် လိူၵ်ႈၵဵပ်းဢဝ်တင်းလၢႆၼၼ်ႉ ဢမ်ႇဢွၼ်ၵၼ် ႁၢမ်ႈတၢပ်ႈႁႄႉၶႅၼ်လႆႈ။ ဢမ်ႇလႆႈမီးႁႅင်းပုၼ်ႈဢၼ် တၵ်းႁၢမ်ႈတၢပ်ႈႁႄႉၶႅၼ်လႃးလႃး။-

16ၵေႃႉဢၼ် မႃးတိုၵ်းတေႃးမၼ်းၼၼ်ႉ တၵ်းႁဵတ်းၸွမ်းၵႃႈၼင်ႇဢၼ် ဢလူဝ်ႇမၼ်းမီးလႄႈ ၽူႈလႂ်ယင်းဢမ်ႇၸုၵ်းၶၢမ်ႇ ၵႃႈတီႈၽၢႆႇၼႃႈ မၼ်းလႆႈ သေၵေႃႉသေၵူၼ်း လႄႈ မၼ်းတၵ်းလႆႈၸုၵ်းယူႇ ၵႃႈၼႂ်းမိူင်းဢၼ်သႃႇယႃႇ လီငၢမ်းလႄႈ၊ မိူင်းၼၼ်ႉ တၵ်းႁွတ်ႈထိုင် ၵႃႈၼႂ်းမိုဝ်းမၼ်း မူတ်းမူတ်းသဵင်ႈသဵင်ႈဢေႃႈ။-

17မၼ်းတၵ်း ဝႆႉၸႂ်ၵျူဝ်းၸႃးပႃးဢဝ် မုၵ်ႉၸိူဝ်းပူဝ်ႇပႃႇ ၵူၼ်းသိုၵ်းမၼ်းႁႂ်ႈလႆႈ ၶဝ်ႈၵိၼ်မိူင်းမၼ်း ၼၼ်ႉလႄႈ ႁဵတ်းမိၵ်ႉသႃႇႁႃယႃႉ တၢင်းဢၼ် ထုၵ်ႇၵၼ်တင်းမၼ်းၼၼ်ႉ သေယဝ်ႉ၊ ဢဝ်လုၵ်ႈယိင်း မႄႈယိင်း ဢၢပ်ႈပၼ်ၵၼ်တင်းမၼ်းၼၼ်ႉ ႁႂ်ႈလႆႈယႃႉမိူင်းၼၼ်ႉပႅတ်ႈဢေႃႈ။ ၼႂ်းဝႃႈၼၼ်သေၵေႃႈ တၢင်းၵျၢမ်ႇတၢင်းပွင်မၼ်း ဢမ်ႇလႆႈတႄႇ။ လွင်ႈတၢင်းမၼ်းဢမ်ႇလႆႈပဵၼ်။-

18လႆႈသမ်ႉ မၼ်းတၵ်းဝၢႆႇၼႃႈမၼ်းၸူးၵႃႈတီႈ ၸူႉၵုၼ်ၼႂ်းၼမ်ႉပၢင်ႇလၢႆႇ တင်းလၢႆ လႄႈ သိမ်းဢဝ်ၵုၼ်ၼႂ်းၼမ်ႉ ၼမ်ၼႃႇဢေႃႈ။ ၵူၺ်းၵႃႈ ၶုၼ်ပူဝ်ႇ ပႃးၼိုင်ႈ တၵ်းႁႂ်ႈတၢင်းဢၼ် မၼ်းသႄႉသွမ်းၼၼ်ႉ ႁၢႆလၢႆၵႂႃႇလႄႈ မၼ်းၼၼ်ႉ တၵ်းႁႂ်ႈ တၢင်းဢၼ် မၼ်းသႄႉသွမ်းၼၼ်ႉ ၶိုၼ်းႁွတ်ႈထိုင် ၵႃႈၼိူဝ်မၼ်းဢေႃႈ။-

19မၼ်းတၵ်း ၶိုၼ်းမိူဝ်းၸူး ၵႃႈတီႈဝဵင်းဢၼ်မၼ်ႈၶိူင်ႇမၼ်း ၸိူဝ်းၼၼ်ႉလႄႈ တိူဝ်ႉမႅၼ်ႈလႄႈလူမ်ႉသေလႄႈ တၵ်းလပ်ႉႁၢႆၵႂႃႇ ဢေႃႈ။-

20ၵႃႈတီႈ ဢရႃႇမၼ်းၼၼ်ႉ ၵေႃႉဢၼ်ၶျႃးမုၼ်ၸေးၸိမ်ႇ သိုင်ႇၸိုင်ႈဝၢၼ်ႈမိူင်းမၼ်း တူၵ်းတီႈတႅမ်ႇယူႇ သေလႄႈ ၽႃႇငိုၼ်း ၵဵပ်းငိုၼ်းၼၼ်ႉ တၵ်းပေႃႇမႃးလႄႈ မီးၵမ်းဢွၼ်ႇၼိုင်ႈၵူၺ်းသေယဝ်ႉ၊ တေႃးသႃႉ တၢင်းၸႂ်မႆႈယင်းဢမ်ႇဢွၵ်ႇ၊ ယင်းဢမ်ႇလႆႈ တိုၵ်းသိုၵ်းတိုၵ်းသိူဝ် လႄႈ တၵ်းႁွတ်ႈထိုင် တၢင်းဢၼ်သုမ်းၸွမ်းဢေႃႈ။

21ၵႃႈတီႈ ဢရႃႇၵေႃႉၼၼ်ႉၼၼ်ႉ၊ ၵေႃႉဢၼ်ယုတ်ႈမိူၵ်ႈလႄႈ ၶဝ်ဢမ်ႇဢဝ်မုၼ်ၸေးၸိမ်ႇ သိုင်ႇၸိုင်ႈဝၢၼ်ႈမိူင်း ဢၢပ်ႈပၼ်ၼၼ်ႉ တၵ်းပေႃႇမႃးဢေႃႈ။ မၼ်းၼၼ်ႉ တၵ်းပေႃႇမႃး ၼႂ်းၶိင်ႇမိူဝ်ႈဢၼ် လူင်ႉလီလွတ်ႈလီ ၼၼ်ႉလႄႈ ႁဵတ်းတၢင်းဢၼ်ၶျေႃး ဢၼ်ဝွၼ်း သေလႄႈ လႆႈဝၢၼ်ႈလႆႈမိူင်းဢေႃႈ။-

22တပ်ႉၵူၼ်းသိုၵ်း ဢၼ်ထူမ်ႈႁူမ်ႇ ၸိူဝ်းၼၼ်ႉ တၵ်းၸူမ်တူၵ်း ၵႃႈတီႈၽၢႆႇၼႃႈမၼ်းလႄႈ သုမ်းၸွမ်းဢေႃႈ။ ၶုၼ်ဢၼ်ၶၢမ်ႇ မိၵ်ႉသႃႇႁႃယႃႉၵေႃႈ တၵ်းၶၢမ်ႇတၢင်းဢၼ် သုမ်းဢၼ်ၸွမ်းဢေႃႈ။-

23လွင်ႈမၼ်းၸမ်ႉ မၼ်းႁဵတ်းသဵတ်ႈၸႃႇ လူၺ်ႈၵၼ်တင်းမၼ်းၼၼ်ႉ သေယဝ်ႉ၊ တၵ်းႁဵတ်း ပရီႉယႄႇယူႇ သေလႄႈ ၶီႇၶိုၼ်ႈလႄႈ ပိၵ်ႉသမ်ႉမၼ်းပႃးၵူၼ်း ၵေႇၵေႇသေၵေႃႈ တၼ်းၶူဝ်းမၼ်း တၵ်းယႂ်ႇဢေႃႈ။-

24ၼႂ်းၶိင်ႇမိူဝ်ႈဢၼ် လူင်ႉလီလွတ်ႈလီၼၼ်ႉ မၼ်းတၵ်း ၶဝ်ႈၵႃႈၼႂ်းဢိူင်ႇၼႂ်းၵျၢၵ်ႈ ဢၼ်မၢၵ်ႇၼမ်ႁူင်းၼမ် ၼႃႇသေပိူၼ်ႈၼၼ်ႉလႄႈ ႁဵတ်းလွင်ႈတၢင်းဢၼ် ပူႇမၼ်းမွၼ်ႇမၼ်း ဢမ်ႇတွၼ်ႉႁဵတ်းဢၼ်ဝႃႈ တၢင်းဢၼ်ဢဝ်ဢုၵ်ႉၸႃႇၸေးၸိမ်ႇ ဢၼ်ႁိမ်ဢဝ်ႁူင်ႇဢဝ်ၼၼ်ႉ ၽႄမႅင်ႇပၼ်ၵၼ်ဢေႃႈ။ မၼ်းတၵ်းၵျၢမ်ႇပွင် ႁႂ်ႈလႆႈဝဵင်းဢၼ်မၼ်ႈၶိူင်ႇတင်းလၢႆ ယူႇႁိုင်တၢၼ်ႇတၢၼ်ႇဢေႃႈ။-

25မၼ်းတၵ်း ပႃးဢဝ်မုၵ်ႉၸိူဝ်း ၵူၼ်းသိုၵ်း ဢၼ်ယႂ်ႇၼႃႇသေလႄႈ တိုၵ်းယူင်းႁႅင်းမၼ်း ဢိၵ်ႇတင်း တၢင်းႁတ်းတၢင်းႁၢၼ်မၼ်း ယူႇၽၢႆႇၼိုင်ႈ တင်းၶုၼ်ႁေႃၶမ်း မိူင်းတၢင်းၸၢၼ်းဢေႃႈ။ ၶုၼ်ႁေႃၶမ်း မိူင်းတၢင်းၸၢၼ်းၼၼ်ႉၵေႃႈ၊ တၵ်းပႃးဢဝ်မုၵ်ႉၸိူဝ်းၵူၼ်းသိုၵ်း ဢၼ်ႁႅင်းယႂ်ႇၼႃႇလႄႈ ၼမ်ၵိုၼ်းၼႃႇသေလႄႈ ႁႄႉႁပ်ႉတိုၵ်းတေႃးသေၵေႃႈ၊ ဢမ်ႇၸုၵ်းဢမ်ႇၶၢမ်ႇလႆႈ။ လွင်ႈမၼ်းၸမ်ႉ ၶဝ်တၵ်း ဢွၼ်ၵၼ် ၵျၢမ်ႇပွင် တၢင်းၵျၢမ်ႇတၢင်းပွင် ဢၼ်ဢမ်ႇလီယူႇၽၢႆႇၼိုင်ႈတင်းမၼ်း ၼၼ်ႉဢေႃႈ။-

26ၶဝ်ၸိူဝ်းဢၼ် ၵိၼ်တၢင်းၵိၼ်မၼ်းၼၼ်ႉ ၸိူဝ်းၼၼ်ႉၵေႃႈ တၵ်းယႃႉဢၵျူဝ်းမၼ်း ၼၼ်ႉလႄႈ တပ်ႉၵူၼ်းသိုၵ်းမၼ်းၼၼ်ႉ ၸိူဝ်းၼၼ်ႉ တၵ်းၶုၼ်ႇလႅၼ်ႈလႄႈ ၵူၼ်းၼမ်ၼႃႇတၵ်းလူမ်ႉတၢႆဢေႃႈ။-

27ၶုၼ်ႁေႃၶမ်းသွင်ပႃးၼၼ်ႉ တၵ်းဢွၼ်ၵၼ်ၵျၢမ်ႇပွင် တၢင်းၵျၢမ်ႇတၢင်းပွင် ဢၼ်ဢမ်ႇလီလႄႈ လၢတ်ႈၵႂၢမ်းမူႉသႃႇ ၵႃႈတီႈၶူင်ႇတီႈၵိၼ် ဢၼ်လဵဝ်ၵၼ်ဢေႃႈ။ ၼႂ်းဝႃႈၼၼ်သေၵေႃႈ တၢင်းၵျၢမ်ႇတၢင်းပွင်ၼၼ်ႉ ဢမ်ႇလႆႈပဵၼ်။ တီႈသုတ်းတီႈၵွႆမၼ်း တၵ်းလႆႈ ပဵၼ်ၼႂ်းၶိင်ႇၵႃႇလႃႉ ဢၼ်မၵ်းၶၢၼ်းဝႆႉ ၼၼ်ႉဢေႃႈ။-

28လႆႈသမ်ႉ မၼ်းတၵ်းပႃးဢဝ်တင်း ၸေးၸိမ်ႇဢုၵ်ႉၸႃႇၼမ်ၼႃႇ ယူႇသေလႄႈ ၶိုၼ်းမိူဝ်းၸူး ၵႃႈတီႈမိူင်းမၼ်းဢေႃႈ။ မၼ်းတၵ်းဝႆႉၸႂ်ယူႇၽၢႆႇၼိုင်ႈ တင်းပတီႉၺိၺ်ႇတြႃး ဢၼ်မူတ်းၸၢင်ႇၼၼ်ႉ သေလႄႈ ႁဵတ်းၸွမ်းၵႃႈၼင်ႇဢၼ် ဢလူဝ်ႇမၼ်းမီးၼၼ်ႉ သေယဝ်ႉ၊ ၶိုၼ်းမိူဝ်းၸူး ၵႃႈတီႈမိူင်းမၼ်းဢေႃႈ။-

29ၶိင်ႇၵႃႇလႃႉဢၼ် မၵ်းၶၢၼ်းဝႆႉၼၼ်ႉ၊ မၼ်းတၵ်းသမ်ႉၶိုၼ်းမႃး ၵႃႈတီႈၼႃႈတၢင်းၸၢၼ်း လူးၵွၼ်ႇဢေႃႈ။ ၵူၺ်းၵႃႈ ၶိင်ႇၵႃႇလႃႉ ၵမ်းလိုၼ်း ၼၼ်ႉ တၵ်းဢမ်ႇပဵၼ်ၸိူဝ်ႉၼင်ႇ ၶိင်ႇၵႃႇလႃႉမိူဝ်ႈဢွၼ်တၢင်းၼၼ်ႉ။-

30လွင်ႈမၼ်းၸမ်ႉ ႁိူဝ်းသၢင်းၽေႃး ၵိတ်ႉတဵမ် တင်းလၢႆ တၵ်းဢွၼ်ၵၼ် ႁၢမ်ႈတၢပ်ႈႁႄႉၶႅၼ်မၼ်းဢေႃႈ။ ၵွပ်ႈပိူဝ်ႈ ၸိူဝ်ႉၼင်ႇၼၼ်လႄႈ မၼ်းတၵ်းၸဵပ်းၸႂ်ယူႇ သေလႄႈ ၶိုၼ်းမိူဝ်းလႄႈ ၸႂ်မႆႈၶႆႈၸႃႉတီႈ ပတီႉၺိၺ်ႇတြႃး ဢၼ်မူတ်းၸၢင်ႇၼၼ်ႉ သေလႄႈ ၸွမ်းၵႃႈၼင်ႇဢၼ် ဢလူဝ်ႇမၼ်းမီးၼၼ်ႉဢေႃႈ။-

31တပ်ႉၵူၼ်းသိုၵ်း ဢၼ်ဢွၵ်ႇၵႃႈတီႈမၼ်းၼၼ်ႉ တၵ်းဢွၼ်ၵၼ်လုၵ်ႉလႄႈ ႁႂ်ႈထႃႇၼႃႉတီႈမူတ်းၸၢင်ႇၸဝ်ႈ တီႈဢၼ်တၼ်းၶူဝ်းယႂ်ႇၼၼ်ႉ ၵူဝ်ႈၵိူၵ်ႇဢေႃႈ။ ၶဝ်ၼၼ်ႉ တၵ်းဢွၼ်ၵၼ်ပႄႇဝၢတ်ႈ ဢၼ်ႁဵတ်းယူႇ ၵူႈမိုဝ်ႉၵူႈဝၼ်း သေႇသေႇၼၼ်ႉ ပႅတ်ႈလႄႈ ပူၵ်းတင်ႈ လွင်ႈတၢင်းဢၼ်လီႁင်ႈ ဢဵတ်ႇသဵတ်ႇ ဢၼ်ၸၢင်ႈယႃႉယူၵ်ႉၼၼ်ႉဝႆႉဢေႃႈ။-

32မၼ်းတၵ်းၶျေႃးဝွၼ်း ၶဝ်ၸိူဝ်းဢၼ် ၽိတ်းပိူင်ႈ ပတီႉၺိၺ်ႇတြႃး ၼၼ်ႉလႄႈ ႁႂ်ႈၶဝ်ပူၼ်ႉလိူဝ်ဢေႃႈ။ ၶဝ်ၸိူဝ်းဢၼ်ႁူႉၽြႃးၶဝ် ယူႇၼၼ်ႉၸမ်ႉ၊ တၵ်းဢွၼ်ၵၼ်ဢဝ်ႁႅင်း ဢၼ်ယႂ်ႇၼႃႇလႄႈႁဵတ်းဢေႃႈ။-

33ၶဝ်ၸိူဝ်းဢၼ် မီးပိင်ႇၺႃႇ ၵႃႈၼႂ်းၵူၼ်း တင်းလၢႆၼၼ်ႉ တၵ်းဢွၼ်ၵၼ် သင်ႇသွၼ်ၵူၼ်းၼမ်ၼႃႇဢေႃႈ။ ၵူၺ်းၵႃႈၶဝ်တၵ်း ဢွၼ်ၵၼ်လူမ်ႉတၢႆ လူၺ်ႈၽေးလၢပ်ႇၽေးလႅဝ်း၊ ၽေးတၢင်းဢၼ်ဢဝ်တုတ်ႇၽႆး၊ ၽေးတၢင်းဢၼ်သိမ်းဢဝ်ၵႂႃႇ တၢင်ႇတီႈတၢင်ႇလႅၼ်၊ ၽေးတၢင်းဢၼ်ႁိမ်ဢဝ်ႁူင်ႇဢဝ်ၼၼ်ႉ ႁိုင်တၢၼ်ႇတၢၼ်ႇဢေႃႈ။-

34မိူဝ်ႈဢၼ်ၶဝ်လူမ်ႉၼၼ်ႉ၊ သမ်ႉတၵ်းလႆႈၶၢမ်ႇတၢင်းဢၼ် ၸွႆႈထႅမ်မႃႉၸႃႉၵေႇၼႃႇဢေႃႈ။ ၵူၼ်းၼမ်ၼႃႇ တၵ်းဢွၼ်ၵၼ်ႁဵတ်း တၢင်းဢၼ်ၶျေႃးဢၼ်ဝွၼ်း သေလႄႈ ပိုင်ႈဢိင် ၸပ်းၸွမ်းၶဝ်ယူႇဢေႃႈ။-

35ၶဝ်ၸိူဝ်းဢၼ် မီးပိင်ႇၺႃႇၵမ်ႈၽွင်ႈ တၵ်းဢွၼ်ၵၼ်လူမ်ႉ ႁႂ်ႈၶဝ်လႆႈၶၢမ်ႇတၢင်းဢၼ် ၸၢမ်းတူၺ်းသေလႄႈ လႆႈမူတ်းသႂ်ၶၢဝ်ၸၢင်ႇ တေႃႇထိုင်ႁွတ်ႈ တီႈသုတ်းတီႈၵွႆၼၼ်ႉဢေႃႈ။ လွင်ႈမၼ်းၸမ်ႉ တၵ်းလႆႈ ပဵၼ်ၼႂ်းၶိင်ႇမိူဝ်ႈဢၼ် မၵ်းၶၢၼ်းဝႆႉၼၼ်ႉဢေႃႈ။-

36ၶုၼ်ႁေႃၶမ်းၼၼ်ႉ တၵ်းႁဵတ်းၸွမ်းၵႃႈၼင်ႇဢၼ် ဢလူဝ်ႇမၼ်းမီးၼၼ်ႉလႄႈ၊ တူဝ်မၼ်းယုၵ်ႉယွင်ႈတူဝ်မၼ်း ႁႂ်ႈတူဝ်မၼ်း ပဵၼ်ဢၼ်ယႂ်ႇမျၢတ်ႈ လိူဝ်တွၼ်းၼႃႇသေ ၽြႃးတင်းသဵင်ႈတင်းလူင်ယူႇ သေလႄႈ ႁဵတ်းတၢင်းဢၼ်ၶတ်းၵၼ်တင်း ၽြႃး ၼိူဝ်ၽြႃး တင်းလၢႆ ၼၼ်ႉလႄႈ လၢတ်ႈၵႂၢမ်း ဢၼ်လီဢၢမ်းၼႃႇဢေႃႈ။ မၼ်းတၵ်းလႆႈလီလႆႈပဵၼ် ယူႇတေႃႇထိုင်ႁွတ်ႈ ၶိင်ႇၵႃႇလႃႉ တေႃးသႃႉ တၢင်းၸႂ်မႆႈၶႆႈၸႃႉၸေးၸုမ်ႇၼၼ်ႉဢေႃႈ။ တၵ်းလႆႈပဵၼ်ၸွမ်းၵႃႈၼင်ႇဢၼ် ၸီႇယၢင်ႇတႅပ်းတတ်းဝႆႉ ၼၼ်ႉဢေႃႈ။-

37မၼ်းတၵ်း ဢမ်ႇႁဵတ်းပမႃႇၼႃႉ တီႈၽြႃးပူႇမၼ်းမွၼ်ႇမၼ်း တင်းလၢႆ၊ တီႈဢလူဝ်ႇဢၼ်ၸပ်းၸွႆး တီႈမႄႈယိင်းတင်းလၢႆ၊ တီႈၽြႃး သေသူႇသေပႃးလႄႈ၊ တူဝ်မၼ်းတၵ်းယုၵ်ႉယွင်ႈတူဝ်မၼ်း လိူဝ်တွၼ်းၼႃႇသေပိူၼ်ႈ တင်းသဵင်ႈတင်းလူင်ဢေႃႈ။-

38မၼ်းတၵ်းယုၵ်ႉယွင်ႈ ၽြႃးတိူၵ်ႈတီႈတိုၵ်းသိုၵ်းဝႆႉ ၼႂ်းဢရႃႇၽြႃး မၼ်းလႄႈ ဢဝ်ငိုၼ်းၶမ်းသႅင်မျၢတ်ႈ ၶိူင်ႈပိူင် ဢၼ်ထိူၵ်ႈၵႃႈထိူၵ်ႈၶၼ် ၼၼ်ႉ ပုၵ်ႈၸေႃႇတီႈၽြႃး ဢၼ်ပူႇမၼ်းမွၼ်ႇမၼ်း ဢမ်ႇႁူႉၼၼ်ႉဢေႃႈ။-

39မၼ်းတၵ်းဢိင်ၽြႃး ၵူၼ်းတၢင်ႇၸိူဝ်ႉတၢင်ႇၶိူဝ်း သေလႄႈ လုမ်းလႃးတိူၵ်ႈတီႈတိုၵ်းသိုၵ်း ဢၼ်မၼ်ႈဢၼ်ၶိူင်ႇတင်းလၢႆလႄႈ ႁႂ်ႈၵုင်ႇသရေႇ ၶဝ်ၸိူဝ်းဢၼ် ႁပ်ႉတုင်းဢဝ်ၼၼ်ႉ ယႂ်ႇၽႄႈတူဝ်းတွၼ်းမႃးဢေႃႈ။ မၼ်းတၵ်း ပၼ်ဢၶႂၢင်ႉႁႂ်ႈၶဝ်လႆႈဢုပ်ႉၵႃႈၼိူဝ် ၵူၼ်းၼမ်ၼႃႇလႄႈ ၽႄလိၼ်မႅင်ႇပၼ် ႁႂ်ႈပၼ်ဢၵျူဝ်းပုၼ်ႈၶဝ်ဢေႃႈ။-

40ၶိင်ႇၵႃႇလႃႉ တီႈသုတ်းတီႈၵွႆၼၼ်ႉ၊ ၶုၼ်ႁေႃၶမ်း မိူင်းတၢင်းၸၢၼ်းၼၼ်ႉ တၵ်းတိုၵ်းတေႃးမၼ်းလႄႈ ၶုၼ်ႁေႃၶမ်းမိူင်းတၢင်းႁွင်ႇ ၵေႃႈ တၵ်းပႃးဢဝ်ရထႃးလႂ်၊ ႁူဝ်ႁၢၼ်ၵူၼ်းသိုၵ်းၶီႇမႃႉလႂ်၊ ႁိူဝ်းသၢင်းၽေႃးလႂ် သေလႄႈ ၶီႇသိုၵ်းၸူးမၼ်းၼၼ်ႉ မိူၼ်ၸိူဝ်ႉၼင်ႇ လူမ်းၽိဝ်ႇႁုင်ၼၼ်ႉလႄႈ ၶဝ်ႈၵႃႈၼႂ်းမိူင်းတင်းလၢႆလႄႈ ထူမ်ႈႁူမ်ႇသေယဝ်ႉ၊ ဢွၵ်ႇၵႂႃႇသေဢေႃႈ။-

41မိူင်းဢၼ်သႃႇယႃႇလီငၢမ်းၵေႃႈ မၼ်းတၵ်းၶဝ်ႈလႄႈ ၵူၼ်းၼမ်ၼႃႇ တၵ်းသုမ်းၸွမ်းဢေႃႈ။ ၵူၺ်းၵႃႈ ၶဝ်ၸိူဝ်းဢၼ် လွတ်ႈသေၵႃႈၼႂ်း မိုဝ်းမၼ်းၸမ်ႉ၊ ပဵၼ်ၵူၼ်းမိူင်း ဢေႇတုမ်ႇ ၊ ၵူၼ်းမိူင်း မေႃႇၽႃႉ ၊ ၵူၼ်းမဵဝ်း ဢမ်ႇမုၼ်ႇ ဢၼ်ပဵၼ် ဢၼ်ယႂ်ႇဢၼ်မျၢတ်ႈ ၸိူဝ်းၼၼ်ႉဢေႃႈ။-

42မၼ်းတၵ်းလႆႈ ယဵတ်ႇယိုၼ်းမိုဝ်းမၼ်း ၵႃႈၼိူဝ်မိူင်း တင်းလၢႆ၊ မိူင်း ဢေႇၵိပ်ႉတူႉ ၵေႃႈဢမ်ႇလႆႈလွတ်ႈ။-

43မၼ်းတၵ်းလႆႈ ပိူင်ႇဢဝ်ၽၼ်ႇတႃႇငိုၼ်း၊ ၽၼ်ႇတႃႇၶမ်း၊ ဢုၵ်ႉၸႃႇဢၼ်ထိူၵ်ႈၵႃႈထိူၵ်ႈၶၼ် ၵႃႈဢၼ်မီးၵႃႈၼႂ်းမိူင်း ဢေႇၵိပ်ႉတူႉ ၼၼ်ႉဢေႃႈ။ ၵူၼ်းမိူင်း လီႉပူႉ ဢိၵ်ႇတင်း ၵူၼ်းမိူင်း ၵူႉသႃႉ တင်းလၢႆ တၵ်းဢွၼ်ၵၼ် ၸွမ်းလင်မၼ်းဢေႃႈ။-

44ၵူၺ်းၵႃႈ သတၢင်းသဵင်ၶၢဝ်ႇ ဢၼ်ဢွၵ်ႇသေ ၵႃႈတီႈၼႃႈဝၼ်းဢွၵ်ႇ ၼႃႈတၢင်းႁွင်ႇမႃးၼၼ်ႉ တၵ်းႁႂ်ႈမၼ်းမႆႈၸႂ် ႁွၼ်ႉၸႂ်လႄႈ မၼ်းတၵ်းမီးတေႃးသႃႉ တၢင်းၸႂ်မႆႈဢၼ်ယႂ်ႇၼႃႇလူင်လၢင် သေလႄႈ ဢွၵ်ႇၵႂႃႇ ႁႂ်ႈလႆႈယႃႉပႅတ်ႈလႄႈ ၽဵဝ်ႈၵူၼ်းၼမ်ၼႃႇပႅတ်ႈဢေႃႈ။-

45မၼ်းတၵ်းတႄႇႁဵတ်းမူဝ်းၵႃႇ ႁေႃၶမ်းမၼ်း ၵႃႈၼႂ်းၵႄႈဝူင်ႈၵၢင်ပၢင်ႇလၢႆႇ တင်းလွႆဢၼ်မူတ်းၸၢင်ႇ ၼၼ်ႉဢေႃႈ။ ၵူၺ်းၵႃႈ မၼ်းတၵ်း ႁွတ်ႈထိုင် တီႈသုတ်းတီႈၵွႆမၼ်းလႄႈ ၽူႈလႂ်ဢမ်ႇၸွႆႈထႅမ် မႃႉၸႃႉမၼ်းလႆႈ သေၵေႃႉသေၵူၼ်း။