Daniel 10

Shan

← Chapter 9 Jump to: Chapter 11 →

1ၼႂ်းပီႊဢၼ် ၵူႉရူႉ ၶုၼ်ႁေႃၶမ်း ပေႇရသီႉ ၸၢမ်ႇႁၢင်ႈၸၢမ်ႇႁေႃ သၢမ်ပီႊၼၼ်ႉ၊ တၢၼ်ႇယေႇလႃႉ ဢၼ်မီးၸိုဝ်ႈမီးသဵင် ပေႇလတႃႉသႃႇၸႃႇ ၼၼ်ႉ လႆႈၶၢမ်ႇပျႃႇတိၵ်ႈၸဝ်ႈဢေႃႈ။ ပျႃႇတိၵ်ႈၸဝ်ႈၼၼ်ႉ ပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈလႄႈ ၸၢပ်ႈသႅင်ႇၵၼ်တင်း တၢင်းဢၼ် တိုၵ်းသိုၵ်း ဢၼ်ယႂ်ႇၼႃႇဢေႃႈ။ မၼ်းႁူႉၸႅင်ႈလွင်ႈတၢင်းၼၼ်ႉလႄႈ ႁူႉသၢႆငၢႆရူႇပႃႇရူင်ႇၼၼ်ႉဢေႃႈ။-

2ၼႂ်းၶိင်ႇၵႃႇလႃႉ မိုဝ်ႉဝၼ်းၼၼ်ႉ ၵဝ် တၢၼ်ႇယေႇလႃႉ ၼႆႉ ၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်ယူႇ သၢဝ်းဢဵတ်းဝၼ်းတဵမ်တဵမ်ဢေႃႈ။-

3ၸူဝ်ႈဢၼ်ဢမ်ႇပႆႇၸေး သၢဝ်းဢဵတ်းဝၼ်း ၼၼ်ႉၸိုင် ၵဝ်ဢမ်ႇၵိၼ်ၶဝ်ႈမုၼ်းဢၼ်လီဢၼ်ဝၢၼ်။ ၼိူဝ်ႉဢိၵ်ႇတင်း ၼမ်ႉၸပိတ်ႈဢမ်ႇလႆႈၶဝ်ႈၵႃႈၼႂ်းသူပ်းၵဝ်။ ဢမ်ႇႁဵတ်းတၢင်းဢၼ် တႃးၼမ်ႉမၼ်းလႃးလႃး။-

4ၼႂ်းဝၼ်းလိူၼ် ပထမႃႉသၢဝ်းသီႇဝၼ်းၼၼ်ႉ ၵဝ်ယင်းတိုၵ်ႉမီးယူႇ ၵႃႈတီႈႁိမ်းၼမ်ႉႁွင်ႈလူင်ဢၼ်ဝႃႈ ႁီႉတၵေႇလႃႉ ၼၼ်ႉလႄႈ၊-

5ဢဝ်တႃၵဝ်ႁႅၼ်တူၺ်းလႄႈ ႁၼ်ၵူၼ်းဢၼ်ၼုင်ႈမႆပိၵ်ႈၶျေႃး သေလႄႈ ႁတ်ႉသၢႆဢႅဝ်ၶမ်းလွတ်ႈငၢၼ်ႇ ဢူႉၽတ်ႉ ယူႇၼၼ်ႉ ၵေႃႉၼိုင်ႈဢေႃႈ။-

6တူဝ်မၼ်းၼၼ်ႉ ပဵၼ်ၸိူဝ်ႉၼင်ႇ သႅင် မျႅၵ်ႉရွႆး လႄႈ ၼႃႈမၼ်းပဵၼ်ၸိူဝ်ႉၼင်ႇ သၢႆဢရွင်ႇၽႃႉမႅပ်ႈ ၼၼ်ႉဢေႃႈ။ မၢၵ်ႇတႃမၼ်း ပဵၼ်ၸိူဝ်ႉၼင်ႇ ဝၢၼ်ႇၽႆးတဵၼ်း ဢၼ်လုၵ်ႉႁိူဝ်ႈၼႃႇ ၼၼ်ႉလႄႈ၊ တိၼ်မၼ်းမိုဝ်းမၼ်းၼၼ်ႉ မီးဢရွင်ႇႁၢင်ႈၽၢင် တွင်းလိူင် ဢၼ် ၸၢင်ႈဢူမႂ်ႇမႂ်ႇၼၼ်ႉဢေႃႈ။ သဵင်ၵႂၢမ်းမၼ်းပဵၼ်ၸိူဝ်ႉၼင်ႇ သဵင်မုၵ်ႉၵူၼ်း ၸိူဝ်းၵူၼ်းဢၼ်ၼမ်ၼႃႇ ၼၼ်ႉဢေႃႈ။-

7ၵဝ် တၢၼ်ႇယေႇလႃႉ ၵေႃႉလဵဝ်ၵူၺ်း လႆႈႁၼ် ပျႃႇတိၵ်ႈ ရူႇပႃႇရူင်ႇ ၼၼ်ႉလႄႈ ၶဝ်ၸိူဝ်းဢၼ် ပႃးလူၺ်ႈၵၼ်တင်းၵဝ်ၼၼ်ႉ ဢမ်ႇလႆႈႁၼ်ပျႃႇတိၵ်ႈၼၼ်ႉ။ တၢင်းဢၼ်ၵူဝ်ႁႄသၼ်ႇဝႆ ၼႃႇလူင်လၢင် တူၵ်းႁွတ်ႈၵႃႈၼိူဝ်ၶဝ်လႄႈ ၶဝ်ဢွၼ်ၵၼ်ဢွၵ်ႇပၢႆႈ ႁႂ်ႈလႆႈတဵတ်ႇမႅပ်ႉယူႇဢေႃႈ။-

8ၵဝ်ၸမ်ႉ၊ ၵိုတ်းၵျၢၼ်ႇယူႇၵေႃႉလဵဝ်ၵူၺ်းလႄႈ ႁၼ်ရူႇပႃႇရူင်ႇ ဢၼ်ယႂ်ႇၼႃႇလူင်လၢင်ၼၼ်ႉ သေယဝ်ႉ၊ ႁႅင်းဢူၼ်ႈႁႅင်းယွမ်းၵႂႃႇလႄႈ ၼႃႈၵဝ်ႁဵဝ်ႇၸွပ်ႈလူႉၵႂႃႇ သေလႄႈ တၢင်းၵတ်ႉတၢင်းၶၼ် ဢမ်ႇၵိုတ်းၵျၢၼ်ႇဝႆႉ တီႈၵဝ်လႃးလႃး။-

9ၵူၺ်းၵႃႈ ၵဝ်လႆႈငိၼ်းသဵင်ၵႂၢမ်း ၵေႃႉၼၼ်ႉလႄႈ ၼႂ်းမိူဝ်ႈဢၼ် ၵဝ်လႆႈငိၼ်းသဵင်ၵႂၢမ်း ၵေႃႉၼၼ်ႉၼၼ်ႉၸိုင် ၵဝ်ၼွၼ်းၼူၵ်ႇၼႃယူႇ၊ ဢူပ်ႇပူပ်ႇယူႇ သေလႄႈ ဢဝ်ၼႃႈငူပ်ႉလိၼ်ယူႇဢေႃႈ။-

10မိူဝ်ႈၼၼ်ႉ မိုဝ်းၶွၼ်ၼိုင်ႈ တိူဝ်ႉထုၵ်ႇယုၵ်ႉယွင်ႈၵဝ်လႄႈ ၵဝ်မီးတၢင်းဢၼ် ၵူင်ႇယူင်ႇယူႇ ၵႃႈၼိူဝ်ႁူဝ်ၶဝ်ႇၵဝ် ဢိၵ်ႇတင်း ၽႃႇမိုဝ်းၵဝ်ဢေႃႈ။-

11မၼ်းၵေႃႈ လၢတ်ႈတီႈၵဝ်လႄႈဝႃႈ၊ တၢၼ်ႇယေႇလႃႉ ၵေႃႉဢၼ် လီႁၵ်ႉလီပႅင်း ၼႆႉဢိူၺ်း၊ မၢတ်ႈတွင်းၵႂၢမ်းဢၼ် ၵဝ်တၵ်းလၢတ်ႈတီႈမႂ်း ၼၼ်ႉလႄႈ လုၵ်ႉၸုၵ်းယူႇတႃႉ။ ၵဝ်လႆႈၶၢမ်ႇတၢင်းဢၼ် ပွႆႇၸႂ်ႉမႃးၸူး တီႈမႂ်းမိူဝ်ႈလဵဝ်ၼႆႉယဝ်ႉ၊ မိူဝ်ႈဢၼ်မၼ်းဝႃႈၼင်ႇၼႆယဝ်ႉ ၼၼ်ႉၸိုင်၊ ၵဝ်သၼ်ႇသၼ်ႇသၢႆသၢႆ သေလႄႈ လုၵ်ႉၸုၵ်းယူႇဢေႃႈ။-

12မိူဝ်ႈၼၼ်ႉ မၼ်းၵေႃႈ လၢတ်ႈတီႈၵဝ်လႄႈဝႃႈ၊ တၢၼ်ႇယေႇလႃႉ ဢိူၺ်း၊ ယႃႇပေၵူဝ်ပေႁႄ။ ၸႃႉၸဵမ်ဝၼ်းပထမႃႉ ဢၼ်မႂ်း ဝႆႉၸႂ်မႂ်း ႁႂ်ႈလႆႈႁူႉၸႅင်ႈလႄႈ ဢဝ်သင်ႇသွၼ်သုင်းမႃႉ တူဝ်ၸဝ်ႈၵဝ်ႇ ၵႃႈတီႈၽၢႆႇၼႃႈ ၽြႃးပဵၼ်ၸဝ်ႈ မႂ်းၼၼ်ႉလႄႈ၊ မၼ်းၸဝ်ႈထွမ်ႇငိၼ်းၵႂၢမ်းမႂ်း ယဝ်ႉ။ ၵွပ်ႈပိူဝ်ႈ ၵႂၢမ်းမႂ်းၼၼ်ႉလႄႈ ၵဝ်ႁွတ်ႈမႃးယဝ်ႉ။-

13ၶုၼ်ဢၼ်ဢုပ်ႉပိူင်ႇ မိူင်း ပေႇရသီႉ ၸမ်ႉ၊ ႁၢမ်ႈတၢပ်ႈႁႄႉၶႅၼ်ၵဝ်ယူႇ သၢဝ်းပၢႆဢဵတ်းဝၼ်းတဵမ်တဵမ်ဢေႃႈ။ ၵမ်းလိုၼ်း မိၵ်ႉၶေႇလႃႉ ဢၼ်ၶဝ်ႈပႃး ၵႃႈၼႂ်းၶုၼ် ဢၼ်မျၢတ်ႈၼႃႇသေပိူၼ်ႈ ၸိူဝ်းၼၼ်ႉၼၼ်ႉ မႃးၸွႆႈမႃးထႅမ်ၵဝ်လႄႈ ၵဝ်ၵေႃႈလႆႈၵိုတ်းသဝ်းယူႇ ၵႃႈတီႈႁိမ်း ၶုၼ်လူင် ပေႇရသီႉ တင်းလၢႆ ၵႃႈတီႈၼၼ်ႈဢေႃႈ။-

14မိူဝ်ႈလဵဝ်ၼႆႉၸမ်ႉ၊ ၵဝ်ႁွတ်ႈမႃးႁႂ်ႈလႆႈ ႁႂ်ႈမႂ်းႁူႉၸႅင်ႈ လွင်ႈတၢင်းဢၼ်တၵ်းပဵၼ်မႃး တီႈၵူၼ်းမဵဝ်းလဵဝ်ၵၼ် တင်းမႂ်းၸိူဝ်းၼၼ်ႉ ၼႂ်းၶိင်ႇၵႃႇလႃႉမိုဝ်ႉဝၼ်း ၵမ်းလိုၼ်းၼၼ်ႉယဝ်ႉ။ ပျႃႇတိၵ်ႈရူႇပႃႇရူင်ႇၼႆႉ ၸၢပ်ႈသႅင်ႇၵၼ်တင်း ၶိင်ႇၵႃႇလႃႉမိုဝ်ႉဝၼ်းယၢဝ်းယိုၼ်းၼႃႇဢေႃႈ၊ ဝႃႈၼင်ႇၼႆဢေႃႈ။-

15မိူဝ်ႈဢၼ် မၼ်းလၢတ်ႈၸိူဝ်ႉၼင်ႇၼၼ် တီႈၵဝ်ယဝ်ႉၼၼ်ႉၸိုင်၊ ၵဝ်ဢဝ်ၼႃႈၵဝ် ၵူမ်ႈၸူးလိၼ်ယူႇလႄႈ ဢမ်ႇလၢတ်ႈၵႂၢမ်းလႄႈယူႇဢေႃႈ။-

16မိူဝ်ႈၼၼ်ႉ ၵေႃႉဢၼ် မိူၼ်ၸိူဝ်ႉၼင်ႇ ႁၢင်ႈၽၢင်လုၵ်ႈၵူၼ်းၼၼ်ႉ ဢဝ်မိုဝ်းမၼ်းတိူဝ်ႉထုၵ်ႇသႂ်ႇ သီႇသူပ်းၵဝ်လႄႈ ၵဝ်ၽုၺ်ႇ သူပ်းၵဝ်လဝ်ႊလၢတ်ႈတီႈ ၵေႃႉဢၼ် ၸုၵ်းယူႇၵႃႈတီႈၽၢႆႇၼႃႈၵဝ် ၼၼ်ႉလႄႈဝႃႈ၊ ၸဝ်ႈၵဝ်ၶႃႈဢိူၺ်း၊ တုၵ်ႉၶႃႉဝူၺ်ႇတၼႃႇၵဝ်ၶႃႈ ၶိုၼ်းမႃး ႁွတ်ႈထိုင်ၵႃႈၼိူဝ်ၵဝ်ၶႃႈ ၵွပ်ႈပိူဝ်ႈ ရူႇပႃႇရူင်ႇလႄႈ ၵဝ်ၶႃႈဢမ်ႇမီးႁႅင်းလႃးလႃး ၶႃႈယဝ်ႉ။-

17ၶႃႈၸဝ်ႈႁဝ်းၼႆႉ တၵ်းလၢတ်ႈၵႂၢမ်းတေႃႇၵၼ် တင်းၸဝ်ႈႁဝ်းလႆႈ ၸိူဝ်ႉၼင်ႇႁိုဝ်ၶႃႈ။ မိူဝ်ႈလဵဝ်ၼႆႉၵဝ်ၶႃႈ ဢမ်ႇမီးႁႅင်းလႃးလႃး ယဝ်ႉ။ ဢသၢၵ်ႈၵဝ်ၶႃႈၵေႃႈ ဢမ်ႇၵိုတ်းၵျၢၼ်ႇဝႆႉ တီႈၵဝ်ၶႃႈၶႃႈယဝ်ႉ၊ ဝႃႈၼင်ႇၼႆဢေႃႈ။-

18လိုၼ်းၼၼ်ႉ ၵေႃႉဢၼ်မီး ႁၢင်ႈၽၢင်ၵူၼ်းၼၼ်ႉ သမ်ႉမႃးတိူဝ်ႉထုၵ်ႇၵဝ် သေလႄႈ ပၼ်ႁႅင်းတီႈၵဝ် သေယဝ်ႉ၊-

19လၢတ်ႈတီႈၵဝ်လႄႈဝႃႈ၊ ၵေႃႉဢၼ် လီႁၵ်ႉလီပႅင်းၼႃႇဢိူၺ်း၊ ယႃႇပေၵူဝ်ပေႁႄ။ ႁႂ်ႈမီးတၢင်းဢၼ်ၼိမ် သေၵမ်းလူၺ်ႈ။ မီးႁႅင်းၼမ်ၼမ်တႃႉ၊ ဝႃႈၼင်ႇၼႆဢေႃႈ။ မၼ်းဝႃႈၸိူဝ်ႉၼင်ႇၼၼ် သေယဝ်ႉ၊ ၵဝ်လႆႈႁႅင်းမႃးလႄႈ လၢတ်ႈလႄႈဝႃႈ၊ ၸဝ်ႈၵဝ်ၶႃႈဢိူၺ်း၊ မီးဢမိင်ႉသေၵမ်းၶႃႈ။ ၸဝ်ႈႁဝ်းပၼ်ႁႅင်းတီႈၵဝ်ၶႃႈယဝ်ႉ၊ ဝႃႈၼင်ႇၼႆဢေႃႈ။-

20ၵေႃႉၼၼ်ႉၵေႃႈ လၢတ်ႈလႄႈဝႃႈ၊ မႂ်းႁူႉၸႅင်ႈလွင်ႈဢၼ်ၵဝ် လႆႈမႃးၵႃႈတီႈမႂ်း ၵွပ်ႈပိူဝ်ႈ ၸိူဝ်ႉၼင်ႇႁိုဝ် ၼၼ်ႉႁိုဝ်။ ၵဝ်တၵ်းလႆႈ ၶိုၼ်းမိူဝ်းၵႂႃႇ မိူဝ်ႈလဵဝ်ၼႆႉ ႁႂ်ႈလႆႈတိုၵ်းတေႃး ၶုၼ် ပေႇရသီႉ ၼၼ်ႉဢေႃႈ။ လိုၼ်းသေ ဢၼ်ၵဝ်ၶိုၼ်းမိူဝ်း ယဝ်ႉၼၼ်ႉ၊ ၶုၼ် ႁေႇလသႃႉ ၼၼ်ႉ တၵ်းပေႃႇမႃးဢေႃႈ။-

21ၵူၺ်းၵႃႈ ၵဝ်တၵ်းၼႄပျႃး လွင်ႈဢၼ်မၢတ်ႈမၢႆတႅမ်ႈဝႆႉ ၵႃႈၼႂ်းသမ်ႇမႃႇၵျၢမ်းလိၵ်ႈၼၼ်ႉ လူးၵွၼ်ႇဢေႃႈ။ ၼွၵ်ႈသေ မိၵ်ႉၶေႇလႃႉ ၶုၼ်သူၼၼ်ႉ ဢမ်ႇမီးၵေႃႉဢၼ် ဢဝ်ႁႅင်းဢွၵ်ႇယူႇ ၽၢႆႇၵဝ် ၼႂ်းဢမူႉၼႆႉ သေၵေႃႉသေၵူၼ်း လႃးလႃး။

← Chapter 9 Jump to: Chapter 11 →