Daniel 6 — Shan

1ၶုၼ်လူင် တႃႇရီႉ ၼၼ်ႉ ၸွမ်းလူၺ်ႈဢလူဝ်ႇမၼ်း သေလႄႈ ၶၢၼ်းၸဝ်ႈၽႃႉ ဢၼ်လႆႈၸီႇယၢင်ႇဢမူႉ သိုင်ႇၸိုင်ႈဝၢၼ်ႈမိူင်းၸဝ်ႈ ၵူႈၸိူဝ်ႉၵူႈပိူင် ၼၼ်ႉ ပၢၵ်ႇပၢႆသၢဝ်းၼိုင်ႈ၊-

2ဢိၵ်ႇတင်း ဝုၼ်ႇလူင်သၢမ်ပႃး ဢၼ်ပႃးတင်း တၢၼ်ႇယေႇလႃႉ ၼၼ်ႉ ဢၼ်လႆႈဢုပ်ႉၵႃႈၼိူဝ်ၶဝ်ၼၼ်ႉ သေလႄႈ ႁႂ်ႈၸဝ်ႈၽႃႉၸိူဝ်းၼၼ်ႉ သၢၵ်ႈပၼ်သႂၢင်းၸပေႇၸရၢင်း တီႈၶဝ် ႁႂ်ႈဢၵျူဝ်း ၶုၼ်ႁေႃၶမ်း ဢမ်ႇလႆႈလူႉၼၼ်ႉ ဝႆႉဢေႃႈ။-

3တၢၼ်ႇယေႇလႃႉ ၼၼ်ႉ ၵွပ်ႈပိူဝ်ႈ ဢၼ်ပျေႉၸုမ်ႇဝႆႉ တင်းၺၢၼ်ႇဢၼ်လၢၵ်ႇလၢႆး ၼၼ်ႉလႄႈ လႆႈဢရႃႇ ဢၼ်ဢုပ်ႉၵႃႈၼိူဝ်ဝုၼ်ႇလူင် တင်းလၢႆ ဢိၵ်ႇတင်း ၸဝ်ႈၽႃႉ တင်းလၢႆလႄႈ ၶုၼ်ႁေႃၶမ်း မီးတၢင်းၵျၢမ်ႇတၢင်းပွင် တၵ်းဢဝ်မၼ်း ၶၢၼ်းဝႆႉၵႃႈၼိူဝ် သိုင်ႇၸိုင်ႈဝၢၼ်ႈမိူင်းၸဝ်ႈ တင်းသဵင်ႈတင်းလူင်ဢေႃႈ။-

4မိူဝ်ႈၼၼ်ႉ ၶုၼ်လူင် တင်းလၢႆ ဢိၵ်ႇတင်း ၸဝ်ႈၽႃႉ ၸိူဝ်းၼၼ်ႉ ဢွၼ်ၵၼ်ႁႃဢၶႂၢင်ႉဢၼ် တၵ်းတၢင်ႇဢပႅတ်ႈ တီႈ တၢၼ်ႇယေႇလႃႉ လူၺ်ႈလွင်ႈဢမူႉ သိုင်ႇၸိုင်ႈဝၢၼ်ႈမိူင်းၸဝ်ႈ ၼၼ်ႉဢေႃႈ။ ၵူၺ်းၵႃႈၶဝ်ဢမ်ႇထူပ်း တီႈဢၼ်ၽိတ်းဢၼ်ပိူင်ႈ ဢိၵ်ႇတင်း ဢၶႂၢင်ႉတီႈဢၼ် တၵ်းတၢင်ႇဢပႅတ်ႈ လႃးလႃး။ လွင်ႈမၼ်းၸမ်ႉ မၼ်းပျေႉၸုမ်ႇဝႆႉ တင်းသဵတ်ႈၸႃႇလႄႈ ဢမ်ႇမီးဢပႅတ်ႈသေၸိူဝ်ႉသေပိူင်။-

5မိူဝ်ႈၼၼ်ႉ ၵူၼ်းၸိူဝ်းၼၼ်ႉ တိူင်ႇပၢင်ႇ လၢတ်ႈၸႃၵၼ်လႄႈဝႃႈ၊ ၼွၵ်ႈသေ ဢမူႉၽႃႇသႃႇ ၽြႃးပဵၼ်ၸဝ်ႈ မၼ်းၼၼ်ႉ ႁဝ်းဢွၼ်ၵၼ်ႁႃဢၶႂၢင်ႉ ဢၼ်တၵ်း တၢင်ႇဢပႅတ်ႈတီႈမၼ်း ၼၼ်ႉလႄႈ ဢမ်ႇထူပ်းလႆႈ၊ ဝႃႈၼင်ႇၼႆသေယဝ်ႉ၊-

6ဝုၼ်ႇလူင်တင်းလၢႆ ဢိၵ်ႇတင်း ၸဝ်ႈၽႃႉၸိူဝ်းၼၼ်ႉ ဢွၼ်ၵၼ်မႃးၸူႉၵၼ်တုမ်ၵၼ် ၵႃႈတီႈၶုၼ်ႁေႃၶမ်းသေလႄႈ လဝ်ႊလၢတ်ႈလႄႈဝႃႈ၊ ၸဝ်ႈၶုၼ်လူင် တႃႇရီႉ တီႈၶႃႈ၊ ႁႂ်ႈဢသၢၵ်ႈၸဝ်ႈႁဝ်းလိပ်းယူႇတႃႇသေႇ မၼ်ႈၶိူင်ႇသေၵမ်းလူၺ်ႈတီႈၶႃႈ၊-

7ဝုၼ်ႇလူင်၊ ၸဝ်ႈၽႃႉ၊ မူးမၢတ်ႈၽွင်းမိူင်း ဢၼ်တိူင်ႇပၢင်ႇ၊ ၸဵတ်ႈၵႄးမိူင်းၸဝ်ႈ တင်းသဵင်ႈတင်းလူင် တိူင်ႇပၢင်ႇ ၽွမ်ႉသဵင်ပဵင်းပၢၵ်ႇၵၼ် ႁႂ်ႈလႆႈႁဵတ်း တၢင်းဢၼ်ထုတ်ႇဢွၵ်ႇ ဢူႉပတေႇၸဝ်ႈလႄႈ ပူင်ဢမိင်ႉၸဝ်ႈ ဢၼ်ႁၢမ်ႈတၢပ်ႈႁႄႉၶႅၼ် ဢၼ်ဢမ်ႇၽွၵ်ႈပျၢၼ်ႇလႆႈၼၼ်ႉလႄႈဝႃႈ၊ ၼႂ်းသၢမ်သိပ်းဝၼ်း တဵမ်တဵမ် ၼွၵ်ႈသေတီႈၸဝ်ႈႁဝ်းၼႆႉ ၽူႈလႂ်သေဢမ်ႇဝႃႈ၊ ၵေႃႉဢၼ်ၶုပ်ႉဝႆႈ သူးတွင်းတီႈၽြႃး သေသူႇသေပႃး ဢမ်ႇၼၼ် တီႈၵူၼ်းသေၵေႃႉသေၵူၼ်းၼၼ်ႉၸိုင်၊ ၵေႃႉၼၼ်ႉ တၵ်းလႆႈၶၢမ်ႇတၢင်းဢၼ် ဢဝ်ထိမ်ႈၶျႃးတူၵ်းသႂ်ႇ ၵႃႈၼႂ်းႁူးၶုမ် ဢၼ်ၶင်သၢင်ႇသီႈဝႆႉ ၼၼ်ႉဢေႃႈ၊ ဝႃႈၼႆၼၼ်ႉတီႈၶႃႈယဝ်ႉ။-

8ပိူဝ်ႈၼႆလႄႈ ၸဝ်ႈၶုၼ်လူင်တီႈၶႃႈ၊ ပူင်ဢမိင်ႉဢၼ်ႁၢမ်ႈတၢပ်ႈႁႄႉၶႅၼ်ၼၼ်ႉ သေၵမ်းတီႈၶႃႈ၊ တွၵ်ႇတၼ်းသိၵ်ႈ ႁႂ်ႈဢမိင်ႉၸဝ်ႈၼၼ်ႉ တႄႇယူႇၸွမ်းလူၺ်ႈ ထမ်ႇမသၢတ်ႈ မေႇတီႉ၊ ပေႇရသီႉ ဢၼ်ဢမ်ႇၸၢင်ႈၶၢႆႉပုတ်ႈလႆႈၼၼ်ႉ သေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊-

9ၶုၼ် တႃႇရီႉ ၼၼ်ႉ တွၵ်ႇတၼ်းသိၵ်ႈ တီႈဢမိင်ႉၸဝ်ႈ ဢၼ်ႁၢမ်ႈတၢပ်ႈႁႄႉၶႅၼ်ၼၼ်ႉဢေႃႈ။-

10ပိၵ်ႉသမ်ႉ တၢၼ်ႇယေႇလႃႉ ႁူႉငိၼ်းလွင်ႈဢၼ်ဢမိင်ႉၸဝ်ႈ မီးတၢင်းဢၼ်ထုတ်ႇဢွၵ်ႇလႄႈ တွၵ်ႇတၼ်းသိၵ်ႈဝႆႉယဝ်ႉၼၼ်ႉ သေၵေႃႈ၊ မၼ်းၵႂႃႇၸူးၵႃႈတီႈႁိူၼ်း မၼ်းလႄႈ ၽုၺ်ႇပိုတ်ႇႁူးလၢင်းတဵၼ် လုၵ်းႁၢၼ်ႉၼိူဝ်ဢၼ် ဝၢႆႇၼႃႈတေႃႇ ဝဵင်း ယေႇရူႉသလႅမ်ႇ ၼၼ်ႉသေယဝ်ႉ၊ ယေႈဝၼ်းသၢမ်ပွၵ်ႈ ၶုပ်ႉၶဝ်ႇယူႇသေလႄႈ သူးတွင်းလႄႈ ယွင်ႈယေႃးၵျေးၸူးၸဝ်ႈ ၵႃႈတီႈၽၢႆႇၼႃႈ ၽြႃးပဵၼ်ၸဝ်ႈ ၸွမ်းၵႃႈၼင်ႇဢၼ်မီးထုင်းၸၢမ်ႇ ဢၼ်မၼ်းႁဵတ်း မိူဝ်ႈဢွၼ်တၢင်းၼၼ်ႉ မီးၼၼ်ႉဢေႃႈ။-

11မိူဝ်ႈၼၼ်ႉ ၶုၼ်ၸိူဝ်းၼၼ်ႉ ဢွၼ်ၵၼ်မႃး ၸူႉၵၼ်တုမ်ၵၼ်လႄႈ ထူပ်းႁၼ် တၢၼ်ႇယေႇလႃႉ သူးတွင်းပထၼႃႇ လဝ်ႊယွၼ်းဢဝ် ၵႃႈတီႈၽၢႆႇၼႃႈ ၽြႃးပဵၼ်ၸဝ်ႈ မၼ်းသေယဝ်ႉ၊-

12ဢွၼ်ၵၼ် သုတ်ႉၸပ်းသုတ်ႉၸူး ၵႃႈတီႈၶုၼ်ႁေႃၶမ်းလႄႈ လဝ်ႊထၢမ်လွင်ႈဢမိင်ႉမၼ်းၸဝ်ႈ ၼၼ်ႉလႄႈဝႃႈ၊ ၸဝ်ႈႁဝ်းတွၵ်ႇတၼ်းသိၵ်ႈဝႆႉ တီႈဢမိင်ႉၸဝ်ႈဢၼ်ဝႃႈ၊ ၼႂ်းသၢမ်သိပ်းဝၼ်းတဵမ်တဵမ် ၼွၵ်ႈသေတီႈၸဝ်ႈႁဝ်းၼႆႉ ၸဝ်ႈၶုၼ်လူင်တီႈၶႃႈ၊ ၶဝ်ၵႃႈဢၼ် ၶုပ်ႉဝႆႈသူးတွင်းတီႈၽြႃး သေသူႇသေပႃး၊ ဢမ်ႇၼၼ် တီႈၵူၼ်းသေၵေႃႉသေၵူၼ်းၼၼ်ႉ တၵ်းလႆႈ ၶၢမ်ႇတၢင်းဢၼ် ဢဝ်ထိမ်ႈၶျႃးတူၵ်း သႂ်ႇၵႃႈၼႂ်းႁူးၶုမ် ဢၼ်ၶင်သၢင်ႇသီႈဝႆႉ ၼၼ်ႉဢေႃႈ၊ ဝႃႈၼင်ႇၼႆၼၼ်ႉယဝ်ႉ၊ ဢမ်ႇၸႂ်ႈတီႈၶႃႈႁိုဝ်။ ဝႃႈၼင်ႇၼႆဢေႃႈ။ ၶုၼ်ႁေႃၶမ်းၵေႃႈ မီးဢမိင်ႉလႄႈဝႃႈ၊ ပဵၼ်ဢၼ်မၢၼ်ႇဢၼ်မႅၼ်ႈ ၸွမ်းလူၺ်ႈ ထမ်ႇမသၢတ်ႈ မေႇတီႉ၊ ပေႇရသီႉ ဢၼ်ဢမ်ႇၸၢင်ႈၶၢႆႉပုတ်ႈလႆႈၼၼ်ႉယဝ်ႉ၊ ဝႃႈၼင်ႇၼႆဢေႃႈ။-

13ၵူၼ်းၸိူဝ်းၼၼ်ႉၵေႃႈ ဢွၼ်ၵၼ်လဝ်ႊလၢတ်ႈ ၵႃႈတီႈၽၢႆႇၼႃႈ ၶုၼ်ႁေႃၶမ်းလႄႈဝႃႈ၊ ၸဝ်ႈၶုၼ်လူင်တီႈၶႃႈ၊ တၢၼ်ႇယေႇလႃႉ မဵဝ်းၵူၼ်း ယူႉတႃႉ ဢၼ်လႆႈ ၶၢမ်ႇတၢင်းဢၼ်သိမ်းဢဝ်မႃးၼၼ်ႉ ဢမ်ႇႁဵတ်းပမႃႇၼႃႉ တီႈၸဝ်ႈႁဝ်း၊ ၸဝ်ႈၶုၼ်လူင်တီႈၶႃႈ၊ ဢိၵ်ႇတင်း တီႈဢမိင်ႉၸဝ်ႈႁဝ်း ဢၼ်ၸဝ်ႈႁဝ်း တွၵ်ႇတၼ်းသိၵ်ႈၼၼ်ႉလႄႈ သူးတွင်းပထၼႃႇယူႇ ယေႈဝၼ်းသၢမ်ပွၵ်ႈတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

14ၶုၼ်ႁေႃၶမ်း ငိၼ်းၵႂၢမ်းၼၼ်ႉ သေယဝ်ႉ၊ မႆႈၸႂ်ၶီၸႂ်ၼႃႇလူင်လၢင်လႄႈ၊ မီးၸႂ်ဢၼ်ႁႅင်းယႂ်ႇၼႃႇလူင်လၢင် ႁႂ်ႈလႆႈၵႄႇသႄႇဢဝ် တၢၼ်ႇယေႇလႃႉ လွတ်ႈလႄႈ ၵျူဝ်းၸႃးႁႃဢၶႂၢင်ႉ ႁႂ်ႈလႆႈဢဝ်မၼ်းလွတ်ႈယူႇ တေႃႇထိုင်ႁွတ်ႈ ၵၢင်ဝၼ်းထၼ်ႈပေႃးတူၵ်းဢေႃႈ။-

15လႆႈသမ်ႉ ၶုၼ်ၸိူဝ်းၼၼ်ႉ ဢွၼ်ၵၼ် မႃးၸူႉၵၼ်တုမ်ၵၼ် ၵႃႈတီႈ ၶုၼ်ႁေႃၶမ်းလႄႈ လဝ်ႊလၢတ်ႈတီႈ ၶုၼ်ႁေႃၶမ်းလႄႈဝႃႈ ၸဝ်ႈၶုၼ်လူင်တီႈၶႃႈ၊ ၶႅၼ်းတေႃႈလႆႈသတီႉ လွင်ႈဢၼ်ပႃးၵႃႈၼႂ်းထမ်ႇမသၢတ်ႈ မေႇတီႉ၊ ပေႇရသီႉ ၼၼ်ႉလႄႈဝႃႈ၊ ဢမိင်ႉၸဝ်ႈ ဢိၵ်ႇတင်း ဢူႉပတေႇၸဝ်ႈဢၼ် ၶုၼ်ႁေႃၶမ်း ထုတ်ႇဢွၵ်ႇယဝ်ႉၼၼ်ႉ ဢမ်ႇလႆႈၶၢႆႉလႆႈပုတ်ႈ၊ ဝႃႈၼင်ႇၼႆၼၼ်ႉ သေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊-

16ၶုၼ်ႁေႃၶမ်းမီးဢမိင်ႉလႄႈ ၶဝ်ဢွၼ်ၵၼ် ဢဝ် တၢၼ်ႇယေႇလႃႉ မႃးလႄႈ ထိမ်ႈၶျႃးတူၵ်းသႂ်ႇ ၵႃႈၼႂ်းႁူးၶုမ် ဢၼ်ၶင်သၢင်ႇသီႈ ဝႆႉၼၼ်ႉဢေႃႈ။ ၶုၼ်ႁေႃၶမ်းၵေႃႈ မီးဢမိင်ႉတီႈ တၢၼ်ႇယေႇလႃႉ လႄႈဝႃႈ၊ ၽြႃးဢၼ်မႂ်းၵူဝ်းၵႂၢႆႇယူႇ သေႇသေႇၼၼ်ႉ တၵ်းၵႄႇသႄႇ ၶျွတ်ႈဢဝ်မႂ်းလႆ၊ ဝႃႈၼင်ႇၼႆဢေႃႈ။-

17ၶႅပ်းမၢၵ်ႇႁိၼ်လူင်ၵေႃႈ ၶဝ်ဢဝ်မႃးလႄႈ ႁူမ်ႇဢိုတ်းဝႆႉၵႃႈၼိူဝ်ပၢၵ်ႇႁူးၶုမ် သေယဝ်ႉ၊ ၶုၼ်ႁေႃၶမ်း တွၵ်ႇတၼ်းသိၵ်ႈလႄႈ ၶုၼ်ၸိူဝ်းၼၼ်ႉ တွၵ်ႇတၼ်းသိၵ်ႈၶဝ်ဝႆႉ ႁႂ်ႈတၢင်းဢၼ် ၸီႇယၢင်ႇ တၢၼ်ႇယေႇလႃႉ ၼၼ်ႉ ဢမ်ႇလိူဝ်ဢမ်ႇယွမ်းဢေႃႈ။-

18လိုၼ်းၼၼ်ႉ ၶုၼ်ႁေႃၶမ်း ၶိုၼ်းမိူဝ်းတီႈႁေႃၶမ်းလႄႈ ၵမ်တၢင်းၵိၼ်ယူႇ ႁႂ်ႈထၼ်ႈပေႃး ပူၼ်ႉၶိုၼ်း တင်းၶိုၼ်းလႄႈ၊ ယင်းဢမ်ႇႁႂ်ႈဢဝ်ၸိူင်ႉၼၢင်း မၼ်းတင်းလၢႆ သႂၢင်းၶဝ်ႈတီႈမၼ်းလႄႈ ၼွၼ်းလႄႈဢမ်ႇလပ်းလႆႈ။-

19ၶုၼ်ႁေႃၶမ်း လုၵ်ႉၸဝ်ႉၸဝ်ႉ ၶိင်ႇမိူဝ်ႈဢၼ် မိူင်းလႅင်းၼၼ်ႉလႄႈ ၵႂႃႇၸူးၵႃႈတီႈ ႁူးၶုမ်သၢင်ႇသီႈၼၼ်ႉ ၶၼ်ၶၼ်ၽႂ်းၽႂ်းဢေႃႈ။-

20မၼ်းႁွတ်ႈထိုင်ၵႃႈတီႈႁိမ်း ႁူးၶုမ်ၼၼ်ႉသေယဝ်ႉ၊ ပႃးတင်းသဵင်ဢၼ်ႁႆႈဢၼ်ႁွင်ႉ သေလႄႈ ႁွင်ႉဢေႃႈ။ ၶုၼ်ႁေႃၶမ်း ႁွင်ႉထၢမ်တီႈ တၢၼ်ႇယေႇလႃႉ လႄႈဝႃႈ၊ တၢၼ်ႇယေႇလႃႉ ၊ ၶႃႈၽြႃးပဵၼ်ၸဝ်ႈ ဢၼ်ဢသၢၵ်ႈလိပ်းယူႇဢိူၺ်း၊ ၽြႃးပဵၼ်ၸဝ်ႈ ဢၼ်မႂ်း ၵူဝ်းၵႂၢႆႇယူႇသေႇသေႇၼၼ်ႉ ၵႄႇၶျွတ်ႈဢဝ်မႂ်း လွတ်ႈသေၵႃႈၼႂ်းၽေး သၢင်ႇသီႈလႆႈႁိုဝ်။ ဝႃႈၼင်ႇၼႆဢေႃႈ။-

21တၢၼ်ႇယေႇလႃႉ ၵေႃႈ ၶိုၼ်းလဝ်ႊလၢတ်ႈ တီႈၶုၼ်ႁေႃၶမ်းလႄႈဝႃႈ၊ ၸဝ်ႈၶုၼ်လူင်တီႈၶႃႈ၊ ႁႂ်ႈဢသၢၵ်ႈၸဝ်ႈႁဝ်းလိပ်း ယူႇတႃႇသေႇ မၼ်ႈၶိူင်ႇ သေၵမ်းလူၺ်ႈတီႈၶႃႈ၊-

22ၽြႃးပဵၼ်ၸဝ်ႈ ဢၼ်ၶႃႈၸဝ်ႈ ၵူဝ်းၵႂၢႆႇယူႇၼၼ်ႉ ပွႆႇၸႂ်ႉတမၢၼ်ႇၵၢင်ႁၢဝ်မႃး သေလႄႈ ဢိုတ်းသူပ်းသၢင်ႇသီႈဝႆႉလႄႈ ၶႃႈၸဝ်ႈၵၢင်းလွတ်ႈ တင်းၽေး သၢင်ႇသီႈယူႇတီႈၶႃႈဢေႃႈ။ လွင်ႈမၼ်းၸမ်ႉ ၶႃႈၸဝ်ႈၼႆႉ ၵၢင်းလွတ်ႈတင်းဢပႅတ်ႈ ၵႃႈတီႈၽၢႆႇၼႃႈ မၼ်းၸဝ်ႈၼၼ်ႉလႄႈ ၶႃႈၸဝ်ႈ ဢမ်ႇၽိတ်းပိူင်ႈၵႃႈတီႈ ၽၢႆႇၼႃႈၸဝ်ႈႁဝ်း လႃးလႃး တီႈၶႃႈ၊ ဝႃႈၼင်ႇၼႆဢေႃႈ။-

23မိူဝ်ႈၼၼ်ႉ ၶုၼ်ႁေႃၶမ်း ၸူမ်းသိူဝ်းၼႃႇလူင်လၢင်လႄႈ မီးဢမိင်ႉ ႁႂ်ႈဢဝ် တၢၼ်ႇယေႇလႃႉ ဢွၵ်ႇသေ ၵႃႈၼႂ်းႁူးၶုမ်ၼၼ်ႉလႄႈ တၢၼ်ႇယေႇလႃႉ လႆႈၶၢမ်ႇတၢင်းဢၼ် ဢဝ်ဢွၵ်ႇသေ ၵႃႈၼႂ်းႁူးၶုမ်ၼၼ်ႉလႄႈ၊ ဢမ်ႇမီးတၢင်းဢၼ်ၸဵပ်းဢၼ်သႅပ်ႇ သေၸိူဝ်ႉသေပိူင် တီႈမၼ်း လႃးလႃး ၵွပ်ႈပိူဝ်ႈ ဢၼ်မၼ်းယုမ်ႇမၢတ်ႈ ဢိင်ပိုင်ႈ ၽြႃးပဵၼ်ၸဝ်ႈ မၼ်းၼၼ်ႉဢေႃႈ။-

24လိုၼ်းၼၼ်ႉ ၶုၼ်ႁေႃၶမ်း မီးဢမိင်ႉလႄႈ ၶဝ်ဢွၼ်ၵၼ်ႁွင်ႉဢဝ်ၶဝ်ၸိူဝ်းဢၼ် တၢင်ႇဢပႅတ်ႈတီႈ တၢၼ်ႇယေႇလႃႉ ၼၼ်ႉမႃးလႄႈ ဢဝ်ၶဝ် ဢိၵ်ႇလူၺ်ႈၵၼ် တင်းလုၵ်ႈၶဝ် မေးၶဝ် ထိမ်ႈၶျႃးတူၵ်းသႂ်ႇ ၵႃႈၼႂ်းႁူးၶုမ်သၢင်ႇသီႈၼၼ်ႉ သေလႄႈ သၢင်ႇသီႈ ၸိူဝ်းၼၼ်ႉ ဢွၼ်ၵၼ်ပႄႉၼႅင်ႇလႄႈ သိၵ်ႇယႃႉ ႁၵ်းလုပ်ႇၶဝ်ၵႃႈမီးပႅတ်ႈ ၸဵမ်မိူဝ်ႈၸူဝ်ႈဢၼ်ၶဝ် ဢမ်ႇပႆႇတူၵ်းႁွတ်ႈ တူၵ်းထိုင် ၵူၼ်ႈၶုမ် ပိုၼ်ႉၶုမ်ၼၼ်ႉဢေႃႈ။-

25မိူဝ်ႈၼၼ်ႉ ၶုၼ်လူင် တႃႇရီႉ ပွႆႇၸႂ်ႉ လိၵ်ႈဢမိင်ႉၸဝ်ႈ ၵႂႃႇတီႈၵူၼ်း ၵူႈၸိူဝ်ႉၵူႈမဵဝ်း ဢၼ်ယူႇၵႃႈတီႈ ၵူႈတီႈၵူႈလႅၼ် ၵႃႈၼိူဝ် ၼႃႈလိၼ်မိူင်းတင်းၼႃႈလႄႈ လၢတ်ႈၵႂၢမ်းၽႃႇသႃႇ ၶေႃၶေႃ ႁင်းၽႂ်ႁင်းမၼ်း တင်းသဵင်ႈတင်းလူင် ၼၼ်ႉဢေႃႈ။ ၵႂၢမ်းလိၵ်ႈၼၼ်ႉဝႃႈၸမ်ႉ၊ ႁႂ်ႈတၢင်းဢၼ်ၼိမ် ဢၼ်လီ ၵတ်းယဵၼ်ၶျၢမ်းသႃႇ မီးၼမ်ၼႃႇတီႈသူ သေၵမ်းလူၺ်ႈ။-

26ၵဝ်ပူင်ဢမိင်ႉၸဝ်ႈ ႁႂ်ႈၵူၼ်းဢၼ်ယူႇၵႃႈၼႂ်း သိုင်ႇၸိုင်ႈဝၢၼ်ႈမိူင်း ဢၼ်ၵဝ်ဢုပ်ႉပိူင်ႇတင်းမိူင်းၼႆႉ ၸိူဝ်းၼၼ်ႉ ဢွၼ်ၵၼ်မီးတၢင်းဢၼ် သၼ်ႇသၼ်ႇဝႆဝႆ သေလႄႈ ၵူဝ်ယမ် ၽြႃးပဵၼ်ၸဝ်ႈ တၢၼ်ႇယေႇလႃႉ ဢေႃႈ။ လွင်ႈမၼ်းၸမ်ႉ ၽြႃးပဵၼ်ၸဝ်ႈ ၼၼ်ႉ ပဵၼ်ၽြႃးဢၼ် ဢသၢၵ်ႈလိပ်းယူႇလႄႈ တႄႇယူႇၼိၵ်ႈၸႃႉ ထႃႇဝရႃႉဢေႃႈ။ သိုင်ႇၸိုင်ႈဝၢၼ်ႈမိူင်း မၼ်းၸဝ်ႈၼၼ်ႉ ဢမ်ႇႁွတ်ႈထိုင် တၢင်းဢၼ်လူႉဢၼ်လႅဝ်လႆႈ။ ဢႃႇၼႃႇၸၢၵ်ႈမၼ်းၸဝ်ႈၵေႃႈ တၵ်းတႄႇယူႇ တေႃႇထိုင်ႁွတ်ႈ တီႈသုတ်းတီႈၵွႆဢေႃႈ။-

27မၼ်းၸဝ်ႈ ၸၢင်ႈၵႄႇသႄႇၼုၵ်ႈဢဝ်လႄႈ ၸၢင်ႈၵႄႇသႄႇၶျွတ်ႈဢဝ်၊ ၸၢင်ႈႁဵတ်းႁႂ်ႈ ၼီႉမိၵ်ႈလၢၵ်ႈၶၼႃႇ တီႈဢၼ်ဢၢမ်းလီ တင်းလၢႆ ပဵၼ်ၵႃႈၼိူဝ်ၽႃႉၵၢင်ႁၢဝ် ဢိၵ်ႇတင်း ၵႃႈၼိူဝ်လိၼ်မိူင်းလႄႈ ပဵၼ်ၸဝ်ႈ ဢၼ်ၵႄႇသႄႇၶျွတ်ႈဢဝ် တၢၼ်ႇယေႇလႃႉ လွတ်ႈသေ ၵႃႈၼႂ်းမိုဝ်း သၢင်ႇသီႈ တင်းလၢႆ၊ ဝႃႈၼင်ႇၼႆဢေႃႈ။-

28ၼင်ႇၼၼ်လႄႈ တၢၼ်ႇယေႇလႃႉ ၼၼ်ႉ လႆႈလီလႆႈပဵၼ် ၼႂ်းၸူဝ်ႈပၢၼ် ၶုၼ်လူင် တႃႇရီႉ ဢိၵ်ႇတင်း ၼႂ်းၸူဝ်ႈပၢၼ် ၶုၼ်လူင် ၵူႉရူႉ မဵဝ်း ပေႇရသီႉ ၼၼ်ႉဢေႃႈ။