Daniel 12

Shan

← Chapter 11 Jump to:

1ၼႂ်းၶိင်ႇၵႃႇလႃႉၼၼ်ႉ မိၵ်ႉၶေႇလႃႉ ၸဝ်ႈလူင်ဢၼ်ပႂ်ႉ ၵူၼ်းမဵဝ်းလဵဝ်ၵၼ်တင်းမႂ်းၼၼ်ႉ တၵ်းလုၵ်ႉလႄႈ ၶိင်ႇၵႃႇလႃႉတုၵ်ႉၶႃႉ တၢင်းၽၢၼ် ဢၼ်ဢမ်ႇတွၼ်ႉပဵၼ် ၸႃႉၸဵမ်ၶိင်ႇမိူဝ်ႈဢၼ် မဵဝ်းၵူၼ်းလႆႈပဵၼ်မႃး ၼၼ်ႉလႄႈ တေႃႇထိုင်ႁွတ်ႈ ၶိင်ႇမိူဝ်ႈၼၼ်ႉၼၼ်ႉ တၵ်းႁွတ်ႈထိုင်ဢေႃႈ။ ၼႂ်းၶိင်ႇၵႃႇလႃႉၼၼ်ႉ ၵူၼ်းမဵဝ်းလဵဝ်ၵၼ် တင်းမႂ်းၵႃႈဢၼ်ၶဝ်ႈပႃး ၼႂ်းၸရၢင်းၽိုၼ်လိၵ်ႈၼၼ်ႉ ၸိူဝ်းၼၼ်ႉ တၵ်းလႆႈ ႁွတ်ႈထိုင်တၢင်းဢၼ် ၵႄႇသႄႇဢဝ်လွတ်ႈဢေႃႈ။-

2မိူဝ်ႈၼၼ်ႉ ၶဝ်ၸိူဝ်းဢၼ်ၼွၼ်းလပ်း ၵႃႈၼႂ်းမုၼ်ႈလိၼ် ၼမ်ၼႃႇၼၼ်ႉ တၵ်းဢွၼ်ၵၼ်တိုၼ်ႇမႃးဢေႃႈ။ ၵမ်ႈၽွင်ႈၸမ်ႉ၊ တၵ်းတိုၼ်ႇမႃးၸူးတီႈ တၢင်းဢၼ် ဢသၢၵ်ႈလိပ်းထႃႇဝရႃႉလႄႈ ၵမ်ႈၽွင်ႈၸမ်ႉ၊ တၵ်းတိုၼ်ႇမႃးၸူးတီႈ တၢင်းဢၼ်ဢူၵ်းဢၢႆ၊ တၢင်းဢၼ်သရေႇလူႉ ထႃႇဝရႃႉဢေႃႈ။-

3ၶဝ်ၸိူဝ်းဢၼ် မီးပိင်ႇၺႃႇၼၼ်ႉ တၵ်းလႆႈ ႁိူဝ်ႈလႅင်းမိူၼ်ၸိူဝ်ႉၼင်ႇ ဢရွင်ႇပိၵ်ႈ တၢၼ်ႇၽႃႉၵၢင်ႁၢဝ် ၼၼ်ႉလႄႈ၊ ၶဝ်ၸိူဝ်းဢၼ် ဢဝ်ၵူၼ်းၼမ်ၼႃႇ သႂၢင်းၶဝ်ႈၵႃႈၼႂ်း တြႃးတၢင်းဢၼ်သိုဝ်ႈတေႃႇၼၼ်ႉ တၵ်းႁိူဝ်ႈလႅင်း မိူၼ်ၸိူဝ်ႉၼင်ႇ လၢဝ်တင်းလၢႆ ၼၼ်ႉယူႇ သေႇသေႇဢေႃႈ။-

4တၢၼ်ႇယေႇလႃႉ ဢိူၺ်း၊ မႂ်းဢိုတ်းႁပ်းၵႂၢမ်းၸဝ်ႈ ၸိူဝ်းၼႆႉဝႆႉလႄႈ တွၵ်ႇတၼ်းသိၵ်ႈ ၽိုၼ်လိၵ်ႈၼႆႉဝႆႉ ႁႂ်ႈထၼ်ႈပေႃး တေႃႇထိုင်ႁွတ်ႈ ၶိင်ႇၵႃႇလႃႉတီႈသုတ်းတီႈၵွႆ ၼၼ်ႉတႃႉ။ ၵူၼ်းၼမ်ၼႃႇတၵ်းလူတူၺ်းလိၵ်ႈၼၼ်ႉ ၸေးၸေးၸွတ်ႇၸွတ်ႇလႄႈ ပိင်ႇၺႃႇတၵ်းယႂ်ႇၽႄႈ တူဝ်းတွၼ်းမႃးဢေႃႈ၊ ဝႃႈၼင်ႇၼႆဢေႃႈ။-

5မိူဝ်ႈၼၼ်ႉ ၵဝ် တၢၼ်ႇယေႇလႃႉ ၼႆႉ လူတူၺ်းလႄႈႁၼ်တၢင်ႇၵေႃႉတၢင်ႇပႃး သွင်ပႃး ၸုၵ်းယူႇၵႃႈၼိူဝ်ၽင်ႇၼမ်ႉ ယေႈၽၢႆႇ ယေႈပႃႈဢေႃႈ။-

6ပႃးၼိုင်ႈ တွင်ႈထၢမ်တီႈၵေႃႉဢၼ် ၼုင်ႈပိၵ်ႈၶျေႃးလႄႈ ယူႇၵႃႈၼိူဝ်ၼမ်ႉႁွင်ႈၼၼ်ႉလႄႈဝႃႈ၊ ၸူဝ်ႈဢၼ်လွင်ႈတၢင်းဢၼ်လီဢၢမ်းၸိူဝ်းၼႆႉ ဢမ်ႇပႆႇသဵင်ႈပႆႇမူတ်းၼၼ်ႉၸိုင် တၵ်းႁိုင်ၵႃႈႁိုဝ်လူးၵွၼ်ႇ၊ ဝႃႈၼင်ႇၼႆဢေႃႈ။-

7ၵဝ်ငိၼ်း ၵေႃႉဢၼ်ၼုင်ႈပိၵ်ႈၶျေႃး သေလႄႈ မီးယူႇၵႃႈၼိူဝ်ၼမ်ႉႁွင်ႈၼၼ်ႉ ယုၵ်ႉမိုဝ်းၶွၼ်ၶႂႃ ဢိၵ်ႇတင်း မိုဝ်းၶွၼ်သၢႆႉ ၶိုၼ်ႈၵႃႈၼိူဝ် ၽႃႉၵၢင်ႁၢဝ်သေလႄႈ ဢဝ်ၽြႃးဢၼ် ဢသၢၵ်ႈလိပ်းယူႇၵမ်ႇၽႃႇ သိုပ်ႇသိုပ်ႇတၢမ်းတၢမ်း ၼၼ်ႉ တိူင်ႇဝႃႈလႄႈဝႃႈ၊ တၵ်းပဵၼ်ၸူဝ်ႈၵႃႇလႃႉၼိုင်ႈ၊ ၵႃႇလႃႉတင်းလၢႆ ၵႃႇလႃႉၶိုင်ႈၼိုင်ႈ တဵမ်တဵမ်ဢေႃႈ။ မိူဝ်ႈဢၼ်ဢမူႉ တၢင်းဢၼ် ႁႂ်ႈတၢင်းၵတ်ႉတၢင်းၶၼ် ၶဝ်ၸိူဝ်းဢၼ်မူတ်းၸၢင်ႇ တင်းလၢႆ ပိဝ်သဵၼ်ၵႂႃႇၼၼ်ႉ ယဝ်ႉတူဝ်ႈယဝ်ႉၼၼ်ႉ၊ လွင်ႈတၢင်း ၵူႈၸိူဝ်ႉၵူႈပိူင် ၸိူဝ်းၼႆႉ တၵ်းလႆႈ သဵင်ႈလႆႈမူတ်းဢေႃႈ၊ ဝႃႈၼင်ႇၼႆဢေႃႈ။-

8ၵဝ်ငိၼ်းၵႂၢမ်းၼၼ်ႉလႄႈ ဢမ်ႇႁူႉဢမ်ႇၸႅင်ႈ။ ပိူဝ်ႈၼႆလႄႈ ၵဝ်ၸင်ႇထၢမ်လႄႈဝႃႈ၊ ၸဝ်ႈၵဝ်ၶႃႈတီႈၶႃႈဢိူၺ်း၊ တီႈသဵင်ႈတီႈမူတ်း လွင်ႈတၢင်း ၸိူဝ်းၼႆႉၼႆႉ တၵ်းပဵၼ် ၸိူဝ်ႉၼင်ႇႁိုဝ်တီႈၶႃႈ၊ ဝႃႈၼင်ႇၼႆသေယဝ်ႉ၊-

9ၵေႃႉၼၼ်ႉလၢတ်ႈလႄႈဝႃႈ၊ တၢၼ်ႇယေႇလႃႉ ဢိူၺ်း၊ မႂ်းၵႂႃႇတႃႉ။ ၵႂၢမ်းၸိူဝ်းၼႆႉ မီးတၢင်းဢၼ် ဢိုတ်းႁပ်းဝႆႉလႄႈ တွၵ်ႇတၼ်းသိၵ်ႈဝႆႉ ယူႇတေႃႇထိုင်ႁွတ်ႈ ၶိင်ႇၵႃႇလႃႉ တီႈသုတ်းတီႈၵွႆ ၼၼ်ႉဢေႃႈ။-

10ၵူၼ်းၼမ်ၼႃႇ တၵ်းဢွၼ်ၵၼ် ႁွတ်ႈထိုင် တၢင်းဢၼ် မူတ်းသႂ်ၶၢဝ်ၸၢင်ႇ လႄႈ လႆႈၶၢမ်ႇတၢင်းဢၼ် ၸၢမ်းတူၺ်းဢေႃႈ။ ၶဝ်ၸိူဝ်းဢၼ်ဢမ်ႇတြႃးၼၼ်ႉၸမ်ႉ၊ တၵ်းႁဵတ်းၸွမ်း ဢၼ်ဢမ်ႇတြႃးယူႇဢေႃႈ။ ၶဝ်ၸိူဝ်းဢၼ်ဢမ်ႇတြႃးၼၼ်ႉ ဢမ်ႇလႆႈႁူႉလႆႈၸႅင်ႈ သေၵေႃႉသေၵူၼ်း။ ၶဝ်ၸိူဝ်းဢၼ် မီးပိင်ႇၺႃႇၼၼ်ႉၸမ်ႉ၊ တၵ်းဢွၼ်ၵၼ် ႁူႉၸႅင်ႈဢေႃႈ။-

11ဢဝ်ၵႃႈတီႈ ၶိင်ႇမိူဝ်ႈတၢင်းဢၼ် ပႄႇဝၢတ်ႈ ဢၼ်ႁဵတ်းယူႇ ၵူႈမိုဝ်ႉၵူႈဝၼ်း သေႇသေႇၼၼ်ႉ ပႅတ်ႈၼၼ်ႉ ဢိၵ်ႇတင်း တၢင်းဢၼ် ဢဝ်လွင်ႈတၢင်းဢၼ် လီႁင်ႈဢဵတ်ႇသဵတ်ႇ ဢၼ်ၸၢင်ႈယႃႉယူၵ်ႉၼၼ်ႉ တၢင်ႇဝႆႉၼၼ်ႉၵႂႃႇလႄႈ တၵ်းႁိုင် ႁဵင်ပၢႆ သွင်ပၢၵ်ႇပၢႆၵဝ်ႈသိပ်းဝၼ်းဢေႃႈ။-

12ၵေႃႉဢၼ်ပႂ်ႉထႃႈလႄႈ ၶိုတ်းထိုင် ႁဵင်ပၢႆသၢမ်ပၢၵ်ႇသၢမ်သိပ်းပၢႆႁႃႈဝၼ်းၼၼ်ႉၼၼ်ႉ မီးမင်ႇၵလႃႇဢေႃႈ။-

13မႂ်းၸမ်ႉ၊ ၵႂႃႇတေႃႇထိုင်ႁွတ်ႈ တီႈသုတ်းတီႈၵွႆၼၼ်ႉတႃႉ။ မႂ်းတၵ်းလႆႈယူႇၼိမ်ၼိမ်လီလီဢေႃႈ။ ၼႂ်းတီႈသုတ်းတီႈၵွႆ ၶိင်ႇၵႃႇလႃႉမိုဝ်ႉဝၼ်းၼၼ်ႉ မႂ်းတၵ်းလႆႈလုၵ်ႉၸုၵ်းယူႇ ၵႃႈၼႂ်းပုၼ်ႈမႂ်းတႃႇမႂ်းဢေႃႈ၊ ဝႃႈၼင်ႇၼႆဢေႃႈ။ ၵျၢမ်းဢၼႃႇၵၢတ်ႈတီႉတၢၼ်ႇယေႇလႃႉယဝ်ႉယဝ်ႉဢေႃႈ။

← Chapter 11 Jump to: