Daniel 7

Shan

← Chapter 6 Jump to: Chapter 8 →

1ၼႂ်းပီႊဢၼ် ပေႇလသႃႇၸႃႇ ၶုၼ်ႁေႃၶမ်း ပႃႇပူႉလုၼ်ႇ ၸၢမ်ႇႁၢင်ႈၸၢမ်ႇႁေႃ ပီႊပထမႃႉၼၼ်ႉ တၢၼ်ႇယေႇလႃႉ ၼွၼ်းၽၼ်ႁၼ်လႄႈ ရူႇပႃႇရူင်ႇပေႃႇမႃး ၵႃႈၼႂ်းၵွၵ်းႁူဝ်မၼ်း ၵႃႈၼိူဝ်ၵူႇတီႈၼွၼ်းမၼ်း လႄႈ မၼ်းဢဝ် တၢင်းဢၼ်မၼ်းၼွၼ်းၽၼ်ႁၼ်ၼၼ်ႉ တႅမ်ႈဝႆႉလႄႈ မွၵ်ႇလၢတ်ႈႁူဝ်ႁုပ်ႈမၼ်းဝႆႉဢေႃႈ။-

2တၢၼ်ႇယေႇလႃႉ မွၵ်ႇလၢတ်ႈဝႆႉလႄႈဝႃႈၸမ်ႉ၊ ၵဝ်လူတူၺ်း ၵႃႈၼႂ်းရူႇပႃႇရူင်ႇ ၶိင်ႇၵၢင်ၶိုၼ်းၼၼ်ႉ ၸေးၸေးၸွတ်ႇၸွတ်ႇလႄႈ ႁၼ်လူမ်း သီႇၼႃႈၽႃႉ ၵၢင်ႁၢဝ် ၸိူဝ်းၼၼ်ႉ ၼင်ႇၵၼ်ၵၼ် ၽၢင်ႈထူဝ်းၵၼ်ယူႇ ၵႃႈၼိူဝ်ၼမ်ႉသမ်ႇမုၵ်ႉတြႃႇလူင်ဢေႃႈ။-

3တူဝ်ထိူၼ်ႇႁၢႆႉသီႇတူဝ် ဢၼ်ႁၢင်ႈၽၢင်ၶဝ် ဢမ်ႇမိူၼ်ၵၼ်ၼၼ်ႉ ဢွၼ်ၵၼ် ဢွၵ်ႇသေၵႃႈၼႂ်း ၼမ်ႉသမ်ႇမုၵ်ႉတြႃႇမႃးဢေႃႈ။-

4တူဝ်ထိူၼ်ႇႁၢႆႉ ပထမႃႉၼၼ်ႉ မိူၼ်ၸိူဝ်ႉၼင်ႇ သၢင်ႇသီႈလႄႈ မီးပိၵ်ႇလၢင်းတႃႉၶမ်းသေဢေႃႈ။ ၼႂ်းမိူဝ်ႈဢၼ် ၵဝ်ယင်းတိုၵ်ႉလူတူၺ်းယူႇၼၼ်ႉ၊ မၼ်းလႆႈၶၢမ်ႇတၢင်းဢၼ် ထူၺ်ႈၶူၼ်မၼ်းပႅတ်ႈလႄႈ ယုၵ်ႉယွင်ႈဢဝ်တူဝ်မၼ်းၶိုၼ်ႈသေ ၵႃႈၼိူဝ်လိၼ်မိူင်းယူႇ သေလႄႈ ဢဝ်တိၼ်မၼ်း ၸုၵ်းတင်ႈသိုဝ်ႈဝႆႉယူႇ မိူၼ်ၸိူဝ်ႉၼင်ႇ ၵူၼ်းၼၼ်ႉလႄႈ ဢဝ်ၸႂ်သၽေႃးၵူၼ်း သႂၢင်းသႂ်ႇပၼ်ဢေႃႈ။-

5သမ်ႉမီးတူဝ်ထိူၼ်ႇႁၢႆႉတူဝ်ၼိုင်ႈ ဢၼ်ပဵၼ်တူဝ် တူႉတီႉယႃႉ ဢၼ်မိူၼ်ၸိူဝ်ႉၼင်ႇမီ ၼၼ်ႉလႄႈ တူဝ်ၼၼ်ႉ သၵႅင်းယုၵ်ႉယွင်ႈ တူဝ်မၼ်းယူႇၽၢႆႇၼိုင်ႈဢေႃႈ။ လုပ်ႇသီႈၶၢင်ႈသၢမ်သိၵ်ႈ မီးၵႃႈၼႂ်းသူပ်းမၼ်း ၵႃႈတီႈၵႄႈဝူင်ႈၵၢင်ၶဵဝ်ႈမၼ်း ယူႇလႄႈ ပိူၼ်ႈဢွၼ်ၵၼ် လၢတ်ႈတီႈမၼ်းလႄႈဝႃႈ၊ လုၵ်ႉလႄႈၶူပ်းၵိၼ်ၼိူဝ်ႉၼမ်ၼမ်တႃႉ၊ ဝႃႈၼင်ႇၼႆဢေႃႈ။-

6လႆႈသမ်ႉၵဝ်လူတူၺ်းလႄႈ ႁၼ်တူဝ်ထိူၼ်ႇႁၢႆႉတူဝ်ၼိုင်ႈ ဢၼ်မိူၼ်ၸိူဝ်ႉၼင်ႇ သိူဝ်ၸုမ်ႈလႄႈ မီးပိၵ်ႇၼူၵ်ႉသီႇဢၼ် ၵႃႈၼိူဝ်လင် မၼ်းၼၼ်ႉဢေႃႈ။ တူဝ်ၼၼ်ႉ ပျေႉၸုမ်ႇဝႆႉ တင်းၵွၵ်းႁူဝ်သီႇႁူၺ်ႇ မီးဢၶႂၢင်ႉ ဢၼ်လႆႈဢုပ်ႉပိူင်ႇဢေႃႈ။-

7လိုၼ်းၼၼ်ႉ ၼႂ်းမိူဝ်ႈဢၼ် ၵဝ်သမ်ႉယင်းတိုၵ်ႉလူတူၺ်း ၵႃႈၼႂ်းရူႇပႃႇရူင်ႇ ၶိင်ႇၵၢင်ၶိုၼ်းၼၼ်ႉ ၸေးၸေးၸွတ်ႇၸွတ်ႇယူႇၼၼ်ႉၸိုင်၊ ၵဝ်ႁၼ်တူဝ်ထိူၼ်ႇႁၢႆႉ ၸတုၵ်ႉထႃႉ ဢၼ်လီၵူဝ်လီႁႄ ဢၼ်ပႃးတၼ်းၶူဝ်း၊ ဢၼ်မီးႁႅင်းယႂ်ႇၼႃႇလူင်လၢင် ၼၼ်ႉဢေႃႈ။ မၼ်းၼၼ်ႉ မီးၶဵဝ်ႈလဵၵ်း ဢၼ်ယႂ်ႇၼႃႇလႄႈ ၶူပ်းၵိၼ်သိၵ်ႇႁၵ်း ယႃႉပႅတ်ႈ သေလႄႈ ဢဝ်တိၼ်ယဵပ်ႇၼူတ်ႈ လွင်ႈတၢင်း ဢၼ်ၵိုတ်းဢၼ်ၵျၢၼ်ႇ ၸိူဝ်းၼၼ်ႉ ပႅတ်ႈဢေႃႈ။ မၼ်းၼၼ်ႉ လၢၵ်ႇပိူင်ႈသေတူဝ်ထိူၼ်ႇ ဢွၼ်တၢင်း ၵႃႈမီးၸိူဝ်းၼၼ်ႉလႄႈ မီးၶဝ်လႅမ်သိပ်းလႅမ်ႈဢေႃႈ။-

8ၼႂ်းမိူဝ်ႈဢၼ် ၵဝ်ယင်းတိုၵ်ႉလူတူၺ်း ၶဝ်လႅမ်ၸိူဝ်းၼၼ်ႉ ယူႇၼၼ်ႉၸိုင်၊ ၵႃႈၼႂ်းၶိုင်ႈၵၢင်ၶဝ်ၼၼ်ႉ ၶဝ်လႅမ်ဢွၼ်ႇလႅမ်ႈၼိုင်ႈ ဢွၵ်ႇမႃးဢေႃႈ။ ၶဝ်လႅမ်ဢၼ်မိူဝ်ႈဢွၼ်တၢင်း သၢမ်လႅမ်ႈၼၼ်ႉ လႆႈၶၢမ်ႇတၢင်းဢၼ်ထွတ်ႇထူၺ်ႈ ဢွၵ်ႇပႅတ်ႈ လူၺ်ႈၵၼ်တင်း ႁၢၵ်ႈၶဝ် ၵႃႈတီႈၽၢႆႇၼႃႈၶဝ်လႅမ် ၼၼ်ႉဢေႃႈ။ ၶဝ်လႅမ်ဢွၼ်ႇၼၼ်ႉ ပျေႉၸုမ်ႇဝႆႉတင်းမၢၵ်ႇတႃ ၸိူဝ်ႉၼင်ႇမၢၵ်ႇတႃၵူၼ်း ဢိၵ်ႇတင်း သူပ်းဢၼ်ၸၢင်ႈလၢတ်ႈၵႂၢမ်း ဢၼ်ယႂ်ႇၼႃႇဢေႃႈ။

9မိူဝ်ႈၼၼ်ႉ ၼႂ်းမိူဝ်ႈဢၼ် ၵဝ်ယင်းတိုၵ်ႉလူတူၺ်းယူႇ ၼၼ်ႉၸိုင်၊ ရႃႇၸႃႉပလၢင်ႇ တင်းလၢႆ မီးတၢင်းဢၼ်တႄႇဝႆႉယူႇလႄႈ ၸဝ်ႈဢၼ်ပဵၼ်ၸဵမ်မိုဝ်ႉဝၼ်း မိူဝ်ႈၵွၼ်ႇမိူဝ်ႈမိုၼ်ႉၼၼ်ႉ ပႃးၼိုင်ႈ ၼင်ႈယူႇဢေႃႈ။ ၶူဝ်းၼုင်ႈမၼ်းၸဝ်ႈၼၼ်ႉ ၽိူၵ်ႇၶၢဝ်ႇမိူၼ်ၸိူဝ်ႉၼင်ႇ မူၺ်ႁႃႇလႄႈ ၶူၼ်ႁူဝ်မၼ်းၸဝ်ႈၼၼ်ႉ မိူၼ်ၸိူဝ်ႉၼင်ႇ ၶူၼ်သူဝ်းဢၼ်ၽိူၵ်ႇ ဢၼ်ၶၢဝ်ၼၼ်ႉဢေႃႈ။ ပလၢင်ႇမၼ်းၸဝ်ႈၼၼ်ႉ ပဵၼ်ပဵဝ်ၽႆးဝႆႉလႄႈ မၢၵ်ႇလေႃႉမၼ်း ၸိူဝ်းၼၼ်ႉ ပဵၼ်ၸၢၵ်ႈၽႆးဢေႃႈ။-

10သၢႆဢရွင်ႇၽႆး ၽုတ်းဢွၵ်ႇ မၢပ်ႈဢွၵ်ႇသေၵႃႈတီႈ ၼႃႈမၼ်းၸဝ်ႈၼၼ်ႉမႃးဢေႃႈ။ ၶဝ်ၸိူဝ်းဢၼ်ၼမ်ၼႃႇလူင်လၢင် ပဵၼ်မိုၼ်ႇပဵၼ်သႅၼ် ၼၼ်ႉ ဢွၼ်ၵၼ်ၵိုတ်ႉႁၢပ်ႇဢမူႉမၼ်းၸဝ်ႈလႄႈ ၵူၼ်းၵုၵ်ႉတေႇသၢင်ႇၶျေႇဢမ်ႇၵႃး ဢွၼ်ၵၼ် ၸုၵ်းၶႃးၸႃးယူႇ ၵႃႈတီႈၽၢႆႇၼႃႈၸဝ်ႈဢေႃႈ။ တၢင်းဢၼ်ၸီႇယၢင်ႇတြႃး မီးတၢင်းဢၼ်မႄးပွင် မႄးႁႅၼ်းဝႆႉလႄႈ ၽိုၼ်လိၵ်ႈ တင်းလၢႆ မီးတၢင်းဢၼ် ၽုၺ်ႇပိုတ်ႇဝႆႉဢေႃႈ။-

11မိူဝ်ႈၼၼ်ႉ ၼႂ်းမိူဝ်ႈဢၼ် ၵဝ်ယင်းတိုၵ်ႉလူတူၺ်း ၵွပ်ႈပိူဝ်ႈ သဵင်ယႂ်ႇသဵင်လူင် ဢၼ်ၶဝ်လႅမ်ဢွၼ်ႇၼၼ်ႉ လၢတ်ႈၼၼ်ႉယူႇ ၼၼ်ႉၸိုင်၊ ၵဝ်တူၺ်းယူႇတေႃႇထိုင်ႁွတ်ႈ တူဝ်ထိူၼ်ႇႁၢႆႉၼၼ်ႉ လႆႈၶၢမ်ႇတၢင်းဢၼ် ဢဝ်တၢႆပႅတ်ႈလႄႈ တူဝ်မၼ်းလႆႈၶၢမ်ႇတၢင်းဢၼ် ယႃႉပႅတ်ႈသေလႄႈ ဢဝ်တုတ်ႇၽႆးပႅတ်ႈ ၼၼ်ႉဢေႃႈ။-

12တူဝ်ထိူၼ်ႇႁၢႆႉ တင်းတူဝ် ၸိူဝ်းၼၼ်ႉၸမ်ႉ၊ ပိၵ်ႉသမ်ႉ ဢၶႂၢင်ႉတၼ်းၶူဝ်း ဢၼ်လႆႈဢုပ်ႉပိူင်ႇၼၼ်ႉ လႆႈၶၢမ်ႇတၢင်းဢၼ် သိမ်းဢဝ်ယဝ်ႉသေၵေႃႈ ဢသၢၵ်ႈၶဝ် ယင်းလိပ်းယူႇထႅင်ႈ ၶိင်ႇၼိုင်ႈၸူဝ်ႈၼိုင်ႈ ဢေႃႈ။-

13ၼႂ်းမိူဝ်ႈဢၼ် ၵဝ်သမ်ႉ ယင်းတိုၵ်ႉလူတူၺ်း ၵႃႈၼႂ်းရူႇပႃႇရူင်ႇ ၶိင်ႇၵၢင်ၶိုၼ်းၼၼ်ႉ ယူႇၼၼ်ႉၸိုင်၊ ၵေႃႉၼိုင်ႈ ဢၼ်မိူၼ်ၸိူဝ်ႉၼင်ႇ လုၵ်ႈၵူၼ်းၼၼ်ႉ ၶီႇၽႃႈၽူၼ်ယူႇသေလႄႈ ႁွတ်ႈမႃးၵႃႈတီႈၸဝ်ႈဢၼ် ပဵၼ်ၸႃႉၸဵမ်မိုဝ်ႉဝၼ်းမိူဝ်ႈၵွၼ်ႇမိူဝ်ႈမိုၼ်ႉ ၼၼ်ႉဢေႃႈ။ ၵေႃႉၼၼ်ႉၸိုင်၊ ၶဝ်ဢွၼ်ၵၼ် ဢဝ်သႂၢင်းၶဝ်ႈ ၵႃႈတီႈႁိမ်းၽၢႆႇၼႃႈ မၼ်းၸဝ်ႈဢေႃႈ။-

14ၵေႃႉဢၼ် လႆႈဢႃႇၼႃႇၸၢၵ်ႈတၼ်းၶူဝ်း ဢႃႇၼူႉၽေႃႇ ဢိၵ်ႇတင်း သိုင်ႇၸိုင်ႈဝၢၼ်ႈမိူင်း ႁႂ်ႈၵူၼ်းၵူႈၸိူဝ်ႉၵူႈမဵဝ်း ဢၼ်ယူႇၵူႈတီႈၵူႈလႅၼ်လႄႈ လၢတ်ႈၵႂၢမ်းၽႃႇသႃႇ ၶေႃၶေႃ ႁင်းၽႂ်ႁင်းမၼ်း တင်းသဵင်ႈတင်းလူင် လႆႈၶၢမ်ႇတၢင်းၸႂ်ႉ တၢင်းသွႆမၼ်းဢေႃႈ။ ဢႃႇၼႃႇၸၢၵ်ႈမၼ်းၸဝ်ႈၼၼ်ႉ ပဵၼ်ဢႃႇၼႃႇၸၢၵ်ႈ ၼိၵ်ႈၸႃႉ ထႃႇဝရႃႉ ဢၼ်ဢမ်ႇလပ်ႉဢမ်ႇႁၢႆလႆႈၼၼ်ႉ ဢေႃႈ။ သိုင်ႇၸိုင်ႈဝၢၼ်ႈမိူင်း မၼ်းၸဝ်ႈၼၼ်ႉ ဢမ်ႇႁွတ်ႈထိုင် တၢင်းဢၼ်လူႉ ဢၼ်လႅဝ်လႆႈ။

15ၵဝ် တၢၼ်ႇယေႇလႃႉ ၼႆႉ မီးႁူဝ်ၸႂ် ဢၼ်မႆႈဢၼ်ႁွၼ်ႉယူႇ ၵႃႈၼႂ်းတူဝ်ၶၼ်ႇထႃႇၵဝ်လႄႈ ရူႇပႃႇရူင်ႇ ၵႃႈၼႂ်းၵွၵ်းႁူဝ်ၵဝ် ၸိူဝ်းၼၼ်ႉ ႁႂ်ႈၵဝ်မႆႈၸႂ် ၶီၸႂ်ဢေႃႈ။-

16ၵဝ်ၵႂႃႇၸူး ၵႃႈတီႈၵေႃႉဢၼ် ၸုၵ်းယူႇ ၵႃႈတီႈႁိမ်းၼၼ်ႉလႄႈ တွင်ႈထၢမ် တီႈၸိုဝ်ႈတီႈၸႂ်ႈမၼ်း လူၺ်ႈလွင်ႈ ၵႃႈမီးၸိူဝ်းၼႆႉၼၼ်ႉ တီႈမၼ်းၼၼ်ႉလႄႈ မၼ်းၼၼ်ႉ ၶိုၼ်းဢိူဝ်လႄႈ ႁႂ်ႈၵဝ်ႁူႉ ဢၼၢၵ်ႈဢထိၵ်ႈပႄႇ လွင်ႈတၢင်း ၸိူဝ်းၼၼ်ႉဢေႃႈ။-

17ဢၼ်ၵေႃႉၼၼ်ႉဝႃႈၸမ်ႉ၊ တူဝ်ထိူၼ်ႇႁၢႆႉ သီႇတူဝ်ၼႆႉ ပဵၼ်ၶုၼ်ႁေႃၶမ်း သီႇပႃး ဢၼ်တၵ်းပေႃႇမႃး ၵႃႈၼိူဝ်လိၼ်မိူင်းဢေႃႈ။-

18ၼႂ်းဝႃႈၼၼ်သေၵေႃႈ ၶဝ်ၸိူဝ်းဢၼ်မူတ်းၸၢင်ႇ ၽြႃးဢၼ်သုင်ၼႃႇ သေပိူၼ်ႈၼၼ်ႉၼၼ်ႉ တၵ်းလႆႈၶၢမ်ႇဢဝ် သိုင်ႇၸိုင်ႈဝၢၼ်ႈမိူင်းလႄႈ ၸၢမ်ႇၸႃး သိုင်ႇၸိုင်ႈဝၢၼ်ႈမိူင်းၼၼ်ႉ ၵမ်ႇၽႃႇ သိုပ်ႇသိုပ်ႇတၢမ်းတၢမ်း တႃႇသေႇ ဢမ်ႇထၢတ်ႇဢေႃႈ၊ ဝႃႈၼင်ႇၼႆဢေႃႈ။-

19မိူဝ်ႈၼၼ်ႉ ၵဝ်မီးဢလူဝ်ႇၶႂ်ႈႁူႉ တီႈၸိုဝ်ႈတီႈၸႂ်ႈမၼ်း လူၺ်ႈလွင်ႈတူဝ်ထိူၼ်ႇႁၢႆႉ ၸတုၵ်ႉထႃႉ ဢၼ်လၢၵ်ႇပိူင်ႈသေ တူဝ်ထိူၼ်ႇႁၢႆႉ ဢွၼ်တၢင်းၵႃႈမီး ၸိူဝ်းၼၼ်ႉလႄႈ ပဵၼ်ဢၼ်လီၵူဝ်လီႁႄ ၼႃႇလူင်လၢင်ယူႇ သေလႄႈ ပျေႉၸုမ်ႇဝႆႉတင်း ၶဵဝ်ႈလဵၵ်း ဢိၵ်ႇတင်း ၼဵပ်ႉတိၼ်ၼဵပ်ႉမိုဝ်းတွင်းလိူင်၊ ဢၼ်ၸၢင်ႈၶူပ်းၵိၼ် သိၵ်ႇႁၵ်းယႃႉပႅတ်ႈလႄႈ ဢဝ်တိၼ်ယဵပ်ႇၼူတ်ႈ လွင်ႈတၢင်းဢၼ်ၵိုတ်းဢၼ်ၵျၢၼ်ႇ ၸိူဝ်းၼၼ်ႉ ပႅတ်ႈၼၼ်ႉ၊-

20ဢိၵ်ႇတင်း လူၺ်ႈလွင်ႈၶဝ်လႅမ် သိပ်းလႅမ်ႈ ၵႃႈတီႈႁူဝ်မၼ်းၼၼ်ႉ တင်းၶဝ်လႅမ်ဢၼ်ၼိုင်ႈ ဢၼ်ဢွၵ်ႇမႃး ၵမ်းလိုၼ်းလႄႈ ၶဝ်လႅမ်ဢၼ်ဢွၼ်တၢင်း သၢမ်လႅမ်ႈၼၼ်ႉ ဢွၼ်ၵၼ် သွၼ်ႇတူၵ်းၵႃႈတီႈ ၽၢႆႇၼႃႈမၼ်းၼၼ်ႉ ဢၼ်ပျေႉၸုမ်ႇဝႆႉတင်း မၢၵ်ႇတႃ တင်းသူပ်း ဢၼ်ၸၢင်ႈလၢတ်ႈၵႂၢမ်း ဢၼ်ယႂ်ႇၼႃႇလႄႈ မီးႁၢင်ႈၽၢင်ၼႃႈ ဢၼ်လီၵူဝ်လီႁႄ လိူဝ်တွၼ်းသေ ၵေႃႉသေႈမၼ်း ၸိူဝ်းၼၼ်ႉဢေႃႈ။-

21ၼႂ်းမိူဝ်ႈဢၼ် ၵဝ်ယင်းတိုၵ်ႉလူတူၺ်းယူႇ ၼၼ်ႉၸိုင်၊ ၶဝ်လႅမ်ၼၼ်ႉ တိုၵ်းတေႃး ၶဝ်ၸိူဝ်းဢၼ်မူတ်းၸၢင်ႇ ၼၼ်ႉလႄႈ ပႄႉၼႅင်ႇၶဝ်-

22တေႃႇထိုင်ႁွတ်ႈ ၸဝ်ႈဢၼ်ပဵၼ် ၸႃႉၸဵမ်မိုဝ်ႉဝၼ်း မိူဝ်ႈၵွၼ်ႇမိူဝ်ႈမိုၼ်ႉၼၼ်ႉ ႁွတ်ႈမႃးလႄႈ ပၼ်ဢၶႂၢင်ႉဢၼ်လႆႈၸီႇယၢင်ႇ တီႈၶဝ်ၸိူဝ်းဢၼ် မူတ်းၸၢင်ႇ ၽြႃးဢၼ်သုင်ၼႃႇသေပိူၼ်ႈၼၼ်ႉ ၸိူဝ်းၼၼ်ႉလႄႈ၊ ၶိင်ႇၵႃႇလႃႉ ဢၼ်မၵ်းၶိၼ်းဝႆႉၼၼ်ႉ ႁွတ်ႈထိုင်သေယဝ်ႉ၊ ၶဝ်ၸိူဝ်းဢၼ်မူတ်းၸၢင်ႇၼၼ်ႉ သိမ်းဢဝ်ၵိၼ် ဝၢၼ်ႈမိူင်းဢေႃႈ။-

23ၵေႃႉၼၼ်ႉ သမ်ႉလၢတ်ႈလႄႈဝႃႈ၊ တူဝ်ထိူၼ်ႇႁၢႆႉ ၸတုၵ်ႉထႃႉၼၼ်ႉ ပဵၼ်သိုင်ႇၸိုင်ႈဝၢၼ်ႈမိူင်း ၸတုၵ်ႉထႃႉ ၵႃႈၼိူဝ်လိၼ်မိူင်းဢၼ် လၢၵ်ႇပိူင်ႈသေ သိုင်ႇၸိုင်ႈဝၢၼ်ႈမိူင်း ၵႃႈမီးဢေႃႈ။ တူဝ်ၼၼ်ႉတၵ်းၶူပ်းၵိၼ် သိၵ်ႇၶၢတ်ႇ ယဵပ်ႇၼူတ်ႈ လိၼ်မိူင်း ၵႃႈမီးပႅတ်ႈဢေႃႈ။-

24ၶဝ်လႅမ် သိပ်းလႅမ်ႈ ဢၼ်ဢွၵ်ႇမႃးသေၵႃႈတီႈ သိုင်ႇၸိုင်ႈဝၢၼ်ႈမိူင်းၼၼ်ႉ ၸိူဝ်းၼၼ်ႉၸိုင် ပဵၼ်ၶုၼ်လူင်သိပ်းပႃး ဢၼ်တၵ်းပေႃႇမႃးဢေႃႈ။ လိုၼ်းၶဝ်ၼၼ်ႉ ၶုၼ်လူင်တၢင်ႇပႃး တၵ်းပေႃႇမႃးဢေႃႈ။ မၼ်းတၵ်းလၢၵ်ႇပိူင်ႈသေ ၶုၼ်လူင်ဢွၼ်တၢင်း ၸိူဝ်းၼၼ်ႉလႄႈ ၶျႃးၶုၼ်လူင်သၢမ်ပႃး တူၵ်းတီႈတႅမ်ႇဢေႃႈ။-

25မၼ်းတၵ်း ႁဵတ်းၶတ်းၵၼ် တင်းၽြႃးဢၼ်သုင်ၼႃႇသေပိူၼ်ႈ ၼၼ်ႉလႄႈ လၢတ်ႈၵႂၢမ်း ဢၼ်ယႂ်ႇၼႃႇဢေႃႈ။ မၼ်းတၵ်း ၼိၵ်ႈၸၢၵ်ႈငႅၼ်းသႄး ၶဝ်ၸိူဝ်းဢၼ်မူတ်းၸၢင်ႇ ၽြႃးဢၼ်သုင်ၼႃႇသေပိူၼ်ႈၼၼ်ႉ ၸိူဝ်းၼၼ်ႉဢေႃႈ။ မၼ်းတၵ်းၵျၢမ်ႇပွင် ႁႂ်ႈၶိင်ႇၵႃႇလႃႉ ဢိၵ်ႇတင်း ပိင်းၺၢပ်ႈတြႃး ၶၢႆႉပုတ်ႈၵႂႃႇလႄႈ ၶဝ်ၼၼ်ႉ တၵ်းလႆႈ ၶၢမ်ႇတၢင်းဢၼ် ဢဝ်ဢၢပ်ႈပၼ် ၵႃႈၼႂ်းမိုဝ်းမၼ်းၸူဝ်ႈ ၵႃႇလႃႉၼိုင်ႈ၊ သွင်ၵႃႇလႃႉ၊ ၵႃႇလႃႉၶိုင်ႈၼိုင်ႈ တဵမ်တဵမ်ဢေႃႈ။-

26လိုၼ်းၼၼ်ႉ တၵ်းပဵၼ် တၢင်းဢၼ်ၸီႇယၢင်ႇတြႃးလႄႈ မၼ်းတၵ်းလႆႈၶၢမ်ႇတၢင်းဢၼ် ၼုၵ်ႈထွၼ် ဢႃႇၼႃႇၸၢၵ်ႈမၼ်းႁႂ်ႈလႆႈ ပႄႇၽဵဝ်ႈယႃႉပႅတ်ႈ မူတ်းမူတ်းသဵင်ႈသဵင်ႈဢေႃႈ။-

27သိုင်ႇၸိုင်ႈဝၢၼ်ႈမိူင်း ဢိၵ်ႇတင်း ဢႃႇၼႃႇၸၢၵ်ႈ တင်းမုၼ်တၼ်းၶူဝ်း သိုင်ႇၸိုင်ႈဝၢၼ်ႈမိူင်းၵႃႈဢၼ်မီး ၵႃႈတႂ်ႈၽႃႉၵၢင်ႁၢဝ် တင်းလၢႆ ႁွတ်ႈထိုင်ၵႃႈၼႂ်းမိုဝ်း ၵူၼ်းမဵဝ်းဢၼ်မူတ်းၸၢင်ႇ ၽြႃးဢၼ်သုင်ၼႃႇသေပိူၼ်ႈၼၼ်ႉ ၸိူဝ်းၼၼ်ႉဢေႃႈ။ သိုင်ႇၸိုင်ႈဝၢၼ်ႈမိူင်း မၼ်းၸဝ်ႈၼၼ်ႉ ပဵၼ်သိုင်ႇၸိုင်ႈဝၢၼ်ႈမိူင်း ထႃႇဝရႃႉလႄႈ ဢႃႇၼႃႇ တင်းသဵင်ႈတင်းလူင် တၵ်းဢွၼ်ၵၼ် ၶၢမ်ႇတၢင်းၸႂ်ႉတၢင်းသွႆမၼ်းၸဝ်ႈလႄႈ ထွမ်ႇဢဝ်ၵႂၢမ်းမၼ်းၸဝ်ႈဢေႃႈ။-

28ဢၼ်ၼႆႉၸမ်ႉ၊ ပဵၼ်ဢၼၢၵ်ႈ ဢထိၵ်ႈပႄႇမၼ်းယဝ်ႉ၊ ဝႃႈၼင်ႇၼႆဢေႃႈ။ ၵဝ် တၢၼ်ႇယေႇလႃႉ ၼႆႉႁွတ်ႈထိုင် တၢင်းဢၼ်မႆႈၸႂ် ႁွၼ်ႉၸႂ်လႄႈ မီးတၢင်းဢၼ် ၼႃႈႁဵဝ်ႇၸွပ်ႈယူႇဢေႃႈ။ ၼႂ်းဝႃႈၼၼ်သေၵေႃႈ ၵဝ်ဢဝ်လွင်ႈတၢင်းၼၼ်ႉ သိမ်းသိူင်ႇဝႆႉ ၵႃႈၼႂ်းႁူဝ်ၸႂ် ၵဝ်ဢေႃႈ။

← Chapter 6 Jump to: Chapter 8 →