Daniel 8

Shan

← Chapter 7 Jump to: Chapter 9 →

1ၼႂ်းပီႊဢၼ် ၶုၼ်လူင် ပေႇလသႃႇၸႃႇ ၸၢမ်ႇႁၢင်ႈၸၢမ်ႇႁေႃ သၢမ်ပီႊၼၼ်ႉ ပျႃႇတိၵ်ႈ ရူႇပႃႇရူင်ႇ ပေႃႇမႃး တီႈၵဝ် တၢၼ်ႇယေႇလႃႉ ၼႆႉ လိုၼ်းသေပျႃႇတိၵ်ႈရူႇပႃႇရူင်ႇ ဢၼ်မိူဝ်ႈၵႆႈၼၼ်ႉထႅင်ႈဢေႃႈ။-

2ပျႃႇတိၵ်ႈရူႇပႃႇရူင်ႇ ဢၼ်ၵဝ်ႁၼ်ၸမ်ႉ၊ မိူဝ်ႈဢၼ် ၵဝ်ႁၼ်ၼၼ်ႉ ၵဝ်မီးယူႇၵႃႈၼႂ်းႁေႃၶမ်း သူႉသၼ်ႇ ဢၼ်မီးၵႃႈၼႂ်းဢိူင်ႇ ၼႂ်းၵျၢၵ်ႈ ဢေႇလမ်ႇ ယူႇၼၼ်ႉဢေႃႈ။ ၵဝ်ႁၼ်ၼႂ်းရူႇပႃႇရူင်ႇၵႃႈတီႈႁိမ်း ၼမ်ႉႁွင်ႈ ဢူႉလေး ဢေႃႈ။-

3မိူဝ်ႈဢၼ် ၵဝ်ဢဝ်တႃၵဝ်ႁႅၼ်တူၺ်းလႄႈ ႁၼ်ၼၼ်ႉ သူဝ်းပေႃႈ ဢၼ်မီးၶဝ်လႅမ် သွင်လႅမ်ႈၼၼ်ႉ တူဝ်ၼိုင်ႈၸုၵ်းယူႇ ၵႃႈတီႈၽၢႆႇၼိုင်ႈၼမ်ႉႁွင်ႈဢေႃႈ။ ၶဝ်လႅမ်သွင်လႅမ်ႈၼၼ်ႉ ပဵၼ်ဢၼ်ယၢဝ်းလႄႈ လႅမ်ႈၼိုင်ႈ ယဵင်ႈၶႅၼ်းယၢဝ်းၼႃႇသေ လႅမ်ႈၼိုင်ႈဢေႃႈ။ ၶဝ်လႅမ်ဢၼ် ယဵင်ႈၶႅၼ်းယၢဝ်းၼၼ်ႉ ဢွၵ်ႇမႃးၵမ်းလိုၼ်းဢေႃႈ။-

4ၵဝ်ႁၼ်သူဝ်းပေႃႈၼၼ်ႉ ပတ်ႉတေႃး ဝၼ်းတူၵ်း၊ တၢင်းႁွင်ႇ၊ တၢင်းၸၢၼ်း၊ သၢမ်ၼႃႈလႄႈ တရိၵ်ႈသၢၼ်ႇ ဢမ်ႇၸုၵ်းၶၢမ်ႇယူႇ ၵႃႈတီႈၽၢႆႇၼႃႈမၼ်းလႆႈ သေတူဝ်။ ၽူႈလႂ်ဢမ်ႇၵႄႇသႄႇၼုၵ်ႈဢဝ် ဢွၵ်ႇသေၵႃႈၼႂ်း မိုဝ်းမၼ်းလႆႈသေၵေႃႉသေၵူၼ်းလႄႈ မၼ်းၼၼ်ႉ ႁဵတ်းၸွမ်းလူၺ်ႈ ဢလူဝ်ႇမၼ်းယူႇသေလႄႈ ယုၵ်ႉယွင်ႈတူဝ်မၼ်း ၼႃႇလူင်လၢင်ဢေႃႈ။-

5ၼႂ်းမိူဝ်ႈဢၼ် ၵဝ်ယင်းတိုၵ်ႉ ၶႆႈၸႂ်ဝူၼ်ႉၸႂ်လူၺ်ႈလွင်ႈၼၼ်ႉယူႇ ၼၼ်ႉၸိုင်၊ ပႄႉပေႃႈတူဝ်ၼိုင်ႈ လုၵ်ႈၵႃႈတီႈ ၽၢႆႇဝၼ်းတူၵ်းမႃးလႄႈ ယင်းဢမ်ႇယဵပ်ႇလိၼ်တိူဝ်ႉလိၼ်ၶၢမ်ႈ ၼႃႈလိၼ်မိူင်းတင်းၼႃႈမႃးဢေႃႈ။-

6သူဝ်းပေႃႈၼၼ်ႉ မီးၶဝ်လႅမ် ဢၼ်လၢၵ်ႇလၢႆးၵႃႈၼႂ်းၵႄႈဝူင်ႈၵၢင် မၢၵ်ႇတႃမၼ်းဢေႃႈ။ မၼ်းသုတ်ႉၸပ်းသုတ်ႉၸူး သူဝ်းပေႃႈ ဢၼ်မီး ၶဝ်လႅမ်သွင်လႅမ်ႈလႄႈ ၵဝ်ႁၼ်ၸုၵ်းယူႇၵႃႈတီႈ ၽၢႆႇၼိုင်ႈတင်းၼမ်ႉႁွင်ႈ ၼၼ်ႉလႄႈ ဢဝ်တင်းႁႅင်း ဢၼ်ယႂ်ႇၼႃႇလူင်လၢင် ၶုၼ်ႇလႅၼ်ၸူး ၵႃႈတီႈမၼ်းၼၼ်ႉဢေႃႈ။-

7ၵဝ်ႁၼ်မၼ်း ႁွတ်ႈထိုင်ၵႃႈတီႈႁိမ်းသူဝ်းပေႃႈ ၼၼ်ႉလႄႈ မၼ်းပႃးတၢင်းၸႂ်မႆႈၶႆႈၸႃႉ ဢၼ်ႁႅင်းယႂ်ႇၼႃႇလူင်လၢင် တီႈမၼ်းၼၼ်ႉ သေလႄႈ ပတ်ႉတေႃးသႂ်ႇသူဝ်းပေႃႈ ၼၼ်ႉလႄႈ ႁၵ်းပုတ်းၶဝ်လႅမ်မၼ်းၼၼ်ႉ သွင်လႅမ်ႈၼၼ်ႉပႅတ်ႈဢေႃႈ။ ၵွပ်ႈပိူဝ်ႈ ဢၼ်သူဝ်းပေႃႈၼၼ်ႉ ဢမ်ႇမီးႁႅင်းတၼ်းၶူဝ်း ဢၼ်ၸုၵ်းၶၢမ်ႇၵႃႈတီႈ ၽၢႆႇၼႃႈမၼ်းလႆႈလႄႈ၊ မၼ်းဢဝ်မၼ်းၼၼ်ႉ လူမ်ႉၵႃႈၼိူဝ်လိၼ်သေလႄႈ ယဵပ်ႇယမ်ႈ ဢေႃႈ။ ၽူႈလႂ် ဢမ်ႇၵႄႇသႄႇ ၼုၵ်ႈဢဝ် သူဝ်းပေႃႈၼၼ်ႉ ဢွၵ်ႇသေ ၵႃႈၼႂ်းမိုဝ်းမၼ်းလႆႈ။-

8ပိူဝ်ႈၼႆလႄႈ ပႄႉပေႃႈၼၼ်ႉ ယုၵ်ႉယွင်ႈတူဝ်မၼ်းၼႃႇလူင်လၢင်ဢေႃႈ။ မိူဝ်ႈဢၼ် မၼ်းႁႅင်းယႂ်ႇၼႃႇယဝ်ႉၼၼ်ႉ၊ ၶဝ်လႅမ်လူင်မၼ်း လႆႈၶၢမ်ႇတၢင်းဢၼ် ႁၵ်းပုတ်းပႅတ်ႈဢေႃႈ။ ၵႃႈတီႈႁွႆးၶဝ်လႅမ်ၼၼ်ႉ၊ ၶဝ်လႅမ်ဢၼ်လၢၵ်ႇလၢႆး သီႇလႅမ်ႈဢွၵ်ႇမႃးလႄႈ ဝၢႆႇၼႃႈၸူး သီႇၼႃႈၽႃႉ ၵၢင်ႁၢဝ်ယူႇဢေႃႈ။-

9ၵႃႈၼႂ်းၶဝ်ၼၼ်ႉ တီႈၶဝ်လႅမ်လႅမ်ႈၼိုင်ႈ သမ်ႉဢွၵ်ႇမႃးထႅင်ႈၶဝ်လႅမ် လႅမ်ႈၼိုင်ႈလႄႈ ႁွတ်ႈထိုင်တၢင်းဢၼ်ယႂ်ႇမႃးၼႃႇလူင်လၢင် သေလႄႈ ဝၢႆႇၼႃႈၵႂႃႇ ၽၢႆႇတၢင်းၸၢၼ်း၊ ၽၢႆႇဝၼ်းဢွၵ်ႇဢိၵ်ႇတင်း မိူင်းဢၼ်သႃႇယႃႇလီငၢမ်းၼၼ်ႉ ယူႇဢေႃႈ။-

10မၼ်းယႂ်ႇမႃးတေႃႇထိုင်ႁွတ်ႈ ပူဝ်ႇပႃႇၵၢင်ႁၢဝ်လႄႈ ဢဝ်ပူဝ်ႇပႃႇၼၼ်ႉ ၵမ်ႈၽွင်ႈ လၢဝ်ၵမ်ႈၽွင်ႈ ၶျႃးတူၵ်းၵႃႈၼိူဝ်လိၼ် သေလႄႈ ယဵပ်ႇယမ်ႈဢေႃႈ။-

11ထၢၼ်ႇၼၼ်ႉၵူၺ်းဢမ်ႇၵႃး မၼ်းႁဵတ်းတၢင်းဢၼ်ပူၵ်းပႅၼ် တေႃႇထိုင်ႁွတ်ႈၸဝ်ႈပူဝ်ႇပႃႇၼၼ်ႉ ယူႇသေလႄႈ ပႄႇပႅတ်ႈဝၢတ်ႈ ဢၼ် ႁဵတ်းယူႇၵူႈမိုဝ်ႉၵူႈဝၼ်း သေႇသေႇၼၼ်ႉ သေလႄႈ ၶျႃးထႃႇၼႃႉတီႈမူတ်းၸၢင်ႇၸဝ်ႈ တူၵ်းတီႈတႅမ်ႇဢေႃႈ။-

12ၵွပ်ႈပိူဝ်ႈ ဢၼ်ဢပႅတ်ႈၼမ်လႄႈ မၼ်းဢဝ်ပူဝ်ႇပႃႇၶၢၼ်းဝႆႉ ၵႃႈၼိူဝ်ဝၢတ်ႈဢၼ်ႁဵတ်းယူႇ ၵူႈမိုဝ်ႉၵူႈဝၼ်း သေႇသေႇ ၼၼ်ႉလႄႈ ပူဝ်ႇပႃႇၼၼ်ႉ ဢဝ်သမ်ႇမႃႇတြႃး ၶျႃးတူၵ်းၵႃႈတီႈလိၼ်ဢေႃႈ။ ႁဵတ်းၸွမ်းဢလူဝ်ႇမၼ်းလႄႈ ႁွတ်ႈထိုင်တၢင်းဢၼ် လႆႈလီလႆႈပဵၼ်ဢေႃႈ။-

13မိူဝ်ႈၼၼ်ႉ ၵဝ်ငိၼ်းသဵင် ၵေႃႉဢၼ်မူတ်းၸၢင်ႇပႃးၼိုင်ႈ လၢတ်ႈၵႂၢမ်းဢေႃႈ။ ၵေႃႉဢၼ်မူတ်းၸၢင်ႇပႃးၼိုင်ႈ ႁွင်ႉသႅၼ်ႇၸူး တီႈၵေႃႉဢၼ် လၢတ်ႈမိူဝ်ႈၵႆႈၼၼ်ႉ သေလႄႈ ထၢမ်လႄႈဝႃႈ၊ ပျႃႇတိၵ်ႈရူႇပႃႇရူင်ႇ ဢၼ်ၸၢပ်ႈသႅင်ႇၵၼ်တင်း ဝၢတ်ႈဢၼ်ႁဵတ်းယူႇ ၵူႈမိုဝ်ႉၵူႈဝၼ်းသေႇသေႇ ဢိၵ်ႇတင်း ၵေႃႉဢၼ်ႁၢႆႉမိူၵ်ႈ ဢၼ်တၵ်းလႆႈၶၢမ်ႇတၢင်းဢၼ် ယႃႉၽဵဝ်ႈပႅတ်ႈ၊ တင်းတၢင်းဢၼ်ဢဝ်ထႃႇၼႃႉ တီႈမူတ်းၸၢင်ႇၸဝ်ႈတင်းပူဝ်ႇပႃႇၼၼ်ႉ ဢၢပ်ႈပၼ်ႁႂ်ႈလႆႈယဵပ်ႇယမ်ႈၼၼ်ႉ တၵ်းတႄႇယူႇၶိင်ႇၵႃႇလႃႉႁိုင်ၵႃႈႁိုဝ်။ ဝႃႈၼင်ႇၼႆသေယဝ်ႉ၊-

14ၵေႃႉဢၼ် လၢတ်ႈမိူဝ်ႈၵႆႈၼၼ်ႉ ၶိုၼ်းလၢတ်ႈတီႈၵဝ်လႄႈဝႃႈ၊ တၵ်းလႆႈတႄႇယူႇ မိုဝ်ႉဝၼ်းမိုဝ်ႉၶိုၼ်းပွင်းၵၼ် သွင်ႁဵင်သၢမ်ပၢၵ်ႇ တဵမ်တဵမ်ဢေႃႈ။ လိုၼ်းၼၼ်ႉ ထႃႇၼႃႉတီႈမူတ်းၸၢင်ႇၸဝ်ႈ တၵ်းလႆႈ ၶၢမ်ႇတၢင်းဢၼ်ႁဵတ်း ႁႂ်ႈပဵၼ်ဢၼ်မူတ်းသႂ်ဢေႃႈ၊ ဝႃႈၼင်ႇၼႆဢေႃႈ။

15ၵဝ် တၢၼ်ႇယေႇလႃႉ ၼႆႉ ၼႂ်းမိူဝ်ႈဢၼ် ႁၼ်ရူႇပႃႇရူင်ႇၼၼ်ႉလႄႈ ႁႃဢၼၢၵ်ႈမၼ်း ယူႇၼၼ်ႉၸိုင်၊ ၵေႃႉၼိုင်ႈ ဢၼ်မိူၼ်ၸိူဝ်ႉၼင်ႇ ႁၢင်ႈၽၢင်ၵူၼ်းၼၼ်ႉ ၸုၵ်းယူႇၵႃႈတီႈၽၢႆႇၼႃႈၵဝ်ဢေႃႈ။-

16ၵဝ်ငိၼ်းသဵင်ၵူၼ်းႁွင်ႉယူႇၵႃႈတီႈ ၵႄႈဝူင်ႈၵၢင်ၽင်ႇၼမ်ႉႁွင်ႈ ဢူႉလေး လႄႈ လၢတ်ႈလႄႈဝႃႈ၊ ၵႃႇပြေႇလႃႉ ဢိူၺ်း၊ ႁႂ်ႈၵေႃႉၼၼ်ႉ ႁူႉၸႅင်ႈပျႃႇတိၵ်ႈရူႇပႃႇရူင်ႇၼႆႉတႃႉ၊ ဝႃႈၼင်ႇၼႆဢေႃႈ။-

17ၵေႃႉၼၼ်ႉ မႃးၸူးၵႃႈတီႈႁိမ်းတီႈဢၼ်ၵဝ်ၸုၵ်းယူႇ ၼၼ်ႉလႄႈ ၵဝ်ၵူဝ်ႁႄလႄႈ ၶုပ်ႉမူပ်ႇယူႇဢေႃႈ။ ၵေႃႉၼၼ်ႉ လၢတ်ႈတီႈၵဝ်လႄႈဝႃႈ၊ လုၵ်ႈၵူၼ်းဢိူၺ်း၊ ႁူႉၸႅင်ႈတႃႉ။ ပျႃႇတိၵ်ႈရူႇပႃႇရူင်ႇၼႆႉ ၸၢပ်ႈသႅင်ႇၵၼ်တင်း ၶိင်ႇၵႃႇလႃႉ တီႈသုတ်းတီႈၵွႆမၼ်းဢေႃႈ ဝႃႈၼင်ႇၼႆဢေႃႈ။-

18ၼႂ်းမိူဝ်ႈဢၼ် မၼ်းဝႃႈၸိူဝ်ႉၼင်ႇၼၼ် ယူႇၼၼ်ႉၸိုင် ၵဝ်ၶုပ်ႉမူပ်ႇၵႃႈၼိူဝ်လိၼ်လႄႈ ၼွၼ်းၼူၵ်ႇၼႃႇလူင်လၢင်ယူႇဢေႃႈ။ ၵေႃႉၼၼ်ႉ တိူဝ်ႉသႂ်ႇၵဝ်လႄႈ ႁႂ်ႈၵဝ်ၸုၵ်းတင်ႈသိုဝ်ႈယူႇ သေလႄႈ လၢတ်ႈလႄႈဝႃႈ၊-

19တူၺ်းလူး။ ၵဝ်တၵ်းမွၵ်ႇလၢတ်ႈ လွင်ႈတၢင်းဢၼ် တၵ်းပဵၼ်မႃး ၵႃႈၼႂ်းတီႈသုတ်းတီႈၵွႆ တၢင်းၸႂ်မႆႈၶႆႈၸႃႉၸဝ်ႈ လူးၵွၼ်ႇဢေႃႈ။ပဵၼ်ဢၼ်ၸၢပ်ႈသႅင်ႇၵၼ်တင်းတီႈသုတ်းတီႈၵွႆၶိင်ႇၵႃႇလႃႉမၼ်း ဢၼ်မၵ်းၶိၼ်းဝႆႉၼၼ်ႉဢေႃႈ။-

20သူဝ်းပေႃႈ ဢၼ်မႂ်းႁၼ်လႄႈ မီးၶဝ်လႅမ်သွင်လႅမ်ႈၼၼ်ႉ ပဵၼ်ၶုၼ်ႁေႃၶမ်း မေႇတီႉ ၊ ၶုၼ်ႁေႃၶမ်း ပေႇရသီႉ ဢေႃႈ။-

21ပႄႉပေႃႈၼၼ်ႉ ပဵၼ်ၶုၼ်ႁေႃၶမ်း ႁေႇလသႃႉ ဢေႃႈ။ ၶဝ်လႅမ်လူင်ဢၼ်မီးၵႃႈတီႈ ၵႄႈဝူင်ႈၵၢင် မၢၵ်ႇတႃမၼ်းၸိူဝ်းၼၼ်ႉ ပဵၼ်ၶုၼ်လူင် ပထမႃႉဢေႃႈ။-

22ၶဝ်လႅမ် ဢၼ်လႆႈၶၢမ်ႇတၢင်းဢၼ် ႁၵ်းပုတ်းလႄႈ ၶဝ်လႅမ်သီႇလႅမ်ႈ ဢွၵ်ႇမႃးၵႃႈတီႈႁွႆးမၼ်း ၼၼ်ႉၸမ်ႉ၊ မိူင်းသီႇမိူင်းတၵ်းပဵၼ်ဢွၵ်ႇမႃး ၵႃႈၼႂ်းမိူင်းဢွၼ်တၢင်း ၼၼ်ႉလႄႈ ဢမ်ႇပျေႉၸုမ်ႇဝႆႉတင်းတၼ်းၶူဝ်း မိူင်းဢွၼ်တၢင်းၼၼ်ႉ။-

23ၼႂ်းၶိင်ႇၵႃႇလႃႉ တီႈသုတ်းတီႈၵွႆမိူင်းၼၼ်ႉ၊ မိူဝ်ႈဢၼ်ဢပႅတ်ႈ ၶဝ်ၸိူဝ်းဢၼ် ပူၼ်ႉလိူဝ်ၼၼ်ႉ ပျေႉၸုမ်ႇယဝ်ႉၼၼ်ႉၸိုင်၊ ၶုၼ်လူင်ဢၼ်မီးၼႃႈ ဢၼ်ႁတ်းႁၢၼ်လႄႈ ၸၢင်ႈမေႃပရီႉယႄႇၼၼ်ႉပႃးၼိုင်ႈ တၵ်းပေႃႇမႃးဢေႃႈ။-

24ၶုၼ်လူင်ၼၼ်ႉ တၼ်းၶူဝ်းမၼ်းယင်းဢမ်ႇမီးလႄႈ တၼ်းၶူဝ်းတၵ်းယႂ်ႇဢေႃႈ။ မၼ်းတၵ်း ယဵင်ႈၶႅၼ်းယႃႉပႅတ်ႈၼႃႇလူင်လၢင်လႄႈ လႆႈလီလႆႈပဵၼ်ယူႇ သေလႄႈ ႁဵတ်းၸွမ်းဢလူဝ်ႇမၼ်းဢေႃႈ။ မၼ်းတၵ်းယႃႉၽဵဝ်ႈ ၶဝ်ၸိူဝ်းဢၼ်ႁႅင်းယႂ်ႇၼႃႇ ဢိၵ်ႇတင်း ၵူၼ်းမဵဝ်းဢၼ်မူတ်းၸၢင်ႇ တင်းလၢႆ ပႅတ်ႈဢေႃႈ။-

25မၼ်းၼၼ်ႉ ၵွပ်ႈပိူဝ်ႈ ဢၼ်ႁဵတ်းလၵ်းႁဵတ်းလႅမ် ၼႃႇလူင်လၢင်လႄႈ တၵ်းႁႂ်ႈမူႉသႃႇ လႆႈလီလႆႈပဵၼ် ၵႃႈၼႂ်းမိုဝ်းမၼ်းဢေႃႈ။ မၼ်းတၵ်း မီးၸႂ်ဢၼ် ပူၵ်းပႅၼ်ၽႅၼ်သုင် ၼႃႇလူင်လၢင်လႄႈ ႁဵတ်းမိၵ်ႉသႃႇႁႃယႃႉသေယဝ်ႉ၊ တၵ်းယႃႉၽဵဝ်ႈ ၵူၼ်းၼမ်ၼႃႇပႅတ်ႈလႄႈ ႁဵတ်းၶတ်းၵၼ် တင်းၸဝ်ႈၼိူဝ်ၸဝ်ႈတင်းလၢႆ ၼၼ်ႉဢေႃႈ။ ၼႂ်းဝႃႈၼၼ်သေၵေႃႈ မိုဝ်းၵူၼ်းယင်းဢမ်ႇႁွတ်ႈထိုင်လႄႈ မၼ်းတၵ်း ၶၢမ်ႇတၢင်းဢၼ် ႁၵ်းပုတ်းလူႉလႅဝ်ဢေႃႈ။-

26ၵႂၢမ်းပျႃႇတိၵ်ႈရူႇပႃႇရူင်ႇ ဢၼ်ၽုၺ်ႇဢွၵ်ႇၼႄပျႃး ႁူဝ်ၶမ်ႈ ဢိၵ်ႇတင်း ႁူဝ်ၼႂ်ၸိူဝ်းၼၼ်ႉၼၼ်ႉ မၢၼ်ႇမႅၼ်ႈၸိုဝ်ႈၸႂ်ႈလႄႈ၊ မႂ်းတွၵ်ႇတၼ်းသိၵ်ႈဝႆႉ တီႈၵႂၢမ်းၼၼ်ႉတႃႉ။ ၸၢပ်ႈသႅင်ႇၵၼ်တင်း ၶိင်ႇၵႃႇလႃႉမိုဝ်ႉဝၼ်းၼမ်ၼႃႇလူင်လၢင်ဢေႃႈ၊ ဝႃႈၼင်ႇၼႆဢေႃႈ။-

27မိူဝ်ႈၼၼ်ႉ ၵဝ် တၢၼ်ႇယေႇလႃႉ ၼႆႉ တၢႆလိုမ်းၵႂႃႇလႄႈ မီးတၢင်းၶႆႈတၢင်းပဵၼ်ယူႇ မိုဝ်ႉဝၼ်းၼမ်တၢၼ်ႇတၢၼ်ႇဢေႃႈ။ လႆႈသမ်ႉ ၵဝ်ၶႅၼ်းမႃးလႄႈ ႁဵတ်းပွင်ဢမူႉ ၶုၼ်ႁေႃၶမ်းဢေႃႈ။ ပိၵ်ႉသမ်ႉၵဝ်မီး တၢင်းဢၼ် ဢၢမ်းၼႃႇ ပျႃႇတိၵ်ႈ ရူႇပႃႇရူင်ႇ ၼၼ်ႉသေၵေႃႈ၊ ၽူႈလႂ်ဢမ်ႇႁူႉသၢႆငၢႆ လွင်ႈမၼ်းတၢင်းမၼ်း သေၵေႃႉသေၵူၼ်း။

← Chapter 7 Jump to: Chapter 9 →