Daniel 3

Shan

← Chapter 2 Jump to: Chapter 4 →

1ၶုၼ်လူင် ၼေႇပူႉၶတ်ႉၼေႇၸႃႇ ၼၼ်ႉ ႁဵတ်းရုၵ်ႈထူႉၶမ်း ဢၼ်တၢင်းသုင်မၼ်းမီး ႁူၵ်းသိပ်းသွၵ်ႇ၊ တၢင်းၵႂၢင်ႈမၼ်း ႁူၵ်းသွၵ်ႇၼၼ်ႉ သေလႄႈ ဢဝ်ပူၵ်းတင်ႈဝႆႉၵႃႈတီႈၼႂ်း ပၢင်ႇပဵင်း တူႉရႃႉ ၵႃႈၼႂ်းမိူင်း ပႃႇပူႉလုၼ်ႇ ၼၼ်ႉဢေႃႈ။-

2ၶုၼ်လူင် ၼေႇပူႉၶတ်ႉၼေႇၸႃႇ ၼၼ်ႉ ပွႆႇၸႂ်ႉၵူၼ်းႁွင်ႉဢဝ် ၸဝ်ႈၽႃႉ၊ မဵဝ်ႉဝုၼ်ႇ၊ ၸဵတ်ႈၵႄး ၊ ၵူၼ်းလူင်ဢၼ်ၸီႇယၢင်ႇတြႃး၊ ဝုၼ်ႇၵဵပ်းၶွၼ်ႇၸဝ်ႈ၊ မူးမၢတ်ႈၽွင်းမိူင်း ဢၼ်ႁူႉဢမူႉတြႃး၊ မူးမၢတ်ႈၽွင်းမိူင်း ဢၼ်တိူင်ႇပၢင်ႇ၊ ၵူၼ်းဢၼ်မီးဢရႃႇ ၵႃႈၼႂ်းဢိူင်ႇ ၼႂ်းၵျၢၵ်ႈမိူင်းၸဝ်ႈ တင်းသဵင်ႈတင်းလူင် ၼၼ်ႉမႃး ၸူႉၵၼ်တုမ်ၵၼ်ၵႃႈတီႈ ပွႆးဢၼ်ႁဵတ်း ဢၼူႉမေႃးတၼႃႇ လူႇတၢၼ်းရုၵ်ႈထူႉ ဢၼ် ၶုၼ်လူင် ၼေႇပူႉၶတ်ႉၼေႇၸႃႇ ပူၵ်းတင်ႈဝႆႉၼၼ်ႉလႄႈ၊-

3ၸဝ်ႈၽႃႉ၊ မဵဝ်ႉဝုၼ်ႇ၊ ၸဵတ်ႈၵႄး၊ ၵူၼ်းလူင် ဢၼ်ၸီႇယၢင်ႇတြႃး၊ ဝုၼ်ႇၵဵပ်းၶွၼ်ႇၸဝ်ႈ၊ မူးမၢတ်ႈၽွင်းမိူင်း ဢၼ်ႁူႉဢမူႉတြႃး၊ မူးမၢတ်ႈၽွင်းမိူင်း ဢၼ်တိူင်ႇပၢင်ႇ၊ ၵူၼ်းဢၼ်မီးဢရႃႇ ၵႃႈၼႂ်းဢိူင်ႇ ၼႂ်းၵျၢၵ်ႈမိူင်းၸဝ်ႈ တင်းသဵင်ႈတင်းလူင် ၼၼ်ႉ ဢွၼ်ၵၼ်မႃး ၸူႉၵၼ်တုမ်ၵၼ်ၵႃႈတီႈပွႆး ဢၼ်ႁဵတ်းဢၼူႉမေႃးတၼႃႇ လူႇတၢၼ်း ရုၵ်ႈထူႉ ဢၼ်ၶုၼ်လူင် ၼေႇပူႉၶတ်ႉၼေႇၸႃႇ ပူၵ်းတင်ႈဝႆႉ ၼၼ်ႉဢေႃႈ။ ၶဝ်ၼၼ်ႉ ဢွၼ်ၵၼ် ၸုၵ်းယူႇၵႃႈတီႈ ၽၢႆႇၼႃႈရုၵ်ႈထူႉ ဢၼ်ၶုၼ်လူင် ၼေႇပူႉၶတ်ႉၼေႇၸႃႇ ပူၵ်းတင်ႈဝႆႉ ၼၼ်ႉဢေႃႈ။-

4မိူဝ်ႈၼၼ်ႉ ၵူၼ်းဢၼ်ပၢဝ်ႇဢၼ်သေႃႇၵေႃႉၼိုင်ႈ ႁွင်ႉပၢဝ်ႇႁွင်ႉသေႃႇလႄႈဝႃႈ၊ ၵူၼ်းမဵဝ်းဢၼ်လၢတ်ႈၵႂၢမ်းၽႃႇသႃႇ ၶေႃၶေႃ ႁင်းၽႂ်ႁင်းမၼ်း ၶဝ်ဢိူၺ်း၊ ဢမိင်ႉၸဝ်ႈမီးၸမ်ႉ၊-

5မိူဝ်ႈဢၼ် သူလႆႈငိၼ်းသဵင်တၢင်းဢၼ်ပဝ်ႇႁႆႇ ၸႃႉၸဵမ်ၼႄးၶရႃႇ၊ တိင်ႇ၊ ပီႇ၊ တရေႃး၊ ၵွင်ၶဵတ်ႇလႄႈ တူႇရီႉယႃႇၵူႈၸိူဝ်ႉၵူႈမဵဝ်း ၼၼ်ႉၸိုင်၊ သူတၵ်းလႆႈဢွၼ်ၵၼ် ၶုပ်ႉမူပ်ႇၵူဝ်းၵႂၢႆႇရုၵ်ႈထူႉၶမ်း ဢၼ်ၶုၼ်လူင် ၼေႇပူႉၶတ်ႉၼေႇၸႃႇ ပူၵ်းတင်ႈဝႆႉၼႆႉဢေႃႈ။-

6ႁႂ်ႈဢဝ်ၵေႃႉဢၼ်ဢမ်ႇၶုပ်ႉမူပ်ႇ၊ ဢမ်ႇၵူဝ်းၵႂၢႆႇၼၼ်ႉ ထိမ်ႈၶျႃးတူၵ်းသႂ်ႇၵႃႈၼႂ်းမုၵ်ႉၽႆး ဢၼ်လုၵ်ႉမႆႈယူႇၼၼ်ႉ ၵမ်းလဵဝ်သေ၊ ဝႃႈၼင်ႇၼႆဢေႃႈ။-

7ပိူဝ်ႈၼႆလႄႈ မိူဝ်ႈဢၼ် ၵူၼ်းမဵဝ်းၵႃႈမီးၼၼ်ႉ ငိၼ်းသဵင်တၢင်းဢၼ်ပဝ်ႇႁႆႇ ၸႃႉၸဵမ်ၼႄးၶရႃႇ၊ တိင်ႇ၊ ပီႇ၊ တရေႃး၊ ၵွင်ၶဵတ်ႇလႄႈ တူႇရီႉယႃႇၵူႈၸိူဝ်ႉၵူႈမဵဝ်း ၼၼ်ႉၸိုင်၊ ၵူၼ်းၵူႈၸိူဝ်ႉၵူႈမဵဝ်း ဢၼ်လၢတ်ႈၵႂၢမ်းၽႃႇသႃႇ ၶေႃၶေႃ ႁင်းၽႂ်ႁင်းမၼ်း တင်းသဵင်ႈတင်းလူင် ၼၼ်ႉ ဢွၼ်ၵၼ်ၶုပ်ႉမူပ်ႇလႄႈ ၵူဝ်းၵႂၢႆႇရုၵ်ႈထူႉၶမ်း ဢၼ်ၶုၼ်လူင် ၼေႇပူႉၶတ်ႉၼေႇၸႃႇ ပူၵ်းတင်ႈဝႆႉၼၼ်ႉဢေႃႈ။

8မိူဝ်ႈၼၼ်ႉ ၵမ်းလဵဝ်၊ ၵူၼ်း ၶႃႇလတေး ၵမ်ႈၽွင်ႈ ဢွၼ်ၵၼ် သုတ်ႉၸပ်းသုတ်ႉၸူးလႄႈ တၢင်ႇဢပႅတ်ႈတီႈၵူၼ်း ယူႉတႃႉ တင်းလၢႆ သေလႄႈ၊-

9လဝ်ႊလၢတ်ႈတီႈ ၶုၼ်လူင် ၼေႇပူႉၶတ်ႉၼေႇၸႃႇ လႄႈဝႃႈ၊ ၸဝ်ႈၶုၼ်လူင်တီႈၶႃႈ၊ ႁႂ်ႈဢသၢၵ်ႈၸဝ်ႈႁဝ်းလိပ်းယူႇ တႃႇသေႇ မၼ်ႈၶိူင်ႇသေၵမ်းလူၺ်ႈတီႈၶႃႈ၊-

10ၸဝ်ႈၶုၼ်လူင်တီႈၶႃႈ၊ ဢမိင်ႉၸဝ်ႈႁဝ်းဢၼ်ဝႃႈ၊ ၵူၼ်းၵႃႈဢၼ်လႆႈငိၼ်းသဵင် တၢင်းဢၼ် ပဝ်ႇႁႆႇ ၸႃႉၸဵမ်ၼႄးၶရႃႇ၊ တိင်ႇ၊ ပီႇ၊ တရေႃး၊ ၵွင်ၶဵတ်ႇလႄႈ တူႇရီႉယႃႇၵူႈၸိူဝ်ႉၵူႈမဵဝ်းၼၼ်ႉ ၸိူဝ်းၼၼ်ႉ တၵ်းလႆႈဢွၼ်ၵၼ် ၶုပ်ႉမူပ်ႇၵူဝ်းၵႂၢႆႇရုၵ်ႈထူႉၶမ်းဢေႃႈ။-

11ႁႂ်ႈဢဝ်ၵေႃႉဢၼ် ဢမ်ႇၶုပ်ႉမူပ်ႇ၊ ဢမ်ႇၵူဝ်းၵႂၢႆႇၼၼ်ႉ ထိမ်ႈၶျႃးတူၵ်းသႂ်ႇၵႃႈၼႂ်း မုၵ်ႉၽႆး ဢၼ်လုၵ်ႉမႆႈယူႇၼၼ်ႉသေ၊ ဝႃႈၼင်ႇၼႆၼၼ်ႉ မီးယဝ်ႉတီႈၶႃႈဢေႃႈ။-

12မီးၵူၼ်း ယူႉတႃႉ ဢၼ်ၸဝ်ႈႁဝ်းၶၢၼ်းဝႆႉ ႁႂ်ႈပဵၼ်ဝုၼ်ႇ ၵႃႈၼႂ်းမိူင်း ပႃႇပူႉလုၼ်ႇ ဢၼ်ဝႃႈ သႃႇတရႅၵ်ႉ၊ မေႇသႅၵ်ႉ၊ ဢပေႇတၼေႇၵေႃး ၸိူဝ်းၼၼ်ႉ တီႈၶႃႈဢေႃႈ။ ၸဝ်ႈၶုၼ်လူင်တီႈၶႃႈ၊ ၶဝ်ၼၼ်ႉ ဢမ်ႇႁဵတ်းပမႃႇၼႃႉ တီႈဢမိင်ႉၸဝ်ႈႁဝ်းတီႈၶႃႈ၊ ဢမ်ႇႁဵတ်းဝၢတ်ႈတီႈ ၽြႃးၸဝ်ႈႁဝ်း ၸိူဝ်းၼၼ်ႉ တီႈၶႃႈ၊ ရုၵ်ႈထူႉၶမ်း ဢၼ်ၸဝ်ႈႁဝ်းပူၵ်းတင်ႈဝႆႉ ၼႆႉၵေႃႈ ၶဝ်ဢမ်ႇၵူဝ်းၵႂၢႆႇတီႈၶႃႈ၊ ဝႃႈၼင်ႇၼႆဢေႃႈ။-

13မိူဝ်ႈၼၼ်ႉ ၶုၼ်လူင် ၼေႇပူႉၶတ်ႉၼေႇၸႃႇ ၼၼ်ႉ ၸႂ်မႆႈၶႆႈၸႃႉလႄႈ ဢၢႆႁႅင်းတေႃးသႃႉမၼ်း ဢွၵ်ႇႁႅင်းယႂ်ႇၼႃႇလူင်လၢင် သေလႄႈ မီးဢမိင်ႉႁႂ်ႈႁွင်ႉဢဝ် သႃႇတရႅၵ်ႉ၊ မေႇသႅၵ်ႉ၊ ဢပေႇတၼေႇၵေႃး ၶဝ်ႈမႃးလႄႈ ၶဝ်ဢွၼ်ၵၼ် ႁွင်ႉဢဝ်ၶဝ်ၼၼ်ႉ မႃးတီႈၶုၼ်ႁေႃၶမ်း ၸွမ်းၵႃႈၼင်ႇဢၼ် မီးဢမိင်ႉၼၼ်ႉဢေႃႈ။-

14ၼေႇပူႉၶတ်ႉၼေႇၸႃႇ ၼၼ်ႉ မီးဢမိင်ႉတီႈၶဝ် လႄႈဝႃႈ၊ သႃႇတရႅၵ်ႉ၊ မေႇသႅၵ်ႉ၊ ဢပေႇတၼေႇၵေႃး ၶဝ်ဢိူၺ်း၊ သူမီးတၢင်းၵျၢမ်ႇတၢင်းပွင် ဢၼ်သူတၵ်း ဢမ်ႇႁဵတ်းဝၢတ်ႈ တီႈၽြႃးၵဝ်လႄႈ ဢမ်ႇၵူဝ်းၵႂၢႆႇရုၵ်ႈထူႉၶမ်း ဢၼ်ၵဝ်ပူၵ်းတင်ႈဝႆႉ ၼၼ်ႉႁိုဝ်။-

15မိူဝ်ႈလဵဝ်ၼႆႉ မိူဝ်ႈဢၼ် သူလႆႈငိၼ်းသဵင် တၢင်းဢၼ်ပဝ်ႇႁႆႇ ၸႃႉၸဵမ်ၼႄးၶရႃႇ၊ တိင်ႇ၊ ပီႇ၊ တရေႃး၊ ၵွင်ၶဵတ်ႇလႄႈ တူႇရီႉယႃႇၵူႈၸိူဝ်ႉၵူႈမဵဝ်း ၸိူဝ်းၼၼ်ႉ၊ ပေႃးသူမႄးႁႅၼ်းဝႆႉ ႁႂ်ႈလႆႈၶုပ်ႉမူပ်ႇလႄႈ ၵူဝ်းၵႂၢႆႇရုၵ်ႈထူႉဢၼ်ၵဝ်ႁဵတ်း ၼႆႉၸိုင်၊ လီယဝ်ႉ။ ပေႃးဢမ်ႇၵူဝ်းၵႂၢႆႇၸိုင်၊ တၵ်းလႆႈဢဝ်သူ ထိမ်ႈတူၵ်းသႂ်ႇ ၵႃႈၼႂ်းမုၵ်ႉၽႆး ဢၼ်လုၵ်ႉမႆႈယူႇၼၼ်ႉ ၵမ်းလဵဝ်ဢေႃႈ။ ၽြႃးဢၼ်တၵ်း ၵႄႇသႄႇ ဢဝ်သူလွတ်ႈသေ ၵႃႈၼႂ်းမိုဝ်းၵဝ်ၼႆႉၸမ်ႉ၊ မီးၽြႃးဢၼ်လႂ်၊ ဝႃႈၼင်ႇၼႆဢေႃႈ။-

16သႃႇတရႅၵ်ႉ၊ မေႇသႅၵ်ႉ၊ ဢပေႇတၼေႇၵေႃး ၸိူဝ်းၼၼ်ႉၵေႃႈ လဝ်ႊလၢတ်ႈတီႈ ၶုၼ်လူင် ၼေႇပူႉၶတ်ႉၼေႇၸႃႇ လႄႈဝႃႈ၊ ၶႃႈၸဝ်ႈႁဝ်းၶဝ် ဢမ်ႇမီးလွင်ႈဢၼ် တၵ်းလႆႈၶိုၼ်းလၢတ်ႈ လူၺ်ႈလွင်ႈ တီႈႁဵင်းၼႆႉ တီႈၸဝ်ႈႁဝ်း တီႈၶႃႈ၊-

17ပေႃးၽြႃးပဵၼ်ၸဝ်ႈ ဢၼ်ၶႃႈၸဝ်ႈႁဝ်းၶဝ် ၵူဝ်းၵႂၢႆႇၼၼ်ႉ ၵႄႇသႄႇ ၼုၵ်ႈဢဝ်ၶႃႈၸဝ်ႈႁဝ်းၶဝ် ဢွၵ်ႇသေၵႃႈၼႂ်းမုၵ်ႉၽႆး ဢၼ်လုၵ်ႉမႆႈယူႇၼၼ်ႉ လႆႈၸိုင်၊ ၵႃႈၼႂ်းမိုဝ်းၸဝ်ႈႁဝ်းၵေႃႈ မၼ်းၸဝ်ႈတၵ်း ၵႄႇသႄႇ ၼုၵ်ႈဢဝ် ၶႃႈၸဝ်ႈႁဝ်းၶဝ်လႆႈယူႇ တီႈၶႃႈဢေႃႈ။-

18ပိၵ်ႉသမ်ႉ ဢမ်ႇပဵၼ်ၸိူဝ်ႉၼင်ႇၼၼ် သေၵေႃႈ၊ ၸဝ်ႈၶုၼ်လူင်တီႈၶႃႈ၊ ႁႂ်ႈၸဝ်ႈႁဝ်းလႆႈႁူႉ လွင်ႈဢၼ်ၶႃႈၸဝ်ႈႁဝ်းၶဝ် ဢမ်ႇႁဵတ်းဝၢတ်ႈ တီႈၽြႃးၸဝ်ႈႁဝ်း ၸိူဝ်းၼၼ်ႉလႄႈ ဢမ်ႇၵူဝ်းၵႂၢႆႇရုၵ်ႈထူႉ ဢၼ်ၸဝ်ႈႁဝ်းပူၵ်းတင်ႈဝႆႉ ၼႆႉၼၼ်ႉ တီႈၶႃႈဢေႃႈ၊ ဝႃႈၼင်ႇၼႆဢေႃႈ။-

19မိူဝ်ႈၼၼ်ႉ ၶုၼ်လူင် ၼေႇပူႉၶတ်ႉၼေႇၸႃႇ ၼၼ်ႉ တဵမ်ဝႆႉတၢင်းဢၢႆႁႅင်းတေႃးသႃႉ တၢင်းၸႂ်မႆႈၶႆႈၸႃႉ ဢၼ်ႁႅင်းယႂ်ႇၼႃႇလူင်လၢင်ၼၼ်ႉလႄႈ ၶၢႆႉပုတ်ႈၼႃႈမၼ်းတေႃႇ သႃႇတရႅၵ်ႉ၊ မေႇသႅၵ်ႉ၊ ဢပေႇတၼေႇၵေႃး ၸိူဝ်းၼၼ်ႉယူႇ သေလႄႈ ဢွၵ်ႇသူပ်း မီးဢမိင်ႉႁႂ်ႈၶဝ်ႁဵတ်းႁႂ်ႈ မုၵ်ႉၽႆးၼၼ်ႉ ယဵင်ႈၶႅၼ်းမႆႈ လိူဝ်တွၼ်းၼႃႇသေ မိူဝ်ႈဢွၼ်တၢင်းၼၼ်ႉ ၸဵတ်းပုၼ်ႈဢေႃႈ။-

20မၼ်းသမ်ႉ မီးဢမိင်ႉတီႈ ႁူဝ်ႁၢၼ်ၵူၼ်းသိုၵ်း ဢၼ်ႁႅင်းယႂ်ႇၼႃႇ ၵမ်ႈၽွင်ႈႁႂ်ႈၶဝ်မတ်ႉၽုၵ်ႇဢဝ် သႃႇတရႅၵ်ႉ၊ မေႇသႅၵ်ႉ၊ ဢပေႇတၼေႇၵေႃး ၸိူဝ်းၼၼ်ႉ ထိမ်ႈတူၵ်းသႂ်ႇၵႃႈၼႂ်းမုၵ်ႉၽႆး ဢၼ်လုၵ်ႉမႆႈယူႇၼၼ်ႉလႄႈ၊-

21ၵူၼ်းၸိူဝ်းၼၼ်ႉ လႆႈၶၢမ်ႇတၢင်းဢၼ် မတ်ႉၽုၵ်ႇဢဝ် ပႃးလူၺ်ႈၵၼ်တင်းၵူၼ်၊ သိူဝ်ႈ၊ သိူဝ်ႈယၢဝ်း၊ ၶူဝ်းၼုင်ႈၶဝ်သေလႄႈ ထိမ်ႈတူၵ်းသႂ်ႇၵႃႈၼႂ်းမုၵ်ႉၽႆး ဢၼ်လုၵ်ႉမႆႈယူႇ ၼၼ်ႉဢေႃႈ။-

22ၵွပ်ႈပိူဝ်ႈဢၼ် ဢမိင်ႉၶုၼ်ႁေႃၶမ်း ႁိပ်ႈၼႅတ်ႈလႄႈ မုၵ်ႉၽႆးၼၼ်ႉမႆႈၼႃႇလူင်လၢင် ၼၼ်ႉလႄႈ၊ ပဵဝ်ၽႆးႁုပ်ႇမႆႈၶဝ်ၸိူဝ်းဢၼ် တိုတ်ႉၸၼ်ဢဝ် သႃႇတရႅၵ်ႉ၊ မေႇသႅၵ်ႉ၊ ဢပေႇတၼေႇၵေႃး ၸိူဝ်းၼၼ်ႉၼၼ်ႉတၢႆဢေႃႈ။-

23ၶဝ်သၢမ်ၵေႃႉ၊ သႃႇတရႅၵ်ႉ၊ မေႇသႅၵ်ႉ၊ ဢပေႇတၼေႇၵေႃး ၸိူဝ်းၼၼ်ႉၸမ်ႉ၊ ၶၢမ်ႇတၢင်းဢၼ်မတ်ႉၽုၵ်ႇယူႇ သေလႄႈ တူၵ်းႁွတ်ႈၵႃႈၼႂ်းမုၵ်ႉၽႆး ဢၼ်လုၵ်ႉမႆႈ ႁႅင်းယႂ်ႇၼႃႇလူင်လၢင် ၼၼ်ႉဢေႃႈ။-

24မိူဝ်ႈၼၼ်ႉ ၶုၼ် ၼေႇပူႉၶတ်ႉၼေႇၸႃႇ ၼၼ်ႉ မီးတၢင်းဢၼ်ဢၢမ်းၼႃႇ ၵႂင်ၸႂ်ယုင်ႈၸႂ် ယူႇသေလႄႈ လုၵ်ႉၶၼ်ၶၼ်ၽႂ်းၽႂ်း လႄႈ ထၢမ်တီႈမူးမၢတ်ႈ ၽွင်းမိူင်း ဢၼ်တိူင်ႇပၢင်ႇၸိူဝ်းၼၼ်ႉ လႄႈဝႃႈ၊ ႁဝ်းမတ်ႉၽုၵ်ႇဢဝ် ၵူၼ်းသၢမ်ၵေႃႉ ထိမ်ႈတူၵ်းသႂ်ႇ ၵႃႈၼႂ်းၽႆးဢမ်ႇၸႂ်ႈႁိုဝ်။ ဝႃႈၼင်ႇၼႆလႄႈ ၶဝ်ၼၼ်ႉ ဢွၼ်ၵၼ်ၶိုၼ်းလဝ်ႊလၢတ်ႈတီႈ ၶုၼ်ႁေႃၶမ်းလႄႈဝႃႈ၊ ၸႂ်ႈတီႈၶႃႈယဝ်ႉ၊ ၸဝ်ႈၶုၼ်လူင်တီႈၶႃႈ၊ ဝႃႈၼင်ႇၼႆဢေႃႈ။-

25မၼ်းမီးဢမိင်ႉလႄႈဝႃႈ၊ တူၺ်းလူး။ ၵဝ်ႁၼ်ၵူၼ်းသီႇၵေႃႉ ယင်းဢမ်ႇမီး တၢင်းဢၼ်မတ်ႉ ဢၼ်ၽုၵ်ႇလႄႈ ၵႂႃႇမႃးယူႇၵႃႈၼႂ်းၵၢင်ၽႆးလႄႈ ၵၢင်းလွတ်ႈတင်းၽေးဢူႉပၢတ်ႈယူႇ လူင်ပႄႇ။ ၵေႃႉၸတုၵ်ႉထႃႉၼၼ်ႉ မီးႁၢင်ႈၽၢင် လုၵ်ႈၽြႃးပဵၼ်ၸဝ်ႈ တင်းလၢႆဢေႃႈ၊ ဝႃႈၼင်ႇၼႆသေယဝ်ႉ၊

26ၼေႇပူႉၶတ်ႉၼေႇၸႃႇ သုတ်ႉၸပ်းသုတ်ႉၸူး ၵႃႈတီႈႁိမ်းပၢၵ်ႇမုၵ်ႉၽႆး ဢၼ်လုၵ်ႉမႆႈယူႇၼၼ်ႉ သေလႄႈ မီးဢမိင်ႉလႄႈဝႃႈ၊ သႃႇတရႅၵ်ႉ၊ မေႇသႅၵ်ႉ၊ ဢပေႇတၼေႇၵေႃး ၊ ၶႃႈၽြႃးပဵၼ်ၸဝ်ႈ ဢၼ်သုင်ၼႃႇသေပိူၼ်ႈၼၼ်ႉ ၶဝ်ဢိူၺ်း၊ ဢွၼ်ၵၼ် ဢွၵ်ႇလႄႈမႃးၵႃႈတီႈၼႆႈတႃႉ၊ ဝႃႈၼင်ႇၼႆလႄႈ သႃႇတရႅၵ်ႉ၊ မေႇသႅၵ်ႉ၊ ဢပေႇတၼေႇၵေႃး ၸိူဝ်းၼၼ်ႉ ဢွၼ်ၵၼ်ဢွၵ်ႇသေ ၵႃႈၼႂ်းၽႆးမႃးဢေႃႈ။-

27မိူဝ်ႈၼၼ်ႉ ၸဝ်ႈၽႃႉ၊ မဵဝ်ႉဝုၼ်ႇ၊ ၸဵတ်ႈၵႄး၊ ၵူၼ်းလူင်ဢၼ်ၸီႇယၢင်ႇတြႃး၊ ဢတႂၢင်းဝုၼ်ႇ တင်းလၢႆ ဢွၼ်ၵၼ်ဢုမ်ႇလွမ်ႉႁွပ်ႈ သေလႄႈ လူတူၺ်းၶဝ်လႄႈ ႁၼ်လွင်ႈဢၼ် ၽႆးဢမ်ႇမႆႈတူဝ်ၶဝ်လႆႈ သဵၼ်ႈၶူၼ်ႁူဝ်ၶဝ်ၵေႃႈ ဢမ်ႇၶႅမ်ႈသေသဵၼ်ႈ၊ သိူဝ်ႈယၢဝ်းၶဝ်ၵေႃႈ ဢမ်ႇမီးတၢင်းဢၼ် လၢၵ်ႇၵႂႃႇပိူင်ႈၵႂႃႇ၊ ဢၢႆဢၼ်ၽႆးမႆႈၵေႃႈ ဢမ်ႇမီးလႃးလႃး ၼၼ်ႉဢေႃႈ။-

28ၶုၼ်လူင် ၼေႇပူႉၶတ်ႉၼေႇၸႃႇ ၵေႃႈ မီးဢမိင်ႉလႄႈဝႃႈ၊ ႁႂ်ႈၽြႃးပဵၼ်ၸဝ်ႈ သႃႇတရႅၵ်ႉ၊ မေႇသႅၵ်ႉ၊ ဢပေႇတၼေႇၵေႃး ၼႆႉၼၼ်ႉ မီးမင်ႇၵလႃႇ သေၵမ်းလူၺ်ႈ။ မၼ်းၸဝ်ႈၼၼ်ႉ ပွႆႇၸႂ်ႉတမၢၼ်ႇၵၢင်ႁၢဝ်မႃးလႄႈ ၵႄႇသႄႇ ၶျွတ်ႈဢဝ်ၶႃႈမၼ်းၸဝ်ႈ ဢၼ်ယုမ်ႇမၢတ်ႈ ၸႂ်လီလူၺ်ႈမၼ်းၸဝ်ႈလႄႈ ပူၼ်ႉလိူဝ်ဢမိင်ႉၶုၼ်လူင် သေလႄႈ ဢဝ်တူဝ်ၶၼ်ႇထႃႇၶဝ်ဢၢပ်ႈပၼ် ႁႂ်ႈဢမ်ႇလႆႈ ႁဵတ်းဝၢတ်ႈ ၵူဝ်းၵႂၢႆႇၽြႃး တၢင်ႇသူႇတၢင်ႇပႃး ၼွၵ်ႈသေ ၽြႃးပဵၼ်ၸဝ်ႈ ၶဝ်ၼၼ်ႉယဝ်ႉ။-

29ပိူဝ်ႈၼႆလႄႈ ၵဝ်ပူင်ဢမိင်ႉလႄႈဝႃႈ၊ ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်း ဢၼ်လၢတ်ႈၵႂၢမ်းၽႃႇသႃႇ ၶေႃၶေႃ ႁင်းၽႂ်ႁင်းမၼ်းၼၼ်ႉ ၵေႃႉဢၼ်လၢတ်ႈၵႂၢမ်း ဢၼ်ၽိတ်းပိူင်ႈတီႈ ၽြႃးပဵၼ်ၸဝ်ႈ သႃႇတရႅၵ်ႉ၊ မေႇသႅၵ်ႉ၊ ဢပေႇတၼေႇၵေႃး ၼႆႉၼၼ်ႉ တၵ်းလႆႈ ၶၢမ်ႇတၢင်းဢၼ် တႅပ်းၽၼ်းပဵၼ်ပွတ်း ပဵၼ်တွၼ်ႈပႅတ်ႈလႄႈ ႁိူၼ်းမၼ်းၵေႃႈ တၵ်းလႆႈႁႂ်ႈပဵၼ်ၵွင်ၶီႈဝူဝ်းပႅတ်ႈဢေႃႈ၊ ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ တၢင်းဢၼ် ၵႄႇသႄႇၶျွတ်ႈဢဝ် ဢၼ်ထၢၼ်ႇၼႆႉၸိုင်၊ ၼွၵ်ႈသေ ၽြႃးပဵၼ်ၸဝ်ႈ ၼၼ်ႉ ၽြႃးသူႇလႂ်ပႃးလႂ် ဢမ်ႇတၢတ်ႈၼိူင်ႇလႆႈ၊ ဝႃႈၼင်ႇၼႆသေယဝ်ႉ၊-

30ၶုၼ်ႁေႃၶမ်းယုၵ်ႉယွင်ႈ သႃႇတရႅၵ်ႉ၊ မေႇသႅၵ်ႉ၊ ဢပေႇတၼေႇၵေႃး ဝႆႉၵႃႈၼႂ်းမိူင်း ပႃႇပူႉလုၼ်ႇ ဢေႃႈ။

← Chapter 2 Jump to: Chapter 4 →