Daniel 5 — Shan

1ၽဝ်ႇၼိုင်ႈ ၶုၼ်လူင် ပေႇလသႃႇၸႃႇ ၶၢမ်ႇပွႆးဢၼ်ယႂ်ႇၼႃႇလူင်လၢင် ပုၼ်ႈမူးမၢတ်ႈၽွင်းမိူင်း ႁဵင်ၼိုင်ႈလႄႈ သူတ်ႉၵိၼ် ၼမ်ႉၸပိတ်ႈၵႃႈတီႈၽၢႆႇၼႃႈၶဝ် ႁဵင်ၼိုင်ႈၼၼ်ႉဢေႃႈ။-

2ၶုၼ် ပေႇလသႃႇၸႃႇ ၼၼ်ႉ၊ ၼႂ်းမိူဝ်ႈဢၼ် မၼ်းယင်းတိုၵ်ႉၸိမ်းတူၺ်း ၼမ်ႉၸပိတ်ႈ ယူႇၼၼ်ႉၸိုင်၊ မၼ်းမီးဢမိင်ႉႁႂ်ႈဢဝ် ၵွၵ်းၶမ်းၵွၵ်းငိုၼ်း ဢၼ်ၸဝ်ႈပေႃႈမၼ်း ၼေႇပူႉၶတ်ႉၼေႇၸႃႇ ဢဝ်ၵႃႈၼႂ်းပိၵ်ႈမၢၼ်ႇ ဝဵင်း ယေႇရူႉသလႅမ်ႇ မႃး ၸိူဝ်းၼၼ်ႉ ႁႂ်ႈတူဝ်မၼ်း ဢိၵ်ႇတင်း မူးမၢတ်ႈၽွင်းမိူင်းမၼ်း၊ ၼၢင်းႁေႃၶမ်းမၼ်း၊ ၸိူင်ႉၼၢင်းမၼ်း တင်းလၢႆ လႆႈဢဝ်သူတ်ႉၵိၼ်လႄႈ၊-

3ၶဝ်ဢွၼ်ၵၼ် ဢဝ်ၵွၵ်းၶမ်း ဢၼ်သိမ်းဢဝ်သေ ၵႃႈၼႂ်းတိူၵ်ႈၽၼ်ႇတႃႇပိၵ်ႈမၢၼ်ႇ ၽြႃးပဵၼ်ၸဝ်ႈ ဢၼ်မီးၵႃႈတီႈ ဝဵင်း ယေႇရူႉသလႅမ်ႇ မႃး ၸိူဝ်းၼၼ်ႉမႃးလႄႈ ၶုၼ်လူင်၊ မူးမၢတ်ႈၽွင်းမိူင်း၊ ၼၢင်းႁေႃၶမ်း၊ ၸိူင်ႉၼၢင်း ၸိူဝ်းၼၼ်ႉ ဢွၼ်ၵၼ် ဢဝ်သူတ်ႉၵိၼ်ဢေႃႈ။-

4ၶဝ်ၼၼ်ႉ ဢွၼ်ၵၼ် သူတ်ႉၵိၼ်ၼမ်ႉၸပိတ်ႈ သေလႄႈ ယွင်ႈယေႃးၽြႃးၶမ်း၊ ၽြႃးငိုၼ်း၊ ၽြႃးတွင်းလိူင်၊ ၽြႃးလဵၵ်း၊ ၽြႃးမႆႉ၊ ၽြႃးမၢၵ်ႇႁိၼ် တင်းလၢႆဢေႃႈ။-

5ၼႂ်းၶိင်ႇမိူဝ်ႈၼၼ်ႉ ၵမ်းလဵဝ်၊ ၼိဝ်ႉမိုဝ်းၵူၼ်းပေႃႇမႃးလႄႈ တႅမ်ႈတူဝ်လိၵ်ႈ ဢႅၵ်ႉၶရႃႇ တၢင်ႇသႂ်ႇဝႆႉ ၵႃႈတီႈဢၢင်းၵတေႇၽႃဢုတ်ႇ ႁေႃၶမ်းၶုၼ်လူင် ၵႃႈၼိူဝ်ၶူင်ႇတီႈတႆႈၽႆး ၼၼ်ႉဢေႃႈ။ ၼင်ႇၼၼ်လႄႈ ၶုၼ်ႁေႃၶမ်း ႁၼ်ပၢႆမိုဝ်းဢၼ်တႅမ်ႈဝႆႉ ၸိူဝ်ႉၼင်ႇၼၼ်ၼၼ်ႉ သေယဝ်ႉ၊-

6ၼႃႈမၼ်း ႁဵဝ်ႇၸွပ်ႈၵႂႃႇလႄႈ မၼ်းႁွတ်ႈထိုင် တၢင်းဢၼ်မႆႈၸႂ်ႁွၼ်ႉၸႂ် သေလႄႈ မီးတၢင်းဢၼ်ပဵၼ်ၸိူဝ်ႉၼင်ႇ ဢႅဝ်မၼ်း ႁၢမ်ႉတၵ်းပုတ်းတၵ်းၶၢတ်ႇၵႂႃႇလႄႈ ႁူဝ်ၶဝ်ႇမၼ်းၼင်ႇၵၼ်ၵၼ် တုမ်ႉၵၼ်လေႃႇၵၼ်ယူႇဢေႃႈ။-

7ၵမ်းၼၼ်ႉ ၶုၼ်လူင်ႁွင်ႉသႅၼ်ႇလႄႈဝႃႈ၊ ႁွင်ႉဢဝ်မေႃပေႇတၢင်ႇ၊ သြႃႇ ၶႃႇလတေး ၊ သြႃႇဢၼႃႇၵၢတ်ႈတီႉ တင်းလၢႆ မႃးတႃႉ၊ ဝႃႈၼင်ႇၼႆသေယဝ်ႉ၊ ၶုၼ်လူင် မီးဢမိင်ႉတီႈပိင်ႇၺႃႇသီႉ မိူင်း ပႃႇပူႉလုၼ်ႇ ၸိူဝ်းၼၼ်ႉ လႄႈဝႃႈ၊ ႁႂ်ႈၵေႃႉဢၼ် ၽတ်းလိၵ်ႈၼႆႉလႄႈ ၽုၺ်ႇဢွၵ်ႇၼႄပျႃး ဢထိၵ်ႈပႄႇမၼ်းတီႈၵဝ်ၼၼ်ႉ လႆႈၶၢမ်ႇတၢင်းဢၼ် ဢဝ်ၶူဝ်းဢၼ် လႅင်ၵမ်ႇၼုင်ႈမႆပၼ်လႄႈ ဢဝ်ၸရွႆႇၶမ်းႁွႆႈသႂ်ႇပၼ် ၵႃႈတီႈၶေႃးမၼ်း သေလႄႈ ပဵၼ်ၶုၼ် တႃႉတီႉယႃႉ ၵႃႈၼႂ်း သိုင်ႇၸိုင်ႈဝၢၼ်ႈမိူင်းၸဝ်ႈသေ၊ ဝႃႈၼင်ႇၼႆဢေႃႈ။-

8ပိၵ်ႉသမ်ႉ ပိင်ႇၺႃႇသီႉ ၶုၼ်လူင် တင်းသဵင်ႈတင်းလူင် ဢွၼ်ၵၼ်ႁွတ်ႈမႃးသေၵေႃႈ၊ ၶဝ်ဢမ်ႇဢွၼ်ၵၼ် ၽတ်းလိၵ်ႈ ၼၼ်ႉလႆႈ၊ ဢမ်ႇႁေႃးလၢတ်ႈ ဢၼၢၵ်ႈဢထိၵ်ႈပႄႇမၼ်း တီႈၶုၼ်ႁေႃၶမ်းလႆႈ။-

9မိူဝ်ႈၼၼ်ႉ ၶုၼ်လူင် ပေႇလသႃႇၸႃႇ ၼၼ်ႉ မီးတၢင်းဢၼ် မႆႈၸႂ်ႁွၼ်ႉၸႂ်၊ တၢင်းဢၼ် ၼႃႈႁဵဝ်ႇၸွပ်ႈယူႇလႄႈ မူးမၢတ်ႈၽွင်းမိူင်းမၼ်း တင်းလၢႆ ဢွၼ်ၵၼ် ၵႂင်ၸႂ်ယုင်ႈၸႂ်ယူႇဢေႃႈ။-

10မိူဝ်ႈၼၼ်ႉ ၼၢင်းႁေႃၶမ်း ႁူႉငိၼ်းၵႂၢမ်း ၶုၼ်ႁေႃၶမ်း ဢိၵ်ႇတင်း ၵႂၢမ်းမူးမၢတ်ႈၽွင်းမိူင်းမၼ်း ၸိူဝ်းၼၼ်ႉ သေယဝ်ႉ၊ ၶဝ်ႈၸူးၵႃႈၼႂ်းပွႆးၸဝ်ႈ ၼၼ်ႉလႄႈ ၼၢင်းႁေႃၶမ်းၼၼ်ႉ လဝ်ႊလၢတ်ႈလႄႈဝႃႈ၊ ၸဝ်ႈၶုၼ်လူင်တီႈၶႃႈ၊ ႁႂ်ႈဢသၢၵ်ႈၸဝ်ႈႁဝ်း လိပ်းယူႇတႃႇသေႇမၼ်ႈၶိူင်ႇ သေၵမ်းလူၺ်ႈ။ ယႃႇပေမီး တၢင်းဢၼ် မႆႈၸႂ်ႁွၼ်ႉၸႂ် သေၵမ်းတီႈၶႃႈ၊-

11ၵူၼ်းဢၼ်ပျေႉၸုမ်ႇဝႆႉတင်း ဝီႉၺိၺ်ႇၽြႃး ဢၼ်မူတ်းၸၢင်ႇ တင်းလၢႆ ၼၼ်ႉ ၵေႃႉၼိုင်ႈ မီးယူႇၵႃႈၼႂ်း သိုင်ႇၸိုင်ႈဝၢၼ်ႈမိူင်းၸဝ်ႈႁဝ်း ဢေႃႈ။ ၼႂ်းၸူဝ်ႈၼႂ်းပၢၼ် ၸဝ်ႈပေႃႈၸဝ်ႈႁဝ်းၼၼ်ႉ၊ လႆႈထူပ်းတၢင်းၵတ်ႉတၢင်းၶၼ်၊ ၺၢၼ်ႇပိင်ႇၺႃႇ ဢၼ်မိူၼ်ၸိူဝ်ႉၼင်ႇ ပိင်ႇၺႃႇၽြႃးတင်းလၢႆၼၼ်ႉ ၵႃႈၼႂ်းၵေႃႉၼၼ်ႉဢေႃႈ။ ၸဝ်ႈပေႃႈၸဝ်ႈႁဝ်း ၼေႇပူႉၶတ်ႉၼေႇၸႃႇ ဢၼ်ဝႃႈ ၸဝ်ႈပေႃႈၸဝ်ႈႁဝ်းၼၼ်ႉ ဢဝ်ၵေႃႉၼၼ်ႉၶၢၼ်းဝႆႉ ႁႂ်ႈပဵၼ်ၵေႃႉဢၼ်ဢုပ်ႉၵႃႈၼိူဝ် မႃႇၵူႉပိင်ႇၺႃႇသီႉ၊ မေႃပေႇတၢင်ႇ၊ သြႃႇ ၶႃႇလတေး ၊ သြႃႇဢၼႃႇၵၢတ်ႈတီႉ တင်းလၢႆ ဢေႃႈ။-

12လွင်ႈမၼ်းၸမ်ႉ လႆႈထူပ်းၸႂ်ဝီႉၺိၺ်ႇ ဢၼ်လၢၵ်ႇလၢႆး ဢိၵ်ႇတင်းၺၢၼ်ႇ၊ ပိင်ႇၺႃႇ၊ တၢင်းဢၼ် မွၵ်ႇလၢတ်ႈဢၼၢၵ်ႈ တၢင်းဢၼ် ၽၼ်ႁၼ်၊ တၢင်းဢၼ်ၽုၺ်ႇဢွၵ်ႇၼႄပျႃး လွင်ႈတၢင်းဢၼ်လိုၵ်ႉလမ်ႇ ယၢပ်ႇၽိုတ်ႇ၊ တၢင်းဢၼ် ၵႄႈလိတ်ႈပုၵ်ႈသႃႇ တၢင်းဢၼ်တွင်ႈ ဢၼ်ထၢမ်ၼၼ်ႉ ၵႃႈၼႂ်းၵေႃႉၼၼ်ႉ ဢၼ်ဝႃႈ တၢၼ်ႇယေႇလႃႉ ဢၼ်ၶုၼ်ႁေႃၶမ်းၼၼ်ႉ ဢဵတ်းလူ ပၼ်ၸိုဝ်ႈပၼ်သဵင် ပေႇလတႃႉသႃႇၸႃႇ ၼၼ်ႉ တီႈၶႃႈဢေႃႈ။ ပေႃးၸဝ်ႈႁဝ်းႁွင်ႉ တၢၼ်ႇယေႇလႃႉ ၸိုင်၊ မၼ်းတၵ်း ၽုၺ်ႇဢွၵ်ႇၼႄပျႃး ဢၼၢၵ်ႈမၼ်း တီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊

13တၢၼ်ႇယေႇလႃႉ လႆႈၶၢမ်ႇတၢင်းဢၼ် ႁွင်ႉသႂၢင်းၶဝ်ႈၸူး ၵႃႈတီႈၶုၼ်ႁေႃၶမ်းဢေႃႈ။ ၶုၼ်ႁေႃၶမ်း ထၢမ်တီႈ တၢၼ်ႇယေႇလႃႉ လႄႈဝႃႈ၊ မႂ်းၸႂ်ႈ တၢၼ်ႇယေႇလႃႉ ဢၼ်ၶဝ်ႈပႃး ၼႂ်းမုၵ်ႉၵူၼ်းၸိူဝ်းၵူၼ်း ယူႉတႃႉ ဢၼ်ၸဝ်ႈပေႃႈၵဝ် ၶုၼ်ႁေႃၶမ်းၼၼ်ႉ သိမ်းဢဝ်ဢွၵ်ႇသေ ၵႃႈၼႂ်းမိူင်း ယူႉတႃႉ မႃး ၸိူဝ်းၼၼ်ႉႁိုဝ်။-

14ၵဝ်ငိၼ်း သတၢင်းသဵင်ၶၢဝ်ႇမႂ်း လွင်ႈဢၼ်မႂ်းပျေႉၸုမ်ႇဝႆႉ တင်းဝီႉၺိၺ်ႇၽြႃး တင်းလၢႆ ဢိၵ်ႇတင်း လွင်ႈဢၼ်လႆႈထူပ်းတၢင်းၵတ်ႉ တၢင်းၶၼ်၊ ၺၢၼ်ႇ၊ ပိင်ႇၺႃႇဢၼ်လၢၵ်ႇလၢႆး ၵႃႈၼႂ်းမႂ်းၼၼ်ႉယဝ်ႉ။-

15ပိၵ်ႉသမ်ႉ ဢဝ်မေႃပေႇတၢင်ႇ ဢိၵ်ႇတင်း ပိင်ႇၺႃႇသီႉ တင်းလၢႆ မႃးသႂၢင်းၶဝ်ႈတီႈၵဝ် ႁႂ်ႈၶဝ်ၽတ်းလိၵ်ႈ ၼၼ်ႉလႄႈ ၽုၺ်ႇဢွၵ်ႇ ၼႄပျႃးဢၼၢၵ်ႈမၼ်းတီႈၵဝ် သေၵေႃႈ ၶဝ်ၼၼ်ႉ ဢမ်ႇဢွၼ်ၵၼ်ၽုၺ်ႇဢွၵ်ႇ ၼႄပျႃးဢၼၢၵ်ႈမၼ်းလႆႈ။-

16ၵဝ်လႆႈငိၼ်းလွင်ႈ ဢၼ်မႂ်းၽုၺ်ႇဢွၵ်ႇ ၼႄပျႃးဢၼၢၵ်ႈ တင်းလၢႆလႄႈ ၵႄႈလိတ်ႈပုၵ်ႈသႃႇ တၢင်းဢၼ် တွင်ႈထၢမ် တင်းလၢႆ ၼၼ်ႉယဝ်ႉ။ ပေႃးမႂ်းၽတ်းလိၵ်ႈ ၼၼ်ႉလႄႈ ၽုၺ်ႇဢွၵ်ႇ ၼႄပျႃးဢၼၢၵ်ႈမၼ်း တီႈၵဝ်လႆႈၸိုင်၊ မႂ်းတၵ်းလႆႈၶၢမ်ႇတၢင်းဢၼ် ဢဝ်ၶူဝ်းဢၼ်လႅင်ၵမ်ႇ ၼုင်ႈမႆပၼ်လႄႈ ဢဝ်ၸရွႆႇၶမ်းႁွႆႈသႂ်ႇပၼ် တီႈၶေႃးသေလႄႈ ပဵၼ်ၶုၼ်တႃႉတီႉယႃႉ ၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈဢေႃႈ၊ ဝႃႈၼင်ႇၼႆဢေႃႈ။-

17တၢၼ်ႇယေႇလႃႉ ၵေႃႈ လဝ်ႊလၢတ်ႈတီႈ ၶုၼ်ႁေႃၶမ်းလႄႈဝႃႈ၊ ႁႂ်ႈသူးၸဝ်ႈလၢပ်ႈၸဝ်ႈၼၼ်ႉ မီးတီႈၸဝ်ႈႁဝ်းသေၵမ်းတီႈၶႃႈ၊ ဢဝ်လွင်ႈတၢင်းဢၼ်ၶႂ်ႈပၼ် ၸိူဝ်းၼၼ်ႉ ပၼ်တီႈပိူၼ်ႈတၢင်ႇၵေႃႉ သေၵမ်းတီႈၶႃႈ၊ ၵူၺ်းၵႃႈ ၶႃႈၸဝ်ႈ တၵ်းၽတ်းလိၵ်ႈၼၼ်ႉ တီႈၸဝ်ႈၶုၼ်လူင်လႄႈ ၽုၺ်ႇဢွၵ်ႇၼႄပျႃး ဢၼၢၵ်ႈမၼ်း တီႈၸဝ်ႈႁဝ်း တီႈၶႃႈဢေႃႈ။-

18ၸဝ်ႈၶုၼ်လူင်တီႈၶႃႈ၊ ၽြႃးပဵၼ်ၸဝ်ႈ ဢၼ်သုင်ၼႃႇသေပိူၼ်ႈၼၼ်ႉ ဢဵတ်းလူ ပၼ်သိုင်ႇၸိုင်ႈဝၢၼ်ႈမိူင်းၸဝ်ႈ ဢိၵ်ႇတင်း မုၼ်ၽုင်းၶမ်းၸဝ်ႈ တင်းၵုင်ႇသရေႇၸဝ်ႈ တင်းဢႃႇၼူႉၽေႃႇၸဝ်ႈ တီႈၸဝ်ႈပေႃႈၸဝ်ႈႁဝ်း ၶုၼ်လူင် ၼေႇပူႉၶတ်ႉၼေႇၸႃႇ ၼၼ်ႉ တီႈၶႃႈဢေႃႈ။-

20မိူဝ်ႈဢၼ်မၼ်းၸဝ်ႈ မီးၸႂ်မၢၼ်ႇမႃႇၼႃႉလႄႈ မီးတၢင်းဢၼ် ၸႂ်ၵႅၼ်ႇၸႂ်ၶႅင်ထၼ်ႈပေႃး ႁဵတ်းဢမ်ႇပေႃးၼင်ႇႁိုဝ် တီႈပိူၼ်ႈ ၼၼ်ႉၸိုင်၊ မၼ်းၸဝ်ႈ လႆႈၶၢမ်ႇတၢင်းဢၼ်ဢဝ် တူၵ်းလူင်းသေ ၵႃႈၼိူဝ်ႁေႃၶမ်းလႄႈ မုၼ်ၽုင်းတၼ်းၶူဝ်း မၼ်းၸဝ်ႈ လပ်ႉႁၢႆၵႂႃႇတီႈၶႃႈဢေႃႈ။-

21မၼ်းၸဝ်ႈ ၶၢမ်ႇတၢင်းဢၼ် ႁေႃႈဢွၵ်ႇပႅတ်ႈသေ ၵႃႈၼႂ်းမုၵ်ႉၵူၼ်း ၸိူဝ်းၵူၼ်းလႄႈ ပျေႉၸုမ်ႇဝႆႉ တင်းသၽေႃးတရိၵ်ႈသၢၼ်ႇ တီႈၶႃႈဢေႃႈ။ မၼ်းၸဝ်ႈ တူၵ်းတီႈယူႇတီႈသဝ်း လူၺ်ႈၵၼ်တင်း လီႈဢၼ်ရိူင်း တင်းလၢႆယူႇ၊ ၵိၼ်ယိူဝ်ႈၵိၼ်ယႃႈ မိူၼ်ၸိူဝ်ႉၼင်ႇဝူဝ်းၼၼ်ႉယူႇ သေလႄႈ တူဝ်မၼ်းၸဝ်ႈ လႆႈၶၢမ်ႇတၢင်းဢၼ် ယမ်းၽူၼ်ယမ်းၼၢႆးယူႇ တေႃႇထိုင်ႁွတ်ႈ မၼ်းၸဝ်ႈႁူႉၸႅင်ႈ လွင်ႈဢၼ် ၽြႃးပဵၼ်ၸဝ်ႈ ဢၼ်သုင်ၼႃႇသေပိူၼ်ႈၼၼ်ႉ ဢုပ်ႉပိူင်ႇမိူင်းလေႃးၵီႇလႄႈ ဢၢပ်ႈပၼ်တီႈၵေႃႉဢၼ် မၼ်းၸဝ်ႈ မီးဢလူဝ်ႇၶႂ်ႈပၼ်ၼၼ်ႉ တီႈၶႃႈဢေႃႈ။-

22ပေႇလသႃႇၸႃႇ ဢၼ်ပဵၼ် လုၵ်ႈၸၢႆးမၼ်းၸဝ်ႈ ၼၼ်ႉတီႈၶႃႈ၊ ပိၵ်ႉသမ်ႉ ၸဝ်ႈႁဝ်းႁူႉလွင်ႈတၢင်းၼၼ်ႉ ၵူႈၸိူဝ်ႉၵူႈပိူင် သေၵေႃႈ ၸဝ်ႈႁဝ်းယင်းဢမ်ႇၶျႃး ႁူဝ်ၸႂ်ၸဝ်ႈႁဝ်း တူၵ်းတီႈတႅမ်ႇလႄႈ-

23ႁဵတ်းၶတ်းၵၼ် တင်းၸဝ်ႈၽုင်ႇၵၢင်ႁၢဝ် ယူႇသေလႄႈ ႁႂ်ႈဢဝ်ၵွၵ်းပိၵ်ႈမၢၼ်ႇၸဝ်ႈ ၸိူဝ်းၼၼ်ႉ မႃးသႂၢင်းၶဝ်ႈၵႃႈတီႈၽၢႆႇၼႃႈ ၸဝ်ႈႁဝ်းလႄႈ တူဝ်ၸဝ်ႈႁဝ်း ဢိၵ်ႇတင်း မူးမၢတ်ႈၽွင်းမိူင်းၸဝ်ႈႁဝ်း၊ ၼၢင်းႁေႃၶမ်းၸဝ်ႈႁဝ်း၊ ၸိူင်ႉၼၢင်းၸဝ်ႈႁဝ်း ၸိူဝ်းၼၼ်ႉ ဢွၼ်ၵၼ်ဢဝ်ၵွၵ်း ၸိူဝ်းၼၼ်ႉ သူတ်ႉၵိၼ်ၼမ်ႉၸပိတ်ႈလႄႈ ဢွၼ်ၵၼ် ယွင်ႈယေႃးၽြႃးငိုၼ်း ၽြႃးၶမ်း၊ ၽြႃးတွင်းလိူင်၊ ၽြႃးလဵၵ်း၊ ၽြႃးမႆႉ၊ ၽြႃးမၢၵ်ႇႁိၼ် ဢၼ်မၢၵ်ႇတႃဢမ်ႇႁၼ်၊ ႁူဢမ်ႇငိၼ်း၊ ဢမ်ႇႁူႉၵႃႈသင် လႃးလႃး ၸိူဝ်းၼၼ်ႉယူႇ သေလႄႈ ယင်းဢမ်ႇယွင်ႈယေႃး ၽြႃးပဵၼ်ၸဝ်ႈ ဢၼ်ဢုပ်ႉပိူင်ႇဢသၢၵ်ႈ တၢင်းဢၼ် ထူၺ်ႈၸႂ်ၶဝ်ႈထူၺ်ႈၸႂ်ဢွၵ်ႇ ၸဝ်ႈႁဝ်း၊ ဢၼ်ၸီႇယၢင်ႇ သဵၼ်ႈတၢင်းၵႃႈဢၼ် ၸဝ်ႈႁဝ်းၸွမ်း ၼၼ်ႉလႄႈယူႇယဝ်ႉ တီႈၶႃႈလူင်ပႄႇ။-

24ပိူဝ်ႈၼႆလႄႈ မၼ်းၸဝ်ႈၼၼ်ႉ ပွႆႇၸႂ်ႉပၢႆမိုဝ်းၼၼ်ႉမႃးလႄႈ တႅမ်ႈလိၵ်ႈၼၼ်ႉဝႆႉ တီႈၶႃႈဢေႃႈ။-

25ၵႂၢမ်းလိၵ်ႈဢၼ်တႅမ်ႈဝႆႉၼၼ်ႉဝႃႈၸမ်ႉ၊ မေႇၼေႇ၊ မေႇၼေႇ၊ တေႇၵလႃႉ၊ ဢူႉၽႃႇၸိၼ်း၊ ဝႃႈၼင်ႇၼႆ တီႈၶႃႈဢေႃႈ။-

26ဢၼၢၵ်ႈဢထိၵ်ႈပႄႇဢၼ်ဝႃႈ မေႇၼေႇ ၼၼ်ႉၸမ်ႉ၊ ၽြႃးပဵၼ်ၸဝ်ႈ ၼပ်ႉဢၢၼ်ႇ သိုင်ႇၸိုင်ႈဝၢၼ်ႈမိူင်း ၸဝ်ႈႁဝ်းလႄႈ ႁႂ်ႈမၼ်းသုတ်းၵႂႃႇ ၵွႆၵႂႃႇ တီႈၶႃႈဢေႃႈ။-

27ဢၼၢၵ်ႈဢထိၵ်ႈပႄႇဢၼ်ဝႃႈ တေႇၵလႃႉ ၼၼ်ႉၸမ်ႉ၊ မၼ်းၸဝ်ႈဢဝ်ယႃႇၸူႇ ၸင်ႈႁိဝ်ႈၸဝ်ႈႁဝ်းလႄႈ ထူပ်းႁၼ်လွင်ႈဢၼ် ၸဝ်ႈႁဝ်း ယွမ်းၵႂႃႇၼၼ်ႉ တီႈၶႃႈဢေႃႈ။-

28ဢၼၢၵ်ႈဢထိၵ်ႈပႄႇ ဢၼ်ဝႃႈ ၽေးရိတ်ႉ ၼၼ်ႉၸမ်ႉ၊ မၼ်းၸဝ်ႈ ၽႄဢဝ် သိုင်ႇၸိုင်ႈဝၢၼ်ႈမိူင်း ၸဝ်ႈႁဝ်းလႄႈ ဢၢပ်ႈပၼ် တီႈၵူၼ်း မေႇတီႉ ၊ ၵူၼ်း ပေႇရသီႉ ၸိူဝ်းၼၼ်ႉ တီႈၶႃႈဢေႃႈ၊ ဝႃႈၼင်ႇၼႆဢေႃႈ။-

29မိူဝ်ႈၼၼ်ႉ ၶုၼ်လူင် ပေႇလသႃႇၸႃႇ မီးဢမိင်ႉလႄႈ ၶဝ်ဢွၼ်ၵၼ် ဢဝ်ၶူဝ်းဢၼ်လႅင်ၵမ်ႇ ၼုင်ႈမႆပၼ် တၢၼ်ႇယေႇလႃႉ လႄႈ ဢဝ်ၸရွႆႇၶမ်း ႁွႆႈသႂ်ႇပၼ်ၵႃႈတီႈၶေႃးမၼ်း သေယဝ်ႉ၊ ဢဝ်လွင်ႈမၼ်းႁွင်ႉပၢဝ်ႇႁွင်ႉသေႃႇ လူၺ်ႈလွင်ႈဢၼ် မၼ်းပဵၼ် ၶုၼ်တႃႉတီႉယႃႉ ၵႃႈၼႂ်း သိုင်ႇၸိုင်ႈဝၢၼ်ႈမိူင်းၸဝ်ႈ ၼၼ်ႉဢေႃႈ။-

30ၼႂ်းၶိုၼ်းၼၼ်ႉ ၵမ်းလဵဝ်၊ ပေႇလသႃႇၸႃႇ ၶုၼ်ႁေႃၶမ်း ၶႃႇလတေး ၼၼ်ႉ သုမ်းဢသၢၵ်ႈလႄႈ၊-

31ၶုၼ် တႃႇရီႉ မဵဝ်း မေႇတီႉ ၼၼ်ႉ သိမ်းဢဝ် သိုင်ႇၸိုင်ႈဝၢၼ်ႈမိူင်း ၸဝ်ႈၼၼ်ႉ ၼႂ်းပီႊဢၼ်ဢသၢၵ်ႈမၼ်းလႆႈ ႁူၵ်းသိပ်းပၢႆသွင်ပီႊ ၼၼ်ႉဢေႃႈ။