Daniel 2 — Shan

1ၼႂ်းပီႈဢၼ် ၼေႇပူႉၶတ်ႉၼေႇၸႃႇ ၸၢမ်ႇႁၢင်ႈၸၢမ်ႇႁေႃ ပီႊတူႉတီႉယႃႉၼၼ်ႉ၊ ၼေႇပူႉၶတ်ႉၼေႇၸႃႇ ၼွၼ်းၽၼ်ႁၼ်လႄႈ မီးတၢင်းဢၼ်တူၵ်းၸႂ် သေလႄႈ ၼွၼ်းလႄႈ ဢမ်ႇလပ်းလႆႈ။-

2မိူဝ်ႈၼၼ်ႉ ၶုၼ်ႁေႃၶမ်းမီးဢမိင်ႉ ႁႂ်ႈႁွင်ႉဢဝ်မႃႇၵူႉပိင်ႇၺႃႇသီႉ၊ မေႃပေႇတၢင်ႇ၊ သြႃႇဢၼ်ၸၢင်ႈၸေႃႉၸၢင်ႈႁဵတ်း၊ သြႃႇ ၶႃႇလတေး တင်းလၢႆမႃး ႁႂ်ႈၶဝ်ၶိုၼ်းလၢတ်ႈပၼ် တၢင်းဢၼ်ၽၼ်ႁၼ်ၼၼ်ႉ တီႈၶုၼ်ႁေႃၶမ်းလႄႈ ၶဝ်ၼၼ်ႉ ဢွၼ်ၵၼ်ႁွတ်ႈမႃး ၸွမ်းၵႃႈၼင်ႇဢၼ် ဢမိင်ႉၸဝ်ႈမီးၼၼ်ႉလႄႈ ၸုၵ်းယူႇ ၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။-

3ၶုၼ်ႁေႃၶမ်းၵေႃႈ လၢတ်ႈတီႈၶဝ်လႄႈဝႃႈ၊ ၵဝ်ၼွၼ်းၽၼ်ႁၼ်ယဝ်ႉ။ ႁူဝ်ၸႂ်ၵဝ်မီးတၢင်းဢၼ် ၵႂင်ၸႂ်ယုင်ႈၸႂ်ယူႇ ၵွပ်ႈပိူဝ်ႈ ဢၼ်ဢမ်ႇႁူႉ တၢင်းဢၼ်ၽၼ်ႁၼ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။-

4ပိင်ႇၺႃႇသီႉ ၶႃႇလတေး ၸိူဝ်းၼၼ်ႉၵေႃႈ ဢွၼ်ၵၼ် ဢဝ်ၽႃႇသႃႇၵႂၢမ်း သူႉရီႉ လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ၸဝ်ႈၶုၼ်လူင်တီႈၶႃႈ၊ ႁႂ်ႈဢသၢၵ်ႈၸဝ်ႈႁဝ်းလိပ်းယူႇမၼ်ႈၶိူင်ႇ သေၵမ်းလူၺ်ႈတီႈၶႃႈ၊ ၶႅၼ်းတေႃႈမီးဢမိင်ႉ တၢင်းဢၼ်ၽၼ်ႁၼ် ၸဝ်ႈႁဝ်းတီႈၶႃႈၸဝ်ႈႁဝ်းၶဝ် သေၵမ်းတီႈၶႃႈ၊ ၶႃႈၸဝ်ႈႁဝ်းၶဝ် တၵ်းၽုၺ်ႇဢွၵ်ႇၼႄပျႃး ဢၼၢၵ်ႈမၼ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

5ၶုၼ်ႁေႃၶမ်းၵေႃႈ လၢတ်ႈတီႈပိင်ႇၺႃႇသီႉ ၶႃႇလတေး ၸိူဝ်းၼၼ်ႉလႄႈဝႃႈ၊ လွင်ႈၼၼ်ႉ လပ်ႉႁၢႆၵႂႃႇသေၵႃႈတီႈၵဝ်ယဝ်ႉ။ ပေႃးသူ ဢမ်ႇၽုၺ်ႇဢွၵ်ႇၼႄပျႃး တၢင်းဢၼ်ၽၼ်ႁၼ် ဢိၵ်ႇတင်း ဢၼၢၵ်ႈမၼ်းၼၼ်ႉၸိုင်၊ သူတၵ်းလႆႈၶၢမ်ႇတၢင်းဢၼ်တႅပ်းၽၼ်း ပဵၼ်ပွတ်းပဵၼ်တွၼ်ႈပႅတ်ႈလႄႈ ႁိူၼ်းသူၵေႃႈ တၵ်းလႆႈၶၢမ်ႇတၢင်းဢၼ်ႁဵတ်းႁႂ်ႈပဵၼ်ၵွင် ၶီႈဝူဝ်းၶီႈၵႂၢႆး ပႅတ်ႈဢေႃႈ။-

6ပေႃးသူ ၽုၺ်ႇဢွၵ်ႇၼႄပျႃး တၢင်းဢၼ်ၽၼ်ႁၼ် ဢိၵ်ႇတင်း ဢၼၢၵ်ႈမၼ်းၸိုင်၊ သူတၵ်းလႆႈၶၢမ်ႇဢဝ် တၢင်းဢၼ်မုၼ်ႁူမ်ႇ၊ ဢိၵ်ႇတင်း သူးလၢပ်ႈ တင်းမုၼ်ၵုင်ႇသရေႇ ၼမ်ၼႃႇတီႈၵဝ်ဢေႃႈ။ ပိူဝ်ႈဢၼ် ပဵၼ်ၼင်ႇၼႆလႄႈ ဢွၼ်ၵၼ်ၽုၺ်ႇဢွၵ်ႇၼႄပျႃး တၢင်းဢၼ် ၽၼ်ႁၼ် ဢိၵ်ႇတင်း ဢၼၢၵ်ႈမၼ်း တီႈၵဝ်တႃႉ၊ ဝႃႈၼင်ႇၼႆဢေႃႈ။-

7ၶဝ်ၼၼ်ႉ သမ်ႉၶိုၼ်း ဢွၼ်ၵၼ် လဝ်ႊလၢတ်ႈပွၵ်ႈတူႉတီႉယႃႉထႅင်ႈလႄႈဝႃႈ၊ ၸဝ်ႈၶုၼ်လူင်တီႈၶႃႈ၊ ၶႅၼ်းတေႃႈ မီးဢမိင်ႉ တၢင်းဢၼ်ၽၼ်ႁၼ် ၸဝ်ႈႁဝ်းၼၼ်ႉ တီႈၶႃႈၸဝ်ႈႁဝ်းၶဝ် သေၵမ်းတီႈၶႃႈ၊ ၶႃႈၸဝ်ႈႁဝ်းၶဝ် တၵ်းၽုၺ်ႇဢွၵ်ႇၼႄပျႃး ဢၼၢၵ်ႈမၼ်းတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

8ၶုၼ်ႁေႃၶမ်း သမ်ႉၶိုၼ်းမီးဢမိင်ႉလႄႈဝႃႈ၊ ၵွပ်ႈပိူဝ်ႈဢၼ် လွင်ႈၼၼ်ႉ လပ်ႉႁၢႆၵႂႃႇသေၵႃႈတီႈၵဝ်လႄႈ ၵဝ်ႁူႉလွင်ႈဢၼ် သူၶႂ်ႈႁဵတ်း ႁႂ်ႈမိုဝ်ႉဝၼ်းၶိင်ႇၵႃႇလႃႉ ပဵၼ်ဢၼ်ႁိုင်ဢၼ်ၼၢၼ်း ၼၼ်ႉယူႇ ဢမၢၼ်ႇၶၼ်ပဵၼ်ဢေႃႈ။-

9ပေႃးသူ ၽုၺ်ႇဢွၵ်ႇၼႄပျႃး တၢင်းဢၼ်ၽၼ်ႁၼ် ၼၼ်ႉၸိုင်၊ သူမီးတၢင်းၵျၢမ်ႇတၢင်းပွင် ဢၼ်လဵဝ်ၵၼ်လႄႈ ဢွၼ်ၵၼ် မႄးႁၢင်ႈမႄးပွင်ၵႂၢမ်းဢၼ် ၵူတ်ႉငွၵ်းလိင်ႇလႅၼ် ပုၼ်ႈဢၼ်တၵ်းလဝ်ႊလၢတ်ႈ ၵႃႈတီႈၽၢႆႇၼႃႈၵဝ် ႁႂ်ႈထၼ်ႈပေႃးတေႃႇထိုင်ႁွတ်ႈ ၶိင်ႇၵႃႇလႃႉ ၶၢႆႉပုတ်ႈၵႂႃႇၼၼ်ႉယဝ်ႉ။ ပိူဝ်ႈၼႆလႄႈ ဢွၼ်ၵၼ်ၶိုၼ်းလၢတ်ႈ တၢင်းဢၼ် ၽၼ်ႁၼ်ၼၼ်ႉတႃႉ။ ပေႃးလၢတ်ႈၸိူဝ်ႉၼင်ႇၼၼ်ၸိုင်၊ ၵဝ်တၵ်းႁူႉလွင်ႈ ဢၼ်သူၽုၺ်ႇဢွၵ်ႇၼႄပျႃး ဢၼၢၵ်ႈမၼ်းလႆႈၼၼ်ႉဢေႃႈ၊ ဝႃႈၼင်ႇၼႆဢေႃႈ။-

10သြႃႇ ၶႃႇလတေး ၸိူဝ်းၼၼ်ႉၵေႃႈ သမ်ႉၶိုၼ်းလဝ်ႊလၢတ်ႈ ၵႃႈတီႈၽၢႆႇၼႃႈၶုၼ်ႁေႃၶမ်း လႄႈဝႃႈ၊ ၵေႃႉဢၼ်တၵ်းၵႄႈလိတ်ႈ ဢမူႉလွင်ႈတၢင်း ၸဝ်ႈၶုၼ်လူင်လႆႈၼၼ်ႉ၊ ၵႃႈၼိူဝ်လိၼ်မိူင်းၼႆႉ ဢမ်ႇမီးသေၵေႃႉသေၵူၼ်းတီႈၶႃႈ၊ ၶုၼ်ႁေႃၶမ်းပႃးလႂ်သေဢမ်ႇဝႃႈ၊ ပိၵ်ႉသမ်ႉမီးမုၼ်ၽုင်းတၼ်းၶူဝ်း ဢၼ်ယႂ်ႇၼႃႇသေၵေႃႈ၊ ဢမ်ႇတွၼ်ႉထၢမ်တီႈ မႃႇၵူႉပိင်ႇၺႃႇသီႉ၊ မေႃပေႇတၢင်ႇ၊ သြႃႇ ၶႃႇလတေး တင်းလၢႆ ၸိူဝ်းၼႆႉတီႈၶႃႈ၊-

11လွင်ႈတၢင်းဢၼ် ၸဝ်ႈၶုၼ်လူင် တွင်ႈထၢမ်ၼႆႉ ပဵၼ်လွင်ႈတၢင်းဢၼ်လိုၵ်ႉဢၼ်လမ်ႇတီႈၶႃႈဢေႃႈ။ လိူဝ်သေၽြႃးဢၼ် ဢမ်ႇယူႇလူၺ်ႈၼိူဝ်ႉ လူၺ်ႈၼင်ၼၼ်ႉ၊ ၽူႈလႂ်သေၵေႃႉသေၵူၼ်း ဢမ်ႇၽုၺ်ႇဢွၵ်ႇၼႄပျႃး ၵႃႈတီႈၽၢႆႇၼႃႈၸဝ်ႈၶုၼ်လူင်လႆႈတီႈၶႃႈ၊ ဝႃႈၼင်ႇၼႆဢေႃႈ။-

12ၵွပ်ႈပိူဝ်ႈ ၵႂၢမ်းၼၼ်ႉလႄႈ ၶုၼ်ႁေႃၶမ်းၸႂ်မႆႈၶႆႈၸႃႉလႄႈ ဢၢႆႁႅင်းတေႃးသႃႉ ဢွၵ်ႇႁႅင်းယႂ်ႇၼႃႇလူင်လၢင် သေလႄႈ မီးဢမိင်ႉႁႂ်ႈပႄႇၽဵဝ်ႈ ပိင်ႇၺႃႇသီႉၵႃႈဢၼ်မီးၵႃႈၼႂ်း ဝဵင်း ပႃႇပူႉလုၼ်ႇ ၼၼ်ႉပႅတ်ႈဢေႃႈ။-

13ဢဝ်ဢမိင်ႉ ၸဝ်ႈလွင်ႈဢၼ် တၵ်းလႆႈဢဝ်ပိင်ႇၺႃႇသီႉ တင်းလၢႆ တၢႆၼၼ်ႉ သင်ႇလၢတ်ႈသေယဝ်ႉ၊ မိူဝ်ႈဢၼ်ၶဝ်ဢွၼ်ၵၼ် ႁႃႁႂ်ႈလႆႈဢဝ် တၢၼ်ႇယေႇလႃႉ ဢိၵ်ႇတင်း ၵေႃႉဢၼ်ႁူမ်ႈၵၼ်ပွင်းၵၼ် တင်းမၼ်းၸိူဝ်းၼၼ်ႉ တၢႆၼၼ်ႉၸိုင်။

14တၢၼ်ႇယေႇလႃႉ ပႃးတင်းသတီႉပိင်ႇၺႃႇ သေလႄႈ လၢတ်ႈၵႂၢမ်းတေႃႇၵၼ်တင်း ဢႃႇရွၵ်ႉ ၵူဝ်ႇရမ်ႇတေႃႇမူးဢၼ်ဢွၵ်ႇႁႂ်ႈလႆႈပႄႇၽဵဝ်ႈ ပိင်ႇၺႃႇသီႉ ပႃႇပူႉလုၼ်ႇ တင်းလၢႆ ပႅတ်ႈၼၼ်ႉဢေႃႈ။-

15မၼ်းတွင်ႈထၢမ် တီႈ ဢႃႇရွၵ်ႉ ၵူဝ်ႇရမ်ႇတေႃႇမူး ၶုၼ်ႁေႃၶမ်း လႄႈဝႃႈ၊ ၵွပ်ႈပိူဝ်ႈ ၸိူဝ်ႉၼင်ႇႁိုဝ်လႄႈ ဢမိင်ႉၶုၼ်ႁေႃၶမ်းၼၼ်ႉ ၶၼ်ၽႂ်းထၢၼ်ႇၼႆႉၼင်ႇႁိုဝ်။ ဝႃႈၼင်ႇၼႆလႄႈ ဢႃႇရွၵ်ႉ ၼၼ်ႉ မွၵ်ႇလၢတ်ႈလွင်ႈမၼ်း တီႈ တၢၼ်ႇယေႇလႃႉ သေယဝ်ႉ၊-

16တၢၼ်ႇယေႇလႃႉ ၼၼ်ႉ ၶဝ်ႈၵႃႈၼႂ်းႁေႃလႄႈ လဝ်ႊယွၼ်းဢဝ်တီႈ ၶုၼ်ႁေႃၶမ်း ႁႂ်ႈမၼ်းပၼ် ၶိင်ႇမိူဝ်ႈဝၼ်းဢၼ်လႆႈ ၽုၺ်ႇဢွၵ်ႇ ၼႄပျႃးဢၼၢၵ်ႈ တီႈၶုၼ်ႁေႃၶမ်းၼၼ်ႉဢေႃႈ။-

17မိူဝ်ႈၼၼ်ႉ တၢၼ်ႇယေႇလႃႉ ၶိုၼ်းမိူဝ်းၵႂႃႇ ၵႃႈတီႈႁိူၼ်းမၼ်းလႄႈ မွၵ်ႇလၢတ်ႈပၼ်ငိၼ်းလွင်ႈၼၼ်ႉ တီႈၵေႃႉသေႈမၼ်း ႁႃႇၼၼီႉ၊ မီႉသေႇလႃႉ၊ ဢႃႇၸရီႉ ၸိူဝ်းၼၼ်ႉ၊-

18လွင်ႈၼင်ႇႁိုဝ် ၶဝ်တၵ်းဢွၼ်ၵၼ်သူးတွင်း ႁႂ်ႈလႆႈၶၢမ်ႇဢဝ်ၵျေးၸူးၵရူႉၼႃႇ ၽြႃးပဵၼ်ၸဝ်ႈ ၽုင်ႇၵၢင်ႁၢဝ် ၼႂ်းလွင်ႈတၢင်းဢၼ်လိုၵ်ႉဢၼ်လမ်ႇၼၼ်ႉ ႁႂ်ႈ တၢၼ်ႇယေႇလႃႉ ဢိၵ်ႇတင်း ၵေႃႉသေႈမၼ်းၸိူဝ်းၼၼ်ႉ ဢမ်ႇလႆႈတၢႆလူၺ်ႈၵၼ်တင်း ပိင်ႇၺႃႇသီႉ ပႃႇပူႉလုၼ်ႇ ၸိူဝ်းၼၼ်ႉဢေႃႈ။-

19မိူဝ်ႈၼၼ်ႉ လွင်ႈတၢင်းဢၼ်လိုၵ်ႉဢၼ်လမ်ႇၼၼ်ႉ ထၢင်ႇသႃးပေႃႇမႃး တီႈ တၢၼ်ႇယေႇလႃႉ ၼႂ်းပျႃႇတိၵ်ႈရူႇပႃႇရူင်ႇ ၶိင်ႇၵၢင်ၶိုၼ်း ဢေႃႈ။ မိူဝ်ႈၼၼ်ႉ တၢၼ်ႇယေႇလႃႉ ယွင်ႈယေႃးၵျေးၸူး ၽြႃးပဵၼ်ၸဝ်ႈ၊ ၸဝ်ႈၽုင်ႇၵၢင်ႁၢဝ်လႄႈ၊-

20တၢၼ်ႇယေႇလႃႉ လဝ်ႊလၢတ်ႈလႄႈဝႃႈ၊ ႁႂ်ႈၼႃႇမႃႉၸိုဝ်ႈသဵင် ၽြႃးပဵၼ်ၸဝ်ႈ မီးမင်ႇၵလႃႇထႃႇဝရႃႉသေၵမ်းလူၺ်ႈ၊ လွင်ႈမၼ်းၸမ်ႉ မၼ်းၸဝ်ႈၼႆႉ ပျေႉၸုမ်ႇဝႆႉတင်းပိင်ႇၺႃႇ ဢိၵ်ႇတင်း တၢင်းၵတ်ႉတၢင်းၶၼ်ဢေႃႈ။-

21မၼ်းၸဝ်ႈႁႂ်ႈၶိင်ႇၵႃႇလႃႉ ဢူႉတူႉၶၢႆႉပုတ်ႈဢေႃႈ။ မၼ်းၸဝ်ႈၶျႃးၶုၼ်ႁေႃၶမ်းတူၵ်း လႄႈ ယုၵ်ႉယွင်ႈၶုၼ်ႁေႃၶမ်းဢေႃႈ။-

22မၼ်းၸဝ်ႈ ပၼ်ပိင်ႇၺႃႇ တီႈၶဝ်ၸိူဝ်းဢၼ် မီးပိင်ႇၺႃႇၼၼ်ႉလႄႈ ပၼ်တၢင်းဢၼ်ၶုတ်းမူင်ႇၸီးၸွင် ႁူႉၸႅင်ႈတီႈၶဝ်ၸိူဝ်းဢၼ် မီးၺၢၼ်ႇၼၼ်ႉဢေႃႈ။ မၼ်းၸဝ်ႈ ၼႄပျႃးလွင်ႈတၢင်း ဢၼ်လိုၵ်ႉလမ်ႇသိူင်ႇဢမ် ၸိူဝ်းၼၼ်ႉဢေႃႈ။ မၼ်းၸဝ်ႈႁူႉႁၼ်ၵႃႈဢၼ် မီးၵႃႈၼႂ်းလပ်းသိင်ႇၼၼ်ႉလႄႈ ဢၼ်လႅင်းတႄႇယူႇၵႃႈၼႂ်းမၼ်းၸဝ်ႈဢေႃႈ။-

23ၽြႃးပဵၼ်ၸဝ်ႈ ပူႇမွၼ်ႇၶႃႈၸဝ်ႈတီႈၶႃႈ၊ ၶႃႈၸဝ်ႈယွင်ႈယေႃး ၵျေးၸူးၸဝ်ႈႁဝ်းလႄႈ ႁဵတ်းထေႃးပၼႃႇတီႈၸဝ်ႈႁဝ်း ဢၼ်ဢဵတ်းလူပၼ်ပိင်ႇၺႃႇ ဢိၵ်ႇတင်း တၢင်းၵတ်ႉတၢင်းၶၼ် တီႈၶႃႈၸဝ်ႈလႄႈ ႁႂ်ႈၶႃႈၸဝ်ႈႁူႉလွင်ႈတၢင်းဢၼ် ၶႃႈၸဝ်ႈႁဝ်းၶဝ် လဝ်ႊယွၼ်း ဢဝ် တီႈၸဝ်ႈႁဝ်းၼၼ်ႉတီႈၶႃႈဢေႃႈ။ လွင်ႈမၼ်းၸမ်ႉ ၸဝ်ႈႁဝ်းႁႂ်ႈၶႃႈၸဝ်ႈႁဝ်းၶဝ်ႁူႉ ဢမူႉလွင်ႈတၢင်း ၶုၼ်ႁေႃၶမ်းၼႆႉ တီႈၶႃႈယဝ်ႉ၊ ဝႃႈၼင်ႇၼႆသေယဝ်ႉ၊

24တၢၼ်ႇယေႇလႃႉ ၵႂႃႇၸူး ၵႃႈတီႈ ဢႃႇရွၵ်ႉ ဢၼ်ၶုၼ်ႁေႃၶမ်းၶၢၼ်းဝႆႉ ႁႂ်ႈလႆႈပႄႇၽဵဝ်ႈပိင်ႇၺႃႇသီႉ ပႃႇပူႉလုၼ်ႇ ၸိူဝ်းၼၼ်ႉပႅတ်ႈၼၼ်ႉလႄႈ လၢတ်ႈလႄႈဝႃႈ၊ ယႃႇပေဢဝ်ပိင်ႇၺႃႇသီႉ ပႃႇပူႉလုၼ်ႇ ၸိူဝ်းၼၼ်ႉ တၢႆသေၵမ်းၶႃႈ။ ဢဝ်ၵဝ်ၶႃႈ သႂၢင်းၶဝ်ႈၵႃႈတီႈ ၶုၼ်ႁေႃၶမ်း သေၵမ်းၶႃႈ။ ၵဝ်ၶႃႈ တၵ်းၽုၺ်ႇဢွၵ်ႇၼႄပျႃး ဢၼၢၵ်ႈမၼ်း တီႈၶုၼ်ႁေႃၶမ်းၶႃႈဢေႃႈ၊ ဝႃႈၼင်ႇၼႆဢေႃႈ။-

25မိူဝ်ႈၼၼ်ႉ ဢႃႇရွၵ်ႉ ၼၼ်ႉ ႁိပ်ႈၼႅတ်ႈဢဝ် တၢၼ်ႇယေႇလႃႉ သႂၢင်းၶဝ်ႈၵႃႈတီႈၽၢႆႇၼႃႈ ၶုၼ်ႁေႃၶမ်း သေလႄႈ လဝ်ႊလၢတ်ႈလႄႈဝႃႈ၊ ၶႃႈၸဝ်ႈထူပ်းႁၼ် ၵူၼ်းဢၼ်တၵ်း ၽုၺ်ႇဢွၵ်ႇ ၼႄပျႃးဢၼၢၵ်ႈမၼ်း တီႈၸဝ်ႈႁဝ်းလႆႈၼၼ်ႉ ၵေႃႉၼိုင်ႈ ၵႃႈၼႂ်း ၵူၼ်းမဵဝ်း ယူႉတႃႉ ဢၼ်လႆႈ ၶၢမ်ႇတၢင်းဢၼ်သိမ်းဢဝ်မႃး ၸိူဝ်းၼၼ်ႉ တီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

26ၶုၼ်ႁေႃၶမ်းၵေႃႈ ၶိုၼ်းလၢတ်ႈလႄႈ ထၢမ်တီႈ တၢၼ်ႇယေႇလႃႉ ဢၼ်လႆႈၸိုဝ်ႈ ပေႇလတႃႉသႃႇၸႃႇ ၼၼ်ႉလႄႈဝႃႈ၊ မႂ်းမွၵ်ႇလၢတ်ႈပၼ် တၢင်းဢၼ် ၵဝ်ၽၼ်ႁၼ်ၼၼ်ႉ ဢိၵ်ႇတင်း ဢၼၢၵ်ႈမၼ်းလႆႈႁိုဝ်။ ဝႃႈၼင်ႇၼႆသေယဝ်ႉ၊-

27တၢၼ်ႇယေႇလႃႉ လဝ်ႊလၢတ်ႈတီႈၶုၼ်ႁေႃၶမ်း လႄႈဝႃႈ၊ လွင်ႈတၢင်းဢၼ်လိုၵ်ႉဢၼ်လမ်ႇ ဢၼ်ၸဝ်ႈႁဝ်းထၢမ် ၼၼ်ႉၸိုင်၊ ပိင်ႇၺႃႇသီႉ၊ မေႃပေႇတၢင်ႇ၊ သြႃႇမႃႇၵူႉ၊ သြႃႇဢၼႃႇၵၢတ်ႈတီႉ တင်းလၢႆ ဢမ်ႇၽုၺ်ႇဢွၵ်ႇၼႄပျႃး တီႈၸဝ်ႈၶုၼ်လူင်လႆႈတီႈၶႃႈ၊-

28ၽြႃးပဵၼ်ၸဝ်ႈ ဢၼ်ၽုၺ်ႇဢွၵ်ႇၼႄပျႃး လွင်ႈတၢင်းဢၼ်လိုၵ်ႉဢၼ်လမ်ႇ တင်းလၢႆ ၼၼ်ႉသူႇၼိုင်ႈ မီးယူႇၵႃႈၼိူဝ်ၽုင်ႇၵၢင်ႁၢဝ် လႄႈ မၼ်းၸဝ်ႈမွၵ်ႇလၢတ်ႈပၼ်ငိၼ်း လွင်ႈတၢင်းဢၼ်တၵ်းပဵၼ်မႃး ၶိင်ႇၵႃႇလႃႉၵမ်းလိုၼ်းပုၼ်ႉ တီႈၶုၼ်လူင် ၼေႇပူႉၶတ်ႉၼေႇၸႃႇ တီႈၶႃႈဢေႃႈ။-

29တၢင်းဢၼ် ၸဝ်ႈႁဝ်းၽၼ်ႁၼ် ဢိၵ်ႇတင်း ရူႇပႃႇရူင်ႇၵႃႈၼႂ်းၵွၵ်းႁူဝ် ၸဝ်ႈႁဝ်း ၵႃႈၼိူဝ်ၵူႇတီႈၼွၼ်းၸဝ်ႈႁဝ်း ၼၼ်ႉၸမ်ႉ၊ ၸဝ်ႈ ၶုၼ်လူင်တီႈၶႃႈ၊ ၸဝ်ႈႁဝ်းၶႆႈၸႂ်ဝူၼ်ႉၸႂ်လႄႈ မုင်ႈမွင်းလွင်ႈတၢင်းဢၼ် တၵ်းပဵၼ်မႃး မိူဝ်ႈၵမ်းလိုၼ်းၼၼ်ႉ တီႈၶႃႈဢေႃႈ။ ၽြႃးဢၼ်ၽုၺ်ႇဢွၵ်ႇၼႄပျႃး လွင်ႈတၢင်းဢၼ်လိုၵ်ႉဢၼ်လမ်ႇ တင်းလၢႆၼၼ်ႉ ၼႄပျႃးလွင်ႈတၢင်းဢၼ် တၵ်းပဵၼ်မႃး မိူဝ်ႈၵမ်းလိုၼ်းၼၼ်ႉ တီႈၸဝ်ႈႁဝ်းတီႈၶႃႈဢေႃႈ။-

30ၵွပ်ႈပိူဝ်ႈ ဢၼ်ၶႃႈၸဝ်ႈ ယဵင်ႈၶႅၼ်း မီးပိင်ႇၺႃႇလိူဝ်တွၼ်းၼႃႇသေ ၵူၼ်းသတ်ႉတဝႃႇ တၢင်ႇၵေႃႉတၢင်ႇၵူၼ်း ၼၼ်ႉလႄႈ လွင်ႈတၢင်းဢၼ်လိုၵ်ႉဢၼ်လမ်ႇၼႆႉ ၸႅင်ႈမႃးလႅင်းမႃးတီႈၶႃႈၸဝ်ႈ ဢမ်ႇၸႂ်ႈတီႈၶႃႈ၊ လွင်ႈၼင်ႇႁိုဝ် ၸဝ်ႈၶုၼ်လူင်တၵ်းလႆႈႁူႉ ဢၼၢၵ်ႈမၼ်းလႄႈ ၸဝ်ႈႁဝ်းတၵ်းလႆႈႁူႉၸႅင်ႈ တၢင်းဢၼ်ထၢင်ႇဢၼ်ထိူမ်ႁူဝ်ၸႂ်ၸဝ်ႈႁဝ်းၼၼ်ႉၵူၺ်းၸိုင်၊ ၸင်ႇပဵၼ်တီႈၶႃႈဢေႃႈ။-

31ၸဝ်ႈၶုၼ်လူင်တီႈၶႃႈ၊ ၸဝ်ႈႁဝ်းလူတူၺ်းလႄႈ ႁၼ်ရုၵ်ႈထူႉလူင်တီႈ ၶႃႈဢေႃႈ။ ရုၵ်ႈထူႉဢၼ်ယႂ်ႇသုင်လႄႈ ပျေႉၸုမ်ႇဝႆႉ တင်းငဝ်းဢရွင်ႇ ဢၼ်ႁိူဝ်ႈႁိူင်း ႁႅင်းၼႃႇလူင်လၢင်ၼၼ်ႉ ၸုၵ်းတင်ႈယူႇ ၵႃႈတီႈၽၢႆႇၼႃႈ ၸဝ်ႈႁဝ်းတီႈၶႃႈဢေႃႈ။ ႁၢင်ႈၽၢင်မၼ်းပဵၼ် ဢၼ်လီၵူဝ်လီႁႄဝႆႉ တီႈၶႃႈဢေႃႈ။-

32ရုၵ်ႈထူႉၼၼ်ႉ၊ ၵွၵ်းႁူဝ်မၼ်း ပဵၼ်ၶမ်းလွတ်ႈငၢၼ်ႇလႄႈ ႁူဝ်ဢူၵ်းမၼ်း တင်းၶႅၼ်မိုဝ်းမၼ်းသွင်ၶွၼ်ၼၼ်ႉ ပဵၼ်ငိုၼ်းတီႈၶႃႈဢေႃႈ။ တွင်ႉမၼ်းတင်းၶႃမၼ်းသွင်ၶွၼ်ၼၼ်ႉ ပဵၼ်တွင်းလိူင်တီႈၶႃႈဢေႃႈ။-

33ပွင်ႈၵၢဝ်ႈမၼ်းသွင်ၶွၼ်ၼၼ်ႉ ပဵၼ်လဵၵ်းလႄႈ၊ တိၼ်မၼ်းပဵၼ် လဵၵ်းပွတ်းၼိုင်ႈ၊ လိၼ်ၼဵဝ်ပွတ်းၼိုင်ႈ တီႈၶႃႈဢေႃႈ။-

34ၸဝ်ႈႁဝ်းလူတူၺ်းယူႇ တေႃႇထိုင်ႁွတ်ႈ မၢၵ်ႇႁိၼ်လုၵ်ႈၼိုင်ႈ ဢၼ်ယင်းဢမ်ႇဢဝ်မိုဝ်းတွင်ႈ မိုဝ်းႁဵတ်းလႄႈ ပဵၼ်မႃးၵူၺ်းမၼ်းၼၼ်ႉ တိူဝ်ႉထုၵ်ႇသႂ်ႇ ရုၵ်ႈထူႉၼၼ်ႉ ၵႃႈတီႈတိၼ်မၼ်း ဢၼ်ပဵၼ်လဵၵ်း ဢိၵ်ႇတင်း လိၼ်ၼဵဝ်ၼၼ်ႉလႄႈ ႁၵ်းႁဵၵ်းပႅတ်ႈၼၼ်ႉဢေႃႈ။-

35မိူဝ်ႈၼၼ်ႉ လဵၵ်း၊ လိၼ်ၼဵဝ်၊ တွင်းလိူင်၊ ငိုၼ်း၊ ၶမ်းၸိူဝ်းၼၼ်ႉ ႁၵ်းႁဵၵ်းမုၼ်ႈလႅဝ်ၵႂႃႇၼင်ႇၵၼ်လႄႈ ပဵၼ်ၸိူဝ်ႉၼင်ႇ မုၼ်ႈတလၢင်းယဵပ်ႇၶဝ်ႈ ၼႂ်းၶိင်ႇႁႅင်ႈၼၼ်ႉ သေလႄႈ လူမ်းပတ်ႉထူဝ်းၽူင်ႉပိဝ်ၵႂႃႇလႄႈ ဢမ်ႇမီးတီႈဢၼ် တၵ်းတႄႇယူႇသဝ်းယူႇလႃးလႃး။ မၢၵ်ႇႁိၼ် ဢၼ်တိူဝ်ႉထုၵ်ႇသႂ်ႇရုၵ်ႈထူႉ ၼၼ်ႉၸမ်ႉ၊ ယႂ်ႇၽႄႈၵႂၢင်ႈမႃး ပဵၼ်လွႆလူင်ၵႂႃႇလႄႈ လူၼ်ႉတဵမ်ၵႃႈၼိူဝ် ၼႃႈလိၼ်မိူင်းတင်းၼႃႈ တီႈၶႃႈဢေႃႈ။-

36ဢၼ်ၼႆႉၸမ်ႉ၊ ပဵၼ်တၢင်းဢၼ် ၽၼ်ႁၼ်ၼၼ်ႉ တီႈၶႃႈဢေႃႈ။ မိူဝ်ႈလဵဝ်ၼႆႉၶႃႈၸဝ်ႈႁဝ်းၶဝ် တၵ်းၽုၺ်ႇဢွၵ်ႇၼႄပျႃး ဢၼၢၵ်ႈမၼ်း ၵႃႈတီႈၽၢႆႇၼႃႈၸဝ်ႈၶုၼ်လူင် တီႈၶႃႈဢေႃႈ။-

37ၸဝ်ႈၶုၼ်လူင်တီႈၶႃႈ၊ ၸဝ်ႈႁဝ်းၼႆႉ ပဵၼ်ၶုၼ်ႁေႃၶမ်း ၼိူဝ်ၶုၼ်ႁေႃၶမ်း တင်းလၢႆ တီႈၶႃႈဢေႃႈ။ ၽြႃးပဵၼ်ၸဝ်ႈ ၽုင်ႇၵၢင်ႁၢဝ်ၼၼ်ႉ ဢဝ်သိုင်ႇၸိုင်ႈဝၢၼ်ႈမိူင်း ဢိၵ်ႇလူၺ်ႈၵၼ်တင်း တၼ်းၶူဝ်းဢႃႇၼူႉၽေႃႇ တၢင်းၵတ်ႉတၢင်းၶၼ်၊ မုၼ်သရေႇ ပၼ်တီႈၸဝ်ႈႁဝ်းတီႈၶႃႈယဝ်ႉ။-

38ၵႃႈပဵၼ်တီႈဢၼ်လုၵ်ႈၵူၼ်း ဢိၵ်ႇတင်း တရိၵ်ႈသၢၼ်ႇၵႃႈၼိူဝ်လိၼ် တင်းၼူၵ်ႉ ၵႃႈၼိူဝ်ၽႃႉၵၢင်ႁၢဝ် ၸိူဝ်းၼၼ်ႉ ယူႇသဝ်းၼၼ်ႉ မၼ်းၸဝ်ႈ ဢဝ်ၶဝ်ဢၢပ်ႈပၼ် ၵႃႈၼႂ်းမိုဝ်းၸဝ်ႈႁဝ်းလႄႈ ႁႂ်ႈၸဝ်ႈႁဝ်းမီးဢၶႂၢင်ႉ ဢၼ်လႆႈဢုပ်ႉပိူင်ႇၶဝ် တင်းသဵင်ႈတင်းလူင် တီႈၶႃႈဢေႃႈ။ ၸဝ်ႈႁဝ်းပဵၼ်ၵွၵ်းႁူဝ်ၶမ်း မၼ်းၼၼ်ႉ တီႈၶႃႈဢေႃႈ။-

39လိုၼ်းၸဝ်ႈႁဝ်းၼႆႉၼၼ်ႉ၊ သိုင်ႇၸိုင်ႈဝၢၼ်ႈမိူင်း ဢၼ်ဢမ်ႇမျၢတ်ႈထၢၼ်ႇ သိုင်ႇၸိုင်ႈဝၢၼ်ႈမိူင်း ၸဝ်ႈႁဝ်းၼႆႉ မိူင်းၼိုင်ႈ တၵ်းပေႃႇပဵၼ်မႃး တီႈၶႃႈဢေႃႈ။ လိုၼ်းၼၼ်ႉ သိုင်ႇၸိုင်ႈဝၢၼ်ႈမိူင်း တႃႉတီႉယႃႉ ဢၼ်ဝႃႈ သိုင်ႇၸိုင်ႈဝၢၼ်ႈမိူင်း တွင်းလိူင် ဢၼ်လႆႈဢုပ်ႉပိူင်ႇၵႃႈၼိူဝ် ၼႃႈလိၼ်တင်းၼႃႈၼၼ်ႉ တၵ်းပေႃႇပဵၼ်မႃးတီႈၶႃႈဢေႃႈ။-

40သိုင်ႇၸိုင်ႈဝၢၼ်ႈမိူင်း ၸတုၵ်ႉထႃႉၼၼ်ႉ တၵ်းပဵၼ်ဢၼ်ၵႅၼ်ႇဢၼ်ၶႅင် မိူၼ်ၸိူဝ်ႉၼင်ႇလဵၵ်း ၼၼ်ႉလႄႈ တၵ်းႁဵတ်းတၢင်းဢၼ် ယႃႉႁၵ်း တင်းသဵင်ႈတင်းလူင် ၸိူဝ်းၼႆႉ တႅၵ်ႇလႅဝ်ပႅတ်ႈ မိူၼ်ၸိူဝ်ႉၼင်ႇဢၼ် လဵၵ်းယႃႉႁၵ်းၵူႈၸိူဝ်ႉၵူႈပိူင်လႄႈ ပႄႉၼႅင်ႇလႆႈၼၼ်ႉ တီႈၶႃႈဢေႃႈ။-

41ၵႃႈၼင်ႇဢၼ် ၸဝ်ႈႁဝ်းၽၼ်ႁၼ်တိၼ်မၼ်း ဢိၵ်ႇတင်း ၼိဝ်ႉတိၼ်မၼ်း ပဵၼ်လိၼ်ၼဵဝ်ၸဝ်ႈမေႃႈပွတ်းၼိုင်ႈ လဵၵ်းပွတ်းၼိုင်ႈၼၼ်ႉ၊ တၵ်းပဵၼ် သိုင်ႇၸိုင်ႈဝၢၼ်ႈမိူင်း ဢၼ်ၼင်ႇၵၼ်ၵၼ် ၽၢတ်ႇၽႄၵၼ်တီႈၶႃႈဢေႃႈ။ ၵူၺ်းၵႃႈ ၵွပ်ႈပိူဝ်ႈဢၼ် ၸဝ်ႈႁဝ်းၽၼ်ႁၼ်လဵၵ်း ဢိၵ်ႇတင်း လိၼ်ၼဵဝ်ဢၼ်ၽဝ် လေႃးလႄးၵၼ် ယူႇၼၼ်ႉလႄႈ တၵ်းမီး တၢင်းၵတ်ႉတၢင်းၶၼ် လဵၵ်းဢၼ်ၵႅၼ်ႇၶႅင် တီႈၶႃႈဢေႃႈ။-

42မႅၼ်ႈၸွမ်း ၵႃႈၼင်ႇဢၼ် ၼိဝ်ႉမၼ်း ပဵၼ်လဵၵ်းပွတ်းၼိုင်ႈ လိၼ်ၼဵဝ်ပွတ်းၼိုင်ႈ ၼၼ်ႉလႄႈ သိုင်ႇၸိုင်ႈဝၢၼ်ႈမိူင်းၼၼ်ႉ တၵ်းမီး တၢင်းဢၼ်ၵႅၼ်ႇၶႅင်ၽၢၵ်ႇၼိုင်ႈ ဢိၵ်ႇတင်း တၢင်းဢၼ်ႁၵ်းႁဵၵ်းၵႂႃႇ ၽၢၵ်ႇၼိုင်ႈ တီႈၶႃႈဢေႃႈ။-

43မႅၼ်ႈၸွမ်း ၵႃႈၼင်ႇဢၼ် ၸဝ်ႈႁဝ်းၽၼ်ႁၼ်လဵၵ်း ဢိၵ်ႇတင်း လိၼ်ၼဵဝ် ဢၼ်ၽဝ်လေႃးလႄးၵၼ် ယူႇၼၼ်ႉလႄႈ ၶဝ်ၼၼ်ႉ တၵ်းလေႃးလႄး လူၺ်ႈၵၼ်တင်းၵူၼ်း တၢင်ႇၸိူဝ်ႉတၢင်ႇမဵဝ်းဢေႃႈ။ ၵူၺ်းၵႃႈၶဝ်ၼၼ်ႉ တၵ်းဢမ်ႇၽွမ်ႉသဵင်ပဵင်းပၢၵ်ႇ ပဵၼ်ဢၼ်ၼိုင်ႈ ဢၼ်လဵဝ်ၵၼ် မိူၼ်ၸိူဝ်ႉၼင်ႇဢၼ်လဵၵ်း ဢိၵ်ႇတင်း လိၼ်ၼဵဝ် ဢမ်ႇပဵၼ်ဢၼ်ၼိုင်ႈဢၼ်လဵဝ်ၵၼ်လႆႈၼၼ်ႉ တီႈၶႃႈဢေႃႈ။-

44ၼႂ်းၸူဝ်ႈပၢၼ် ၶုၼ်ႁေႃၶမ်း ၸိူဝ်းၼၼ်ႉ၊ ၽြႃးပဵၼ်ၸဝ်ႈ ၸဝ်ႈၽုင်ႇၵၢင်ႁၢဝ် တၵ်းႁႂ်ႈသိုင်ႇၸိုင်ႈဝၢၼ်ႈမိူင်း ဢၼ်ဢမ်ႇႁွတ်ႈထိုင် တၢင်းဢၼ်လူႉလႅဝ်လႆႈၼၼ်ႉ ဢၼ်ၼိုင်ႈတႄႇပဵၼ်ဢေႃႈ။ မိူင်းၼၼ်ႉ ယင်းဢမ်ႇလႆႈႁွတ်ႈထိုင် ၵႃႈၼႂ်းမိုဝ်း ၵူၼ်းတၢင်ႇၸိူဝ်ႉတၢင်ႇမဵဝ်းလႄႈ တၵ်းႁၵ်းႁဵၵ်း သိုင်ႇၸိုင်ႈဝၢၼ်ႈမိူင်း ဢၼ်ဝႃႈမႃးယဝ်ႉ ၸိူဝ်းၼၼ်ႉ လူႉလႅဝ်ပႅတ်ႈသေလႄႈ တႄႇယူႇတႃႇသေႇ မၼ်ႈၶိူင်ႇတီႈၶႃႈဢေႃႈ။-

45ၵွပ်ႈပိူဝ်ႈ ဢၼ်ၸဝ်ႈႁဝ်း ၽၼ်ႁၼ်မၢၵ်ႇႁိၼ်လုၵ်ႈၼိုင်ႈ ဢၼ်ဢမ်ႇဢဝ် မိုဝ်းတွင်ႈမိုဝ်းႁဵတ်း ပဵၼ်မႃးၵူၺ်းမၼ်းလႄႈ ငၢၵ်ႈၵွၵ်းၽၢတ်ႇသေ ၵႃႈၼိူဝ်လွႆလူင်မႃး သေလႄႈ ႁၵ်းႁဵၵ်းလဵၵ်း၊ တွင်းလိူင်၊ လိၼ်ၼဵဝ်၊ ငိုၼ်းၶမ်း ၸိူဝ်းၼၼ်ႉပႅတ်ႈၼၼ်ႉလႄႈ၊ ၽြႃးပဵၼ်ၸဝ်ႈ ဢၼ်ယႂ်ႇမျၢတ်ႈၼႃႇၼၼ်ႉ မွၵ်ႇလၢတ်ႈလွင်ႈတၢင်းဢၼ် တၵ်းပဵၼ်မႃး မိူဝ်ႈၵမ်းလိုၼ်းပုၼ်ႉၼၼ်ႉ တီႈၸဝ်ႈၶုၼ်လူင် တီႈၶႃႈဢေႃႈ။ တၢင်းဢၼ် ၽၼ်ႁၼ်ၸဝ်ႈႁဝ်း မၼ်ႈၶိူင်ႇလႄႈ ဢၼၢၵ်ႈမၼ်းၵေႃႈ မၢၼ်ႇမႅၼ်ႈတီႈၶႃႈဢေႃႈ၊ ဝႃႈၼင်ႇၼႆဢေႃႈ။

46မိူဝ်ႈၼၼ်ႉ ၶုၼ်လူင် ၼေႇပူႉၶတ်ႉၼေႇၸႃႇ ၶုပ်ႉမူပ်ႇလႄႈဝႆႈၵူဝ်းၵႂၢႆႇ တၢၼ်ႇယေႇလႃႉ သေလႄႈ ၸီႇယၢင်ႇႁႂ်ႈဢဝ်ၶိူင်ႈ တၢင်းပုၵ်ႈၸေႃႇ ဢိၵ်ႇတင်း မဵဝ်းၼၢမ်ႇသႃႇ သၢၵ်ႈၵၢပ်ႈတီႈမၼ်းလႄႈ၊-

47ၶုၼ်ႁေႃၶမ်း လၢတ်ႈတီႈ တၢၼ်ႇယေႇလႃႉ လႄႈဝႃႈ၊ ၵွပ်ႈပိူဝ်ႈ ဢၼ်ၸဝ်ႈၽုၺ်ႇဢွၵ်ႇၼႄပျႃး လွင်ႈတၢင်း ဢၼ်လိုၵ်ႉဢၼ်လမ်ႇၼႆႉ လႆႈလႄႈ၊ ၽြႃးပဵၼ်ၸဝ်ႈ ၸဝ်ႈၼၼ်ႉ ပဵၼ်ၽြႃး ၼိူဝ်ၽြႃး တင်းလၢႆ ၸဝ်ႈၼိူဝ်ၶုၼ်ႁေႃၶမ်း တင်းလၢႆ၊ ၸဝ်ႈဢၼ် ၽုၺ်ႇဢွၵ်ႇၼႄပျႃး လွင်ႈတၢင်း ဢၼ်လိုၵ်ႉဢၼ်လမ်ႇ တင်းလၢႆဢေႃႈ၊ ဝႃႈၼင်ႇၼႆသေယဝ်ႉ၊-

48ၶုၼ်ႁေႃၶမ်း ယုၵ်ႉယွင်ႈ တၢၼ်ႇယေႇလႃႉ သေလႄႈ ပၼ်သူးလၢပ်ႈဢၼ်ယႂ်ႇ ၼမ်ၼႃႇလူင်လၢင်လႄႈ ၶၢၼ်းမၼ်းဝႆႉ ႁႂ်ႈပဵၼ်ဝုၼ်ႇလူင် ၼႂ်းမိူင်း ပႃႇပူႉလုၼ်ႇ ဢိၵ်ႇတင်း ဝုၼ်ႇဢၼ်ဢုပ်ႉၵႃႈၼိူဝ် ပိင်ႇၺႃႇသီႉ ပႃႇပူႉလုၼ်ႇ တင်းလၢႆ ဢေႃႈ။-

49မိူဝ်ႈၼၼ်ႉ တၢၼ်ႇယေႇလႃႉ လဝ်ႊယွၼ်းတီႈ ၶုၼ်ႁေႃၶမ်းလႄႈ၊ ၶုၼ်ႁေႃၶမ်းၼၼ်ႉ ၶၢၼ်း သႃႇတရႅၵ်ႉ၊ မေႇသႅၵ်ႉ၊ ဢပေႇတၼေႇၵေႃး ၸိူဝ်းၼၼ်ႉဝႆႉ ႁႂ်ႈပဵၼ်ဝုၼ်ႇၼႂ်းမိူင်း ပႃႇပူႉလုၼ်ႇ လႄႈ တၢၼ်ႇယေႇလႃႉ ၸမ်ႉ၊ လႆႈယူႇၵႃႈၼႂ်းၽၵ်းတူ ၼႃႈႁေႃၶမ်းဢေႃႈ။