Hebrews 1

Shan

Jump to: Chapter 2 →

1ၽြႃးပဵၼ်ၸဝ်ႈ ဢၼ်ဢဝ်တင်းပရေႃးၽႅတ်ႈတင်းလၢႆ ဝႆႉပျႃႇတိၵ်ႈတီႈပူႇႁဝ်းမွၼ်ႇႁဝ်း ၶိူဝ်းၶိူဝ်းယႂ်းယႂ်းလၢႆၸိူဝ်ႉလၢႆပိူင် ၼႂ်းၶိင်ႇၵႃႇလႃႉဢၼ်ပူၼ်ႉၵႂႃႇယဝ်ႉ မိူဝ်ႈဢွၼ်တၢင်းၼႆႉၼၼ်ႉ၊-

2ဢဝ်တင်းလုၵ်ႈမၼ်းၸဝ်ႈ ဝႆႉပျႃႇတိၵ်ႈတီႈႁဝ်းၼႂ်းၶိင်ႇၵႃႇလႃႉလိုၼ်းလင်သုတ်းၼႆႉယဝ်ႉ။ လုၵ်ႈၸဝ်ႈၼၼ်ႉၸိုင် မၼ်းၸဝ်ႈၶၢၼ်းဝႆႉၼႂ်းဢရႃႇၸဝ်ႈဢၼ် တၵ်းလႆႈၶၢမ်ႇဢမူၺ်ႇၵႃႈမီး တင်းသဵင်ႈတင်းလူင်ဢေႃႈ။ မၼ်းၸဝ်ႈဢဝ်တင်းလုၵ်ႈၸဝ်ႈၼၼ်ႉ တႄႇလေႃးၵထၢတ်ႈတင်းလၢႆဝႆႉဢေႃႈ။-

3လုၵ်ႈၸဝ်ႈၼၼ်ႉ ပဵၼ်သၢႆဢရွင်ႇမုၼ်ၽုင်းၸဝ်ႈ ဢိၵ်ႇတင်းပုင်ႇႁၢင်ႈပၵတီႉၸဝ်ႈလႄႈ ပဵၼ်ၵေႃႉဢၼ်ဢဝ်တင်းဢမိင်ႉ တူဝ်ၸဝ်ႈၵဝ်ႇ ဢၼ်ပျေႉၸုမ်ႇတင်းတၼ်းၶူဝ်းၼၼ်ႉ ထွၵ်ႈၵမ်ႉလွင်ႈတၢင်းၵႃႈမီး တင်းသဵင်ႈတင်းလူင်ယူႇသေလႄႈ ဢဝ်တူဝ်ၸဝ်ႈၵဝ်ႇ ပႄႇၽဵဝ်ႈပႅတ်ႈဢပႅတ်ႈတင်းလၢႆသေယဝ်ႉ၊ ၼင်ႈယူႇၵႃႈတီႈၽၢႆႇၶႂႃတၼ်းၶူဝ်းဢႃႇၼူႉၽေႃႇ ၵႃႈတီႈဢၼ်သုင်ပုၼ်ႉဢေႃႈ။

4မၼ်းၸဝ်ႈပဵၼ်ၵေႃႉဢၼ် မျၢတ်ႈၼႃႇသေတမၢၼ်ႇၵၢင်ႁၢဝ်တင်းလၢႆ မႅၼ်ႈၵႃႈၼင်ႇဢၼ်လႆႈၶၢမ်ႇဢဝ်ၼႃႇမႃႉၸိုဝ်ႈသဵင် ဢၼ်မျၢတ်ႈၼႃႇသေၼႃႇမႃႉၸိုဝ်ႈသဵင် ဢၼ်တမၢၼ်ႇၵၢင်ႁၢဝ်ၸိူဝ်းၼၼ်ႉ လႆႈၶၢမ်ႇဢဝ်ၼၼ်ႉဢေႃႈ။

5လွင်ႈမၼ်းၸမ်ႉ မၼ်းၸဝ်ႈယၢမ်ႈတွၼ်ႉမီးဢမိင်ႉ တီႈတမၢၼ်ႇၵၢင်ႁၢဝ်ၵေႃႉလႂ်လႄႈဝႃႈ၊ မႂ်းပဵၼ်လုၵ်ႈၸၢႆးၵဝ်ဢေႃႈ။ ၼႂ်းဝၼ်းမိူဝ်ႈၼႆႉ ၵဝ်ႁႂ်ႈမႂ်းၵိူတ်ႇလဵင်ႉပဵၼ်မႃးယဝ်ႉ၊ ဝႃႈၼင်ႇၼႆလႄႈ သမ်ႉလၢတ်ႈထႅင်ႈလႄႈဝႃႈ၊ ၵဝ်တၵ်းပဵၼ်ပေႃႈမၼ်းဢေႃႈ။ မၼ်းၵေႃႈတၵ်းပဵၼ်လုၵ်ႈၸၢႆးၵဝ်ဢေႃႈ၊ ဝႃႈၼင်ႇၼႆသေပွၵ်ႈ။-

6ၼႄးၼိုင်ႈၸမ်ႉ၊ မိူဝ်ႈဢၼ်မၼ်းၸဝ်ႈဢဝ် လုၵ်ႈတူၼ်ႈသႂၢင်းသႂ်ႇၵႃႈၼႂ်းလေႃးၵႃႉၼႆႉၼၼ်ႉၸိုင် မၼ်းၸဝ်ႈမီးဢမိင်ႉလႄႈဝႃႈ၊ ႁႂ်ႈတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈ တင်းသဵင်ႈတင်းလူင် ၵူမ်ႈမူပ်ႇၵူဝ်းၵႂၢႆႇမၼ်းၸဝ်ႈသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

7ၼႄးၼိုင်ႈၸမ်ႉ၊ ဢဝ်လွင်ႈတမၢၼ်ႇၵၢင်ႁၢဝ်တင်းလၢႆလႄႈမီးဢမိင်ႉဝႃႈ၊ မၼ်းၸဝ်ႈႁႂ်ႈတမၢၼ်ႇတူဝ်ၸဝ်ႈၵဝ်ႇတင်းလၢႆ ပဵၼ်ၸိူဝ်ႉၼင်ႇလူမ်းလႄႈ ႁႂ်ႈၵူၼ်းၸႂ်ႉၵူၼ်းသွႆတူဝ်ၸဝ်ႈၵဝ်ႇတင်းလၢႆ ပဵၼ်ၸိူဝ်ႉၼင်ႇပဵဝ်ၽႆးဢေႃႈ၊ ဝႃႈၼင်ႇၼႆဢေႃႈ။-

8ဢၼ်မႃးလူၺ်ႈလွင်ႈလုၵ်ႈမၼ်းၸဝ်ႈလႄႈဝႃႈၸမ်ႉ၊ ဢူဝ်းၽြႃးပဵၼ်ၸဝ်ႈ၊ ပလၢင်ႇၸဝ်ႈႁဝ်းၼၼ်ႉ ပဵၼ်ပလၢင်ႇၼိၵ်ႈၸႃႉထႃႇဝရႃႉတီႈၶႃႈဢေႃႈ။ ၵၼ်းႁွၵ်ႇရႃႇၸႃႉတၢင်းဢၼ်သိုဝ်ႈတေႃႇၼၼ်ႉ ပဵၼ်ၵၼ်းႁွၵ်ႇမိူင်းၸဝ်ႈႁဝ်းတီႈၶႃႈဢေႃႈ။-

9ၸဝ်ႈႁဝ်းထုၵ်ႇၸႂ်ၵျိူၵ်ႈၸႂ်တြႃး တၢင်းဢၼ်သိုဝ်ႈတေႃႇလႄႈ ၸင်းလွင်ႈတၢင်းဢၼ်ဢမ်ႇတြႃးၼၼ်ႉ တီႈၶႃႈဢေႃႈ။ ပိူဝ်ႈၼႆလႄႈ ဢူဝ်းၽြႃးပဵၼ်ၸဝ်ႈ၊ ၽြႃးပဵၼ်ၸဝ်ႈ ၸဝ်ႈႁဝ်းၼၼ်ႉ ယုၵ်ႉယွင်ႈၸဝ်ႈႁဝ်းၼႃႇလူင်လၢင် ၵႃႈၼိူဝ်ၵေႃႉသေႈၸဝ်ႈႁဝ်းတင်းလၢႆၼၼ်ႉလႄႈ ဢဝ်တင်းၼမ်ႉမၼ်းတၢင်းဢၼ်သိူဝ်းပျေႃႇ ပၼ်ၽိၵ်ႈသိၵ်ႈတီႈၶႃႈယဝ်ႉ၊ ဝႃႈၼင်ႇၼႆဢေႃႈ။

10ဢၼ်သမ်ႉမႃးထႅင်ႈလႄႈဝႃႈၸမ်ႉ၊ ဢူဝ်းထႃႇဝရႃႉၽြႃး၊ မိူဝ်ႈၵေႃႇၸႃႉႁူဝ်ပိုင်းၼၼ်ႉ၊ ၸဝ်ႈႁဝ်းတႄႇလိၼ်မိူင်းဝႆႉ တီႈၶႃႈယဝ်ႉ။ ၽႃႉၵၢင်ႁၢဝ်ၵေႃႈ ပဵၼ်လွင်ႈတၢင်းဢၼ် ၸဝ်ႈႁဝ်းဢဝ်တင်းမိုဝ်းၽၢၼ်ႇသၢင်းႁဵတ်းပဵၼ်တီႈၶႃႈဢေႃႈ။-

11ပိၵ်ႉသမ်ႉလွင်ႈတၢင်းၸိူဝ်းၼၼ်ႉ တၵ်းႁွတ်ႈထိုင်တၢင်းလူႉတၢင်းလႅဝ်သေၵေႃႈ၊ ၸဝ်ႈႁဝ်းတႄႇယူႇသေႇသေႇတီႈၶႃႈဢေႃႈ။ ပိၵ်ႉသမ်ႉလွင်ႈတၢင်းၵႃႈမီးၸိူဝ်းၼၼ်ႉ ႁွတ်ႈထိုင်တၢင်းဢၼ်ၵဝ်ႇၵႂႃႇမွင်ၵႂႃႇၸိူဝ်ႉၼင်ႇၶူဝ်းၼင်ႇလဵင်းၼၼ်ႉလႄႈ၊-

12ၸဝ်ႈႁဝ်းႁမ်းၵဵၼ်ၶဝ် ၸိူဝ်ႉၼင်ႇဢၼ်ႁမ်းၵဵၼ်ၶူဝ်းၼုင်ႈၼၼ်ႉလႄႈ ၶဝ်မီးတၢင်းဢၼ်ၶၢႆႉပုတ်ႈၵႂႃႇသေၵေႃႈ၊ ၸဝ်ႈႁဝ်း ဢမ်ႇၶၢႆႉဢမ်ႇပုတ်ႈတီႈၶႃႈ၊ ၶူပ်ႇပီႊၸဝ်ႈႁဝ်းၼၼ်ႉၵေႃႈ ဢမ်ႇသုတ်းဢမ်ႇသဵင်ႈလႆႈတီႈၶႃႈ၊ ဝႃႈၼင်ႇၼႆဢေႃႈ။-

13လိူဝ်သေၼၼ်ႉ၊ မၼ်းၸဝ်ႈယၢမ်ႈတွၼ်ႉမီးဢမိင်ႉတီႈ တမၢၼ်ႇၵၢင်ႁၢဝ်ၵေႃႉလႂ်လႄႈဝႃႈ၊ ၸူဝ်ႈဢၼ်ၵဝ်ဢမ်ႇပႆႇဢဝ်ရၢၼ်ႇသူႇမႂ်းတင်းလၢႆ ၶျႃးဝႆႉႁႂ်ႈပဵၼ်တီႈတၢင်ႇတိၼ်မႂ်းၼၼ်ႉၸိုင်၊ ၼင်ႈယူႇၵႃႈတီႈၽၢႆႇၶႂႃၵဝ်တႃႉ၊ ဝႃႈၼင်ႇၼႆၼၼ်ႉသေပွၵ်ႈ။

14တမၢၼ်ႇၵၢင်ႁၢဝ်တင်းလၢႆၸမ်ႉ၊ ပဵၼ်ၼၢမ်ႇဝီႉၺိၺ်ႇဢၼ်လႆႈၶၢမ်ႇတၢင်းၸႂ်ႉတၢင်းသွႆ ႁႂ်ႈလႆႈလူလႆႈတူၺ်းၶဝ်ၸိူဝ်းဢၼ် တၵ်းၶၢမ်ႇဢမူၺ်ႇၵျေးၸူးတၢင်းဢၼ်ၵႄႇၶျွတ်ႈဢဝ်ၼၼ်ႉ ဢမ်ႇၸႂ်ႈႁိုဝ်။

Jump to: Chapter 2 →