Hebrews 11 — Shan

1တၢင်းဢၼ်ယုမ်ႇမၢတ်ႈၸိုင် ပဵၼ်တၢင်းဢၼ်ၶျႃးၸႂ် လူၺ်ႈလွင်ႈတၢင်းၸိူဝ်းဢၼ် မုင်ႈထႃႈမွင်းထႃႈၼၼ်ႉဢေႃႈ။ ပဵၼ်တၢင်းဢၼ်ႁူႉၸႅင်ႈ ၸွႆးၸပ်းလွင်ႈတၢင်းၸိူဝ်းဢၼ်ဢမ်ႇပႆႇႁၼ်ၼၼ်ႉဢေႃႈ။-

2ၵွပ်ႈပိူဝ်ႈပႃႇရမီႇၼၼ်ႉလႄႈ ၵူၼ်းၵဝ်ႇမိူဝ်ႈဢွၼ်ၼႆႉၸိူဝ်းၼၼ်ႉ လႆႈၶၢမ်ႇတၢင်းဢၼ်မၼ်းၸဝ်ႈယွင်ႈယေႃးဢေႃႈ။-

3ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ ႁဝ်းႁူႉလွင်ႈဢၼ်ၶိူင်ႈပိူင် ဢၼ်လႆႈႁၼ်တေႃႈလဵဝ်ၸိူဝ်းၼႆႉ ယင်းဢမ်ႇပဵၼ်မႃးၵႃႈၼႂ်းၶိူင်ႈပိူင် ဢၼ်ထၢင်ႇသႃးၸိူဝ်းၼႆႉလႄႈ လေႃးၵထၢတ်ႈတင်းလၢႆ တႄႇယူႇၵွပ်ႈပိူဝ်ႈဢမိင်ႉၽြႃးပဵၼ်ၸဝ်ႈၵူၺ်းၼၼ်ႉဢေႃႈ။

4ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ ဢႃႇပေႇလႃႉ ၼၼ်ႉ ပုၵ်ႈၸေႃႇယိတ်ႈဢၼ် ယဵင်ႈၶႅၼ်းမျၢတ်ႈၼႃႇသေယိတ်ႈဢၼ် ၵႃႇဢီႉၼႃႉ ပုၵ်ႈၸေႃႇၼၼ်ႉ တီႈၽြႃးပဵၼ်ၸဝ်ႈဢေႃႈ။ မၼ်းပုၵ်ႈၸေႃႇယိတ်ႈၸိူဝ်ႉၼင်ႇၼၼ်လႄႈ လႆႈတၢင်းဢၼ်မၼ်းၸဝ်ႈၶၢမ်ႇသၢၵ်ႈသေႇ လွင်ႈဢၼ်မၼ်းသိုဝ်ႈတေႃႇၼၼ်ႉဢေႃႈ။ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ၽြႃးပဵၼ်ၸဝ်ႈႁပ်ႉတုင်းဢဝ်တၢင်းလူႇတၢင်းတၢၼ်း ဢၼ်မၼ်းလူႇတၢၼ်းၼၼ်ႉဢေႃႈ။ ၵွပ်ႈႁွႆးၼႆႉ၊ ပိၵ်ႉသမ်ႉမၼ်းတၢႆလႄႈ ပူၼ်ႉၵႂႃႇယဝ်ႉသေၵေႃႈ၊ တေႃႈလဵဝ်ၼႆႉ မၼ်းယင်းႁေႃးလၢတ်ႈတြႃးယူႇဢေႃႈ။-

5ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ ဢေးၼွၵ်ႉ ၼၼ်ႉ ၵၢင်းလွတ်ႈတင်းတၢင်းတၢႆသေလႄႈ လႆႈၶၢႆႉၵႂႃႇၵႃႈၼႂ်း ၸၢတ်ႈၼႃႈဢေႃႈ။ ပိူဝ်ႈဢၼ်ၽြႃးပဵၼ်ၸဝ်ႈ ႁႂ်ႈမၼ်းၶၢႆႉၵႂႃႇၵႃႈၼႂ်းၸၢတ်ႈၼႃႈလႄႈ ၵမ်းလိုၼ်းမၼ်းဢမ်ႇပေႃႇဢမ်ႇမီး။ မၼ်းၼၼ်ႉ ၸူဝ်ႈဢၼ်ဢမ်ႇပႆႇလႆႈၶၢႆႉၵႂႃႇၵႃႈၼႂ်း ၸၢတ်ႈၼႃႈၼၼ်ႉၸိုင်၊ လႆႈတၢင်းဢၼ်မၼ်းၸဝ်ႈ ၶၢမ်ႇသၢၵ်ႈသေႇ လွင်ႈဢၼ်ပဵၼ်ၵေႃႉဢၼ်ထုၵ်ႇၸႂ်ၽြႃးပဵၼ်ၸဝ်ႈဢေႃႈ။-

6ပေႃးတၢင်းဢၼ်ယုမ်ႇမၢတ်ႈဢမ်ႇမီးၸိုင်၊ ဢမ်ႇထုၵ်ႇၸႂ်ၽြႃးပဵၼ်ၸဝ်ႈလႆႈ။ လွင်ႈမၼ်းၸမ်ႉ ၵေႃႉဢၼ်သုတ်ႉၸပ်းသုတ်ႉၸူး ၵႃႈတီႈၽြႃးပဵၼ်ၸဝ်ႈၼၼ်ႉ တၵ်းလႆႈယုမ်ႇမၢတ်ႈလွင်ႈဢၼ်ၽြႃးပဵၼ်ၸဝ်ႈမီးယူႇ ဢိၵ်ႇတင်းလွင်ႈဢၼ်မၼ်းၸဝ်ႈ ပၼ်ဢၵျူဝ်းတီႈၶဝ်ၸိူဝ်းဢၼ် ႁႃမၼ်းၸဝ်ႈၼၼ်ႉဢေႃႈ။

7ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ ၼူဝ်းဢႃႇ ၼၼ်ႉ လႆႈၶၢမ်ႇပျႃႇတိၵ်ႈၸဝ်ႈ ဢၼ်ၽုၺ်ႇဢွၵ်ႇၼႄပျႃး လွင်ႈတၢင်းဢၼ် ဢမ်ႇပႆႇႁၼ်ၸိူဝ်းၼၼ်ႉသေယဝ်ႉ၊ မီးၸႂ်ဢၼ်ၵူဝ်ဢၼ်ႁႄလႄႈ တႄႇႁဵတ်းႁိူဝ်းသၢင်းၽေႃး ႁႂ်ႈလႆႈၵႄႇၶျွတ်ႈဢဝ်ၵူၼ်းႁိူၼ်းၵူၼ်းယေးမၼ်းဢေႃႈ။ ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈၼၼ်ႉလႄႈ၊ မၼ်းတၢင်ႇဢပႅတ်ႈၵႃႈၼိူဝ် ၵူၼ်းလေႃးၵီႇတင်းလၢႆလႄႈ ပဵၼ်ၵေႃႉဢၼ်ၶၢမ်ႇဢမူၺ်ႇ တၢင်းဢၼ်သိုဝ်ႈတေႃႇ ဢၼ်ၸၢပ်ႈသႅင်ႇၵၼ်တင်း တၢင်းဢၼ်ယုမ်ႇမၢတ်ႈဢေႃႈ။-

8ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ ဢႃႇပြႃႇႁၢမ်ႇ ၼၼ်ႉ မိူဝ်ႈဢၼ်ၽြႃးပဵၼ်ၸဝ်ႈ ႁွင်ႉဢဝ်မၼ်းဢွၵ်ႇၵႂႃႇၸူး ၵႃႈတီႈမိူင်းဢၼ် တၵ်းလႆႈၶၢမ်ႇဢမူၺ်ႇၼၼ်ႉၸိုင် ယင်းဢမ်ႇႁူႉလွင်ႈဢၼ်တူဝ်ၸဝ်ႈၵဝ်ႇ တၵ်းၵႂႃႇၵႃႈတီႈလႂ်တၢင်းလႂ်ၼၼ်ႉလႄႈ ထွမ်ႇဢဝ်လႄႈဢွၵ်ႇၵႂႃႇဢေႃႈ။-

9ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ မၼ်းလႆႈပဵၼ်ၶႅၵ်ႇသေလႄႈ ယူႇၵႃႈၼႂ်းမိူင်းဢၼ်ၸၢပ်ႈသႅင်ႇၵၼ်တင်း ၵတီႉၸဝ်ႈ မိူၼ်ၸိူဝ်ႉၼင်ႇဢၼ် ၶႅၵ်ႇယူႇၵႃႈၼႂ်းမိူင်းဢၼ် ပိူၼ်ႈဢုပ်ႉပိူင်ႇၼၼ်ႉဢေႃႈ။ မၼ်းယူႇၵႃႈၼႂ်းမူဝ်းၵႃႇလူၺ်ႈၵၼ်တင်း ဢီႉၸၢၵ်ႈ တင်း ယႃႇၵုပ်ႈ ဢၼ်ဝႃႈ ၶဝ်ၸိူဝ်းဢၼ် တၵ်းလႆႈၶၢမ်ႇဢမူၺ်ႇၵတီႉၸဝ်ႈၼၼ်ႉဢေႃႈ။-

10လွင်ႈမၼ်းၸမ်ႉ မၼ်းမုင်ႈထႃႈမွင်းထႃႈ ဝဵင်းဢၼ်မၼ်ႈၶိူင်ႇ၊ ဢၼ်ၽြႃးပဵၼ်ၸဝ်ႈတႄႇႁဵတ်းမႄးႁဵတ်းဝႆႉၼၼ်ႉဢေႃႈ။

11ၵွပ်ႈပိူဝ်ႈတၢင်းဢၼ် ယုမ်ႇမၢတ်ႈလႄႈ မေးမၼ်း ၸႃႇရႃႇ ၼၼ်ႉၵေႃႈ၊ လႆႈၶၢမ်ႇဢဝ်ဢၶႂၢင်ႉ တၼ်းၶူဝ်းဢၼ်ပႃးပတိၵ်ႉသၼ်ႇထေႇ ၼႂ်းမိူဝ်ႈဢၼ်ဢသၢၵ်ႈဢရွႆႇမၼ်း ပူၼ်ႉၵႂႃႇယဝ်ႉၼၼ်ႉလႆႈဢေႃႈ။ လွင်ႈမၼ်းၸမ်ႉ မၼ်းမီးတၢင်းဢၼ်ၸႂ်ၸပ်းၸႂ်ၸွႆး လူၺ်ႈလွင်ႈဢၼ် ၸဝ်ႈဢၼ်ဝႆႉၵတီႉၼၼ်ႉ မီးသဵတ်ႈၸႃႇၼၼ်ႉယူႇဢေႃႈ။-

12ပိူဝ်ႈဢၼ်ပဵၼ်ၸိူဝ်ႉၼင်ႇၼၼ်လႄႈ ၵူၼ်းၵေႃႉၼိုင်ႈ ဢၼ်မိူၼ်ၸိူဝ်ႉၼင်ႇ ၵူၼ်းဢၼ်တၢႆယဝ်ႉၼၼ်ႉ ပဵၼ်ပေႃႈၶဝ်ၸိူဝ်းဢၼ်ၼမ်ၵိုၼ်းၼႃႇလူင်လၢင် မိူၼ်ၸိူဝ်ႉၼင်ႇ လၢဝ်ၵၢင်ႁၢဝ်တင်းလၢႆလႄႈ ဢမ်ႇၼပ်ႉဢမ်ႇဢၢၼ်ႇလႆႈ မိူၼ်ၸိူဝ်ႉၼင်ႇသၢႆး ႁိမ်းၼမ်ႉသမ်ႇမုၵ်ႉတြႃႇၼၼ်ႉဢေႃႈ။

13ၶဝ်ၸိူဝ်းဢၼ်ဝႃႈမႃးယဝ်ႉ တေႃႈလဵဝ်ၼႆႉၼၼ်ႉ ယင်းဢမ်ႇလႆႈၶၢမ်ႇဢဝ်ၵျေးၸူးဢၵျူဝ်း ဢၼ်ၸၢပ်ႈသႅင်ႇၵၼ်တင်း ၵတီႉၸဝ်ႈၼၼ်ႉလႄႈ ယူႇတီႈၵႆသေလႄႈမုင်ႈႁၼ်ယူႇ၊ ဢဝ်တင်းႁူဝ်ၸႂ် ၵွတ်ႇဢုမ်ႈယူႇ၊ ႁပ်ႉတုင်းဢဝ်လွင်ႈဢၼ် တူဝ်ၸဝ်ႈၵဝ်ႇ ပဵၼ်ၵူၼ်းတၢင်ႇဝၢၼ်ႈတၢင်ႇမိူင်း၊ ၶႅၵ်ႇဢႃႇၵၼ်ႇတူႉ ၵႃႈၼိူဝ်လိၼ်မိူင်းၼႆႉၼၼ်ႉ ထၢင်ႇထၢင်ႇသႃးသႃးယူႇသေလႄႈ၊ ပႃးတင်းၸႂ်ဢၼ်ယုမ်ႇမၢတ်ႈၼၼ်ႉ တၢႆၵႂႃႇပူၼ်ႉၵႂႃႇသေဢေႃႈ။-

14ၶဝ်ၸိူဝ်းဢၼ်ႁပ်ႉတုင်းဢဝ် ၸိူဝ်ႉၼင်ႇၼၼ်ၼၼ်ႉ ၼႄပျႃးလွင်ႈဢၼ်ၶဝ် ႁႃမိူင်းပေႃႈၶဝ်ၼၼ်ႉယူႇ ထၢင်ႇထၢင်ႇသႃးသႃးဢေႃႈ။-

15ၶဝ်ၼၼ်ႉ ပေႃးၶုၵ်းၸႂ်လႆႈၶႆႈၸႂ်ထူပ်း မိူင်းဢၼ်ၶဝ်ဢွၵ်ႇမႃးမိူဝ်ႈဢွၼ်တၢင်းၼၼ်ႉ ဢမၢၼ်ႇၶၼ်ပဵၼ်ၸိုင်၊ မီးဢၶႂၢင်ႉဢၼ်လႆႈၶိုၼ်းမိူဝ်းၸူး ၵႃႈတီႈမိူင်းၼၼ်ႉယူႇဢေႃႈ။-

16ၵူၺ်းၵႃႈတေႃႈလဵဝ်ၼႆႉ ၶဝ်မီးၸႂ်ဢၼ်တူၵ်းဢၢင်ႈၶႂ်ႈလႆႈ မိူင်းဢၼ်ယဵင်ႈၶႅၼ်းမျၢတ်ႈ ဢၼ်ဝႃႈမိူင်းၵၢင်ႁၢဝ်ပုၼ်ႉဢေႃႈ။ ပိူဝ်ႈၼႆလႄႈ ၽြႃးပဵၼ်ၸဝ်ႈ ဢမ်ႇဢူၵ်းဢမ်ႇဢၢႆ လွင်ႈဢၼ်လႆႈၶၢမ်ႇတၢင်းဢၼ်ႁွင်ႉဝႃႈ ၽြႃးၶဝ်ၼၼ်ႉ။ လွင်ႈမၼ်းၸမ်ႉ မၼ်းၸဝ်ႈတႄႇႁဵတ်းဝဵင်းတီႈပုၼ်ႉ ဢၼ်ၶဝ်တၵ်းယူႇၼၼ်ႉဝႆႉယဝ်ႉ။

17ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ ဢႃႇပြႃႇႁၢမ်ႇ ၼၼ်ႉ ပုၵ်ႈၸေႃႇ ဢီႉၸၢၵ်ႈ ၼႂ်းမိူဝ်ႈဢၼ်လႆႈၶၢမ်ႇတၢင်းဢၼ် မၼ်းၸဝ်ႈၸၢမ်းတူၺ်းၼၼ်ႉဢေႃႈ။ ၵေႃႉဢၼ်ၶၢမ်ႇဢဝ်ပျႃႇတိၵ်ႈၸဝ်ႈ ၼမ်ၼႃႇၼၼ်ႉ ဢဝ်လုၵ်ႈတူဝ်ၸဝ်ႈၵဝ်ႇ ၵေႃႉလဵဝ်ၵူၺ်းၼၼ်ႉပုၵ်ႈၸေႃႇဢေႃႈ။-

18လွင်ႈဢၼ် ဢႃႇပြႃႇႁၢမ်ႇ မီးပျႃႇတိၵ်ႈၸဝ်ႈဝႆႉပႃးၼိုင်ႈလႄႈဝႃႈၸမ်ႉ၊ ၸိူဝ်ႉၶိူဝ်းမႂ်းတၵ်းတႄႇ ၼႂ်း ဢီႉၸၢၵ်ႈ ၵူၺ်းဢေႃႈ၊ ဝႃႈၼင်ႇၼႆဢေႃႈ။-

19မိူဝ်ႈဢၼ်မၼ်းပုၵ်ႈၸေႃႇ ၸိူဝ်ႉၼင်ႇၼၼ်ၼၼ်ႉၸိုင်၊ မၼ်းၶုၵ်းၸႂ်လႆႈၶႆႈၸႂ်ထူပ်း လွင်ႈဢၼ်ၽြႃးပဵၼ်ၸဝ်ႈ တၢတ်ႈၼိူင်ႇႁႂ်ႈလုၵ်ႉၵႃႈတၢင်းတၢႆၶိုၼ်းလိပ်းလႆႈၼၼ်ႉယူႇဢေႃႈ။ ၸွမ်းၼင်ႇၵႂၢမ်းဢူႉပမႃႇၸိုင် မၼ်းလႆႈလုၵ်ႈမၼ်းၼၼ်ႉ ၵႃႈၼႂ်းတၢင်းတၢႆဢေႃႈ။

20ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ ဢီႉၸၢၵ်ႈ ၼၼ်ႉၵေႃႈ၊ ဢဝ်လွင်ႈတၢင်းဢၼႃႇၵၢတ်ႈ ပၼ်တၢင်းလီတီႈ ယႃႇၵုပ်ႈ တင်း ဢေးသေႃး ဢေႃႈ။

21ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ ယႃႇၵုပ်ႈ ၼၼ်ႉၵေႃႈ၊ မိူဝ်ႈဢၼ်ၸမ်ၶိင်ႇဢၼ်မၼ်းတၵ်းတၢႆၼၼ်ႉၸိုင် ပၼ်တၢင်းလီတီႈလုၵ်ႈၸၢႆး ယူဝ်းသႅပ်ႈ သွင်ၵေႃႉလႄႈ ၵူဝ်းၵႂၢႆႇၵႃႈၼိူဝ်ပၢႆတွင်ႇမူၺ်း မၼ်းဢေႃႈ။

22ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ ယူဝ်းသႅပ်ႈ ၼၼ်ႉ မိူဝ်ႈဢၼ်ယင်းတိုၵ်ႉတၢႆယူႇၼၼ်ႉၸိုင် ၼႄပျႃးလွင်ႈတၢင်းဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ တၵ်းဢွၵ်ႇၵႂႃႇၼၼ်ႉသေလႄႈ သင်ႇလၢတ်ႈဝႆႉလွင်ႈလုပ်ႇမၼ်းဢေႃႈ။

23ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ ပေႃႈမႄႈ မူဝ်းသေႇ ၵိူတ်ႇလဵင်ႉမၼ်းမႃးသေယဝ်ႉ၊ ပိူဝ်ႈဢၼ်ႁၼ်လွင်ႈတၢင်းဢၼ် မၼ်းပဵၼ်လုၵ်ႈဢွၼ်ႇဢၼ်ႁၢင်ႈလီၼၼ်ႉလႄႈ၊ ယင်းဢမ်ႇၵူဝ်ဢမိင်ႉၶုၼ်ႁေႃၶမ်းလႄႈ ဢဝ်မၼ်းသိူင်ႇဝႆႉသၢမ်လိူၼ်တဵမ်တဵမ်ဢေႃႈ။

24ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ မူဝ်းသေႇ ၼၼ်ႉ၊ မိူဝ်ႈဢၼ်ဢသၢၵ်ႈယႂ်ႇမႃးယဝ်ႉၼၼ်ႉၸိုင်၊ ပႄႇပႅတ်ႈဢၶႂၢင်ႉ တၢင်းဢၼ်ႁွင်ႉဝႃႈလုၵ်ႈၸၢႆး ၵႃႈတီႈလုၵ်ႈယိင်းၶုၼ် ၽႃႇရေႃး ၼၼ်ႉ၊-

25ၵွပ်ႈပိူဝ်ႈဢၼ်ယဵင်ႈၶႅၼ်းမီးဢလူဝ်ႇၶႂ်ႈၶၢမ်ႇ တၢင်းၽၢၼ်လူၺ်ႈၵၼ်တင်းၵူၼ်းၽြႃးပဵၼ်ၸဝ်ႈတင်းလၢႆ ၼႃႇသေတၢင်းဢၼ်ၸၢမ်ႇၸႃးၵႃႇမၵုင်ႇၵမ်းဢွၼ်ႇၼိုင်ႈ ဢၼ်မီးဢပႅတ်ႈၼၼ်ႉ၊-

26ဢိၵ်ႇတင်း ၵွပ်ႈပိူဝ်ႈထၢင်ႇၼႂ်းၸႂ်လႄႈဝႃႈ တုၵ်ႉၶႃႉတၢင်းဢၼ်သႄႉသွမ်း ၵွပ်ႈပိူဝ်ႈၸဝ်ႈၶရိၸ်ႈၼၼ်ႉပဵၼ်ၸေးၸိမ်ႇ ဢၼ်ယဵင်ႈၶႅၼ်းမျၢတ်ႈၼႃႇသေၸေးၸိမ်ႇမိူင်း ဢေႇၵိပ်ႉတူႉ ၼၼ်ႉ၊ ဝႃႈၼင်ႇၼႆၼၼ်ႉဢေႃႈ။ လွင်ႈမၼ်းၸမ်ႉ မၼ်းထွၵ်ႈလူၺ်ႈဢၵျူဝ်းဢၼ်တၵ်းလႆႈၵမ်းလိုၼ်းၼၼ်ႉလႄႈ မုင်ႈထႃႈမွင်းထႃႈယူႇဢေႃႈ။-

27ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ မၼ်းၼၼ်ႉယင်းဢမ်ႇၵူဝ်ဢမ်ႇႁႄတၢင်းၸႂ်မႆႈၶႆႈၸႃႉ ၶုၼ်ႁေႃၶမ်းလႄႈ ပႅတ်ႈမိူင်း ဢေႇၵိပ်ႉတူႉ ၼၼ်ႉဝႆႉသေဢေႃႈ။ လွင်ႈမၼ်းၸမ်ႉ မၼ်းမီးတၢင်းဢၼ်တႄႇယူႇၼိမ်ယူႇ မိူၼ်ၸိူဝ်ႉၼင်ႇဢၼ် မၼ်းလႆႈႁၼ်ၽြႃးပဵၼ်ၸဝ်ႈဢၼ်တႃဢမ်ႇႁၼ်လႆႈၼၼ်ႉဢေႃႈ။-

28ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ မၼ်းၼၼ်ႉပႂ်ႉၵမ်ပႂ်ႉၸွမ်းပွႆး ပႃႉသၶႃႇ ဢိၵ်ႇတင်းတၢင်းဢၼ်ၸုပ်ႉၽႅတ်းလိူတ်ႈၼၼ်ႉ ႁႂ်ႈၵေႃႉဢၼ်ယႃႉပႅတ်ႈလုၵ်ႈတူၼ်ႈတင်းလၢႆၼၼ်ႉ ဢမ်ႇလႆႈတိူဝ်ႉလႆႈထုၵ်ႇၵူၼ်း ဢီႉသရေႇလႃႉ ၸိူဝ်းၼၼ်ႉဢေႃႈ။

29ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ ၶဝ်ၼၼ်ႉလႆႈပႆတၢင်းၵႂႃႇၵႃႈၼႂ်းၵၢင်ပၢင်ႇလၢႆႇ ဢေႇတုမ်ႇ မိူၼ်ၸိူဝ်ႉၼင်ႇဢၼ်ၵႂႃႇတၢင်းလွႆၼၼ်ႉဢေႃႈ။ ၵူၼ်း ဢေႇၵိပ်ႉတူႉ ၸိူဝ်းၼၼ်ႉ မိူဝ်ႈဢၼ်ၵျူဝ်းၸႃးဢၢင်ႈတၵ်းၵႂႃႇ ၸိူဝ်ႉၼင်ႇၶဝ်ၼၼ်ႉၸိုင် ၸူမ်ၵႂႃႇဢေႃႈ။

30ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ လမ်းဝဵင်း ယေႇရီႉၶူဝ်း ၼၼ်ႉ ၵိူၼ်ႇလူမ်ႉပင်းတူၵ်း လိုၼ်းသေဢၼ်လႆႈၶၢမ်ႇတၢင်းဢၼ်ၶဝ် လဵပ်ႈႁွပ်ႈၸဵတ်းဝၼ်းတဵမ်တဵမ်ၼၼ်ႉဢေႃႈ။

31ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ မႄႈမွၵ်ႇယႃႈ ရႃႇၶပ်ႉ ၼၼ်ႉ ယင်းဢမ်ႇလူႉဢမ်ႇလႅဝ်လူၺ်ႈၵၼ်တင်း ၶဝ်ၸိူဝ်းဢၼ်ဢမ်ႇယုမ်ႇမၢတ်ႈၼၼ်ႉလႄႈ လႆႈၵတ်းယဵၼ်ၶျၢမ်းသႃႇ ၵွပ်ႈပိူဝ်ႈဢၼ်ႁဵတ်းၵေႃႉႁဵတ်းသေႈ လူၺ်ႈၵၼ်တင်း ၶဵဝ်လွတ်ႈၽၢႆႇၼႂ်း ၸိူဝ်းၼၼ်ႉလႄႈ ႁပ်ႉတုင်းဢဝ်ၶဝ်ၼၼ်ႉဢေႃႈ။

32လိူဝ်သေၼၼ်ႉ မီးတီႈလၢတ်ႈၸိူဝ်ႉၼင်ႇႁိုဝ်လူးၵွၼ်ႇ။ လၢတ်ႈလွင်ႈၸႃႉၸဵမ် ၵီႉတီႉဢုၼ်ႇ၊ ပႃႇရၵ်ႉ၊ သၢမ်ႇသုၼ်ႇ၊ ယေႇၽထႃႉ၊ တႃႇဝိတ်ႈ၊ သမူၺ်ႇလႃႉ ဢိၵ်ႇတင်းပရေႃးၽႅတ်ႈၸိူဝ်းၼၼ်ႉလႄႈ ဢမ်ႇသဵင်ႈလႆႈ။-

33ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ ၶဝ်ၼၼ်ႉလႆႈပႄႉၼႅင်ႇ တၢင်ႇဝၢၼ်ႈတၢင်ႇမိူင်း၊ လႆႈၸီႇယၢင်ႇၸွမ်းၼင်ႇတြႃး၊ လႆႈၶဝ်ႈၸၢမ်ႇၸႃးၵတီႉၸဝ်ႈ၊ လႆႈဢိုတ်းဝႆႉသူပ်းသၢင်ႇသီႈ၊-

34လႆႈႁႂ်ႈႁႅင်းၽႆးထၢတ်ႇယဵၼ်၊ လႆႈၵၢင်းလွတ်ႈတင်းၽေးလၢပ်ႇ၊ လႆႈလုၵ်ႉသေၵႃႈၼႂ်းတၢင်းၶႆႈတၢင်းပဵၼ်လႄႈ ႁွတ်ႈထိုင်တၢင်းဢၼ်ယူႇလီၵိၼ်ဝၢၼ်၊ လႆႈပျေႉၸုမ်ႇတင်းႁႅင်းဢၼ်တိုၵ်းသိုၵ်း၊ လႆႈယႃႉပႅတ်ႈတပ်ႉၵူၼ်း တၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉဢေႃႈ။

35ၽူႈယိင်းၶဝ်ၵေႃႈ သမ်ႉၶိုၼ်းလႆႈလုၵ်ႈလႆႈလၢင်းတူဝ်ၸဝ်ႈၵဝ်ႇ ဢၼ်လုၵ်ႉၵႃႈတၢင်းတၢႆၶိုၼ်းလိပ်းၼၼ်ႉဢေႃႈ။ ၵူၼ်းၵမ်ႈၽွင်ႈယင်းဢမ်ႇၶၢမ်ႇဢမ်ႇဢဝ်တၢင်းဢၼ်လွတ်ႈလႄႈ လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄး ဢၼ်ယၢပ်ႇၼႃႇ ႁႂ်ႈလႆႈႁွတ်ႈထိုင်တၢင်းဢၼ်လုၵ်ႉၶိုၼ်း ဢၼ်ယဵင်ႈၶႅၼ်းမျၢတ်ႈၼၼ်ႉဢေႃႈ။

36ၵမ်ႈၽွင်ႈၵေႃႈ လႆႈၶၢမ်ႇတၢင်းဢၼ်ၸၢမ်းတူၺ်း ဢၼ်ဝႃႈတၢင်းဢၼ်ႁဵတ်းပျၢၵ်ႈသႄႉသွမ်း ဢိၵ်ႇတင်းတၢင်းဢၼ်ပေႃႉယႅၼ်ႉဢမ်ႇၵႃး၊ လႆႈၶၢမ်ႇတၢင်းဢၼ်ၶၢမ်ႇတၢင်းဢၼ်မတ်ႉၽုၵ်ႇ ဢိၵ်ႇတင်းတၢင်းဢၼ်လႆႈယူႇၵႃႈၼႂ်းထွင်ႇဢေႃႈ။-

37ၶဝ်လႆႈၶၢမ်ႇတၢင်းဢၼ် ဢဝ်တင်းမၢၵ်ႇႁိၼ်ထိမ်ႈ၊ တၢင်းဢၼ်ဢဝ်လဵၵ်းလိူဝ်ႈတႅပ်းၶၢတ်ႇ ပဵၼ်ပွတ်းပဵၼ်တွၼ်ႈ၊ တၢင်းဢၼ်ၸၢမ်းတူၺ်းလႄႈယႃႉယူၵ်ႉ၊ တၢင်းဢၼ်ဢဝ်လၢပ်ႇၽၼ်းၸိူဝ်းၼၼ်ႉဢေႃႈ။ ၶဝ်ယၢၵ်ႈၼႃႇၽၢၼ်ၼႃႇလႄႈ ၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးယူႇ၊ ၼုင်ႈမႆၼင်သူဝ်းၼင်ပႄႉယူႇသေလႄႈ ၵႂႃႇၵႂႃႇမႃးမႃးဢေႃႈ။-

38လေႃးၵႃႉၼႆႉ၊ ဢမ်ႇထိူၵ်ႈဢမ်ႇတၢၼ်ႇၵၼ်တင်းၶဝ်။ ၶဝ်လႆႈလႄႇၵႂႃႇလႄႇမႃးၵႃႈၼႂ်းထိူၼ်ႇၼႂ်းၶိူဝ်း ၼႂ်းၵႄႈႁူၺ်ႈၵႄႈလွႆ၊ ၼႂ်းထမ်ႈၼႂ်းႁူး၊ ၼႂ်းၶုမ်လိၼ်လုၵ်းလိၼ်ဢေႃႈ။

39ၶဝ်တင်းသဵင်ႈတင်းလူင်ၸိူဝ်းၼၼ်ႉ ပိၵ်ႉသမ်ႉႁွတ်ႈထိုင်တၢင်းဢၼ်ယွင်ႈယေႃး ၵွပ်ႈပိူဝ်ႈတၢင်းဢၼ် ၶဝ်ယုမ်ႇမၢတ်ႈၼၼ်ႉသေၵေႃႈ၊ ဢမ်ႇလႆႈၶၢမ်ႇဢဝ်ၵျေးၸူးဢၵျူဝ်းၵႃႈၼင်ႇၵတီႉၸဝ်ႈၼၼ်ႉ။-

40ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ လွင်ႈၼင်ႇႁိုဝ်ႁဝ်းယင်းဢမ်ႇပႃးလႄႈ ၶဝ်ၼၼ်ႉတၵ်းဢမ်ႇလႆႈႁွတ်ႈထိုင် တၢင်းဢၼ်ၸေးၸုမ်ႇၸိုင်၊ ၽြႃးပဵၼ်ၸဝ်ႈၵျၢမ်ႇပွင်ၵျေးၸူး ဢၼ်ယဵင်ႈၶႅၼ်းမျၢတ်ႈၼႃႇပုၼ်ႈႁဝ်းဢေႃႈ။