Hebrews 4

Shan

← Chapter 3 Jump to: Chapter 5 →

1ပိူဝ်ႈၼႆလႄႈ မႆႈၸႂ်လူၺ်ႈလွင်ႈဢၼ်ၵတီႉၸဝ်ႈဢၼ်ပၼ်ဢၶႂၢင်ႉ ဢၼ်တၵ်းလႆႈၶဝ်ႈၵႃႈၼႂ်းၵတ်းယဵၼ်ၶျၢမ်းသႃႇၽြႃးပဵၼ်ၸဝ်ႈၼၼ်ႉ ယင်းၵိုတ်းၵျၢၼ်ႇဝႆႉယူႇတီႈႁဝ်းလႄႈ ၼႂ်းသူၵမ်ႈၽွင်ႈ တၵ်းဢမ်ႇၶိုတ်းလႄႈယူႇၼၼ်ႉတႃႉႁဝ်း။-

2ႁဝ်းလႆႈငိၼ်းသတၢင်းသိူဝ်းပျေႃႇမိူၼ်ၸိူဝ်ႉၼင်ႇၶဝ်ၼၼ်ႉယဝ်ႉ။ ၼႂ်းဝႃႈၼၼ်သေၵေႃႈ ၵႂၢမ်းတြႃးဢၼ်ၶဝ်ၼၼ်ႉလႆႈငိၼ်းၼၼ်ႉၸိုင် ဢမ်ႇပၼ်ဢၵျူဝ်းၵွပ်ႈပိူဝ်ႈဢၼ်ဢမ်ႇလေႃးၵၼ်တင်းတၢင်းယုမ်ႇမၢတ်ႈ ၵႃႈၼႂ်းၶဝ်ၸိူဝ်းဢၼ်လႆႈငိၼ်းၼၼ်ႉ။-

3ႁဝ်းၸမ်ႉ၊ ပဵၼ်ၵေႃႉဢၼ်ယုမ်ႇမၢတ်ႈလႄႈ ၶဝ်ႈၵႃႈၼႂ်းၵတ်းယဵၼ်ၶျၢမ်းသႃႇၼၼ်ႉဢေႃႈ။ ၼင်ႇၼၼ်လႄႈ ပျႃႇတိၵ်ႈၸဝ်ႈမီးဝႆႉလႄႈဝႃႈၸမ်ႉ၊ ၵဝ်ၸႂ်မႆႈၶႆႈၸႃႉလႄႈတိူင်ႇဝႃႈ၊ ၶဝ်ဢမ်ႇလႆႈၶဝ်ႈၵႃႈၼႂ်းၵတ်းယဵၼ်ၶျၢမ်းသႃႇၵဝ်၊ ဝႃႈၼင်ႇၼႆဢေႃႈ။ မိူဝ်ႈဢၼ်ဝႃႈၵတ်းယဵၼ်ၶျၢမ်းသႃႇၼၼ်ႉၸိုင် ၶႂ်ႈဝႃႈၵတ်းယဵၼ်ၶျၢမ်းသႃႇတၢင်းဢၼ်ဢမူႉလွင်ႈတၢင်းတင်းသဵင်ႈတင်းလူင်ယဝ်ႉၸွတ်ႇတူဝ်ႈလႄႈ မၼ်းၸဝ်ႈယူႇၼိမ်ၼိမ်ယူႇ ၸဵမ်မိူဝ်ႈၵမ်ႇၽႃႇၸႃႉတႄႇၼၼ်ႉဢေႃႈ။-

4ဢၼ်ဢဝ်လွင်ႈဝၼ်း သတ်ႉတမႃႉၼၼ်ႉသေလႄႈ မႃးၼႂ်းၵျၢမ်းလိၵ်ႈတီႈၼိုင်ႈလႄႈဝႃႈၸမ်ႉ၊ ၽြႃးပဵၼ်ၸဝ်ႈၼၼ်ႉ ယဝ်ႉၸွတ်ႇတူဝ်ႈလွင်ႈတၢင်းဢၼ်မၼ်းၸဝ်ႈႁဵတ်းပဵၼ်တင်းသဵင်ႈတင်းလူင်ၼၼ်ႉလႄႈ၊ ၼႂ်းဝၼ်းသတ်ႉတမႃႉ ယူႇၼိမ်ၼိမ်ယူႇဢေႃႈ၊ ဝႃႈၼင်ႇၼႆဢေႃႈ။-

5ဢၼ်သမ်ႉမႃးထႅင်ႈၼႂ်းၵျၢမ်းလိၵ်ႈလႄႈဝႃႈၸမ်ႉ၊ ၶဝ်ဢမ်ႇလႆႈၶဝ်ႈၵႃႈၼႂ်းၵတ်းယဵၼ်ၶျၢမ်းသႃႇၵဝ်၊ ဝႃႈၼင်ႇၼႆဢေႃႈ။

6ၵွပ်ႈႁွႆးၼႆႉ၊ ၵွပ်ႈပိူဝ်ႈၵမ်ႈၽွင်ႈတၵ်းလႆႈၶဝ်ႈလႄႈ ၶဝ်ၸိူဝ်းဢၼ်လႆႈငိၼ်းသတၢင်းသိူဝ်းပျေႃႇ မိူဝ်ႈဢွၼ်တၢင်းၼၼ်ႉၸမ်ႉ၊ ဢမ်ႇလႆႈၶဝ်ႈၵွပ်ႈပိူဝ်ႈဢၼ်ဢမ်ႇယုမ်ႇမၢတ်ႈၼၼ်ႉလႄႈ၊-

7မၼ်းၸဝ်ႈမၢတ်ႈမၢႆဝႆႉဝၼ်းၼိုင်ႈသေႇၶျႃႇလီငၢမ်းလႄႈ ဝႆႉၼႂ်းၵျၢမ်းလိၵ်ႈ တႃႇဝိတ်ႈ လႄႈဝႃႈ၊ ၶိင်ႇၵႃႇလႃႉႁိုင်ထၢၼ်ႇၼႆႉသေယဝ်ႉ၊ ၼႂ်းဝၼ်းမိူဝ်ႈၼႆႉ ဝႃႈၼင်ႇၼႆလႄႈ မႅၼ်ႈၸွမ်းၼင်ႇဢၼ်ဝႃႈမႃးယဝ်ႉလႄႈဝႃႈ၊ ၼႂ်းဝၼ်းမိူဝ်ႈၼႆႉ ပေႃးသူငိၼ်းသဵင်ပျႃႇတိၵ်ႈၸဝ်ႈၸိုင် ယႃႇပေမီးႁူဝ်ၸႂ်ဢၼ်ၵႅၼ်ႇဢၼ်ၶႅင်၊ ဝႃႈၼင်ႇၼႆၼၼ်ႉဢေႃႈ။

8ပေႃး ယေႃးသူႉ လႆႈပၼ်ၵတ်းယဵၼ်ၶျၢမ်းသႃႇတီႈၶဝ်ၼၼ်ႉ ဢမၢၼ်ႇၶၼ်ပဵၼ်ယဝ်ႉၸိုင်၊ ၵမ်းလိုၼ်းတၵ်းမီးတီႈလၢတ်ႈလွင်ႈဝၼ်းတၢင်ႇဝၼ်းၸိူဝ်ႉၼင်ႇႁိုဝ်လူးၵွၼ်ႇ။

9ပိူဝ်ႈၼႆလႄႈ ၵတ်းယဵၼ်ၶျၢမ်းသႃႇတၢင်းၼိမ်မဵဝ်းၼိုင်ႈယင်းၵိုတ်းၵျၢၼ်ႇဝႆႉယူႇ ပုၼ်ႈႁင်းၵူၼ်းၽြႃးပဵၼ်ၸဝ်ႈတင်းလၢႆဢေႃႈ။-

10ၵေႃႉဢၼ်လႆႈၶဝ်ႈၵႃႈၼႂ်းၵတ်းယဵၼ်ၶျၢမ်းသႃႇၼၼ်ႉၵေႃႈ၊ လွင်ႈတၢင်းဢၼ်တူဝ်ၸဝ်ႈၵဝ်ႇ သၢင်ႈႁဵတ်းတင်းလၢႆယဝ်ႉၸွတ်ႇတူဝ်ႈလႄႈ လႆႈယူႇၼိမ်ၼိမ်လီလီမိူၼ်ၸိူဝ်ႉၼင်ႇဢၼ် ၽြႃးပဵၼ်ၸဝ်ႈ လွင်ႈတၢင်းဢၼ်မၼ်းၸဝ်ႈႁဵတ်းပဵၼ်ၼၼ်ႉ ယဝ်ႉၸွတ်ႇတူဝ်ႈလႄႈ ယူႇၼိမ်ၼိမ်လီလီၼၼ်ႉဢေႃႈ။

11ပိူဝ်ႈၼႆလႄႈ လွင်ႈၼင်ႇႁိုဝ် ႁဝ်းတၵ်းဢမ်ႇလႆႈၸွမ်းသဵၼ်ႈတၢင်း ဢၼ်ၵူၼ်း ဢီႉသရေႇလႃႉ တင်းလၢႆ မီးၸႂ်ဢၼ် ယင်းဢမ်ႇယုမ်ႇမၢတ်ႈလႄႈ လူမ်ႉၼၼ်ႉၸိုင် ဢဝ်ႁႅင်းၵျူဝ်းၸႃးႁဵတ်းႁႂ်ႈလႆႈၶဝ်ႈ ၵႃႈၼႂ်းၵတ်းယဵၼ်ၶျၢမ်းသႃႇတႃႉႁဝ်း။-

12ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈၸိုင် ပျေႉၸုမ်ႇတင်းတၢင်းဢၼ်ဢသၢၵ်ႈလိပ်း၊ တၢင်းဢၼ်မီးတင်းတၼ်းၶူဝ်း ပွင်ႁဵတ်းပွင်မႄး၊ တၢင်းဢၼ်ၽၢႆသေ လၢပ်ႇသၢၼ်ႇလျၢၵ်ႉ တင်းသဵင်ႈတင်းလူင်သေလႄႈ ၸၢင်ႈတႅင်းပွင်ႇထၼ်ႈပေႃး ၸၵ်းၽႄဢသၢၵ်ႈတင်းၸႂ်ဝီႉၺိၺ်ႇ၊ ပွင်ႈလုပ်ႇတင်းလၢႆ တင်းဢွၵ်းလုပ်ႇၼၼ်ႉလႄႈ၊ ၸၢင်ႈႁူႉႁၼ်တၢင်းဢၼ် ႁူဝ်ၸႂ်ၵျၢမ်ႇပွင်ယူႇၼၼ်ႉဢေႃႈ။-

13လွင်ႈတၢင်းဢၼ်မၼ်းၸဝ်ႈၽၢၼ်ႇသၢင်းႁဵတ်းပဵၼ် ဢၼ်ဢမ်ႇထၢင်ႇသႃး ၵႃႈတီႈၽၢႆႇၼႃႈၸဝ်ႈဢၼ် ၸႅတ်ႈထၢမ်ၸီႇယၢင်ႇႁဝ်းၼၼ်ႉ ဢမ်ႇမီးသေၸိူဝ်ႉသေပိူင်။ လွင်ႈတၢင်းၵႃႈမီးတင်းသဵင်ႈတင်းလူင် ယင်းဢမ်ႇမီးဢၼ်ႁႄႉဢၼ်ၵင်ႈလႄႈ ၽုၺ်ႇဝႆႉမီးယူႇသိုဝ်ႈၼႃႈတႂ်ႈတႃမၼ်းၸဝ်ႈဢေႃႈ။

14တေႃႈလဵဝ်ၼႆႉၸမ်ႉ၊ ၵွပ်ႈပိူဝ်ႈဢၼ်ႁဝ်းမီးၶုၼ်ယိတ်ႈပရေႃးႁဵၵ်ႈလူင် ဢၼ်ၵႂႃႇၶဝ်ႈၵႃႈၼႂ်းမိူင်းၵၢင်ႁၢဝ်ဢၼ်ဝႃႈ ယေႇသူႉ လုၵ်ႈၽြႃးပဵၼ်ၸဝ်ႈၼၼ်ႉလႄႈ ဢွၼ်ၵၼ်တႄႇယူႇၼႂ်းလွင်ႈတၢင်းဢၼ် ႁဝ်းႁပ်ႉတုင်းဢဝ်ယဝ်ႉၼၼ်ႉတႃႉႁဝ်း။-

15ႁဝ်းမီးၶုၼ်ယိတ်ႈပရေႃးႁဵၵ်ႈ ဢၼ်ပဵၼ်ၵေႃႉဢၼ်ဢမ်ႇၸဵပ်းၸႂ်လႆႈၵွပ်ႈပိူဝ်ႈတုၵ်ႉၶႃႉတၢင်းၽၢၼ် ဢၼ်ႁဝ်းလႆႈၶၢမ်ႇၼႆႉဢမ်ႇၸႂ်ႈ။ ပဵၼ်ၵေႃႉဢၼ်ယၢမ်ႈလႆႈၶၢမ်ႇ တၢင်းဢၼ်ၸၢမ်းတူၺ်းယႃႉယူၵ်ႉၵူႈၸိူဝ်ႉၵူႈပိူင် မိူၼ်ၸိူဝ်ႉၼင်ႇဢၼ်ႁဝ်းလႆႈၶၢမ်ႇၼၼ်ႉယဝ်ႉဢေႃႈ။ ၼႂ်းဝႃႈၼၼ်သေၵေႃႈ မၼ်းၸဝ်ႈၵၢင်းလွတ်ႈတင်း တူႉၸရိူၵ်ႈဢပႅတ်ႈဢေႃႈ။-

16ပိူဝ်ႈၼႆလႄႈ မီးတင်းၸႂ်ဢၼ်ႁတ်းႁၢၼ်သေလႄႈ ဢွၼ်ၵၼ်သုတ်ႉၶဝ်ႈၸပ်းၶဝ်ႈၸူးၵႃႈတီႈ ၵျေးၸူးပလၢင်ႇၸဝ်ႈ ႁႂ်ႈလႆႈၶၢမ်ႇဢဝ် ၵရူႉၼႃႇတၢင်းဢၼ်ဢဵတ်းလူ ဢိၵ်ႇတင်းၵျေးၸူး တၢင်းဢၼ်မၼ်းၸဝ်ႈၸွႆႈထႅမ် ဢၼ်သၢင်ႇထုၵ်ႇလီငၢမ်းၼၼ်ႉတႃႉႁဝ်း။

← Chapter 3 Jump to: Chapter 5 →