Hebrews 3

Shan

← Chapter 2 Jump to: Chapter 4 →

1ပေႃးပဵၼ်ၸိူဝ်ႉၼင်ႇၼၼ်ၸိုင်၊ ပီႈၼွင်ႉဢၼ်မူတ်းၸၢင်ႇ ဢၼ်လႆႈၶၢမ်ႇဢဝ်ၵျေးၸူး တၢင်းဢၼ်မၼ်းၸဝ်ႈႁွင်ႉပၢင်းဢဝ် ဢၼ်ၸၢပ်ႈသႅင်ႇၵၼ်တင်းမိူင်းၵၢင်ႁၢဝ်ၶဝ်ဢိူၺ်း၊ ၶႆႈၸႂ်ဝူၼ်ႉၸႂ်လူၺ်ႈလွင်ႈတမၢၼ်ႇၸဝ်ႈ ဢိၵ်ႇတင်းၶုၼ်ယိတ်ႈပရေႃးႁဵၵ်ႈ ဢၼ်ႁဝ်းႁပ်ႉတုင်းဢဝ်ဢၼ်ဝႃႈ ယေႇသူႉ ၊-

2ဢၼ်ပႂ်ႉသဵတ်ႈၸႃႇၵႃႈၼႂ်းလွင်ႈတၢင်းၵေႃႉဢၼ် ၶၢၼ်းမၼ်းၸဝ်ႈဝႆႉၼၼ်ႉ မိူၼ်ၸိူဝ်ႉၼင်ႇဢၼ် မူဝ်းသေႇ ပႂ်ႉသဵတ်ႈၸႃႇ ၵႃႈၼႂ်းႁိူၼ်းၽြႃးပဵၼ်ၸဝ်ႈတင်းႁိူၼ်းၼၼ်ႉ ၸေးၸေးၸွတ်ႇၸွတ်ႇသေၵမ်းတႃႉ။-

3မီးလွင်ႈတီႈလီထၢင်ႇမၼ်းၸဝ်ႈပဵၼ်ၵေႃႉဢၼ် ယဵင်ႈၶႅၼ်းထိူၵ်ႈၶၢမ်ႇသရေႇယႂ်ႇၼႃႇသေ မူဝ်းသေႇ ၼၼ်ႉ မိူၼ်ၸိူဝ်ႉၼင်ႇဢၼ် ၵေႃႉဢၼ်မႄးႁဵတ်းႁိူၼ်း ယဵင်ႈၶႅၼ်းမီးသရေႇယႂ်ႇၼႃႇသေႁိူၼ်းၼၼ်ႉဢေႃႈ။-

4ႁိူၼ်းဢၼ်လႂ်သေဢမ်ႇဝႃႈ၊ ပဵၼ်ၵွပ်ႈပိူဝ်ႈဢၼ်သေၵေႃႉသေၵူၼ်းမႄးႁဵတ်းဢေႃႈ။ ၵေႃႉဢၼ်တႄႇႁဵတ်း ၵူႈၸိူဝ်ႉၵူႈပိူင်ၸမ်ႉ ပဵၼ်ၽြႃးပဵၼ်ၸဝ်ႈဢေႃႈ။-

5မူဝ်းသေႇ ၼၼ်ႉပႂ်ႉသဵတ်ႈၸႃႇယူႇ ၵႃႈၼႂ်းႁိူၼ်းၽြႃးပဵၼ်ၸဝ်ႈတင်းႁိူၼ်း မိူၼ်ၸိူဝ်ႉၼင်ႇၵေႃႉဢၼ် လႆႈၶၢမ်ႇတၢင်းၸႂ်ႉတၢင်းသွႆၼၼ်ႉ ပုၼ်ႈဢၼ်တၵ်းၶၢမ်ႇသၢၵ်ႈသေႇလွင်ႈတၢင်းဢၼ် တၵ်းႁေႃးလၢတ်ႈၵမ်းလိုၼ်းတင်းလၢႆၼၼ်ႉဢေႃႈ။-

6ၸဝ်ႈၶရိၸ်ႈၸမ်ႉ၊ ဢုပ်ႉပိူင်ႇႁိူၼ်းၸဝ်ႈလႄႈ ပႂ်ႉသဵတ်ႈၸႃႇယူႇမိူၼ်ၸိူဝ်ႉၼင်ႇ လုၵ်ႈၸၢႆးဢေႃႈ။ ႁဝ်းၸမ်ႉ၊ ပေႃးမၼ်ႈၶိူင်ႇယူႇၼႂ်း တၢင်းဢၼ်ႁတ်းႁၢၼ် ဢိၵ်ႇတင်းၼႂ်းတၢင်းဢၼ်သိူဝ်းပျေႃႇဢုပ်ႇဝၢဝ်း ဢၼ်ၸၢပ်ႈသႅင်ႇၵၼ်တင်း တၢင်းဢၼ်မုင်ႈထႃႈမွင်းထႃႈၼၼ်ႉ တေႃႇထိုင်ႁွတ်ႈတီႈသုတ်းတီႈၵွႆၸိုင်၊ ပဵၼ်ႁိူၼ်းၸဝ်ႈၼၼ်ႉဢေႃႈ။

7ပိူဝ်ႈၼႆလႄႈ ဝီႉၺိၺ်ႇဢၼ်မူတ်းၸၢင်ႇၸဝ်ႈ ႁေႃးလၢတ်ႈဝႆႉလႄႈဝႃႈၸမ်ႉ၊ ၼႂ်းဝၼ်းမိူဝ်ႈၼႆႉ ပေႃးသူငိၼ်းသဵင်ပျႃႇတိၵ်ႈၸဝ်ႈၸိုင်၊-

8ယႃႇပေမီးႁူဝ်ၸႂ်ဢၼ်ၵႅၼ်ႇဢၼ်ၶႅင် မိူၼ်ၸိူဝ်ႉၼင်ႇဢၼ်မီးၼႂ်းၶိင်ႇၵႃႇလႃႉ တၢင်းဢၼ်ႁဵတ်းဢမ်ႇထုၵ်ႇၶတ်းၵၼ်တင်းၵဝ်လႄႈ ၸၢမ်းတူၺ်းယႃႉယူၵ်ႉၵႃႈၼႂ်းထိူၼ်ႇ၊-

9တီႈဢၼ်ပူႇသူမွၼ်ႇသူ ၸႅတ်ႈထၢမ်ၸၢမ်းတူၺ်းယႃႉယူၵ်ႉၵဝ် ၵူႈၸိူဝ်ႉၵူႈပိူင်သေလႄႈ ႁၼ်လွင်ႈတၢင်းဢၼ်ၵဝ်ႁဵတ်းတင်းလၢႆၼၼ်ႉ သီႇသိပ်းပီႊတဵမ်တဵမ်ၼၼ်ႉ၊-

10ၵွပ်ႈႁွႆးၼႆႉ၊ ၵဝ်လီႁင်ႈၵူၼ်းမဵဝ်းၼၼ်ႉလႄႈဝႃႈ၊ ၶဝ်မီးၸႂ်သၽေႃးဢၼ်ၸၢင်ႈၽိတ်းပိူင်ႈယူႇသေႇသေႇဢေႃႈ။ ၶဝ်ဢမ်ႇႁူႉသဵၼ်ႈတၢင်းဢၼ်ၵဝ်ၵႂႃႇၵႂႃႇမႃးမႃးယူႇၼၼ်ႉ၊ ဝႃႈၼင်ႇၼႆဢေႃႈ။-

11ပိူဝ်ႈၼႆလႄႈ ၵဝ်ၸႂ်မႆႈၶႆႈၸႃႉလႄႈတိူင်ႇဝႃႈ၊ ၶဝ်ဢမ်ႇလႆႈၶဝ်ႈၵႃႈၼႂ်း ၵတ်းယဵၼ်ၶျၢမ်းသႃႇၵဝ်၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။

12ပီႈၼွင်ႉၶဝ်ဢိူၺ်း၊ လွင်ႈၼင်ႇႁိုဝ်သူ တၵ်းဢမ်ႇမီးႁူဝ်ၸႂ်ဢၼ်ၵူဝ်ႈၵိူၵ်ႇ ဢၼ်ဢမ်ႇၸၢင်ႈယုမ်ႇမၢတ်ႈ ၵွပ်ႈပိူဝ်ႈဢၼ်ဢွၵ်ႇသေၵႃႈတီႈၽြႃးပဵၼ်ၸဝ်ႈ ဢၼ်ဢသၢၵ်ႈလိပ်းယူႇၼၼ်ႉၵႂႃႇၸိုင်၊ ႁဵတ်းသတီႉတႃႉ။-

13ၶိင်ႇဢၼ်ႁွင်ႉႁဵၵ်ႈဝႃႈ ဝၼ်းမိူဝ်ႈၼႆႉၼၼ်ႉ၊ ၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ် တိုၵ်းယူင်းၸူဝ်းဢဝ်ၵၼ်ၵူႈဝၼ်းတႃႇသေႇဢမ်ႇထၢတ်ႇ ႁႂ်ႈႁူဝ်ၸႂ်သူဢမ်ႇလႆႈၵႅၼ်ႇလႆႈၶႅင် ၵွပ်ႈပိူဝ်ႈတၢင်းဢၼ်တူႉၸရိူၵ်ႈ ပႅတ်ႉလႅၼ်ၼၼ်ႉတႃႉ။-

14ၸိူဝ်ႉၼင်ႇဢၼ်ႁဝ်းႁဵတ်းၵေႃႇၸႃႉငဝ်ႈႁၢၵ်ႈ တၢင်းဢၼ်ၸွႆးၸပ်းၼၼ်ႉ၊ ပေႃးႁဝ်းတႄႇယူႇတေႃႇထိုင်ႁွတ်ႈ တီႈသုတ်းတီႈၵွႆၸိုင် ႁဝ်းပဵၼ်ၵေႃႉဢၼ်သိူၵ်ႈသမ်ႇၵၼ်တင်း ၸဝ်ႈၶရိၸ်ႈဢေႃႈ။-

15မႅၼ်ႈၵႃႈၼင်ႇဢၼ်မႃးၼႂ်းၵျၢမ်းလိၵ်ႈလႄႈဝႃႈ၊ ၼႂ်းဝၼ်းမိူဝ်ႈၼႆႉ ပေႃးသူငိၼ်းသဵင်ပျႃႇတိၵ်ႈၸဝ်ႈၸိုင်၊ ယႃႇပေမီးႁူဝ်ၸႂ်ဢၼ် ၵႅၼ်ႇဢၼ်ၶႅင်မိူၼ်ၸိူဝ်ႉၼင်ႇဢၼ် မီးၼႂ်းၶိင်ႇၵႃႇလႃႉတၢင်းဢၼ်ႁဵတ်းဢမ်ႇထုၵ်ႇၶတ်းၵၼ်ၼၼ်ႉ၊ ဝႃႈၼင်ႇၼႆၼၼ်ႉ။-

16ၶဝ်ၸိူဝ်းဢၼ်လႆႈငိၼ်းယဝ်ႉလႄႈ ႁဵတ်းတၢင်းဢၼ်ဢမ်ႇထုၵ်ႇၶတ်းၵၼ်ၼၼ်ႉၸမ်ႉ၊ ပဵၼ်ၽူႈလႂ်။ ၶဝ်ၸိူဝ်းဢၼ်ၸွမ်းလင် မူဝ်းသေႇ လႄႈ ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးတင်းသဵင်ႈတင်းလူင်ၼၼ်ႉ ႁဵတ်းၸိူဝ်ႉၼင်ႇၼၼ်ဢမ်ႇၸႂ်ႈႁိုဝ်။-

17ၶဝ်ၸိူဝ်းဢၼ်ဢမ်ႇထုၵ်ႇၸႂ်မၼ်းၸဝ်ႈ သီႇသိပ်းပီႊတဵမ်တဵမ်ၼၼ်ႉၸမ်ႉ၊ ပဵၼ်ၽူႈလႂ်။ ပဵၼ်ၶဝ်ၸိူဝ်းဢၼ်ႁဵတ်းတူႉၸရိူၵ်ႈဢပႅတ်ႈသေလႄႈ လူမ်ႉတၢႆၵႃႈတီႈၼႂ်းထိူၼ်ႇၼၼ်ႉ ဢမ်ႇၸႂ်ႈႁိုဝ်။-

18ၶဝ်ၸိူဝ်းဢၼ်မၼ်းၸဝ်ႈတိူင်ႇလႄႈဝႃႈ၊ သူဢမ်ႇလႆႈၶဝ်ႈၵႃႈၼႂ်းၵတ်းယဵၼ်ၶျၢမ်းသႃႇၵဝ်၊ ဝႃႈၼင်ႇၼႆၼၼ်ႉၸမ်ႉ၊ လိူဝ်သေၶဝ်ၸိူဝ်းဢၼ်ဢမ်ႇယုမ်ႇမၢတ်ႈၼၼ်ႉ ပဵၼ်ၽူႈလႂ်။-

19ပေႃးပဵၼ်ၸိူဝ်ႉၼင်ႇၼၼ်ၸိုင်၊ ႁဝ်းႁူႉႁၼ်လွင်ႈဢၼ်ၶဝ်ဢမ်ႇၶဝ်ႈလႆႈ ၵွပ်ႈပိူဝ်ႈဢၼ်ဢမ်ႇယုမ်ႇမၢတ်ႈၼၼ်ႉၵူၺ်းၼၼ်ႉယူႇဢေႃႈ။

← Chapter 2 Jump to: Chapter 4 →