Hebrews 10

Shan

← Chapter 9 Jump to: Chapter 11 →

1ၼႄးၼိုင်ႈၸမ်ႉ၊ ၵွပ်ႈပိူဝ်ႈဢၼ်ပိင်းၺၢပ်ႈတြႃး ဢမ်ႇၼႄပၼ်ပုင်ႇႁၢင်ႈ ဢၼ်ဢၵျူဝ်းမင်ႇၵလႃႇ ဢၼ်တၵ်းပဵၼ်ၵမ်းလိုၼ်းတင်းလၢႆ ၼၼ်ႉသေႇၶျႃႇလီငၢမ်း၊ ၼႄပၼ်သၢႆငၢႆၵူၺ်းလႄႈ လႆႈဢဝ်ယိတ်ႈဢၼ်ပုၵ်ႈၸေႃႇၵူႈပီႊသေႇသေႇၼၼ်ႉလႄႈ ဢမ်ႇႁႂ်ႈၶဝ်ၸိူဝ်းဢၼ်သုတ်ႉၸပ်းသုတ်ႉၸူးၵႃႈတီႈၸဝ်ႈၼၼ်ႉ တႄႇယူႇၵႃႈၼႂ်းတၢင်းဢၼ်ၸေးဢၼ်ၸုမ်ႇၼၼ်ႉလႆႈ။-

2ပေႃးႁႂ်ႈတႄႇယူႇလႆႈၸိုင်၊ ၵွပ်ႈပိူဝ်ႈဢၼ်ၶဝ်ၸိူဝ်းဢၼ်ႁဵတ်းဝၢတ်ႈၼၼ်ႉ ႁွတ်ႈထိုင်တၢင်းဢၼ်မူတ်းသႂ် ပွၵ်ႈလဵဝ်ၵူၺ်းသေယဝ်ႉ၊ ၵမ်းလိုၼ်းယင်းဢမ်ႇမီးလွင်ႈဢၼ် တၵ်းလႆႈသၢင်ႇဝူၺ်ႇၵႃႉတြႃးသေဢိတ်းၼၼ်ႉလႄႈ၊ ၵမ်းလိုၼ်း ၶဝ်ယင်းဢမ်ႇပုၵ်ႈၸေႃႇလႄႈတၵ်းယူႇဢမ်ႇၸႂ်ႈႁိုဝ်။-

3ၵူၺ်းၵႃႈ ၼႂ်းလွင်ႈဢၼ်ပုၵ်ႈၸေႃႇယိတ်ႈၸိူဝ်းၼၼ်ႉၸိုင် မီးတၢင်းဢၼ်ၶုၵ်းၸႂ်လႆႈၶႆႈၸႂ်ထူပ်းဢပႅတ်ႈယူႇၵူႈပီႊဢေႃႈ။-

4လွင်ႈမၼ်းၸမ်ႉ လိူတ်ႈဝူဝ်း၊ လိူတ်ႈပႄႉ ဢမ်ႇပႄႇပႅတ်ႈဢပႅတ်ႈလႆႈ။

5ပိူဝ်ႈၼႆလႄႈ ၸဝ်ႈၶရိၸ်ႈၼၼ်ႉ မိူဝ်ႈဢၼ်မႃးၼႂ်းလေႃးၵႃႉၼႆႉၼၼ်ႉၸိုင်၊ လဝ်ႊလၢတ်ႈလႄႈဝႃႈ၊ ဢူဝ်းၽြႃးပဵၼ်ၸဝ်ႈ၊ ၸဝ်ႈႁဝ်းဢမ်ႇမီးဢလူဝ်ႇၶႂ်ႈလႆႈယိတ်ႈ ဢိၵ်ႇတင်းၶိူင်ႈတၢင်းပုၵ်ႈၸေႃႇတင်းလၢႆ တီႈၶႃႈယဝ်ႉ။ ၵူၺ်းၵႃႈ ၸဝ်ႈႁဝ်းမႄးႁဵတ်းဝႆႉတူဝ်ၶၼ်ႇထႃႇ ပုၼ်ႈၵဝ်ၶႃႈတီႈၶႃႈယဝ်ႉ။-

6မိူဝ်ႈဢၼ်ၸဝ်ႈႁဝ်းဢမ်ႇထုၵ်ႇၸႂ်ၵျိူၵ်ႈၸႂ်ယိတ်ႈတၢင်းဢၼ်ဢဝ်ၽႆးတုတ်ႇ ဢိၵ်ႇတင်းယိတ်ႈတၢင်းဢၼ် ၽေႇဢပႅတ်ႈတင်းလၢႆၼၼ်ႉၸိုင်၊-

7ၵဝ်ၶႃႈႁပ်ႉတုင်းဢဝ် မႅၼ်ႈၸွမ်းၵႃႈၼင်ႇဢၼ် ဢဝ်လွင်ႈၵဝ်ၶႃႈ တႅမ်ႈဝႆႉၵႃႈၼႂ်းၵဵၼ်ႁမ်းၵျၢမ်းလိၵ်ႈၼၼ်ႉလႄႈဝႃႈ၊ ၵဝ်ၶႃႈတၵ်းၵႂႃႇႁႂ်ႈလႆႈ ႁဵတ်းၸွမ်းဢလူဝ်ႇၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆၼၼ်ႉယဝ်ႉတီႈၶႃႈ၊ ဝႃႈၼင်ႇၼႆဢေႃႈ။-

8ၸဝ်ႈၶရိၸ်ႈဢဝ်လွင်ႈဝၢတ်ႈဢၼ် တၵ်းလႆႈႁဵတ်းၸွမ်းၼင်ႇပိင်းၺၢပ်ႈတြႃးၼၼ်ႉသေလႄႈ လၢတ်ႈဝႆႉဢွၼ်တၢင်းလႄႈဝႃႈ၊ ၸဝ်ႈႁဝ်းဢမ်ႇမီးဢလူဝ်ႇၶႂ်ႈလႆႈ၊ ၸဝ်ႈႁဝ်းဢမ်ႇထုၵ်ႇၸႂ်ၵျိူၵ်ႈၸႂ်ယိတ်ႈ တင်းၶိူင်ႈတၢင်းပုၵ်ႈၸေႃႇတင်းလၢႆ ဢိၵ်ႇတင်းယိတ်ႈဢၼ်ဢဝ်ၽႆးတုတ်ႇ တင်းယိတ်ႈတၢင်းဢၼ် ၽေႇဢပႅတ်ႈတင်းလၢႆၼၼ်ႉတီႈၶႃႈ၊ ဝႃႈၼင်ႇၼႆသေယဝ်ႉ၊-

9လႆႈသမ်ႉ ၼႂ်းလွင်ႈဢၼ်မၼ်းၸဝ်ႈ လဝ်ႊလၢတ်ႈလႄႈဝႃႈ၊ ဢူဝ်းၽြႃးပဵၼ်ၸဝ်ႈ၊ ၵဝ်ၶႃႈတၵ်းၵႂႃႇႁႂ်ႈလႆႈ ႁဵတ်းၸွမ်းဢလူဝ်ႇၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆၼၼ်ႉ၊ မၼ်းၸဝ်ႈပႄႇပႅတ်ႈဝၢတ်ႈပထမႃႉၼၼ်ႉ ႁႂ်ႈဝၢတ်ႈတူႉတီႉယႃႉလႆႈတႄႇဢေႃႈ။-

10မႅၼ်ႈၵႃႈၼင်ႇဢလူဝ်ႇၸဝ်ႈၼၼ်ႉလႄႈ ႁဝ်းႁွတ်ႈထိုင်တၢင်းဢၼ်မူတ်းၸၢင်ႇ ၵွပ်ႈပိူဝ်ႈတၢင်းဢၼ်ပုၵ်ႈၸေႃႇတူဝ်ၶၼ်ႇထႃႇ ယေႇသူႉ ပွၵ်ႈလဵဝ်ၵူၺ်းၼၼ်ႉဢေႃႈ။

11ယိတ်ႈပရေႃးႁဵၵ်ႈၵူႈပႃး ႁဵတ်းဝၢတ်ႈၵူႈဝၼ်းလႄႈ ပုၵ်ႈၸေႃႇယိတ်ႈဢၼ် ဢမ်ႇၽေႇဢပႅတ်ႈလႆႈၼၼ်ႉယူႇ ၶိူဝ်းၶိူဝ်းယႂ်းယႂ်းသေလႄႈ လႆႈၸုၵ်းယူႇဢေႃႈ။-

12ၸဝ်ႈၼၼ်ႉၸမ်ႉ၊ ၸႃႉၸဵမ်မိူဝ်ႈဢၼ်ပုၵ်ႈၸေႃႇယိတ်ႈဢၼ်ၼိုင်ႈ ႁႂ်ႈလႆႈၽေႇဢပႅတ်ႈၼၼ်ႉယဝ်ႉၼၼ်ႉ၊ ၼင်ႈယူႇၵႃႈတီႈၽၢႆႇၶႂႃၽြႃးပဵၼ်ၸဝ်ႈယူႇသေႇသေႇလႄႈ၊-

13ၸူဝ်ႈဢၼ်ဢမ်ႇပႆႇဢဝ်ရၢၼ်ႇသူႇတင်းလၢႆၶျႃးဝႆႉ ႁႂ်ႈပဵၼ်တီႈတၢင်ႇတိၼ်မၼ်းၸဝ်ႈၼၼ်ႉၸိုင် မုင်ႈထႃႈမွင်းထႃႈယူႇဢေႃႈ။-

14လွင်ႈမၼ်းၸမ်ႉ မၼ်းၸဝ်ႈဢဝ်တင်းတၢင်းဢၼ်ပုၵ်ႈၸေႃႇပွၵ်ႈလဵဝ်ၵူၺ်းၼၼ်ႉ ႁဵတ်းႁႂ်ႈၶဝ်ၸိူဝ်းဢၼ်မူတ်းၸၢင်ႇၼၼ်ႉ လႆႈဢၵျူဝ်းတၢင်းဢၼ်ၸေးၸုမ်ႇထႃႇဝရႃႉဢေႃႈ။-

15ၼင်ႇၼၼ်လႄႈ ၼႂ်းလွင်ႈဢၼ်ဝီႉၺိၺ်ႇဢၼ်မူတ်းၸၢင်ႇၸဝ်ႈ ပၼ်သၢၵ်ႈသေႇၵႃႈတီႈႁဝ်းၼၼ်ႉ၊-

16ပတီႉၺိၺ်ႇတြႃး ဢၼ်ၵဝ်တၵ်းပၼ်တီႈၶဝ် မိူဝ်ႈၶိင်ႇၵႃႇလႃႉၵမ်းလိုၼ်းၼၼ်ႉၸမ်ႉ၊ ၵဝ်ထႃႇဝရႃႉၽြႃးတၵ်းဢဝ် ပိင်းၺၢပ်ႈတြႃးၵဝ်သႂၢင်းသႂ်ႇ ၵႃႈၼႂ်းဝီႉၺိၺ်ႇၶဝ်ဢေႃႈ။ တၵ်းတႅမ်ႈသႂ်ႇဝႆႉၵႃႈၼိူဝ်ႁူဝ်ၸႂ်ၶဝ်ဢေႃႈ၊ ဝႃႈၼင်ႇၼႆဝႆႉဢွၼ်တၢင်းသေယဝ်ႉ၊-

17လႆႈသမ်ႉ မီးဢမိင်ႉဝႃႈ၊ ၵဝ်တၵ်းဢမ်ႇၶုၵ်းၸႂ်လႆႈၶႆႈၸႂ်ထူပ်း တၢင်းဢၼ်ၶဝ်ၽိတ်းပိူင်ႈပူၼ်ႉလိူဝ်တင်းလၢႆၼၼ်ႉလႄႈယူႇဢေႃႈ၊ ဝႃႈၼင်ႇၼႆဢေႃႈ။-

18ပေႃးတၢင်းဢၼ်ၵၢင်းလွတ်ႈတင်းဢပႅတ်ႈၸိူဝ်းၼၼ်ႉမီးယဝ်ႉၸိုင်၊ ၵမ်းလိုၼ်းလွင်ႈဢၼ်တၵ်းလႆႈ ႁဵတ်းတၢင်းပုၵ်ႈၸေႃႇ ဢၼ်တၵ်းၽေႇဢပႅတ်ႈထႅင်ႈ ဢမ်ႇမီး။

19ပိူဝ်ႈၼႆလႄႈပီႈၼွင်ႉၶဝ်ဢိူၺ်း၊ ၵွပ်ႈပိူဝ်ႈဢၼ်ႁဝ်းဢိင်လိူတ်ႈ ယေႇသူႉ လႄႈ မီးဢၶႂၢင်ႉဢၼ်ၸွမ်းၼႂ်းသဵၼ်ႈတၢင်းဢၼ်မႂ်ႇ ဢၼ်မီးဢသၢၵ်ႈ၊-

20ဢၼ်မၼ်းၸဝ်ႈပွင်ႁဵတ်းပွင်မႄးဝႆႉလႄႈ လွတ်ႈပွင်ႇၽႃႈၵင်ႈ ဢၼ်တူဝ်ၶၼ်ႇထႃႇမၼ်းၸဝ်ႈၼၼ်ႉၵႂႃႇၼၼ်ႉသေလႄႈ ႁတ်းၶဝ်ႈၸူးၵႃႈၼႂ်းထႃႇၼႃႉတီႈမူတ်းၸၢင်ႇၼၼ်ႉ၊-

21ဢိၵ်ႇတင်းၵွပ်ႈပိူဝ်ႈဢၼ်မီး ၶုၼ်ယိတ်ႈပရေႃးႁဵၵ်ႈ ဢၼ်ဢုပ်ႉႁိူၼ်းၽြႃးပဵၼ်ၸဝ်ႈယူႇလႄႈ၊-

22ႁဝ်းမီးသၽေႃးဢၼ်ပျေႉၸုမ်ႇ တင်းသဵတ်ႈၸႃႇလႄႈ တႄႇယူႇၼႂ်းတၢင်းဢၼ်ယုမ်ႇမၢတ်ႈ ဢၼ်ၵၢင်းလွတ်ႈတင်းဝီႉၸီႉၵိၵ်ႉသႃႇ ယူႇသေလႄႈ မီးတၢင်းဢၼ်ၶၢမ်ႇတၢင်းဢၼ်ဢဝ်လိူတ်ႈၽႅတ်းသႂ်ႇႁႂ်ႈလႆႈၵၢင်းလွတ်ႈတင်းသၢင်ႇဝူၺ်ႇၵႃႉတြႃး ဢိၵ်ႇတင်းတၢင်းဢၼ်ဢဝ်တင်းၼမ်ႉဢၼ်သႂ်လီ သုၵ်ႈပွတ်ႈတူဝ်ၵႃႇယႃႉႁဝ်းသေယဝ်ႉ၊ ၶဝ်ႈသုတ်ႉၸပ်းသုတ်ႉၸူးၵႃႈတီႈၸဝ်ႈၼၼ်ႉတႃႉႁဝ်း။-

23ႁပ်ႉတုင်းဢဝ်လွင်ႈတၢင်းဢၼ်မုင်ႈထႃႈမွင်းထႃႈသေယဝ်ႉ၊ ယင်းဢမ်ႇၶၢႆႉဢမ်ႇပုတ်ႈ ဢမ်ႇသုတ်ႈဢမ်ႇယွမ်းၵႂႃႇသေလႄႈ တႄႇယူႇတႃႉႁဝ်း။ လွင်ႈမၼ်းၸမ်ႉ ၸဝ်ႈဢၼ်ဝႆႉၵတီႉၸဝ်ႈၼၼ်ႉ ပျေႉၸုမ်ႇတင်းသဵတ်ႈၸႃႇယူႇဢေႃႈ။-

24လိူဝ်သေၼၼ်ႉ ၵေႃႉၼိုင်ႈလႄႈၵေႃႉၼိုင်ႈၶႆႈၸႂ်လူတူၺ်းၵၼ်လႄႈ ႁႃဢဝ်ဢၶႂၢင်ႉဢၼ်တၵ်းလႆႈတိုၵ်းယူင်းၸူဝ်းဢဝ်ၵၼ် ႁႂ်ႈလႆႈမီးၸႂ်မႅတ်ႈတႃႇ ဢိၵ်ႇတင်းႁႂ်ႈလႆႈၵမ်ၵျၢင်ႉတၢင်းၵမ်တၢင်းၵျၢင်ႉဢၼ်လီဢၼ်ငၢမ်းတႃႉႁဝ်း။-

25ၸွမ်းၼင်ႇဢၼ်မီးထုင်းၸၢမ်ႇၵူၼ်းၵမ်ႈၽွင်ႈၼၼ်ႉ၊ ယႃႇပေဝႄႈပႅတ်ႈ လွင်ႈတၢင်းဢၼ်ၼင်ႇၵၼ်ၵၼ်ၸူႉၵၼ်တုမ်ၵၼ်ၼၼ်ႉလႄႈ၊ ၵေႃႉၼိုင်ႈလႄႈၵေႃႉၼိုင်ႈ တိုၵ်းယူင်းၸူဝ်းဢဝ်ၵၼ်တႃႉ။ ပိူဝ်ႈဢၼ်ထွၵ်ႈလူၺ်ႈလွင်ႈဢၼ် ၶိင်ႇၵႃႇလႃႉၸမ်တၵ်းႁွတ်ႈမႃးၼၼ်ႉလႄႈ ယဵင်ႈၶႅၼ်းၵႆႉၵျူဝ်းၸႃးတႃႉ။

26လွင်ႈမၼ်းၸမ်ႉ ပေႃးႁဝ်းႁူႉၸႅင်ႈသမ်ႇမႃႇတြႃးသေယဝ်ႉ၊ ၸွမ်းဢလူဝ်ႇတူဝ်ၸဝ်ႈၵဝ်ႇသေလႄႈ သမ်ႉၶိုၼ်းၽိတ်းၶိုၼ်းပိူင်ႈထႅင်ႈၸိုင်၊ ၵမ်းလိုၼ်းယင်းဢမ်ႇမီးဢၶႂၢင်ႉတၢင်းဢၼ်ပုၵ်ႈၸေႃႇယိတ်ႈဢၼ်ၽေႇဢပႅတ်ႈလႄႈ၊-

27မီးလွင်ႈဢၼ်တၵ်းလႆႈမုင်ႈထႃႈမွင်းထႃႈ ဢၼ်လီၵူဝ်လီႁႄၼႃႇလူင်လၢင် ဢၼ်ဝႃႈတၢင်းဢၼ်တၵ်းလႆႈၶၢမ်ႇတၢင်းဢၼ်ၸီႇယၢင်ႇတၢမ်ႇ ဢိၵ်ႇတင်းလွင်ႈဢၼ်တၵ်းလႆႈၶၢမ်ႇ တၢင်းဢၼ်ၽႆး၊ တၢင်းၸႂ်မႆႈၸဝ်ႈ တုတ်ႇယႃႉပႅတ်ႈ ၶဝ်ၸိူဝ်းဢၼ်ထဵင်ပႅတ်ႈၼၼ်ႉဢေႃႈ။-

28ၵေႃႉဢၼ်ပႄႇပႅတ်ႈတြႃး မူဝ်းသေႇ ၼၼ်ႉၸမ်ႉ၊ ပေႃးမီးၵေႃႉဢၼ်ၶၢမ်ႇသၢၵ်ႈသေႇ သွင်ၵေႃႉသၢမ်ၵေႃႉၸိုင်၊ ယင်းဢမ်ႇလႆႈၶၢမ်ႇတၢင်းဢၼ်ဢဵတ်းလူလႄႈ လႆႈတၢႆဢေႃႈ။-

29ၵေႃႉဢၼ်ဢဝ်တိၼ်ယဵပ်ႇၶၢမ်ႈ လုၵ်ႈၽြႃးပဵၼ်ၸဝ်ႈယူႇ၊ တၢင်ႇဢပႅတ်ႈၵႃႈၼိူဝ်လိူတ်ႈ ပတီႉၺိၺ်ႇတြႃး ဢၼ်ႁႂ်ႈတူဝ်ၸဝ်ႈၵဝ်ႇမူတ်းၸၢင်ႇၼၼ်ႉယူႇသေလႄႈ ႁဵတ်းဢမ်ႇၼပ်ႉဢမ်ႇၶၢၼ်း တီႈဝီႉၺိၺ်ႇၸဝ်ႈ ဢၼ်ၸၢင်ႈပၼ်သူႉၵျေးၸူးၼၼ်ႉ တၵ်းလႆႈထိူၵ်ႈၶၢမ်ႇတၢမ်ႇဢၼ်ယႂ်ႇၼႃႇလူင်လၢင်ထၢၼ်ႇလႂ်ဝႃႈၼႆ သူထၢင်ႇႁိုဝ်။-

30ႁဝ်းႁူႉၸဝ်ႈဢၼ်မီးဢမိင်ႉလႄႈဝႃႈ၊ ၵဝ်ဢုပ်ႉပိူင်ႇၸီႇယၢင်ႇဢပႅတ်ႈတြႃးဢေႃႈ။ ၵဝ်တၵ်းတွပ်ႇတႅၼ်းပၼ် ၸွမ်းၼင်ႇဢၼ်ဢပႅတ်ႈမီးၼၼ်ႉဢေႃႈ၊ ဝႃႈၼင်ႇၼႆလႄႈ သမ်ႉဝႃႈ၊ ထႃႇဝရႃႉၽြႃးတၵ်းၸီႇယၢင်ႇတြႃး ပုၼ်ႈၵူၼ်းမၼ်းၸဝ်ႈတင်းလၢႆဢေႃႈ၊ ဝႃႈၼင်ႇၼႆၼၼ်ႉယူႇဢမၢၼ်ႇၶၼ်ပဵၼ်ဢေႃႈ။-

31ဢမူႉလွင်ႈတၢင်းဢၼ်တူၵ်းႁွတ်ႈၵႃႈၼႂ်းမိုဝ်းၽြႃးပဵၼ်ၸဝ်ႈ ဢၼ်ဢသၢၵ်ႈလိပ်းယူႇၼၼ်ႉ ပဵၼ်ဢမူႉလွင်ႈတၢင်းဢၼ် လီၵူဝ်လီႁႄၼႃႇလူင်လၢင်ဢေႃႈ။

32ၶုၵ်းၸႂ်လႆႈၶႆႈၸႂ်ထူပ်း ၶိင်ႇၵႃႇလႃႉမိူဝ်ႈဢွၼ်ၼႆႉၼၼ်ႉ ဢၼ်လိုၼ်းသေသူႁွတ်ႈထိုင် ၵႃႈၼႂ်းဢၼ်လႅင်းသေယဝ်ႉ၊ သူလႆႈထူပ်းတၢင်းဢၼ်ၶေႉၶဵင်ႇတိုၵ်းၵၼ်၊-

33ဢိၵ်ႇတင်းတၢင်းဢၼ်တုၵ်ႉၶႃႉဝူၺ်ႇတၼႃႇဢၼ်ယႂ်ႇၼႃႇ ၵွပ်ႈပိူဝ်ႈဢၼ်လႆႈၶၢမ်ႇတၢင်းဢၼ်သႄႉသွမ်းၼိၵ်ႈၸၢၵ်ႈငႅၼ်းသႄးၽၢႆႇၼႃႈၵူၼ်းတင်းလၢႆ ဢိၵ်ႇတင်းၵွပ်ႈပိူဝ်ႈဢၼ်ပဵၼ်ၵေႃႉသေႈဢၼ် သိူၵ်ႈသမ်ႇၵၼ်တင်း ၶဝ်ၸိူဝ်းဢၼ်လႆႈၶၢမ်ႇၸိူဝ်ႉၼင်ႇၼၼ်ၼၼ်ႉတႃႉ။-

34မိူဝ်ႈၼၼ်ႉ သူလႆႈၸဵပ်းၸႂ်ပုၼ်ႈၶဝ် ၸိူဝ်းဢၼ်လႆႈၶၢမ်ႇတူၵ်းၵိၼ်းၼၼ်ႉလႄႈ ႁူႉလွင်ႈဢၼ်သူမီးၽၼ်ႇတႃႇဢၼ်ယဵင်ႈၶႅၼ်းမျၢတ်ႈလႄႈ တႄႇယူႇသေႇသေႇပုၼ်ႈဢၼ် တူဝ်ၸဝ်ႈၵဝ်ႇတၵ်းသုင်းသွင်ႇၼၼ်ႉယူႇသေလႄႈ မီးတင်းၸႂ်ဢၼ်သိူဝ်းပျေႃႇ ႁပ်ႉတုင်းဢဝ်တၢင်းဢၼ်ပိူၼ်ႈယႃႉပႅတ်ႈ ႁိမ်ဢဝ်ဢုၵ်ႉၸႃႇၶူဝ်းလဵင်းသူၼၼ်ႉဢေႃႈ။

35ပိူဝ်ႈၼႆလႄႈ ယႃႇပေပႅတ်ႈဝႆႉတၢင်းဢၼ်ၸႂ်သူႁတ်းႁၢၼ် ဢၼ်ၸၢပ်ႈသႅင်ႇၵၼ်တင်းဢၵျူဝ်းဢၼ်ယႂ်ႇၼႃႇၼၼ်ႉ။-

36သူႁဵတ်းၸွမ်းဢလူဝ်ႇၽြႃးပဵၼ်ၸဝ်ႈသေယဝ်ႉ၊ လွင်ႈၼင်ႇႁိုဝ်တၵ်းလႆႈဢၵျူဝ်းၵႃႈၼင်ႇ ၵတီႉၸဝ်ႈၼၼ်ႉၸိုင်၊ သူတၵ်းလႆႈမီးၸႂ်တၢင်းဢၼ်ယိူၼ်ႉၶၢမ်ႇဢေႃႈ။-

37ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ဢၼ်မီးမႃးလႄႈဝႃႈ၊ ၵေႃႉဢၼ်တၵ်းမႃးၼၼ်ႉ ယင်းဢမ်ႇၵိုတ်းဢမ်ႇသဝ်း ဢမ်ႇထိူင်းဢမ်ႇၼၢၼ်းလႄႈ တၵ်းႁွတ်ႈမႃးဢေႃႈ။-

38ၵေႃႉဢၼ်သိုဝ်ႈတေႃႇၼၼ်ႉ ဢသၢၵ်ႈတၵ်းလိပ်းၵွပ်ႈပိူဝ်ႈတၢင်းဢၼ်ယုမ်ႇမၢတ်ႈဢေႃႈ။ ၼႂ်းဝႃႈၼၼ်သေၵေႃႈ ပေႃးမၼ်းသုတ်ႈယွမ်းၵႂႃႇၸိုင် ၸႂ်ဝီႉၺိၺ်ႇၵဝ်ဢမ်ႇထုၵ်ႇၸႂ်ၵျိူၵ်ႈၸႂ်ၵေႃႉၼၼ်ႉ၊ ဝႃႈၼင်ႇၼႆဢေႃႈ။-

39ႁဝ်းၸမ်ႉ ပဵၼ်ၵေႃႉဢၼ်သုတ်ႈယွမ်းၵႂႃႇ ႁႂ်ႈလႆႈႁွတ်ႈတၢင်းလူႉတၢင်းလႅဝ်ဢမ်ႇၸႂ်ႈ။ ပဵၼ်ၵေႃႉဢၼ်ယုမ်ႇမၢတ်ႈ ႁႂ်ႈၸႂ်ဝီႉၺိၺ်ႇႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။

← Chapter 9 Jump to: Chapter 11 →