Hebrews 2

Shan

← Chapter 1 Jump to: Chapter 3 →

1ပိူဝ်ႈၼႆလႄႈ လွင်ႈၼင်ႇႁိုဝ်တၵ်းဢမ်ႇလႆႈလူင်လႆႈလိုမ်း တေႇသၼႃႇဢၼ်ႁဝ်းလႆႈငိၼ်းၼၼ်ႉၸိုင် တၵ်းလႆႈမီးတၢင်းဢၼ်ႁူဝ်ၸႂ် ယဵင်ႈၶႅၼ်းၸွႆးၸပ်းမၢတ်ႈတွင်းဝႆႉဢေႃႈ။-

2လွင်ႈမၼ်းၸမ်ႉ ပေႃးပျႃႇတိၵ်ႈဢၼ်မၼ်းၸဝ်ႈ ဢဝ်တင်းတမၢၼ်ႇၵၢင်ႁၢဝ်တင်းလၢႆၼၼ်ႉ တႄႇယူႇလႄႈ လွင်ႈတၢင်းဢၼ်ၽိတ်းပိူင်ႈပူၼ်ႉလိူဝ် ၵူႈၸိူဝ်ႉၵူႈပိူင်ၸိူဝ်းၼၼ်ႉ လႆႈၶၢမ်ႇတၢမ်ႇဢပႅတ်ႈဢၼ်ထိူၵ်ႈၶၢမ်ႇၸိုင်၊-

3ႁဝ်းယင်းဢမ်ႇထွမ်ႇဢမ်ႇဢဝ်တြႃးတၢင်းဢၼ်ၵႄႇၶျွတ်ႈဢဝ် ဢၼ်ယႂ်ႇၼႃႇထၢၼ်ႇၼႆႉ ဢၼ်ၸဝ်ႈၽြႃးႁေႃးလၢတ်ႈဝႆႉ မိူဝ်ႈၵေႃႇၸႃႉႁူဝ်ပိုင်းၼၼ်ႉလႄႈ ၶဝ်ၸိူဝ်းဢၼ်လႆႈငိၼ်းၵႂၢမ်းတေႇသၼႃႇၼၼ်ႉ ဢဝ်တင်းသၢၵ်ႈသေႇဢၼ်လီယုမ်ႇမွၵ်ႇလၢတ်ႈတီႈႁဝ်းၼၼ်ႉယူႇလႄႈ တၵ်းၵၢင်းလွတ်ႈတင်း တၢမ်ႇဢပႅတ်ႈၸိူဝ်ႉၼင်ႇႁိုဝ်။-

4ၽြႃးပဵၼ်ၸဝ်ႈ ဢဝ်တင်းၼီႉမိၵ်ႈလၢၵ်ႈၶၼႃႇ ဢိၵ်ႇတင်းလွင်ႈတၢင်းဢၼ်လီဢၢမ်း တင်းတၼ်းၶူဝ်းဢၼ်လၢၵ်ႇလၢႆးၵူႈၸိူဝ်ႉၵူႈပိူင် တင်းသူႉၵျေးၸူးတၢင်းဢၼ်ဝီႉၺိၺ်ႇဢၼ်မူတ်းၸၢင်ႇၸဝ်ႈ ၽႄမႅင်ႇပၼ်ၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇၸိူဝ်းၼၼ်ႉ ၶၢမ်ႇသၢၵ်ႈသေႇဝႆႉလူၺ်ႈၵၼ်တင်းၶဝ်ၸိူဝ်းဢၼ် ၶၢမ်ႇသၢၵ်ႈသေႇၼၼ်ႉယဝ်ႉ။

5မၼ်းၸဝ်ႈဢၢပ်ႈပၼ်ဢၶႂၢင်ႉ ဢၼ်လႆႈဢုပ်ႉပိူင်ႇၵၢပ်ႈၵမ်ႇၽႃႇၵမ်းလိုၼ်း ဢၼ်ႁဝ်းလၢတ်ႈဝႃႈၼၼ်ႉ တီႈတမၢၼ်ႇၵၢင်ႁၢဝ်တင်းလၢႆ ဢမ်ႇၸႂ်ႈ။-

6ၵေႃႉၼိုင်ႈၶၢမ်ႇသၢၵ်ႈသေႇဝႆႉ ၼႂ်းၵျၢမ်းလိၵ်ႈတီႈၼိုင်ႈလႄႈဝႃႈ၊ ၵူၼ်းၸိုင်ပဵၼ်ၵေႃႉၸိူဝ်ႉၼင်ႇႁိုဝ်လႄႈ ၸဝ်ႈႁဝ်းၶုၵ်းၸႂ်လႆႈၶႆႈၸႂ်ထူပ်းမၼ်းတီႈၶႃႈ၊ လုၵ်ႈၵူၼ်းၸိုင် ပဵၼ်ၵေႃႉၸိူဝ်ႉၼင်ႇႁိုဝ်လႄႈ ၸဝ်ႈႁဝ်းမႃးလူမႃးတူၺ်းမၼ်းတီႈၶႃႈ၊-

7မၼ်းၸိုင်ၸဝ်ႈႁဝ်းၶျႃးတႅမ်ႇဝႆႉၵႃႈတႂ်ႈ တမၢၼ်ႇၵၢင်ႁၢဝ်တင်းလၢႆဢိတ်းၼိုင်ႈ တီႈၶႃႈဢေႃႈ။ ႁူဝ်မၼ်းၸိုင် ၸဝ်ႈႁဝ်းဢဝ်တင်းမုၼ်ၽုင်းသရေႇ ၶဵၼ်းႁွပ်ႈဝႆႉတီႈၶႃႈဢေႃႈ။-

8ၸဝ်ႈႁဝ်းဢဝ်လွင်ႈတၢင်းၵႃႈမီးတင်းသဵင်ႈတင်းလူင် ၶျႃးဝႆႉၵႃႈတႂ်ႈတိၼ်မၼ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။ မိူဝ်ႈဢၼ်ဝႃႈ၊ မၼ်းၸဝ်ႈဢဝ်လွင်ႈတၢင်းၵႃႈမီး တင်းသဵင်ႈတင်းလူင်ၶျႃးဝႆႉဢေႃႈ၊ ဝႃႈၼင်ႇၼႆၼၼ်ႉၸိုင် လွင်ႈတၢင်းဢၼ် ယင်းဢမ်ႇၶျႃးဝႆႉလႄႈၵိုတ်းၵျၢၼ်ႇယူႇၼၼ်ႉ ဢမ်ႇလႆႈမီးသေၸိူဝ်ႉသေပိူင်။ တေႃႈလဵဝ်ၼႆႉၸမ်ႉ၊ ႁဝ်းဢမ်ႇပႆႇလႆႈႁၼ်လွင်ႈဢၼ် လွင်ႈတၢင်းၵႃႈမီး တင်းသဵင်ႈတင်းလူင်ၶျႃးဝႆႉလႄႈ မီးယူႇၼၼ်ႉ။-

9ၵူၺ်းၵႃႈ ႁဝ်းႁၼ် ယေႇသူႉ ဢၼ်တူၵ်းတႅမ်ႇၵႃႈတီႈတႂ်ႈ တမၢၼ်ႇၵၢင်ႁၢဝ်တင်းလၢႆ ဢိတ်းၼိုင်ႈသေယဝ်ႉ၊ မီးတၢင်းဢၼ်မုၼ်ၽုင်းသရေႇၶဵၼ်းႁွပ်ႈၵႃႈတီႈႁူဝ်မၼ်းၸဝ်ႈ ၵွပ်ႈပိူဝ်ႈဢၼ်မၼ်းၸဝ်ႈလႆႈၶၢမ်ႇတၢင်းတၢႆ ႁႂ်ႈလႆႈမီးဢၶႂၢင်ႉ ဢၼ်လႆႈၸွမ်းလူၺ်ႈ ၵျေးၸူးၽြႃးပဵၼ်ၸဝ်ႈသေလႄႈ ၶၢမ်ႇတၢင်းတၢႆပုၼ်ႈၵူၼ်း တင်းသဵင်ႈတင်းလူင်ၼၼ်ႉဢေႃႈ။-

10လွင်ႈမၼ်းၸမ်ႉ လွင်ႈၼင်ႇႁိုဝ်ၸဝ်ႈဢၼ်ၵႄႇၶျွတ်ႈဢဝ် လုၵ်ႈလၢင်းၼမ်ၼႃႇသေလႄႈ ဢဝ်သူင်ႇႁွတ်ႈထိုင်ၵႃႈတီႈ ဢၼ်တၵ်းၸၢမ်ႇၸႃးမုၼ်ၸေးၸိမ်ႇၼၼ်ႉ တၵ်းလႆႈႁွတ်ႈထိုင်တၢင်းဢၼ်ၸေးၸုမ်ႇ ၵွပ်ႈပိူဝ်ႈတုၵ်ႉၶႃႉဝူၺ်ႇတၼႃႇၸိုင်၊ ၽြႃးဢၼ်ၽၢၼ်ႇသၢင်းႁဵတ်းပဵၼ် ၵႃႈမီးတင်းသဵင်ႈတင်းလူင်လႄႈဢုပ်ႉပိူင်ႇၼၼ်ႉ ထုၵ်ႇလီၸီႇယၢင်ႇဢေႃႈ။

11ၵေႃႉဢၼ်ၸၢင်ႈႁႂ်ႈမူတ်းၸၢင်ႇ ဢိၵ်ႇတင်းၶဝ်ၸိူဝ်းဢၼ်မၼ်းၸဝ်ႈ ႁႂ်ႈမူတ်းၸၢင်ႇၼၼ်ႉ မီးပၵတီႉပႃးလဵဝ်ၵၼ်ဢေႃႈ။ ပိူဝ်ႈၼႆလႄႈ ၵေႃႉဢၼ်ၸၢင်ႈႁႂ်ႈမူတ်းၸၢင်ႇၼၼ်ႉ ဢမ်ႇမီးတၢင်းဢၼ်ဢူၵ်းဢၼ်ဢၢႆ လူၺ်ႈလွင်ႈဢၼ်ႁွင်ႉႁဵၵ်ႈၶဝ်ၸိူဝ်းဢၼ်မၼ်းၸဝ်ႈ ႁႂ်ႈမူတ်းၸၢင်ႇၼၼ်ႉဝႃႈ ပီႈၼွင်ႉၵၼ်ၼၼ်ႉ။-

12တီႈဢၼ်ႁွင်ႉႁဵၵ်ႈဝႃႈ ၸိူဝ်ႉၼင်ႇၼၼ်ၼၼ်ႉၸမ်ႉ၊ ၵဝ်ၶႃႈတၵ်းမွၵ်ႇလၢတ်ႈၼႃႇမႃႉၸိုဝ်ႈသဵင်ၸဝ်ႈႁဝ်း တီႈပီႈၼွင်ႉၵဝ်ၶႃႈတင်းလၢႆၼၼ်ႉတီႈၶႃႈဢေႃႈ။ ၵဝ်ၶႃႈတၵ်းယွင်ႈယေႃးၸဝ်ႈႁဝ်း ၵႃႈတီႈၼႂ်းၵၢင်ပရဵၵ်ႈသၢတ်ႈလႄႈ၊ ႁဵတ်းၵႂၢမ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

13ဢၼ်သမ်ႉမႃးထႅင်ႈၵမ်းၼိုင်ႈလႄႈဝႃႈၸမ်ႉ၊ ၵဝ်တၵ်းဢိင်ပိုင်ႈၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆဢေႃႈ။ သမ်ႉမႃးထႅင်ႈၵမ်းၼိုင်ႈလႄႈဝႃႈၸမ်ႉ၊ တူၺ်းလူး၊ ၵဝ်ဢိၵ်ႇတင်းလုၵ်ႈဢွၼ်ႇဢၼ်ၽြႃးပဵၼ်ၸဝ်ႈ ပၼ်တီႈၵဝ်တင်းလၢႆၼၼ်ႉ မီးယူႇဢေႃႈ၊ ဝႃႈၼင်ႇၼႆဢေႃႈ။

14ၵွပ်ႈပိူဝ်ႈဢၼ်လုၵ်ႈဢွၼ်ႇၸိူဝ်းၼၼ်ႉ သိူၵ်ႈသမ်ႇၵၼ်တင်းၼိူဝ်ႉတင်းလိူတ်ႈလႄႈ ၸဝ်ႈၶရိၸ်ႈၼၼ်ႉ ဢဝ်ၼိူဝ်ႉဢဝ်လိူတ်ႈမိူၼ်ၸိူဝ်ႉၼင်ႇလုၵ်ႈဢွၼ်ႇၸိူဝ်းၼၼ်ႉ ႁႂ်ႈလႆႈယႃႉႁၵ်းတၼ်းၶူဝ်းၵေႃႉဢၼ်ဢုပ်ႉပိူင်ႇတြႃးတၢင်းတၢႆ ဢၼ်ဝႃႈမႃႇၼၢတ်ႈၼၼ်ႉပႅတ်ႈ ၵွပ်ႈပိူဝ်ႈတၢင်းဢၼ်မၼ်းၸဝ်ႈၶၢမ်ႇတၢင်းတၢႆၼၼ်ႉ၊-

15ဢိၵ်ႇတင်းႁႂ်ႈလႆႈပွႆႇၶဝ်ၸိူဝ်းဢၼ် ၵူဝ်ႁႄၽေးတၢင်းတၢႆၸူဝ်ႈဢသၢၵ်ႈလႄႈ လႆႈၶၢမ်ႇႁဵတ်းၶႃႈၼၼ်ႉလွတ်ႈဢေႃႈ။

16လွင်ႈမၼ်းၸမ်ႉ ၸဝ်ႈၶရိၸ်ႈၸွႆႈထႅမ်တမၢၼ်ႇၵၢင်ႁၢဝ်တင်းလၢႆဢမ်ႇၸႂ်ႈ။ မၼ်းၸဝ်ႈၸွႆႈထႅမ်ၸိူဝ်ႉၶိူဝ်း ဢႃႇပြႃႇႁၢမ်ႇ ဢေႃႈ။-

17ပိူဝ်ႈၼႆလႄႈ ၸဝ်ႈၶရိၸ်ႈၼၼ်ႉ မီးလွင်ႈဢၼ်တၵ်းလႆႈမိူၼ်ၸိူဝ်ႉၼင်ႇ ပီႈၼွင်ႉတူဝ်ၸဝ်ႈၵဝ်ႇတင်းလၢႆ ၼႂ်းလွင်ႈတၢင်းၵူႈၸိူဝ်ႉၵူႈပိူင် ႁႂ်ႈလႆႈပဵၼ်ၶုၼ်ယိတ်ႈပရေႃးႁဵၵ်ႈလူင် ဢၼ်ပျေႉၸုမ်ႇတင်းၵရူႉၼႃႇ ဢိၵ်ႇတင်းသဵတ်ႈၸႃႇ ၼႂ်းလွင်ႈတၢင်းဢၼ်ၸၢပ်ႈသႅင်ႇၵၼ်တင်း ၽြႃးပဵၼ်ၸဝ်ႈၼၼ်ႉ ပုၼ်ႈလွင်ႈၼင်ႇႁိုဝ် တၵ်းလႆႈၸီႇယၢင်ႇပွင်ႁဵတ်း လွင်ႈဢၼ်တၵ်းၽေႇဢပႅတ်ႈၵူၼ်းတင်းလၢႆဢေႃႈ။-

18မၼ်းၸဝ်ႈၼၼ်ႉၵွပ်ႈပိူဝ်ႈဢၼ် တူဝ်ၸဝ်ႈၵဝ်ႇၶၢမ်ႇတၢင်းဢၼ်ၸၢမ်းတူၺ်းယႃႉယူၵ်ႉလႄႈ ၵႂႃႇမႃးၼႂ်းတုၵ်ႉၶႃႉတၢင်းၽၢၼ်ၸိူဝ်ႉၼင်ႇၼၼ်ၼၼ်ႉလႄႈ တၢတ်ႈၼိူင်ႇလႆႈႁႂ်ႈလႆႈၸွႆႈထႅမ်ၶဝ်ၸိူဝ်းဢၼ် လႆႈႁူပ်ႉလႆႈထူပ်းလွင်ႈတၢင်းဢၼ် ၸၢမ်းတူၺ်းယႃႉယူၵ်ႉၸိူဝ်းၼၼ်ႉဢေႃႈ။

← Chapter 1 Jump to: Chapter 3 →