Hebrews 8

Shan

← Chapter 7 Jump to: Chapter 9 →

1ဢၼ်ႁူမ်ႇလူမ်ႈ လွင်ႈတၢင်းၵႃႈဢၼ်ဝႃႈမႃးယဝ်ႉၼၼ်ႉၸမ်ႉ၊ ၶုၼ်ယိတ်ႈပရေႃးႁဵၵ်ႈၸိူဝ်ႉၼင်ႇၼၼ် ဢၼ်ၼင်ႈယူႇၵႃႈတီႈၽၢႆႇၶႂႃပလၢင်ႇ မုၼ်ဢႃႇၼူႉၽေႃႇၸဝ်ႈ ၵႃႈၼိူဝ်မိူင်းၵၢင်ႁၢဝ်ပုၼ်ႉ၊-

2ဢၼ်ပဵၼ်ၵေႃႉဢၼ်ႁဵတ်းဝၢတ်ႈၽြႃး ၵႃႈၼႂ်းထႃႇၼႃႉတီႈမူတ်းၸၢင်ႇဢၼ်ဝႃႈ သုမ်ႉထဵင်ၸဝ်ႈၸႅတ်ႈၸႅတ်ႈ ဢၼ်ၵူၼ်းဢမ်ႇမႄးႁဵတ်းလႄႈ ထႃႇဝရႃႉၽြႃးမႄးႁဵတ်းၼၼ်ႉၼၼ်ႉ မီးတီႈႁဝ်းဢေႃႈ။

3ၶုၼ်ယိတ်ႈပရေႃးႁဵၵ်ႈပႃးလႂ်သေဢမ်ႇဝႃႈ၊ ၵွပ်ႈပိူဝ်ႈဢၼ်ၶၢၼ်းဝႆႉ၊ မီးယူႇႁႂ်ႈလႆႈပုၵ်ႈၸေႃႇ ၶိူင်ႈတၢင်းပုၵ်ႈၸေႃႇ ဢိၵ်ႇတင်းယိတ်ႈတင်းလၢႆလႄႈ ၶုၼ်ယိတ်ႈပရေႃးႁဵၵ်ႈႁဝ်းၵေႃႈ တၵ်းလႆႈမီးယိတ်ႈဢၼ်တၵ်းလႆႈပုၵ်ႈၸေႃႇ သေၸိူဝ်ႉသေပိူင်ဢေႃႈ။-

4ၵွပ်ႈပိူဝ်ႈဢၼ်မီးယိတ်ႈပရေႃးႁဵၵ်ႈ ဢၼ်သၢၵ်ႈၵၢပ်ႈၶိူင်ႈတၢင်းပုၵ်ႈၸေႃႇၸွမ်းၼင်ႇပိင်းၺၢပ်ႈတြႃးၼၼ်ႉၼမ်ၼႃႇလႄႈ ၸဝ်ႈၼၼ်ႉပေႃးမီးယူႇ ၵႃႈၼိူဝ်လိၼ်မိူင်းၸိုင် ဢမ်ႇလႆႈႁဵတ်းယိတ်ႈပရေႃးႁဵၵ်ႈ။-

5ယိတ်ႈပရေႃးႁဵၵ်ႈၸိူဝ်းၼၼ်ႉ ႁဵတ်းဝၢတ်ႈဢၼ် ၸၢပ်ႈသႅင်ႇၵၼ်တင်း ပုင်ႇႁၢင်ႈသၢႆငၢႆ လွင်ႈတၢင်းဢၼ် မီးယူႇၵႃႈၼိူဝ်ၵၢင်ႁၢဝ်ၸိူဝ်းၼၼ်ႉ မႅၼ်ႈၸွမ်းၼင်ႇဢၼ် မူဝ်းသေႇ လႆႈၶၢမ်ႇဢဝ်ပျႃႇတိၵ်ႈၸဝ်ႈ ၼႂ်းမိူဝ်ႈဢၼ်မၼ်းၸမ်တၵ်း တႄႇႁဵတ်းသုမ်ႉထဵင်ၸဝ်ႈၼၼ်ႉ ဢၼ်ဝႃႈႁဵတ်းသတီႉ ႁႂ်ႈလႆႈတႄႇႁဵတ်းတင်းသဵင်ႈတင်းလူင် ၸွမ်းၼင်ႇပုင်ႇႁၢင်ႈဢၼ်ၼႄပျႃးမႃးယဝ်ႉ ၵႃႈတီႈမႂ်းၵႃႈၼိူဝ်လွႆၼၼ်ႉတႃႉ၊ ဝႃႈၼင်ႇၼႆၼၼ်ႉဢေႃႈ။

6လိူဝ်သေၼၼ်ႉ ၵႃႈၼင်ႇဢၼ်မၼ်းပဵၼ်ၵူၼ်းဝူင်ႈၵၢင်ပတီႉၺိၺ်ႇတြႃး၊ ဢၼ်ယဵင်ႈၶႅၼ်းမျၢတ်ႈ ဢၼ်တႄႇယူႇၼႂ်းၵတီႉၸဝ်ႈ ဢၼ်ယဵင်ႈၶႅၼ်းမျၢတ်ႈတင်းလၢႆၼၼ်ႉ၊ မၼ်းၸဝ်ႈလႆႈဢၶႂၢင်ႉဢရႃႇတၢင်းဢၼ်ႁဵတ်းဝၢတ်ႈ ဢၼ်ယဵင်ႈၶႅၼ်းမျၢတ်ႈဢေႃႈ။-

7ပေႃးပတီႉၺိၺ်ႇတြႃးပထမႃႉၼၼ်ႉ ဢမ်ႇမီးဢၶႂၢင်ႉတီႈဢၼ်တၵ်းတၢင်ႇဢပႅတ်ႈၸိုင်၊ ႁဵတ်းသင်လႄႈ လႆႈႁႃဢၶႂၢင်ႉဢၼ်ပတီႉၺိၺ်ႇတြႃးတူႉတီႉယႃႉ တၵ်းတႄႇယူႇၼၼ်ႉထႅင်ႈလူးၵွၼ်ႇၸိူဝ်ႉၼင်ႇႁိုဝ်။-

8ထႃႇဝရႃႉၽြႃးတၢင်ႇဢပႅတ်ႈတီႈၶဝ်လႄႈဝႃႈၸမ်ႉ၊ ၶိင်ႇၵႃႇလႃႉဢၼ်ၵဝ်တၵ်းဢဝ်ပတီႉၺိၺ်ႇတြႃးဢၼ်မႂ်ႇ ဢၼ်ပႅၵ်ႇပိူင်ႈၵၼ်တင်း ပတီႉၺိၺ်ႇတြႃးဢၼ်ၵဝ်ပၼ်တီႈပူႇမွၼ်ႇၵူၼ်းမဵဝ်းၼႆႉ ၼႂ်းမိူဝ်ႈဢၼ်ၵဝ်တိုတ်ႉၸုင်ဢဝ်မိုဝ်းၶဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ၵႂႃႇၼၼ်ႉ ပၼ်တီႈၵူၼ်းမဵဝ်း ဢီႉသရေႇလႃႉ ဢိၵ်ႇတင်းၵူၼ်းမဵဝ်း ယူႉတႃႉ တင်းလၢႆၼၼ်ႉ တၵ်းႁွတ်ႈထိုင်ဢေႃႈ။-

9ၶဝ်ဢမ်ႇတႄႇယူႇၼႂ်းပတီႉၺိၺ်ႇတြႃးဢၼ်ၵဝ်ပၼ်မိူဝ်ႈဢွၼ်တၢင်းၼၼ်ႉ၊ ၵဝ်ၵေႃႈဢမ်ႇလူဢမ်ႇတူၺ်းၶဝ်ၼၼ်ႉလႄႈယူႇဢေႃႈ။-

10ပတီႉၺိၺ်ႇတြႃး ဢၼ်ၵဝ်တၵ်းပၼ်တီႈၵူၼ်းမဵဝ်း ဢီႉသရေႇလႃႉ မိူဝ်ႈၶိင်ႇၵႃႇလႃႉၵမ်းလိုၼ်းၼၼ်ႉၸမ်ႉ၊ ၵဝ်ထႃႇဝရႃႉၽြႃးတၵ်း ဢဝ်ပိင်းၺၢပ်ႈတြႃးၵဝ် သႂၢင်းသႂ်ႇၵႃႈၼႂ်းဝီႉၺိၺ်ႇၶဝ်ဢေႃႈ။ တၵ်းတႅမ်ႈသႂ်ႇဝႆႉ ၵႃႈၼိူဝ်ႁူဝ်ၸႂ်ၶဝ်ဢေႃႈ။ ၵဝ်တၵ်းပဵၼ်ၽြႃးၶဝ်ဢေႃႈ။ ၶဝ်ၵေႃႈတၵ်းပဵၼ်ၵူၼ်းၵဝ်ဢေႃႈ။-

11ၶဝ်ၼၼ်ႉမဵဝ်းၸိူဝ်ႉၶိူဝ်းၵၼ်၊ ပီႈၼွင်ႉၵၼ်ၵေႃႉၼိုင်ႈလႄႈၵေႃႉၼိုင်ႈ တၵ်းဢမ်ႇလႆႈပၼ်သုင်းမႃႉ ဢေႃးဝႃႇတႃႉတီႈၵၼ်လႄႈဝႃႈ၊ ႁူႉထႃႇဝရႃႉၽြႃးတႃႉ၊ ဝႃႈၼင်ႇၼႆၼၼ်ႉ။ လွင်ႈမၼ်းၸမ်ႉ ၶဝ်ၵႃႈမီးတင်းသဵင်ႈတင်းလူင် ၸႃႉၸဵမ်ၵေႃႉဢၼ်လဵၵ်ႉသေပိူၼ်ႈ တေႃႇထိုင်ႁွတ်ႈၵေႃႉဢၼ်ယႂ်ႇသေပိူၼ်ႈၼၼ်ႉ တၵ်းႁူႉၵဝ်ယူႇဢေႃႈ။-

12မိူဝ်ႈၼၼ်ႉၵဝ်တၵ်းယိူၼ်ႉၶၢမ်ႇဢပႅတ်ႈၶဝ်ဢေႃႈ။ ၵဝ်တၵ်းဢမ်ႇၶုၵ်းၸႂ်လႆႈၶႆႈၸႂ်ထူပ်း တၢင်းဢၼ်ၶဝ်ၽိတ်းပိူင်ႈပူၼ်ႉလိူဝ် တင်းလၢႆၼၼ်ႉလႄႈယူႇဢေႃႈ ဝႃႈၼႆ ထႃႇဝရႃႉၽြႃးမီးဢမိင်ႉဢေႃႈ။

13ၼႂ်းလွင်ႈဢၼ်မၼ်းၸဝ်ႈဝႃႈ ပတီႉၺိၺ်ႇတြႃးဢၼ်မႂ်ႇ၊ ဝႃႈၼင်ႇၼႆၼၼ်ႉ၊ မၼ်းၸဝ်ႈႁႂ်ႈပတီႉၺိၺ်ႇတြႃးပထမႃႉ ၼၼ်ႉၵဝ်ႇၵႂႃႇဢေႃႈ။ လွင်ႈတၢင်းဢၼ်သုတ်ႈယွမ်းလႄႈၵဝ်ႇၵႂႃႇၼၼ်ႉၸိုင်၊ ၸမ်တၵ်းႁွတ်ႈထိုင်တၢင်းဢၼ်ႁၢႆလၢႆဢေႃႈ။

← Chapter 7 Jump to: Chapter 9 →