Hebrews 7

Shan

← Chapter 6 Jump to: Chapter 8 →

1မေႇလၶီႉၸေႇတႅၵ်ႈ ၶုၼ်လူင် သႃႇလိမ်း ဢၼ်ပဵၼ်ယိတ်ႈပရေႃးႁဵၵ်ႈၽြႃးပဵၼ်ၸဝ်ႈ ဢၼ်သုင်ၼႃႇသေပိူၼ်ႈ ဢၼ်ႁပ်ႉႁူဝ်တၢင်း ဢႃႇပြႃႇႁၢမ်ႇ ၼႂ်းမိူဝ်ႈဢၼ်မၼ်းလုၵ်ႉသေၵႃႈတီႈ တၢင်းဢၼ်တိုၵ်းတေႃးယႃႉပႅတ်ႈၶုၼ်လူင်တင်းလၢႆ ၶိုၼ်းမႃးၼၼ်ႉသေလႄႈ ပၼ်တၢင်းလီသေယဝ်ႉ၊-

2ၶၢမ်ႇဢဝ်ဢုၵ်ႉၸႃႇဢၼ် ဢႃႇပြႃႇႁၢမ်ႇ တိုၵ်းတေႃးယႃႉပႅတ်ႈလႄႈ လႆႈမႃးလူႇမႃးတၢၼ်းၵႃႈမီး သိပ်းပုၼ်ႈပုၼ်ႈၼိုင်ႈၼၼ်ႉၼၼ်ႉ၊ ၸွမ်းၼင်ႇဢၼၢၵ်ႈၼႃႇမႃႉၸိုဝ်ႈသဵင်မၼ်းၼၼ်ႉ ဢွၼ်တၢင်းပဵၼ် ၶုၼ်တၢင်းဢၼ်သိုဝ်ႈတေႃႇ၊ လိုၼ်းၼၼ်ႉ ပဵၼ်ၶုၼ် သႃႇလိမ်း ဢၼ်ၶႂ်ႈဝႃႈ ၶုၼ်တၢင်းၼိမ်၊-

3ယင်းဢမ်ႇမီးပေႃႈ၊ ဢမ်ႇမီးမႄႈ၊ ဢမ်ႇမီးၸိူဝ်ႉၶိူဝ်း ဢၼ်သိုပ်ႇလူင်းမႃးၸဵမ်မိူဝ်ႈဢွၼ်ၼႆႉ၊ ဢမ်ႇမီးတီႈတႄႇၸႃႉ၊ တီႈသုတ်းဢသၢၵ်ႈ၊ မိူၼ်ၸိူဝ်ႉၼင်ႇလုၵ်ႈၽြႃးပဵၼ်ၸဝ်ႈလႄႈ တႄႇယူႇၼႂ်းဢရႃႇပရေႃးၽႅတ်ႈသေႇသေႇဢေႃႈ။

4ၶႆႈၸႂ်တူၺ်းလွင်ႈဢၼ် ၶုၼ်ဢၼ်ၶၢမ်ႇဢဝ်တၢင်းလူႇ ဢၼ် ဢႃႇပြႃႇႁၢမ်ႇ ဢၼ်ပဵၼ်ပေႃႈၸိူဝ်ႉၶိူဝ်းႁဝ်း ဢဝ်ဢုၵ်ႉၸႃႇဢၼ်တိုၵ်းတေႃးယႃႉပႅတ်ႈလႄႈ လႆႈမႃးလူႇမႃးတၢၼ်း သိပ်းပုၼ်ႈပုၼ်ႈၼိုင်ႈၼၼ်ႉ ယႂ်ႇမျၢတ်ႈၼႃႇထၢၼ်ႇႁိုဝ်ၼၼ်ႉတႃႉ၊-

5ၵူၼ်း လေႇဝီႉ ဢၼ်ၶၢမ်ႇဢဝ်ဢရႃႇ ယိတ်ႈပရေႃးႁဵၵ်ႈၸိူဝ်းၼၼ်ႉ ပိၵ်ႉသမ်ႉသိုပ်ႇလူင်းမႃးၵႃႈတီႈ ဢႃႇပြႃႇႁၢမ်ႇ သေၵေႃႈ၊ ၸွမ်းၼင်ႇပိင်းၺၢပ်ႈတြႃးၼၼ်ႉ မီးဢၶႂၢင်ႉဢၼ်လႆႈၶၢမ်ႇဢဝ်သိပ်းပုၼ်ႈပုၼ်ႈၼိုင်ႈၵႃႈၼႂ်းမဵဝ်းၵူၼ်းၶဝ် ဢၼ်ဝႃႈပီႈၼွင်ႉၶဝ်ၼၼ်ႉဢေႃႈ။-

6ၶုၼ်ဢၼ်ဢမ်ႇၸႂ်ႈၸိူဝ်ႉၶိူဝ်းၶဝ်ၼၼ်ႉၸမ်ႉ၊ ၶၢမ်ႇဢဝ်သိပ်းပုၼ်ႈပုၼ်ႈၼိုင်ႈ ၵႃႈၼႂ်းမိုဝ်း ဢႃႇပြႃႇႁၢမ်ႇ ဢေႃႈ။ တီႈၵေႃႉဢၼ်လႆႈၶၢမ်ႇၵတီႉၸဝ်ႈၼၼ်ႉၵေႃႈ၊ မၼ်းပၼ်တၢင်းလီဢေႃႈ။-

7လွင်ႈဢၼ်ၵေႃႉဢၼ်ယႂ်ႇ ၸၢင်ႈပၼ်တၢင်းလီတီႈၵေႃႉဢၼ်လဵၵ်ႉၼၼ်ႉၸိုင် တီႈတၵ်းတွပ်ႇတၵ်းထဵင်ဢမ်ႇမီး။-

8လိူဝ်သေၼၼ်ႉ၊ မိူဝ်ႈလဵဝ်ၼႆႉ ၶဝ်ၸိူဝ်းဢၼ်ၸၢင်ႈတၢႆၼၼ်ႉ ၸၢင်ႈၶၢမ်ႇဢဝ်သိပ်းပုၼ်ႈပုၼ်ႈၼိုင်ႈဢေႃႈ။ မိူဝ်ႈၼၼ်ႉၸမ်ႉ၊ ၵေႃႉဢၼ်လႆႈတၢင်းဢၼ်ၶၢမ်ႇသၢၵ်ႈသေႇလႄႈဝႃႈ၊ မၼ်းဢသၢၵ်ႈလိပ်းယူႇဢေႃႈ၊ ဝႃႈၼင်ႇၼႆၼၼ်ႉ လႆႈၶၢမ်ႇဢဝ်သိပ်းပုၼ်ႈပုၼ်ႈၼိုင်ႈဢေႃႈ။-

9လိူဝ်သေၼၼ်ႉ လေႇဝီႉ ဢၼ်ၸၢင်ႈၶၢမ်ႇဢဝ်သိပ်းပုၼ်ႈပုၼ်ႈၼိုင်ႈၼၼ်ႉ လႆႈပၼ်သိပ်းပုၼ်ႈပုၼ်ႈၼိုင်ႈၼႂ်း ဢႃႇပြႃႇႁၢမ်ႇ ၼၼ်ႉယဝ်ႉဝႃႈၼႆ မီးဢၶႂၢင်ႉတီႈတၵ်းလၢတ်ႈဢေႃႈ။-

10လွင်ႈမၼ်းၸမ်ႉ မိူဝ်ႈဢၼ် မေႇလၶီႉၸေႇတႅၵ်ႈ ထူပ်း ဢႃႇပြႃႇႁၢမ်ႇ ၼၼ်ႉၸိုင်၊ လေႇဝီႉ ယင်းမီးယူႇၼႂ်းတူဝ်ပေႃႈမၼ်းဢေႃႈ။

11ၼႄးၼိုင်ႈၸမ်ႉ၊ ၵွပ်ႈပိူဝ်ႈဢၼ်ၵူၼ်းၸိူဝ်းဢၼ် ၸၢပ်ႈသႅင်ႇၵၼ်တင်းမဵဝ်းယိတ်ႈပရေႃးႁဵၵ်ႈ ဢၼ်သိုပ်ႇလူင်းမႃးၵႃႈတီႈ လေႇဝီႉ ၼၼ်ႉ ၶၢမ်ႇဢဝ်ပိင်းၺၢပ်ႈတြႃးၸဝ်ႈၼၼ်ႉလႄႈ ပေႃးႁွတ်ႈထိုင်တၢင်းဢၼ်ၸေးၸုမ်ႇ ၵွပ်ႈပိူဝ်ႈၸိူဝ်ႉၶိူဝ်းၼၼ်ႉ ဢမၢၼ်ႇၶၼ်ပဵၼ်လႆႈၸိုင် ႁဵတ်းသင်လႄႈယင်းသမ်ႉမီးလွင်ႈဢၼ် ယိတ်ႈပရေႃးႁဵၵ်ႈတၢင်ႇပႃး ယင်းဢမ်ႇၶၢမ်ႇတၢင်းဢၼ်ႁွင်ႉဢၼ်ႁဵၵ်ႈ ၸွမ်းၼင်ႇဢရႃႇ ဢႃႇရုၼ်ႇ လႄႈ လႆႈပေႃႇမႃးၸွမ်းဢရႃႇ မေႇလၶီႉၸေႇတႅၵ်ႈ ၼၼ်ႉထႅင်ႈၼင်ႇႁိုဝ်။-

12ပေႃးၸိူဝ်ႉၶိူဝ်းယိတ်ႈပရေႃးႁဵၵ်ႈၶၢႆႉပုတ်ႈၸိုင် ပိင်းၺၢပ်ႈတြႃးဢမ်ႇၶၢႆႉဢမ်ႇပုတ်ႈလႄႈဢမ်ႇယူႇလႆႈ။-

13ၵေႃႉဢၼ်လႆႈၶၢမ်ႇဢဝ်ပျႃႇတိၵ်ႈၸဝ်ႈၼၼ်ႉၸိုင် ၸၢပ်ႈသႅင်ႇၵၼ်တင်းၸိူဝ်ႉၶိူဝ်း ဢၼ်ဢမ်ႇလႆႈႁဵတ်းဝၢတ်ႈ ၵႃႈတီႈယိတ်ႈပလၢင်ႇ သေၵေႃႉသေၵူၼ်းၼၼ်ႉဢေႃႈ။-

14လွင်ႈမၼ်းၸမ်ႉ လွင်ႈဢၼ်ၸဝ်ႈႁဝ်းၼၼ်ႉပေႃႇမႃးၵႃႈၼႂ်းၸိူဝ်ႉၶိူဝ်း ယူႉတႃႉ ၼၼ်ႉၸိုင် ထၢင်ႇသႃးယူႇဢေႃႈ။ ၸိူဝ်ႉၶိူဝ်းၼၼ်ႉ ၸၢပ်ႈသႅင်ႇၵၼ်တင်းဢရႃႇယိတ်ႈပရေႃးႁဵၵ်ႈဝႃႈၼႆ မူဝ်းသေႇ ဢမ်ႇလၢတ်ႈၵႃႈသင်ဝႆႉသေဢိတ်း။

15လိူဝ်သေၼၼ်ႉ ပေႃးယိတ်ႈပရေႃးႁဵၵ်ႈ တၢင်ႇပႃးပေႃႇမႃးမိူၼ်ၸိူဝ်ႉၼင်ႇ မေႇလၶီႉၸေႇတႅၵ်ႈ ၼၼ်ႉဢမၢၼ်ႇၶၼ်ပဵၼ်ၸိုင်၊ ၸိူဝ်ႉၶိူဝ်းယိတ်ႈပရေႃးႁဵၵ်ႈၶၢႆႉပုတ်ႈယဝ်ႉဝႃႈၼႆ ယဵင်ႈၶႅၼ်းထၢင်ႇသႃးဢေႃႈ။-

16ယိတ်ႈပရေႃးႁဵၵ်ႈၼၼ်ႉ ၶၢမ်ႇတၢင်းဢၼ်ၶၢၼ်းဝႆႉ ၸွမ်းၼင်ႇတြႃးဢၼ်ၸၢပ်ႈသႅင်ႇၵၼ်တင်းတူဝ်ၶၼ်ႇထႃႇဢမ်ႇၸႂ်ႈ။ မၼ်းၶၢမ်ႇတၢင်းဢၼ်ၶၢၼ်းဝႆႉ ၸွမ်းၼင်ႇတၼ်းၶူဝ်းဢႃႇၼူႉၽေႃႇ ထႃႇဝရႃႉဢသၢၵ်ႈဢေႃႈ။-

17လွင်ႈမၼ်းၸမ်ႉ မီးတၢင်းဢၼ်ၶၢမ်ႇသၢၵ်ႈသေႇဝႆႉလႄႈဝႃႈ၊ မႂ်းပဵၼ်ယိတ်ႈပရေႃးႁဵၵ်ႈထႃႇဝရႃႉ ၸွမ်းၼင်ႇဢရႃႇ မေႇလၶီႉၸေႇတႅၵ်ႈ ၼၼ်ႉဢေႃႈ၊ ဝႃႈၼင်ႇၼႆဢေႃႈ။-

18ၵွပ်ႈပိူဝ်ႈဢၼ်ပိင်းၺၢပ်ႈတြႃး ဢမ်ႇဢဝ်ၽူႈလႂ်သူင်ႇႁႂ်ႈႁွတ်ႈထိုင် တၢင်းဢၼ်ၸေးၸုမ်ႇၼၼ်ႉလႄႈ ပိင်းၺၢပ်ႈတြႃးဢၼ်ၵဝ်ႇၼၼ်ႉၸိုင် ႁွတ်ႈထိုင်တၢင်းဢၼ်ပႄႇဝႆႉ ၵွပ်ႈပိူဝ်ႈဢၼ်ဢမ်ႇမီးႁႅင်းလႄႈ ဢမ်ႇပၼ်ဢၵျူဝ်းလႆႈၼၼ်ႉဢေႃႈ။-

19ၼႂ်းဝႃႈၼၼ်သေၵေႃႈ ဢၶႂၢင်ႉတၢင်းဢၼ်မုင်ႈထႃႈမွင်းထႃႈ ဢၼ်ယဵင်ႈၶႅၼ်းမျၢတ်ႈၼၼ်ႉ တူၵ်းတီႈတူၵ်းလႅၼ်ဢေႃႈ။ ၵွပ်ႈပိူဝ်ႈတၢင်းဢၼ်မုင်ႈထႃႈမွင်းထႃႈၼၼ်ႉလႄႈ ႁဝ်းလႆႈၶဝ်ႈသုတ်ႉၸပ်းသုတ်ႉၸူး ၵႃႈတီႈႁိမ်းၽြႃးပဵၼ်ၸဝ်ႈဢေႃႈ။

20ၶဝ်ၼၼ်ႉ တၢင်းဢၼ်မၼ်းၸဝ်ႈတိူင်ႇဝႃႈ ယင်းဢမ်ႇမီးလႄႈ လႆႈဢရႃႇယိတ်ႈပရေႃးႁဵၵ်ႈဢေႃႈ။-

21ယေႇသူႉ ၸမ်ႉ၊ တၢင်းဢၼ်မၼ်းၸဝ်ႈတိူင်ႇဝႃႈမီးလႄႈ လႆႈဢရႃႇယိတ်ႈပရေႃးႁဵၵ်ႈဢေႃႈ။ မႅၼ်ႈၼင်ႇဢၼ်ထႃႇဝရႃႉၽြႃးတိူင်ႇဝႃႈဝႆႉလႄႈဝႃႈ၊ မႂ်းပဵၼ်ယိတ်ႈပရေႃးႁဵၵ်ႈထႃႇဝရႃႉ ၸွမ်းၼင်ႇဢရႃႇ မေႇလၶီႉၸေႇတႅၵ်ႈ ၼၼ်ႉဢေႃႈ၊ ဝႃႈၼင်ႇၼႆလႄႈ ၵမ်းလိုၼ်းဢမ်ႇမီးၸႂ်ဢၼ်ၶၢႆႉဢၼ်ပုတ်ႈၼၼ်ႉ။-

22ယေႇသူႉ ပဵၼ်ၵေႃႉဢၼ်ႁပ်ႉတုင်းဢဝ်ပတီႉၺိၺ်ႇတြႃး ဢၼ်ယဵင်ႈၶႅၼ်းမျၢတ်ႈၼႃႇ ၸွမ်းၵႃႈၼင်ႇဢၼ် လႆႈၶၢမ်ႇတၢင်းဢၼ်မၼ်းၸဝ်ႈတိူင်ႇဝႃႈလႄႈ လႆႈဢရႃႇယိတ်ႈပရေႃးႁဵၵ်ႈၼၼ်ႉဢေႃႈ။-

23ၶဝ်ၼၼ်ႉၵေႃႈ၊ ၵွပ်ႈပိူဝ်ႈဢၼ်လႆႈတၢႆလႄႈ ဢမ်ႇတႄႇယူႇသေႇသေႇၼၼ်ႉလႄႈ ၸၢင်ႈလႆႈမီးၼမ်ၼႃႇလူင်လၢင်ဢေႃႈ။-

24မၼ်းၸဝ်ႈၸမ်ႉ၊ ၵွပ်ႈပိူဝ်ႈဢၼ်တႄႇယူႇၼိၵ်ႈၸႃႉထႃႇဝရႃႉလႄႈ ၶၢၼ်းဝႆႉမီးယူႇၼႂ်းဢရႃႇ ယိတ်ႈပရေႃးႁဵၵ်ႈဢၼ်ဢမ်ႇၶၢႆႉဢမ်ႇပုတ်ႈဢေႃႈ။-

25ပိူဝ်ႈၼႆလႄႈ မၼ်းၸဝ်ႈၼၼ်ႉၵွပ်ႈပိူဝ်ႈဢၼ် ဢသၢၵ်ႈလိပ်းယူႇ ၵူႈၶိင်ႇၵူႈၶႃႇ ပုၼ်ႈဢၼ်တၵ်းပႂ်ႉဢမူႉ ၶဝ်ၸိူဝ်းဢၼ်ဢိင်မၼ်းၸဝ်ႈသေလႄႈ သုတ်ႉၸပ်းသုတ်ႉၸူး ၵႃႈတီႈၽြႃးပဵၼ်ၸဝ်ႈၼၼ်ႉလႄႈ၊ တၢတ်ႈၼိူင်ႇလႆႈ ႁႂ်ႈလႆႈၵႄႇၶျွတ်ႈဢဝ်ၶဝ်သေႇသေႇယူႇဢေႃႈ။

26ၶုၼ်ယိတ်ႈပရေႃးႁဵၵ်ႈၸိူဝ်ႉၼင်ႇၼၼ် ဢၼ်ပဵၼ်ၵေႃႉဢၼ်မူတ်းၸၢင်ႇယူႇ၊ ၶၢဝ်သႂ်ယူႇ၊ ၵၢင်းလွတ်ႈတင်းတၢင်းဢၼ်ၵူဝ်ႈဢၼ်ၵိူၵ်ႇယူႇ၊ ဢမ်ႇသိူၵ်ႈသမ်ႇၵၼ်တင်းၶဝ်ၸိူဝ်းဢၼ်မီးဢပႅတ်ႈယူႇ၊ သုင်မျၢတ်ႈၼႃႇသေၶဝ်ၸိူဝ်းဢၼ် မီးၵႃႈၼိူဝ်မိူင်းၵၢင်ႁၢဝ်ပုၼ်ႉယူႇလႄႈ၊-

27ဢၼ်ဢမ်ႇမီးလွင်ႈဢၼ်တၵ်းလႆႈပုၵ်ႈၸေႃႇယိတ်ႈ ၵွပ်ႈပိူဝ်ႈဢပႅတ်ႈတူဝ်ၸဝ်ႈၵဝ်ႇ ဢိၵ်ႇတင်းၵွပ်ႈပိူဝ်ႈဢပႅတ်ႈၵူၼ်းတင်းလၢႆၵူႈဝၼ်း မိူၼ်ၸိူဝ်ႉၼင်ႇဢၼ် ၶုၼ်ယိတ်ႈပရေႃးႁဵၵ်ႈတၢင်ႇၵေႃႉတင်းလၢႆ လႆႈပုၵ်ႈၸေႃႇယိတ်ႈၼၼ်ႉၼၼ်ႉ ပဵၼ်ဢၼ်ထုၵ်ႇၵၼ်တင်းႁဝ်းဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ဢမ်ႇလႆႈပုၵ်ႈၸေႃႇၸိူဝ်ႉၼင်ႇၶဝ်ၼၼ်ႉဝႃႈၼႆၸမ်ႉ၊ မၼ်းၸဝ်ႈဢဝ်တူဝ်ၸဝ်ႈၵဝ်ႇ ပုၵ်ႈၸေႃႇပွၵ်ႈလဵဝ်ၵူၺ်းလႄႈ ႁႂ်ႈဢမူႉၼၼ်ႉယဝ်ႉတူဝ်ႈဢေႃႈ။

28ပိင်းၺၢပ်ႈတြႃးၶၢၼ်းၶဝ်ၸိူဝ်းဢၼ်မီးဢပႅတ်ႈၼၼ်ႉ ဝႆႉၼႂ်းဢရႃႇၶုၼ်ယိတ်ႈပရေႃးႁဵၵ်ႈဢေႃႈ။ ပျႃႇတိၵ်ႈဢၼ် မၼ်းၸဝ်ႈတိူင်ႇဝႃႈလိုၼ်းလင်ပိင်းၺၢပ်ႈတြႃးၼၼ်ႉၸမ်ႉ၊ ၶၢၼ်းလုၵ်ႈၸဝ်ႈဢၼ်ႁွတ်ႈထိုင် တၢင်းဢၼ်ၸေးၸုမ်ႇယူႇတႃႇသေႇဢမ်ႇထၢတ်ႇၼၼ်ႉဝႆႉဢေႃႈ။

← Chapter 6 Jump to: Chapter 8 →