Hebrews 6

Shan

← Chapter 5 Jump to: Chapter 7 →

1ပိူဝ်ႈၼႆလႄႈ ႁဝ်းယင်းဢမ်ႇၶိုၼ်းတႄႇမူႇလႃႉငဝ်ႈႁၢၵ်ႈဢၼ်ဝႃႈ တၢင်းဢၼ်ၶုၵ်းၸႂ်လႆႈမႆႈၸႂ် လူၺ်ႈလွင်ႈတၢင်းၵမ်တၢင်းၵျၢင်ႉ ဢၼ်ၸၢပ်ႈသႅင်ႇၵၼ်တင်း တၢင်းတၢႆ၊ တၢင်းဢၼ်ယုမ်ႇမၢတ်ႈၽြႃးပဵၼ်ၸဝ်ႈ၊-

2တၢင်းဢၼ်သင်ႇသွၼ်ဢဝ် တြႃး ပပ်ႉတီႉၸမ်ႇ ၊ တၢင်းဢၼ်ဢဝ်မိုဝ်းတၢင်ႇ၊ တၢင်းဢၼ်ၶဝ်ၸိူဝ်းဢၼ်တၢႆယဝ်ႉၼၼ်ႉလုၵ်ႉၶိုၼ်း၊ တၢင်းဢၼ်ၸီႇယၢင်ႇထႃႇဝရႃႉ ၸိူဝ်းၼၼ်ႉလႄႈ ဢွၼ်ၵၼ်ဝႆႉသေဝၢင်းသေ လွင်ႈတၢင်းဢၼ်ပဵၼ်ၵေႃႇၸႃႉငဝ်ႈရၢင်း ၼႂ်းၽႃႇသႃႇၸဝ်ႈၶရိၸ်ႈၼၼ်ႉသေလႄႈ ၵႂႃႇႁွတ်ႈထိုင်ၵႃႈတီႈ တၢင်းဢၼ်ၸေးၸုမ်ႇၼၼ်ႉတႃႉႁဝ်း။-

3ပေႃးၽြႃးပဵၼ်ၸဝ်ႈပၼ်ဢၶႂၢင်ႉၸိုင် ႁဝ်းတၵ်းႁဵတ်းၸိူဝ်ႉၼင်ႇၼၼ်ဢေႃႈ။-

4ၶဝ်ၸိူဝ်းဢၼ်ႁွတ်ႈထိုင်ၵႃႈတီႈ ဢၼ်လႅင်းပွၵ်ႈၼိုင်ႈလႄႈ လႆႈမီးတၢင်းဢၼ်ၸိမ်းတူၺ်း သူႉၵျေးၸူးၵၢင်ႁၢဝ်၊ တၢင်းဢၼ်ၶၢမ်ႇဢဝ်ဝီႉၺိၺ်ႇဢၼ်မူတ်းၸၢင်ႇၸဝ်ႈ၊-

5တၢင်းဢၼ်ၸိမ်းတူၺ်း ၵႂၢမ်းတြႃးဢၼ်လီဢၼ်ငၢမ်းၽြႃးပဵၼ်ၸဝ်ႈ ဢိၵ်ႇတင်း တၼ်းၶူဝ်းၵၢပ်ႈၵႃႇလႃႉၵမ်းလိုၼ်းတင်းလၢႆၼၼ်ႉသေယဝ်ႉ၊-

6သမ်ႉၽွၵ်ႈပျၢၼ်ႇသုတ်ႉၶိုၼ်းၵႂႃႇၸိူဝ်းၼၼ်ႉၸမ်ႉ၊ ဢမ်ႇႁွတ်ႈထိုင်ၵႃႈတီႈတၢင်းဢၼ်ႁဵတ်းပဵၼ်ဢၼ်မႂ်ႇ ပုၼ်ႈလွင်ႈၼင်ႇႁိုဝ် တၵ်းၶုၵ်းၸႂ်လႆႈလႄႈမႆႈၸႂ်ထႅင်ႈၵမ်းလိုၼ်းၼၼ်ႉ ၵွပ်ႈပိူဝ်ႈဢၼ်ပဵၼ်ၵေႃႉဢၼ်ဢဝ်လုၵ်ႈၽြႃးပဵၼ်ၸဝ်ႈတွၵ်ႇဝႆႉ ၵႃႈတီႈသဝ်လၵ်းဝႃးၵၢပ်ႈတီႈတူဝ်ၸဝ်ႈၵဝ်ႇသေလႄႈ ယႃႉသရေႇၸဝ်ႈထၢင်ႇထၢင်ႇသႃးသႃးၵမ်းလိုၼ်းၼၼ်ႉလႆႈ။-

7ဢူႉပမႃႇၸမ်ႉ၊ လိၼ်ဢၼ်ၵိၼ်ၼမ်ႉၽူၼ် ဢၼ်တူၵ်းသႂ်ႇၵႃႈၼိူဝ်မၼ်းၶိူဝ်းၶိူဝ်းယႂ်းယႂ်းသေလႄႈ ၸၢင်ႈႁႂ်ႈပဵၼ်ၽၵ်းယိူဝ်ႈၽၵ်းၶဵဝ် ပုၼ်ႈဢၼ်ၶဝ်ၸိူဝ်းဢၼ်ႁဵတ်းဝႆႉၼၼ်ႉ တၵ်းသုင်းသွင်ႇၼၼ်ႉ ၸၢင်ႈၶၢမ်ႇတၢင်းလီမင်ႇၵလႃႇ ၵႃႈတီႈၽြႃးပဵၼ်ၸဝ်ႈဢေႃႈ။-

8လိၼ်ဢၼ်ၸၢင်ႈႁႂ်ႈပဵၼ်တူၼ်ႈၼၢမ် ၵူႈၸိူဝ်ႉၵူႈပိူင်ၼၼ်ႉ ဢမ်ႇထိူၵ်ႈၶၢမ်ႇတၢင်းဢၼ်လူဢၼ်တူၺ်း၊ ၸမ်ၶိင်ႇဢၼ်တၵ်းလႆႈၶၢမ်ႇ တၢင်းဢၼ်ၵိၼ်ႇဢၼ်ဝႃႈလႄႈ ၼႂ်းတီႈသုတ်းမၼ်းၼၼ်ႉ ၸၢင်ႈႁွတ်ႈထိုင်တၢင်းဢၼ်ၽႆးမႆႈဢေႃႈ။

9ပိၵ်ႉသမ်ႉႁဝ်းလၢတ်ႈၸိူဝ်ႉၼင်ႇၼၼ်သေၵေႃႈ၊ ၵေႃႉဢၼ်ၵဝ်ႁၵ်ႉၶဝ်ဢိူၺ်း၊ ႁဝ်းတူၵ်းၵၢင်ၸႂ်လွင်ႈဢၼ်သူ ၸၢပ်ႈသႅင်ႇၵၼ်တင်း လွင်ႈတၢင်းဢၼ်ယဵင်ႈၶႅၼ်းလီ ဢိၵ်ႇတင်းလွင်ႈတၢင်းဢၼ်ၵိုင်ႇထိူၵ်ႈၵၼ်တင်း တၢင်းဢၼ်ၵႄႇၶျွတ်ႈဢဝ်ၸိူဝ်းၼၼ်ႉယူႇဢေႃႈ။-

10လွင်ႈမၼ်းၸမ်ႉ ၽြႃးပဵၼ်ၸဝ်ႈဢမ်ႇႁဵတ်းလွင်ႈတၢင်းဢၼ်ဢမ်ႇတြႃးတေႃႇထိုင်ႁွတ်ႈထၼ်ႈပေႃး လိုမ်းပႅတ်ႈဢမူႉသူ ဢိၵ်ႇတင်းမႅတ်ႈတႃႇသူ ဢၼ်သူထွၵ်ႈလူၺ်ႈၼႃႇမႃႉၸိုဝ်ႈသဵင်ၸဝ်ႈသေလႄႈ ၼႄပျႃးဝႆႉၼၼ်ႉ ဢၼ်ဝႃႈလွင်ႈတၢင်းဢၼ်သူႁဵတ်းလဵင်ႉႁဵတ်းလူ တီႈၵူၼ်းမူတ်းၸၢင်ႇတင်းလၢႆ မိူဝ်ႈဢွၼ်ၼႆႉၼၼ်ႉဢမ်ႇၵႃး၊ တေႃႈလဵဝ်ၼႆႉၵေႃႈ ယင်းႁဵတ်းလဵင်ႉႁဵတ်းလူယူႇၼၼ်ႉၵူၺ်း။

11ႁဝ်းမီးဢလူဝ်ႇၶႂ်ႈႁႂ်ႈသူၵႃႈမီး ၼႄပျႃးတၢင်းဢၼ်လုမ်းလႃးဝီႉရီႉယႃႉၵႆႉၵျူဝ်းၸႃး ၸိူဝ်ႉၼင်ႇၼၼ်လႄႈ ပျေႉၸုမ်ႇတင်း တၢင်းဢၼ်မုင်ႈထႃႈမွင်းထႃႈ ဢၼ်ၵၢင်းလွတ်ႈတင်း တၢင်းဢၼ်ယုမ်ႇၶိုင်ႈၼိုင်ႈ ဢမ်ႇယုမ်ႇၶိုင်ႈၼိုင်ႈယူႇ တေႃႇထိုင်ႁွတ်ႈတီႈသုတ်းတီႈၵွႆပုၼ်ႉ၊-

12ႁႂ်ႈသူလႆႈၵၢင်းလွတ်ႈတင်း တၢင်းဢၼ်ၶၢၼ်ႉဢၼ်ဢိူၼ်လႄႈ ၵမ်ၵျၢင်ႉၸိူဝ်ႉၼင်ႇၶဝ်ၸိူဝ်းဢၼ်လႆႈၶၢမ်ႇဢမူၺ်ႇၵတီႉၸဝ်ႈ ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈ ဢိၵ်ႇတင်းတၢင်းဢၼ်ယိူၼ်ႉၶၢမ်ႇၼၼ်ႉဢေႃႈ။

13မိူဝ်ႈဢၼ်ၽြႃးပဵၼ်ၸဝ်ႈဝႆႉၵတီႉၵႃႈတီႈ ဢႃႇပြႃႇႁၢမ်ႇ ၼၼ်ႉၸိုင်၊ ၵွပ်ႈပိူဝ်ႈဢၼ်မၼ်းၸဝ်ႈ ဢမ်ႇမီးၵေႃႉဢၼ်ယႂ်ႇမျၢတ်ႈၼႃႇသေမၼ်းၸဝ်ႈ ပုၼ်ႈဢၼ်တၵ်းဢဝ်တိူင်ႇဢဝ်ဝႃႈၼၼ်ႉလႄႈ ဢဝ်တူဝ်ၸဝ်ႈၵဝ်ႇတိူင်ႇလႄႈဝႃႈ၊-

14ၵဝ်တၵ်းပၼ်တၢင်းလီတီႈမႂ်းသေႇသေႇဢေႃႈ။ တၵ်းႁႂ်ႈမႂ်းယႂ်ႇၽႄႈၼမ်ၵိုၼ်းမႃးသေႇသေႇဢေႃႈ၊ ဝႃႈၼင်ႇၼႆဢေႃႈ။-

15မႅၼ်ႈၼင်ႇဢၼ်ဝႃႈၼၼ်ႉ၊ ဢႃႇပြႃႇႁၢမ်ႇ ယိူၼ်ႉၶၢမ်ႇလႄႈ ပႂ်ႉထႃႈယူႇယဝ်ႉၸင်ႇ လႆႈၶဝ်ႈၸၢမ်ႇၸႃးၵတီႉၸဝ်ႈဢေႃႈ။-

16ၵူၼ်းႁဝ်းၸၢင်ႈဢဝ် ၵေႃႉဢၼ်ယႂ်ႇသေတူဝ်ၸဝ်ႈၵဝ်ႇလႄႈ တိူင်ႇဝႃႈဢေႃႈ။ တၢင်းဢၼ်တိူင်ႇဢၼ်ဝႃႈၼၼ်ႉ ၸၢင်ႈႁႂ်ႈတၢင်းဢၼ်တွပ်ႇၵၼ်ထဵင်ၵၼ် ၵႃႈမီးထၢတ်ႇယဵၼ် ပုၼ်ႈလွင်ႈၼင်ႇႁိုဝ် တၵ်းႁႂ်ႈပဵၼ်လွင်ႈတၢင်းဢၼ်မၼ်ႈဢၼ်ၶိူင်ႇဢေႃႈ။-

17ၵွပ်ႈႁွႆးၼႆႉ၊ ၽြႃးပဵၼ်ၸဝ်ႈမီးသၽေႃး ဢၼ်ၶႂ်ႈၼႄပျႃးလွင်ႈဢၼ် တၢင်းၵျၢမ်ႇတၢင်းပွင်မၼ်းၸဝ်ႈ ဢမ်ႇၽွၵ်ႈဢမ်ႇပျၢၼ်ႇၶိုၼ်းလႆႈၼၼ်ႉ တီႈၶဝ်ၸိူဝ်းဢၼ် လႆႈၶၢမ်ႇဢမူၺ်ႇၵတီႉၸဝ်ႈၼၼ်ႉ ဢမၢၼ်ႇၶၼ်ပဵၼ်သေယဝ်ႉ၊ ဢဝ်တင်းတၢင်းဢၼ်တိူင်ႇ ဢၼ်ဝႃႈၼၼ်ႉႁပ်ႉတုင်းဢဝ်ဢေႃႈ။-

18လွင်ႈမၼ်းၸမ်ႉ လွင်ႈၼင်ႇႁိုဝ်ႁဝ်းၸိူဝ်းဢၼ်ၶုၼ်ႇလႅၼ်ႈၸူး ႁႂ်ႈလႆႈဢိင်ပိုင်ႈ တၢင်းဢၼ်မုင်ႈထႃႈမွင်းထႃႈ ဢၼ်ဝႆႉၵႃႈတီႈၽၢႆႇၼႃႈႁဝ်းၼႆႉ တၵ်းလႆႈတၢင်းဢၼ်သၢၵ်ႈသႃႇဢၼ်ယႂ်ႇၼႃႇ ၵွပ်ႈပိူဝ်ႈလွင်ႈတၢင်းဢၼ်ဢမ်ႇၶၢႆႉပုတ်ႈ ဢမ်ႇၽွၵ်ႈပျၢၼ်ႇသွင်ပႃး ဢၼ်ဝႃႈလွင်ႈတၢင်းဢၼ်ၽြႃးပဵၼ်ၸဝ်ႈ ဢမ်ႇသုင်းမူႉသႃႇလႆႈၼၼ်ႉၸိုင်ၸင်ႇပဵၼ်ဢေႃႈ။-

19တၢင်းဢၼ်မုင်ႈထႃႈမွင်းထႃႈၼၼ်ႉၸမ်ႉ၊ မီးဝႆႉတီႈႁဝ်းမိူၼ်ၸိူဝ်ႉၼင်ႇ ၵျွၵ်ႈသူး ႁူဝ်ၸႂ်ဢၼ်မၼ်ႈၶိူင်ႇလႄႈ တႄႇယူႇ ဢၼ်ၶျႃးဝႆႉ ၵႃႈၼႂ်းၽႃႈၵင်ႈၼၼ်ႉဢေႃႈ။-

20ယေႇသူႉ ဢၼ်ပဵၼ်ၶုၼ်ယိတ်ႈပရေႃးႁဵၵ်ႈ ထႃႇဝရႃႉၸွမ်းၼင်ႇဢရႃႇ မေႇလၶီႉၸေႇတႅၵ်ႈ ၼၼ်ႉ ပဵၼ်ၵေႃႉဢၼ်ဢွၼ်ႁူဝ်ပုၼ်ႈႁဝ်းလႄႈ ၶဝ်ႈၸူးတီႈၵႃႈၼႂ်းပုၼ်ႉဢေႃႈ။

← Chapter 5 Jump to: Chapter 7 →