John 11 — Shan

1ၵူၼ်းဢၼ်လႆႈၸိုဝ်ႈ လႃႇၸရူႉ ဢၼ်ပဵၼ်ၵူၼ်းဝၢၼ်ႈ ပေႇထၼီႉ တီႈဢၼ် မႃႇထႃႉ တင်းၼွင်ႉယိင်းမၼ်း မႃႇရီႉ ယူႇၼၼ်ႉၵေႃႉၼိုင်ႈ မီးတၢင်းၶႆႈတၢင်းပဵၼ်ယူႇဢေႃႈ။-

2မႃႇရီႉ ၼွင်ႉယိင်း လႃႇၸရူႉ ဢၼ်မီးတၢင်းၶႆႈတၢင်းပဵၼ်ယူႇၼၼ်ႉၸမ်ႉ၊ ပဵၼ် မႃႇရီႉ ဢၼ်ဢဝ်တင်းၼမ်ႉမၼ်းႁွမ်တႃးၸဝ်ႈၽြႃးလႄႈ သမ်ႉဢဝ်တင်းၶူၼ်ႁူဝ်မၼ်းၸဵတ်ႉတိၼ်မၼ်းၸဝ်ႈၼၼ်ႉဢေႃႈ။-

3မႄႈယိင်းသွင်ၵေႃႉပီႈၼွင်ႉၼၼ်ႉ ပွႆႇၸႂ်ႉၵူၼ်းၵႂႃႇၵႃႈတီႈမၼ်းၸဝ်ႈလႄႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၵေႃႉဢၼ်ၸဝ်ႈႁဝ်းႁၵ်ႉၼၼ်ႉ မီးတၢင်းၶႆႈတၢင်းပဵၼ်ယူႇၶႃႈဢေႃႈ၊ ဝႃႈၼင်ႇၼႆဢေႃႈ။-

4ယေႇသူႉ ငိၼ်းၵႂၢမ်းၼၼ်ႉသေယဝ်ႉ၊ လၢတ်ႈလႄႈဝႃႈ၊ တၢင်းၶႆႈတၢင်းပဵၼ်ၼၼ်ႉ ဢမ်ႇၸႂ်ႈတၢင်းၶႆႈတၢင်းပဵၼ်ဢၼ်တၢႆ။ ပဵၼ်တၢင်းၶႆႈတၢင်းပဵၼ်ဢၼ်ႁႂ်ႈမုၼ်ၽုင်းၽြႃးပဵၼ်ၸဝ်ႈထၢင်ႇသႃးမႃးၼၼ်ႉၵူၺ်းဢေႃႈ။ ၵွပ်ႈပိူဝ်ႈတၢင်းၶႆႈတၢင်းပဵၼ်ၼၼ်ႉလႄႈ လုၵ်ႈၽြႃးပဵၼ်ၸဝ်ႈတၵ်းမီးတၢင်းဢၼ်မုၼ်ၽုင်းၸဝ်ႈထၢင်ႇသႃးမႃးဢေႃႈ၊ ဝႃႈၼင်ႇၼႆဢေႃႈ။-

5ယေႇသူႉ ႁၵ်ႉ မႃႇထႃႉ ဢိၵ်ႇတင်းၼွင်ႉယိင်းမၼ်း တင်း လႃႇၸရူႉ ၸိူဝ်းၼၼ်ႉဢေႃႈ။-

6မိူဝ်ႈဢၼ်မၼ်းၸဝ်ႈငိၼ်းလွင်ႈဢၼ် လႃႇၸရူႉ ပဵၼ်ယူႇၼၼ်ႉၸိုင် မၼ်းၸဝ်ႈယင်းဢမ်ႇမႃးလႄႈယူႇၵႃႈတီႈၼၼ်ႈသွင်ဝၼ်းဢေႃႈ။-

7လိုၼ်းၼၼ်ႉ မၼ်းၸဝ်ႈသမ်ႉလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊ ၵႂႃႇၵႃႈတီႈမိူင်း ယူႉတႃႉ ပုၼ်ႉတႃႉႁဝ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

8တပႄးၸဝ်ႈၸိူဝ်းၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၵူၼ်း ယူႉတႃႉ တင်းလၢႆ ၸၢင်ႈတၵ်းၵျၢမ်ႇႁႃႁႂ်ႈလႆႈဢဝ်မၢၵ်ႇႁိၼ်ထိမ်ႈၸဝ်ႈႁဝ်းယဝ်ႉလႄႈ ၸဝ်ႈႁဝ်းတၵ်းၵႂႃႇၵႃႈတီႈပုၼ်ႉထႅင်ႈလူးၵွၼ်ႇၶႃႈႁိုဝ်၊ ဝႃႈၼင်ႇၼႆဢေႃႈ။-

9ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ၼႂ်းဝၼ်းၼိုင်ႈမီးသိပ်းသွင်ၼႃႇရီႇဢမ်ႇၸႂ်ႈႁိုဝ်။ ပေႃးၵူၼ်းၵႂႃႇမႃးၼႂ်းၶိင်ႇၵၢင်ဝၼ်းၸိုင်၊ ပိူဝ်ႈဢၼ်လႆႈႁၼ်ဢရွင်ႇဢၼ်လႅင်းၵၢင်ဝၼ်းယူႇလႄႈ ဢမ်ႇၸၢင်ႈတိူဝ်ႉမႅၼ်ႈလႄႈလူမ်ႉ။-

10ပေႃးၵႂႃႇမႃးၼႂ်းၶိင်ႇၵၢင်ၶိုၼ်းၸမ်ႉ၊ ပိူဝ်ႈဢၼ်ဢၼ်လႅင်းဢမ်ႇမီးလႄႈ ၸၢင်ႈတိူဝ်ႉမႅၼ်ႈလႄႈလူမ်ႉဢေႃႈ၊ ဝႃႈၼင်ႇၼႆယဝ်ႉ၊-

11သမ်ႉလၢတ်ႈထႅင်ႈလႄႈဝႃႈ၊ ၵေႃႉသေႈႁဝ်း လႃႇၸရူႉ ၼၼ်ႉ ၼွၼ်းလပ်းယူႇဢေႃႈ။ ၵဝ်တၵ်းၵႂႃႇႁႂ်ႈလႆႈပူၵ်းမၼ်းတိုၼ်ႇဢေႃႈ၊ ဝႃႈၼင်ႇၼႆဢေႃႈ။-

12တပႄးၸဝ်ႈၸိူဝ်းၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ပေႃးမၼ်းၼွၼ်းလပ်းယူႇၸိုင်၊ မၼ်းတၵ်းလႆႈတၢင်းဢၼ်သၢၵ်ႈသႃႇၶႃႈဢေႃႈ၊ ဝႃႈၼင်ႇၼႆဢေႃႈ။-

13ပိၵ်ႉသမ်ႉ ယေႇသူႉ ဢဝ်လွင်ႈဢၼ်မၼ်းတၢႆၼၼ်ႉလႄႈ ဝႃႈသေၵေႃႈ၊ တပႄးၸဝ်ႈၸိူဝ်းၼၼ်ႉ ထၢင်ႇမၼ်းၸဝ်ႈလၢတ်ႈပၼ် လွင်ႈဢၼ်မၼ်းၼွၼ်းလပ်းယူႇၵူၺ်းၼၼ်ႉဢေႃႈ။-

14ပိူဝ်ႈၼႆလႄႈ ယေႇသူႉ ၵေႃႈလၢတ်ႈလႅင်းလႅင်းလႄႈဝႃႈ၊ လႃႇၸရူႉ တၢႆယဝ်ႉ။-

15လွင်ႈၼင်ႇႁိုဝ်သူတၵ်းလႆႈယုမ်ႇမၢတ်ႈၸိုင်၊ ၵဝ်မီးတၢင်းဢၼ်သိူဝ်းပျေႃႇၵွပ်ႈပိူဝ်ႈသူ ၼႂ်းလွင်ႈဢၼ်ၵဝ်ဢမ်ႇမီးၵႃႈတီႈၼၼ်ႈ ၼၼ်ႉဢေႃႈ။ တေႃႈလဵဝ်ၼႆႉၵႂႃႇၵႃႈတီႈမၼ်းၼၼ်ႉတႃႉႁဝ်း၊ ဝႃႈၼင်ႇၼႆဢေႃႈ။-

16ထူဝ်းမႃႉ ဢၼ်လႆႈၸိုဝ်ႈ တီႉတူႉမူႉ ၵေႃႈ လၢတ်ႈတီႈတပႄးၸဝ်ႈၼင်ႇၵၼ်ၸိူဝ်းၼၼ်ႉလႄႈဝႃႈ၊ ႁဝ်းၶႃႈၵေႃႈၸွမ်းၵႂႃႇလႄႈ ၶၢမ်ႇတၢႆလူၺ်ႈၵၼ်တင်းမၼ်းၸဝ်ႈတႃႉႁဝ်း၊ ဝႃႈၼင်ႇၼႆဢေႃႈ။

17ယေႇသူႉ ႁွတ်ႈထိုင်သေယဝ်ႉ၊ ထူပ်းႁၼ်လွင်ႈဢၼ်သၢင်းၵျူဝ်ႇမၼ်းလႄႈ ႁွတ်ႈထိုင်ၵႃႈၼႂ်းၶုမ်သၢင်းၶႅင်း လႆႈသီႇဝၼ်းယဝ်ႉၼၼ်ႉဢေႃႈ။-

18ဝၢၼ်ႈ ပေႇထၼီႉ ၼၼ်ႉ ၵႆၵၼ်တင်း ဝဵင်း ယေႇရူႉသလႅမ်ႇ သေလၵ်းၼိုင်ႈၵူၺ်းလႄႈ၊-

19ၵူၼ်း ယူႉတႃႉ ၼမ်ၼႃႇမႃး ႁႂ်ႈ မႃႇထႃႉ တင်း မႃႇရီႉ လႆႈပေႇၸႂ်ၼိမ်ၸႂ်ၼႂ်းလွင်ႈဢၼ် ပီႈၸၢႆးၶဝ်တၢႆၼၼ်ႉဢေႃႈ။

20မိူဝ်ႈဢၼ် မႃႇထႃႉ ငိၼ်းလွင်ႈဢၼ် ယေႇသူႉ မႃးၼၼ်ႉၸိုင် မၼ်းၵႂႃႇႁႂ်ႈလႆႈႁပ်ႉႁူဝ်တၢင်းမၼ်းၸဝ်ႈဢေႃႈ။ မႃႇရီႉ ၸမ်ႉ၊ ၼင်ႈၵိုတ်းယူႇၵႃႈၼႂ်းႁိူၼ်းဢေႃႈ။-

21မႃႇထႃႉ ၵေႃႈလဝ်ႊလၢတ်ႈတီႈ ယေႇသူႉ လႄႈဝႃႈ၊ ၸဝ်ႈႁဝ်း၊ သင်ၸဝ်ႈႁဝ်းလႆႈမီးယူႇၵႃႈတီႈၼႆႈၸိုင်၊ ပီႈၸၢႆးၵဝ်ၶႃႈဢမ်ႇလႆႈတၢႆၶႃႈ။

22ၵူၺ်းၵႃႈ တေႃႈလဵဝ်ၼႆႉသေၵေႃႈ ၶႃႈၸဝ်ႈႁူႉလွင်ႈဢၼ်ၽြႃးပဵၼ်ၸဝ်ႈ တၵ်းပၼ်ၵႃႈၼင်ႇဢၼ်ၸဝ်ႈႁဝ်းသူးတွင်း တီႈၽြႃးပဵၼ်ၸဝ်ႈၼၼ်ႉယူႇၶႃႈဢေႃႈ၊ ဝႃႈၼင်ႇၼႆဢေႃႈ။-

23ယေႇသူႉ ၵေႃႈလၢတ်ႈလႄႈဝႃႈ၊ ပီႈၸၢႆးမႂ်းၼၼ်ႉတၵ်းလုၵ်ႉၶိုၼ်းဢေႃႈ၊ ဝႃႈၼင်ႇၼႆဢေႃႈ။-

24မႃႇထႃႉ ၵေႃႈလဝ်ႊလၢတ်ႈလႄႈဝႃႈ၊ ၶႃႈၸဝ်ႈႁူႉလွင်ႈဢၼ်မၼ်း တၵ်းလုၵ်ႉၶိုၼ်းၼႂ်းဝၼ်းဢၼ်သုတ်းဢၼ်ၵွႆ ဢၼ်ဝႃႈ ၶိင်ႇၵႃႇလႃႉဢၼ်လုၵ်ႉၶိုၼ်းၼၼ်ႉယူႇၶႃႈဢေႃႈ၊ ဝႃႈၼင်ႇၼႆဢေႃႈ။-

25ယေႇသူႉ ၵေႃႈလၢတ်ႈလႄႈဝႃႈ၊ ၵဝ်ပဵၼ်လွင်ႈတၢင်းဢၼ်လုၵ်ႉၶိုၼ်းဢိၵ်ႇတင်း လွင်ႈတၢင်းဢၼ်ဢသၢၵ်ႈလိပ်းဢေႃႈ။ ၵေႃႉဢၼ်ယုမ်ႇမၢတ်ႈၵဝ်ၼၼ်ႉ ပိၵ်ႉသမ်ႉတၢႆၵႂႃႇယဝ်ႉသေၵေႃႈ၊ တၵ်းလိပ်းဢေႃႈ။-

26ၶဝ်ၸိူဝ်းဢၼ်ဢသၢၵ်ႈလိပ်းလႄႈ ယုမ်ႇမၢတ်ႈၵဝ်ၵႃႈမီးတင်းသဵင်ႈတင်းလူင်ၼၼ်ႉၵေႃႈ တၵ်းၵၢင်းလွတ်ႈတင်းတၢင်းတၢႆယူႇတႃႇသေႇဢမ်ႇထၢတ်ႇဢေႃႈ။ ယုမ်ႇၵႂၢမ်းၵဝ်ၼႆႉႁိုဝ်ဝႃႈၼႆ၊ မိူဝ်ႈဢၼ်မၼ်းၸဝ်ႈထၢမ်ၼၼ်ႉၸိုင်၊ မၼ်းၵေႃႈလဝ်ႊလၢတ်ႈလႄႈဝႃႈ၊ ၸႂ်ႈၶႃႈယဝ်ႉၸဝ်ႈ။-

27ၶႃႈၸဝ်ႈယုမ်ႇလွင်ႈဢၼ်ၸဝ်ႈႁဝ်းပဵၼ်ၸဝ်ႈၶရိၸ်ႈ လုၵ်ႈၽြႃးပဵၼ်ၸဝ်ႈ ဢၼ်မႃးၼႂ်းလေႃးၵႃႉၼႆႉၼၼ်ႉယဝ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။

28မၼ်းလဝ်ႊလၢတ်ႈၸိူဝ်ႉၼင်ႇၼႆယဝ်ႉၸင်ႇ ၵႂႃႇလႄႈႁွင်ႉဢဝ်ၼွင်ႉယိင်းမၼ်း မႃႇရီႉ တဵတ်ႇတဵတ်ႇလႄႈလၢတ်ႈဝႃႈ၊ သြႃႇၸဝ်ႈႁွတ်ႈမႃးယဝ်ႉ။ မၼ်းၸဝ်ႈႁွင်ႉမႂ်းဢေႃႈ၊ ဝႃႈၼင်ႇၼႆဢေႃႈ။-

29မႃႇရီႉ ငိၼ်းၵႂၢမ်းၼၼ်ႉသေယဝ်ႉ၊ လုၵ်ႉၶၼ်ၶၼ်ၽႂ်းၽႂ်းလႄႈ ၵႂႃႇၸူးၵႃႈတီႈမၼ်းၸဝ်ႈဢေႃႈ။

30မိူဝ်ႈၼၼ်ႉ ယေႇသူႉ ဢမ်ႇပႆႇၶဝ်ႈၵႃႈၼႂ်းဝၢၼ်ႈလႄႈ မီးယူႇၵႃႈတီႈဢၼ် မႃႇထႃႉ မႃးႁပ်ႉႁူဝ်တၢင်းမၼ်းၸဝ်ႈၼၼ်ႉဢေႃႈ။-

31ပိူဝ်ႈၼႆလႄႈ ၵူၼ်း ယူႉတႃႉ ဢၼ်မီးယူႇလူၺ်ႈၵၼ်တင်း မႃႇရီႉ ၵႃႈၼႂ်းႁိူၼ်းလႄႈလၢတ်ႈၵႂၢမ်း ဢၼ်ႁႂ်ႈပေႇၸႂ်ၼိမ်ၸႂ်ယူႇၸိူဝ်းၼၼ်ႉ လႆႈႁၼ် မႃႇရီႉ လုၵ်ႉၶၼ်ၶၼ်ၽႂ်းၽႂ်းလႄႈဢွၵ်ႇၵႂႃႇၼၼ်ႉသေယဝ်ႉ၊ ၸွမ်းပႃႈလင်မၼ်းၵႂႃႇသေလႄႈ ထၢင်ႇမၼ်းၵႂႃႇၵႃႈတီႈသၢင်းၶႅင်းႁႂ်ႈလႆႈႁွင်ႉႁႆႈၵႃႈတီႈၼၼ်ႈဢေႃႈ။-

32မႃႇရီႉ ၼၼ်ႉႁွတ်ႈထိုင်ၵႃႈတီႈ ဢၼ် ယေႇသူႉ မီးၼၼ်ႉလႄႈ ႁၼ်မၼ်းၸဝ်ႈသေယဝ်ႉ၊ ၶုပ်ႉမူပ်ႇႁိမ်းတိၼ်မၼ်းၸဝ်ႈသေလႄႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ သင်ၸဝ်ႈႁဝ်းလႆႈမီးယူႇၵႃႈတီႈၼႆႈၸိုင်၊ ပီႈၸၢႆးၶႃႈၸဝ်ႈဢမ်ႇလႆႈတၢႆၶႃႈ၊ ဝႃႈၼင်ႇၼႆဢေႃႈ။

33မိူဝ်ႈဢၼ် ယေႇသူႉ ႁၼ် မႃႇရီႉ ဢိၵ်ႇတင်း ၵူၼ်း ယူႉတႃႉ ဢၼ်ၸွမ်းလူၺ်ႈၵၼ်တင်းမၼ်းမႃးၸိူဝ်းၼၼ်ႉ ႁွင်ႉႁႆႈယူႇၼၼ်ႉၸိုင် မၼ်းၸဝ်ႈၸႂ်လဵၵ်ႉၸႂ်ဢူၼ်ႈၼႃႇလူင်လၢင်သေလႄႈ မီးတၢင်းဢၼ်မႆႈၸႂ်ၶီၸႂ်လႄႈထၢမ်ဝႃႈ၊-

34သူဢဝ်တူဝ်တၢႆမၼ်းဝႆႉၵႃႈတီႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ မႃးလႄႈတူၺ်းသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

35ယေႇသူႉ ၵေႃႈၼမ်ႉတႃတူၵ်းယူႇဢေႃႈ။

36ပိူဝ်ႈၼႆလႄႈ ၵူၼ်း ယူႉတႃႉ ၸိူဝ်းၼၼ်ႉၵေႃႈလၢတ်ႈလႄႈဝႃႈ၊ တူၺ်းလူး၊ မၼ်းၸဝ်ႈႁၵ်ႉ လႃႇၸရူႉ ၼႃႇလူင်လၢင်ဢေႃႈ၊ ဝႃႈၼင်ႇၼႆဢေႃႈ။-

37ၵမ်ႈၽွင်ႈၵေႃႈဝႃႈ၊ ၵေႃႉဢၼ်ၽုၺ်ႇမၢၵ်ႇတႃၵူၼ်းတႃမွတ်ႇၼၼ်ႉၼႆႉ၊ ၼင်ႇႁိုဝ် လႃႇၸရူႉ တၵ်းဢမ်ႇတၢႆၸိုင်၊ ဢမ်ႇတၢတ်ႈၼိူင်ႇလႆႈႁိုဝ်၊ ဝႃႈၼင်ႇၼႆဢေႃႈ။

38ပိူဝ်ႈၼႆလႄႈ ယေႇသူႉ သမ်ႉၸႂ်လဵၵ်ႉၸႂ်ဢူၼ်ႈၼႃႇလူင်လၢင်လႄႈ ႁွတ်ႈထိုင်ၵႃႈတီႈၶုမ်သၢင်းၶႅင်းဢေႃႈ။ ၶုမ်သၢင်းၶႅင်းၼၼ်ႉပဵၼ်ႁူးထမ်ႈလႄႈ ဢဝ်မၢၵ်ႇႁိၼ်ဢိုတ်းဝႆႉဢေႃႈ။-

39ယေႇသူႉ ၵေႃႈလၢတ်ႈလႄႈဝႃႈ၊ ၶၢႆႉမၢၵ်ႇႁိၼ်ၼၼ်ႉပႅတ်ႈတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊ မႃႇထႃႉ ၼွင်ႉယိင်းၵေႃႉဢၼ်တၢႆၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ တေႃႈလဵဝ်ၼႆႉမၼ်းတၵ်းမဵၼ်တူႇၶႃႈဢေႃႈ။ လႆႈသီႇဝၼ်းယဝ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။-

40ယေႇသူႉ ၵေႃႈလၢတ်ႈလႄႈဝႃႈ၊ ၵဝ်လၢတ်ႈဝႆႉလႄႈဝႃႈ၊ ပေႃးမႂ်းယုမ်ႇၸိုင်၊ မႂ်းတၵ်းလႆႈႁၼ်မုၼ်ၽုင်းဢႃႇၼူႉၽေႃႇၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆယဝ်ႉဢမ်ႇၸႂ်ႈႁိုဝ်၊ ဝႃႈၼင်ႇၼႆဢေႃႈ။

41မိူဝ်ႈၼၼ်ႉ ၶဝ်ၶၢႆႉမၢၵ်ႇႁိၼ်ၵႃႈတီႈၶုမ်သၢင်းၶႅင်းၼၼ်ႉဢေႃႈ။ ယေႇသူႉ ၵေႃႈႁႅၼ်တူၺ်းၵႃႈၼိူဝ်သေလႄႈဝႃႈ၊ ပေႃႈၸဝ်ႈတီႈၶႃႈ၊ ၵျေးၸူးၸဝ်ႈႁဝ်းဢၼ် ထွမ်ႇဢဝ်ၵႂၢမ်းၵဝ်ၶႃႈၼၼ်ႉ ယႂ်ႇၼႃႇတီႈၶႃႈဢေႃႈ။-

42ၵဝ်ၶႃႈႁူႉလွင်ႈဢၼ် ၸဝ်ႈႁဝ်းထွမ်ႇဢဝ်ၵႂၢမ်းၵဝ်ၶႃႈတႃႇသေႇဢမ်ႇထၢတ်ႇၼၼ်ႉ ယူႇတီႈၶႃႈဢေႃႈ။ ၼႂ်းဝႃႈၼၼ်သေၵေႃႈ ၼင်ႇႁိုဝ်ၵူၼ်းတင်းသဵင်ႈတင်းလူင် ဢၼ်လွမ်ႉႁွပ်ႈယူႇၸိူဝ်းၼႆႉ တၵ်းယုမ်ႇမၢတ်ႈလွင်ႈဢၼ် ၸဝ်ႈႁဝ်းပွႆႇၸႂ်ႉၵဝ်ၶႃႈမႃးၼၼ်ႉၸိုင်၊ ၵဝ်ၶႃႈထွၵ်ႈလူၺ်ႈဢၵျူဝ်းၶဝ်လႄႈ လဝ်ႊလၢတ်ႈၸိူဝ်ႉၼင်ႇၼႆတီႈၶႃႈဢေႃႈ၊ ဝႃႈၼင်ႇၼႆယဝ်ႉ၊-

43ၸင်ႇႁဵတ်းတင်းသဵင်ဢၼ်ယႂ်ႇၼႃႇႁွင်ႉလႄႈဝႃႈ၊ လႃႇၸရူႉ ဢိူၺ်း၊ ဢွၵ်ႇမႃးတႃႉ၊ ဝႃႈၼင်ႇၼႆဢေႃႈ။-

44မိူဝ်ႈၼၼ်ႉ ၵေႃႉဢၼ်တၢႆယဝ်ႉၼၼ်ႉ၊ ၵႃႈတီႈတိၼ်တင်းမိုဝ်းမၼ်းမီးတင်းၽႃႈဝဵၼ်းႁေႃႇဝႆႉယူႇ၊ ၵႃႈတီႈၼႃႈမၼ်းၵေႃႈ မီးတင်းၽႃႈၸဵတ်ႉမတ်ႉဝႆႉယူႇသေလႄႈ ဢွၵ်ႇမႃးဢေႃႈ။ ယေႇသူႉ ၵေႃႈလၢတ်ႈလႄႈဝႃႈ၊ ၵႄႈမၼ်းသေလႄႈပွႆႇတႃႉ၊ ဝႃႈၼင်ႇၼႆဢေႃႈ။

45မိူဝ်ႈၼၼ်ႉ ၵူၼ်း ယူႉတႃႉ ဢၼ်မႃးၵႃႈတီႈ မႃႇရီႉ လႄႈ လႆႈႁၼ်လွင်ႈတၢင်းဢၼ်မၼ်းၸဝ်ႈႁဵတ်းၼၼ်ႉ ၼမ်ၼႃႇၸိူဝ်းၼၼ်ႉယုမ်ႇမၢတ်ႈမၼ်းၸဝ်ႈဢေႃႈ။-

46ၵမ်ႈၽွင်ႈၸမ်ႉ၊ ၵႂႃႇၵႃႈတီႈ ၽႃႇရီႉသႄး တင်းလၢႆလႄႈ လၢတ်ႈပၼ်လွင်ႈတၢင်းဢၼ် ယေႇသူႉ ႁဵတ်းၸိူဝ်းၼၼ်ႉဢေႃႈ။-

47မိူဝ်ႈၼၼ်ႉ ယိတ်ႈပရေႃးႁဵၵ်ႈလူင် ဢိၵ်ႇတင်း ၽႃႇရီႉသႄး ၸိူဝ်းၼၼ်ႉ ႁႂ်ႈၶုၼ်တီႈလုမ်းလူင်တင်းလၢႆၸူႉၵၼ်တုမ်ၵၼ်သေယဝ်ႉ၊ လၢတ်ႈလႄႈဝႃႈ၊ ႁဝ်းႁဵတ်းၸိူဝ်ႉၼင်ႇႁိုဝ်ယူႇ။ ၵေႃႉၼၼ်ႉၼႄပျႃးၼီႉမိၵ်ႈလၢၵ်ႈၶၼႃႇၼမ်ၼႃႇဢေႃႈ။-

48ပေႃးပွႆႇမၼ်းဝႆႉၸိူဝ်ႉၼင်ႇၼႆၸိုင်၊ ၵူၼ်းတင်းသဵင်ႈတင်းလူင်တၵ်းယုမ်ႇမၼ်းဢေႃႈ။ ၵူၼ်း ရူဝ်းမႃႉ တင်းလၢႆၵေႃႈ တၵ်းမႃးလႄႈ ယႃႉၽဵဝ်ႈပႅတ်ႈတီႈထႃႇၼႃႉႁဝ်း၊ ဢိၵ်ႇတင်းမဵဝ်းႁဝ်းၼႆႉဢေႃႈ၊ ဝႃႈၼင်ႇၼႆဢေႃႈ။-

49ဢၼ်ၶဝ်ႈပႃးၼႂ်းၶဝ်ၼၼ်ႉ ဢၼ်လႆႈၸိုဝ်ႈ ၵႃႇယၽႃႉ ၊ ဢၼ်ပဵၼ်ၶုၼ်ယိတ်ႈပရေႃးႁဵၵ်ႈ ၼႂ်းပီႊၼၼ်ႉၵေႃႉၼိုင်ႈၵေႃႈလၢတ်ႈလႄႈဝႃႈ၊ သူၼႆႉဢမ်ႇႁူႉၵႃႈသင်လႃးလႃး။-

50သူဢမ်ႇၶႆႈၸႂ်ဝူၼ်ႉၸႂ်လူၺ်ႈလွင်ႈ ဢၼ်ၵူၼ်းၵေႃႉၼိုင်ႈတၢႆပုၼ်ႈၵူၼ်းတင်းလၢႆ ယဵင်ႈၶႅၼ်းလီၼႃႇသေမဵဝ်းၵူၼ်း ယူႉတႃႉ လူႉလႅဝ်ပႅတ်ႈတင်းသဵင်ႈတင်းလူင်ၼၼ်ႉ တီႈႁဝ်းလူင်ပႄႇ၊ ဝႃႈၼင်ႇၼႆဢေႃႈ။-

51ၵႂၢမ်းၼၼ်ႉၸိုင်မၼ်းလၢတ်ႈဝႃႈၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ။ မၼ်းပဵၼ်ၶုၼ်ယိတ်ႈပရေႃးႁဵၵ်ႈၼႂ်းပီႊၼၼ်ႉယူႇလႄႈ ပႃးတင်းၺၢၼ်ႇပရေႃးၽႅတ်ႈ ႁေႃးလၢတ်ႈလွင်ႈဢၼ် ယေႇသူႉ တၵ်းလႆႈတၢႆပုၼ်ႈၵူၼ်းမဵဝ်းၼၼ်ႉ၊-

52ဢိၵ်ႇတင်းလွင်ႈဢၼ် တၵ်းလႆႈတၢႆပုၼ်ႈၵူၼ်းမဵဝ်းၼၼ်ႉၵူၺ်းဢမ်ႇၵႃး တၵ်းလႆႈတၢႆ ႁႂ်ႈလုၵ်ႈၽြႃးပဵၼ်ၸဝ်ႈ ဢၼ်ၽၢတ်ႇၽႄၵၼ် မီးယူႇၵူႈတီႈၵူႈလႅၼ်ၸိူဝ်းၼၼ်ႉ လႆႈၸူႉတုမ်လူၺ်ႈၵၼ်ၼၼ်ႉဢေႃႈ။

53ၸႃႉၸဵမ်ဝၼ်းၼၼ်ႉလႄႈ ၶဝ်တိူင်ႇပၢင်ႇၵၼ် ၵျၢမ်ႇႁႃႁႂ်ႈလႆႈဢဝ်ဢသၢၵ်ႈမၼ်းၸဝ်ႈတၢႆယူႇဢေႃႈ။-

54ပိူဝ်ႈၼႆလႄႈ၊လိုၼ်းၼၼ်ႉ ယေႇသူႉ ဢမ်ႇလႄႇလဵပ်ႈထၢင်ႇထၢင်ႇသႃးသႃး ၵႃႈၼႂ်းၵူၼ်း ယူႉတႃႉ တင်းလၢႆလႄႈ ဢွၵ်ႇသေၵႃႈတီႈၼၼ်ႈၵႂႃႇၵႃႈတီႈဢၼ် ၸမ်ၵၼ်တင်းထိူၼ်ႇ၊ ၵႃႈတီႈဝဵင်းဢၼ်လႆႈၸိုဝ်ႈ ဢေႇၽရိမ်ႇ ၼၼ်ႉလႄႈ၊ ယူႇလူၺ်ႈၵၼ်တင်းတပႄးၸဝ်ႈတင်းလၢႆဢေႃႈ။

55မိူဝ်ႈၼၼ်ႉပွႆး ပႃႉသၶႃႇ ၵူၼ်း ယူႉတႃႉ ၸမ်တၵ်းပဵၼ်လႄႈ၊ ၵူၼ်းၼမ်ၼႃႇ၊ ၼင်ႇႁိုဝ် တၵ်းလႆႈႁႂ်ႈတူဝ်ၸဝ်ႈၵဝ်ႇမူတ်းသႂ်ၸိုင်၊ ဢွၼ်ၵၼ်လုၵ်ႉသေၵႃႈတီႈဝၢၼ်ႈၼွၵ်ႈၼႃးပၢင်ႇ မႃးၵႃႈတီႈဝဵင်း ယေႇရူႉသလႅမ်ႇ ၸူဝ်ႈဢၼ်ဢမ်ႇပႆႇၶၢမ်ႇပွႆးၼၼ်ႉဢေႃႈ။-

56ၶဝ်ၼၼ်ႉႁႃ ယေႇသူႉ လႄႈ ၸုၵ်းၵႃႈၼႂ်းပိၵ်ႈမၢၼ်ႇၸဝ်ႈယူႇသေလႄႈ ၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်ၵၼ်လႄႈဝႃႈ၊ သူထၢင်ႇၸိူဝ်ႉၼင်ႇႁိုဝ်။ မၼ်းၼၼ်ႉ ဢမ်ႇမႃးၵႃႈတီႈပွႆးၼႆႉႁိုဝ်၊ ဝႃႈၼင်ႇၼႆဢေႃႈ။-

57မိူဝ်ႈၼၼ်ႉ ယိတ်ႈပရေႃးႁဵၵ်ႈလူင်ဢိၵ်ႇတင်း ၽႃႇရီႉသႄး ၸိူဝ်းၼၼ်ႉ သင်ႇလၢတ်ႈလွင်ႈဢၼ် ပေႃးၽူႈလႂ်ႁူႉတီႈဢၼ်မၼ်းၸဝ်ႈမီးၸိုင် တၵ်းလႆႈၸီႉၼႄႁႂ်ႈၶဝ်လႆႈတီႉဢဝ်မၼ်းၸဝ်ႈၼၼ်ႉ၊ ဝႃႈၼင်ႇၼႆဝႆႉယဝ်ႉ။