John 14

Shan

← Chapter 13 Jump to: Chapter 15 →

1ယေႇသူႉ သမ်ႉလၢတ်ႈလႄႈဝႃႈ၊ ယႃႇႁႂ်ႈႁူဝ်ၸႂ်သူမီးတၢင်းဢၼ်မႆႈၸႂ်ၶီၸႂ်။ ယုမ်ႇမၢတ်ႈၽြႃးပဵၼ်ၸဝ်ႈတႃႉ။ ၵဝ်ၼႆႉၵေႃႈယုမ်ႇမၢတ်ႈတႃႉ။-

2ၼႂ်းႁိူၼ်းၸဝ်ႈပေႃႈၵဝ်ၼၼ်ႉ မီးလုၵ်းပုၼ်ႈဢၼ်တၵ်းယူႇၼမ်ၼႃႇဢေႃႈ။ ပေႃးဢမ်ႇပဵၼ်ၸိူဝ်ႉၼင်ႇၼၼ်ၸိုင်၊ ၵဝ်ယင်းဢမ်ႇလၢတ်ႈတီႈသူလႄႈ တၵ်းဢမ်ႇယူႇ။ ၵဝ်ၵႂႃႇႁႂ်ႈလႆႈမႄးႁႅၼ်းဝႆႉတီႈဢၼ်သူတၵ်းယူႇၼၼ်ႉဢေႃႈ။-

3ပေႃးၵဝ်ၵႂႃႇလႄႈ မႄးႁႅၼ်းဝႆႉတီႈဢၼ်သူတၵ်းယူႇၸိုင်၊ ၵဝ်တၵ်းသမ်ႉၶိုၼ်းမႃးထႅင်ႈလႄႈ သိမ်းဢဝ်သူၵႂႃႇၵႃႈတီႈၵဝ်ပုၼ်ႉႁႂ်ႈသူလႆႈမီးၵႃႈတီႈဢၼ်ၵဝ်မီးၼၼ်ႉဢေႃႈ။-

4ၵဝ်ၵႂႃႇၵႃႈတီႈပုၼ်ႉဝႃႈၼႆသူႁူႉသဵၼ်ႈတၢင်းၼၼ်ႉယူႇဢေႃႈ၊ ဝႃႈၼင်ႇၼႆဢေႃႈ။

5ထူဝ်းမႃႉ ၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ပိူဝ်ႈဢၼ်ႁဝ်းၶႃႈဢမ်ႇႁူႉလွင်ႈဢၼ် ၸဝ်ႈႁဝ်းတၵ်းၵႂႃႇၵႃႈတီႈလႂ်ပုၼ်ႉလႄႈ၊ ႁဵတ်းၸိူဝ်ႉၼင်ႇႁိုဝ်လႄႈ တၵ်းႁူႉသဵၼ်ႈတၢင်းၼၼ်ႉလႆႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

6ယေႇသူႉ ၵေႃႈလၢတ်ႈလႄႈဝႃႈ၊ ၵဝ်ၼႆႉပဵၼ်သဵၼ်ႈတၢင်းဢေႃႈ။ သမ်ႇမႃႇတြႃးၵေႃႈပဵၼ်ဢေႃႈ။ ဢသၢၵ်ႈၵေႃႈပဵၼ်ဢေႃႈ။ ပေႃးဢမ်ႇဢိင်ပိုင်ႈၵဝ်ၸိုင်၊ ၽူႈလႂ်သေၵေႃႉသေၵူၼ်း ဢမ်ႇႁွတ်ႈထိုင်ၵႃႈတီႈၸဝ်ႈပေႃႈၵဝ်ၼၼ်ႉလႆႈ။-

7ပေႃးသူႁူႉၵဝ်ၸိုင်၊ သူယင်းဢမ်ႇႁူႉၸဝ်ႈပေႃႈၵဝ်လႄႈတၵ်းဢမ်ႇလႆႈယူႇ။ ၸႃႉၸဵမ်တေႃႈလဵဝ်ၼႆႉလႄႈသူ လႆႈႁူႉလႆႈႁၼ်မၼ်းၸဝ်ႈၼၼ်ႉယဝ်ႉ၊ ဝႃႈၼင်ႇၼႆဢေႃႈ။

8ၽီႉလိပ်ႉပူႉ ၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၶႅၼ်းတေႃႈၼႄပျႃးပေႃႈၸဝ်ႈႁဝ်းၼၼ်ႉတီႈႁဝ်းၶႃႈသေၵမ်းၶႃႈ။ ပေႃးၼႄပျႃးၸိူဝ်ႉၼင်ႇၼၼ်ၸိုင်၊ ဢလူဝ်ႇႁဝ်းၶႃႈတၵ်းပျေႉၸုမ်ႇၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

9ယေႇသူႉ ၵေႃႈလၢတ်ႈလႄႈဝႃႈ၊ ၽီႉလိပ်ႉပူႉ ဢိူၺ်း၊ ၵဝ်မီးယူႇလူၺ်ႈၵၼ်တင်းသူ ၶိင်ႇၵႃႇလႃႉႁိုင်ထၢၼ်ႇၼႆႉယဝ်ႉလႄႈ၊ မႂ်းဢမ်ႇပႆႇႁူႉၵဝ်လူးၵွၼ်ႇႁိုဝ်။ ၵေႃႉဢၼ်ႁၼ်ၵဝ်ၼၼ်ႉႁၼ်ပေႃႈၸဝ်ႈဢေႃႈ။ ပေႃးပဵၼ်ၸိူဝ်ႉၼင်ႇၼႆၸိုင်၊ ႁဵတ်းၸိူဝ်ႉၼင်ႇႁိုဝ်လႄႈ မႂ်းလၢတ်ႈလႄႈဝႃႈ၊ ၶႅၼ်းတေႃႈၼႄပျႃးပေႃႈၸဝ်ႈၼၼ်ႉတီႈႁဝ်းၶႃႈသေၵမ်းၶႃႈ၊ ဝႃႈၼင်ႇၼႆၼင်ႇႁိုဝ်။-

10မႂ်းဢမ်ႇယုမ်ႇလွင်ႈဢၼ် ၵဝ်မီးယူႇၼႂ်းပေႃႈၸဝ်ႈ ဢိၵ်ႇတင်းလွင်ႈဢၼ်ပေႃႈၸဝ်ႈမီးယူႇၼႂ်းၵဝ်ၼၼ်ႉႁိုဝ်။ ၵႂၢမ်းဢၼ်ၵဝ်ႁေႃးလၢတ်ႈၼၼ်ႉၸိုင်၊ ၵဝ်ႁေႃးလၢတ်ႈၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ။ လွင်ႈတၢင်းဢၼ်ၵဝ်ႁဵတ်းၸိူဝ်းၼၼ်ႉၸမ်ႉ၊ ပေႃႈၸဝ်ႈဢၼ်တႄႇယူႇၼႂ်းၵဝ်ၼၼ်ႉႁဵတ်းဢေႃႈ။-

11ယုမ်ႇလွင်ႈဢၼ်ၵဝ်မီးယူႇၼႂ်းပေႃႈၸဝ်ႈ ဢိၵ်ႇတင်းလွင်ႈဢၼ် ပေႃႈၸဝ်ႈမီးယူႇၼႂ်းၵဝ်ၼၼ်ႉတႃႉ။ ပေႃးဢမ်ႇယုမ်ႇၵႂၢမ်းၵဝ်ၸိုင်၊ ထွၵ်ႈလူၺ်ႈလွင်ႈတၢင်းဢၼ်ၵဝ်ႁဵတ်းၸိူဝ်းၼၼ်ႉသေလႄႈယုမ်ႇတႃႉ။

12ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်ႉ၊ ၵေႃႉဢၼ်ယုမ်ႇမၢတ်ႈၵဝ်ၼႆႉၼၼ်ႉ တၵ်းႁဵတ်းလွင်ႈတၢင်းဢၼ်ၵဝ်ႁဵတ်းၸိူဝ်းၼၼ်ႉဢေႃႈ။ လွင်ႈတၢင်းဢၼ်ယဵင်ႈၶႅၼ်းယႂ်ႇသေလွင်ႈတၢင်းၸိူဝ်းၼၼ်ႉၵေႃႈမၼ်းတၵ်းႁဵတ်းဢေႃႈ။ လွင်ႈမၼ်းၸမ်ႉ ၵဝ်ၵႂႃႇၵႃႈတီႈပေႃႈၸဝ်ႈပုၼ်ႉသေလႄႈ၊-

13တၵ်းႁဵတ်းၸွမ်းၵႃႈၼင်ႇဢၼ်သူဢိင်ပိုင်ႈၼႃႇမႃႉၸိုဝ်ႈသဵင်ၵဝ်သေလႄႈ သူးတွင်းၵႃႈမီးတင်းသဵင်ႈတင်းလူင်ၼၼ်ႉဢေႃႈ။ လွင်ႈမၼ်းၸမ်ႉ ပေႃႈၸဝ်ႈတၵ်းလႆႈမီးတၢင်းဢၼ်မုၼ်ၽုင်းထၢင်ႇသႃးမႃး ၵွပ်ႈပိူဝ်ႈလုၵ်ႈၸဝ်ႈဢေႃႈ။-

14ပေႃးသူဢိင်ပိုင်ႈၼႃႇမႃႉၸိုဝ်ႈသဵင်ၵဝ်သေလႄႈ ယွၼ်းသူးသေၸိူဝ်ႉသေပိူင်ၸိုင်ၵဝ်တၵ်းႁဵတ်းဢေႃႈ။

15ပေႃးသူႁၵ်ႉၵဝ်ၸိုင် ပႂ်ႉၸွမ်းပိင်းၺၢပ်ႈၵဝ်တင်းလၢႆတႃႉ။ ၵဝ်တၵ်းယွၼ်းဢဝ်တီႈပေႃႈၸဝ်ႈလႄႈ၊-

16မၼ်းၸဝ်ႈၵေႃႈတၵ်းပၼ် သြႃႇဢူႉပိတ်ႉသေႇတၢင်ႇပႃး ဢၼ်ဝႃႈဝီႉၺိၺ်ႇၸဝ်ႈ ဢၼ်ၼႄပျႃးသမ်ႇမႃႇတြႃးၼၼ်ႉတီႈသူလွင်ႈၼင်ႇႁိုဝ်တၵ်းလႆႈမီးယူႇလူၺ်ႈၵၼ်တင်းသူ တႃႇသေႇဢမ်ႇထၢတ်ႇဢေႃႈ။-

17ဝီႉၺိၺ်ႇၸဝ်ႈၼၼ်ႉၸိုင်၊ ပိူဝ်ႈဢၼ်လေႃးၵႃႉၼႆႉဢမ်ႇႁူႉဢမ်ႇႁၼ်လႄႈ ဢမ်ႇၶၢမ်ႇဢမ်ႇဢဝ်လႆႈ။ ပိူဝ်ႈဢၼ်ဝီႉၺိၺ်ႇၸဝ်ႈၼၼ်ႉ တႄႇယူႇလူၺ်ႈၵၼ်တင်းသူ မီးယူႇၼႂ်းသူလႄႈ၊ သူလႆႈႁူႉဢေႃႈ။-

18ၵဝ်တၵ်းၸုၼ်ႉပႅတ်ႈသူႁႂ်ႈသူလႆႈပဵၼ်ၵေႃႉဢၼ် ၽၢၼ်ပေႃႈၽၢၼ်မႄႈယူႇဢမ်ႇၸႂ်ႈ။ ၵဝ်တၵ်းၶိုၼ်းမႃးတီႈသူထႅင်ႈလူးၵွၼ်ႇဢေႃႈ။

19ႁိုင်ၵမ်းဢွၼ်ႇၼိုင်ႈၵူၺ်းသေယဝ်ႉ၊ လေႃးၵႃႉၼႆႉတၵ်းဢမ်ႇလႆႈႁၼ်ၵဝ်။ သူၸမ်ႉ၊ တၵ်းလႆႈႁၼ်ၵဝ်ဢေႃႈ။ ပိူဝ်ႈဢၼ်ၵဝ်ဢသၢၵ်ႈလိပ်းယူႇလႄႈ၊ သူၵေႃႈဢသၢၵ်ႈတၵ်းလႆႈလိပ်းယူႇဢေႃႈ။-

20ၼႂ်းဝၼ်းၼၼ်ႉ သူတၵ်းလႆႈႁူႉလွင်ႈဢၼ်ၵဝ်မီးယူႇၼႂ်းၸဝ်ႈပေႃႈၵဝ်၊ လွင်ႈဢၼ်သူမီးယူႇၼႂ်းၵဝ်၊ လွင်ႈဢၼ်ၵဝ်မီးယူႇၼႂ်းသူၼၼ်ႉဢေႃႈ။-

21ၵေႃႉဢၼ်လႆႈပိင်းၺၢပ်ႈၵဝ်တင်းလၢႆလႄႈ ပႂ်ႉၸွမ်းၼၼ်ႉ ပဵၼ်ၵေႃႉဢၼ်ႁၵ်ႉၵဝ်ဢေႃႈ။ ၵေႃႉဢၼ်ႁၵ်ႉၵဝ်ၼၼ်ႉၸိုင် ၸဝ်ႈပေႃႈၵဝ်တၵ်းႁၵ်ႉဢေႃႈ။ ၵဝ်ၵေႃႈတၵ်းႁၵ်ႉၵေႃႉၼၼ်ႉလႄႈ ၼႄပျႃးတူဝ်ၸဝ်ႈၵဝ်ႇထၢင်ႇသႃးတီႈၵေႃႉၼၼ်ႉဢေႃႈ၊ ဝႃႈၼင်ႇၼႆဢေႃႈ။

22ယူႉတႃႉဢီႉသၵႃႇရေႇဢုတ်ႈ ဢမ်ႇၸႂ်ႈ၊ ယူႉတႃႉ တၢင်ႇၵေႃႉ ၵေႃႈလဝ်ႊထၢမ်လႄႈဝႃႈ၊ ၸဝ်ႈႁဝ်း၊ ၸဝ်ႈႁဝ်းယင်းဢမ်ႇထၢင်ႇသႃးမႃးတီႈလေႃးၵႃႉၼႆႉလႄႈ တၵ်းထၢင်ႇသႃးမႃးတီႈႁဝ်းၶႃႈ ၸိူဝ်ႉၼင်ႇႁိုဝ်ၶႃႈ၊ ဝႃႈၼင်ႇၼႆဢေႃႈ။-

23ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ၵေႃႉဢၼ်ႁၵ်ႉၵဝ်ၼၼ်ႉ တၵ်းထွမ်ႇဢဝ်ၵႂၢမ်းၵဝ်ဢေႃႈ။ ၸဝ်ႈပေႃႈၵဝ်ၼၼ်ႉတၵ်းႁၵ်ႉၵေႃႉၼၼ်ႉဢေႃႈ။ ႁဝ်းၵေႃႈတၵ်းမႃးတီႈမၼ်းလႄႈ ၶျႃးတီႈယူႇလူၺ်ႈၵၼ်တင်းမၼ်းဢေႃႈ။-

24ၵေႃႉဢၼ်ဢမ်ႇႁၵ်ႉၵဝ်ၼၼ်ႉ ဢမ်ႇထွမ်ႇဢဝ်ၵႂၢမ်းၵဝ်။ ၵႂၢမ်းဢၼ်သူငိၼ်းၼႆႉပဵၼ်ၵႂၢမ်းၵဝ်ဢမ်ႇၸႂ်ႈ။ ပဵၼ်ၵႂၢမ်းပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။

25ၵဝ်လၢတ်ႈၵႂၢမ်းၼႆႉဝႆႉ ၼႂ်းမိူဝ်ႈဢၼ်ၵဝ်ယင်းမီးယူႇလူၺ်ႈၵၼ်တင်းသူၼႆႉယဝ်ႉ။-

26သြႃႇဢူႉပိတ်ႉသေႇ ဢၼ်ဝႃႈဝီႉၺိၺ်ႇဢၼ်မူတ်းၸၢင်ႇၸဝ်ႈ၊ ဢၼ်ပေႃႈၸဝ်ႈ တၵ်းဢဝ်တင်းဢၶႂၢင်ႉၵဝ်ပွႆႇၸႂ်ႉမႃးၼၼ်ႉ တၵ်းၼႄပျႃးသင်ႇသွၼ်လွင်ႈတၢင်း တင်းသဵင်ႈတင်းလူင်ၵူႈၸိူဝ်ႉၵူႈပိူင်တီႈသူလႄႈ ႁႂ်ႈသူၶုၵ်းၸႂ်လႆႈၶႆႈၸႂ်ထူပ်း ၵႂၢမ်းၵႃႈဢၼ်ၵဝ်လၢတ်ႈဝႆႉယဝ်ႉ တင်းသဵင်ႈတင်းလူင်ၼၼ်ႉဢေႃႈ။

27ၵဝ်ဢဝ်တၢင်းၼိမ်ဝႆႉတီႈသူဢေႃႈ။ တၢင်းၼိမ်ၵဝ်ၸိုင်ၵဝ်ပၼ်တီႈသူဢေႃႈ။ ၵဝ်ပၼ်ၸိူဝ်ႉၼင်ႇဢၼ်လေႃးၵႃႉပၼ်ၼၼ်ႉဢမ်ႇၸႂ်ႈ။ ယႃႇပေႁႂ်ႈႁူဝ်ၸႂ်သူ မီးတၢင်းဢၼ်ယၢပ်ႇၸႂ်မႆႈၸႂ်လႄႈ သၼ်ႇဝႆၵူဝ်ႁႄ။-

28သူလႆႈငိၼ်းၵႂၢမ်းဢၼ်ၵဝ်လၢတ်ႈလႄႈဝႃႈ၊ပိၵ်ႉသမ်ႉၵဝ်ၵႂႃႇတေႃႈလဵဝ်ၼႆႉသေၵေႃႈ၊ ၵဝ်တၵ်းမႃးတီႈသူထႅင်ႈလူးၵွၼ်ႇ၊ ဝႃႈၼင်ႇၼႆၼၼ်ႉဝႆႉယဝ်ႉ။ ပေႃးသူႁၵ်ႉၵဝ်ၸိုင်သူတၵ်းသိူဝ်းပျေႃႇလူၺ်ႈလွင်ႈဢၼ်ၵဝ်တၵ်းၵႂႃႇၵႃႈတီႈပေႃႈၸဝ်ႈၼၼ်ႉဢေႃႈ။ လွင်ႈမၼ်းၸမ်ႉ ပေႃႈၵဝ်ၼၼ်ႉယဵင်ႈၶႅၼ်းယႂ်ႇမျၢတ်ႈၼႃႇသေၵဝ်ဢေႃႈ။-

29ၼင်ႇႁိုဝ်သူတၵ်းလႆႈယုမ်ႇမၢတ်ႈ ၼႂ်းမိူဝ်ႈဢၼ်လွင်ႈတၢင်းၼၼ်ႉႁွတ်ႈထိုင်ၼၼ်ႉၸိုင် တေႃႈလဵဝ်ၼႆႉ ၵဝ်လၢတ်ႈဝႆႉတီႈသူ ၸူဝ်ႈဢၼ်လွင်ႈတၢင်းၼၼ်ႉ ဢမ်ႇပႆႇႁွတ်ႈထိုင်ၼၼ်ႉယဝ်ႉ။

30ၸႃႉၸဵမ်တေႃႈလဵဝ်ၼႆႉလႄႈ ၵဝ်တၵ်းဢမ်ႇလၢတ်ႈၼမ်ၼမ်တေႃႇသူ။ လွင်ႈမၼ်းၸမ်ႉ ၶုၼ်ဢၼ်ဢုပ်ႉပိူင်ႇလေႃးၵႃႉၼႆႉၼၼ်ႉ မႃးယူႇဢေႃႈ။ ပိၵ်ႉသမ်ႉမၼ်းမႃးသေၵေႃႈ၊ မၼ်းဢမ်ႇထူပ်းဢၶႂၢင်ႉ လွင်ႈတၢင်းဢၼ်လႂ်သေၸိူဝ်ႉသေပိူင် ၵႃႈၼႂ်းၵဝ်ၼႆႉ။-

31ၵူၺ်းၵႃႈ လွင်ႈၼင်ႇႁိုဝ်လေႃးၵႃႉၼႆႉ တၵ်းႁူႉလွင်ႈဢၼ်ၵဝ်ႁၵ်ႉပေႃႈၸဝ်ႈ ဢိၵ်ႇတင်း လွင်ႈဢၼ်ၵဝ်ႁဵတ်းၵႃႈၼင်ႇဢၼ်ပေႃႈၸဝ်ႈသင်ႇလၢတ်ႈဝႆႉၼၼ်ႉၸိုင် ၸင်ႇပဵၼ်ဢေႃႈ၊ လုၵ်ႉသေၵႃႈတီႈၼႆႈလႄႈၵႂႃႇတႃႉႁဝ်း။

← Chapter 13 Jump to: Chapter 15 →