John 6 — Shan

1လိုၼ်းၼၼ်ႉ ယေႇသူႉ ၶၢမ်ႈၵႂႃႇၵႃႈတီႈၽၢႆႇပုၼ်ႉၼွင် ၵႃႇလီႉလႄး ဢၼ်ဝႃႈ ၼွင် တီႉပေႇရီႉ ၼၼ်ႉဢေႃႈ။-

2ၵူၼ်းဢၼ်ၸူႉဢၼ်တုမ်ၼမ်ၼႃႇၸွမ်းပႃႈလင်မၼ်းၸဝ်ႈၵႂႃႇ ၵွပ်ႈပိူဝ်ႈဢၼ်ၶဝ်လႆႈႁၼ်ၼီႉမိၵ်ႈလၢၵ်ႈၶၼႃႇဢၼ်မၼ်းၸဝ်ႈၼႄပျႃး တီႈၶဝ်ၸိူဝ်းဢၼ်ၸပ်းတၢင်းၶႆႈတၢင်းပဵၼ်ၸိူဝ်းၼၼ်ႉဢေႃႈ။-

3ယေႇသူႉ ၶိုၼ်ႈၵႂႃႇၵႃႈၼိူဝ်လွႆလႄႈ ၼင်ႈယူႇလူၺ်ႈၵၼ်တင်းတပႄးၸဝ်ႈတင်းလၢႆဢေႃႈ။-

4မိူဝ်ႈၼၼ်ႉၸမ်တၵ်းႁွတ်ႈထိုင်ၶိင်ႇ ဢၼ်ၶၢမ်ႇပွႆး ပႃႉသၶႃႇ ၵူၼ်း ယူႉတႃႉ ဢေႃႈ။-

5ယေႇသူႉ မုင်ႈတူၺ်းလႄႈႁၼ် ၵူၼ်းဢၼ်ၸူႉဢၼ်တုမ်ၼမ်ၼႃႇၸိူဝ်းၼၼ်ႉ မႃးၵႃႈတီႈမၼ်းၸဝ်ႈၼၼ်ႉသေယဝ်ႉ၊ ထၢမ်တီႈ ၽီႉလိပ်ႉပူႉ လႄႈဝႃႈ၊ ၼင်ႇႁိုဝ်ၶဝ်ၼႆႉတၵ်းလႆႈၵိၼ်လႆႈၶူပ်းၸိုင် တၵ်းသိုဝ်ႉဢဝ်ၶဝ်ႈမုၼ်းၵႃႈတီႈလႂ်၊ ဝႃႈၼင်ႇၼႆဢေႃႈ။-

6ပိၵ်ႉသမ်ႉမၼ်းၸဝ်ႈႁူႉလွင်ႈဢၼ်တူဝ်ၸဝ်ႈၵဝ်ႇ တၵ်းႁဵတ်းၸိူဝ်ႉၼင်ႇႁိုဝ်ၼၼ်ႉယူႇသေၵေႃႈ ၼင်ႇႁိုဝ်တၵ်းလႆႈၸၢမ်းတူၺ်းမၼ်းၸိုင် မၼ်းၸဝ်ႈၸင်ႇထၢမ်ဝႃႈၸိူဝ်ႉၼင်ႇၼၼ်ဢေႃႈ။-

7ၽီႉလိပ်ႉပူႉ ၵေႃႈလဝ်ႊလၢတ်ႈလႄႈဝႃႈ၊ ၼင်ႇႁိုဝ်ၶဝ်ၼႆႉတၵ်းလႆႈယေႈၵေႃႉယေႈဢိတ်းၸိုင်၊ ၶဝ်ႈမုၼ်းဢၼ်ထိူၵ်ႈၵႃႈ တေႇၼႃႇရီႇ သွင်ပၢၵ်ႇၶႅပ်းၼိုင်ႈဢမ်ႇပေႃးဢမ်ႇၵုမ်ႇၶႃႈ၊ ဝႃႈၼင်ႇၼႆဢေႃႈ။-

8ၼႂ်းတပႄးၸဝ်ႈၸိူဝ်းၼၼ်ႉၵေႃႉၼိုင်ႈ ဢၼ်လႆႈၸိုဝ်ႈ ဢၼ်ႇတရေႇ ဢၼ်ပဵၼ်ၼွင်ႉၸၢႆး သီႉမုၼ်ႇပေႇတရူႉ ၼၼ်ႉ ၵေႃႈလဝ်ႊလၢတ်ႈလႄႈဝႃႈ၊-

9မီးလုၵ်ႈဢွၼ်ႇဢၼ်ပႃးၶဝ်ႈမုၼ်းမူႉယေႃးႁႃႈလုၵ်ႈတင်းပႃဢွၼ်ႇသွင်တူဝ် ၵေႃႉၼိုင်ႈၶႃႈဢေႃႈ၊ ၼႂ်းဝႃႈၼၼ်သေၵေႃႈ ပိူဝ်ႈဢၼ်ၵူၼ်းမီးၼမ်ၼႃႇထၢၼ်ႇၼႆႉလႄႈ တၢင်းၵိၼ်ၼႆႉတၵ်းပွင်ႇလွင်ႈၵႃႈသင်ၶႃႈ၊ ဝႃႈၼင်ႇၼႆဢေႃႈ။-

10ယေႇသူႉ ၵေႃႈလၢတ်ႈလႄႈဝႃႈ၊ ႁႂ်ႈၵူၼ်းၸိူဝ်းၼႆႉဢိင်ယူႇတႃႉ၊ ဝႃႈၼင်ႇၼႆဢေႃႈ။ ၵႃႈတီႈၼၼ်ႈ မီးတူၼ်ႈယိူဝ်ႈတူၼ်ႈယႃႈၼမ်ၼႃႇဢေႃႈ။ ၵႃႈၼင်ႇဢၼ်ၼပ်ႉဢၢၼ်ႇၼၼ်ႉၵူၼ်းသေႁႃႈႁဵင်ၼိုင်ႈၸမ်ၸမ်ဢိင်ယူႇဢေႃႈ။-

11ယေႇသူႉ ဢဝ်ၶဝ်ႈမုၼ်းလႄႈယွင်ႈယေႃးၵျေးၸူးၸဝ်ႈသေယဝ်ႉ၊ ၽႄမႅင်ႇပၼ်တီႈၶဝ်ၸိူဝ်းဢၼ်ဢိင်ယူႇၼၼ်ႉဢေႃႈ။ မိူၼ်ၼင်ႇၼၼ် မၼ်းၸဝ်ႈဢဝ်ပႃၸိူဝ်းၼၼ်ႉ ၽႄမႅင်ႇၵႃႈၼင်ႇဢၼ် ၶဝ်မီးဢလူဝ်ႇၶႂ်ႈလႆႈၼၼ်ႉဢေႃႈ။-

12ၶဝ်ၼၼ်ႉဢိမ်ႇယဝ်ႉ၊ မၼ်းၸဝ်ႈၵေႃႈလၢတ်ႈတီႈတပႄးၸဝ်ႈၸိူဝ်းၼၼ်ႉလႄႈဝႃႈ၊ ၼင်ႇႁိုဝ်တၵ်းဢမ်ႇလႆႈႁၢႆသေၸိူဝ်ႉသေပိူင်ၸိုင် ၵဵပ်းသိမ်းဢဝ်ဢၼ်ၵိုတ်းဢၼ်ၵျၢၼ်ႇဢၼ်ႁၵ်းဢၼ်ႁဵၵ်းတင်းလၢႆၸိူဝ်းၼႆႉဝႆႉတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

13ၶဝ်ၼၼ်ႉၵဵပ်းသိမ်းဢဝ်ဢၼ်ပွတ်းဢၼ်ႁၵ်းၶဝ်ႈမုၼ်းမူႉယေႃးဢၼ်ၵိုတ်းဢၼ်ၵျၢၼ်ႇ တီႈၶဝ်ၸိူဝ်းဢၼ်ၵိၼ်ၸိူဝ်းၼၼ်ႉဝႆႉလႄႈ လႆႈတဵမ်သိပ်းသွင်ပဵတ်ႈဢေႃႈ။-

14ပိူဝ်ႈၼႆလႄႈ မိူဝ်ႈဢၼ်ၵူၼ်းၸိူဝ်းၼၼ်ႉ ႁၼ်ၼီႉမိၵ်ႈလၢၵ်ႈၶၼႃႇဢၼ်မၼ်းၸဝ်ႈၼႄပျႃးၸိူဝ်ႉၼင်ႇၼၼ်ၼၼ်ႉၸိုင် ၶဝ်လၢတ်ႈလႄႈဝႃႈ၊ ၵေႃႉၼႆႉၸမ်ႉ၊ ပဵၼ်ပရေႃးၽႅတ်ႈ ဢၼ်မႃးၼႂ်းလေႃးၵႃႉၼႆႉၸႂ်ႈတႄႇဢေႃႈ၊ ဝႃႈၼင်ႇၼႆဢေႃႈ။

15ယေႇသူႉ ႁူႉလွင်ႈဢၼ် ၶဝ်ၼၼ်ႉတၵ်းမႃးလႄႈ ႁဵတ်းပႄႉႁဵတ်းၼႅင်ႇ ႁႂ်ႈလႆႈဢဝ်မၼ်းၸဝ်ႈယုၵ်ႉယွင်ႈဝႆႉၵႃႈၼႂ်းဢရႃႇ ၶုၼ်ႁေႃၶမ်းၼၼ်ႉသေယဝ်ႉ၊ ၶိုၼ်ႈၵႂႃႇၵႃႈၼိူဝ်လွႆပႃးလဵဝ်ၵူၺ်းမၼ်းၸဝ်ႈဢေႃႈ။

16မိူဝ်ႈဢၼ်ႁွတ်ႈထိုင်ၶိင်ႇၵၢင်ၶမ်ႈၸိုင် တပႄးၸဝ်ႈၸိူဝ်းၼၼ်ႉလူင်းၵႂႃႇၸူးၵႃႈတီႈၼွင်လႄႈ၊-

17ၶဝ်ႈၼႂ်းႁိူဝ်းယဝ်ႉၸင်ႇ ၶၢမ်ႈၼွင်ၼၼ်ႉၵႂႃႇႁႂ်ႈလႆႈႁွတ်ႈထိုင် ၵႃႈတီႈဝဵင်း ၵပိူဝ်ႇၼေႇဢုမ်ႇ ဢေႃႈ။ မိူဝ်ႈၼၼ်ႉပဵၼ်ဢၼ်လပ်းသိင်ႇလႄႈ ယေႇသူႉ ဢမ်ႇပႆႇႁွတ်ႈထိုင်ၵႃႈတီႈဢၼ်ၶဝ်မီးၼၼ်ႉ။-

18ပိူဝ်ႈဢၼ်လူမ်းလူင်မႃးလႄႈလႅင်းၼမ်ႉပိူပ်ႈၼမ်ႉလုၵ်ႉၶိုၼ်ႈယႂ်ႇမႃးယူႇဢေႃႈ။-

19မိူဝ်ႈဢၼ်ၶဝ်ၽၢႆးႁိူဝ်းလႄႈႁွတ်ႈသေလၵ်းပၢႆၶိုင်ႈသေသွင်လၵ်းၸမ်ၸမ်ၸိုင်၊ ၶဝ်ႁၼ် ယေႇသူႉ ပႆၵႃႈၼိူဝ်ၼမ်ႉၼွင်ၼၼ်ႉသုတ်ႉမႃးၸမ်ၵႃႈတီႈႁိမ်းႁိူဝ်းလႄႈ ၶဝ်မီးတၢင်းဢၼ်တူၵ်းၸႂ်ၵူဝ်ႁႄဢေႃႈ။-

20မၼ်းၸဝ်ႈၵေႃႈလၢတ်ႈလႄႈဝႃႈ၊ ပဵၼ်ၵဝ်လႆ၊ ယႃႇပေၵူဝ်ပေႁႄ၊ မိူဝ်ႈဢၼ်ဝႃႈၼင်ႇၼႆၸိုင်၊-

21ၶဝ်မီးတင်းၸႂ်ဢၼ်သိူဝ်းပျေႃႇႁပ်ႉဢဝ်မၼ်းၸဝ်ႈ ၶဝ်ႈၵႃႈၼႂ်းႁိူဝ်းၼၼ်ႉဢေႃႈ။ ႁိူဝ်းၵေႃႈသိူၵ်ႈၵႃႈတီႈဢၼ်ၶဝ်ၶႂ်ႈၵႂႃႇႁွတ်ႈၼၼ်ႉၵမ်းလဵဝ်ဢေႃႈ။-

22ဝၼ်းမိူဝ်ႈၽုၵ်ႈမိူဝ်ႈဢၼ်ၵူၼ်းဢၼ်ၸူႉဢၼ်တုမ်ဢၼ်ၸုၵ်းယူႇ ၵႃႈတီႈၽင်ႇၼမ်ႉၽၢႆႇပုၼ်ႉၸိူဝ်းၼၼ်ႉလႆႈႁၼ်လွင်ႈဢၼ်လိူဝ်သေႁိူဝ်းဢွၼ်ႇလမ်းၼိုင်ႈၵူၺ်း ဢမ်ႇမီးႁိူဝ်းဢွၼ်ႇဢၼ်လႂ်ၵႃႈတီႈၼၼ်ႈ ဢိၵ်ႇတင်းလွင်ႈဢၼ် ယေႇသူႉ ဢမ်ႇၶဝ်ႈလူၺ်ႈၵၼ်တင်းတပႄးၸဝ်ႈၸိူဝ်းၼၼ်ႉ ၵႃႈၼႂ်းႁိူဝ်းၼၼ်ႉလႄႈ တပႄးၸဝ်ႈၸိူဝ်းၼၼ်ႉၵူၺ်းၵႂႃႇၼၼ်ႉ၊-

23ပိၵ်ႉသမ်ႉႁိူဝ်းဢွၼ်ႇတၢင်ႇတီႈၼမ်ၼႃႇ လုၵ်ႉသေၵႃႈတီႈဝဵင်း တီႉပေႇရီႉ မႃးၸမ်ၵႃႈတီႈႁိမ်းတီႈဢၼ်မိူဝ်ႈၼၼ်ႉ ၸဝ်ႈၽြႃးယွင်ႈယေႃးၵျေးၸူးၸဝ်ႈသေယဝ်ႉ၊ ၵူၼ်းတင်းလၢႆ ၵိၼ်ၶဝ်ႈမုၼ်းၼၼ်ႉသေၵေႃႈ၊-

24မိူဝ်ႈဢၼ်ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉ လႆႈႁၼ်လွင်ႈဢၼ် ယေႇသူႉ ဢိၵ်ႇတင်းတပႄးၸဝ်ႈၸိူဝ်းၼၼ်ႉဢမ်ႇမီးၵႃႈတီႈၼၼ်ႈၼၼ်ႉၸိုင်၊ ၶဝ်ဢွၼ်ၵၼ်ၶဝ်ႈၵႃႈၼႂ်းႁိူဝ်းသေလႄႈ ၵႂႃႇၸူးၵႃႈတီႈဝဵင်း ၵပိူဝ်ႇၼေႇဢုမ်ႇ ႁႂ်ႈလႆႈႁႃ ယေႇသူႉ ဢေႃႈ။

25မိူဝ်ႈဢၼ်ၶဝ်ထူပ်းႁၼ်မၼ်းၸဝ်ႈၵႃႈတီႈၽင်ႇၼမ်ႉၽၢႆႇပုၼ်ႉၸိုင် ၶဝ်လဝ်ႊထၢမ်လႄႈဝႃႈ၊ ၸဝ်ႈႁဝ်း၊ ၸဝ်ႈႁဝ်းမႃးၵႃႈတီႈၼႆႈၶိင်ႇမိူဝ်ႈလႂ်ၶႃႈ၊ ဝႃႈၼင်ႇၼႆဢေႃႈ။-

26ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်ႉ၊ သူၸွမ်းႁႃၵဝ်ၵွပ်ႈပိူဝ်ႈဢၼ် သူႁၼ်ၼီႉမိၵ်ႈလၢၵ်ႈၶၼႃႇတင်းလၢႆၼၼ်ႉဢမ်ႇၸႂ်ႈ။ သူၸွမ်းႁႃၵွပ်ႈပိူဝ်ႈဢၼ် သူလႆႈၵိၼ်ၶဝ်ႈမုၼ်းလႄႈဢိမ်ႇတဵမ်ၼၼ်ႉၵူၺ်းဢေႃႈ။-

27ယႃႇပေၵျူဝ်းၸႃး ႁႂ်ႈလႆႈတၢင်းၵိၼ်ဢၼ်ၸၢင်ႈလူႉၸၢင်ႈလႅဝ်ၼၼ်ႉ။ ၵျူဝ်းၸႃး ႁႂ်ႈလႆႈတၢင်းၵိၼ်ဢၼ်ၸၢင်ႈတႄႇယူႇထူၼ်ႈၸူဝ်ႈထႃႇဝရႃႉဢသၢၵ်ႈလႄႈ လုၵ်ႈၵူၼ်းတၵ်းပၼ်တီႈသူၼၼ်ႉတႃႉ။ လုၵ်ႈၼၼ်ႉပဵၼ်ၵေႃႉဢၼ်ၶၢမ်ႇတၢင်းဢၼ် ပေႃႈၸဝ်ႈတွၵ်ႇတၼ်းသိၵ်ႈဢေႃႈ၊ မၼ်းၸဝ်ႈဝႃႈၼင်ႇၼႆဢေႃႈ။

28ၶဝ်ၼၼ်ႉၵေႃႈလဝ်ႊထၢမ်လႄႈဝႃႈ၊ ၼင်ႇႁိုဝ်ႁဝ်းၶႃႈ တၵ်းလႆႈၵမ်ၵျၢင်ႉတၢင်းၵမ်တၢင်းၵျၢင်ႉဢၼ် မႅၼ်ႈၵၼ်တင်းဢလူဝ်ႇၽြႃးပဵၼ်ၸဝ်ႈၸိုင် ႁဝ်းၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ၊ ဝႃႈၼင်ႇၼႆဢေႃႈ။-

29ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ တၢင်းၵမ်တၢင်းၵျၢင်ႉဢၼ်မႅၼ်ႈၵၼ်တင်းဢလူဝ်ႇၽြႃးပဵၼ်ၸဝ်ႈၼၼ်ႉၸမ်ႉ၊ ပဵၼ်တၢင်းၵမ်တၢင်းၵျၢင်ႉတၢင်းဢၼ်ယုမ်ႇမၢတ်ႈ ၵေႃႉဢၼ်မၼ်းၸဝ်ႈပွႆႇၸႂ်ႉမႃးၼၼ်ႉဢေႃႈ၊ ဝႃႈၼင်ႇၼႆဢေႃႈ။

30ၶဝ်ၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၼင်ႇႁိုဝ်ႁဝ်းၶႃႈ တၵ်းလႆႈႁၼ်သေလႄႈယုမ်ႇမၢတ်ႈၸဝ်ႈႁဝ်းၸိုင်၊ ၸဝ်ႈႁဝ်းတၵ်းၼႄပျႃးၼီႉမိၵ်ႈလၢၵ်ႈၶၼႃႇဢၼ်လႂ်ၶႃႈ။ ၸဝ်ႈႁဝ်းတၵ်းႁဵတ်းလွင်ႈတၢင်းဢၼ်လႂ်ၶႃႈ။-

31ၵႃႈၼင်ႇဢၼ်မႃးၼႂ်းၵျၢမ်းလိၵ်ႈလႄႈဝႃႈ၊ ပုၼ်ႈဢၼ်ၶဝ်တၵ်းၵိၼ်ၸိုင် မၼ်းၸဝ်ႈဢဝ်ၶဝ်ႈမုၼ်း ၵႃႈၼိူဝ်ၵၢင်ႁၢဝ်ပၼ်မႃးတီႈၶဝ်ဢေႃႈ၊ ဝႃႈၼင်ႇၼႆၼၼ်ႉ၊ ပူႇမွၼ်ႇႁဝ်းၸိူဝ်းၼၼ်ႉလႆႈၵိၼ် မၼ်ႇၼႃႉ ၼၼ်ႉယဝ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။

32ယေႇသူႉ ၵေႃႈလၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ မူဝ်းသေႇ ဢမ်ႇဢဝ်ၶဝ်ႈမုၼ်းၵႃႈၼိူဝ်ၵၢင်ႁၢဝ် ပၼ်မႃးတီႈသူ။ ပေႃႈၸဝ်ႈဢဝ်ၶဝ်ႈမုၼ်းဢၼ်ၸိုဝ်ႈဢၼ်ၸႂ်ႈၵႃႈၼိူဝ်ၵၢင်ႁၢဝ်ပၼ်မႃးတီႈသူဢေႃႈ။-

33ၶဝ်ႈမုၼ်းၽြႃးပဵၼ်ၸဝ်ႈၸမ်ႉ၊ ပဵၼ်ၶဝ်ႈမုၼ်းဢၼ်လုၵ်ႉသေၵႃႈၼိူဝ်ၵၢင်ႁၢဝ်ပုၼ်ႉလူင်းမႃးလႄႈ ပၼ်ဢသၢၵ်ႈတီႈၵူၼ်းလေႃးၵီႇတင်းလၢႆဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊-

34ၶဝ်ၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၶႅၼ်းတေႃႈပၼ်ၶဝ်ႈမုၼ်းၼၼ်ႉတီႈႁဝ်းၶႃႈၵူႈၶိင်ႇၵူႈၶႃႇသေၵမ်းၶႃႈ၊ ဝႃႈၼင်ႇၼႆဢေႃႈ။-

35ယေႇသူႉ ၵေႃႈလၢတ်ႈလႄႈဝႃႈ၊ ၵဝ်ပဵၼ်ၶဝ်ႈမုၼ်းဢသၢၵ်ႈဢေႃႈ။ ၵေႃႉဢၼ်မႃးၵႃႈတီႈၵဝ်ၼႆႉၼၼ်ႉ၊ ၵမ်းလိုၼ်းတၵ်းဢမ်ႇလႆႈဢိုပ်းတၢင်းၵိၼ်။ ၵေႃႉဢၼ်ယုမ်ႇမၢတ်ႈၵဝ်ၼႆႉၼၼ်ႉ ၵမ်းလိုၼ်းတၵ်းဢမ်ႇလႆႈယၢၵ်ႇၼမ်ႉ။-

36ၵူၺ်းၵႃႈ သူၼႆႉပိၵ်ႉသမ်ႉႁၼ်ၵဝ်ယူႇသေၵေႃႈ ဢမ်ႇယုမ်ႇမၢတ်ႈဝႃႈၼႆ၊ၵဝ်ဝႃႈမႃးယဝ်ႉ။-

37ၶဝ်ၸိူဝ်းဢၼ် ပေႃႈၸဝ်ႈပၼ်တီႈၵဝ်ၵႃႈမီးတင်းသဵင်ႈတင်းလူင်ၼၼ်ႉ တၵ်းမႃးၵႃႈတီႈၵဝ်ဢေႃႈ။ ၵေႃႉဢၼ်မႃးၵႃႈတီႈၵဝ်ၸိုင်ၵဝ်ဢမ်ႇပႄႇဢမ်ႇပႅတ်ႈလႃးလႃး။-

38လွင်ႈမၼ်းၸမ်ႉ ၵဝ်ၼႆႉလုၵ်ႉသေၵႃႈၼိူဝ်ၵၢင်ႁၢဝ်လူင်းမႃး ႁႂ်ႈလႆႈၸွမ်းဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ၊ လူင်းမႃး ႁႂ်ႈလႆႈၸွမ်းဢလူဝ်ႇၵေႃႉဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။-

39ဢလူဝ်ႇၵေႃႉဢၼ်ပွႆႇၸႂ်ႉၵဝ်မႃးၼၼ်ႉၸမ်ႉ၊ ပဵၼ်တၢင်းဢၼ်ၵဝ်တၵ်းဢမ်ႇလႆႈႁႂ်ႈၶဝ်ၸိူဝ်းဢၼ်မၼ်းၸဝ်ႈပၼ်တီႈၵဝ်ၼၼ်ႉ ႁၢႆၵႂႃႇသေၵေႃႉသေၵူၼ်းလႄႈ တၵ်းလႆႈႁႂ်ႈၶဝ်တင်းသဵင်ႈတင်းလူင် လုၵ်ႉၶိုၼ်းၼႂ်းဝၼ်းဢၼ်သုတ်းပုၼ်ႉဢေႃႈ။-

40လွင်ႈမၼ်းၸမ်ႉ ဢလူဝ်ႇၸဝ်ႈပေႃႈၵဝ်ၼၼ်ႉၸမ်ႉ၊ ပဵၼ်တၢင်းဢၼ်ၶႂ်ႈႁႂ်ႈ ၶဝ်ၸိူဝ်းဢၼ် တူၺ်းႁၼ်လုၵ်ႈၸဝ်ႈလႄႈယုမ်ႇမၢတ်ႈၵႃႈမီးတင်းသဵင်ႈတင်းလူင်ၼၼ်ႉလႆႈထႃႇဝရႃႉဢသၢၵ်ႈဢေႃႈ။ ၵဝ်ၵေႃႈတၵ်းႁႂ်ႈၶဝ်လုၵ်ႉၶိုၼ်းၼႂ်းဝၼ်းဢၼ်သုတ်းပုၼ်ႉဢေႃႈ၊ ဝႃႈၼင်ႇၼႆဢေႃႈ။

41ၵွပ်ႈပိူဝ်ႈဢၼ်မၼ်းၸဝ်ႈလၢတ်ႈလႄႈဝႃႈ၊ ၵဝ်ပဵၼ်ၶဝ်ႈမုၼ်းဢၼ်လုၵ်ႉသေၵႃႈၼိူဝ်ၵၢင်ႁၢဝ်ပုၼ်ႉလူင်းမႃးဢေႃႈ၊ ဝႃႈၼင်ႇၼႆၼၼ်ႉလႄႈ၊ ၵူၼ်း ယူႉတႃႉ သႄႉသွမ်းတၢင်ႇဢပႅတ်ႈလႄႈဝႃႈ၊-

42ၵေႃႉၼႆႉပဵၼ် ယေႇသူႉ လုၵ်ႈၸၢႆး ယူဝ်းသႅပ်ႈ ဢမ်ႇၸႂ်ႈႁိုဝ်။ ပေႃႈမႄႈမၼ်းၸိုင်ႁဝ်းႁူႉယူႇဢမ်ႇၸႂ်ႈႁိုဝ်။ ႁဵတ်းႁိုဝ်လႄႈမၼ်းလၢတ်ႈလႄႈဝႃႈ ၵဝ်လုၵ်ႉသေၵႃႈၼိူဝ်ၵၢင်ႁၢဝ်ပုၼ်ႉလူင်းမႃးဢေႃႈ၊ ဝႃႈၼင်ႇၼႆၼင်ႇႁိုဝ်။ ဝႃႈၼင်ႇၼႆဢေႃႈ။-

43ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ၵေႃႉၼိုင်ႈလႄႈၵေႃႉၼိုင်ႈ ယႃႇပေသႄႉသွမ်းတၢင်ႇဢပႅတ်ႈတီႈၵၼ်။-

44သင်ပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉ ဢမ်ႇတိုၵ်းယူင်းၸိုင်ၽူႈလႂ်ဢမ်ႇမႃး ၵႃႈတီႈၵဝ်လႆႈ သေၵေႃႉသေၵူၼ်း။ ၵေႃႉဢၼ်မႃးၼၼ်ႉၸိုင်၊ ၵဝ်တၵ်းႁႂ်ႈလုၵ်ႉၶိုၼ်းၼႂ်းဝၼ်းဢၼ်သုတ်းပုၼ်ႉဢေႃႈ။-

45ၵႃႈၼင်ႇဢၼ်မီးမႃးၼႂ်းၵျၢမ်းလိၵ်ႈ ဢၼႃႇၵၢတ်ႈတီႉၼၼ်ႉလႄႈဝႃႈ၊ ၶဝ်တင်းသဵင်ႈတင်းလူင်တၵ်းပဵၼ်ၵေႃႉဢၼ်ၽြႃးပဵၼ်ၸဝ်ႈသင်ႇသွၼ်သုင်းမႃႉပၼ်ဢေႃႈ၊ ဝႃႈၼင်ႇၼႆၼၼ်ႉ၊ ၵေႃႉဢၼ်ထွမ်ႇငိၼ်းတီႈပေႃႈၸဝ်ႈလႄႈၶၢမ်ႇဢဝ်ၼႄး ၵႃႈမီးတင်းသဵင်ႈတင်းလူင်ၼၼ်ႉၸိုင်၊ မႃးၵႃႈတီႈၵဝ်ဢေႃႈ။-

46မိူဝ်ႈဢၼ်ၵဝ်ဝႃႈၸိူဝ်ႉၼင်ႇၼႆၸိုင်၊ လိူဝ်သေၵေႃႉဢၼ်လုၵ်ႉသေၵႃႈတီႈၽြႃးပဵၼ်ၸဝ်ႈမႃးပႃးလဵဝ်ၵူၺ်းၼၼ်ႉ၊ သေၵေႃႉသေၵူၼ်းလႆႈႁၼ်ပေႃႈၸဝ်ႈၼၼ်ႉမႃးယဝ်ႉဝႃႈၼႆဢမ်ႇၶႂ်ႈဝႃႈ၊ ၵေႃႉဢၼ်မႃးၼၼ်ႉၸမ်ႉ၊ လႆႈႁၼ်ပေႃႈၸဝ်ႈမႃးယဝ်ႉ။

47ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၵေႃႉဢၼ်ယုမ်ႇမၢတ်ႈၵဝ်ၼႆႉၼၼ်ႉ လႆႈထႃႇဝရႃႉဢသၢၵ်ႈဢေႃႈ။-

48ၵဝ်ပဵၼ်ၶဝ်ႈမုၼ်းဢသၢၵ်ႈဢေႃႈ။-

49ပူႇမွၼ်ႇသူၸိူဝ်းၼၼ်ႉ ၵိၼ် မၼ်ႇၼႃႉ ၵႃႈၼႂ်းထိူၼ်ႇၼၼ်ႉယူႇသေလႄႈလႆႈတၢႆဢေႃႈ။-

50ၶဝ်ႈမုၼ်းၼႆႉၸမ်ႉ ပဵၼ်ၶဝ်ႈမုၼ်းဢၼ်လုၵ်ႉသေၵႃႈၼိူဝ်ၵၢင်ႁၢဝ်မႃး ပုၼ်ႈလွင်ႈၼင်ႇႁိုဝ်ၵူၼ်းတၵ်းၵိၼ်လႄႈဢမ်ႇလႆႈတၢႆဢေႃႈ။-

51ၵဝ်ၼႆႉပဵၼ်ၶဝ်ႈမုၼ်းဢသၢၵ်ႈ ဢၼ်လုၵ်ႉသေၵႃႈၼိူဝ်ၵၢင်ႁၢဝ်ပုၼ်ႉလူင်းမႃးဢေႃႈ။ ၵေႃႉဢၼ်ၵိၼ်ၶဝ်ႈမုၼ်းၼႆႉၸမ်ႉ၊ ဢသၢၵ်ႈတၵ်းလိပ်းယူႇတႃႇသေႇဢမ်ႇထၢတ်ႇဢေႃႈ။ ၶဝ်ႈမုၼ်းဢၼ်ၵဝ်ပၼ်ၸမ်ႉ၊ ပဵၼ်ၼိူဝ်ႉၵဝ် ဢၼ်ၵဝ်ၸုၼ်ႉပႅတ်ႈပုၼ်ႈဢသၢၵ်ႈၵူၼ်းလေႃးၵီႇတင်းလၢႆဢေႃႈ၊ ဝႃႈၼင်ႇၼႆဢေႃႈ။

52မိူဝ်ႈၼၼ်ႉ ၵူၼ်း ယူႉတႃႉ ၸိူဝ်းၼၼ်ႉၵေႃႈ ၵေႃႉၼိုင်ႈလႄႈၵေႃႉၼိုင်ႈထဵင်ၵၼ်လႄႈဝႃႈ၊ မၼ်းၼႆႉတၵ်းပၼ်ၼိူဝ်ႉမၼ်း ပုၼ်ႈဢၼ်ႁဝ်းတၵ်းၵိၼ်ၼၼ်ႉလႆႈၸိူဝ်ႉၼင်ႇႁိုဝ်၊ ဝႃႈၼင်ႇၼႆဢေႃႈ။-

53ယေႇသူႉ ၵေႃႈလၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ပေႃးသူဢမ်ႇၵိၼ်ၼိူဝ်ႉ ဢမ်ႇသူတ်ႉလိူတ်ႈလုၵ်ႈၵူၼ်းၸိုင်၊ ဢသၢၵ်ႈဢမ်ႇမီးၼႂ်းသူ။-

54ၵေႃႉဢၼ်ၵိၼ်ၼိူဝ်ႉသူတ်ႉလိူတ်ႈၵဝ်ၼႆႉၼၼ်ႉလႆႈထႃႇဝရႃႉဢသၢၵ်ႈဢေႃႈ။ ၵေႃႉၼၼ်ႉၸိုင်ၵဝ်တၵ်းႁႂ်ႈ လုၵ်ႉၶိုၼ်းၼႂ်းဝၼ်းဢၼ်သုတ်းပုၼ်ႉဢေႃႈ။-

55ၼိူဝ်ႉၵဝ်ၼႆႉပဵၼ်ဢၼ်လီၵိၼ်ဢေႃႈ၊ လိူတ်ႈၵဝ်ၼႆႉပဵၼ်ဢၼ်လီသူတ်ႉဢေႃႈ။-

56ၵေႃႉဢၼ်ၵိၼ်ၼိူဝ်ႉ သူတ်ႉလိူတ်ႈၵဝ်ၼႆႉၼၼ်ႉတႄႇယူႇၼႂ်းၵဝ်ဢေႃႈ။ ၵႃႈၼႂ်းၵေႃႉၼၼ်ႉၵေႃႈၵဝ်တႄႇယူႇဢေႃႈ။-

57ၸိူဝ်ႉၼင်ႇဢၼ် ပေႃႈၸဝ်ႈဢၼ်ဢသၢၵ်ႈလိပ်းယူႇ ပွႆႇၸႂ်ႉၵဝ်မႃးလႄႈ ၵဝ်ၵေႃႈဢသၢၵ်ႈလိပ်းယူႇၵွပ်ႈပိူဝ်ႈပေႃႈၸဝ်ႈၼၼ်ႉ၊ ၵေႃႉဢၼ်ၵိၼ်ၵဝ်ၼႆႉၼၼ်ႉ ဢသၢၵ်ႈတၵ်းလိပ်းၵွပ်ႈပိူဝ်ႈၵဝ်ဢေႃႈ။-

58ၶဝ်ႈမုၼ်းၼႆႉၸမ်ႉ၊ ပဵၼ်ၶဝ်ႈမုၼ်းဢၼ်လုၵ်ႉသေၵႃႈၼိူဝ်ၵၢင်ႁၢဝ်ပုၼ်ႉလူင်းမႃးဢေႃႈ။ ၸိူဝ်ႉၼင်ႇဢၼ်ပူႇမွၼ်ႇသူၸိူဝ်းၼၼ်ႉ ၵိၼ် မၼ်ႇၼႃႉ ယူႇသေလႄႈ လႆႈတၢႆၼၼ်ႉဢမ်ႇၸႂ်ႈ၊ ၵေႃႉဢၼ်ၵိၼ်ၶဝ်ႈမုၼ်းၼႆႉၼၼ်ႉ ဢသၢၵ်ႈတၵ်းလိပ်းယူႇတႃႇသေႇဢမ်ႇထၢတ်ႇဢေႃႈ ဝႃႈၼႆ၊-

59ၼႂ်းမိူဝ်ႈဢၼ်မၼ်းၸဝ်ႈသင်ႇသွၼ်ပၼ်ယူႇၼႂ်းၸရွပ်ႈႁေႃးတြႃးၵႃႈတီႈဝဵင်း ၵပိူဝ်ႇၼေႇဢုမ်ႇ ၼၼ်ႉၸိုင်၊ မၼ်းၸဝ်ႈလၢတ်ႈဝႃႈ ၸိူဝ်ႉၼင်ႇၼႆဢေႃႈ။

60တပႄးၸဝ်ႈၼမ်ၼႃႇငိၼ်းသေယဝ်ႉ၊ ဢွၼ်ၵၼ်လၢတ်ႈလႄႈဝႃႈ၊ ၵႂၢမ်းၼႆႉယၢပ်ႇၼႃႇဢေႃႈ။ ႁူၽူႈလႂ်တၵ်းၶၢမ်ႇလႆႈ၊ ဝႃႈၼင်ႇၼႆဢေႃႈ။-

61လွင်ႈဢၼ်တပႄးၸဝ်ႈၸိူဝ်းၼၼ်ႉ သႄႉသွမ်းတၢင်ႇဢပႅတ်ႈၸိူဝ်ႉၼင်ႇၼႆၼၼ်ႉၸိုင်၊ ယေႇသူႉ ႁူႉဢဝ်ၵူၺ်းလႄႈလၢတ်ႈဝႃႈ၊ ၵွပ်ႈပိူဝ်ႈၵႂၢမ်းၼႆႉလႄႈ သူၸႂ်လူႉႁိုဝ်။-

62ပေႃးသူလႆႈႁၼ်လုၵ်ႈၵူၼ်း ၶိုၼ်ႈၵႂႃႇၵႃႈတီႈဢၼ်ယူႇဢွၼ်တၢင်းပုၼ်ႉၸိုင်၊ သူတၵ်းထၢင်ႇၸိူဝ်ႉၼင်ႇႁိုဝ်။-

63ဝီႉၺိၺ်ႇၵူၺ်းႁႂ်ႈဢသၢၵ်ႈလိပ်းဢေႃႈ။ ၼိူဝ်ႉၸမ်ႉ၊ ဢမ်ႇတၢတ်ႈၼိူင်ႇလႆႈလႃးလႃး။ ၵႂၢမ်းဢၼ်ၵဝ်လၢတ်ႈၼႆႉ ပဵၼ်ဝီႉၺိၺ်ႇဢေႃႈ။ ဢသၢၵ်ႈၵေႃႈပဵၼ်ဢေႃႈ။-

64ၼႂ်းဝႃႈၼၼ်သေၵေႃႈ ၼႂ်းသူၼႆႉ ၶဝ်ၸိူဝ်းဢၼ်ဢမ်ႇယုမ်ႇမၢတ်ႈမီးၵမ်ႈၽွင်ႈဢေႃႈ။ လွင်ႈမၼ်းၸမ်ႉ ယေႇသူႉ ႁူႉလွင်ႈဢၼ် ၽူႈလႂ်တၵ်းဢမ်ႇယုမ်ႇမၢတ်ႈ ဢိၵ်ႇတင်းလွင်ႈဢၼ်ၽူႈလႂ် တၵ်းဢဝ်မၼ်းၸဝ်ႈဢၢပ်ႈၼၼ်ႉယူႇၸႃႉၸဵမ်မိူဝ်ႈၵေႃႇၸႃႉႁူဝ်ပိုင်းဢေႃႈ။-

65မၼ်းၸဝ်ႈလၢတ်ႈလႄႈဝႃႈ၊ ၵွပ်ႈႁွႆးၼႆႉ ပေႃးပေႃႈၸဝ်ႈဢမ်ႇပၼ်ဢၶႂၢင်ႉၸိုင်၊ ၽူႈလႂ်သေၵေႃႉသေၵူၼ်းဢမ်ႇမႃးၵႃႈတီႈၵဝ်လႆႈ၊ ဝႃႈၼင်ႇၼႆမႃးယဝ်ႉ၊ ဝႃႈၼင်ႇၼႆဢေႃႈ။

66ၸႃႉၸဵမ်မိူဝ်ႈၼၼ်ႉလႄႈတပႄးၸဝ်ႈၼမ်ၼႃႇ ဢမ်ႇႁဵတ်းၵေႃႉႁဵတ်းသေႈလူၺ်ႈၵၼ်တင်းမၼ်းၸဝ်ႈလႄႈ ဢွၼ်ၵၼ်သုတ်ႉယိုတ်းၶိုၼ်းမိူဝ်းၵႂႃႇသေဢေႃႈ။

67ပိူဝ်ႈၼႆလႄႈ ယေႇသူႉ လၢတ်ႈတီႈသိပ်းသွင်ပႃးလႄႈဝႃႈ၊ သူၵေႃႈမီးဢလူဝ်ႇၶႂ်ႈဢွၵ်ႇၵႂႃႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

68သီႉမုၼ်ႇပေႇတရူႉ ၵေႃႈ လဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ႁဝ်းၶႃႈတၵ်းလႆႈၵႂႃႇၵႃႈတီႈၽူႈလႂ်ၶႃႈ။ ၵႂၢမ်းထႃႇဝရႃႉဢသၢၵ်ႈၸိုင် တႄႇယူႇၼႂ်းၸဝ်ႈႁဝ်းၶႃႈဢေႃႈ။-

69ႁဝ်းၶႃႈယုမ်ႇမၢတ်ႈလႄႈ ႁူႉလွင်ႈဢၼ်ၸဝ်ႈႁဝ်းၶႃႈပဵၼ်ၵေႃႉဢၼ် မူတ်းၸၢင်ႇၽြႃးပဵၼ်ၸဝ်ႈၼၼ်ႉယူႇၶႃႈဢေႃႈ၊ ဝႃႈၼင်ႇၼႆဢေႃႈ။-

70ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ၵဝ်လိူၵ်ႈၵဵပ်းဢဝ်သူသိပ်းသွင်ပႃးၼႆႉဢမ်ႇၸႂ်ႈႁိုဝ်။ ၼႂ်းဝႃႈၼၼ်သေၵေႃႈ ၼႂ်းသူၼႆႉပႃးမႃႇၼၢတ်ႈၵေႃႉၼိုင်ႈဢေႃႈ၊ ဝႃႈၼင်ႇၼႆဢေႃႈ။-

71မၼ်းၸဝ်ႈ ဢဝ်လွင်ႈ ယူႉတႃႉဢီႉသၵႃႇရေႇဢုတ်ႈ လုၵ်ႈၸၢႆး သီႉမုၼ်ႇ ၼၼ်ႉလၢတ်ႈဢေႃႈ။ လွင်ႈမၼ်းၸမ်ႉ မၼ်းၼၼ်ႉၶဝ်ႈပႃးၼႂ်းသိပ်းသွင်ပႃးၼၼ်ႉယူႇသေလႄႈ ပဵၼ်ၵေႃႉဢၼ်တၵ်းဢဝ်မၼ်းၸဝ်ႈဢၢပ်ႈဢေႃႈ။