John 18 — Shan

1ယေႇသူႉ ၵေႃႈဝႃႈၸိူဝ်ႉၼင်ႇၼၼ်သေယဝ်ႉ၊ ဢွၵ်ႇလူၺ်ႈၵၼ်တင်းတပႄးၸဝ်ႈတင်းလၢႆ ၵႂႃႇၵႃႈတီႈၽၢႆႇပုၼ်ႉႁွင်ႈ ၵေႇတရုၼ်ႇ တီႈဢၼ် မီးသူၼ်ဢူးယဵၼ်ႇၼၼ်ႉလႄႈ ၶဝ်ႈၵႂႃႇၵႃႈၼႂ်းၼၼ်ႉ ဢိၵ်ႇလူၺ်ႈၵၼ်တင်းတပႄးၸဝ်ႈၸိူဝ်းၼၼ်ႉဢေႃႈ။

2ပိူဝ်ႈဢၼ် ယေႇသူႉ ၵႂႃႇၵႃႈတီႈၼၼ်ႈ ဢိၵ်ႇလူၺ်ႈၵၼ်တင်းတပႄးၸဝ်ႈတင်းလၢႆ ယူႇၶိူဝ်းၶိူဝ်းလႄႈ ယူႉတႃႉဢီႉသၵႃႇရေႇဢုတ်ႈ ဢၼ်ဢဝ်မၼ်းၸဝ်ႈဢၢပ်ႈၼၼ်ႉ ႁူႉတီႈၼၼ်ႈဢေႃႈ။-

3ပိူဝ်ႈၼႆလႄႈ ယူႉတႃႉ ၼၼ်ႉ ပႃးဢဝ်တင်းၵူၼ်းသိုၵ်းတပ်ႉၼိုင်ႈဢိၵ်ႇတင်းၵူၼ်းဢွၼ်ႇၸၢႆးဢၼ်ယိတ်ႈပရေႃးႁဵၵ်ႈလူင် ဢိၵ်ႇတင်း ၽႃႇရီႉသႄး တင်းလၢႆ ပွႆႇၸႂ်ႉမႃးၸိူဝ်းၼၼ်ႉလႄႈ ယိပ်းၵမ်ၵၢၼ်ႈၽႆးလႂ်၊ ႁိူၼ်းၽႆးလႂ်၊ လၢၵ်ႈၼၢၵ်ႈလႂ်ယူႇသေလႄႈ မႃးဢေႃႈ။-

4ယေႇသူႉ ႁူႉလွင်ႈတၢင်း ၵႃႈဢၼ်တၵ်းပဵၼ်မႃးတီႈမၼ်းၸဝ်ႈၸိူဝ်းၼၼ်ႉယူႇလႄႈ ၵႂႃႇၸူးၵႃႈတီႈၶဝ်ၸိူဝ်းဢၼ်မႃးၼၼ်ႉသေယဝ်ႉ၊ ထၢမ်လႄႈဝႃႈ၊ သူႁႃၽူႈလႂ်၊ ဝႃႈၼင်ႇၼႆဢေႃႈ။-

5ၶဝ်ၼၼ်ႉၶိုၼ်းလၢတ်ႈလႄႈဝႃႈ၊ ႁႃ ယေႇသူႉ ၵူၼ်းဝဵင်း ၼႃႇၸရႅတ်ႈ ဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ယေႇသူႉ ၵေႃႈလၢတ်ႈလႄႈဝႃႈ၊ ပဵၼ်ၵဝ်ၼႆႉဢေႃႈ၊ ဝႃႈၼင်ႇၼႆဢေႃႈ။ ယူႉတႃႉဢီႉသၵႃႇရေႇဢုတ်ႈ ဢၼ်ဢဝ်မၼ်းၸဝ်ႈဢၢပ်ႈၼၼ်ႉၵေႃႈ ၸုၵ်းယူႇလူၺ်ႈၵၼ်တင်းၶဝ်ၼၼ်ႉဢေႃႈ။-

6မိူဝ်ႈဢၼ်မၼ်းၸဝ်ႈလၢတ်ႈလႄႈဝႃႈ၊ ပဵၼ်ၵဝ်ၼႆႉဢေႃႈ၊ ဝႃႈၼင်ႇၼႆၼၼ်ႉၸိုင် ၶဝ်ၼၼ်ႉပိၼ်ႈၶိုၼ်းၵႂႃႇတၢင်းလင်သေလႄႈ လူမ်ႉၵႃႈၼိူဝ်လိၼ်ဢေႃႈ။-

7မၼ်းၸဝ်ႈသမ်ႉၶိုၼ်းထၢမ်ထႅင်ႈလႄႈဝႃႈ၊ သူႁႃၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉလၢတ်ႈလႄႈဝႃႈ၊ ႁႃ ယေႇသူႉ ၵူၼ်းဝဵင်း ၼႃႇၸရႅတ်ႈ ဢေႃႈ၊ ဝႃႈၼင်ႇၼႆဢေႃႈ။-

8ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ပဵၼ်ၵဝ်ၼႆႉဢေႃႈဝႃႈၼႆ၊ ၵဝ်လၢတ်ႈယဝ်ႉ။ ပိူဝ်ႈၼႆလႄႈ ပေႃးသူႁႃၵဝ်ၸိုင်၊ ပၼ်ဢၶႂၢင်ႉႁႂ်ႈၶဝ်ၸိူဝ်းၼႆႉလႆႈၵႂႃႇသေၵမ်း၊ ဝႃႈၼင်ႇၼႆဢေႃႈ။-

9ၼင်ႇႁိုဝ်ၵႂၢမ်းဢၼ်မၼ်းၸဝ်ႈလၢတ်ႈဝႆႉလႄႈဝႃႈ၊ ၼႂ်းၶဝ်ၸိူဝ်းဢၼ်ၸဝ်ႈႁဝ်းပၼ်တီႈၵဝ်ၶႃႈၼၼ်ႉ၊ ၽူႈလႂ်သေၵေႃႉသေၵူၼ်းဢမ်ႇႁွတ်ႈထိုင်တၢင်းလူႉတၢင်းလႅဝ်တီႈၶႃႈ၊ ဝႃႈၼင်ႇၼႆၼၼ်ႉ တၵ်းပျေႉၸုမ်ႇၸိုင် ၸင်ႇပဵၼ်ဢေႃႈ။

10မိူဝ်ႈၼၼ်ႉ သီႉမုၼ်ႇပေႇတရူႉ တိုတ်ႉထွတ်ႇဢဝ်လၢပ်ႇဢၼ်ပႃးၵႃႈတီႈမၼ်းၼၼ်ႉဢွၵ်ႇသေယဝ်ႉ၊ ၽၼ်းသႂ်ႇၶႃႈၵူၼ်းယိတ်ႈပရေႃးႁဵၵ်ႈၵေႃႉၼိုင်ႈလႄႈ ဝၢၼ်ႁူမၼ်းၽၢႆႇၶႂႃၶၢတ်ႇၵႂႃႇဢေႃႈ။ ၸိုဝ်ႈသဵင်ၶႃႈၼၼ်ႉၸမ်ႉ၊ ပဵၼ် မႃႇလၶူႉ ဢေႃႈ။-

11ပိူဝ်ႈၼႆလႄႈ ယေႇသူႉ ၵေႃႈလၢတ်ႈတီႈ ပေႇတရူႉ လႄႈဝႃႈ၊ ဢဝ်လၢပ်ႇသုပ်းသႂ်ႇဝႆႉၵႃႈၼႂ်းၵပ်းမၼ်းသေတႃႉ။ ၵွၵ်းဢၼ်ပေႃႈၸဝ်ႈပၼ်တီႈၵဝ်ၼၼ်ႉၸိုင်၊ ၵဝ်တၵ်းဢမ်ႇလႆႈၵိၼ်ႁိုဝ်၊ ဝႃႈၼင်ႇၼႆဢေႃႈ။

12မိူဝ်ႈၼၼ်ႉ ၸႃႉၸဵမ်တပ်ႉမူးလႄႈ ၵူၼ်းသိုၵ်းဢိၵ်ႇတင်းၵူၼ်းဢွၼ်ႇၸၢႆးၶုၼ် ယူႉတႃႉ ၸိူဝ်းၼၼ်ႉတီႉဢဝ် ယေႇသူႉ လႄႈ မတ်ႉၽုၵ်ႇသေယဝ်ႉ၊-

13ဢဝ်ၵႂႃႇၸူးၵႃႈတီႈ ၶုၼ် ဢၼ်ႇၼၢတ်ႉ ဢွၼ်တၢင်းဢေႃႈ။ ၶုၼ် ဢၼ်ႇၼၢတ်ႉ ၸမ်ႉ၊ ပဵၼ်ပူႇၼၢႆး ၵႃႇယၽႃႉ ဢၼ်ပဵၼ်ၶုၼ်ယိတ်ႈပရေႃးႁဵၵ်ႈၼႂ်းပီႊၼၼ်ႉၼၼ်ႉဢေႃႈ။-

14ၵႃႇယၽႃႉ ၼၼ်ႉၸမ်ႉ၊ ပဵၼ်ၵေႃႉဢၼ်တိူင်ႇပၢင်ႇလၢတ်ႈၸႃၵၼ်တင်းၵူၼ်း ယူႉတႃႉ တင်းလၢႆလႄႈဝႃႈ၊ တၢင်းဢၼ်ၵူၼ်းၵေႃႉၼိုင်ႈတၢႆပုၼ်ႈၵူၼ်းတင်းလၢႆၼၼ်ႉ ယဵင်ႈၶႅၼ်းလီဢေႃႈ၊ ဝႃႈၼင်ႇၼႆၼၼ်ႉဢေႃႈ။

15သီႉမုၼ်ႇပေႇတရူႉ တင်းတပႄးၸဝ်ႈတၢင်ႇၵေႃႉ ၸွမ်းပႃႈလင် ယေႇသူႉ ၵႂႃႇဢေႃႈ။ တပႄးၸဝ်ႈၼၼ်ႉ ပဵၼ်ၵေႃႉဢၼ် မိုတ်ႈၵိုဝ်းၵၼ်တင်းၶုၼ်ယိတ်ႈပရေႃးႁဵၵ်ႈလႄႈ ၶဝ်ႈလူၺ်ႈၵၼ်တင်း ယေႇသူႉ ၵႃႈတီႈၼႂ်းတလၢင်းဢၼ်မီး ၵႄႈႁိူၼ်းၶုၼ်ယိတ်ႈပရေႃးႁဵၵ်ႈၼၼ်ႉဢေႃႈ။-

16ပေႇတရူႉ ၸမ်ႉ၊ ၸုၵ်းယူႇၵႃႈတီႈႁိမ်းၽၵ်းတူၽၢႆႇၼွၵ်ႈဢေႃႈ။ ပိူဝ်ႈၼႆလႄႈ တပႄးၸဝ်ႈတၢင်ႇၵေႃႉဢၼ်မိုတ်ႈၵိုဝ်းၵၼ်တင်းၶုၼ်ယိတ်ႈပရေႃးႁဵၵ်ႈၼၼ်ႉဢွၵ်ႇၵႂႃႇလႄႈ လၢတ်ႈတီႈမႄႈယိင်းဢၼ်ပႂ်ႉၽၵ်းတူၼၼ်ႉသေယဝ်ႉ၊ ဢဝ် ပေႇတရူႉ ၶဝ်ႈမႃးဢေႃႈ။-

17ၵမ်းၼၼ်ႉ မႄႈယိင်းဢၼ်ပႂ်ႉၽၵ်းတူၼၼ်ႉ လၢတ်ႈတီႈ ပေႇတရူႉ လႄႈဝႃႈ၊ မႂ်းၶဝ်ႈပႃးၼႂ်းတပႄးၵူၼ်းၵေႃႉၼၼ်ႉဢမ်ႇၸႂ်ႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းထဵင်ပႅတ်ႈလႄႈဝႃႈ၊ ၵဝ်ဢမ်ႇၶဝ်ႈပႃးၵူၺ်ႉ၊ ဝႃႈၼင်ႇၼႆဢေႃႈ။

18မိူဝ်ႈၶိင်ႇၼၼ်ႉပိူဝ်ႈဢၼ်ၵတ်းလႄႈ ၶႃႈၵူၼ်းဢိၵ်ႇတင်းၵူၼ်းဢွၼ်ႇၸၢႆးၸိူဝ်းၼၼ်ႉ သႂ်ႇၵွင်ထၢၼ်ႇၽႆးလႄႈ ၸုၵ်းယူႇၵႃႈတီႈၼၼ်ႈသေလႄႈ ဢွမ်ႇၽႆးယူႇဢေႃႈ။ ပေႇတရူႉ ၵေႃႈ ၸုၵ်းယူႇလူၺ်ႈၵၼ်တင်းၶဝ်လႄႈဢွမ်ႇၽႆးယူႇဢေႃႈ။

19မိူဝ်ႈၼၼ်ႉၶုၼ်ယိတ်ႈပရေႃးႁဵၵ်ႈၼၼ်ႉ ၸႅတ်ႈထၢမ်ၸႅတ်ႈတူၺ်း ယေႇသူႉ လူၺ်ႈလွင်ႈတပႄးမၼ်းၸဝ်ႈတင်းလၢႆ ဢိၵ်ႇတင်းလူၺ်ႈလွင်ႈတေႇသၼႃႇမၼ်းၸဝ်ႈဢေႃႈ။-

20ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ၵဝ်ႁေႃးလၢတ်ႈထၢင်ႇထၢင်ႇသႃးသႃးၼႂ်းလေႃးၵႃႉၼႆႉယဝ်ႉ။ ၵဝ်သင်ႇသွၼ်သုင်းမႃႉပၼ် ၵႃႈၼႂ်းၸရွပ်ႈႁေႃးတြႃးတင်းလၢႆ ဢိၵ်ႇတင်းၵႃႈၼႂ်းပိၵ်ႈမၢၼ်ႇၸဝ်ႈ တီႈဢၼ်ၵူၼ်း ယူႉတႃႉ တင်းသဵင်ႈတင်းလူင်ၸူႉၵၼ်တုမ်ၵၼ်ၼၼ်ႉတႃႇသေႇဢမ်ႇထၢတ်ႇယဝ်ႉ။ ၵဝ်ဢမ်ႇႁေႃးဢမ်ႇလၢတ်ႈၼႂ်း တီႈဢၼ်လပ်ႉဢၼ်သိူင်ႇၼၼ်ႉလႃးလႃး။-

21ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ တွင်ႈထၢမ်ၵဝ်ၼင်ႇႁိုဝ်။ ၵဝ်ႁေႃးလၢတ်ႈၸိူဝ်ႉၼင်ႇႁိုဝ်ဝႃႈၼႆ တွင်ႈထၢမ်ၶဝ်ၸိူဝ်းဢၼ်လႆႈထွမ်ႇလႆႈငိၼ်းတင်းလၢႆၼၼ်ႉတႃႉ။ ၶဝ်ၼၼ်ႉႁူႉၵႂၢမ်းဢၼ်ၵဝ်လၢတ်ႈၼၼ်ႉယူႇဢေႃႈ၊ ဝႃႈၼင်ႇၼႆဢေႃႈ။

22မိူဝ်ႈဢၼ်မၼ်းၸဝ်ႈဝႃႈၸိူဝ်ႉၼင်ႇၼၼ်ၼၼ်ႉၸိုင်၊ ၵူၼ်းဢွၼ်ႇၸၢႆးဢၼ်ၸုၵ်းယူႇၵႃႈတီႈႁိမ်းၼၼ်ႉၵေႃႉၼိုင်ႈ ယႅၼ်ႉတူပ်ႇ ယေႇသူႉ သေလႄႈဝႃႈ၊ မႂ်းၶိုၼ်းလၢတ်ႈတီႈၶုၼ်ယိတ်ႈပရေႃးႁဵၵ်ႈၸိူဝ်ႉၼင်ႇၼႆႁိုဝ်၊ ဝႃႈၼင်ႇၼႆဢေႃႈ။-

23ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ပေႃးၵဝ်လၢတ်ႈဢမ်ႇလီၸိုင်၊ ၼႄပျႃးလွင်ႈဢၼ်ဢမ်ႇလီၼၼ်ႉသေၵမ်း။ ပေႃးၵဝ်လၢတ်ႈလီယူႇၸိုင် ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ယႅၼ်ႉတူပ်ႇၵဝ်ၼင်ႇႁိုဝ်။ ဝႃႈၼင်ႇၼႆဢေႃႈ။-

24ၶုၼ် ဢၼ်ႇၼၢတ်ႉ ႁႂ်ႈဢဝ်မၼ်းၸဝ်ႈၵႃႈၼင်ႇဢၼ်မတ်ႉၽုၵ်ႇဝႆႉယူႇၼၼ်ႉ ၵႂႃႇသူင်ႇၵႃႈတီႈ ၶုၼ်ယိတ်ႈပရေႃးႁဵၵ်ႈ ၵႃႇယၽႃႉ သေဢေႃႈ။

25ၼႂ်းမိူဝ်ႈဢၼ်၊ သီႉမုၼ်ႇပေႇတရူႉ ၸုၵ်းလႄႈဢွမ်ႇၽႆးယူႇၼၼ်ႉၸိုင်၊ ၵမ်ႈၽွင်ႈထၢမ်လႄႈဝႃႈ၊ မႂ်းၶဝ်ႈပႃးၼႂ်းတပႄးၵေႃႉၼၼ်ႉဢမ်ႇၸႂ်ႈႁိုဝ်၊ ဝႃႈၼင်ႇၼႆသေယဝ်ႉ၊ ပေႇတရူႉ ထဵင်ပႅတ်ႈလႄႈဝႃႈ၊ ၵဝ်ဢမ်ႇၶဝ်ႈပႃးၵူၺ်ႉ၊ ဝႃႈၼင်ႇၼႆဢေႃႈ။-

26ၶႃႈၶုၼ်ယိတ်ႈပရေႃးႁဵၵ်ႈ ဢၼ်ပဵၼ်ၸိူဝ်ႉၶိူဝ်းလဵဝ်ၵၼ်တင်းၵေႃႉဢၼ် ပေႇတရူႉ ၽၼ်းလႄႈဝၢၼ်ႁူၶၢတ်ႇၵႂႃႇၼၼ်ႉၵေႃႉၼိုင်ႈ ၵေႃႈလၢတ်ႈလႄႈဝႃႈ၊ ၵဝ်ႁၼ်မႂ်းမီးယူႇလူၺ်ႈၵၼ်တင်း ယေႇသူႉ ၵႃႈၼႂ်းသူၼ်ဢူးယဵၼ်ႇၼၼ်ႉယဝ်ႉဢမ်ႇၸႂ်ႈႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်၊-

27ပေႇတရူႉ သမ်ႉၶိုၼ်းထဵင်ပႅတ်ႈဢေႃႈ။ ၵႆႇၵေႃႈၶၼ်မိူဝ်ႈၼၼ်ႉၵမ်းလဵဝ်ဢေႃႈ။

28မိူဝ်ႈဢၼ်ထိုင်ၶိင်ႇၵၢင်ၼႂ်ၸဝ်ႉၸဝ်ႉၸိုင်၊ ၶဝ်ဢဝ် ယေႇသူႉ ဢွၵ်ႇသေၵႃႈတီႈ ၵႃႇယၽႃႉ လႄႈ ၵႂႃႇၵႃႈတီႈႁေႃဢေႃႈ။ ၵူၺ်းၵႃႈ ၶဝ်ၼၼ်ႉတူဝ်ၸဝ်ႈၵဝ်ႇဢမ်ႇၶဝ်ႈၵႃႈၼႂ်းႁေႃ ႁႂ်ႈလႆႈၵၢင်းလွတ်ႈတင်းဢႃႇပၢတ်ႈလႄႈ ၶၢမ်ႇပွႆး ပႃႉသၶႃႇ ဢေႃႈ။-

29ပိူဝ်ႈၼႆလႄႈ ၶုၼ် ပီႉလတ်ႉ ဢွၵ်ႇၸူးၵႃႈတီႈဢၼ်ၶဝ်မီးၼၼ်ႉသေလႄႈထၢမ်ဝႃႈ၊ သူတၢင်ႇဢပႅတ်ႈဢၼ်လႂ်တီႈၵေႃႉၼႆႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

30ၶဝ်ၼၼ်ႉၵေႃႈၶိုၼ်းလဝ်ႊလၢတ်ႈလႄႈဝႃႈ၊ ပေႃးၵေႃႉၼႆႉဢမ်ႇၸႂ်ႈၵူၼ်းႁၢႆႉၸိုင်၊ ႁဝ်းၶႃႈဢမ်ႇဢဝ်မၼ်းဢၢပ်ႈတီႈၸဝ်ႈႁဝ်းၶႃႈတီႈၶႃႈ၊ ဝႃႈၼင်ႇၼႆဢေႃႈ။-

31ပိူဝ်ႈၼႆလႄႈၶုၼ် ပီႉလတ်ႉ ၵေႃႈလၢတ်ႈလႄႈဝႃႈ၊ ဢဝ်မၼ်းလႄႈၸီႇယၢင်ႇၸွမ်းၼင်ႇထမ်ႇမသၢတ်ႈသူတႃႉ၊ ဝႃႈၼင်ႇၼႆဢေႃႈ။ ၵူၼ်း ယူႉတႃႉ ၸိူဝ်းၼၼ်ႉၵေႃႈလဝ်ႊလၢတ်ႈလႄႈဝႃႈ၊ ႁဝ်းၶႃႈဢမ်ႇပိူင်ႇဢဝ်ၽူႈလႂ်တၢႆသေၵေႃႉသေၵူၼ်းၶႃႈ၊ ဝႃႈၼင်ႇၼႆဢေႃႈ။-

32လွင်ႈဢၼ်လဝ်ႊလၢတ်ႈၸိူဝ်ႉၼင်ႇၼႆၼၼ်ႉၸမ်ႉ၊ ၼင်ႇႁိုဝ်ၵႂၢမ်းဢၼ် ယေႇသူႉ လၢတ်ႈၼႄလွင်ႈဢၼ်မၼ်းၸဝ်ႈတၵ်းလႆႈတၢႆၸိူဝ်ႉၼင်ႇႁိုဝ်ၼၼ်ႉ တၵ်းပျေႉၸုမ်ႇၸိုင်ၸင်ႇပဵၼ်ဢေႃႈ။

33ၶုၼ် ပီႉလတ်ႉ သမ်ႉၶိုၼ်းၶဝ်ႈၵႂႃႇၵႃႈၼႂ်းႁေႃလႄႈ ႁွင်ႉဢဝ် ယေႇသူႉ သေယဝ်ႉ၊ ထၢမ်လႄႈဝႃႈ၊ မႂ်းၸႂ်ႈၶုၼ်ႁေႃၶမ်း ယူႉတႃႉ ႁိုဝ်၊ ဝႃႈၼင်ႇၼႆဢေႃႈ။-

34ယေႇသူႉ ၵေႃႈထၢမ်လႄႈဝႃႈ၊ ၶုၼ်လူင်ထၢမ်ၸိူဝ်ႉၼင်ႇၼႆ ၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇႁိုဝ်။ ဢမ်ႇၼၼ်လႄႈ၊ ပိူၼ်ႈတၢင်ႇၵေႃႉလဝ်ႊလၢတ်ႈၸိူဝ်ႉၼင်ႇၼႆဝႆႉလွင်ႈၵဝ်ယဝ်ႉႁိုဝ်၊ ဝႃႈၼင်ႇၼႆဢေႃႈ။-

35ၶုၼ် ပီႉလတ်ႉ ၵေႃႈၶိုၼ်းလၢတ်ႈလႄႈဝႃႈ၊ ၵဝ်ပဵၼ်ၵူၼ်း ယူႉတႃႉ ႁိုဝ်။ ၵူၼ်းမဵဝ်းမႂ်းဢိၵ်ႇတင်း ယိတ်ႈပရေႃးႁဵၵ်ႈလူင်ၸိူဝ်းၼၼ်ႉ ဢဝ်မႂ်းဢၢပ်ႈတီႈၵဝ်ယဝ်ႉ။ မႂ်းႁဵတ်းမႅၼ်ႈၸိူဝ်ႉၼင်ႇႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်၊-

36ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ မိူင်းၵဝ်ဢမ်ႇၸၢပ်ႈသႅင်ႇၵၼ်တင်းလေႃးၵႃႉၼႆႉ။ ပေႃးမိူင်းၵဝ်ၸၢပ်ႈသႅင်ႇၵၼ်တင်းလေႃးၵႃႉၼႆႉၸိုင်၊ ၵူၼ်းၵဝ်တင်းလၢႆတၵ်းတိုၵ်းတေႃးဢမ်ႇႁႂ်ႈၵဝ်လႆႈႁွတ်ႈထိုင်ၼႂ်းမိုဝ်းၵူၼ်း ယူႉတႃႉ တင်းလၢႆၼႆႉဢေႃႈ။ တေႃႈလဵဝ်ၼႆႉၸမ်ႉ၊ မိူင်းၵဝ် ဢမ်ႇၸၢပ်ႈသႅင်ႇၵၼ်တင်း တေႇသႃႉတီႈၼႆႈ ၊ ဝႃႈၼင်ႇၼႆဢေႃႈ။-

37ၶုၼ် ပီႉလတ်ႉ ၵေႃႈထၢမ်လႄႈဝႃႈ၊ ပေႃးပဵၼ်ၸိူဝ်ႉၼင်ႇၼႆၸိုင်၊ မႂ်းၸႂ်ႈၶုၼ်ႁေႃၶမ်းႁိုဝ်၊ ဝႃႈၼင်ႇၼႆသေယဝ်ႉ၊ ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ၵဝ်ပဵၼ်ၶုၼ်ႁေႃၶမ်းမႅၼ်ႈၵႃႈၼင်ႇဢၼ်ၶုၼ်လူင်ထၢမ်ၼႆႉဢေႃႈ။ ၼင်ႇႁိုဝ်တၵ်းလႆႈၶၢမ်ႇသၢၵ်ႈသေႇ ၵႃႈတီႈၽၢႆႇသမ်ႇမႃႇတြႃးၸိုင်ၵဝ်ၶၢမ်ႇတၢင်းဢၼ်ၵိူတ်ႇလဵင်ႉမႃး ၼႂ်းလေႃးၵႃႉၼႆႉယဝ်ႉ။ ၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်း သမ်ႇမႃႇတြႃး ၵႃႈမီးတင်းသဵင်ႈတင်းလူင်ၼၼ်ႉထွမ်ႇဢဝ်ၵႂၢမ်းၵဝ်ဢေႃႈ၊ ဝႃႈၼင်ႇၼႆဢေႃႈ။

38ၶုၼ် ပီႉလတ်ႉ ၵေႃႈထၢမ်လႄႈဝႃႈ၊ သမ်ႇမႃႇတြႃးၼၼ်ႉၸမ်ႉ၊ ပဵၼ်ၸိူဝ်ႉၼင်ႇႁိုဝ်၊ ဝႃႈၼင်ႇၼႆသေယဝ်ႉ၊ သမ်ႉၶိုၼ်းဢွၵ်ႇၸူးၵႃႈတီႈၵူၼ်း ယူႉတႃႉ ၸိူဝ်းၼၼ်ႉလႄႈလၢတ်ႈဝႃႈ၊ ၵဝ်ဢမ်ႇထူပ်းဢပႅတ်ႈတီႈၵေႃႉၼႆႉသေၸိူဝ်ႉသေပိူင်။-

39ပိူဝ်ႈဢၼ်မီးထုင်းၸၢမ်ႇဢၼ်ၵဝ်လႆႈပွႆႇလွတ်ႈၵူၼ်းၵေႃႉၼိုင်ႈပၼ်တီႈသူ ၼႂ်းမိူဝ်ႈပွႆး ပႃႉသၶႃႇ လႄႈ၊ သူၶႂ်ႈႁႂ်ႈၵဝ်ပွႆႇလွတ်ႈၶုၼ်ႁေႃၶမ်း ယူႉတႃႉ ၼႆႉပၼ်တီႈသူႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်၊-

40ၶဝ်တင်းသဵင်ႈတင်းလူင်ၸိူဝ်းၼၼ်ႉၵေႃႈ ႁွင်ႉသႅၼ်ႇသေလႄႈလဝ်ႊလၢတ်ႈလႄႈဝႃႈ၊ ဢမ်ႇၶႂ်ႈႁႂ်ႈပွႆႇလွတ်ႈၵေႃႉၼႆႉၶႃႈ၊ ၶႂ်ႈႁႂ်ႈပွႆႇလွတ်ႈ ပႃႇရပ်ႉပႃႉ ၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။ ပႃႇရပ်ႉပႃႉ ၼၼ်ႉၸမ်ႉ၊ ပဵၼ်ၸူၼ်ဢေႃႈ။