John 8 — Shan

1ယေႇသူႉ ၵေႃႈၵႂႃႇၵႃႈတီႈလွႆ သၢၼ်ႇလုၼ်ႇ ၼၼ်ႉသေဢေႃႈ။-

2ၵၢင်ၼႂ်ၸဝ်ႉၸဝ်ႉ၊ မၼ်းၸဝ်ႈသမ်ႉၶိုၼ်းၶဝ်ႈၵႃႈၼႂ်းပိၵ်ႈမၢၼ်ႇၸဝ်ႈလႄႈ ၵူၼ်းတင်းသဵင်ႈတင်းလူင်မႃးၵႃႈတီႈမၼ်းၸဝ်ႈဢေႃႈ။ ၼႂ်းမိူဝ်ႈဢၼ်မၼ်းၸဝ်ႈယင်းတိုၵ်ႉၼင်ႈလႄႈသင်ႇသွၼ်သုင်းမႃႉပၼ်ယူႇၼၼ်ႉၸိုင်၊-

3ၵူၼ်းထုတ်ႇၵျၢမ်း ဢိၵ်ႇတင်း ၽႃႇရီႉသႄး တင်းလၢႆ ဢဝ်မႄႈယိင်းဢၼ်ထူပ်းၼႂ်းဢမူႉတၢင်းဢၼ်ၽိတ်းပိူင်ႈၼၼ်ႉ ၵေႃႉၼိုင်ႈမႃးလႄႈ ဢဝ်ဝႆႉၵႃႈတီႈၼႂ်းၶိုင်ႈၵၢင်သေယဝ်ႉ၊-

4လဝ်ႊလၢတ်ႈလႄႈဝႃႈ၊ သြႃႇၸဝ်ႈ။ လႆႈထူပ်းမႅၼ်ႈမႄႈယိင်းၼႆႉၼႂ်းမိူဝ်ႈဢၼ်မၼ်းယင်းတိုၵ်ႉႁဵတ်းဢမူႉ တၢင်းဢၼ်ၽိတ်းပိူင်ႈယူႇၼၼ်ႉၶႃႈယဝ်ႉ။-

5မႄႈယိင်းၸိူဝ်ႉၼင်ႇၼႆၸိုင် တၵ်းလႆႈဢဝ်တင်းမၢၵ်ႇႁိၼ်ထိမ်ႈဝႃႈၼႆ မူဝ်းသေႇ ၸီႇယၢင်ႇဝႆႉ ၼႂ်းပိင်းၺၢပ်ႈတြႃးတီႈႁဝ်းၶႃႈယဝ်ႉၶႃႈယဝ်ႉ။ ၼႂ်းဝႃႈၼၼ်သေၵေႃႈ ၸဝ်ႈႁဝ်းတၵ်းဝႃႈလွင်ႈမၼ်းၸိူဝ်ႉၼင်ႇႁိုဝ်ၶႃႈ၊ ဝႃႈၼင်ႇၼႆဢေႃႈ။-

6လွင်ႈဢၼ်ၶဝ်လဝ်ႊဝႃႈၸိူဝ်ႉၼင်ႇၼႆၼၼ်ႉၸမ်ႉ၊ ၼင်ႇႁိုဝ်တၵ်းမီးတီႈဢၼ်တၵ်းတၢင်ႇဢပႅတ်ႈတီႈမၼ်းၸဝ်ႈၸိုင်၊ ၶဝ်ၼၼ်ႉၸၢမ်းတူၺ်းယႃႉယူၵ်ႉမၼ်းၸဝ်ႈလႄႈ လဝ်ႈဝႃႈဢေႃႈ၊ ယေႇသူႉ ၵူမ်ႈယူႇသေလႄႈ ဢဝ်တင်းၼိဝ်ႉမိုဝ်းမၼ်းၸဝ်ႈၶိတ်ႇတႅမ်ႈၵႃႈတီႈလိၼ်ယူႇဢေႃႈ။-

7မိူဝ်ႈဢၼ်ၶဝ်ၼၼ်ႉ လဝ်ႊထၢမ်ၶိူဝ်းၶိူဝ်းယႂ်းယႂ်းယူႇၼၼ်ႉၸိုင်၊ မၼ်းၸဝ်ႈလုၵ်ႉငွၵ်ႈသေလႄႈလၢတ်ႈဝႃႈ၊ ၼႂ်းသူၼႆႉႁႂ်ႈၵေႃႉဢၼ်ၵၢင်းလွတ်ႈတင်းဢပႅတ်ႈၼၼ်ႉ ဢဝ်တင်းမၢၵ်ႇႁိၼ်ထိမ်ႈဢွၼ်တၢင်းတႃႉ၊ ဝႃႈၼင်ႇၼႆသေယဝ်ႉ၊-

8သမ်ႉၶိုၼ်းၵူမ်ႈလႄႈၶိတ်ႇတႅမ်ႈၵႃႈတီႈလိၼ်ယူႇဢေႃႈ။-

9ၶဝ်ၼၼ်ႉလႆႈငိၼ်းသေယဝ်ႉ၊ ပိူဝ်ႈဢၼ်ႁူဝ်ၸႂ်တူဝ်ၸဝ်ႈၵဝ်ႇၽုၺ်ႇၼႄဢပႅတ်ႈတူဝ်ၸဝ်ႈၵဝ်ႇလႄႈ ၸႃႉၸဵမ်ၵေႃႉဢၼ်ဢသၢၵ်ႈယႂ်ႇ တေႃႇထိုင်ႁွတ်ႈၵေႃႉဢၼ်ဢသၢၵ်ႈလဵၵ်ႉသေပိူၼ်ႈၵေႃႉၼိုင်ႈယဝ်ႉၵေႃႉၼိုင်ႈ ဢွၵ်ႇၵႂႃႇသေဢေႃႈ။ ယေႇသူႉ ၵိုတ်းၵျၢၼ်ႇယူႇပႃးလဵဝ်ၵူၺ်းလႄႈ မႄႈယိင်းၼၼ်ႉၸုၵ်းယူႇၵႃႈတီႈၶိုင်ႈၵၢင်ၼၼ်ႉဢေႃႈ။

10မိူဝ်ႈၼၼ်ႉ ယေႇသူႉ ၶိုၼ်းလုၵ်ႉငွၵ်ႈလႄႈ လိူဝ်သေမႄႈယိင်းၼၼ်ႉၵေႃႉလဵဝ်ၵူၺ်း၊ မိူဝ်ႈဢၼ်ဢမ်ႇႁၼ်ၽူႈလႂ်သေၵေႃႉသေၵူၼ်းၼၼ်ႉၸိုင် ထၢမ်လႄႈဝႃႈ၊ မႄႈယိင်းဢိူၺ်း၊ ၶဝ်ၸိူဝ်းဢၼ်တၢင်ႇဢပႅတ်ႈတီႈမႂ်းၸိူဝ်းၼၼ်ႉမီးၵႃႈလႂ်။ ၽူႈလႂ်သေၵေႃႉသေၵူၼ်းဢမ်ႇၸီႇယၢင်ႇဢမူႉမႂ်းႁိုဝ်၊ ဝႃႈၼင်ႇၼႆဢေႃႈ။-

11မၼ်းၵေႃႈလဝ်ႊလၢတ်ႈလႄႈဝႃႈ၊ ၽူႈလႂ်သေၵေႃႉသေၵူၼ်းဢမ်ႇၸီႇယၢင်ႇၶႃႈၸဝ်ႈ၊ ဝႃႈၼင်ႇၼႆဢေႃႈ။ မၼ်းၸဝ်ႈၵေႃႈလၢတ်ႈလႄႈဝႃႈ၊ ၵဝ်ၵေႃႈဢမ်ႇၸီႇယၢင်ႇဢမူႉမႂ်း။ ၵႂႃႇတႃႉ။ ၵမ်းလိုၼ်းယႃႇပေႁဵတ်းတူႉၸရိူၵ်ႈဢပႅတ်ႈထႅင်ႈ၊ ဝႃႈၼင်ႇၼႆသေဢေႃႈ။

12လႆႈသမ်ႉ ယေႇသူႉ ၵေႃႈလၢတ်ႈလႄႈဝႃႈ၊ ၵဝ်ပဵၼ်ဢၼ်လႅင်းလေႃးၵႃႉၼႆႉဢေႃႈ။ ၵေႃႉဢၼ်ၸွမ်းပႃႈလင်ၵဝ်ၼႆႉၼၼ်ႉဢမ်ႇၵႂႃႇဢမ်ႇမႃးၵႃႈၼႂ်းလပ်းသိင်ႇ။ တၵ်းလႆႈဢၼ်လႅင်းဢသၢၵ်ႈဢေႃႈ၊ ဝႃႈၼင်ႇၼႆဢေႃႈ။-

13ၽႃႇရီႉသႄး တင်းလၢႆၵေႃႈလၢတ်ႈလႄႈဝႃႈ၊ မႂ်းၶၢမ်ႇသၢၵ်ႈသေႇလွင်ႈတူဝ်ၸဝ်ႈၵဝ်ႇဢေႃႈ။ သၢၵ်ႈသေႇမႂ်းၼႆႉဢမ်ႇတႄႇ၊ ဝႃႈၼင်ႇၼႆဢေႃႈ။-

14ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ပိၵ်ႉသမ်ႉၵဝ်ၶၢမ်ႇသၢၵ်ႈသေႇလွင်ႈတူဝ်ၸဝ်ႈၵဝ်ႇသေၵေႃႈ၊ သၢၵ်ႈသေႇၵဝ်ၼႆႉတႄႇယူႇဢေႃႈ။ လွင်ႈမၼ်းၸမ်ႉ ၵဝ်လုၵ်ႉၵႃႈတီႈလႂ်မႃးဝႃႈၼႆလႄႈသင်၊ ၵဝ်ၵႂႃႇၵႃႈတီႈလႂ်ပုၼ်ႉဝႃႈၼႆလႄႈသင်၊ ၵဝ်ႁူႉယူႇဢေႃႈ။ ၵဝ်လုၵ်ႉၵႃႈတီႈလႂ်မႃးဝႃႈၼႆလႄႈသင်၊ ၵဝ်ၵႂႃႇၵႃႈတီႈလႂ်ဝႃႈၼႆလႄႈသင်၊ သူၸမ်ႉ၊ ဢမ်ႇႁူႉ။-

15သူၸၢင်ႈၸီႇယၢင်ႇၸွမ်းၼင်ႇၸႃႇတီႉပၵတီႉဢေႃႈ။ ၵဝ်ၸမ်ႉ၊ ဢမ်ႇၸီႇယၢင်ႇၽူႈလႂ်သေၵေႃႉသေၵူၼ်း။-

16ၵူၺ်းၵႃႈ သင်ၵဝ်ၸီႇယၢင်ႇၸိုင်၊ တၢင်းဢၼ်ၵဝ်ၸီႇယၢင်ႇၼၼ်ႉတႄႇယူႇဢေႃႈ။ လွင်ႈမၼ်းၸမ်ႉ ၵဝ်ၼႆႉယူႇၵေႃႉလဵဝ်ၵူၺ်းဢမ်ႇၸႂ်ႈ။ ပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉယူႇၽၢႆႇၵဝ်ယူႇဢေႃႈ။-

17ၵႂၢမ်းၵူၼ်းၶၢမ်ႇသၢၵ်ႈသေႇသွင်ၵေႃႉတၵ်းလႆႈတႄႇဢေႃႈဝႃႈၼႆ တႅမ်ႈဝႆႉမီးယူႇၼႂ်းၵျၢမ်းလိၵ်ႈပိင်းၺၢပ်ႈတီႉသူၼၼ်ႉဢေႃႈ။-

18ၵဝ်ပဵၼ်ၵေႃႉဢၼ်ၶၢမ်ႇသၢၵ်ႈသေႇလွင်ႈတူဝ်ၸဝ်ႈၵဝ်ႇဢေႃႈ။ ပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉၵေႃႈ၊ ၶၢမ်ႇသၢၵ်ႈသေႇလွင်ႈၵဝ်ယူႇ၊ ဝႃႈၼင်ႇၼႆဢေႃႈ။-

19ၶဝ်ၼၼ်ႉၵေႃႈထၢမ်လႄႈဝႃႈ၊ ပေႃႈမႂ်းမီးၵႃႈလႂ်၊ ဝႃႈၼင်ႇၼႆဢေႃႈ။ ယေႇသူႉ ၵေႃႈလၢတ်ႈလႄႈဝႃႈ၊ သူဢမ်ႇႁူႉၵဝ်၊ ပေႃႈၸဝ်ႈၼၼ်ႉၵေႃႈသူဢမ်ႇႁူႉ၊ ပေႃးသူႁူႉၵဝ်ၸိုင် ၸဝ်ႈပေႃႈၵဝ်ၼၼ်ႉၵေႃႈသူတၵ်းႁူႉဢေႃႈ၊ ဝႃႈၼင်ႇၼႆဢေႃႈ။

20ၼႂ်းမိူဝ်ႈဢၼ်ယင်းတိုၵ်ႉသင်ႇသွၼ်သုင်းမႃႉပၼ်ၼႂ်းပိၵ်ႈမၢၼ်ႇၸဝ်ႈယူႇၼၼ်ႉၸိုင်၊ မၼ်းၸဝ်ႈလၢတ်ႈၵႂၢမ်းၼႆႉ ၼႂ်းတိူၵ်ႈၽၼ်ႇတႃႇၼၼ်ႉဢေႃႈ။ ပိူဝ်ႈဢၼ်ၶိင်ႇမၼ်းၸဝ်ႈဢမ်ႇပႆႇႁွတ်ႈပႆႇထိုင်လႄႈ ၽူႈလႂ်သေၵေႃႉသေၵူၼ်းဢမ်ႇတီႉဢမ်ႇဢဝ်မၼ်းၸဝ်ႈ။

21လႆႈသမ်ႉ မၼ်းၸဝ်ႈသမ်ႉလၢတ်ႈလႄႈဝႃႈ၊ ၵဝ်တၵ်းလႆႈၵႂႃႇဢေႃႈ။ သူတၵ်းႁႃၵဝ်ဢေႃႈ။ သူတၵ်းတၢႆၵႃႈတီႈၼႂ်းဢပႅတ်ႈသူဢေႃႈ။ တီႈဢၼ်ၵဝ်ၵႂႃႇပုၼ်ႉၸိုင်၊ သူဢမ်ႇႁွတ်ႈထိုင်လႆႈ၊ ဝႃႈၼင်ႇၼႆဢေႃႈ။-

22ၵူၼ်း ယူႉတႃႉ တင်းလၢႆၵေႃႈလၢတ်ႈလႄႈဝႃႈ၊ မိူဝ်ႈဢၼ်မၼ်းဝႃႈ၊ တီႈဢၼ်ၵဝ်ၵႂႃႇပုၼ်ႉၸိုင်၊ သူဢမ်ႇႁွတ်ႈထိုင်လႆႈ၊ ဝႃႈၼင်ႇၼႆၼၼ်ႉၸိုင်၊ မၼ်းတၵ်းဢဝ်ဢသၢၵ်ႈမၼ်းတၢႆႁိုဝ်၊ ဝႃႈၼင်ႇၼႆဢေႃႈ။-

23မၼ်းၸဝ်ႈၵေႃႈလၢတ်ႈလႄႈဝႃႈ၊ သူပဵၼ်ၵူၼ်းၵႃႈတႂ်ႈဢေႃႈ။ ၵဝ်ၸမ်ႉ၊ ပဵၼ်ၵူၼ်းၵႃႈၼိူဝ်ဢေႃႈ၊ သူပဵၼ်ၵူၼ်းလေႃးၵီႇဢေႃႈ။ ၵဝ်ၸမ်ႉ၊ ဢမ်ႇၸႂ်ႈၵူၼ်းလေႃးၵီႇ။-

24ပိူဝ်ႈၼႆလႄႈသူတၵ်းတၢႆၵႃႈတီႈၼႂ်းဢပႅတ်ႈသူဢေႃႈ ဝႃႈၼႆ၊ ၵဝ်ဝႃႈဢေႃႈ။ ပေႃးသူဢမ်ႇယုမ်ႇလွင်ႈဢၼ်ၵဝ်ပဵၼ် ၵေႃႉၼၼ်ႉၸိုင်၊ သူတၵ်းတၢႆၵႃႈတီႈၼႂ်းဢပႅတ်ႈသူဢေႃႈ၊ ဝႃႈၼင်ႇၼႆဢေႃႈ။-

25ၶဝ်ၼၼ်ႉၵေႃႈထၢမ်လႄႈဝႃႈ၊ မႂ်းပဵၼ်ၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ ယေႇသူႉ ၵေႃႈလၢတ်ႈလႄႈဝႃႈ ၵဝ်ပဵၼ်ယူႇၵႃႈၼင်ႇဢၼ်ၵဝ်လၢတ်ႈတီႈသူ ၸဵမ်မိူဝ်ႈၵေႃႇၸႃႉမၼ်းၼၼ်ႉဢေႃႈ။-

26တီႈဢၼ် ၵဝ်လီလၢတ်ႈလီဝႃႈလႄႈ ၸီႇယၢင်ႇလွင်ႈသူၸိုင်မီးၼမ်ၼႃႇဢေႃႈ။ ၼႂ်းဝႃႈၼၼ်သေၵေႃႈ ၵေႃႉဢၼ်ပွႆႇၸႂ်ႉၵဝ်မႃးၼၼ်ႉပျေႉၸုမ်ႇတင်းသဵတ်ႈၸႃႇဢေႃႈ။ ၵဝ်ႁေႃးလၢတ်ႈ ၵႃႈဢၼ်ၵဝ်လႆႈငိၼ်းတီႈမၼ်းၸဝ်ႈၼၼ်ႉၵူၺ်း ၼႂ်းလေႃးၵႃႉၼႆႉဢေႃႈ၊ ဝႃႈၼင်ႇၼႆဢေႃႈ။-

27လွင်ႈဢၼ်မၼ်းၸဝ်ႈ ဢဝ်လွင်ႈပေႃႈၸဝ်ႈသေလႄႈ ဝႃႈၸိူဝ်ႉၼင်ႇၼႆၼၼ်ႉၸိုင်ၶဝ်ၼၼ်ႉဢမ်ႇႁူႉ။

28ပိူဝ်ႈၼႆလႄႈ ယေႇသူႉ ၵေႃႈလၢတ်ႈလႄႈဝႃႈ၊ မိူဝ်ႈဢၼ်သူယုၵ်ႉလုၵ်ႈၵူၼ်းဝႆႉၼၼ်ႉၸိုင်၊ သူတၵ်းလႆႈႁူႉလွင်ႈဢၼ်ၵဝ်ပဵၼ်ၵေႃႉၼၼ်ႉ ဢိၵ်ႇတင်းလွင်ႈဢၼ်ၵဝ်ဢမ်ႇႁဵတ်းၵႃႈသင် ၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇလႄႈ ၵဝ်ႁေႃးလၢတ်ႈၵႃႈၼင်ႇဢၼ် ပေႃႈၵဝ်သွၼ်ပၼ်တီႈၵဝ်ၼၼ်ႉၵူၺ်းၼၼ်ႉဢေႃႈ။-

29ၵေႃႉဢၼ်ပွႆႇၸႂ်ႉၵဝ်မႃးၼၼ်ႉမီးယူႇလူၺ်ႈၵၼ်တင်းၵဝ်ဢေႃႈ။ မၼ်းၸဝ်ႈဢမ်ႇၸုၼ်ႉပႅတ်ႈၵဝ် ႁႂ်ႈၵဝ်လႆႈယူႇၵေႃႉလဵဝ်ၵူၺ်း။ လွင်ႈမၼ်းၸမ်ႉ ၵဝ်ႁဵတ်းလွင်ႈတၢင်းဢၼ် ထုၵ်ႇၸႂ်မၼ်းၸဝ်ႈၼၼ်ႉ ယူႇတႃႇသေႇဢမ်ႇထၢတ်ႇဢေႃႈ၊ ဝႃႈၼင်ႇၼႆဢေႃႈ။-

30ၼႂ်းမိူဝ်ႈဢၼ် မၼ်းၸဝ်ႈယင်းတိုၵ်ႉလၢတ်ႈၵႂၢမ်းၼႆႉယူႇၼၼ်ႉၸိုင်၊ ၵူၼ်းၼမ်ၼႃႇ ႁွတ်ႈထိုင်တၢင်းဢၼ်ယုမ်ႇမၢတ်ႈဢေႃႈ။

31မိူဝ်ႈၼၼ်ႉ ယေႇသူႉ ၵေႃႈလၢတ်ႈ တီႈၵူၼ်း ယူႉတႃႉ ဢၼ်ယုမ်ႇမၢတ်ႈၸိူဝ်းၼၼ်ႉလႄႈဝႃႈ၊ ပေႃးသူတႄႇယူႇၼႂ်းတေႇသၼႃႇၵဝ်ၸိုင်၊ သူပဵၼ်တပႄးၵဝ်ဢမၢၼ်ႇၶၼ်ပဵၼ်ဢေႃႈ။-

32သမ်ႇမႃႇတြႃးၵေႃႈသူတၵ်းႁူႉဢေႃႈ။ တြႃးၼႆႉတၵ်းပွႆႇသူလွတ်ႈဢေႃႈ၊ ဝႃႈၼင်ႇၼႆဢေႃႈ။-

33ၶဝ်ၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ႁဝ်းပဵၼ်ၸိူဝ်ႉၶိူဝ်း ဢႃႇပြႃႇႁၢမ်ႇ ဢေႃႈ။ ဢမ်ႇပႆႇလႆႈၶၢမ်ႇႁဵတ်းၶႃႈတီႈၽူႈလႂ်သေၵေႃႉသေၵူၼ်းသေပွၵ်ႈ။ တၵ်းပွႆႇသူလွတ်ႈဢေႃႈ၊ ဝႃႈၼႆမႂ်းၼႆႉလၢတ်ႈဝႃႈၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။-

34ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၶဝ်ၸိူဝ်းဢၼ်ႁဵတ်းတူႉၸရိူၵ်ႈၵႃႈမီးတင်းသဵင်ႈတင်းလူင်ၼၼ်ႉ ပဵၼ်ၶႃႈတူႉၸရိူၵ်ႈဢေႃႈ။-

35ၶႃႈၸမ်ႉ၊ ယူႇၼႂ်းႁိူၼ်းၵူႈၶိင်ႇၵူႈၶႃႇတႃႇသေႇဢမ်ႇၸႂ်ႈ။ လုၵ်ႈၸမ်ႉ၊ ယူႇၵူႈၶိင်ႇၵူႈၶႃႇတႃႇသေႇဢေႃႈ။-

36ပိူဝ်ႈၼႆလႄႈ ပေႃးလုၵ်ႈပွႆႇသူလွတ်ႈၸိုင် သူတၵ်းလွတ်ႈဢမၢၼ်ႇၶၼ်ပဵၼ်ဢေႃႈ။-

37ၵဝ်ႁူႉလွင်ႈဢၼ်သူပဵၼ် ၸိူဝ်ႉၶိူဝ်း ဢႃႇပြႃႇႁၢမ်ႇ ယူႇဢေႃႈ။ ၼႂ်းဝႃႈၼၼ်သေၵေႃႈ ပိူဝ်ႈဢၼ်တေႇသၼႃႇၵဝ် ဢမ်ႇလႆႈတီႈဢၼ်တၵ်းတႄႇယူႇၼႂ်းသူလႄႈ သူၵျၢမ်ႇႁႃႁႂ်ႈလႆႈဢဝ်ၵဝ်တၢႆယူႇဢေႃႈ။-

38ၵဝ်ႁေႃးလၢတ်ႈ ၵႃႈၼင်ႇဢၼ် ၵဝ်လႆႈႁၼ်တီႈပေႃႈၸဝ်ႈယဝ်ႉၼၼ်ႉဢေႃႈ။ သူႁဵတ်းၵႃႈၼင်ႇဢၼ်သူလႆႈႁၼ် တီႈပေႃႈသူယဝ်ႉၼၼ်ႉဢေႃႈ၊ ဝႃႈၼင်ႇၼႆဢေႃႈ။

39ၶဝ်ၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ဢႃႇပြႃႇႁၢမ်ႇ ၼၼ်ႉပဵၼ်ပေႃႈႁဝ်းဢေႃႈ၊ ဝႃႈၼင်ႇၼႆဢေႃႈ။ ယေႇသူႉ ၵေႃႈလၢတ်ႈလႄႈဝႃႈ၊ ပေႃးသူၸႂ်ႈလုၵ်ႈ ဢႃႇပြႃႇႁၢမ်ႇ ၸိုင် သူတၵ်းၵမ်ၵျၢင်ႉ တၢင်းၵမ်တၢင်းၵျၢင်ႉ ဢႃႇပြႃႇႁၢမ်ႇ ဢေႃႈ။-

40တေႃႈလဵဝ်ၼႆႉသူၵျၢမ်ႇႁႃႁႂ်ႈလႆႈဢဝ်ၵဝ် ဢၼ်ပဵၼ်ၵေႃႉဢၼ်ႁေႃးလၢတ်ႈတြႃးသဵတ်ႈၸႃႇ ဢၼ်လႆႈငိၼ်းတီႈၽြႃးပဵၼ်ၸဝ်ႈၼၼ်ႉတီႈသူၼႆႉတၢႆယူႇဢေႃႈ။ ဢႃႇပြႃႇႁၢမ်ႇ ၵမ်ၵျၢင်ႉၸိူဝ်ႉၼင်ႇၼႆဢမ်ႇၸႂ်ႈ။-

41သူၼႆႉ ၵမ်ၵျၢင်ႉ တၢင်းၵမ်တၢင်းၵျၢင်ႉပေႃႈသူဢေႃႈ၊ ဝႃႈၼင်ႇၼႆဢေႃႈ။ ၶဝ်ၼၼ်ႉၵေႃႈလၢတ်ႈလႄႈဝႃႈ၊ ႁဝ်းပဵၼ်ၸိူဝ်ႉၶိူဝ်းမႄႈမွၵ်ႇယႃႈဢမ်ႇၸႂ်ႈ၊ ပေႃႈႁဝ်းဢၼ်ဝႃႈၽြႃးပဵၼ်ၸဝ်ႈၼၼ်ႉမီးယူႇပႃးလဵဝ်ၵူၺ်းဢေႃႈ၊ ဝႃႈၼင်ႇၼႆဢေႃႈ။-

42ယေႇသူႉ ၵေႃႈလၢတ်ႈလႄႈဝႃႈ၊ ပေႃးၽြႃးပဵၼ်ၸဝ်ႈၸႂ်ႈပေႃႈသူၸိုင်၊ သူတၵ်းႁၵ်ႉၵဝ်ဢေႃႈ လွင်ႈမၼ်းၸမ်ႉ ၵဝ်ဢွၵ်ႇသေၵႃႈတီႈၽြႃးပဵၼ်ၸဝ်ႈလႄႈႁွတ်ႈမႃးဢေႃႈ။ မႃးၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ။ ၽြႃးပဵၼ်ၸဝ်ႈပွႆႇၸႂ်ႉၵဝ်မႃးဢေႃႈ။-

43ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူဢမ်ႇႁူႉၵႂၢမ်းၵဝ်ၼင်ႇႁိုဝ်။ ပိူဝ်ႈဢၼ်သူဢမ်ႇထွမ်ႇဢမ်ႇဢဝ်တေႇသၼႃႇၵဝ်လႆႈလႄႈ သူဢမ်ႇႁူႉၵႂၢမ်းၵဝ်။-

44သူသိုပ်ႇလူင်းမႃးၵႃႈတီႈပေႃႈသူဢၼ်ဝႃႈ မႃႇၼၢတ်ႈၼၼ်ႉဢေႃႈ။ ဢလူဝ်ႇပေႃႈသူၵေႃႈ သူၸၢင်ႈထွမ်ႇဢဝ်ဢေႃႈ။ မၼ်းၼၼ်ႉပဵၼ်ၵေႃႉဢၼ်ဢဝ်ဢသၢၵ်ႈၵူၼ်းတၢႆ ၸႃႉၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉဢေႃႈ။ ပိူဝ်ႈဢၼ်သဵတ်ႈၸႃႇတြႃးဢမ်ႇမီးၼႂ်းမၼ်းလႄႈ မၼ်းဢမ်ႇတႄႇဢမ်ႇယူႇ ၵႃႈၼႂ်းသဵတ်ႈၸႃႇတြႃးၼၼ်ႉ။ မိူဝ်ႈဢၼ်မၼ်းလၢတ်ႈၵႂၢမ်းမူႉသႃႇၸိုင် မၼ်းလၢတ်ႈၸွမ်းၼင်ႇပၵတီႉတူဝ်ၸဝ်ႈၵဝ်ႇဢေႃႈ။ လွင်ႈမၼ်းၸမ်ႉ မၼ်းၸၢင်ႈလၢတ်ႈၵႂၢမ်းမူႉသႃႇဢေႃႈ။ ပေႃႈမူႉသႃႇၵေႃႈပဵၼ်ဢေႃႈ။-

45ပိူဝ်ႈဢၼ်ၵဝ်လၢတ်ႈၵႂၢမ်းသဵတ်ႈၸႃႇလႄႈ သူဢမ်ႇယုမ်ႇၵဝ်။

46ၼႂ်းသူၼႆႉၽူႈလႂ်တၵ်းၽုၺ်ႇဢွၵ်ႇၼႄပျႃးလွင်ႈဢၼ်ဢပႅတ်ႈမီးၵႃႈတီႈၵဝ်။ ပေႃးၵဝ်လၢတ်ႈၵႂၢမ်းသဵတ်ႈၸႃႇယူႇၸိုင်၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူဢမ်ႇယုမ်ႇမၢတ်ႈၼင်ႇႁိုဝ်။-

47ၵေႃႉဢၼ်ၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈၼၼ်ႉ ၸၢင်ႈထွမ်ႇဢဝ်ၵႂၢမ်းၽြႃးပဵၼ်ၸဝ်ႈဢေႃႈ။ ပိူဝ်ႈဢၼ်သူဢမ်ႇၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈလႄႈ သူဢမ်ႇထွမ်ႇဢမ်ႇဢဝ်၊ ဝႃႈၼင်ႇၼႆဢေႃႈ။

48ၵူၼ်း ယူႉတႃႉ ၸိူဝ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ၵႂၢမ်းဢၼ်ႁဝ်းလၢတ်ႈလႄႈဝႃႈ၊ မႂ်းပဵၼ်ၵူၼ်း သမႃႇရီႉ ဢေႃႈ။ ၵေႃႉဢၼ်ၽီႁၢႆႉၶဝ်ႈၵေႃႈပဵၼ်ဢေႃႈ၊ ဝႃႈၼင်ႇၼႆၼၼ်ႉမႅၼ်ႈယူႇဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။-

49ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ၵဝ်ပဵၼ်ၵေႃႉဢၼ်ၽီႁၢႆႉၶဝ်ႈဢမ်ႇၸႂ်ႈ။ ၵဝ်ယွင်ႈယေႃးပေႃႈၵဝ်ဢေႃႈ။ သူယႃႉသရေႇၵဝ်ဢေႃႈ။-

50ၵဝ်ဢမ်ႇႁႃဢဝ်မုၼ်သရေႇတူဝ်ၸဝ်ႈၵဝ်ႇ။ ၵေႃႉဢၼ်ႁႃမုၼ်သရေႇၵဝ်လႄႈၸီႇယၢင်ႇၼၼ်ႉ ယင်းမီးယူႇလူးၵွၼ်ႇဢေႃႈ။-

51ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်ႉ၊ ၵေႃႉဢၼ်ထွမ်ႇဢဝ်ၵႂၢမ်းၵဝ်ၼႆႉၼၼ်ႉ တၵ်းၵၢင်းလွတ်ႈတင်း တၢင်းတၢႆယူႇတႃႇသေႇဢမ်ႇထၢတ်ႇဢေႃႈ၊ ဝႃႈၼင်ႇၼႆဢေႃႈ။-

52ၵူၼ်း ယူႉတႃႉ ၸိူဝ်းၼၼ်ႉၵေႃႈလၢတ်ႈလႄႈဝႃႈ၊ တေႃႈလဵဝ်ၼႆႉ ႁဝ်းႁူႉလွင်ႈဢၼ် ၽီႁၢႆႉၶဝ်ႈၼႂ်းမႂ်းဢေႃႈ။ ၸႃႉၸဵမ် ဢႃႇပြႃႇႁၢမ်ႇ လႄႈ ပရေႃးၽႅတ်ႈၸိူဝ်းၼၼ်ႉလႆႈတၢႆၵႂႃႇယဝ်ႉ။ ဢၼ်မႂ်းလၢတ်ႈလႄႈဝႃႈၼႆႉၸမ်ႉ၊ ၵေႃႉဢၼ်ထွမ်ႇဢဝ်ၵႂၢမ်းၵဝ်ၼႆႉၼၼ်ႉ တၵ်းၵၢင်းလွတ်ႈတင်းတၢင်းတၢႆယူႇတႃႇသေႇဢမ်ႇထၢတ်ႇဢေႃႈ၊ ဝႃႈၼင်ႇၼႆလူင်ပႄႇ။-

53မႂ်းၼႆႉယဵင်ႈၶႅၼ်းယႂ်ႇမျၢတ်ႈၼႃႇသေ ပေႃႈႁဝ်း ဢႃႇပြႃႇႁၢမ်ႇ ၼၼ်ႉလူးၵွၼ်ႇႁိုဝ်။ မၼ်းၼၼ်ႉလႆႈတၢႆၵႂႃႇယဝ်ႉ။ ပရေႃးၽႅတ်ႈၸိူဝ်းၼၼ်ႉၵေႃႈလႆႈတၢႆၵႂႃႇယဝ်ႉ။ မႂ်းႁဵတ်းပုင်ႇႁၢင်ႈၽူႈလႂ်၊ ဝႃႈၼင်ႇၼႆဢေႃႈ။-

54ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ သင်ၵဝ်ၼႄပျႃးမုၼ်ၽုင်းတူဝ်ၸဝ်ႈၵဝ်ႇၸိုင် ပဵၼ်ဢၼ်လၢႆလၢႆ ဢမ်ႇပွင်ႇလွင်ႈဢေႃႈ။ ၸဝ်ႈပေႃႈၵဝ်ၼၼ်ႉ ပဵၼ်ၵေႃႉဢၼ် ႁႂ်ႈမုၼ်ၽုင်းၵဝ်ထၢင်ႇသႃးမႃးဢေႃႈ။ မၼ်းၸဝ်ႈၼၼ်ႉၸိုင်၊ သူၸၢင်ႈႁွင်ႉဝႃႈ ၽြႃးပဵၼ်ၸဝ်ႈႁဝ်း၊ ဝႃႈၼင်ႇၼႆဢေႃႈ။-

55ၼႂ်းဝႃႈၼၼ်သေၵေႃႈ သူဢမ်ႇႁူႉမၼ်းၸဝ်ႈၼၼ်ႉ။ ၵဝ်ၸမ်ႉ၊ ႁူႉမၼ်းၸဝ်ႈဢေႃႈ။ သင်ၵဝ်ဝႃႈ၊ ၵဝ်ဢမ်ႇႁူႉ၊ ဝႃႈၼင်ႇၼႆၸိုင်၊ ၵဝ်တၵ်းပဵၼ်ၵေႃႉဢၼ်လၢတ်ႈမူႉသႃႇ မိူၼ်ၸိူဝ်ႉၼင်ႇသူဢေႃႈ။ မၼ်းၸဝ်ႈၸိုင်ၵဝ်ႁူႉယူႇဢေႃႈ။ ၵႂၢမ်းမၼ်းၸဝ်ႈၵေႃႈ ၵဝ်ထွမ်ႇဢဝ်ဢေႃႈ။-

56ပေႃႈသူ ဢႃႇပြႃႇႁၢမ်ႇ ၼၼ်ႉ မီးဢလူဝ်ႇၶႂ်ႈထူပ်းႁၼ် ၶိင်ႇၵႃႇလႃႉဝၼ်းၵဝ်ၼႆႉဢေႃႈ။ မိူဝ်ႈဢၼ်မၼ်းလႆႈထူပ်းႁၼ်ၸိုင်၊ မၼ်းႁွတ်ႈထိုင်တၢင်းဢၼ်သိူဝ်းပျေႃႇဢေႃႈ၊ ဝႃႈၼင်ႇၼႆဢေႃႈ။-

57ပိူဝ်ႈၼႆလႄႈ ၵူၼ်း ယူႉတႃႉ ၸိူဝ်းၼၼ်ႉၵေႃႈလၢတ်ႈလႄႈဝႃႈ၊ ဢသၢၵ်ႈမႂ်းဢမ်ႇပႆႇလႆႈႁႃႈသိပ်းပီႊလႄႈ မႂ်းလႆႈႁၼ် ဢႃႇပြႃႇႁၢမ်ႇ ၼၼ်ႉယဝ်ႉလူင်ပႄႇ၊ ဝႃႈၼင်ႇၼႆဢေႃႈ။-

58ယေႇသူႉ ၵေႃႈလၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်ႉ၊ ၵဝ်ပဵၼ်ၸူဝ်ႈဢၼ် ဢႃႇပြႃႇႁၢမ်ႇ ဢမ်ႇပႆႇပဵၼ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။-

59မိူဝ်ႈၼၼ်ႉၶဝ်ဢွၼ်ၵၼ် ၵဵပ်းဢဝ်မၢၵ်ႇႁိၼ်ႁႂ်ႈလႆႈထိမ်ႈမၼ်းၸဝ်ႈဢေႃႈ။ ယေႇသူႉ လပ်ႉဝႄႈ လတ်းၶိုင်ႈၵၢင်ၶဝ်ၼၼ်ႉသေယဝ်ႉ၊ ဢွၵ်ႇၵႂႃႇၵႃႈၼႂ်းပိၵ်ႈမၢၼ်ႇၸဝ်ႈၼၼ်ႉသေဢေႃႈ။