John 21

Shan

← Chapter 20 Jump to:

1လိုၼ်းၼၼ်ႉ ယေႇသူႉ ၼႄပျႃးတူဝ်ၸဝ်ႈၵဝ်ႇ တီႈတပႄးၸဝ်ႈၵမ်ႈၽွင်ႈ ၵႃႈတီႈႁိမ်းၼွင် တီႉပေႇရီႉ ဢေႃႈ။ လွင်ႈတၢင်းဢၼ် မၼ်းၸဝ်ႈၼႄပျႃးၼၼ်ႉၸမ်ႉ၊-

2မီး သီႉမုၼ်ႇပေႇတရူႉ ဢိၵ်ႇတင်း ထူဝ်းမႃႉ ဢၼ်လႆႈၸိုဝ်ႈ တီႉတူႉမူႉ တင်း ၼႃႇသၼေႇလႃႉ ၵူၼ်းဝဵင်း ၵႃႇၼႃႉ မိူင်း ၵႃႇလီႉလႄး တင်းလုၵ်ႈၸၢႆး ၸေႇပေႇတႄး တင်းလၢႆ တင်းတပႄးၸဝ်ႈတၢင်ႇၵေႃႉ သွင်ၵေႃႉၸိူဝ်းၼၼ်ႉဢေႃႈ။-

3သီႉမုၼ်ႇပေႇတရူႉ လၢတ်ႈတီႈၶဝ်လႄႈဝႃႈ၊ ၵဝ်ၶႃႈတၵ်းၵႂႃႇတီႉပႃဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင် ၶဝ်ၼၼ်ႉၵေႃႈ လၢတ်ႈလႄႈဝႃႈ၊ ႁဝ်းၶႃႈၵေႃႈတၵ်းၸွမ်းဢေႃႈ၊ ဝႃႈၼင်ႇၼႆဢေႃႈ။ ၶဝ်ဢွၵ်ႇၵႂႃႇသေယဝ်ႉ၊ ၶဝ်ႈၵႃႈၼႂ်းႁိူဝ်းၵမ်းလဵဝ်လႄႈ ၼႂ်းၶိုၼ်းၼၼ်ႉဢမ်ႇလႆႈသေတူဝ်။

4မိူဝ်ႈဢၼ်ထိုင်ၶိင်ႇၵၢင်ၼႂ်ၸိုင်၊ ယေႇသူႉ ၸုၵ်းယူႇၵႃႈတီႈႁိမ်းၽင်ႇၼွင်ဢေႃႈ။ ၼႂ်းဝႃႈၼၼ်သေၵေႃႈ တပႄးၸဝ်ႈၸိူဝ်းၼၼ်ႉဢမ်ႇႁူႉလွင်ႈဢၼ်ပဵၼ် ယေႇသူႉ ။-

5ယေႇသူႉ ၵေႃႈထၢမ်လႄႈဝႃႈ၊ လုၵ်ႈၶဝ်ဢိူၺ်း၊ မီးတၢင်းၵိၼ်သေၸိူဝ်ႉသေပိူင်ႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉၶိုၼ်းလၢတ်ႈလႄႈဝႃႈ၊ ဢမ်ႇမီးၶႃႈ၊ ဝႃႈၼင်ႇၼႆဢေႃႈ။-

6ၵမ်းၼၼ်ႉ မၼ်းၸဝ်ႈၵေႃႈလၢတ်ႈလႄႈဝႃႈ၊ ဝၢၼ်ႇၶႄတူၵ်းၵႃႈတီႈၽၢႆႇၶႂႃႁိူဝ်းၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ တၵ်းလႆႈဢေႃႈ ဝႃႈၼႆ၊ ၵႃႈၼင်ႇဢၼ်မၼ်းၸဝ်ႈဝႃႈၼၼ်ႉ၊ ၶဝ်ဝၢၼ်ႇတူၵ်းလႄႈ ၵွပ်ႈပိူဝ်ႈဢၼ်ႁူမ်ႇမႅၼ်ႈပႃၼမ်ၼႃႇလူင်လၢင်ၼၼ်ႉ တိုတ်ႉၸၼ်ဢဝ်ၶႄလႄႈဢမ်ႇလႆႈ။

7မိူဝ်ႈၼၼ်ႉတပႄးၸဝ်ႈဢၼ် ယေႇသူႉ ႁၵ်ႉၼၼ်ႉ၊လၢတ်ႈတီႈ ပေႇတရူႉ လႄႈဝႃႈ၊ ပဵၼ်ၸဝ်ႈႁဝ်းၶႃႈလူင်လၢင်၊ ဝႃႈၼင်ႇၼႆဢေႃႈ။ သီႉမုၼ်ႇပေႇတရူႉ ၼၼ်ႉ မိူဝ်ႈဢၼ်ငိၼ်းလွင်ႈဢၼ်ပဵၼ်မၼ်းၸဝ်ႈၼၼ်ႉၸိုင်၊ ပိူဝ်ႈဢၼ်မၼ်းယူႇတူဝ်ပူၺ် ယူႇလႄႈ ၼုင်ႈသိူဝ်ႈထၢပ်ႈၼိူဝ်သေယဝ်ႉ၊ လူင်းၵႃႈၼႂ်းၼမ်ႉၼွင်ဢေႃႈ။-

8တပႄးၸဝ်ႈတၢင်ႇၵေႃႉၸိူဝ်းၼၼ်ႉ ပိူဝ်ႈဢၼ်ဢမ်ႇၸမ်ဢမ်ႇၵႆၵၼ်တင်းၽင်ႇၼမ်ႉ ယၢၼ်သေသွင်ပၢၵ်ႇသွၵ်ႇၼိုင်ႈၵူၺ်းၼၼ်ႉလႄႈ၊ တိုတ်ႉၸၼ်ၶႄဢိၵ်ႇတင်းပႃ ၸိူဝ်းၼၼ်ႉယူႇသေလႄႈ ၶီႇၵႃႈၼိူဝ်ႁိူဝ်းမႃးဢေႃႈ။

9မိူဝ်ႈဢၼ်ၶဝ်ႁွတ်ႈထိုင်ၵႃႈၼိူဝ်ၵုင်းၸိုင် ၶဝ်ထူပ်းႁၼ်ၵွင်ထၢၼ်ႇၽႆး ဢိၵ်ႇတင်းပႃဢၼ်ပိင်ႈဝႆႉႁၢင်းဝႆႉတင်းၶဝ်ႈမုၼ်းဢေႃႈ။-

10ယေႇသူႉ ၵေႃႈလၢတ်ႈလႄႈဝႃႈ၊ ဢဝ်ပႃဢၼ်သူလႆႈတေႃႈလဵဝ်ၼႆႉၵမ်ႈၽွင်ႈမႃးတႃႉ၊ ဝႃႈၼင်ႇၼႆဢေႃႈ။-

11သီႉမုၼ်ႇပေႇတရူႉ ၶိုၼ်ႈၵႃႈၼိူဝ်ႁိူဝ်းသေလႄႈ တိုတ်ႉၸၼ်ၶႄဢၼ်တဵမ်ဝႆႉတင်းပႃလူင်ပၢၵ်ႇပၢႆႁႃႈသိပ်းပၢႆသၢမ်တူဝ်ၼၼ်ႉ တၢင်ႇၵႃႈၼိူဝ်ၵုင်းဢေႃႈ။ ပိၵ်ႉသမ်ႉၼမ်ထၢၼ်ႇၼၼ်ႉသေၵေႃႈ၊ ၶႄၼၼ်ႉဢမ်ႇမီးတၢင်းဢၼ်သိၵ်ႇဢၼ်ၶၢတ်ႇ။

12ယေႇသူႉ ၵေႃႈလၢတ်ႈတီႈၶဝ်လႄႈဝႃႈ၊ မႃးလႄႈၵိၼ်ၶဝ်ႈၼႂ်တႃႉ၊ ဝႃႈၼင်ႇၼႆဢေႃႈ။ ပိူဝ်ႈဢၼ်တပႄးၸဝ်ႈၸိူဝ်းၼၼ်ႉ ႁူႉလွင်ႈဢၼ် ပဵၼ်မၼ်းၸဝ်ႈၼၼ်ႉယူႇလႄႈ ၸဝ်ႈႁဝ်းပဵၼ်ၽူႈလႂ် ဝႃႈၼႆ ဢမ်ႇႁတ်းလဝ်ႊႁတ်းထၢမ်သေၵေႃႉသေၵူၼ်း။-

13ယေႇသူႉ မႃးလႄႈ ဢဝ်ၶဝ်ႈမုၼ်းတင်းပႃသေယဝ်ႉ၊ ပၼ်တီႈၶဝ်ဢေႃႈ။-

14တၢင်းဢၼ်မၼ်းၸဝ်ႈၼႄပျႃးတူဝ်ၸဝ်ႈၵဝ်ႇၼၼ်ႉၸမ်ႉ၊ ဝၢႆးသေ ယေႇသူႉ လုၵ်ႉၵႃႈတၢင်းတၢႆၶိုၼ်းလိပ်းယဝ်ႉၼၼ်ႉ ပဵၼ်တၢင်းဢၼ်မၼ်းၸဝ်ႈ ၼႄပျႃးတူဝ်ၸဝ်ႈၵဝ်ႇ တီႈတပႄးၸဝ်ႈတင်းလၢႆထူၼ်ႈထိုင်သၢမ်ပွၵ်ႈဢေႃႈ။

15ဝၢႆးသေၵိၼ်ၶဝ်ႈၼႂ်ၼၼ်ႉယဝ်ႉ၊ ယေႇသူႉ ၵေႃႈ ထၢမ်တီႈ သီႉမုၼ်ႇပေႇတရူႉ လႄႈဝႃႈ၊ သီႉမုၼ်ႇ လုၵ်ႈၸၢႆး ယူဝ်းၼႃႉ ဢိူၺ်း၊ မႂ်းႁၵ်ႉၵဝ်ၼႃႇသေၸိူဝ်းၼႆႉႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းလဝ်ႊလၢတ်ႈလႄႈဝႃႈ၊ ၸႂ်ႈၶႃႈယဝ်ႉၸဝ်ႈ။ ၸဝ်ႈႁဝ်းႁူႉလွင်ႈဢၼ်ၵဝ်ၶႃႈႁၵ်ႉၸဝ်ႈႁဝ်းၼၼ်ႉယူႇၶႃႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းၸဝ်ႈၵေႃႈလၢတ်ႈလႄႈဝႃႈ၊ လဵင်ႉထိင်းသူဝ်းဢွၼ်ႇၵဝ် တင်းလၢႆတႃႉ၊ ဝႃႈၼင်ႇၼႆဢေႃႈ။-

16မၼ်းၸဝ်ႈၵေႃႈသမ်ႉထၢမ်ပွၵ်ႈတူႉတီႉယႃႉထႅင်ႈလႄႈဝႃႈ၊ သီႉမုၼ်ႇ လုၵ်ႈၸၢႆး ယူဝ်းၼႃႉ ဢိူၺ်း၊ မႂ်းႁၵ်ႉၵဝ်ႁိုဝ် မိူဝ်ႈဢၼ်ဝႃႈၼင်ႇၼႆၸိုင်၊ မၼ်းလဝ်ႊလၢတ်ႈလႄႈဝႃႈ၊ ၸႂ်ႈၶႃႈယဝ်ႉၸဝ်ႈ။ ၸဝ်ႈႁဝ်းႁူႉလွင်ႈဢၼ်ၵဝ်ၶႃႈႁၵ်ႉၸဝ်ႈႁဝ်းၼၼ်ႉယူႇၶႃႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းၸဝ်ႈၵေႃႈလၢတ်ႈလႄႈဝႃႈ၊ ပႂ်ႉသူဝ်းၵဝ်တင်းလၢႆတႃႉ၊ ဝႃႈၼင်ႇၼႆဢေႃႈ။-

17မၼ်းၸဝ်ႈၵေႃႈသမ်ႉထၢမ်ပွၵ်ႈတႃႉတီႉယႃႉထႅင်ႈလႄႈဝႃႈ၊ သီႉမုၼ်ႇ လုၵ်ႈၸၢႆး ယူဝ်းၼႃႉ ဢိူၺ်း၊ မႂ်းႁၵ်ႉၵဝ်ႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ပိူဝ်ႈဢၼ်မၼ်းၸဝ်ႈထၢမ်ထူၼ်ႈထိုင်သၢမ်ပွၵ်ႈလႄႈဝႃႈ၊ မႂ်းႁၵ်ႉၵဝ်ႁိုဝ်။ ဝႃႈၼင်ႇၼႆၼၼ်ႉလႄႈ၊ ပေႇတရူႉ ၸဵပ်းၸႂ်လႄႈလဝ်ႊလၢတ်ႈဝႃႈ၊ ၸဝ်ႈႁဝ်း၊ ၸဝ်ႈႁဝ်းႁူႉလွင်ႈတၢင်းၵူႈၸိူဝ်ႉၵူႈပိူင်ယူႇၶႃႈဢေႃႈ။ ၸဝ်ႈႁဝ်းႁူႉလွင်ႈဢၼ်ၵဝ်ၶႃႈႁၵ်ႉၸဝ်ႈႁဝ်းၼၼ်ႉယူႇၶႃႈဢေႃႈ၊ ဝႃႈၼင်ႇၼႆသေယဝ်ႉ၊ ယေႇသူႉ ၵေႃႈလၢတ်ႈလႄႈဝႃႈ၊ လဵင်ႉထိင်းသူဝ်းၵဝ်တင်းလၢႆတႃႉ။-

18ၵဝ်ဝႃႈတီႈၸိုဝ်ႈတီႈၸႂ်ႈတီႈမႂ်းၸမ်ႉ၊ မႂ်းၼႆႉမိူဝ်ႈဢၼ်ဢသၢၵ်ႈယင်းတိုၵ်ႉၼုမ်ႇယူႇၼၼ်ႉၸိုင်၊ ၸၢင်ႈဝဵၼ်းႁေႃႇတူဝ်ၸဝ်ႈၵဝ်ႇလႄႈ ၵႂႃႇမႃးတီႈဢၼ်မႂ်းမီးဢလူဝ်ႇၼၼ်ႉဢေႃႈ။ မိူဝ်ႈဢၼ်မႂ်းထဝ်ႈယဝ်ႉၸိုင်၊ မႂ်းတၵ်းယဵတ်ႇမိုဝ်းသွင်ၶွၼ်လႄႈ ပိူၼ်ႈတၢင်ႇၵေႃႉတၵ်းဝဵၼ်းႁေႃႇမႂ်းသေလႄႈ ဢဝ်မႂ်းၵႂႃႇတီႈဢၼ်မႂ်းဢမ်ႇမီးဢလူဝ်ႇၼၼ်ႉဢေႃႈ၊ ဝႃႈၼင်ႇၼႆဢေႃႈ။-

19လွင်ႈဢၼ်မၼ်းၸဝ်ႈလၢတ်ႈၸိူဝ်ႉၼင်ႇၼၼ်ၼၼ်ႉၸမ်ႉ၊ မၼ်းၸဝ်ႈၼႄပၼ် လွင်ႈဢၼ်မၼ်းတၵ်းလႆႈတၢႆၸိူဝ်ႉၼင်ႇႁိုဝ်လႄႈ ႁႂ်ႈမုၼ်ၽုင်းၽြႃးပဵၼ်ၸဝ်ႈထၢင်ႇသႃးမႃးၼၼ်ႉဢေႃႈ။ မၼ်းၸဝ်ႈလၢတ်ႈၸိူဝ်ႉၼင်ႇၼၼ်သေယဝ်ႉ၊ သမ်ႉၶိုၼ်းလၢတ်ႈတီႈမၼ်းလႄႈဝႃႈ၊ ၸွမ်းပႃႈလင်ၵဝ်တႃႉ၊ ဝႃႈၼင်ႇၼႆဢေႃႈ။

20ပေႇတရူႉ ၼၼ်ႉ မိူဝ်ႈဢၼ်ဝၢႆႇတူၺ်းလႄႈႁၼ် တပႄးၸဝ်ႈဢၼ် ယေႇသူႉ ႁၵ်ႉ၊ ဢၼ်ဢိင်ၵႃႈႁိမ်းႁူဝ်ဢူၵ်းမၼ်းၸဝ်ႈ ၼႂ်းမိူဝ်ႈဢၼ်ၵိၼ်ၶဝ်ႈၶမ်ႈ မိူဝ်ႈၼၼ်ႉၼၼ်ႉသေလႄႈလဝ်ႊထၢမ်လႄႈဝႃႈ၊ ၵေႃႉဢၼ်ဢဝ်ၸဝ်ႈႁဝ်းဢၢပ်ႈၼၼ်ႉၸမ်ႉ၊ ပဵၼ်ၽူႈလႂ်ၶႃႈ၊ ဝႃႈၼင်ႇၼႆၼၼ်ႉ ၸွမ်းပႃႈလင်မၼ်းၸဝ်ႈယူႇၼၼ်ႉၸိုင်၊-

21လဝ်ႊထၢမ်လႄႈဝႃႈ၊ ၸဝ်ႈႁဝ်း၊ တီႈၵေႃႉၼႆႉ တၵ်းပဵၼ်ၸိူဝ်ႉၼင်ႇႁိုဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

22ယေႇသူႉ ၵေႃႈလၢတ်ႈလႄႈဝႃႈ၊ ပေႃးၵဝ်မီးဢလူဝ်ႇၶႂ်ႈႁႂ်ႈၵေႃႉၼႆႉလႆႈယူႇတေႃႇထိုင်ႁွတ်ႈၶိင်ႇၵႃႇလႃႉဢၼ်ၵဝ်တၵ်းမႃးၼၼ်ႉၸိုင်၊ ၸၢပ်ႈသႅင်ႇၵၼ်တင်းမႂ်းၸိူဝ်ႉၼင်ႇႁိုဝ်။ မႂ်းၸမ်ႉ၊ ၸွမ်းပႃႈလင်ၵဝ်တႃႉ၊ ဝႃႈၼင်ႇၼႆဢေႃႈ။-

23ပိူဝ်ႈၼႆလႄႈ ၵႂၢမ်းဢၼ်ဝႃႈ၊ တပႄးၸဝ်ႈၼၼ်ႉတၵ်းဢမ်ႇလႆႈတၢႆ၊ ဝႃႈၼင်ႇၼႆၼၼ်ႉၸွတ်ႇတူဝ်ႈၵႂႃႇ ၵႃႈၼႂ်းပီႈၼႂ်းၼွင်ႉတင်းလၢႆဢေႃႈ။ ၼႂ်းဝႃႈၼၼ်သေၵေႃႈ ယေႇသူႉ ဝႃႈ၊ ၵေႃႉၼၼ်ႉဢမ်ႇလႆႈတၢႆ၊ ဝႃႈၼင်ႇၼႆဢမ်ႇၸႂ်ႈ။ မၼ်းၸဝ်ႈဝႃႈ၊ ပေႃးၵဝ်မီးဢလူဝ်ႇၶႂ်ႈႁႂ်ႈၵေႃႉၼၼ်ႉလႆႈယူႇတေႃႇထိုင်ႁွတ်ႈၶိင်ႇၵႃႇလႃႉဢၼ်ၵဝ်တၵ်းမႃးၼၼ်ႉၸိုင်၊ ၸၢပ်ႈသႅင်ႇၵၼ်တင်းမႂ်းၸိူဝ်ႉၼင်ႇႁိုဝ်။ ဝႃႈၼင်ႇၼႆၵူၺ်းဢေႃႈ။

24တပႄးၸဝ်ႈၼၼ်ႉၸမ်ႉ၊ ၶၢမ်ႇသၢၵ်ႈသေႇလွင်ႈတၢင်းၸိူဝ်းၼႆႉလႄႈ ပဵၼ်ၵေႃႉဢၼ်တႅမ်ႈဝႆႉလွင်ႈတၢင်းၸိူဝ်းၼႆႉဢေႃႈ။ လွင်ႈဢၼ်မၼ်းၶၢမ်ႇသၢၵ်ႈသေႇၼႆႉ ပဵၼ်ဢၼ်ၸိုဝ်ႈဢၼ်ၸႂ်ႈၸိုင်ႁဝ်းႁူႉဢေႃႈ။

25လွင်ႈတၢင်းဢၼ် ယေႇသူႉ ႁဵတ်း တၢင်ႇၸိူဝ်ႉတၢင်ႇဢၼ်ၸိူဝ်းၼၼ်ႉယင်းမီးၼမ်ၼႃႇလူးၵွၼ်ႇဢေႃႈ။ ပေႃးတႅမ်ႈဝႆႉလွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉ ႁင်းၽႂ်ႁင်းမၼ်းၸိုင် ၵျၢမ်းလိၵ်ႈတၵ်းၼမ်ၵိုၼ်းၼႃႇတေႃႇထိုင်ႁွတ်ႈထၼ်ႈပေႃး တၵ်းလူၼ်ႉလိူဝ်လိၼ်မိူင်းဢေႃႈ ဝႃႈၼႆၵဝ်ထၢင်ႇဢေႃႈ။ ၶရိၸ်ႈဝၢင်ႇၸဝ်ႈယူဝ်းႁၢၼ်ႇယဝ်ႉယဝ်ႉဢေႃႈ။

← Chapter 20 Jump to: