John 4 — Shan

5ပိူဝ်ႈၼႆလႄႈ မၼ်းၸဝ်ႈၸင်ႇႁွတ်ႈထိုင် ၵႃႈတီႈဝဵင်းဢၼ်လႆႈၸိုဝ်ႈ သူႉၶႃႇ ၼႂ်းၼႄႇ သမႃႇရီႉ ဢၼ်ၸမ်တီႈလိၼ်ၵႂၢၵ်ႈၼိုင်ႈ ဢၼ် ယႃႇၵုပ်ႈ ပၼ်တီႈလုၵ်ႈၸၢႆးမၼ်း ယူဝ်းသႅပ်ႈ ၼၼ်ႉဢေႃႈ။-

6ၵႃႈတီႈၼၼ်ႈ မီးၼမ်ႉမေႃႇ ယႃႇၵုပ်ႈ ဢေႃႈ။ ယေႇသူႉ ပိူဝ်ႈဢၼ်ၵႂႃႇတၢင်းႁိူဝ်ႉၼႃႇလႄႈ ၼင်ႈယူႇၵႃႈတီႈႁိမ်းၼမ်ႉမေႃႇၼၼ်ႉဢေႃႈ။ မိူဝ်ႈၶိင်ႇၼၼ်ႉပဵၼ်ၶိင်ႇႁူၵ်းၼႃႇရီႇဢေႃႈ။

7မႄႈယိင်း သမႃႇရီႉ ၵေႃႉၼိုင်ႈ မႃးႁႂ်ႈလႆႈတဵၵ်းၼမ်ႉလႄႈ ယေႇသူႉ ၵေႃႈလၢတ်ႈတီႈမၼ်းၼၼ်ႉလႄႈဝႃႈ၊ ပၼ်ၼမ်ႉပုၼ်ႈဢၼ်ၵဝ်တၵ်းၵိၼ်သေၵမ်း၊ ဝႃႈၼင်ႇၼႆဢေႃႈ။-

8လွင်ႈမၼ်းၸမ်ႉ တပႄးၸဝ်ႈတင်းလၢႆယင်းတိုၵ်ႉၶဝ်ႈၵႂႃႇၵႃႈၼႂ်းဝဵင်း ႁႂ်ႈလႆႈသိုဝ်ႉဢဝ်တၢင်းၵိၼ်တၢင်းၶူပ်းယူႇဢေႃႈ။-

9မႄႈယိင်း သမႃႇရီႉ ၼၼ်ႉၵေႃႈလၢတ်ႈလႄႈဝႃႈ၊ ၸဝ်ႈပဵၼ်ၵူၼ်း ယူႉတႃႉ လူင်လၢင်လႄႈ လွင်ႈၼင်ႇႁိုဝ်လႄႈ ယွၼ်းၼမ်ႉပုၼ်ႈဢၼ်တၵ်းၵိၼ်တီႈၵဝ်ၶႃႈ ဢၼ်ပဵၼ်မႄႈယိင်း သမႃႇရီႉ ၼႆႉ ၼင်ႇႁိုဝ်ၶႃႈ၊ ဝႃႈၼင်ႇၼႆဢေႃႈ။ လွင်ႈဢၼ်ဝႃႈၼၼ်ႉၸမ်ႉ၊ ၵူၼ်း ယူႉတႃႉ တင်းလၢႆ လွင်ႈတၢင်းဢၼ်တၵ်းလႆႈႁဵတ်းၵေႃႉႁဵတ်းသေႈလူၺ်ႈၵၼ်တင်းၵူၼ်း သမႃႇရီႉ ဢမ်ႇမီး။-

10ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ပေႃးမႂ်းႁူႉၵျေးၸူးၽြႃးပဵၼ်ၸဝ်ႈ ဢိၵ်ႇတင်းၵေႃႉဢၼ်ယွၼ်းတီႈမႂ်းလႄႈဝႃႈ ပၼ်ၼမ်ႉပုၼ်ႈဢၼ်ၵဝ်တၵ်းၵိၼ်သေၵမ်း၊ ဝႃႈၼင်ႇၼႆၼၼ်ႉ ပဵၼ်ၽူႈလႂ်ၸိုင်မႂ်းတၵ်းယွၼ်းၵႃႈတီႈမၼ်းၼၼ်ႉဢေႃႈ။ မၼ်းၼၼ်ႉၵေႃႈတၵ်းပၼ်ၼမ်ႉဢသၢၵ်ႈတီႈမႂ်းဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊-

11မႄႈယိင်းၼၼ်ႉၵေႃႈလၢတ်ႈလႄႈဝႃႈ၊ ၸဝ်ႈ၊ တီႈၸဝ်ႈႁဝ်းၼႆႉ ပုၼ်ႈဢၼ်တၵ်းတဵၵ်းဢဝ်ၼမ်ႉၸိုင်ဢမ်ႇမီးၵႃႈသင်၊ ၼမ်ႉမေႃႇၼႆႉၵေႃႈပဵၼ်ဢၼ်လိုၵ်ႉၼႃႇၶႃႈဢေႃႈ။ တၵ်းလႆႈၼမ်ႉဢသၢၵ်ႈၵႃႈတီႈလႂ်ၶႃႈ။-

12ၸဝ်ႈႁဝ်းၼႆႉယဵင်ႈၶႅၼ်းယႂ်ႇမျၢတ်ႈၼႃႇသေပေႃႈႁဝ်းၶႃႈ ယႃႇၵုပ်ႈ ဢၼ်ပၼ်ၼမ်ႉမေႃႇၼႆႉ တီႈႁဝ်းၶႃႈလႄႈ ၸႃႉၸဵမ်တူဝ်မၼ်းဢိၵ်ႇတင်းလုၵ်ႈလၢင်းမၼ်း တင်းတရိၵ်ႈသၢၼ်ႇမၼ်းတင်းလၢႆ ၵိၼ်ၼမ်ႉၵႃႈတီႈမေႃႇၼႆႉၼၼ်ႉၶႃႈႁိုဝ်၊ ဝႃႈၼင်ႇၼႆဢေႃႈ။-

13ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ၵေႃႉဢၼ်ၵိၼ်ၼမ်ႉၼႆႉၼၼ်ႉ ၵမ်းလိုၼ်းတၵ်းလႆႈယၢၵ်ႇၼမ်ႉလူးၵွၼ်ႇဢေႃႈ။-

14ၵေႃႉဢၼ်ၵိၼ်ၼမ်ႉဢၼ်ၵဝ်ပၼ်ၼၼ်ႉၸမ်ႉ၊ တၵ်းၵၢင်းလွတ်ႈတင်းတၢင်းဢၼ်ယၢၵ်ႇၼမ်ႉၵူႈၶိင်ႇၵူႈၶႃႇဢေႃႈ။ ၼမ်ႉဢၼ်ၵဝ်ပၼ်ၼၼ်ႉ တၵ်းပဵၼ်ၼမ်ႉမေႃႇဢၼ်ၸိုမ်းဢွၵ်ႇယူႇၵႃႈတီႈၼႂ်းၵေႃႉၼၼ်ႉ ပုၼ်ႈလွင်ႈၼင်ႇႁိုဝ်တၵ်းပဵၼ်ထႃႇဝရႃႉဢသၢၵ်ႈလိပ်းဢေႃႈ၊ ဝႃႈၼင်ႇၼႆဢေႃႈ။-

15မႄႈယိင်းၼၼ်ႉၵေႃႈယွၼ်းလႄႈဝႃႈ၊ ၸဝ်ႈ၊ ၼင်ႇႁိုဝ်ၵဝ်ၶႃႈတၵ်းၵၢင်းလွတ်ႈတင်းတၢင်းဢၼ်ယၢၵ်ႇၼမ်ႉ ဢိၵ်ႇတင်းတၢင်းဢၼ်မႃးၵႃႈတီႈၼႆႈလႄႈ တဵၵ်းဢဝ်ၼမ်ႉၼၼ်ႉၸိုင်၊ ၶႅၼ်းတေႃႈပၼ်ၼမ်ႉၼၼ်ႉ တီႈၵဝ်ၶႃႈသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

16ယေႇသူႉ ၵေႃႈလၢတ်ႈလႄႈဝႃႈ ၵႂႃႇတႃႉ။ ႁွင်ႉဢဝ်ၽူဝ်မႂ်းလႄႈမႃးၵႃႈတီႈၼႆႈလူးၵွၼ်ႇတႃႉ၊ ဝႃႈၼင်ႇၼႆဢေႃႈ။-

17မႄႈယိင်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ၵဝ်ၶႃႈဢမ်ႇမီးၽူဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ယေႇသူႉ ၵေႃႈလၢတ်ႈလႄႈဝႃႈ၊ ၵႂၢမ်းဢၼ်မႂ်းဝႃႈ ဢမ်ႇမီးၽူဝ်၊ ဝႃႈၼင်ႇၼႆၼၼ်ႉမႅၼ်ႈတႄႉတႄႉဢေႃႈ။-

18လွင်ႈမၼ်းၸမ်ႉ ၵႃႈတီႈမႂ်းလႆႈမီးၽူဝ်ႁႃႈၵေႃႉယဝ်ႉ။ ၵေႃႉဢၼ်ယူႇလူၺ်ႈၵၼ်တင်းမႂ်းတေႃႈလဵဝ်ၼႆႉၼၼ်ႉၵေႃႈ၊ ပဵၼ်ၽူဝ်မႂ်းဢမ်ႇၸႂ်ႈ။ ၼႂ်းတီႈႁဵင်းၼႆႉ မႂ်းလၢတ်ႈၵႂၢမ်းဢၼ်မၢၼ်ႇဢၼ်မႅၼ်ႈယဝ်ႉ၊ ဝႃႈၼင်ႇၼႆဢေႃႈ။

19မႄႈယိင်းၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈ၊ လွင်ႈဢၼ်ၸဝ်ႈႁဝ်းပဵၼ်ပရေႃးၽႅတ်ႈၸိုင်၊ ၵဝ်ၶႃႈႁူႉၶႃႈဢေႃႈ။-

20ပူႇမွၼ်ႁဝ်းၶႃႈတင်းလၢႆ ယၢမ်ႈၵူဝ်းၵႂၢႆႇၵႃႈၼိူဝ်လွႆၼႆႉယူႇၶႃႈဢေႃႈ။ သူၸဝ်ႈၸၢင်ႈဝႃႈ၊ တၵ်းလႆႈၵူဝ်းၵႂၢႆႇၵႃႈၼႂ်းဝဵင်း ယေႇရူႉသလႅမ်ႇ ပုၼ်ႉၵူၺ်း၊ ဝႃႈၼင်ႇၼႆၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

21ယေႇသူႉ ၵေႃႈလၢတ်ႈလႄႈဝႃႈ၊ မႄႈယိင်းဢိူၺ်း၊ ယုမ်ႇၵႂၢမ်းၵဝ်တႃႉ၊ ၶိင်ႇၵႃႇလႃႉဢၼ်သူတၵ်းလႆႈၵူဝ်းၵႂၢႆႇ ပေႃႈၸဝ်ႈၵႃႈတီႈၼိူဝ်လွႆၼႆႉၵူၺ်းဢမ်ႇၸႂ်ႈ။ ၵႃႈတီႈၼႂ်းဝဵင်း ယေႇရူႉသလႅမ်ႇ ပုၼ်ႉၵူၺ်းဢမ်ႇၸႂ်ႈၼၼ်ႉ ယင်းတိုၵ်ႉႁွတ်ႈမႃးယူႇဢေႃႈ။-

22သူၵူဝ်းၵႂၢႆႇလွင်ႈတၢင်းဢၼ် တူဝ်ၸဝ်ႈၵဝ်ႇဢမ်ႇႁူႉဢေႃႈ။ ႁဝ်းၵူဝ်းၵႂၢႆႇလွင်ႈတၢင်းဢၼ်တူဝ်ၸဝ်ႈၵဝ်ႇႁူႉဢေႃႈ။ လွင်ႈမၼ်းၸမ်ႉ လွင်ႈတၢင်းဢၼ်ၵႄႇၶျွတ်ႈဢဝ်ၼၼ်ႉ မီးၵႃႈတီႈၵူၼ်း ယူႉတႃႉ တင်းလၢႆဢေႃႈ။-

23ၶိင်ႇၵႃႇလႃႉ ဢၼ်ၶဝ်ၸိူဝ်းဢၼ်ၵူဝ်းၵႂၢႆႇ ၸိုဝ်ႈၸိုဝ်ႈၸႂ်ႈၸႂ်ႈတင်းလၢႆ တၵ်းပႃးဢဝ်တင်းၸႂ်ဝီႉၺိၺ်ႇတင်းသဵတ်ႈၸႃႇတြႃး ၵူဝ်းၵႂၢႆႇပေႃႈၸဝ်ႈၼၼ်ႉမႃးယူႇလႄႈ ၼႂ်းတေႃႈလဵဝ်ၼႆႉၵေႃႈႁွတ်ႈဝႆႉမီးယူႇဢေႃႈ၊ လွင်ႈမၼ်းၸမ်ႉ ပေႃႈၸဝ်ႈႁႃၶဝ်ၸိူဝ်းဢၼ်ၵူဝ်းၵႂၢႆႇၸိူဝ်ႉၼင်ႇၼၼ်ၼၼ်ႉဢေႃႈ။-

24ၽြႃးပဵၼ်ၸဝ်ႈ ပဵၼ်ၸႂ်ဝီႉၺိၺ်ႇဢေႃႈ။ ၶဝ်ၸိူဝ်းဢၼ်ၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉ တၵ်းလႆႈပႃးဢဝ်တင်းၸႂ်ဝီႉၺိၺ်ႇတင်းသဵတ်ႈၸႃႇၵူဝ်းၵႂၢႆႇမၼ်းၸဝ်ႈဢေႃႈ၊ ဝႃႈၼင်ႇၼႆဢေႃႈ။-

25မႄႈယိင်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ၸဝ်ႈ မေသီႉ တၵ်းမႃးဢေႃႈ ဝႃႈၼႆၵဝ်ၶႃႈႁူႉယူႇၶႃႈဢေႃႈ။ မိူဝ်ႈဢၼ်မၼ်းၸဝ်ႈႁွတ်ႈထိုင်ၸိုင် မၼ်းၸဝ်ႈတၵ်းၽုၺ်ႇဢွၵ်ႇၼႄပျႃးတင်းသဵင်ႈတင်းလူင်တီႈႁဝ်းၶႃႈ ၶႃႈဢေႃႈ၊ ဝႃႈၼင်ႇၼႆဢေႃႈ။ မေသီႉ ဢၼ်ဝႃႈၸမ်ႉ ၶႂ်ႈဝႃႈၸဝ်ႈၶရိၸ်ႈဢေႃႈ။-

26ယေႇသူႉ ၵေႃႈလၢတ်ႈလႄႈဝႃႈ ၵဝ်ဢၼ်လၢတ်ႈၵႂၢမ်းတေႃႇၵၼ်တင်းမႂ်းယူႇၼႆႉ ပဵၼ် မေသီႉ ယဝ်ႉ၊ ဝႃႈၼင်ႇၼႆဢေႃႈ။

27မိူဝ်ႈၼၼ်ႉ တပႄးၸဝ်ႈၸိူဝ်းၼၼ်ႉႁွတ်ႈမႃးလႄႈ မီးတၢင်းဢၼ်ဢၢမ်းလွင်ႈဢၼ်မၼ်းၸဝ်ႈလၢတ်ႈၵႂၢမ်းတေႃႇၵၼ်တင်း မႄႈယိင်းၼၼ်ႉယူႇၼၼ်ႉဢေႃႈ။ ၼႂ်းဝႃႈၼၼ်သေၵေႃႈ ဢလူဝ်ႇမၼ်းၸဝ်ႈမီးၸိူဝ်ႉၼင်ႇႁိုဝ်။ ႁဵတ်းႁိုဝ်လႄႈ မၼ်းၸဝ်ႈလၢတ်ႈၵႂၢမ်းတေႃႇၵၼ်တင်းမႄႈယိင်းၼၼ်ႉယူႇၼင်ႇႁိုဝ်ဝႃႈၼႆ၊ ၽူႈလႂ်သေၵေႃႉသေၵူၼ်း ဢမ်ႇလဝ်ႊဢမ်ႇထၢမ်။-

28မႄႈယိင်းၼၼ်ႉၵေႃႈပႅတ်ႈဝႆႉမေႃႈၼမ်ႉမၼ်းသေလႄႈၶဝ်ႈၵႂႃႇၵႃႈၼႂ်းဝဵင်းသေယဝ်ႉ၊ လၢတ်ႈတီႈၵူၼ်းတင်းလၢႆလႄႈဝႃႈ၊-

29မႃးလႄႈတူၺ်းၵေႃႉဢၼ်ၽုၺ်ႇဢွၵ်ႇၼႄပျႃးလွင်ႈတၢင်း ၵႃႈဢၼ်ၵဝ်ၶႃႈလႆႈႁဵတ်းမႃးယဝ်ႉတင်းသဵင်ႈတင်းလူင်ၼၼ်ႉ သေၵမ်းၶႃႈ။ ၵေႃႉၼႆႉပဵၼ်ၸဝ်ႈၶရိၸ်ႈ ဢမ်ႇၸႂ်ႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

30ၶဝ်ၼၼ်ႉဢွၵ်ႇသေၵႃႈၼႂ်းဝဵင်းလႄႈ ၵႂႃႇၸူးၵႃႈတီႈမၼ်းၸဝ်ႈဢေႃႈ။

31ၸူဝ်ႈဢၼ်ၶဝ်ဢမ်ႇပႆႇႁွတ်ႈထိုင်ၼၼ်ႉၸိုင် တပႄးၸဝ်ႈၸိူဝ်းၼၼ်ႉၵေႃႈ တွင်းပၢၼ်ႇလႄႈဝႃႈ၊ ၸဝ်ႈႁဝ်းၶႅၼ်းတေႃႈၵိၼ်တၢင်းၵိၼ်သေၵမ်းတီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

32မၼ်းၸဝ်ႈၵေႃႈလၢတ်ႈလႄႈဝႃႈ၊ တၢင်းၵိၼ်ဢၼ်သူဢမ်ႇႁူႉၼၼ်ႉ မီးယူႇၵႃႈတီႈၵဝ်ဢေႃႈ၊ ဝႃႈၼင်ႇၼႆဢေႃႈ။-

33ပိူဝ်ႈၼႆလႄႈ တပႄးၸဝ်ႈၸိူဝ်းၼၼ်ႉ ၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်ၵၼ်လႄႈဝႃႈ၊ သေၵေႃႉသေၵူၼ်းဢဝ်တၢင်းၵိၼ်မႃးသူင်ႇပၼ်ယဝ်ႉႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

34ယေႇသူႉ ၵေႃႈလၢတ်ႈလႄႈဝႃႈ၊ တၢင်းၵိၼ်ၵဝ်ၸမ်ႉ၊ ပဵၼ်တၢင်းဢၼ်ၵမ်ၵျၢင်ႉဢလူဝ်ႇၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉ ဢိၵ်ႇတင်းတၢင်းဢၼ်ႁႂ်ႈတၢင်းႁဵတ်းမၼ်းၸဝ်ႈယဝ်ႉတူဝ်ႈၼၼ်ႉဢေႃႈ။-

35ၸႃႉၸဵမ်တေႃႈလဵဝ်ၼႆႉၵႂႃႇလႄႈ ပေႃးပူၼ်ႉသီႇလိူၼ်ယဝ်ႉၸိုင်၊ တၵ်းပဵၼ်ၶိင်ႇၵႃႇလႃႉဢၼ် တၵ်းပၢတ်ႇၶဝ်ႈဢေႃႈဝႃႈၼႆ၊ သူၸၢင်ႈဝႃႈဢမ်ႇၸႂ်ႈႁိုဝ်။ ၵဝ်ဝႃႈတီႈသူၸမ်ႉ၊ မုင်ႈလႄႈလူတူၺ်းတူင်ႈၼႃးတင်းလၢႆ ဢၼ်ၽိူၵ်ႇၽိူၵ်ႇၶၢဝ်ၶၢဝ်ၼႂ်းၶိင်ႇတေႃႈလဵဝ်ၼႆႉ ပုၼ်ႈဢၼ်တၵ်းလႆႈပၢတ်ႇၶဝ်ႈၼၼ်ႉတႃႉ။-

36ၵေႃႉဢၼ်ပၢတ်ႇၶဝ်ႈၼၼ်ႉ လႆႈၶၢမ်ႇဢဝ်ၵႃႈမၼ်းၶၼ်မၼ်းလႄႈ ၸူႉဝႆႉသိမ်းဝႆႉမၢၵ်ႇမၼ်းႁူင်းမၼ်း ပုၼ်ႈလွင်ႈၼင်ႇႁိုဝ် တၵ်းပဵၼ်ထႃႇဝရႃႉဢသၢၵ်ႈလိပ်းယူႇဢေႃႈ။ ပေႃးပဵၼ်ၸိူဝ်ႉၼင်ႇၼၼ်ၸိုင်၊ ၵေႃႉဢၼ်ဝၢၼ်ႇဢၼ်ပိုၼ် ဢိၵ်ႇတင်းၵေႃႉဢၼ်ပၢတ်ႇဢၼ်ထိူဝ်ၼၼ်ႉ တၵ်းသိူဝ်းပျေႃႇလူၺ်ႈၵၼ်ဢေႃႈ။-

37ၵႂၢမ်းဢၼ်ဝႃႈ ၵေႃႉၼိုင်ႈၸမ်ႉ၊ ဝၢၼ်ႇပိုၼ်ဢေႃႈ။ ၵေႃႉၼိုင်ႈၸမ်ႉ၊ ပၢတ်ႇထိူဝ်ဢေႃႈ၊ ဝႃႈၼင်ႇၼႆၼၼ်ႉ တူၵ်းၼႂ်းတီႈႁဵင်းၼႆႉဢမၢၼ်ႇၶၼ်ပဵၼ်ဢေႃႈ။-

38ၵဝ်ပွႆႇၸႂ်ႉသူမႃးႁႂ်ႈသူလႆႈပၢတ်ႇၶဝ်ႈ တီႈဢၼ်သူဢမ်ႇႁဵတ်းၼၼ်ႉဢေႃႈ။ ပိူၼ်ႈတၢင်ႇၵေႃႉႁဵတ်းၵၢၼ်ႁဵတ်းငၢၼ်းလႄႈသူလႆႈၶဝ်ႈၵႃႈၼႂ်းတၢင်းႁဵတ်းၶဝ်ၼၼ်ႉယဝ်ႉ၊ ဝႃႈၼင်ႇၼႆဢေႃႈ။

39ၵွပ်ႈပိူဝ်ႈၵႂၢမ်းဢၼ်မႄႈယိင်းၼၼ်ႉ ၶၢမ်ႇသၢၵ်ႈသေႇလႄႈဝႃႈ၊ မၼ်းၽုၺ်ႇဢွၵ်ႇၼႄပျႃးလွင်ႈတၢင်းၵႃႈဢၼ်ၵဝ်ၶႃႈလႆႈႁဵတ်းမႃးယဝ်ႉ တင်းသဵင်ႈတင်းလူင်ၼၼ်ႉဢေႃႈ၊ ဝႃႈၼင်ႇၼႆၼၼ်ႉလႄႈ၊ ၵူၼ်း သမႃႇရီႉ ဢၼ်ယူႇၼႂ်းဝဵင်းၼၼ်ႉၼမ်ၼႃႇ၊ ယုမ်ႇမၢတ်ႈမၼ်းၸဝ်ႈဢေႃႈ။-

40ပိူဝ်ႈၼႆလႄႈ မိူဝ်ႈဢၼ်ၵူၼ်း သမႃႇရီႉ ၸိူဝ်းၼၼ်ႉ ႁွတ်ႈထိုင်ၵႃႈတီႈမၼ်းၸဝ်ႈၼၼ်ႉၸိုင် ၶဝ်တွင်းပၢၼ်ႇႁႂ်ႈမၼ်းၸဝ်ႈယူႇၵႃႈတီႈၶဝ်ၼၼ်ႉဢေႃႈ။ မၼ်းၸဝ်ႈယူႇၵႃႈတီႈၼၼ်ႈသွင်ဝၼ်းဢေႃႈ။-

41ပိူၼ်ႈတၢင်ႇၵေႃႉၼမ်ၼႃႇၵေႃႈ ယုမ်ႇမၢတ်ႈၵွပ်ႈပိူဝ်ႈၼုၵ်ႈၵပၢတ်ႈၵႂၢမ်းမၼ်းၸဝ်ႈၼၼ်ႉလႄႈ၊-

42လၢတ်ႈတီႈမႄႈယိင်းၼၼ်ႉလႄႈဝႃႈ၊ တေႃႈလဵဝ်ၼႆႉ ႁဝ်းယုမ်ႇမၢတ်ႈၵွပ်ႈပိူဝ်ႈၵႂၢမ်းမႂ်းၵူၺ်းဢမ်ႇၸႂ်ႈ၊ ႁဝ်းတူဝ်ၸဝ်ႈၵဝ်ႇလႆႈထွမ်ႇလႆႈငိၼ်းၵႂၢမ်းမၼ်းလႄႈႁူႉလွင်ႈဢၼ်မၼ်းၼႆႉပဵၼ်ၸဝ်ႈဢၼ်ၵႄႇၶျွတ်ႈဢဝ်ၵူၼ်းလေႃးၵီႇတင်းလၢႆ ဢမၢၼ်ႇၶၼ်ပဵၼ်ဢၼ်ဝႃႈၸဝ်ႈၶရိၸ်ႈၼၼ်ႉယဝ်ႉ၊ ဝႃႈၼင်ႇၼႆဢေႃႈ။

43မိူဝ်ႈဢၼ်ပူၼ်ႉသွင်ဝၼ်းယဝ်ႉၸိုင်၊ မၼ်းၸဝ်ႈဢွၵ်ႇသေၵႃႈတီႈၼၼ်ႈလႄႈ ၵႂႃႇၵႃႈတီႈမိူင်း ၵႃႇလီႉလႄး ဢေႃႈ။-

44လွင်ႈမၼ်းၸမ်ႉ ယေႇသူႉ တူဝ်ၸဝ်ႈၵဝ်ႇၶၢမ်ႇသၢၵ်ႈသေႇလႄႈဝႃႈ၊ ပရေႃးၽႅတ်ႈဢမ်ႇမီးသရေႇၵႃႈၼႂ်းမိူင်းဢၼ်တူဝ်ၸဝ်ႈၵဝ်ႇယူႇၼၼ်ႉ၊ ဝႃႈၼင်ႇၼႆဢေႃႈ။

45မိူဝ်ႈဢၼ်မၼ်းၸဝ်ႈႁွတ်ႈထိုင်ၵႃႈတီႈမိူင်း ၵႃႇလီႉလႄး ၼၼ်ႉၸိုင်၊ ၵူၼ်း ၵႃႇလီႉလႄး တင်းလၢႆ ႁပ်ႉတုင်းဢဝ်မၼ်းၸဝ်ႈဢေႃႈ။ လွင်ႈမၼ်းၸမ်ႉ ပိူဝ်ႈဢၼ်ၶဝ်ၼၼ်ႉၸၢင်ႈၵႂႃႇၵႃႈတီႈပွႆးဢၼ်ၶၢမ်ႇၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉ မႃးလႄႈ ၶဝ်လႆႈႁၼ်လွင်ႈတၢင်း ၵႃႈဢၼ်မၼ်းၸဝ်ႈႁဵတ်းၼႂ်းပွႆးၼၼ်ႉ တင်းသဵင်ႈတင်းလူင်ၼၼ်ႉမႃးယဝ်ႉ။

46မၼ်းၸဝ်ႈသမ်ႉၶိုၼ်ႈၵႂႃႇၵႃႈတီႈဝဵင်း ၵႃႇၼႃႉ ၼႂ်းမိူင်း ၵႃႇလီႉလႄး တီႈဢၼ်မၼ်းၸဝ်ႈႁႂ်ႈၼမ်ႉပဵၼ်ၼမ်ႉၸပိတ်ႈၼၼ်ႉဢေႃႈ။ မိူဝ်ႈၼၼ်ႉ မီးဢမၢတ်ႈၵေႃႉၼိုင်ႈဢၼ်လုၵ်ႈၸၢႆးမၼ်းၸပ်းတၢင်းၶႆႈတၢင်းပဵၼ် ယူႇၵႃႈၼႂ်းဝဵင်း ၵပိူဝ်ႇၼေႇဢုမ်ႇ ဢေႃႈ။-

47မိူဝ်ႈဢၼ်မၼ်းၼၼ်ႉငိၼ်းလွင်ႈဢၼ် ယေႇသူႉ လုၵ်ႉသေၵႃႈတီႈမိူင်း ယူႉတႃႉ ပုၼ်ႉ ႁွတ်ႈမႃးၵႃႈတီႈမိူင်း ၵႃႇလီႉလႄး ၼၼ်ႉၸိုင်၊ မၼ်းၵႂႃႇၸူးၵႃႈတီႈမၼ်းၸဝ်ႈလႄႈ ၼင်ႇႁိုဝ်မၼ်းၸဝ်ႈတၵ်းလူင်းၸူးၵႃႈတီႈလုၵ်ႈၸၢႆးမၼ်း ဢၼ်ၸမ်တၵ်းတၢႆၼၼ်ႉလႄႈ ႁႂ်ႈတၢင်းၶႆႈတၢင်းပဵၼ်မၼ်းႁၢႆၸိုင် တွင်းပၢၼ်ႇဢေႃႈ။-

48ယေႇသူႉ ၵေႃႈလၢတ်ႈလႄႈဝႃႈ၊ ပေႃးသူဢမ်ႇလႆႈႁၼ်ၼီႉမိၵ်ႈလၢၵ်ႈၶၼႃႇ ဢိၵ်ႇတင်းလွင်ႈတၢင်းဢၼ်လီဢၢမ်းတင်းလၢႆၸိုင်၊ သူဢမ်ႇမီးတၢင်းဢၼ်ယုမ်ႇၵူၺ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

49ဢမၢတ်ႈၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၶႅၼ်းတေႃႈၸဝ်ႈႁဝ်းလူင်းမႃးၸူဝ်ႈဢၼ်လုၵ်ႈၸၢႆးၵဝ်ၶႃႈဢမ်ႇပႆႇတၢႆၼၼ်ႉ၊ သေၵမ်းတီႈၶႃႈ၊ ဝႃႈၼင်ႇၼႆဢေႃႈ။

50ယေႇသူႉ ၵေႃႈလၢတ်ႈလႄႈဝႃႈ၊ ၵႂႃႇတႃႉ၊ လုၵ်ႈၸၢႆးမႂ်းၼၼ်ႉဢသၢၵ်ႈလႆႈၵတ်းယဵၼ်ၶျၢမ်းသႃႇယဝ်ႉ၊ ဝႃႈၼင်ႇၼႆဢေႃႈ။ ဢမၢတ်ႈၼၼ်ႉ ယုမ်ႇဢဝ်ၵႂၢမ်းဢၼ် ယေႇသူႉ ဝႃႈၼၼ်ႉလႄႈ ၵႂႃႇဢေႃႈ။-

51ၼႂ်းမိူဝ်ႈဢၼ်မၼ်းယင်းတိုၵ်ႉၸွမ်းတၢင်းၵႂႃႇယူႇၼၼ်ႉၸိုင်၊ ၵူၼ်းဢွၼ်ႇမၼ်းတင်းလၢႆမႃးႁပ်ႉႁူဝ်တၢင်းမၼ်းလႄႈလဝ်ႊလၢတ်ႈဝႃႈ၊ လုၵ်ႈၸၢႆးၸဝ်ႈႁဝ်းဢသၢၵ်ႈလႆႈၵတ်းယဵၼ်ၶျၢမ်းသႃႇယဝ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။-

52မၼ်းထၢမ်လႄႈဝႃႈ၊ ႁွတ်ႈထိုင်တၢင်းဢၼ်သၢၵ်ႈသႃႇၶႅၼ်းမႃးၶိင်ႇလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉလဝ်ႊလၢတ်ႈလႄႈဝႃႈ၊ ၼၢဝ်မၼ်းၼၼ်ႉႁၢႆမိူဝ်ႈဝႃးၶိင်ႇၸဵတ်းၼႃႇရီႇၶႃႈဢေႃႈ၊ ဝႃႈၼင်ႇၼႆဢေႃႈ။-

53ပိူဝ်ႈၼႆလႄႈပေႃႈမၼ်းၼၼ်ႉ ႁူႉၶိင်ႇၼၼ်ႉပဵၼ်ၶိင်ႇၼႃႇရီႇဢၼ် ယေႇသူႉ လၢတ်ႈလႄႈဝႃႈ လုၵ်ႈၸၢႆးမႂ်းၼၼ်ႉဢသၢၵ်ႈလႆႈၵတ်းယဵၼ်ၶျၢမ်းသႃႇယဝ်ႉ၊ ဝႃႈၼင်ႇၼႆၼၼ်ႉလႄႈ ၸႃႉၸဵမ်တူဝ်ၸဝ်ႈၵဝ်ႇဢိၵ်ႇတင်း ၵူၼ်းႁိူၼ်းၵူၼ်းယေးတူဝ်ၸဝ်ႈၵဝ်ႇ တင်းသဵင်ႈတင်းလူင် ႁွတ်ႈထိုင်တၢင်းဢၼ်ယုမ်ႇမၢတ်ႈဢေႃႈ။-

54ၼီႉမိၵ်ႈလၢၵ်ႈၶၼႃႇၸဝ်ႈဢၼ်ၼႆႉၸမ်ႉ၊ ပဵၼ်ၼီႉမိၵ်ႈလၢၵ်ႈၶၼႃႇတူႉတီႉယႃႉ ဢၼ် ယေႇသူႉ ၼႄပျႃးလိုၼ်းသေမၼ်းၸဝ်ႈ လုၵ်ႉသေၵႃႈတီႈမိူင်း ယူႉတႃႉ ၵႂႃႇၵႃႈတီႈမိူင်း ၵႃႇလီႉလႄး ယဝ်ႉၼၼ်ႉဢေႃႈ။