John 20

Shan

← Chapter 19 Jump to: Chapter 21 →

1ၼႂ်းၸဵတ်းဝၼ်း ဝၼ်းပထမႃႉၸဝ်ႉၸဝ်ႉ၊ ၸူဝ်ႈဢၼ်မိူင်းဢမ်ႇပႆႇလႅင်းၼၼ်ႉ မႃႇရီႉမႃႇၵတလႃႉ ၵႂႃႇၵႃႈတီႈၶုမ်သၢင်းၶႅင်းၼၼ်ႉလႄႈ ထူပ်းႁၼ်မၢၵ်ႇႁိၼ်ဢၼ်ဢိုတ်းဝႆႉၵႃႈတီႈပၢၵ်ႇၶုမ်ၼၼ်ႉၶၢႆႉသေၵႃႈတီႈၼၼ်ႈလႄႈမီးယူႇၼၼ်ႉသေယဝ်ႉ၊-

2ၶုၼ်ႇလႅၼ်ႈၵႂႃႇၸူးၵႃႈတီႈဢၼ် သီႉမုၼ်ႇပေႇတရူႉ ဢိၵ်ႇတင်းတပႄးၸဝ်ႈတၢင်ႇၵေႃႉဢၼ် ယေႇသူႉ ႁၵ်ႉၼၼ်ႉမီးၼၼ်ႉလႄႈ လၢတ်ႈဝႃႈ၊ ၶဝ်ဢဝ်ၸဝ်ႈႁဝ်းၼၼ်ႉ ဢွၵ်ႇသေၵႃႈၼႂ်းၶုမ်သၢင်းၶႅင်းၵႂႃႇယဝ်ႉ။ ႁဝ်းဢမ်ႇႁူႉလွင်ႈဢၼ်ၶဝ်ဢဝ်မၼ်းၸဝ်ႈဝႆႉၵႃႈတီႈလႂ်ၼၼ်ႉ၊ ဝႃႈၼင်ႇၼႆဢေႃႈ။

3မိူဝ်ႈၼၼ်ႉ ပေႇတရူႉ ဢိၵ်ႇတင်းတပႄးၸဝ်ႈတၢင်ႇၵေႃႉၼၼ်ႉ ဢွၵ်ႇသေလႄႈၵႂႃႇၵႃႈတီႈၶုမ်သၢင်းၶႅင်းၼၼ်ႉဢေႃႈ။-

4သွင်ၶႃၶုၼ်ႇလႅၼ်ႈၵႂႃႇၼင်ႇၵၼ်လႄႈ၊ တပႄးၸဝ်ႈတၢင်ႇၵေႃႉၼၼ်ႉပူၼ်ႉ ပေႇတရူႉ ၵႂႃႇသေယဝ်ႉ၊ ႁွတ်ႈထိုင်ၵႃႈတီႈၶုမ်သၢင်းၶႅင်းဢွၼ်တၢင်းဢေႃႈ။-

5မိူဝ်ႈဢၼ်မၼ်းၵူမ်ႈတူၺ်းလႄႈ ႁၼ်လွင်ႈဢၼ်ၽႃႈပိၵ်ႈၼၼ်ႉၵူၺ်း ၵိုတ်းၵျၢၼ်ႇဝႆႉယူႇၼၼ်ႉၸိုင်၊ မၼ်းယင်းဢမ်ႇၶဝ်ႈလႄႈယူႇသေဢေႃႈ။-

6သီႉမုၼ်ႇပေႇတရူႉ ၸွမ်းလင်မၼ်းမႃးလႄႈႁွတ်ႈထိုင်သေယဝ်ႉ၊-

7ၶဝ်ႈၵႃႈၼႂ်းၶုမ်သၢင်းၶႅင်းလႄႈ ထူပ်းႁၼ်လွင်ႈဢၼ်ၽႃႈပိၵ်ႈၵိုတ်းၵျၢၼ်ႇဝႆႉ ဢိၵ်ႇတင်းလွင်ႈဢၼ်ၽႃႈၸဵတ်ႉဢၼ် မီးၵႃႈႁူဝ်မၼ်းၸဝ်ႈၼၼ်ႉ ဢမ်ႇၵိုတ်းၵျၢၼ်ႇဝႆႉလူၺ်ႈၵၼ်တင်းၽႃႈပိၵ်ႈၼၼ်ႉလႄႈ ႁမ်းၵဵၼ်ဝႆႉတၢင်ႇတီႈယူႇၼၼ်ႉဢေႃႈ။-

8မိူဝ်ႈၼၼ်ႉ တပႄးၸဝ်ႈတၢင်ႇၵေႃႉဢၼ်ႁွတ်ႈထိုင်ၵႃႈတီႈၶုမ်သၢင်းၶႅင်း ဢွၼ်တၢင်းၼၼ်ႉ ၶဝ်ႈလႄႈႁၼ်သေယဝ်ႉ၊ ယုမ်ႇဢေႃႈ။-

9တပႄးၸဝ်ႈၸိူဝ်းၼၼ်ႉ ဢမ်ႇပႆႇႁူႉၵႂၢမ်းၵျၢမ်းလိၵ်ႈဢၼ်ဝႃႈ၊ မၼ်းၸဝ်ႈတၵ်းလႆႈ လုၵ်ႉၵႃႈတၢင်းတၢႆၶိုၼ်းလိပ်းဢေႃႈ၊ ဝႃႈၼင်ႇၼႆၼၼ်ႉ။-

10ပိူဝ်ႈၼႆလႄႈ လိုၼ်းၼၼ်ႉတပႄးၸဝ်ႈၸိူဝ်းၼၼ်ႉ ၶိုၼ်းမိူဝ်းၵႂႃႇၵႃႈတီႈဢၼ် တူဝ်ၸဝ်ႈၵဝ်ႇယူႇၼၼ်ႉသေဢေႃႈ။

11မႃႇရီႉ ၸုၵ်းယူႇၵႃႈတီႈႁိမ်းၶုမ်သၢင်းၶႅင်းလႄႈ ႁွင်ႉႁႆႈယူႇဢေႃႈ။ ၼႂ်းမိူဝ်ႈဢၼ်မၼ်းႁွင်ႉႁႆႈယူႇၼၼ်ႉၸိုင် မၼ်းၵူမ်ႈတူၺ်း ၼႂ်းၶုမ်သၢင်းၶႅင်းၼၼ်ႉလႄႈ၊-

12ႁၼ်တမၢၼ်ႇၵၢင်ႁၢဝ်သွင်ပႃးၼုင်ႈတင်းၶူဝ်းဢၼ်ၽိူၵ်ႇဢၼ်ၶၢဝ်သေလႄႈ ၼင်ႈယူႇၵႃႈတီႈဢၼ်တူဝ်တၢႆ ယေႇသူႉ ဢိင်ယူႇၼၼ်ႉ ၵႃႈတီႈၽၢႆႇႁူဝ်ၸဝ်ႈပႃးၼိုင်ႈ ၵႃႈတီႈၽၢႆႇတိၼ်ၸဝ်ႈပႃးၼိုင်ႈဢေႃႈ။-

13ၶဝ်ၼၼ်ႉၵေႃႈထၢမ်လႄႈဝႃႈ၊ ၽူႈယိင်းဢိူၺ်း၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ႁွင်ႉႁႆႈယူႇၼင်ႇႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းလၢတ်ႈလႄႈဝႃႈ၊ ၶဝ်ဢဝ်ၸဝ်ႈၵဝ်ၶႃႈ ၵႂႃႇသေယဝ်ႉ။ ဝႆႉၵႃႈတီႈလႂ်ဢမ်ႇႁူႉၶႃႈ၊ ဝႃႈၼင်ႇၼႆဢေႃႈ။

14မၼ်းဝႃႈၸိူဝ်ႉၼင်ႇၼႆသေယဝ်ႉ၊ မိူဝ်ႈဢၼ်ဝၢႆႇတူၺ်းတၢင်းလင်ၸိုင်၊ ပိၵ်ႉသမ်ႉႁၼ် ယေႇသူႉ ၸုၵ်းယူႇသေၵေႃႈ မၼ်းဢမ်ႇႁူႉ လွင်ႈဢၼ်ပဵၼ် ယေႇသူႉ ။-

15ယေႇသူႉ ၵေႃႈထၢမ်လႄႈဝႃႈ၊ ၽူႈယိင်းဢိူၺ်း၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ႁွင်ႉႁႆႈယူႇၼင်ႇႁိုဝ်။ မႂ်းႁႃၽူႈလႂ်၊ ဝႃႈၼင်ႇၼႆဢေႃႈ။ မၼ်းၵေႃႈထၢင်ႇၵေႃႉၼၼ်ႉပဵၼ်ၵေႃႉဢၼ်ပႂ်ႉသူၼ်ဢူးယဵၼ်ႇၼၼ်ႉလႄႈလၢတ်ႈလႄႈဝႃႈ၊ ၸဝ်ႈဢိူၺ်း၊ ပေႃးၸဝ်ႈဢဝ်မၼ်းၵႂႃႇယဝ်ႉၸိုင် လၢတ်ႈပၼ်လွင်ႈဢၼ်ဢဝ်ဝႆႉၵႃႈတီႈလႂ်ၼၼ်ႉတီႈၵဝ်ၶႃႈသေၵမ်းၶႃႈ။ ၵဝ်ၶႃႈတၵ်းဢဝ်ၵႂႃႇၶႃႈဢေႃႈ၊ ဝႃႈၼင်ႇၼႆဢေႃႈ။-

16ယေႇသူႉ ၵေႃႈလၢတ်ႈလႄႈဝႃႈ၊ မႃႇရီႉ ဢိူၺ်း၊ မိူဝ်ႈဢၼ်ဝႃႈၼင်ႇၼႆၸိုင်၊ မႃႇရီႉ ဝၢႆႇတူၺ်းလႄႈ ဢိူဝ်ဝႃႈ၊ ရပ်ႉပူႉၼီႉ ၊ ဝႃႈၼင်ႇၼႆဢေႃႈ၊ ဢၼ်ဝႃႈ ရပ်ႉပူႉၼီႉ ၸမ်ႉ၊ ၶႂ်ႈဝႃႈသြႃႇၸဝ်ႈ ဢေႃႈ။-

17ယေႇသူႉ ၵေႃႈလၢတ်ႈလႄႈဝႃႈ၊ ယႃႇပေတိူဝ်ႉပေယိပ်းၵဝ်လူးၵွၼ်ႇ။ လွင်ႈမၼ်းၸမ်ႉ ၵဝ်ဢမ်ႇပႆႇလႆႈၶိုၼ်ႈၵႂႃႇၵႃႈတီႈပေႃႈၸဝ်ႈပုၼ်ႉ။ ၵႂႃႇၵႃႈတီႈဢၼ်ၼွင်ႉၵဝ်ၸိူဝ်းၼၼ်ႉမီးပုၼ်ႉတႃႉ။ လၢတ်ႈပၼ်လွင်ႈဢၼ်ၵဝ်တၵ်းလႆႈၶိုၼ်ႈၵႂႃႇၵႃႈတီႈပေႃႈၵဝ် ဢၼ်ဝႃႈပေႃႈသူ ၵႃႈတီႈၽြႃးပဵၼ်ၸဝ်ႈၵဝ် ဢၼ်ဝႃႈၽြႃးပဵၼ်ၸဝ်ႈသူပုၼ်ႉတႃႉဝႃႈၼႆ၊-

18ၵႃႈၼင်ႇဢၼ်မၼ်းၸဝ်ႈဝႃႈၼၼ်ႉ၊ မႃႇရီႉမႃႇၵတလႃႉ ၵႂႃႇလႄႈ လၢတ်ႈပၼ်လွင်ႈဢၼ်မၼ်းလႆႈထူပ်းႁၼ်မၼ်းၸဝ်ႈ ဢိၵ်ႇတင်း လွင်ႈဢၼ်မၼ်းၸဝ်ႈဝႃႈ ၸိူဝ်ႉၼင်ႇၼၼ်ၼၼ်ႉ တီႈတပႄးၸဝ်ႈတင်းလၢႆဢေႃႈ။

19မိူဝ်ႈဢၼ်ထိုင်ၶိင်ႇၵၢင်ၶမ်ႈ ၼႂ်းဝၼ်းၼၼ်ႉဢၼ်ပဵၼ်ဝၼ်းပထမႃႉၼႂ်းၸဵတ်းဝၼ်းၼၼ်ႉၸိုင်၊ ၵွပ်ႈပိူဝ်ႈဢၼ်ၵူဝ် ၵူၼ်း ယူႉတႃႉ တင်းလၢႆလႄႈ ၽၵ်းတူတီႈဢၼ် တပႄးၸဝ်ႈၸူႉၵၼ်တုမ်ၵၼ်ၼၼ်ႉ ဢိုတ်းဝႆႉမီးယူႇလႄႈ ယေႇသူႉ မႃးၸုၵ်းယူႇ ၵႃႈတီႈၼႂ်းၶိုင်ႈၵၢင်ၶဝ်သေလႄႈလၢတ်ႈဝႃႈ၊ ႁႂ်ႈတၢင်းၼိမ်မီးတီႈသူသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

20မၼ်းၸဝ်ႈလၢတ်ႈၸိူဝ်ႉၼင်ႇၼၼ်သေယဝ်ႉ၊ ၼႄပျႃးမိုဝ်းၸဝ်ႈ ဢိၵ်ႇတင်းပဵမ်ႉၸဝ်ႈဢေႃႈ။ တပႄးၸဝ်ႈၸိူဝ်းၼၼ်ႉ ႁၼ်မၼ်းၸဝ်ႈသေယဝ်ႉ၊ မီးတၢင်းဢၼ်သိူဝ်းပျေႃႇဢေႃႈ။-

21ယေႇသူႉ ၵေႃႈသမ်ႉၶိုၼ်းလၢတ်ႈတီႈၶဝ်လႄႈဝႃႈ၊ ႁႂ်ႈတၢင်းၼိမ်မီးတီႈသူသေၵမ်းလူၺ်ႈ။ ၸိူဝ်ႉၼင်ႇဢၼ်ပေႃႈၸဝ်ႈပွႆႇၸႂ်ႉၵဝ်မႃးၼၼ်ႉ၊ ၵဝ်ပွႆႇၸႂ်ႉသူဢေႃႈ၊ ဝႃႈၼင်ႇၼႆသေယဝ်ႉ၊-

22ပဝ်ႇသႂ်ႇၵႃႈၼိူဝ်ၶဝ်ၼၼ်ႉယူႇသေလႄႈလၢတ်ႈဝႃႈ၊ သူၶၢမ်ႇဢဝ်ဝီႉၺိၺ်ႇဢၼ်မူတ်းၸၢင်ႇၸဝ်ႈတႃႉ။-

23ဢပႅတ်ႈၽူႈလႂ်သေဢမ်ႇဝႃႈ၊ ပေႃးသူပွႆႇလွတ်ႈၸိုင်၊ ၵေႃႉၼၼ်ႉမီးတၢင်းဢၼ်ၵၢင်းလွတ်ႈတင်းဢပႅတ်ႈဢေႃႈ။ ဢပႅတ်ႈၽူႈလႂ်သေဢမ်ႇဝႃႈ၊ ပေႃးသူႁႂ်ႈတႄႇယူႇၸိုင်၊ ၵေႃႉၼၼ်ႉမီးတၢင်းဢၼ်ဢပႅတ်ႈတႄႇယူႇဢေႃႈ၊ ဝႃႈၼင်ႇၼႆဢေႃႈ။

24ၵူၺ်းၵႃႈမိူဝ်ႈဢၼ် ယေႇသူႉ မႃးၼၼ်ႉၸိုင်၊ ထူဝ်းမႃႉ ဢၼ်ၶဝ်ႈပႃးၼႂ်းတပႄးၸဝ်ႈသိပ်းသွင်ပႃးဢၼ်လႆႈၸိုဝ်ႈ တီႉတူႉမူႉ ၼၼ်ႉဢမ်ႇမီးလူၺ်ႈၵၼ်တင်း တပႄးၸဝ်ႈၸိူဝ်းၼၼ်ႉ။-

25ပိူဝ်ႈၼႆလႄႈ တပႄးၸဝ်ႈၸိူဝ်းၼၼ်ႉၵေႃႈလၢတ်ႈတီႈမၼ်းလႄႈဝႃႈ၊ ႁဝ်းၶႃႈလႆႈႁၼ်ၸဝ်ႈႁဝ်းၼၼ်ႉယဝ်ႉဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈလၢတ်ႈလႄႈဝႃႈ၊ ပေႃးၵဝ်ၶႃႈဢမ်ႇလႆႈႁၼ်ႁွႆးလဵၵ်းမႆႇၼႃးၵႃႈတီႈၼႂ်းမိုဝ်းမၼ်းၸဝ်ႈၼၼ်ႉ၊ ဢမ်ႇလႆႈဢဝ်ၼိဝ်ႉမိုဝ်း သႄႇတူၺ်းၵႃႈၼႂ်းႁွႆးလဵၵ်းမႆႇၼႃးၼၼ်ႉ၊ ဢမ်ႇလႆႈဢဝ်တင်းမိုဝ်းသႄႇတူၺ်းၵႃႈတီႈပဵမ်ႉမၼ်းၸဝ်ႈၼၼ်ႉၸိုင်၊ ၵဝ်ၶႃႈဢမ်ႇယုမ်ႇၶႃႈ၊ ဝႃႈၼင်ႇၼႆဢေႃႈ။

26လိုၼ်းၼၼ်ႉမိူဝ်ႈဢၼ်လႆႈပႅတ်ႇဝၼ်းၸိုင်၊ တပႄးၸဝ်ႈၸိူဝ်းၼၼ်ႉသမ်ႉ မီးၵႃႈၼႂ်းတီႈၼၼ်ႉထႅင်ႈလႄႈ ထူဝ်းမႃႉ ၵေႃႈ ပႃးဢေႃႈ။ ၼႂ်းမိူဝ်ႈဢၼ်ၽၵ်းတူဢိုတ်းဝႆႉ မီးယူႇၼၼ်ႉၸိုင်၊ ယေႇသူႉ မႃးၸုၵ်းယူႇၵႃႈတီႈၼႂ်းၶိုင်ႈၵၢင်ၶဝ်လႄႈလၢတ်ႈဝႃႈ၊ ႁႂ်ႈတၢင်းၼိမ်မီးတီႈသူသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

27မိူဝ်ႈၼၼ်ႉမၼ်းၸဝ်ႈလၢတ်ႈတီႈ ထူဝ်းမႃႉ လႄႈဝႃႈ၊ ယိုၼ်ႈၼိဝ်ႉမိုဝ်းမႂ်းသေလႄႈ တူၺ်းမိုဝ်းၵဝ်ၼႆႉတႃႉ။ ယိုၼ်ႈမိုဝ်းမႂ်းလႄႈ သႄႇတူၺ်းပဵမ်ႉၵဝ်ၼႆႉတႃႉ။ ယႃႇပေႁႂ်ႈမီးတၢင်းဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈ။ ယုမ်ႇတႃႉ၊ ဝႃႈၼင်ႇၼႆဢေႃႈ။-

28ထူဝ်းမႃႉ ၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈၵဝ်ၶႃႈ၊ ၽြႃးပဵၼ်ၸဝ်ႈၵဝ်ၶႃႈလူင်လၢင်၊ ဝႃႈၼင်ႇၼႆဢေႃႈ။-

29ယေႇသူႉ ၵေႃႈလၢတ်ႈလႄႈဝႃႈ၊ မႂ်းၼႆႉပိူဝ်ႈဢၼ်ႁၼ်ၵဝ်လႄႈမီးတၢင်းဢၼ်ယုမ်ႇဢေႃႈ။ ၶဝ်ၸိူဝ်းဢၼ်ဢမ်ႇႁၼ်ၵဝ်လႄႈယုမ်ႇၼၼ်ႉမီးမင်ႇၵလႃႇဢေႃႈ၊ ဝႃႈၼင်ႇၼႆဢေႃႈ။

30ၼီႉမိၵ်ႈလၢၵ်ႈၶၼႃႇတၢင်ႇၸိူဝ်ႉတၢင်ႇဢၼ် ဢၼ်ဢမ်ႇတႅမ်ႈဝႆႉၵႃႈၼႂ်းၵျၢမ်းလိၵ်ႈၼႆႉၼမ်ၼႃႇၵေႃႈ ယေႇသူႉ ၼႄပျႃးၵႃႈတီႈၽၢႆႇၼႃႈတပႄးၸဝ်ႈတင်းလၢႆဢေႃႈ။-

31ၼင်ႇႁိုဝ်သူတၵ်းယုမ်ႇလွင်ႈဢၼ် ယေႇသူႉ ပဵၼ်ၸဝ်ႈၶရိၸ်ႈ လုၵ်ႈၽြႃးပဵၼ်ၸဝ်ႈၼၼ်ႉ၊ သူယုမ်ႇၸိူဝ်ႉၼင်ႇၼၼ်သေယဝ်ႉ၊ ၼင်ႇႁိုဝ်သူ တၵ်းလႆႈဢသၢၵ်ႈၵွပ်ႈပိူဝ်ႈ ၼႃႇမႃႉၸိုဝ်ႈသဵင်ၸဝ်ႈၸိုင် မီးတၢင်းဢၼ်တႅမ်ႈဝႆႉထၢၼ်ႇၼႆႉဢေႃႈ။

← Chapter 19 Jump to: Chapter 21 →