John 9 — Shan

1ၼႂ်းမိူဝ်ႈဢၼ်မၼ်းၸဝ်ႈ ယင်းတိုၵ်ႉၵႂႃႇၸွမ်းတၢင်းယူႇၼၼ်ႉၸိုင်၊ မၼ်းၸဝ်ႈထူပ်းႁၼ်ၵူၼ်းဢၼ်တႃမွတ်ႇ ၸႃႉၸဵမ်မိူဝ်ႈၼႂ်းတွင်ႉမႄႈမၼ်းမႃးၼၼ်ႉ ၵေႃႉၼိုင်ႈဢေႃႈ။-

2တပႄးၸဝ်ႈတင်းလၢႆၵေႃႈလဝ်ႊထၢမ်လႄႈဝႃႈ၊ ၸဝ်ႈႁဝ်း၊ ၵေႃႉၼႆႉတႃမွတ်ႇၵွပ်ႈပိူဝ်ႈဢပႅတ်ႈၽူႈလႂ်ၶႃႈ။ မွတ်ႇၵွပ်ႈပိူဝ်ႈဢပႅတ်ႈမၼ်းၶႃႈႁိုဝ်။ မွတ်ႇၵွပ်ႈပိူဝ်ႈဢပႅတ်ႈပေႃႈမႄႈမၼ်းၶႃႈႁိုဝ်။ ဝႃႈၼင်ႇၼႆဢေႃႈ။-

3ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ မၼ်းဢမ်ႇႁဵတ်းဢပႅတ်ႈ။ ပေႃႈမႄႈမၼ်းၵေႃႈဢမ်ႇႁဵတ်းဢပႅတ်ႈ။ ၼင်ႇႁိုဝ်ၵၢၼ်တၢင်းႁဵတ်းၽြႃးပဵၼ်ၸဝ်ႈ တၵ်းထၢင်ႇသႃးမႃးၵႃႈၼႂ်းမၼ်းၸိုင်ၸင်ႇပဵၼ်ဢေႃႈ။-

4ၵဝ်တၵ်းလႆႈႁဵတ်းၵၢၼ်တၢင်းႁဵတ်း ၵေႃႉဢၼ်ပွႆႇၸႂ်ႉၵဝ်မႃးၼၼ်ႉ ၼႂ်းမိူဝ်ႈဢၼ်ၶိင်ႇၵၢင်ဝၼ်းယင်းမီးယူႇဢေႃႈ။ ၶိင်ႇၵၢင်ၶိုၼ်းဢၼ်ၽူႈလႂ်သေၵေႃႉသေၵူၼ်း ဢမ်ႇႁဵတ်းသေၸိူဝ်ႉသေပိူင်လႆႈၼၼ်ႉ ယင်းမႃးယူႇလူးၵွၼ်ႇဢေႃႈ။-

5မိူဝ်ႈဢၼ်ၵဝ်ယင်းမီးယူႇၼႂ်းလေႃးၵႃႉၼႆႉၸိုင်၊ ၵဝ်ပဵၼ်ဢၼ်လႅင်းလေႃးၵႃႉၼႆႉဢေႃႈ၊ ဝႃႈၼင်ႇၼႆသေယဝ်ႉ၊-

6ထူမ်ႇသႂ်ႇၵႃႈၼိူဝ်လိၼ်လႄႈဢဝ်ၼမ်ႉလၢႆးႁဵတ်းၵူမ်ႇယဝ်ႉၸင်ႇ ဢဝ်ၵူမ်ႇၼၼ်ႉတႃးတႃၵေႃႉဢၼ်တႃမွတ်ႇၼၼ်ႉသေလႄႈ လၢတ်ႈလႄႈဝႃႈ၊-

7ၵႂႃႇလႄႈသုၵ်ႈၵႃႈတီႈၼမ်ႉၼွင် သီးလွင်ႇ ပုၼ်ႉတႃႉ၊ ဝႃႈၼင်ႇၼႆဢေႃႈ။ ဢၼ်ဝႃႈ သီးလွင်ႇ ၸမ်ႉ၊ ၶႂ်ႈဝႃႈပွႆႇၸႂ်ႉၵႂႃႇဢေႃႈ။ ၵေႃႉၼၼ်ႉၵႂႃႇလႄႈ သုၵ်ႈသေယဝ်ႉ၊ မၢၵ်ႇတႃမၼ်းႁၼ်လႄႈ မၼ်းသမ်ႉၶိုၼ်းမႃးဢေႃႈ။-

8ၸႃႉၸဵမ်ၵူၼ်းႁိူၼ်းၸမ်ၵၼ်တင်းမၼ်းလႄႈ ၶဝ်ၸိူဝ်းဢၼ်လႆႈႁၼ်မၼ်း ပဵၼ်ၵူၼ်းဢၼ်ယွၼ်းၵိၼ်ယူႇၸိူဝ်းၼၼ်ႉၵေႃႈ လၢတ်ႈလႄႈဝႃႈ၊ ၵေႃႉၼႆႉပဵၼ်ၵေႃႉဢၼ်ၼင်ႈလႄႈယွၼ်းၵိၼ်ယူႇၼၼ်ႉဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။-

9ၵမ်ႈၽွင်ႈၵေႃႈဝႃႈ၊ ၸႂ်ႈယဝ်ႉ၊ ဝႃႈၼင်ႇၼႆဢေႃႈ။ ၵမ်ႈၽွင်ႈၵေႃႈဝႃႈ၊ မိူၼ်ၵၼ်တင်းၵေႃႉၼၼ်ႉဢေႃႈ၊ ဝႃႈၼင်ႇၼႆဢေႃႈ။ မၼ်းၵေႃႈဝႃႈ၊ ၵဝ်ၶႃႈပဵၼ်ၵေႃႉၼၼ်ႉယဝ်ႉ၊ ဝႃႈၼင်ႇၼႆဢေႃႈ။-

10ၶဝ်ၵေႃႈထၢမ်လႄႈဝႃႈ၊ ႁဵတ်းၸိူဝ်ႉၼင်ႇႁိုဝ်လႄႈမၢၵ်ႇတႃမႂ်းၽုၺ်ႇမႃး၊ မိူဝ်ႈဢၼ်ဝႃႈၼင်ႇၼႆၸိုင်၊-

11ၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ၵေႃႉၼိုင်ႈဢၼ်လႆႈၸိုဝ်ႈ ယေႇသူႉ ၼၼ်ႉႁဵတ်းၵူမ်ႇလႄႈတႃးတႃၵဝ်ၶႃႈယဝ်ႉ၊ လၢတ်ႈလႄႈဝႃႈ၊ ၵႂႃႇၵႃႈတီႈၼွင် သီးလွင်ႇ ပုၼ်ႉလႄႈသုၵ်ႈတႃႉ ဝႃႈၼႆ၊ ၵႃႈၼင်ႇဢၼ်ဝႃႈၼၼ်ႉ၊ မိူဝ်ႈဢၼ်ၵဝ်ၶႃႈၵႂႃႇလႄႈသုၵ်ႈၸိုင် တႃၵဝ်ၶႃႈႁၼ်မႃးၶႃႈဢေႃႈ၊ ဝႃႈၼင်ႇၼႆဢေႃႈ။-

12ၶဝ်ၼၼ်ႉၵေႃႈထၢမ်လႄႈဝႃႈ၊ ၵေႃႉၼၼ်ႉမီးၵႃႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ ၵေႃႉၼၼ်ႉၵေႃႈလၢတ်ႈလႄႈဝႃႈ၊ ၵဝ်ၶႃႈဢမ်ႇႁူႉၶႃႈ၊ ဝႃႈၼင်ႇၼႆဢေႃႈ။

13ၶဝ်ၸိူဝ်းၼၼ်ႉၵေႃႈ ဢဝ်ၵေႃႉဢၼ်တႃမွတ်ႇယဝ်ႉပွၵ်ႈၼိုင်ႈၼၼ်ႉၵႂႃႇ သူင်ႇၵႃႈတီႈ ၽႃႇရီႉသႄး ၶဝ်ဢေႃႈ။-

14ဝၼ်းဢၼ် ယေႇသူႉ ႁဵတ်းၵူမ်ႇလႄႈၽုၺ်ႇမၢၵ်ႇတႃမၼ်းၼၼ်ႉ ပဵၼ်ဝၼ်းၵမ်သိၼ်ဢေႃႈ။-

15လႆႈသမ်ႉ ၽႃႇရီႉသႄး ၸိူဝ်းၼၼ်ႉၵေႃႈထၢမ်လႄႈဝႃႈ၊ ႁဵတ်းၸိူဝ်ႉၼင်ႇႁိုဝ်လႄႈမၢၵ်ႇတႃမႂ်းႁၼ်မႃး၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈလၢတ်ႈလႄႈဝႃႈ၊ ၵေႃႉၼၼ်ႉဢဝ်ၵူမ်ႇသႂ်ႇၵႃႈတီႈမၢၵ်ႇတႃၵဝ်ၶႃႈလႄႈ မိူဝ်ႈဢၼ်ၵဝ်ၶႃႈသုၵ်ႈၸိုင်၊ မၢၵ်ႇတႃႁၼ်မႃးၶႃႈဢေႃႈ၊ ဝႃႈၼင်ႇၼႆဢေႃႈ။-

16ၽႃႇရီႉသႄး ၵမ်ႈၽွင်ႈၵေႃႈလၢတ်ႈလႄႈဝႃႈ၊ ပိူဝ်ႈဢၼ်ၵေႃႉၼၼ်ႉဢမ်ႇၵမ်ဝၼ်းၵမ်သိၼ်လႄႈ ပဵၼ်ၵေႃႉဢၼ်ၽြႃးပဵၼ်ၸဝ်ႈပွႆႇၸႂ်ႉမႃးဢမ်ႇၸႂ်ႈ၊ ဝႃႈၼင်ႇၼႆဢေႃႈ။ ၵမ်ႈၽွင်ႈၵေႃႈဝႃႈ၊ ၵေႃႉဢၼ်ႁၢႆႉၸိုင် တၵ်းၼႄပျႃးၼီႉမိၵ်ႈလၢၵ်ႈၶၼႃႇၸိူဝ်ႉၼင်ႇၼႆလႆႈၼင်ႇႁိုဝ်၊ ဝႃႈၼင်ႇၼႆဢေႃႈ။ ၼင်ႇၼၼ်လႄႈ ၶဝ်ၵေႃႉၼိုင်ႈလႄႈၵေႃႉၼိုင်ႈ ႁွတ်ႈထိုင်တၢင်းဢၼ်ဢမ်ႇထုၵ်ႇဢမ်ႇပေႃးၵၼ် ၽၢတ်ႇၽႄၵၼ်ဢေႃႈ။-

17ၶဝ်ၼၼ်ႉသမ်ႉၶိုၼ်းထၢမ်ၵေႃႉဢၼ်မၢၵ်ႇတႃမွတ်ႇယဝ်ႉပွၵ်ႈၼိုင်ႈၼၼ်ႉထႅင်ႈလႄႈဝႃႈ၊ ၵေႃႉဢၼ်ၽုၺ်ႇမၢၵ်ႇတႃမႂ်းၼၼ်ႉ ပဵၼ်ၵူၼ်းၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ၵေႃႉၼၼ်ႉၵေႃႈလၢတ်ႈလႄႈဝႃႈ၊ ပဵၼ်ပရေႃးၽႅတ်ႈၶႃႈဢေႃႈ၊ ဝႃႈၼင်ႇၼႆဢေႃႈ။

18ၵူၼ်း ယူႉတႃႉ ၸိူဝ်းၼၼ်ႉ ၸူဝ်ႈဢၼ်ၶဝ်ဢမ်ႇပႆႇႁွင်ႉဢဝ်ပေႃႈမႄႈ ၵေႃႉဢၼ်မၢၵ်ႇတႃလႆႈႁၼ်မႃးၼၼ်ႉမႃးၸိုင် ဢမ်ႇယုမ်ႇလွင်ႈဢၼ်ၵေႃႉၼၼ်ႉ မိူဝ်ႈဢွၼ်တၢင်းမၢၵ်ႇတႃဢမ်ႇႁၼ် ၵမ်းလိုၼ်းမၢၵ်ႇတႃၸင်ႇႁၼ်ၼၼ်ႉလႄႈ၊-

19ထၢမ်တီႈပေႃႈမႄႈမၼ်းလႄႈဝႃႈ၊ ၵေႃႉၼႆႉပဵၼ်လုၵ်ႈၸၢႆးသူ ဢၼ်သူဝႃႈ၊ တႃမွတ်ႇမႃးၸႃႉၸဵမ်မိူဝ်ႈၼႂ်းတွင်ႉမႄႈၼၼ်ႉၸႂ်ႈတႄႉႁိုဝ်။ ပေႃးၸႂ်ႈၸိုင်၊ တေႃႈလဵဝ်ၼႆႉ ႁဵတ်းၸိူဝ်ႉၼင်ႇႁိုဝ်လႄႈ မၢၵ်ႇတႃမၼ်းႁၼ်မႃး၊ ဝႃႈၼင်ႇၼႆဢေႃႈ။-

20ပေႃႈမႄႈမၼ်းၵေႃႈၶိုၼ်းလၢတ်ႈလႄႈဝႃႈ၊ ႁဝ်းၶႃႈႁူႉလွင်ႈဢၼ်ၵေႃႉၼႆႉ ပဵၼ်လုၵ်ႈၸၢႆးႁဝ်းၶႃႈ ဢိၵ်ႇတင်းလွင်ႈဢၼ်တႃမၼ်းမွတ်ႇမႃးၸႃႉၸဵမ်မိူဝ်ႈၼႂ်းတွင်ႉမႄႈၼၼ်ႉၶႃႈဢေႃႈ။-

21ၵူၺ်းၵႃႈ ႁဝ်းၶႃႈဢမ်ႇႁူႉ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ တေႃႈလဵဝ်ၼႆႉမၢၵ်ႇတႃမၼ်းႁၼ်မႃးၼၼ်ႉၶႃႈ။ ႁဝ်းၶႃႈဢမ်ႇႁူႉ လွင်ႈဢၼ်ၽူႈလႂ်ၽုၺ်ႇမၢၵ်ႇတႃမၼ်းၼၼ်ႉၶႃႈ။ ထၢမ်တီႈမၼ်းသေၵမ်းၶႃႈ။ မၼ်းၼႆႉဢသၢၵ်ႈဢရွႆႇၵေႃႈထူၼ်ႈၶႃႈယဝ်ႉ။ မၼ်းတၵ်းလၢတ်ႈလွင်ႈတူဝ်ၸဝ်ႈၵဝ်ႇၶႃႈလႆႈ၊ ဝႃႈၼင်ႇၼႆဢေႃႈ။-

22ပေႃႈမႄႈမၼ်းၼၼ်ႉ ၵွပ်ႈပိူဝ်ႈဢၼ်ၵူဝ် ၵူၼ်း ယူႉတႃႉ တင်းလၢႆလႄႈ ဝႃႈၸိူဝ်ႉၼင်ႇၼႆဢေႃႈ။ လွင်ႈမၼ်းၸမ်ႉ ပေႃးသေၵေႃႉသေၵူၼ်းႁပ်ႉတုင်းဢဝ်လႄႈဝႃႈ၊ ယေႇသူႉ ပဵၼ်ၸဝ်ႈၶရိၸ်ႈဢေႃႈ၊ ဝႃႈၼင်ႇၼႆၸိုင် တၵ်းလႆႈဢဝ်ၵေႃႉၼၼ်ႉႁေႃႈဢွၵ်ႇသေၵႃႈၼႂ်းၸရွပ်ႈႁေႃးတြႃးဝႃႈၼႆ၊ ၵူၼ်း ယူႉတႃႉ ၸိူဝ်းၼၼ်ႉ တိူင်ႇပၢင်ႇၸီႇယၢင်ႇဝႆႉယဝ်ႉ။-

23ပိူဝ်ႈၼႆလႄႈ ပေႃႈမႄႈမၼ်းၵေႃႈလၢတ်ႈလႄႈဝႃႈ၊ မၼ်းၼႆႉဢသၢၵ်ႈဢရွႆႇထူၼ်ႈၶႃႈယဝ်ႉ။ ထၢမ်တီႈမၼ်းသေၵမ်းၶႃႈ၊ ဝႃႈၼင်ႇၼႆသေဢေႃႈ။

24ပိူဝ်ႈၼႆလႄႈ ပွၵ်ႈတူႉတီႉယႃႉ ၶဝ်ၼၼ်ႉႁွင်ႉဢဝ်ၵေႃႉဢၼ်တႃမွတ်ႇယဝ်ႉပွၵ်ႈၼိုင်ႈၼၼ်ႉမႃးလႄႈလၢတ်ႈဝႃႈ၊ ယွင်ႈယေႃးၽြႃးပဵၼ်ၸဝ်ႈတႃႉ။ လွင်ႈဢၼ်ၵေႃႉၼၼ်ႉပဵၼ်ၵူၼ်းႁၢႆႉၸိုင် ႁဝ်းႁူႉယူႇဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

25မၼ်းၶိုၼ်းလၢတ်ႈလႄႈဝႃႈ၊ လွင်ႈဢၼ်ပဵၼ်ၵူၼ်းႁၢႆႉႁိုဝ်။ ဢမ်ႇပဵၼ်ႁိုဝ်ၸိုင်၊ ၵဝ်ၶႃႈဢမ်ႇႁူႉၶႃႈ။ ၵဝ်ၶႃႈႁူႉလွင်ႈဢၼ်ၵဝ်ၶႃႈ မိူဝ်ႈဢွၼ်ၼႆႉၼၼ်ႉမၢၵ်ႇတႃမွတ်ႇယူႇလႄႈ တေႃႈလဵဝ်ၼႆႉ မၢၵ်ႇတႃႁၼ်မႃး လွင်ႈၼိုင်ႈၼႆႉၵူၺ်းၶႃႈဢေႃႈ၊ ဝႃႈၼင်ႇၼႆဢေႃႈ။-

26ၶဝ်ၼၼ်ႉၵေႃႈၶိုၼ်းထၢမ်ၵေႃႉၼၼ်ႉလႄႈဝႃႈ၊ မၼ်းႁဵတ်းတီႈမႂ်းၸိူဝ်ႉၼင်ႇႁိုဝ်။ မၼ်းၽုၺ်ႇမၢၵ်ႇတႃမႂ်းၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

27ၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ၵဝ်ၶႃႈလၢတ်ႈပွၵ်ႈၼိုင်ႈယဝ်ႉ။ သူၸဝ်ႈဢမ်ႇငိၼ်း။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူၸဝ်ႈၶႂ်ႈငိၼ်းထႅင်ႈပွၵ်ႈၼိုင်ႈၼင်ႇႁိုဝ်။ သူၸဝ်ႈမီးဢလူဝ်ႇၶႂ်ႈပဵၼ်တပႄးမၼ်းႁိုဝ်။ ဝႃႈၼင်ႇၼႆဢေႃႈ။-

28ၶဝ်ၼၼ်ႉၵေႃႈသႄႉသွမ်းၵေႃႉၼၼ်ႉလႄႈဝႃႈ၊ မႂ်းပဵၼ်တပႄးမၼ်းဢေႃႈ။ ႁဝ်းၸမ်ႉ၊ ပဵၼ်တပႄး မူဝ်းသေႇ ဢေႃႈ။-

29လွင်ႈဢၼ်ၽြႃးပဵၼ်ၸဝ်ႈဝႆႉပျႃႇတိၵ်ႈၵႃႈတီႈ မူဝ်းသေႇ ၼၼ်ႉၸိုင် ႁဝ်းႁူႉဢေႃႈ။ ၵေႃႉၼၼ်ႉၸိုင်ပဵၼ်မႃးၵႃႈတီႈလႂ်ဝႃႈၼႆ ႁဝ်းဢမ်ႇႁူႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

30ၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ပိၵ်ႉသမ်ႉမၼ်းၽုၺ်ႇမၢၵ်ႇတႃၵဝ်ၶႃႈသေၵေႃႈ၊ လွင်ႈဢၼ်သူၸဝ်ႈ ဢမ်ႇႁူႉလွင်ႈဢၼ်မၼ်းပဵၼ်မႃး ၵႃႈတီႈလႂ်ၼၼ်ႉၸိုင် မီးတီႈလီဢၢမ်းၼႃႇဢေႃႈ။

31ႁဝ်းႁူႉလွင်ႈဢၼ် ၽြႃးပဵၼ်ၸဝ်ႈဢမ်ႇထွမ်ႇဢဝ်ၵႂၢမ်း ၵူၼ်းႁၢႆႉၼၼ်ႉယူႇဢေႃႈ။ ၽူႈလႂ်သေဢမ်ႇဝႃႈ၊ ပေႃးပဵၼ်ၵေႃႉဢၼ် ရူဝ်ႇသေႇၵူဝ်ယမ် ၽြႃးပဵၼ်ၸဝ်ႈလႄႈ ၸွမ်းဢဝ်ဢလူဝ်ႇမၼ်းၸဝ်ႈၸိုင် မၼ်းၸဝ်ႈတၵ်းထွမ်ႇဢဝ်ၵႂၢမ်းၵေႃႉၼၼ်ႉဢေႃႈ။-

32ၼင်ႇဢၼ်ၽူႈလႂ်သေၵေႃႉသေၵူၼ်း တၢတ်ႈၼိူင်ႇလႆႈႁႂ်ႈလႆႈၽုၺ်ႇမၢၵ်ႇတႃၵေႃႉဢၼ်တႃမွတ်ႇၸႃႉၸဵမ်မိူဝ်ႈၼႂ်းတွင်ႉမႄႈမၼ်းမႃးၼၼ်ႉၸိုင်၊ ၸႃႉၸဵမ်ၵမ်ႇၽႃႇၸႃႉတႄႇၼၼ်ႉလႄႈ ဢမ်ႇပႆႇတွၼ်ႉငိၼ်းသေပွၵ်ႈ။-

33ပေႃးၵေႃႉၼၼ်ႉ ဢမ်ႇၸႂ်ႈၵေႃႉဢၼ် ၽြႃးပဵၼ်ၸဝ်ႈပွႆႇၸႂ်ႉမႃးၸိုင် မၼ်းဢမ်ႇတၢတ်ႈၼိူင်ႇသေၸိူဝ်ႉသေပိူင်လႆႈ၊ ဝႃႈၼင်ႇၼႆဢေႃႈ။-

34ၶဝ်ၼၼ်ႉၵေႃႈၶိုၼ်းလၢတ်ႈလႄႈဝႃႈ၊ မႂ်းၼႆႉပဵၼ်ၵေႃႉဢၼ်ၸပ်းတူႉၸရိူၵ်ႈဢပႅတ်ႈ တင်းတူဝ်တင်းၶိင်းယူႇၸႃႉၸဵမ်မိူဝ်ႈဢၼ်ၵိူတ်ႇလဵင်ႉမႃးၼၼ်ႉလႄႈ သင်ႇသွၼ်သုင်းမႃႉပၼ်တီႈႁဝ်းလူင်ပႄႇ၊ ဝႃႈၼင်ႇၼႆသေယဝ်ႉ၊ ႁေႃႈၵေႃႉၼၼ်ႉဢွၵ်ႇၵႃႈၼႂ်းၸရွပ်ႈႁေႃးတြႃးပႅတ်ႈသေဢေႃႈ။

35ယေႇသူႉ ငိၼ်းလွင်ႈဢၼ်ၶဝ်ႁေႃႈၵေႃႉၼၼ်ႉ ဢွၵ်ႇပႅတ်ႈသေယဝ်ႉ၊ ထူပ်းႁၼ်မၼ်းလႄႈထၢမ်ဝႃႈ၊ မႂ်းယုမ်ႇမၢတ်ႈလုၵ်ႈၽြႃးပဵၼ်ၸဝ်ႈႁိုဝ်၊ ဝႃႈၼင်ႇၼႆဢေႃႈ။-

36ၵေႃႉၼၼ်ႉၵေႃႈလဝ်ႊထၢမ်လႄႈဝႃႈ၊ ၸဝ်ႈႁဝ်း၊ ၼင်ႇႁိုဝ်ၵဝ်ၶႃႈတၵ်းလႆႈယုမ်ႇမၢတ်ႈမၼ်းၸဝ်ႈၸိုင်၊ မၼ်းၸဝ်ႈၼၼ်ႉၸမ်ႉ၊ ပဵၼ်ၽူႈလႂ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

37ယေႇသူႉ ၵေႃႈလၢတ်ႈလႄႈဝႃႈ၊ မၼ်းၸဝ်ႈၼၼ်ႉၸိုင် မႂ်းလႆႈႁၼ်မႃးယဝ်ႉဢမ်ႇၵႃး၊ ၵေႃႉဢၼ်လၢတ်ႈၵႂၢမ်းတေႃႇၵၼ်တင်းမႂ်းယူႇတေႃႈလဵဝ်ၼႆႉ ပဵၼ်မၼ်းၸဝ်ႈၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊-

38ၵေႃႉၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၵဝ်ၶႃႈယုမ်ႇမၢတ်ႈယူႇၶႃႈဢေႃႈ၊ ဝႃႈၼင်ႇၼႆသေလႄႈ၊ ၶုပ်ႉမူပ်ႇၵူဝ်းၵႂၢႆႇဢေႃႈ။-

39မိူဝ်ႈၼၼ်ႉ ယေႇသူႉ ၵေႃႈလၢတ်ႈလႄႈဝႃႈ၊ ၵဝ်ႁွတ်ႈမႃးၼႂ်းလေႃးၵႃႉၼႆႉ ပုၼ်ႈလွင်ႈၼင်ႇႁိုဝ်တၵ်းလႆႈၸီႇယၢင်ႇတြႃး ႁႂ်ႈၶဝ်ၸိူဝ်းဢၼ် မၢၵ်ႇတႃဢမ်ႇႁၼ်ၼၼ်ႉ မၢၵ်ႇတႃႁၼ်မႃးလႄႈ ႁႂ်ႈၶဝ်ၸိူဝ်းဢၼ်မၢၵ်ႇတႃႁၼ်ၼၼ်ႉ မၢၵ်ႇတႃမွတ်ႇၵႂႃႇဢေႃႈ၊ ဝႃႈၼင်ႇၼႆဢေႃႈ။-

40ၽႃႇရီႉသႄး ဢၼ်မီး ၵႃႈတီႈမၼ်းၸဝ်ႈၵမ်ႈၽွင်ႈၸိူဝ်းၼၼ်ႉ ငိၼ်းၵႂၢမ်းၼၼ်ႉသေယဝ်ႉ၊ ထၢမ်လႄႈဝႃႈ၊ ႁဝ်းၼႆႉမၢၵ်ႇတႃမွတ်ႇယဝ်ႉႁိုဝ်၊ ဝႃႈၼင်ႇၼႆဢေႃႈ။-

41ယေႇသူႉ ၵေႃႈလၢတ်ႈလႄႈဝႃႈ၊ ပေႃးမၢၵ်ႇတႃသူမွတ်ႇယဝ်ႉဢမၢၼ်ႇၶၼ်ပဵၼ်ၸိုင်၊ သူဢမ်ႇမီးဢပႅတ်ႈ။ ၵူၺ်းၵႃႈတေႃႈလဵဝ်ၼႆႉသူဝႃႈ၊ မၢၵ်ႇတႃႁဝ်းၼႆႉႁၼ်ယူႇ၊ ဝႃႈၼင်ႇၼႆဢေႃႈ။ ပိူဝ်ႈၼႆလႄႈဢပႅတ်ႈတႄႇယူႇၼႂ်းသူဢေႃႈ၊ ဝႃႈၼင်ႇၼႆဢေႃႈ။