John 5 — Shan

1လိုၼ်းၼၼ်ႉၸင်ႇမီးပွႆးဢၼ်ၵူၼ်းမဵဝ်း ယူႉတႃႉ ၶၢမ်ႇလႄႈ ယေႇသူႉ ၵႂႃႇ ၵႃႈတီႈဝဵင်း ယေႇရူႉသလႅမ်ႇ ဢေႃႈ။-

2ၼႂ်းဝဵင်း ယေႇရူႉသလႅမ်ႇ ၵႃႈတီႈႁိမ်းၽၵ်းတူသူဝ်းၼၼ်ႉ မီးၼမ်ႉၼွင်ဢၼ်ၸွမ်းၼင်ႇၵႂၢမ်းၽႃႇသႃႇ ႁေႇပြႄး လႆႈၸိုဝ်ႈ ပေႇသေႇသတႃႉ ဢေႃႈ။ ၼမ်ႉၼွင်ၼၼ်ႉမီးၸၢၼ်းႁႃႈလင်ဢေႃႈ။-

3ၵႃႈတီႈၸၢၼ်းၸိူဝ်းၼၼ်ႉ ၶဝ်ၸိူဝ်းဢၼ်ၸပ်းတၢင်းၶႆႈတၢင်းပဵၼ်လႂ်၊ ဢၼ်တႃမွတ်ႇလႂ်၊ ဢၼ်တိၼ်ပုတ်းလႂ်၊ ဢၼ်တူဝ်ယွမ်ႁႅင်ႈလႂ် ၼွၼ်းယူႇလႄႈ ပႂ်ႉတူၺ်းတၢင်းဢၼ်ၼမ်ႉတူင်ႉၼမ်ႉၼိုင်ယူႇဢေႃႈ။-

4လွင်ႈမၼ်းၸမ်ႉ မိူဝ်ႈဢၼ်ၶိင်ႇမၼ်းထုၵ်ႇၸိုင်၊ တမၢၼ်ႇၵၢင်ႁၢဝ် ၸၢင်ႈလူင်းမႃးၵႃႈတီႈၼမ်ႉၼွင်ၼၼ်ႉလႄႈ ႁႂ်ႈၼမ်ႉၼၼ်ႉတူင်ႉၼိုင်ဢေႃႈ။ ဝၢႆးသေၼမ်ႉတူင်ႉၼိုင်ၸိူဝ်ႉၼင်ႇၼၼ်ယဝ်ႉၼၼ်ႉ၊ ၵေႃႉဢၼ်ၶဝ်ႈဢွၼ်တၢင်းပိူၼ်ႈၼၼ်ႉ ၸၢင်ႈႁွတ်ႈထိုင်တၢင်းဢၼ်ၵၢင်းလွတ်ႈတင်း တၢင်းၶႆႈတၢင်းပဵၼ်ၵႃႈဢၼ်ၸပ်းတီႈတူဝ်ၸဝ်ႈၵဝ်ႇဢေႃႈ။

5မိူဝ်ႈၼၼ်ႉ ၵူၼ်းဢၼ်ၸပ်းတၢင်းၶႆႈတၢင်းပဵၼ်သၢမ်သိပ်းပၢႆပႅတ်ႇပီႊတဵမ်တဵမ်ယဝ်ႉၼၼ်ႉၵေႃႉၼိုင်ႈ မီးယူႇၵႃႈတီႈၼၼ်ႈဢေႃႈ။-

6မိူဝ်ႈဢၼ် ယေႇသူႉ ႁၼ်ၵေႃႉၼၼ်ႉၼွၼ်းယူႇလႄႈ ႁူႉလွင်ႈဢၼ်မၼ်းပဵၼ်ႁိုင်ၼႃႇယဝ်ႉၼၼ်ႉၸိုင် မၼ်းၸဝ်ႈထၢမ်လႄႈဝႃႈ၊ မႂ်းၶႂ်ႈႁွတ်ႈထိုင်တၢင်းဢၼ်ယူႇလီၵိၼ်ဝၢၼ်ႁိုဝ်၊ ဝႃႈၼင်ႇၼႆဢေႃႈ။-

7ၵေႃႉဢၼ်ပဵၼ်ၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ယၢမ်းမိူဝ်ႈဢၼ်ၼမ်ႉတူင်ႉၼမ်ႉၼိုင်ၼၼ်ႉၸိုင် ၵဝ်ၶႃႈဢမ်ႇမီးၵေႃႉဢၼ်တၵ်းဢဝ်ၵဝ်ၶႃႈသႂၢင်းသႂ်ႇဝႆႉ ၵႃႈၼႂ်းၼမ်ႉၼွင်ၼႆႉၶႃႈ။ ၼႂ်းမိူဝ်ႈဢၼ်ၵဝ်ၶႃႈယင်းတိုၵ်ႉၵႂႃႇယူႇၼၼ်ႉၸိုင်၊ ပိူၼ်ႈတၢင်ႇၵေႃႉၸၢင်ႈလူင်းၵႂႃႇသေဢွၼ်တၢင်းၵဝ်ၶႃႈၶႃႈဢေႃႈ၊ ဝႃႈၼင်ႇၼႆဢေႃႈ။-

8ယေႇသူႉ ၵေႃႈလၢတ်ႈလႄႈဝႃႈ၊ လုၵ်ႉတႃႉ။ ဢဝ်တီႈၼွၼ်းမႂ်းလႄႈ ပႆတၢင်းၵႂႃႇတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

9ၵေႃႉၼၼ်ႉပဵၼ်ၵူၼ်းလီမႃးၵမ်းလဵဝ်လႄႈ ဢဝ်တီႈၼွၼ်းမၼ်းပႆတၢင်းၵႂႃႇဢေႃႈ။

10ဝၼ်းၼၼ်ႉ ပဵၼ်ဝၼ်းၵမ်သိၼ်ဢေႃႈ။ ပိူဝ်ႈၼႆလႄႈၵူၼ်း ယူႉတႃႉ တင်းလၢႆၵေႃႈလၢတ်ႈတီႈၵေႃႉဢၼ် ၵၢင်းလွတ်ႈတင်းတၢင်းၶႆႈတၢင်းပဵၼ်ၼၼ်ႉလႄႈဝႃႈ၊ ပဵၼ်ဝၼ်းၵမ်သိၼ်ဢေႃႈ။ မႂ်းဢမ်ႇထုၵ်ႇလီဢဝ်တီႈၼွၼ်းမႂ်းၵႂႃႇ၊ ဝႃႈၼင်ႇၼႆဢေႃႈ။-

11မၼ်းၵေႃႈၶိုၼ်းလၢတ်ႈလႄႈဝႃႈ၊ ၵေႃႉဢၼ်ႁႂ်ႈၵဝ်ၶႃႈလီမႃးၼၼ်ႉလၢတ်ႈလႄႈဝႃႈ၊ ဢဝ်တီႈၼွၼ်းမႂ်းလႄႈ ပႆတၢင်းၵႂႃႇတႃႉ၊ ဝႃႈၼင်ႇၼႆၶႃႈဢေႃႈ၊ ဝႃႈၼင်ႇၼႆဢေႃႈ။-

12ၶဝ်ၼၼ်ႉၵေႃႈထၢမ်လႄႈဝႃႈ၊ ၵေႃႉဢၼ်လၢတ်ႈတီႈမႂ်းလႄႈဝႃႈ၊ ဢဝ်တီႈၼွၼ်းမႂ်းလႄႈ ပႆတၢင်းၵႂႃႇတႃႉ၊ ဝႃႈၼင်ႇၼႆၼၼ်ႉၸမ်ႉ၊ ပဵၼ်ၽူႈလႂ်၊ ဝႃႈၼင်ႇၼႆဢေႃႈ။-

13ၵေႃႉၼၼ်ႉပဵၼ်ၽူႈလႂ်ဝႃႈၼႆ၊ ၵေႃႉဢၼ်ၵၢင်းလွတ်ႈတင်း တၢင်းၶႆႈတၢင်းပဵၼ်ၼၼ်ႉဢမ်ႇႁူႉ၊ လွင်ႈမၼ်းၸမ်ႉ ပိူဝ်ႈဢၼ်မီးတၢင်းဢၼ်ၵူၼ်းၸူႉၵၼ်တုမ်ၵၼ်ယူႇၵႃႈတီႈၼၼ်ႈလႄႈ ယေႇသူႉ တဵတ်ႇတဵတ်ႇဢွၵ်ႇၵႂႃႇသေဢေႃႈ။

14လိုၼ်းၼၼ်ႉ ယေႇသူႉ ထူပ်းႁၼ် ၵေႃႉၼၼ်ႉၵႃႈၼႂ်းပိၵ်ႈမၢၼ်ႇၸဝ်ႈလႄႈလၢတ်ႈဝႃႈ၊ မႂ်းမီးတၢင်းဢၼ်ယူႇလီၵိၼ်ဝၢၼ်ဢေႃႈ။ ၼင်ႇႁိုဝ်တၵ်းလႆႈၵၢင်းလွတ်ႈတင်းၽေး ဢၼ်ယဵင်ႈၶႅၼ်းႁၢႆႉၼႃႇၸိုင်၊ ၵမ်းလိုၼ်း ယႃႇပေၶိုၼ်းႁဵတ်းတူႉၸရိူၵ်ႈဢပႅတ်ႈထႅင်ႈ၊ ဝႃႈၼင်ႇၼႆဢေႃႈ။-

15ၵေႃႉၼၼ်ႉၵႂႃႇသေလႄႈမွၵ်ႇလၢတ်ႈလွင်ႈဢၼ် ၵေႃႉဢၼ်ႁႂ်ႈမၼ်းယူႇလီၵိၼ်ဝၢၼ်မႃးၼၼ်ႉ ပဵၼ် ယေႇသူႉ ၼၼ်ႉ တီႈၵူၼ်း ယူႉတႃႉ ၸိူဝ်းၼၼ်ႉဢေႃႈ။-

16ပိူဝ်ႈဢၼ် ယေႇသူႉ ႁဵတ်းလွင်ႈတၢင်းၸိူဝ်းၼၼ်ႉၼႂ်းဝၼ်းၵမ်သိၼ်လႄႈ၊ ၵူၼ်း ယူႉတႃႉ ၸိူဝ်းၼၼ်ႉၼိၵ်ႈၸၢၵ်ႈငႅၼ်းသႄးမၼ်းၸဝ်ႈဢေႃႈ။-

17ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ပေႃႈၵဝ်ၼၼ်ႉႁဵတ်းတၢင်းႁဵတ်းတေႃႇထိုင်ႁွတ်ႈမိူဝ်ႈလဵဝ်ၼႆႉယူႇလႄႈ ၵဝ်ၵေႃႈႁဵတ်းယူႇဢေႃႈ၊ ဝႃႈၼင်ႇၼႆဢေႃႈ။-

18ၵွပ်ႈႁွႆးၼႆႉလႄႈ၊ ပိူဝ်ႈဢၼ်မၼ်းၸဝ်ႈယႃႉဝၼ်းၵမ်သိၼ်ဢမ်ႇၵႃး၊ ပိူဝ်ႈဢၼ်မၼ်းၸဝ်ႈ ႁွင်ႉၽြႃးပဵၼ်ၸဝ်ႈဝႃႈပေႃႈမၼ်းၸဝ်ႈသေလႄႈ ဢဝ်တူဝ်ၸဝ်ႈၵဝ်ႇတႅၵ်ႈတိူင်းၵၼ်တင်းၽြႃးပဵၼ်ၸဝ်ႈၼၼ်ႉလႄႈ၊ ၵူၼ်း ယူႉတႃႉ ၸိူဝ်းၼၼ်ႉ ယဵင်ႈၶႅၼ်း ၵျၢမ်ႇႁႃႁႂ်ႈလႆႈဢဝ်မၼ်းၸဝ်ႈတၢႆဢေႃႈ။

19ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်ႉ၊ ၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇၵူၺ်းလႄႈ လုၵ်ႈၸဝ်ႈဢမ်ႇႁဵတ်းသေၸိူဝ်ႉသေပိူင်လႆႈ။ ႁဵတ်းၸွမ်းလွင်ႈတၢင်းဢၼ်ႁၼ်ပေႃႈၸဝ်ႈႁဵတ်းၼၼ်ႉၵူၺ်းဢေႃႈ။ ၵႃႈဢၼ်ပေႃႈၸဝ်ႈႁဵတ်းတင်းသဵင်ႈတင်းလူင်ၼၼ်ႉၸိုင်၊ လုၵ်ႈၸဝ်ႈၵေႃႈႁဵတ်းၸွမ်းၸိူဝ်ႉၼင်ႇၼၼ်ဢေႃႈ။-

20ပေႃႈၸဝ်ႈႁၵ်ႉလုၵ်ႈၸဝ်ႈလႄႈ ၼႄပျႃးၵႃႈဢၼ်မၼ်းၸဝ်ႈႁဵတ်းတင်းသဵင်ႈတင်းလူင် တီႈလုၵ်ႈၸဝ်ႈဢေႃႈ။ ၼင်ႇႁိုဝ်သူတၵ်းမီးလွင်ႈတၢင်းဢၼ်လီဢၢမ်းၸိုင်၊ မၼ်းၸဝ်ႈတၵ်းၼႄပျႃးလွင်ႈတၢင်းဢၼ် ယဵင်ႈၶႅၼ်းယႂ်ႇၼႃႇသေလွင်ႈတၢင်းၸိူဝ်းၼႆႉ တီႈလုၵ်ႈၸဝ်ႈဢေႃႈ။-

21ၸိူဝ်ႉၼင်ႇဢၼ်ပေႃႈၸဝ်ႈႁႂ်ႈၶဝ်ၸိူဝ်းဢၼ်တၢႆၵႂႃႇယဝ်ႉ လုၵ်ႉၶိုၼ်းလိပ်းၼၼ်ႉ၊ မိူၼ်ၼင်ႇၼၼ် လုၵ်ႈၸဝ်ႈၵေႃႈ ႁႂ်ႈၶဝ်ၸိူဝ်းဢၼ်မၼ်းၸဝ်ႈမီးဢလူဝ်ႇ တင်းသဵင်ႈတင်းလူင်ၼၼ်ႉလိပ်းဢေႃႈ။-

22ၼင်ႇႁိုဝ်ၵူၼ်းတင်းသဵင်ႈတင်းလူင်တၵ်းရူဝ်ႇသေႇၵူဝ်ယမ်လုၵ်ႈၸဝ်ႈ၊ ၸိူဝ်ႉၼင်ႇဢၼ် ၶဝ်ရူဝ်ႇသေႇၵူဝ်ယမ် ပေႃႈၸဝ်ႈၼၼ်ႉၸိုင်၊-

23ပေႃႈၸဝ်ႈဢမ်ႇၸီႇယၢင်ႇတြႃးတီႈၽူႈလႂ်သေၵေႃႉသေၵူၼ်း။ မၼ်းၸဝ်ႈဢၢပ်ႈပၼ်ဢၶႂၢင်ႉတၢင်းဢၼ်ၸီႇယၢင်ႇတြႃးၵႃႈမီးတင်းသဵင်ႈတင်းလူင်ၼၼ်ႉ တီႈလုၵ်ႈၸဝ်ႈဢေႃႈ။ ၵေႃႉဢၼ်ဢမ်ႇရူဝ်ႇသေႇၵူဝ်ယမ်လုၵ်ႈၸဝ်ႈၸမ်ႉ၊ ပဵၼ်ၵေႃႉဢၼ်ဢမ်ႇရူဝ်ႇသေႇၵူဝ်ယမ်ပေႃႈၸဝ်ႈ ဢၼ်ပွႆႇၸႂ်ႉလုၵ်ႈၸဝ်ႈမႃးၼၼ်ႉဢေႃႈ။-

24ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်ႉ၊ ၵေႃႉဢၼ်ထွမ်ႇဢဝ်ၵႂၢမ်းၵဝ်လႄႈ ယုမ်ႇမၢတ်ႈၵေႃႉဢၼ်ပွႆႇၸႂ်ႉၵဝ်မႃးၼၼ်ႉလႆႈထႃႇဝရႃႉဢသၢၵ်ႈလႄႈ ဢမ်ႇလႆႈၶၢမ်ႇတၢင်းဢၼ်ၸီႇယၢင်ႇဢပႅတ်ႈ၊ ပဵၼ်ၵေႃႉဢၼ်လုၵ်ႉၵႃႈတၢင်းတၢႆ ၶၢမ်ႈၵႂႃႇၵႃႈတီႈတၢင်းဢၼ်ဢသၢၵ်ႈလိပ်းပုၼ်ႉဢေႃႈ။

25ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်ႉ၊ ၶိင်ႇၵႃႇလႃႉဢၼ်ၶဝ်ၸိူဝ်းဢၼ်တၢႆၵႂႃႇယဝ်ႉ တၵ်းလႆႈငိၼ်းသဵင်ၵႂၢမ်းလုၵ်ႈၽြႃးပဵၼ်ၸဝ်ႈလႄႈ ၶဝ်ၸိူဝ်းဢၼ်ငိၼ်းၵေႃႈ တၵ်းလႆႈဢသၢၵ်ႈလိပ်းၼၼ်ႉမႃးယူႇလႄႈ တေႃႈလဵဝ်ၼႆႈၵေႃႈႁွတ်ႈဝႆႉမီးယူႇဢေႃႈ။-

26လွင်ႈမၼ်းၸမ်ႉ ၵႃႈၼင်ႇဢၼ်ပေႃႈၸဝ်ႈမီးဢသၢၵ်ႈ ၼႂ်းတူဝ်ၸဝ်ႈၵဝ်ႇယူႇၼၼ်ႉၸိုင် မၼ်းၸဝ်ႈပၼ်ဢၶႂၢင်ႉဢၼ် လုၵ်ႈၸဝ်ႈတၵ်းလႆႈမီးဢသၢၵ်ႈ ၼႂ်းတူဝ်ၸဝ်ႈၵဝ်ႇဢေႃႈ။-

27တီႈလုၵ်ႈၸဝ်ႈၼၼ်ႉ ပိူဝ်ႈဢၼ်ပဵၼ်လုၵ်ႈၵူၼ်းလႄႈ မၼ်းၸဝ်ႈဢၢပ်ႈပၼ်ဢၶႂၢင်ႉတၢင်းဢၼ်ၸီႇယၢင်ႇတြႃးဢေႃႈ။-

28လွင်ႈတီႈႁဵင်းၼႆႉၸိုင် ယႃႇပေမီးတၢင်းဢၼ်လီဢၢမ်း။ ၶိင်ႇၵႃႇလႃႉဢၼ်ၶဝ်ၸိူဝ်းဢၼ် မီးၼႂ်းသၢင်းၶႅင်းတင်းသဵင်ႈတင်းလူင်တၵ်းလႆႈငိၼ်းသဵင်ၵႂၢမ်းလုၵ်ႈၸဝ်ႈလႄႈ ဢွၵ်ႇမႃးၼၼ်ႉႁွတ်ႈမႃးဢေႃႈ။-

29ၶဝ်ၸိူဝ်းဢၼ် ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်လီၼၼ်ႉ၊ တၵ်းလႆႈဢွၵ်ႇမႃးၸူးၵႃႈတီႈတၢင်းဢၼ်လုၵ်ႉၶိုၼ်းတီႈဢၼ်ဢသၢၵ်ႈလိပ်းလႄႈ၊ ၶဝ်ၸိူဝ်းဢၼ် ၵမ်ၵျၢင်ႉတၢင်းၵမ်တၢင်းၵျၢင်ႉ ဢၼ်ႁၢႆႉမိူၵ်ႈၼၼ်ႉ တၵ်းလႆႈဢွၵ်ႇမႃးၸူးၵႃႈတီႈတၢင်းဢၼ်လုၵ်ႉၶိုၼ်းတီႈဢၼ်ၸီႇယၢင်ႇဢပႅတ်ႈဢေႃႈ။

30ၵဝ်ၼႆႉ ၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇလႄႈ ဢမ်ႇႁဵတ်းသေၸိူဝ်ႉသေပိူင်လႆႈ၊ ၵဝ်ၼႆႉ ၵႃႈၼင်ႇဢၼ်ငိၼ်းၼၼ်ႉၸီႇယၢင်ႇတြႃးဢေႃႈ။ တၢင်းဢၼ်ၵဝ်ၸီႇယၢင်ႇၵေႃႈမႅၼ်ႈၵၼ်တင်းတြႃးၸဝ်ႈဢေႃႈ။ လွင်ႈမၼ်းၸမ်ႉ ၵဝ်ဢမ်ႇၸွမ်းဢလူဝ်ႇတူဝ်ၸဝ်ႈၵဝ်ႇ။ ၵဝ်ၸွမ်းဢလူဝ်ႇပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။-

31ပေႃးၵဝ်ၶၢမ်ႇသၢၵ်ႈသေႇ လွင်ႈတူဝ်ၸဝ်ႈၵဝ်ႇၸိုင် သၢၵ်ႈသေႇၵဝ်ဢမ်ႇတႄႇ။-

32ၵေႃႉဢၼ်ၶၢမ်ႇသၢၵ်ႈသေႇလွင်ႈၵဝ် ယင်းမီးယူႇပႃးၼိုင်ႈဢေႃႈ။ လွင်ႈဢၼ်သၢၵ်ႈသေႇမၼ်းၼၼ်ႉတႄႇၸိုင်ၵဝ်ႁူႉဢေႃႈ။-

33သူလႆႈပွႆႇၸႂ်ႉၵႂႃႇၵႃႈတီႈ ယူဝ်းႁၢၼ်ႇ ပုၼ်ႉလႄႈ မၼ်းၼၼ်ႉၵေႃႈ လႆႈၶၢမ်ႇသၢၵ်ႈသေႇၽၢႆႇသမ်ႇမႃႇတြႃးဢေႃႈ။-

34ၼႂ်းဝႃႈၼၼ်သေၵေႃႈ သၢၵ်ႈသေႇဢၼ်ၵူၼ်းပၼ်ၸိုင်ၵဝ်ဢမ်ႇမၢတ်ႈပဵၼ်ၵႃႈသင်။ ၼင်ႇႁိုဝ်သူတၵ်းႁွတ်ႈထိုင်တၢင်းဢၼ် ၵႄႇၶျွတ်ႈဢဝ်ၸိုင်ၵဝ်ၸင်ႇလၢတ်ႈၵႂၢမ်းၼႆႉဢေႃႈ။-

35ၵေႃႉၼၼ်ႉပဵၼ်ဝၢၼ်ႇၽႆးတဵၼ်းဢၼ်တႆႈလႄႈလႅင်းဢေႃႈ သူမီးဢလူဝ်ႇၶႂ်ႈမူၼ်ႈပျေႃႇၼႂ်းဢၼ်လႅင်းမၼ်းၵမ်းဢွၼ်ႇၼိုင်ႈၵူၺ်းဢေႃႈ။

36သၢၵ်ႈသေႇဢၼ်ယဵင်ႈၶႅၼ်းယႂ်ႇၼႃႇသေ သၢၵ်ႈသေႇ ယူဝ်းႁၢၼ်ႇ ၼၼ်ႉမီးတီႈၵဝ်ဢေႃႈ။ လွင်ႈတၢင်းဢၼ်ပေႃႈၸဝ်ႈဢၢပ်ႈပၼ်ၼႂ်းမိုဝ်းၵဝ် ႁႂ်ႈၵဝ်လႆႈႁဵတ်း ႁႂ်ႈယဝ်ႉႁႂ်ႈတူဝ်ႈဢၼ်ဝႃႈ လွင်ႈတၢင်းဢၼ်ၵဝ်ႁဵတ်းၸိူဝ်းၼၼ်ႉ ယူႇၽၢႆႇၵဝ်သေလႄႈ ၶၢမ်ႇသၢၵ်ႈသေႇလွင်ႈဢၼ်ပေႃႈၸဝ်ႈပွႆႇၸႂ်ႉၵဝ်မႃးၼၼ်ႉဢေႃႈ။-

37ပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉၵေႃႈ ယူႇၽၢႆႇၵဝ်သေလႄႈၶၢမ်ႇသၢၵ်ႈသေႇယူႇဢေႃႈ။ သဵင်ၵႂၢမ်းပေႃႈၸဝ်ႈၼၼ်ႉၸိုင် သူဢမ်ႇငိၼ်း၊ ႁၢင်ႈၽၢင်မၼ်းၸဝ်ႈၼၼ်ႉၵေႃႈသူဢမ်ႇႁၼ်၊-

38ၼုၵ်ႈၵပၢတ်ႈၸဝ်ႈၵေႃႈ ဢမ်ႇတႄႇယူႇၼႂ်းသူ။ လွင်ႈမၼ်းၸမ်ႉ သူယင်းဢမ်ႇယုမ်ႇမၢတ်ႈ ၵေႃႉဢၼ်မၼ်းၸဝ်ႈပွႆႇၸႂ်ႉမႃးၼၼ်ႉလႄႈယူႇဢေႃႈ။

39သူသွၵ်ႈသူႁႃၼႂ်းၵျၢမ်းလိၵ်ႈ ၵွပ်ႈပိူဝ်ႈဢၼ်သူထၢင်ႇတၵ်းလႆႈထႃႇဝရႃႉဢသၢၵ်ႈၵႃႈၼႂ်းၵျၢမ်းလိၵ်ႈၼၼ်ႉဢေႃႈ။ ၵျၢမ်းလိၵ်ႈၼၼ်ႉ ပဵၼ်သၢၵ်ႈသေႇၵဝ်ဢေႃႈ။-

40ၼင်ႇႁိုဝ် သူတၵ်းလႆႈဢသၢၵ်ႈၸိုင် သူဢမ်ႇမီးဢလူဝ်ႇၶႂ်ႈမႃးၸူးၵႃႈတီႈၵဝ်။-

41ၵဝ်ဢမ်ႇၶၢမ်ႇဢဝ်မုၼ်သရေႇဢၼ်ၵူၼ်းပၼ်။-

42ၼႂ်းဝႃႈၼၼ်သေၵေႃႈ လွင်ႈဢၼ်မႅတ်ႈတႃႇတၢင်းဢၼ်ႁၵ်ႉ ၽြႃးပဵၼ်ၸဝ်ႈ ဢမ်ႇမီးၵႃႈၼႂ်းသူၸိုင်ၵဝ်ႁူႉယူႇဢေႃႈ။-

43ပိၵ်ႉသမ်ႉၵဝ်ပႃးတင်းဢၶႂၢင်ႉပေႃႈၸဝ်ႈႁွတ်ႈမႃးသေၵေႃႈ သူဢမ်ႇႁပ်ႉတုင်းဢဝ်ၵဝ် ပေႃးပိူၼ်ႈတၢင်ႇၵေႃႉပႃးတင်း ဢၶႂၢင်ႉတူဝ်ၸဝ်ႈၵဝ်ႇႁွတ်ႈမႃးၸိုင်၊ သူတၵ်းႁပ်ႉတုင်းဢဝ်ၵေႃႉၼၼ်ႉဢေႃႈ။-

44သူဢၼ်ၶၢမ်ႇဢဝ်မုၼ်သရေႇ ဢၼ်ၵေႃႉၼိုင်ႈလႄႈၵေႃႉၼိုင်ႈ ပၼ်ၵၼ်ၵူၺ်းလႄႈ ဢမ်ႇႁႃဢဝ်မုၼ်သရေႇ ဢၼ်ၽြႃးပဵၼ်ၸဝ်ႈၵူၺ်း ၸၢင်ႈပၼ်ၼၼ်ႉၸိူဝ်းၼႆႉ တၵ်းႁဵတ်းၸိူဝ်ႉၼင်ႇႁိုဝ်လႄႈယုမ်ႇမၢတ်ႈလႆႈ။-

45ယႃႇပေထၢင်ႇ ၵဝ်တၵ်းဢဝ်ဢပႅတ်ႈတၢင်ႇသႂ်ႇတီႈသူၵႃႈတီႈၽၢႆႇၼႃႈပေႃႈၸဝ်ႈၼၼ်ႉ။ ၵေႃႉဢၼ်ဢဝ်ဢပႅတ်ႈတၢင်ႇသႂ်ႇတီႈသူၼၼ်ႉ ယင်းမီးယူႇပႃးၼိုင်ႈဢေႃႈ။ ၵေႃႉၼၼ်ႉၸမ်ႉ၊ ပဵၼ် မူဝ်းသေႇ ဢၼ်သူဢိင်ပိုင်ႈၼၼ်ႉဢေႃႈ။-

46ပေႃးသူယုမ်ႇၵႂၢမ်း မူဝ်းသေႇ ၼၼ်ႉၸိုင်၊ သူယင်းဢမ်ႇယုမ်ႇၵႂၢမ်းၵဝ်လႄႈ တၵ်းဢမ်ႇယူႇလႆႈ။ လွင်ႈမၼ်းၸမ်ႉ မူဝ်းသေႇ ၼၼ်ႉ တႅမ်ႈဝႆႉလွင်ႈၵဝ်ဢေႃႈ။-

47ပေႃးသူဢမ်ႇယုမ်ႇၵႂၢမ်းဢၼ်မၼ်းတႅမ်ႈဝႆႉၼၼ်ႉၸိုင်၊ သူတၵ်းႁဵတ်းၸိူဝ်ႉၼင်ႇႁိုဝ်လႄႈ ယုမ်ႇၵႂၢမ်းၵဝ်ၼႆႉလႆႈ၊ ဝႃႈၼင်ႇၼႆဢေႃႈ။