Numbers 11

Shan

← Chapter 10 Jump to: Chapter 12 →

1လႆႈသမ်ႉ ၵူၼ်းတင်းလၢႆၼၼ်ႉပဵၼ်မိူၼ်ၸိူဝ်ႉၼင်ႇၶဝ်ၸိူဝ်းဢၼ် ပွင်ႉၶၢင်းပွင်ႉမိူၼ်ႇလူၺ်ႈလွင်ႈတၢင်းဢၼ်ဢမ်ႇလီ ၵႃႈတီႈႁူထႃႇဝရႃႉၽြႃးၼၼ်ႉယူႇလႄႈ၊ ထႃႇဝရႃႉၽြႃးငိၼ်းၵႂၢမ်းၶဝ်ၼၼ်ႉလႄႈ တၢင်းၸႂ်မႆႈၶႆႈၸႃႉမၼ်းၸဝ်ႈဢွၵ်ႇဢေႃႈ။ ၽႆးထႃႇဝရႃႉၽြႃးမႆႈၼႂ်းၶဝ်လႄႈ ယႃႉပႅတ်ႈၵႃႈတီႈႁိမ်းလႅၼ်သုတ်းတပ်ႉၶဝ်ဢေႃႈ။-

2ၵမ်းၼၼ်ႉ ၵူၼ်းတင်းလၢႆဢွၼ်ၵၼ်ႁွင်ႉသႅၼ်ႇတီႈ မူဝ်းသေႇ သေလႄႈ၊ မူဝ်းသေႇ သူးတွင်း ထႃႇဝရႃႉၽြႃးသေယဝ်ႉ၊ ၽႆးၼၼ်ႉယဵၼ်ၵႂႃႇဢေႃႈ။-

3ၵွပ်ႈပိူဝ်ႈဢၼ် ၽႆးထႃႇဝရႃႉၽြႃးမႆႈၼႂ်းၶဝ်ၼၼ်ႉလႄႈ၊ မၼ်းႁွင်ႉႁဵၵ်ႈၸိုဝ်ႈတီႈၼၼ်ႉ တပေႇရႃႉ ဢေႃႈ။

4ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်း ဢၼ်ပႃးလူၺ်ႈၵၼ်တင်းၶဝ်ၼၼ်ႉ မီးၸႂ်ဢၼ်ဢေႁႃၸပ်းၸွႆးဢေႃႈ။ ၵူၼ်းမဵဝ်း ဢီႉသရေႇလႃႉ တင်းလၢႆၵေႃႈ သမ်ႉၶိုၼ်းဢွၼ်ၵၼ်ႁွင်ႉႁႆႈသေလႄႈဝႃႈ၊ ၽူႈလႂ်တၵ်းပၼ်ၼိူဝ်ႉပုၼ်ႈဢၼ်ႁဝ်းတၵ်းၵိၼ်။-

5ႁဝ်းၶုၵ်းၸႂ်လႆႈၶႆႈၸႂ်ထူပ်း ၼိူဝ်ႉပႃဢၼ်ႁဝ်းယင်းဢမ်ႇပၼ်ၵႃႈမၼ်းၶၼ်မၼ်းလႄႈ လႆႈၵိၼ်ၵႃႈတီႈမိူင်း ဢေႇၵိပ်ႉတူႉ ဢိၵ်ႇတင်း တႅင်၊ တႅင်ၸမ်ႇပူႇ၊ ၽၵ်းမီႇဢၼ်လႅင်ဢၼ်ၽိူၵ်ႇဢၼ်လိူင်ၸိူဝ်းၼၼ်ႉဢေႃႈ။-

6မိူဝ်ႈလဵဝ်ၼႆႉၸိုင်၊ ဢသၢၵ်ႈႁဝ်းၼႆႉႁႅင်းဢူၼ်ႈၵႂႃႇယဝ်ႉ။ ဢမ်ႇမီးၵႃႈသင်လႃးလႃး။ ၼွၵ်ႈသေ မၼ်ႇၼႃႉ ၼႆႉ တီႈဢၼ်တႃႁဝ်းတၵ်းလႆႈႁၼ်ဢမ်ႇမီးယဝ်ႉ၊ ဝႃႈၼင်ႇၼႆဢေႃႈ။-

7မၼ်ႇၼႃႉ ၼၼ်ႉ မိူၼ်ၸိူဝ်ႉၼင်ႇမဵတ်ႉၽၵ်းၵီးလႄႈ ႁၢင်ႈၽၢင်မၼ်းမိူၼ်ၸိူဝ်ႉၼင်ႇမဵတ်ႉမႆႉ ပတေႇလႃႉ ၼၼ်ႉဢေႃႈ။-

8ၵူၼ်းတင်းလၢႆဢွၼ်ၵၼ်လႄႇလဵပ်ႈ ၵဵပ်းသိမ်းဢဝ်လႄႈ ႁဵတ်းတၢင်းဢၼ်ၶိုတ်ႈၵႃႈၼႂ်းလူၺ်၊ တၢင်းဢၼ်တမ်ၵႃႈၼႂ်းၶူၵ်ႉမိုဝ်းသေယဝ်ႉ၊ တူမ်ႈၵႃႈတီႈမေႃႈဢေႃႈ။ ၶဝ်ႈမုၼ်းၶႅပ်းၵေႃႈႁဵတ်းဢေႃႈ။ ဢရႃႉသႃႇမၼ်းမိူၼ်ၸိူဝ်ႉၼင်ႇဢရႃႉသႃႇၶဝ်ႈမုၼ်းၶူဝ်ႈၼမ်ႉမၼ်းၼၼ်ႉဢေႃႈ။-

9မိူဝ်ႈဢၼ်ၼမ်ႉၼၢႆးတူၵ်းၵႃႈတီႈဢၼ်ၶျႃးပၢင်ၼၼ်ႉ၊ ၶိင်ႇၵၢင်ၶိုၼ်းၸိုင် မၼ်ႇၼႃႉ ၼၼ်ႉၸၢင်ႈတူၵ်းၸွမ်းၵႃႈၼိူဝ်မၼ်းဢေႃႈ။

10မိူဝ်ႈၼၼ်ႉ မူဝ်းသေႇ လႆႈငိၼ်းၵူၼ်းတင်းလၢႆ ႁင်းၽႂ်ႁင်းမၼ်း ဢိၵ်ႇတင်းၵူၼ်းႁိူၼ်းၵူၼ်းယေးၶဝ် ဢွၼ်ၵၼ်ႁွင်ႉႁႆႈယူႇၵႃႈတီႈႁူးၽၵ်းတူမူဝ်းၵႃႇၶဝ်ႁင်းၽႂ်ႁင်းမၼ်းဢေႃႈ။ တၢင်းၸႂ်မႆႈၶႆႈၸႃႉထႃႇဝရႃႉၽြႃး ဢွၵ်ႇႁႅင်းယႂ်ႇၼႃႇလူင်လၢင်လႄႈ၊ မူဝ်းသေႇ ၵေႃႈ ဢမ်ႇထုၵ်ႇၸႂ်ၵျိူၵ်ႈၸႂ်မၼ်း။-

11မူဝ်းသေႇ လဝ်ႊလၢတ်ႈတီႈထႃႇဝရႃႉၽြႃးလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းၼိၵ်ႈၸၢၵ်ႈငႅၼ်းသႄးၶႃႈၸဝ်ႈႁဝ်းၼႆႉၼင်ႇႁိုဝ်တီႈၶႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၶႃႈၸဝ်ႈႁဝ်းၼႆႉ ဢမ်ႇလႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းလႄႈ ၸဝ်ႈႁဝ်းဢဝ်ၵူၼ်းတင်းသဵင်ႈတင်းလူင်ၼႆႉ တၢင်ႇသႂ်ႇၵႃႈၼိူဝ်ၶႃႈၸဝ်ႈႁဝ်း ႁႂ်ႈၶႃႈၸဝ်ႈႁဝ်းလႆႈႁၢပ်ႇၼင်ႇႁိုဝ်တီႈၶႃႈ။-

12ၶႃႈၸဝ်ႈႁဝ်းၼႆႉ လႆႈပႃးတွင်ႉပႃးမၢၼ်းၵူၼ်းတင်းသဵင်ႈတင်းလူင်ၼႆႉတီႈၶႃႈႁိုဝ်။ လႆႈၵိူတ်ႇလဵင်ႉၶဝ် ႁႂ်ႈၸဝ်ႈႁဝ်းလႆႈမီးဢမိင်ႉ တီႈၶႃႈၸဝ်ႈႁဝ်းလႄႈဝႃႈ၊ ဢုမ်ႈႁွပ်ႇဢဝ်ၵူၼ်းၸိူဝ်းၼႆႉမိူၼ်ၸိူဝ်ႉၼင်ႇဢၼ် ၵူၼ်းဢၼ်ထိင်းၼၼ်ႉ ဢဝ်လုၵ်ႈဢွၼ်ႇၵိၼ်ၼူမ်းၵႂႃႇၼၼ်ႉလႄႈ ၵႂႃႇၵႃႈတီႈမိူင်းဢၼ်ၸဝ်ႈႁဝ်းတိူင်ႇဝႃႈ တီႈပူႇမွၼ်ႇၶဝ်ၼၼ်ႉတႃႉ၊ ဝႃႈၼင်ႇၼႆၼၼ်ႉတီႈၶႃႈႁိုဝ်။-

13ၶႃႈၸဝ်ႈႁဝ်းၼႆႉ တၵ်းလႆႈၼိူဝ်ႉပုၼ်ႈဢၼ်တၵ်းလဵင်ႉၵူၼ်းတင်းသဵင်ႈတင်းလူင်ၼႆႉ ၵႃႈတီႈလႂ်တီႈၶႃႈ၊ ၶဝ်ဢွၼ်ၵၼ်ႁွင်ႉႁႆႈတီႈၶႃႈၸဝ်ႈႁဝ်းသေလႄႈဝႃႈ၊ ပၼ်ၼိူဝ်ႉပုၼ်ႈဢၼ်ႁဝ်းၶႃႈတၵ်းၵိၼ်သေၵမ်း၊ ဝႃႈၼင်ႇၼႆယူႇတီႈၶႃႈဢေႃႈ။-

14ၶႃႈၸဝ်ႈႁဝ်းၵေႃႉလဵဝ်ၵူၺ်း ဢမ်ႇႁၢပ်ႇဢဝ်ၵူၼ်းတင်းသဵင်ႈတင်းလူင်ၼႆႉၵႂႃႇလႆႈတီႈၶႃႈ၊ ပဵၼ်ၶူဝ်းႁၢပ်ႇဢၼ်ၼၵ်းဢၼ်ၼႃလိူဝ်တွၼ်းၼႃႇလူင်လၢင်တီႈၶႃႈဢေႃႈ။-

15ပေႃးၸဝ်ႈႁဝ်း ႁဵတ်းၸိူဝ်ႉၼင်ႇၼၼ်တီႈၶႃႈၸဝ်ႈႁဝ်း၊ ပေႃးၶႃႈၸဝ်ႈႁဝ်း ထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းၸိုင်၊ ၸဵဝ်းဢဝ်ၶႃႈၸဝ်ႈႁဝ်းၼႆႉ တၢႆၶၼ်ၶၼ်ၽႂ်းၽႂ်းသေၵမ်းတီႈၶႃႈ၊ ယႃႇႁႂ်ႈၶႃႈၸဝ်ႈႁဝ်းလႆႈႁၼ်တုၵ်ႉၶႃႉတၢင်းၽၢၼ်ၶႃႈၸဝ်ႈႁဝ်းသေၵမ်းတီႈၶႃႈ၊ ဝႃႈၼင်ႇၼႆဢေႃႈ။

16ထႃႇဝရႃႉၽြႃးၵေႃႈမီးဢမိင်ႉတီႈ မူဝ်းသေႇ လႄႈဝႃႈ၊ ၼႂ်းၵူၼ်းဢၼ်ပဵၼ်ၵႄႇပဵၼ်ႁူဝ် ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉ၊ ႁႂ်ႈၵူၼ်းၸဵတ်းသိပ်းဢၼ်မႂ်းႁူႉလွင်ႈဢၼ်ပဵၼ်ၵူၼ်းဢၼ် ပဵၼ်ၵႄႇပဵၼ်ႁူဝ်ၵႃႈတီႈၵူၼ်းတင်းလၢႆလႄႈ ပဵၼ်ၶုၼ်ၵႃႈၼိူဝ်ၶဝ်ၼၼ်ႉၸိူဝ်းၼၼ်ႉ ၸူႉၵၼ်တုမ်ၵၼ်တီႈၵဝ်လႄႈႁွင်ႉဢဝ်မႃး ၵႃႈတီႈမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈသေလႄႈ ႁႂ်ႈၶဝ်ၸုၵ်းယူႇၵႃႈတီႈၼၼ်ႈလူၺ်ႈၵၼ်တင်းမႂ်းတႃႉ။-

17ၵဝ်ၵေႃႈ တၵ်းလူင်းမႃးၵႃႈတီႈၼၼ်ႈလႄႈ လၢတ်ႈၵႂၢမ်းတေႃႇၵၼ်တင်းမႂ်းဢေႃႈ။ ၵဝ်တၵ်းဢဝ်ဝီႉၺိၺ်ႇဢၼ်ၵိင်းဝၢပ်ႈယူႇ ၵႃႈတီႈၼိူဝ်မႂ်းၵမ်ႈၽွင်ႈလႄႈ တၢင်ႇသႂ်ႇပၼ်ၵႃႈတီႈၼိူဝ်ၶဝ်ၼၼ်ႉဢေႃႈ။ ၶဝ်ၼၼ်ႉၵေႃႈ တၵ်းလႆႈၽွမ်ႉၵၼ်ၸွႆႈထႅမ်မႂ်း ႁၢပ်ႇဢဝ်ၵူၼ်းတင်းလၢႆၼႆႉၵႂႃႇလႄႈ မႂ်းၵေႃႉလဵဝ်ၵူၺ်းတၵ်းဢမ်ႇလႆႈႁၢပ်ႇဢဝ်ၵႂႃႇ။-

18မႂ်းသင်ႇလၢတ်ႈတီႈၵူၼ်းတင်းလၢႆလႄႈဝႃႈ၊ တူဝ်ၸဝ်ႈၵဝ်ႇ ႁႂ်ႈတူဝ်ၸဝ်ႈၵဝ်ႇမူတ်းၸၢင်ႇပုၼ်ႈဝၼ်းမိူဝ်ႈၽုၵ်ႈတႃႉ။ သူတၵ်းလႆႈၵိၼ်ၼိူဝ်ႉဢေႃႈ။ လွင်ႈမၼ်းၸမ်ႉ သူႁွင်ႉႁႆႈထိုင်ႁူထႃႇဝရႃႉၽြႃးသေလႄႈ လၢတ်ႈလႄႈဝႃႈ၊ ၽူႈလႂ်တၵ်းပၼ်ၼိူဝ်ႉပုၼ်ႈဢၼ်ႁဝ်းတၵ်းၵိၼ်တီႈႁဝ်း။ ႁဝ်းယူႇၵႃႈတီႈမိူင်း ဢေႇၵိပ်ႉတူႉ ပုၼ်ႉလႄႈ ၵတ်းယဵၼ်ၶျၢမ်းသႃႇယူႇဢေႃႈ၊ ဝႃႈၼင်ႇၼႆဢေႃႈ။ ပိူဝ်ႈၼႆလႄႈ ထႃႇဝရႃႉၽြႃးတၵ်းပၼ်ၼိူဝ်ႉတီႈသူလႄႈ သူတၵ်းလႆႈၵိၼ်ဢေႃႈ။-

19သူတၵ်းလႆႈၵိၼ်ဝၼ်းၼိုင်ႈ၊ သွင်ဝၼ်း၊ ႁႃႈဝၼ်း၊ သိပ်းဝၼ်း၊ သၢဝ်းဝၼ်းၵူၺ်းဢမ်ႇၸႂ်ႈ။-

20သူတၵ်းလႆႈၵိၼ်လိူၼ်ၼိုင်ႈတဵမ်တဵမ်တေႃႇထိုင်ႁွတ်ႈထၼ်ႈပေႃး ၼိူဝ်ႉဢွၵ်ႇၵႃႈၼႂ်းၶူႈလင်သူလႄႈ ပဵၼ်တီႈလီႁင်ႈဢဵတ်ႇသဵတ်ႇဢေႃႈ။ လွင်ႈမၼ်းၸမ်ႉ သူႁဵတ်းဢမ်ႇပေႃးၼင်ႇႁိုဝ်တီႈထႃႇဝရႃႉၽြႃး ဢၼ်မီးယူႇၵႃႈတီႈၼႂ်းသူသေလႄႈ ႁွင်ႉႁႆႈၵႃႈတီႈၽၢႆႇၼႃႈမၼ်းၸဝ်ႈလႄႈလၢတ်ႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ႁဝ်းဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼင်ႇႁိုဝ်။ ဝႃႈၼင်ႇၼႆလူင်ပႄႇ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

21မူဝ်းသေႇ ၵေႃႈ လဝ်ႊလၢတ်ႈလႄႈဝႃႈ၊ ၵူၼ်းၸၢႆးဢၼ်ၸၢပ်ႈသႅင်ႇၵၼ်တင်းၶႃႈၸဝ်ႈႁဝ်းၼႆႉၸိူဝ်းၼၼ်ႉ မီးႁူၵ်းသႅၼ်လႄႈ၊ ၸဝ်ႈႁဝ်းမီးဢမိင်ႉလႄႈဝႃႈ၊ ၵဝ်တၵ်းပၼ်ၼိူဝ်ႉတီႈၶဝ် ပုၼ်ႈဢၼ်ၶဝ်တၵ်းလႆႈၵိၼ်လိူၼ်ၼိုင်ႈဢေႃႈ၊ ဝႃႈၼင်ႇၼႆတီႈၶႃႈလူင်ပႄႇ။-

22တၵ်းလႆႈဢဝ်ၽုင်သူဝ်း၊ ၽုင်ပႄႉ၊ ၽုင်ဝူဝ်း တင်းလၢႆ တၢႆႁႂ်ႈလႆႈလဵင်ႉပၼ်ၶဝ်ဢိမ်ႇဢိမ်ႇတဵမ်တဵမ်တီႈၶႃႈႁိုဝ်။ ဢမ်ႇၼၼ်လႄႈ တၵ်းလႆႈႁႂ်ႈဢဝ်ပႃပၢင်ႇလၢႆႇၵႃႈမီး ၸူႉၵၼ်တုမ်ၵၼ်ႁႂ်ႈလႆႈလဵင်ႉပၼ်ၶဝ်ဢိမ်ႇဢိမ်ႇတဵမ်တဵမ်တီႈၶႃႈႁိုဝ်။ ဝႃႈၼင်ႇၼႆသေယဝ်ႉ၊-

23ထႃႇဝရႃႉၽြႃးမီးဢမိင်ႉတီႈ မူဝ်းသေႇ လႄႈဝႃႈ၊ မိုဝ်းထႃႇဝရႃႉၽြႃးပွတ်းႁိုဝ်။ တေႃႈလဵဝ်ၼႆႉ မႂ်းတၵ်းႁူႉလွင်ႈဢၼ် ၵႂၢမ်းၵဝ်တၵ်းတႄႇယူႇတီႈမႂ်းႁိုဝ်။ တၵ်းဢမ်ႇတႄႇယူႇႁိုဝ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။

24မူဝ်းသေႇ ဢွၵ်ႇလႄႈ သင်ႇလၢတ်ႈၵႂၢမ်းထႃႇဝရႃႉၽြႃးၼၼ်ႉ တီႈၵူၼ်းတင်းလၢႆသေယဝ်ႉ၊ ႁႂ်ႈၵူၼ်းၸဵတ်းသိပ်းၵေႃႉ ၵႃႈၼႂ်းၵူၼ်းဢၼ်ပဵၼ်ၵႄႇပဵၼ်ႁူဝ် ၵူၼ်းတင်းလၢႆၼၼ်ႉ ၸူႉၵၼ်တုမ်ၵၼ်လႄႈ ဢဝ်ၶဝ်ဝႆႉလဵပ်ႈၸွမ်းႁိမ်းမူဝ်းၵႃႇၸဝ်ႈဢေႃႈ။-

25ထႃႇဝရႃႉၽြႃးယူႇၵႃႈၼႂ်းမွၵ်ႇၵုမ်ႈလူင်းမႃးလႄႈလၢတ်ႈၵႂၢမ်းတေႃႇမၼ်းဢေႃႈ။ မၼ်းၸဝ်ႈဢဝ်ဝီႉၺိၺ်ႇဢၼ်ၵိင်းဝၢပ်ႈယူႇၵႃႈတီႈၼိူဝ် မူဝ်းသေႇ ၵမ်ႈၽွင်ႈၼၼ်ႉ တၢင်ႇသႂ်ႇပၼ်ၵႃႈတီႈၼိူဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၸဵတ်းသိပ်းၵေႃႉၸိူဝ်းၼၼ်ႉလႄႈ၊ မိူဝ်ႈဢၼ်ဝီႉၺိၺ်ႇၼၼ်ႉ ၵိင်းဝၢပ်ႈယူႇၵႃႈၼိူဝ်ၶဝ်ၼၼ်ႉၸိုင်၊ ၶဝ်ႁဵတ်းပရေႃးၽႅတ်ႈလႄႈ ၵမ်းလိုၼ်းဢမ်ႇထၢပ်ႈဢမ်ႇႁဵတ်း။-

26ၵူၺ်းၵႃႈ ၵူၼ်းသွင်ၵေႃႉယင်းၵိုတ်းၵျၢၼ်ႇဝႆႉယူႇၵႃႈၼႂ်းတပ်ႉလႄႈ၊ ၸိုဝ်ႈသဵင်ၵေႃႉၼိုင်ႈၸမ်ႉ၊ ပဵၼ် ဢေးလတတ်ႉ ၊ ၸိုဝ်ႈသဵင်ၵေႃႉၼိုင်ႈၸမ်ႉ၊ ပဵၼ် မေႇတတ်ႉ လႄႈ၊ ဝီႉၺိၺ်ႇၼၼ်ႉ ၵိင်းဝၢပ်ႈယူႇၵႃႈၼိူဝ်သွင်ၶႃၼၼ်ႉဢေႃႈ။ သွင်ၶႃၼၼ်ႉ ပိၵ်ႉသမ်ႉပႃးၼႂ်းၶဝ်ၸိူဝ်းဢၼ်ၶဝ်ႈပႃး ၼႂ်းၸရၢင်းၸိူဝ်းၼၼ်ႉသေၵေႃႈ ဢမ်ႇၵႂႃႇၵႃႈတီႈမူဝ်းၵႃႇၸဝ်ႈၼၼ်ႉ။ သွင်ၶႃၼၼ်ႉ ဢွၼ်ၵၼ်ႁဵတ်းပရေႃးၽႅတ်ႈယူႇၵႃႈၼႂ်းတပ်ႉဢေႃႈ။-

27ၵူၼ်းဢွၼ်ႇၵေႃႉၼိုင်ႈလႅၼ်ႈၵႂႃႇမွၵ်ႇလၢတ်ႈတီႈ မူဝ်းသေႇ လႄႈဝႃႈ၊ ဢေးလတတ်ႉ တင်း မေႇတတ်ႉ ၼၼ်ႉ ႁဵတ်းပရေႃးၽႅတ်ႈယူႇၵႃႈၼႂ်းတပ်ႉၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

28ယေႃးသူႉ လုၵ်ႈၸၢႆး ၼုၼ်ႇ ဢၼ်ပဵၼ်ၵူၼ်းဢၼ်ၶၢမ်ႇတၢင်းၸႂ်ႉတၢင်းသွႆတီႈ မူဝ်းသေႇ ဢၼ်ပဵၼ်ၵႃႈၼႂ်းၵူၼ်းဢွၼ်ႇမၼ်းတင်းလၢႆၼၼ်ႉ ၶိုၼ်းလၢတ်ႈလႄႈဝႃႈ၊ ၸဝ်ႈ မူဝ်းသေႇ ႁဝ်း ႁႄႉၶႅၼ်ၶဝ်သေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

29မူဝ်းသေႇ လၢတ်ႈလႄႈဝႃႈ၊ မႂ်းၼႆႉမီးၸႂ်ဢၼ်သီႈၵေႉႁေႈတႃပုၼ်ႈၵဝ်ႁိုဝ်။ ႁႂ်ႈၵူၼ်းထႃႇဝရႃႉၽြႃးတင်းသဵင်ႈတင်းလူင် ပဵၼ်ပရေႃးၽႅတ်ႈသေၵမ်းလူၺ်ႈ။ ႁႂ်ႈထႃႇဝရႃႉၽြႃးဢဝ်ဝီႉၺိၺ်ႇမၼ်းၸဝ်ႈ တၢင်ႇသႂ်ႇပၼ်ၵႃႈၼိူဝ်ၶဝ်သေၵမ်းလူၺ်ႈ၊ ဝႃႈၼင်ႇၼႆသေယဝ်ႉ၊-

30မူဝ်းသေႇ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်း ၵူၼ်းမဵဝ်း ဢီႉသရေႇလႃႉ တင်းလၢႆၸိူဝ်းၼၼ်ႉၼၼ်ႉ ဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈၼႂ်းတပ်ႉသေဢေႃႈ။

31မိူဝ်ႈၼၼ်ႉ လူမ်းဢွၵ်ႇသေၵႃႈတီႈထႃႇဝရႃႉၽြႃးလႄႈ ပႃးဢဝ်ၼူၵ်ႉၶုမ်ႈတင်းလၢႆ ၵႃႈတီႈပၢင်ႇလၢႆႇမႃးလႄႈ ႁႂ်ႈတူၵ်းၵႃႈတီႈဢၼ် လဵပ်ႈႁွပ်ႈတပ်ႉၵူႈၽၢႆႇၵူႈပႃႈၸူဝ်ႈတႃႇၶၢဝ်းတၢင်းဝၼ်းၼိုင်ႈတဵမ်တဵမ်ၼင်ႇၵၼ်ၵႃႈၼိူဝ်ၼႃႈလိၼ် ၼႃၶိုၼ်ႈသေသွင်သွၵ်ႇၼိုင်ႈဢေႃႈ။-

32ၵူၼ်းတင်းလၢႆ ဢွၼ်ၵၼ်လုၵ်ႉလႄႈၵဵပ်းသိမ်းဢဝ်ၼူၵ်ႉၶုမ်ႈၸိူဝ်းၼၼ်ႉတင်းဝၼ်းတင်းၶိုၼ်း၊ ဝၼ်းမိူဝ်ႈၽုၵ်ႈၵေႃႈ တင်းဝၼ်းဢေႃႈ။ ၵေႃႉဢၼ်ၵဵပ်းသိမ်းဢဝ် ၵေႇၵေႇၼၼ်ႉ လႆႈၵဵပ်းသိမ်းဢဝ် သိပ်း ဢေႃးမေႇ ဢေႃႈ။ ၶဝ်ဢွၼ်ၵၼ် ဢဝ်ၽႄႇတၢၵ်ႇဝႆႉ ၵႃႈတီႈလဵပ်ႈႁွပ်ႈတပ်ႉ ၵူႈတီႈၵူႈလႅၼ်ဢေႃႈ။-

33ၵူၺ်းၵႃႈ ၼႂ်းမိူဝ်ႈဢၼ်ၼိူဝ်ႉၼၼ်ႉယင်းတိုၵ်ႉမီးယူႇၵႃႈၼႂ်းၵၢင်ၶဵဝ်ႈၶဝ်လႄႈ ၸူဝ်ႈဢၼ်ၶဝ်ဢမ်ႇပႆႇတၼ်းၵဵဝ်ႉၼၼ်ႉၸိုင်၊ တၢင်းၸႂ်မႆႈၶႆႈၸႃႉထႃႇဝရႃႉၽြႃးဢွၵ်ႇလႄႈ ထႃႇဝရႃႉၽြႃးဢဝ်တင်းၽေးဢၼ်ႁႅင်းၼႃႇလူင်လၢင် ပၼ်တၢမ်ႇဢေႃႈ။-

34တီႈၼၼ်ႈၸိုင် မၼ်းႁွင်ႉႁဵၵ်ႈၸိုဝ်ႈ ၵီႉပြုတ်ႉႁတ်ႉတဝႃႇ ၵွပ်ႈပိူဝ်ႈဢၼ်ပဵၼ်တီႈဢၼ် သၢင်းၵျူဝ်ႇၶဝ်ၸိူဝ်းဢၼ်ဢေႁႃ ၸႂ်ၸပ်းၸႂ်ၸွႆးၸိူဝ်းၼၼ်ႉဢေႃႈ။-

35ၵူၼ်းတင်းလၢႆၼၼ်ႉ ဢွၼ်ၵၼ်ဢွၵ်ႇသေၵႃႈတီႈ ၵီႉပြုတ်ႉႁတ်ႉတဝႃႇ ၼၼ်ႉသေယဝ်ႉ၊ ၵႂႃႇတၢင်းပႆတၢင်းၸူးၵႃႈတီႈ ႁႃႇၸရုတ်ႉ လႄႈ ယူႇၵႃႈတီႈ ႁႃႇၸရုတ်ႉ ၼၼ်ႉဢေႃႈ။

← Chapter 10 Jump to: Chapter 12 →