Numbers 22 — Shan

1ၵူၼ်းမဵဝ်း ဢီႉသရေႇလႃႉ တင်းလၢႆ သမ်ႉၵႂႃႇတၢင်းပႆတၢင်းလႄႈ ၶျႃးပၢင်ၵႃႈၼႂ်းပၢင်ႇပဵင်း မေႃႇၽႃႉ ဢၼ်မီးႁိမ်းၼမ်ႉႁွင်ႈ ယေႃးတၢၼ်ႇ သိုဝ်ႈဝဵင်း ယေႇရီႉၶူဝ်း ဢေႃႈ။

2ၶုၼ် ပႃႇလၵ်ႈ လုၵ်ႈၸၢႆး ၸီႉၽေႃႇ ႁူႉႁၼ်လွင်ႈၵႃႈဢၼ် ၵူၼ်းမဵဝ်း ဢီႉသရေႇလႃႉ တင်းလၢႆ ႁဵတ်းတီႈၵူၼ်းမဵဝ်း ဢႃႇမေႃးရီႉ ၸိူဝ်းၼၼ်ႉ ၵူႈၸိူဝ်ႉၵူႈပိူင်ၼၼ်ႉသေယဝ်ႉ၊-

3ၵွပ်ႈပိူဝ်ႈဢၼ်ၶဝ်ၼမ်ၵိုၼ်းၼႃႇလူင်လၢင်လႄႈ မိူင်း မေႃႇၽႃႉ ၵူဝ်ႁႄၼႃႇလူင်လၢင်ဢေႃႈ။ ၵွပ်ႈပိူဝ်ႈၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉလႄႈ မိူင်း မေႃႇၽႃႉ ၼၼ်ႉ ယၢပ်ႇၸႂ်ယုင်ႈၸႂ်လႄႈ၊-

4လၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်မိူင်း မီႉတျၼ်ႇ တင်းလၢႆလႄႈဝႃႈ၊ မုၵ်ႉၵူၼ်းၸိူဝ်းၵူၼ်းၼႆႉ တၵ်းယိုၼ်းၵိၼ်ၵႃႈဢၼ်မီးလဵပ်ႈႁွပ်ႈႁိမ်းႁွမ်းႁဝ်းၼႆႉ မိူၼ်ၸိူဝ်ႉၼင်ႇဢၼ် ဝူဝ်းယိုၼ်းၵိၼ်တူၼ်ႈယိူဝ်ႈတူၼ်ႈယႃႈၼၼ်ႉဢေႃႈ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉ ပႃႇလၵ်ႈ လုၵ်ႈၸၢႆး ၸီႉၽေႃႇ ပဵၼ်ၶုၼ်ႁေႃၶမ်း မေႃႇၽႃႉ ဢေႃႈ။-

5မၼ်းပွႆႇၸႂ်ႉသၢၼ်ႇတမၢၼ်ႇတင်းလၢႆၵႂႃႇၸူးၵႃႈတီႈ ပႃႇလၢမ်ႇ ၊ လုၵ်ႈၸၢႆး ပေႃးရႃႉ ၵႃႈတီႈဝဵင်း ပေႇသေႃႇ ဢၼ်မီးၵႃႈတီႈႁိမ်းၼမ်ႉႁွင်ႈ ဢၼ်ပဵၼ်မိူင်းၵူၼ်းမၼ်းတင်းလၢႆၼၼ်ႉ ႁႂ်ႈလႆႈႁွင်ႉပၢင်းဢဝ်မၼ်းမႃးလႄႈ သင်ႇလၢတ်ႈလႄႈဝႃႈ၊ တူၺ်းလူး၊ ၵူၼ်းမဵဝ်းၼိုင်ႈ ဢၼ်လုၵ်ႉသေၵႃႈတီႈမိူင်း ဢေႇၵိပ်ႉတူႉ ပုၼ်ႉ ႁွတ်ႈမႃးၸိူဝ်းၼၼ်ႉ ႁူမ်ႇသုမ်ႇၼႃႈလိၼ်လႄႈ ၶျႃးတီႈယူႇၶဝ်ယူႇၽၢႆႇၼိုင်ႈတင်းၵဝ်ယဝ်ႉ။-

6ပိူဝ်ႈၼႆလႄႈ မႃးလႄႈၵိၼ်ႇလႃႇၵိၼ်ႇဝႃႈၵူၼ်းမဵဝ်းၼႆႉပုၼ်ႈၵဝ်သေၵမ်း။ ၶဝ်ႁႅင်းယႂ်ႇလိူဝ်တွၼ်းသေၵဝ်ဢေႃႈ။ ပေႃးႁဵတ်းၼင်ႇၼၼ်ၸိုင်၊ ၵဝ်တိုၵ်းတေႃးယႃႉပႅတ်ႈၶဝ်လႄႈ လီႁေႃႈၶဝ်ဢွၵ်ႇသေ ၵႃႈၼႂ်းမိူင်းၵဝ်ၼႆႉလႆ တၵ်းႁေႃႈဢွၵ်ႇလႆႈဢေႃႈ။ ၵဝ်ႁူႉလွင်ႈဢၼ် ၵေႃႉဢၼ်ၸဝ်ႈပၼ်တၢင်းလီၼၼ်ႉ လႆႈၶၢမ်ႇတၢင်းလီမင်ႇၵလႃႇ ဢိၵ်ႇတင်း လွင်ႈဢၼ် ၵေႃႉဢၼ်ၸဝ်ႈၵိၼ်ႇလႃႇၵိၼ်ႇဝႃႈၼၼ်ႉ ပဵၼ်ၵေႃႉဢၼ်ထုၵ်ႇတၢင်းဢၼ် ၵိၼ်ႇလႃႇၵိၼ်ႇဝႃႈၼၼ်ႉဢေႃႈ၊ ဝႃႈၼင်ႇၼႆဢေႃႈ။-

7ၼင်ႇၼၼ်လႄႈ ၵူၼ်းဢၼ်ပဵၼ်ၵႄႇပဵၼ်ႁူဝ်မိူင်း မေႃႇၽႃႉ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ် မိူင်း မီႉတျၼ်ႇ ၸိူဝ်းၼၼ်ႉ ဢွၼ်ၵၼ်ပႃးဢဝ်လၢၵ်ႈသွင်ႇ တၢင်းဢၼ်ႁဵတ်းဢတၢတ်ႈတင်းလၢႆသေလႄႈ ၵႂႃႇလႄႈႁွတ်ႈထိုင်ၵႃႈတီႈ ပႃႇလၢမ်ႇ သေယဝ်ႉ၊ ဢဝ်ၵႂၢမ်းၶုၼ် ပႃႇလၵ်ႈ ၼၼ်ႉ လၢတ်ႈတီႈမၼ်းဢေႃႈ။-

8မၼ်းလၢတ်ႈတီႈၶဝ်လႄႈဝႃႈ၊ ၶိုၼ်းၼႆႉ သူယူႇၵႃႈတီႈၼႆႈလူးၵွၼ်ႇတႃႉ။ ၵဝ်တၵ်းၶိုၼ်းလၢတ်ႈတီႈသူၸွမ်းၵႃႈၼင်ႇဢၼ် ထႃႇဝရႃႉၽြႃးမီးဢမိင်ႉတီႈၵဝ်ၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊ မူးမၢတ်ႈၽွင်းမိူင်း မေႃႇၽႃႉ ၸိူဝ်းၼၼ်ႉ ယူႇၵႃႈတီႈ ပႃႇလၢမ်ႇ ၼၼ်ႉဢေႃႈ။-

9ၽြႃးပဵၼ်ၸဝ်ႈမႃးတီႈ ပႃႇလၢမ်ႇ လႄႈထၢမ်ဝႃႈ၊ ၵူၼ်းဢၼ်မီးယူႇၵႃႈတီႈမႂ်းၸိူဝ်းၼႆႉၸိုင် ပဵၼ်ၽူႈလႂ်၊ ဝႃႈၼင်ႇၼႆသေယဝ်ႉ၊-

10ပႃႇလၢမ်ႇ လဝ်ႊလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊ ပႃႇလၵ်ႈ လုၵ်ႈၸၢႆး ၸီႉၽေႃႇ ဢၼ်ပဵၼ်ၶုၼ်ႁေႃၶမ်း မေႃႇၽႃႉ ၼၼ်ႉ ပွႆႇၸႂ်ႉၵူၼ်းမႃးၵႃႈတီႈၶႃႈၸဝ်ႈလႄႈဝႃႈ၊-

11ၵူၼ်းဢၼ်လုၵ်ႉသေၵႃႈတီႈမိူင်း ဢေႇၵိပ်ႉတူႉ ႁွတ်ႈမႃးၸိူဝ်းၼၼ်ႉ ႁူမ်ႇသုမ်ႇၼႃႈလိၼ်ဝႆႉယဝ်ႉ။ ပိူဝ်ႈၼႆလႄႈ မႃးလႄႈၵိၼ်ႇလႃႇၵိၼ်ႇဝႃႈၶဝ်ပုၼ်ႈၵဝ်သေၵမ်း။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၵဝ်တိုၵ်းတေႃးယႃႉပႅတ်ႈၶဝ်လႄႈ လီႁေႃႈၶဝ်ဢွၵ်ႇသေၵႃႈၼႂ်းမိူင်းၵဝ်ၼႆႉလႆ တၵ်းႁေႃႈဢွၵ်ႇလႆႈဢေႃႈ၊ ဝႃႈၼင်ႇၼႆတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

12ၽြႃးပဵၼ်ၸဝ်ႈ မီးဢမိင်ႉတီႈ ပႃႇလၢမ်ႇ လႄႈဝႃႈ၊ မႂ်းဢမ်ႇလႆႈၸွမ်းလႆႈၵႂႃႇလူၺ်ႈၵၼ်တင်းၶဝ်။ မႂ်းဢမ်ႇလႆႈၵိၼ်ႇလႃႇၵိၼ်ႇဝႃႈၵူၼ်းမဵဝ်းၼၼ်ႉ။ ၶဝ်ပဵၼ်ၵူၼ်းမဵဝ်းဢၼ်လႆႈၶၢမ်ႇတၢင်းလီမင်ႇၵလႃႇဢေႃႈ၊ ဝႃႈၼင်ႇၼႆဢေႃႈ။-

13ၶိင်ႇၵၢင်ၼႂ် ပႃႇလၢမ်ႇ လုၵ်ႉလႄႈၶိုၼ်းလၢတ်ႈတီႈမူးမၢတ်ႈၽွင်းမိူင်းၶုၼ် ပႃႇလၵ်ႈ ၸိူဝ်းၼၼ်ႉလႄႈဝႃႈ၊ သူၶိုၼ်းမိူဝ်းၵႂႃႇၵႃႈတီႈမိူင်းသူသေၵမ်းတႃႉ။ ထႃႇဝရႃႉၽြႃး ဢမ်ႇပၼ်ဢၶႂၢင်ႉဢၼ်လႆႈၸွမ်းလူၺ်ႈၵၼ်တင်းသူၼၼ်ႉတီႈၵဝ်၊ ဝႃႈၼင်ႇၼႆဢေႃႈ။-

14မိူဝ်ႈၼၼ်ႉ မူးမၢတ်ႈၽွင်းမိူင်း မေႃႇၽႃႉ ၸိူဝ်းၼၼ်ႉၶိုၼ်းမိူဝ်းၵႂႃႇ ၵႃႈတီႈၶုၼ် ပႃႇလၵ်ႈ လႄႈ လဝ်ႊလၢတ်ႈလႄႈဝႃႈ၊ ပႃႇလၢမ်ႇ ၼၼ်ႉ ဢမ်ႇမီးဢလူဝ်ႇၶႂ်ႈၸွမ်းမႃးလူၺ်ႈၵၼ်တင်းၶႃႈၸဝ်ႈႁဝ်းၸိူဝ်းၼႆႉတီႈၶႃႈ၊ ဝႃႈၼင်ႇၼႆဢေႃႈ။

15ၶုၼ် ပႃႇလၵ်ႈ ၼၼ်ႉသမ်ႉပွႆႇၸႂ်ႉသၢၼ်ႇတမၢၼ်ႇ ဢၼ်ယဵင်ႈၶႅၼ်းၼမ်ၼႃႇ ဢၼ်ဢရႃႇယဵင်ႈၶႅၼ်းယႂ်ႇၼႃႇသေၶဝ်ၸိူဝ်းဢွၼ်တၢင်းၼၼ်ႉၵႂႃႇဢေႃႈ။-

16ၶဝ်ၼၼ်ႉႁွတ်ႈထိုင်ၵႃႈတီႈ ပႃႇလၢမ်ႇ လႄႈ ဢွၼ်ၵၼ်ၶိုၼ်းလၢတ်ႈတီႈမၼ်းလႄႈဝႃႈ၊ ၶုၼ် ပႃႇလၵ်ႈ လုၵ်ႈၸၢႆး ၸီႉၽေႃႇ ၼၼ်ႉ မီးဢမိင်ႉလႄႈဝႃႈၸမ်ႉ၊ ၼင်ႇႁိုဝ်ၸဝ်ႈတၵ်းဢမ်ႇမႃးတီႈၵဝ်လႆႈၸိုင် ယႃႇပေႁႂ်ႈဢၼ်လႂ်လႆႈႁႄႉလႆႈၶႅၼ်သေၵမ်း၊-

17ၵဝ်တၵ်းယုၵ်ႉယွင်ႈၸဝ်ႈဝႆႉၵႃႈၼႂ်းမုၼ်ၽုင်းဢၼ်ယႂ်ႇၼႃႇဢေႃႈ။ တၵ်းပၼ်ၵႃႈဢၼ်ၸဝ်ႈယွၼ်းဢေႃႈ။ ပိူဝ်ႈၼႆလႄႈ မႃးလႄႈၵိၼ်ႇလႃႇၵိၼ်ႇဝႃႈ ၵူၼ်းမဵဝ်းၼႆႉပုၼ်ႈၵဝ်သေၵမ်း၊ ဝႃႈၼင်ႇၼႆၶႃႈယဝ်ႉ၊ ဝႃႈၼင်ႇၼႆဢေႃႈ။-

18ပႃႇလၢမ်ႇ ၵေႃႈ ၶိုၼ်းလၢတ်ႈတီႈၶႃႈၵူၼ်းၶုၼ် ပႃႇလၵ်ႈ ၸိူဝ်းၼၼ်ႉလႄႈဝႃႈ၊ ပိၵ်ႉသမ်ႉၶုၼ် ပႃႇလၵ်ႈ ဢဝ်ႁေႃမၼ်းၸဝ်ႈဢၼ်တဵမ်ဝႆႉတင်းငိုၼ်းၶမ်းၼၼ်ႉ ပၼ်တီႈၵဝ်သေၵေႃႈ ၵဝ်ဢမ်ႇပူၼ်ႉဢမ်ႇလိူဝ်ၵႂၢမ်းထႃႇဝရႃႉၽြႃး ၽြႃးပဵၼ်ၸဝ်ႈၵဝ်ၼၼ်ႉသေလႄႈ ႁဵတ်းလွင်ႈတၢင်းဢၼ်လဵၵ်ႉဢၼ်ယႂ်ႇသေၸိူဝ်ႉသေပိူင်လႃးလႃးလႆႈ။-

19ၼႂ်းဝႃႈၼၼ်သေၵေႃႈ လွင်ႈၼင်ႇႁိုဝ်ၵဝ်တၵ်းႁူႉလွင်ႈဢၼ် ထႃႇဝရႃႉၽြႃးတၵ်းထၢပ်ႈထႅင်ႈလႄႈ မီးဢမိင်ႉတီႈၵဝ်ၸိူဝ်ႉၼင်ႇႁိုဝ်ၼၼ်ႉၸိုင်၊ ၶိုၼ်းၼႆႉသူယူႇၵႃႈတီႈၼႆႈလူးၵွၼ်ႇတႃႉ၊ ဝႃႈၼင်ႇၼႆဢေႃႈ။-

20ၶိင်ႇၵၢင်ၶိုၼ်း ၽြႃးပဵၼ်ၸဝ်ႈမႃးတီႈ ပႃႇလၢမ်ႇ လႄႈ မီးဢမိင်ႉဝႃႈ၊ ပေႃးၵူၼ်းၸိူဝ်းၼၼ်ႉမႃး ႁႂ်ႈလႆႈႁွင်ႉမႂ်းၸိုင်၊ လုၵ်ႉလႄႈၸွမ်းၵႂႃႇလူၺ်ႈၵၼ်တင်းၶဝ်တႃႉ။ ၵူၺ်းၵႃႈ မႂ်းတၵ်းလႆႈႁဵတ်းၵႃႈဢၼ်ၵဝ်သင်ႇလၢတ်ႈဝႆႉတီႈမႂ်းၼၼ်ႉၵူၺ်းဢေႃႈ၊ ဝႃႈၼင်ႇၼႆဢေႃႈ။-

21ၶိင်ႇၵၢင်ၼႂ်၊ ပႃႇလၢမ်ႇ လုၵ်ႉလႄႈ ဢဝ်ၵွပ်းလီႈမၼ်းတၢင်ႇသေယဝ်ႉ၊ ၸွမ်းလူၺ်ႈၵၼ်တင်းမူးမၢတ်ႈၽွင်းမိူင်း မေႃႇၽႃႉ ၸိူဝ်းၼၼ်ႉၵႂႃႇဢေႃႈ။

22ၵွပ်ႈပိူဝ်ႈဢၼ်မၼ်းၸွမ်းၵႂႃႇၸိူဝ်ႉၼင်ႇၼၼ်ၼၼ်ႉလႄႈ တၢင်းၸႂ်မႆႈၶႆႈၸႃႉၽြႃးပဵၼ်ၸဝ်ႈဢွၵ်ႇလႄႈ တမၢၼ်ႇၵၢင်ႁၢဝ်ထႃႇဝရႃႉၽြႃး ၸုၵ်းယူႇၵႃႈတီႈသဵၼ်ႈတၢင်းႁႂ်ႈလႆႈႁၢမ်ႈတၢပ်ႈႁႄႉၶႅၼ်မၼ်းဢေႃႈ။ မိူဝ်ႈၼၼ်ႉ ၼႂ်းမိူဝ်ႈဢၼ်မၼ်းၶီႇလီႈမၼ်းသေလႄႈ ပႃးဢဝ်ၵူၼ်းဢွၼ်ႇမၼ်းသွင်ၵေႃႉၵႂႃႇယူႇၼၼ်ႉၸိုင်၊-

23လီႈမၼ်းၼၼ်ႉ ႁၼ်တမၢၼ်ႇၵၢင်ႁၢဝ်ထႃႇဝရႃႉၽြႃး ဢဝ်လၢပ်ႇမုင်းသေလႄႈ ၸုၵ်းယူႇၵႃႈတီႈသဵၼ်ႈတၢင်းၼၼ်ႉသေယဝ်ႉ၊ ငႅၵ်းဢွၵ်ႇသဵၼ်ႈတၢင်းလႄႈ ၶဝ်ႈၵႂႃႇၵႃႈၼႂ်းပၢင်ႇတူင်ႈႁႆႊတူင်ႈၼႃးသေဢေႃႈ။ ပႃႇလၢမ်ႇ ၵေႃႈ ပေႃႉယႅၼ်ႉလီႈမၼ်း ႁႂ်ႈမၼ်းၶိုၼ်းမႃးၸူးၵႃႈတီႈသဵၼ်ႈတၢင်းဢေႃႈ။-

24တမၢၼ်ႇၵၢင်ႁၢဝ်ထႃႇဝရႃႉၽြႃး သမ်ႉၸုၵ်းယူႇၵႃႈတီႈသဵၼ်ႈတၢင်းတီႈဢၼ်ၵိဝ်ႇဢၼ်ၵႅပ်ႈ ၵႃႈၼႂ်းၵႄႇဝူင်ႈၵၢင်သူၼ်ဢူးယဵၼ်ႇၸပိတ်ႈ မီးႁူဝ်ႉသွင်ၽၢႆႇၼၼ်ႉဢေႃႈ။-

25လီႈၼၼ်ႉ သမ်ႉၶိုၼ်းႁၼ်တမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉထႅင်ႈသေယဝ်ႉ၊ တိူဝ်ႉသႂ်ႇၵႃႈတီႈႁူဝ်ႉၽၢႆႇၼိုင်ႈလႄႈ ႁိပ်ႇတိၼ် ပႃႇလၢမ်ႇ ၸပ်းႁူဝ်ႉၼၼ်ႉဢေႃႈ။ ပႃႇလၢမ်ႇ ၵေႃႈ သမ်ႉပေႃႉယႅၼ်ႉထႅင်ႈဢေႃႈ။-

26တမၢၼ်ႇၵၢင်ႁၢဝ်ထႃႇဝရႃႉၽြႃးၵေႃႈ ပူၼ်ႉၵႂႃႇလႄႈၸုၵ်းယူႇၵႃႈတီႈဢၼ်ၵိတ်ႇဢၼ်ၵႅပ်ႈတီႈဢၼ် ဢမ်ႇငႅၵ်းဢွၵ်ႇသဵၼ်ႈတၢင်းၵႃႈတီႈၽၢႆႇၶႂႃၽၢႆႇသၢႆႉလႆႈလႃးလႃးၼၼ်ႉဢေႃႈ။-

27လီႈၼၼ်ႉ သမ်ႉၶိုၼ်းႁၼ်တမၢၼ်ႇၵၢင်ႁၢဝ်ထႃႇဝရႃႉၽြႃးထႅင်ႈသေယဝ်ႉ၊ ၼွၼ်းမူပ်ႇယူႇၵႃႈတီႈတႂ်ႈ ပႃႇလၢမ်ႇ ဢေႃႈ။ ပႃႇလၢမ်ႇ ၼၼ်ႉၸႂ်မႆႈၶႆႈၸႃႉၼႃႇလူင်လၢင်လႄႈ ဢဝ်ၶွၼ်ႉတဝ်ႉမၼ်းပေႃႉယႅၼ်ႉလီႈၼၼ်ႉဢေႃႈ။-

28မိူဝ်ႈၼၼ်ႉထႃႇဝရႃႉၽြႃး ၽုၺ်ႇသူပ်းလီႈၼၼ်ႉလႄႈ လီႈၼၼ်ႉထၢမ်တီႈ ပႃႇလၢမ်ႇ လႄႈဝႃႈ၊ ၵဝ်ႁဵတ်းၸိူဝ်ႉၼင်ႇႁိုဝ်တီႈမႂ်း ႁႂ်ႈမႂ်းလႆႈပေႃႉယႅၼ်ႉၵဝ်တေႃႇထိုင်ႁွတ်ႈသၢမ်ပွၵ်ႈ၊ ဝႃႈၼင်ႇၼႆသေယဝ်ႉ၊-

29ပႃႇလၢမ်ႇ လၢတ်ႈတီႈလီႈၼၼ်ႉလႄႈဝႃႈ၊ မႂ်းယဝ်ႉယွၵ်ႇၵဝ်လူင်ပႄႇ။ ၶႂ်ႈႁႂ်ႈလၢပ်ႇမီးၵႃႈၼႂ်းမိုဝ်းၵဝ်ၵူၺ်းယဝ်ႉ။ ပေႃးမီးၸိုင်၊ တေႃႈလဵဝ်ၼႆႉ ၵဝ်တၵ်းဢဝ်မႂ်းတၢႆဢေႃႈ၊ ဝႃႈၼင်ႇၼႆဢေႃႈ။-

30လီႈၼၼ်ႉၵေႃႈ ထၢမ်တီႈ ပႃႇလၢမ်ႇ လႄႈဝႃႈ၊ ၵဝ်ၼႆႉပဵၼ်လီႈမႂ်း ဢၼ်လႆႈၶၢမ်ႇတၢင်းဢၼ်မႂ်းၶီႇတေႃႇထိုင်ႁွတ်ႈဝၼ်းမိူဝ်ႈၼႆႉဢမ်ႇၸႂ်ႈႁိုဝ်။ ၵဝ်ယၢမ်ႈတွၼ်ႉႁဵတ်းၸိူဝ်ႉၼင်ႇၼႆတီႈမႂ်းသေပွၵ်ႈႁိုဝ်။ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ ဢမ်ႇတွၼ်ႉႁဵတ်း၊ ဝႃႈၼင်ႇၼႆဢေႃႈ။-

31မိူဝ်ႈၼၼ်ႉ ထႃႇဝရႃႉၽြႃးၽုၺ်ႇမၢၵ်ႇတႃ ပႃႇလၢမ်ႇ လႄႈ ပႃႇလၢမ်ႇ ႁၼ်တမၢၼ်ႇၵၢင်ႁၢဝ်ထႃႇဝရႃႉၽြႃး ဢဝ်လၢပ်ႇမုင်းသေလႄႈၸုၵ်းယူႇၵႃႈတီႈသဵၼ်ႈတၢင်းၼၼ်ႉလႄႈ၊ မၼ်းၵူမ်ႈႁူဝ်ၵွမ်းႁူဝ်သေလႄႈ မူပ်ႇတဵတ်ႇဢေႃႈ။-

32တမၢၼ်ႇၵၢင်ႁၢဝ်ထႃႇဝရႃႉၽြႃးၵေႃႈလၢတ်ႈတီႈမၼ်းလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းပေႃႉယႅၼ်ႉလီႈမႂ်းတေႃႇထိုင်ႁွတ်ႈသၢမ်ပွၵ်ႈၼင်ႇႁိုဝ်။ ၵွပ်ႈပိူဝ်ႈဢၼ်သဵၼ်ႈတၢင်းဢၼ်မႂ်းၵႂႃႇၼၼ်ႉ ပဵၼ်ဢၼ်ၶတ်းၵၼ်တင်းၵဝ်လႄႈ ၵဝ်ဢွၵ်ႇမႃး ႁႂ်ႈလႆႈႁႄႉၶႅၼ်မႂ်းယဝ်ႉ။-

33လီႈၸိုင် ႁၼ်ၵဝ်လႄႈဝႄႈပိူင်ႈသေၵႃႈတီႈၽၢႆႇၼႃႈၵဝ် တေႃႇထိုင်ႁွတ်ႈသၢမ်ပွၵ်ႈယဝ်ႉ။ သင်ဢမ်ႇဝႄႈပိူင်ႈသေၵႃႈတီႈၵဝ်ၸိူဝ်ႉၼင်ႇၼၼ်ၸိုင်၊ ၵဝ်လႆႈဢဝ်မႂ်းတၢႆဢမၢၼ်ႇၶၼ်ပဵၼ်လႄႈ ပၼ်ဢသၢၵ်ႈလီႈၵူၺ်းၵတ်းယဵၼ်ၶျၢမ်းသႃႇယဝ်ႉ၊ ဝႃႈၼင်ႇၼႆဢေႃႈ။-

34ပႃႇလၢမ်ႇ ၵေႃႈ လၢတ်ႈတီႈတမၢၼ်ႇၵၢင်ႁၢဝ်လႄႈဝႃႈ၊ ၵဝ်ၶႃႈၽိတ်းပိူင်ႈၶႃႈယဝ်ႉ။ ၵဝ်ၶႃႈဢမ်ႇႁူႉလွင်ႈဢၼ်ၸဝ်ႈႁဝ်းၶႂၢင်ႁႄႉၵဝ်ၶႃႈ ယူႇၵႃႈတီႈသဵၼ်ႈတၢင်းၼၼ်ႉၶႃႈ။ မိူဝ်ႈလဵဝ်ၼႆႉ ပေႃးဢလူဝ်ႇၸဝ်ႈႁဝ်းဢမ်ႇမီးၸိုင်၊ ၵဝ်ၶႃႈတၵ်းၶိုၼ်းမိူဝ်းၵႂႃႇၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

35တမၢၼ်ႇၵၢင်ႁၢဝ်ထႃႇဝရႃႉၽြႃး မီးဢမိင်ႉတီႈ ပႃႇလၢမ်ႇ လႄႈဝႃႈ၊ ၸွမ်းလူၺ်ႈၵၼ်တင်းၵူၼ်းၸိူဝ်းၼၼ်ႉၵႂႃႇတႃႉ။ ၵူၺ်းၵႃႈ မႂ်းတၵ်းလႆႈႁေႃးလၢတ်ႈၵႂၢမ်းဢၼ်ၵဝ်သင်ႇလၢတ်ႈဝႆႉၼၼ်ႉၵူၺ်းဢေႃႈ၊ ဝႃႈၼင်ႇၼႆလႄႈ ပႃႇလၢမ်ႇ ၼၼ်ႉ ၸွမ်းၵႂႃႇလူၺ်ႈၵၼ်တင်း မူးမၢတ်ႈၽွင်းမိူင်း ၶုၼ် ပႃႇလၵ်ႈ ၸိူဝ်းၼၼ်ႉဢေႃႈ။

36မိူဝ်ႈဢၼ်ၶုၼ် ပႃႇလၵ်ႈ ငိၼ်းလွင်ႈဢၼ် ပႃႇလၢမ်ႇ ႁွတ်ႈထိုင်ၼၼ်ႉၸိုင်၊ ဢွၵ်ႇၵႂႃႇၸူးၵႃႈတီႈဝဵင်း မေႃႇၽႃႉ ဝဵင်းၼိုင်ႈ ဢၼ်မီးၵႃႈႁိမ်းၼမ်ႉႁွင်ႈ ဢႃႇၼုၼ်ႇ ဢၼ်ပဵၼ်ၶွပ်ႇၼမ်ႉလႅၼ်လိၼ်ၼၼ်ႉ ႁႂ်ႈလႆႈႁပ်ႉႁူဝ်တၢင်းမၼ်းဢေႃႈ။-

37ၶုၼ် ပႃႇလၵ်ႈ ၵေႃႈ လၢတ်ႈတီႈ ပႃႇလၢမ်ႇ လႄႈဝႃႈ၊ ၵဝ်ပွႆႇၸႂ်ႉၵႂႃႇၶိူဝ်းၶိူဝ်းယႂ်းယႂ်း ႁႂ်ႈလႆႈႁွင်ႉပၢင်းဢဝ်ၸဝ်ႈမႃးဢမ်ႇၸႂ်ႈႁိုဝ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈဢမ်ႇမႃး။ ၵဝ်ယုၵ်ႉယွင်ႈၸဝ်ႈဝႆႉ ၵႃႈၼႂ်းမုၼ်ၽုင်းလႆႈဢမ်ႇၸႂ်ႈႁိုဝ်။ ဝႃႈၼင်ႇၼႆသေယဝ်ႉ၊-

38ပႃႇလၢမ်ႇ ၶိုၼ်းလၢတ်ႈတီႈ ပႃႇလၵ်ႈ လႄႈဝႃႈ၊ တူၺ်းလူး၊ ၵဝ်မႃးၸူးၵႃႈတီႈၶုၼ်လူင်ယဝ်ႉ။ ၵူၺ်းၵႃႈ ၵဝ်ပိူင်ႇလၢတ်ႈၵႂၢမ်းသေၶေႃႈသေၵမ်းႁိုဝ်။ ၵဝ်တၵ်းလၢတ်ႈၵႂၢမ်းဢၼ်ၽြႃးပဵၼ်ၸဝ်ႈဢဝ်သႂ်ႇဝႆႉ ၵႃႈတီႈသူပ်းၵဝ်ၼၼ်ႉၵူၺ်းဢေႃႈ၊ ဝႃႈၼင်ႇၼႆသေလႄႈ၊-

39ပႃႇလၢမ်ႇ ၼၼ်ႉ ၸွမ်းလူၺ်ႈၵၼ်တင်းၶုၼ် ပႃႇလၵ်ႈ လႄႈ ၶဝ်ၼၼ်ႉႁွတ်ႈထိုင်ၵႃႈတီႈ ဝဵင်း ၵီႉရယတ်ႉႁူႉၸုတ်ႉ ဢေႃႈ။-

40ၶုၼ် ပႃႇလၵ်ႈ ၵေႃႈ ဢဝ်ဝူဝ်းလႂ်သူဝ်းလႂ် ပုၵ်ႈၸေႃႇလႄႈ ပၼ်ၵႂႃႇၵႃႈတီႈ ပႃႇလၢမ်ႇ ဢိၵ်ႇတင်းမူးမၢတ်ႈၽွင်းမိူင်းဢၼ်မီးယူႇလူၺ်ႈၵၼ်တင်းမၼ်းၸိူဝ်းၼၼ်ႉဢေႃႈ။

41ဝၼ်းမိူဝ်ႈၽုၵ်ႈ ၶုၼ် ပႃႇလၵ်ႈ ႁွင်ႉဢဝ် ပႃႇလၢမ်ႇ လႄႈ ဢဝ်ၵႂႃႇသူင်ႇႁွတ်ႈထိုင်ၵႃႈတီႈၼိူဝ်သၼ်လွႆ ဢၼ်ၸၢပ်ႈသႅင်ႇၵၼ်တင်းၽြႃး ပႃႇလႃႉ ၼၼ်ႉ ႁႂ်ႈမၼ်းလႆႈႁၼ်ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းမူတ်းၼၼ်ႉဢေႃႈ။