Numbers 4 — Shan

1ထႃႇဝရႃႉၽြႃးသမ်ႉမီးဢမိင်ႉတီႈ မူဝ်းသေႇ တင်း ဢႃႇရုၼ်ႇ လႄႈဝႃႈ၊-

2ၼႂ်းၵူၼ်းမဵဝ်း လေႇဝီႉ ၸိူဝ်ႉၶိူဝ်း ၵေႃႇႁတ်ႉ ၼၼ်ႉ၊ ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ် မဵဝ်းပူႇမဵဝ်းပေႃႈၶဝ်သေလႄႈ ဢဝ်ၸရၢင်း၊-

3ၶဝ်ၸိူဝ်းဢၼ်ဢသၢၵ်ႈလႆႈ သၢမ်သိပ်းၶိုၼ်ႈၵႂႃႇတေႃႇထိုင်ႁွတ်ႈႁႃႈသိပ်း၊ ၵႃႈဢၼ်ၶဝ်ႈၵႃႈၼႂ်းမုၵ်ႉၼႂ်းၸိူဝ်း ႁႂ်ႈလႆႈပွင်ႁဵတ်းဢမူႉမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈတင်းသဵင်ႈတင်းလူင်ၼၼ်ႉတႃႉ။

4ဢမူႉဢၼ်ၵူၼ်းၸိူဝ်ႉၶိူဝ်း ၵေႃႇႁတ်ႉ တင်းလၢႆ တၵ်းလႆႈပႂ်ႉလူပႂ်ႉတူၺ်း ၵႃႈတီႈမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈလႄႈ ၸၢပ်ႈသႅင်ႇလူၺ်ႈၵၼ်တင်းၶိူင်ႈပိူင်ဢၼ်မူတ်းၸၢင်ႇၼႃႇလူင်လၢင်ၼၼ်ႉၸမ်ႉ၊-

5မိူဝ်ႈဢၼ်ထိုင်ၶိင်ႇဢၼ်ၶီႇတပ်ႉၼၼ်ႉၸိုင်၊ ဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉ တၵ်းလႆႈၶဝ်ႈၵႃႈၼႂ်းလႄႈ ဢဝ်ၽႃႈၵင်ႈတၢင်းၼႂ်းၼၼ်ႉ ၶျႃးလူင်းသေယဝ်ႉ၊ ဢဝ်ႁူမ်ႇသုမ်ႇတိူၵ်ႈတႃႇၶိူင်ႈၶၢမ်ႇသၢၵ်ႈသေႇဝႆႉဢေႃႈ။-

6သမ်ႉတၵ်းလႆႈဢဝ် ၼင် တႁႃႇသႃႉ ႁူမ်ႇသုမ်ႇလႄႈ ဢဝ်ၶူဝ်းဢၼ်သွမ်ႇသိူဝ်ႇၵႃႈၼိူဝ်ၼင်ၼၼ်ႉဝႆႉသေယဝ်ႉ၊ ဢဝ်ၵၢၼ်းႁၢပ်ႇမၼ်း သွတ်ႇသႂ်ႇဝႆႉဢေႃႈ။-

7ၵႃႈၼိူဝ်ၶူင်ႇတီႈၵိၼ်ၶဝ်ႈမုၼ်းၽၢႆႇၼႃႈၸဝ်ႈၵေႃႈ ၶဝ်တၵ်းလႆႈဢဝ်ၶူဝ်းဢၼ်သွမ်ႇသိူဝ်ႇဝႆႉလႄႈ ဢဝ်မေႃႈဢႅင်ႇ၊ ၸေႃႉ၊ ၵွၵ်းဢႅင်ႇ၊ ၵွၵ်းပုၼ်ႈဢၼ်တၵ်းထွၵ်ႇတၵ်းႁိုဝ်ႈၼၼ်ႉၸိူဝ်းၼၼ်ႉ ဢိၵ်ႇတင်းၶဝ်ႈမုၼ်းဢၼ်လႆႈတႄႇယူႇတႃႇသေႇၼၼ်ႉတၢင်ႇသႂ်ႇဝႆႉ ၵႃႈၼိူဝ်မၼ်းသေယဝ်ႉ၊-

8ဢဝ်တင်းၶူဝ်းဢၼ်လႅင်ႁူမ်ႇသုမ်ႇၶိူင်ႈပိူင်ၸိူဝ်းၼၼ်ႉဝႆႉဢေႃႈ။ သမ်ႉတၵ်းလႆႈဢဝ်ၼင် တႁႃႇသႃႉ ႁူမ်ႇသုမ်ႇလႄႈ ဢဝ်ၵၢၼ်းႁၢပ်ႇမၼ်းသွတ်ႇသႂ်ႇဝႆႉဢေႃႈ။-

9ၶဝ်တၵ်းလႆႈဢဝ်ၶူဝ်းဢၼ်သွမ်ႇႁူမ်ႇသုမ်ႇၶူင်ႇတီႈတႆႈၽႆး ဢၼ်တႆႈၽႆးၼၼ်ႉဢိၵ်ႇတင်း ဝၢၼ်ႇတႆႈၽႆးမၼ်း၊ ၵိမ်းၺၢပ်ႈၽႆးမၼ်း၊ ၵွၵ်းပုၼ်ႈဢၼ်တၵ်းၶၢမ်ႇဢဝ်ဢၼ်ၺၢပ်ႈၽႆးပႅတ်ႈၼၼ်ႉ တင်းမူၵ်ႇၼမ်ႉမၼ်းဢၼ်ၶဝ်ဢဝ်ပွင်ဢဝ်ႁဵတ်းမၼ်းၸိူဝ်းၼၼ်ႉလႄႈ၊-

10ဢဝ်တူဝ်မၼ်းဢိၵ်ႇတင်းၶိူင်ႈပိူင်မၼ်းၵႃႈမီးၸိူဝ်းၼၼ်ႉ သႂ်ႇၵႃႈၼႂ်းထူင်ၼင် တႁႃႇသႃႉ ဝႆႉသေယဝ်ႉ၊ ဢဝ်တၢင်ႇသႂ်ႇၵႃႈၼိူဝ်ၶဵင်ႇမၼ်းဝႆႉဢေႃႈ။-

11ၵႃႈၼိူဝ်ယိတ်ႈပလၢင်ႇၶမ်းၵေႃႈ ၶဝ်တၵ်းလႆႈဢဝ်ၶူဝ်းဢၼ်သွမ်ႇသိူဝ်ႇဝႆႉလႄႈ ဢဝ်ၼင် တႁႃႇသႃႉ ႁူမ်ႇသုမ်ႇသေယဝ်ႉ၊ ဢဝ်ၵၢၼ်းႁၢပ်ႇမၼ်းသွတ်ႇသႂ်ႇဝႆႉဢေႃႈ။-

12ၶိူင်ႈပိူင်ပုၼ်ႈဢၼ်တၵ်းပွင်ႁဵတ်းဢမူႉၸဝ်ႈ ဢၼ်ၶဝ်ဢဝ်ပွင်ႁဵတ်းဢမူႉၸဝ်ႈ ၵႃႈၼႂ်းထႃႇၼႃႉတီႈမူတ်းၸၢင်ႇၼၼ်ႉၸိူဝ်းၼၼ်ႉၸိုင်၊ ၶဝ်တၵ်းလႆႈဢဝ်သႂ်ႇဝႆႉၵႃႈၼႂ်းထူင်ၶူဝ်းဢၼ်သွမ်ႇလႄႈ ဢဝ်ၼင် တႁႃႇသႃႉ ႁူမ်ႇသုမ်ႇသေယဝ်ႉ၊ ဢဝ်တၢင်ႇသႂ်ႇၵႃႈၼိူဝ်ၶဵင်ႇမၼ်းဝႆႉဢေႃႈ။-

13ယိတ်ႈပလၢင်ႇၸိုင် ၶဝ်တၵ်းလႆႈဢဝ်တဝ်ႈၵႃႈၼိူဝ်မၼ်းပႅတ်ႈသေမူတ်းမူတ်းလႄႈ ဢဝ်ၶူဝ်းဢၼ်လႅင်သိူဝ်ႇဝႆႉၵႃႈၼိူဝ်မၼ်းသေယဝ်ႉ၊-

14ဢဝ်ၶိူင်ႈပိူင်ပုၼ်ႈဢၼ်တၵ်းပွင်ႁဵတ်းဢမူႉၸဝ်ႈဢၼ်သႅင်ႇၵၼ်တင်းမၼ်းဢၼ်ဝႃႈ၊ လၢင်ႇပၢၼ်းလႂ်၊ ၶေႃဢၼ်ၵွင်ႉၼိူဝ်ႉလႂ်၊ ၸေႃႉၽႅပ်ႉလႂ်၊ ဝၢၼ်ႇလႂ်၊ ၶိူင်ႈပိူင်ယိတ်ႈပလၢင်ႇၵႃႈမီးၸိူဝ်းၼၼ်ႉ တၢင်ႇသႂ်ႇၵႃႈၼိူဝ်မၼ်းလႄႈ ဢဝ်ၼင် တႁႃႇသႃႉ ႁူမ်ႇသုမ်ႇသေယဝ်ႉ၊ ဢဝ်ၵၢၼ်းႁၢပ်ႇမၼ်းသွတ်ႇသႂ်ႇဝႆႉဢေႃႈ။-

15မိူဝ်ႈဢၼ် ဢႃႇရုၼ်ႇ ဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ ႁူမ်ႇသုမ်ႇထႃႇၼႃႉတီႈမူတ်းၸၢင်ႇၸဝ်ႈ တင်းၶိူင်ႈပိူင်ဢၼ်ၸၢပ်ႈသႅင်ႇၵၼ်တင်း ထႃႇၼႃႉတီႈမူတ်းၸၢင်ႇၸဝ်ႈၸိူဝ်းၼၼ်ႉယဝ်ႉတူဝ်ႈယဝ်ႉလႄႈ ႁွတ်ႈထိုင်ၶိင်ႇၶီႇတပ်ႉၵႂႃႇၸိူဝ်ႉၼင်ႇၼၼ်ၼၼ်ႉ၊ ၵူၼ်းၸိူဝ်ႉၶိူဝ်း ၵေႃႇႁတ်ႉ တင်းလၢႆ တၵ်းလႆႈဢွၼ်ၵၼ်သုတ်ႉၸပ်းသုတ်ႉၸူးႁႂ်ႈလႆႈႁၢပ်ႇၵႂႃႇဢေႃႈ။ ၼႂ်းဝႃႈၼၼ်သေၵေႃႈ လွင်ႈၼင်ႇႁိုဝ်ၶဝ်တၵ်းၵၢင်းလွတ်ႈတင်း တၢင်းတၢႆၸိုင်၊ ၶဝ်ဢမ်ႇလႆႈတိူဝ်ႉလႆႈယိပ်း ၶိူင်ႈပိူင်ဢၼ်မူတ်းၸၢင်ႇၸိူဝ်းၼၼ်ႉ။ ဢၼ်ၼႆႉၸမ်ႉ၊ ပဵၼ်ဢမူႉဢၼ်ၵူၼ်းၸိူဝ်ႉၶိူဝ်း ၵေႃႇႁတ်ႉ တင်းလၢႆ တၵ်းလႆႈပွင်ႁဵတ်းၵႃႈတီႈမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈဢေႃႈ။-

16ဢမူႉဢၼ် ဢေးလႃႇၸႃႇ ဢၼ်ပဵၼ်လုၵ်ႈၸၢႆးယိတ်ႈပရေႃးႁဵၵ်ႈ ဢႃႇရုၼ်ႇ ၼၼ်ႉ၊ တၵ်းလႆႈလူတူၺ်းလုမ်းလႃးၼၼ်ႉၸမ်ႉ၊ ပဵၼ်ၼမ်ႉမၼ်းပုၼ်ႈဢၼ်တၵ်းတႆႈၽႆး၊ ၼၢမ်ႇသႃႇဢၼ်ႁွမ်ဢၼ်ႁူၺ်းပုၼ်ႈဢၼ်တၵ်းတုတ်ႇၽႆး၊ တၢင်းပုၵ်ႈၸေႃႇၽေႃးၸဵၼ်ႇ ဢၼ်သၢၵ်ႈၵၢပ်ႈၵူႈဝၼ်း၊ ၼမ်ႉမၼ်းပုၼ်ႈဢၼ်တၵ်းတႃးၼၼ်ႉဢိၵ်ႇတင်းသုမ်ႉထဵင်ၸဝ်ႈ တင်းၶိူင်ႈပိူင်မၼ်းၵႃႈမီး၊ ထႃႇၼႃႉတီႈမူတ်းၸၢင်ႇၸဝ်ႈ တင်းၶိူင်ႈပိူင်မၼ်းၵႃႈမီးၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

17ထႃႇဝရႃႉၽြႃးသမ်ႉမီးဢမိင်ႉတီႈ မူဝ်းသေႇ တင်း ဢႃႇရုၼ်ႇ လႄႈဝႃႈ၊-

18ယႃႇပေပႄႇတႅပ်းပႅတ်ႈ ၵူၼ်းမဵဝ်းပီႈမဵဝ်းၼွင်ႉၸိူဝ်ႉၶိူဝ်း ၵေႃႇႁတ်ႉ ၸိူဝ်းၼၼ်ႉ သေၵႃႈၼႂ်းမုၵ်ႉၼႂ်းၸိူဝ်း လေႇဝီႉ ။-

19လွင်ႈၼင်ႇႁိုဝ်ၶဝ်တၵ်းၵၢင်းလွတ်ႈတင်းၽေးတၢင်းတၢႆလႄႈ ဢသၢၵ်ႈလႆႈလိပ်းၼႂ်းမိူဝ်ႈဢၼ်ၶဝ်သုတ်ႉၸပ်းသုတ်ႉၸူးၵႃႈတီႈ ၶိူင်ႈပိူင်ဢၼ်မူတ်းၸၢင်ႇၼႃႇလူင်လၢင်ၸိူဝ်းၼၼ်ႉၸိုင်၊ တၵ်းလႆႈႁဵတ်းတီႈၶဝ်ၸိူဝ်ႉၼင်ႇႁိုဝ်ၸမ်ႉ၊ ဢႃႇရုၼ်ႇ ဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ တၵ်းလႆႈၶဝ်ႈဢွၼ်တၢင်းလႄႈမႅင်ႇၽႄၶၢၼ်းဝႆႉဢမူႉ ဢၼ်ၶဝ်တၵ်းလႆႈပႂ်ႉလႆႈႁဵတ်း ဢိၵ်ႇတင်းၶူဝ်းဢၼ်ၶဝ်တၵ်းလႆႈႁၢပ်ႇလႆႈပႃးၼၼ်ႉတီႈၶဝ် ႁင်းၽႂ်ႁင်းမၼ်းဢေႃႈ။-

20ၵူၺ်းၵႃႈ လွင်ႈၼင်ႇႁိုဝ်ၶဝ်တၵ်းၵၢင်းလွတ်ႈတင်း တၢင်းတၢႆၸိုင်၊ ၶဝ်ဢမ်ႇလႆႈၶဝ်ႈၵႃႈၼႂ်းလႄႈ တူၺ်းထႃႇၼႃႉတီႈမူတ်းၸၢင်ႇၸဝ်ႈၼၼ်ႉ သေၵႅပ်ႉဢွၼ်ႇၵမ်းဢွၼ်ႇၼိုင်ႈ၊ ဝႃႈၼင်ႇၼႆဢေႃႈ။

21ထႃႇဝရႃႉၽြႃးသမ်ႉမီးဢမိင်ႉတီႈ မူဝ်းသေႇ လႄႈဝႃႈ၊-

22ၼႂ်းၵူၼ်းၸိူဝ်ႉၶိူဝ်း ၵေႇရသုၼ်ႇ တင်းလၢႆၼၼ်ႉ၊ ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်၊ မဵဝ်းပူႇမဵဝ်းပေႃႈၶဝ်သေလႄႈ၊

23ဢဝ်ၸရၢင်းၶဝ်ၸိူဝ်းဢၼ်ဢသၢၵ်ႈလႆႈ သၢမ်သိပ်းၶိုၼ်ႈၵႂႃႇတေႃႇထိုင်ႁွတ်ႈႁႃႈသိပ်း၊ ၵႃႈဢၼ်ၶဝ်ႈၵႃႈၼႂ်းမုၵ်ႉၼႂ်းၸိူဝ်း ႁႂ်ႈလႆႈပွင်ႁဵတ်းဢမူႉ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉ တင်းသဵင်ႈတင်းလူင်ၼၼ်ႉတႃႉ။-

24ဢမူႉဢၼ်ၵူၼ်းၸိူဝ်ႉၶိူဝ်း ၵေႇရသုၼ်ႇ တင်းလၢႆ တၵ်းလႆႈပႂ်ႉလူပႂ်ႉတူၺ်းဢိၵ်ႇတင်းၶူဝ်းဢၼ်ၶဝ်တၵ်းလႆႈႁၢပ်ႇလႆႈပႃးၸမ်ႉ၊-

25ပဵၼ်ၽႃႈၵင်ႈသုမ်ႉထဵင်ၸဝ်ႈ ဢိၵ်ႇတင်းမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ၊ ဢၼ်ႁူမ်ႇမၼ်း၊ ၼင် တႁႃႇသႃႉ ဢၼ်ႁူမ်ႇၵႃႈၼိူဝ်မၼ်း၊ ၽႃႈၵင်ႈဢၼ်ၵင်ႈႁူးၽၵ်းတူမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ၊-

26ၽႃႈၵင်ႈႁူဝ်ႉဝၢင်းတင်းၽႃႈၵင်ႈ ဢၼ်ၵင်ႈႁူးၽၵ်းတူႁူဝ်ႉဝၢင်း ဢၼ်လဵပ်ႈႁွပ်ႈသုမ်ႉထဵင်ၸဝ်ႈတင်းယိတ်ႈပလၢင်ႇၼၼ်ႉ၊ ၸိူၵ်ႈမၼ်းတင်းလၢႆ ဢိၵ်ႇတင်းၶိူင်ႈပိူင်ၵႃႈဢၼ်ဢဝ်ပွင်ဢဝ်ႁဵတ်းဢမူႉၸိူဝ်းၼၼ်ႉလႄႈ ပဵၼ်ပုၼ်ႈဢၼ်တၵ်းႁၢပ်ႇဢမူႉၸဝ်ႈ တင်းသဵင်ႈတင်းလူင်ၼၼ်ႉဢေႃႈ။ ၼင်ႇၼၼ်လႄႈ ၶဝ်တၵ်းလႆႈပွင်လႆႈႁဵတ်းဢေႃႈ။-

27ၼႂ်းၵႃႈဢၼ်ၵူၼ်းၸိူဝ်ႉၶိူဝ်း ၵေႇရသုၼ်ႇ တင်းလၢႆ ပႂ်ႉဢမူႉဢိၵ်ႇတင်းၼႂ်းၵႃႈဢၼ်ၶဝ်ႁၢပ်ႇၶူဝ်းပႃးၶူဝ်းၼၼ်ႉ၊ ၶဝ်တၵ်းလႆႈပွင်လႆႈႁဵတ်းၸွမ်းၵႃႈၼင်ႇဢၼ် ဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉ ၶၢၼ်းဝႆႉၼၼ်ႉဢေႃႈ။ ၼႂ်းၵႃႈဢၼ်ၶဝ်ႁၢပ်ႇၶူဝ်းပႃးၶူဝ်းၼၼ်ႉ၊ သူတၵ်းလႆႈမႅင်ႇၽႄၸီႇယၢင်ႇဝႆႉတီႈၶဝ်ဢေႃႈ။-

28ဢၼ်ၼႆႉၸမ်ႉ၊ ပဵၼ်ဢမူႉဢၼ်ၵူၼ်းၸိူဝ်ႉၶိူဝ်း ၵေႇရသုၼ်ႇ တင်းလၢႆ တၵ်းလႆႈပွင်လႆႈႁဵတ်းၵႃႈတီႈ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈဢေႃႈ။ ဢီႉသမႃႇ ဢၼ်ပဵၼ်လုၵ်ႈၸၢႆးယိတ်ႈပရေႃးႁဵၵ်ႈ ဢႃႇရုၼ်ႇ ၼၼ်ႉ တၵ်းလႆႈဢုပ်ႉၵႃႈၼိူဝ်ဢမူႉ ဢၼ်ၶဝ်ပွင်ႁဵတ်းၼၼ်ႉဢေႃႈ။

29ၼႂ်းၵူၼ်းၸိူဝ်ႉၶိူဝ်း မေႇရႃႇရီႉ တင်းလၢႆၼၼ်ႉၵေႃႈ ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်၊ မဵဝ်းပူႇမဵဝ်းပေႃႈၶဝ်သေလႄႈ၊-

30ဢဝ်ၸရၢင်းၶဝ်ၸိူဝ်းဢၼ်ဢသၢၵ်ႈလႆႈ သၢမ်သိပ်းၶိုၼ်ႈၵႂႃႇတေႃႇထိုင်ႁွတ်ႈႁႃႈသိပ်း၊ ၵႃႈဢၼ်ၶဝ်ႈၵႃႈၼႂ်းမုၵ်ႉၼႂ်းၸိူဝ်း ႁႂ်ႈလႆႈပွင်ႁဵတ်းဢမူႉ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉ တင်းသဵင်ႈတင်းလူင်ၼၼ်ႉတႃႉ။-

31ဢမူႉတၢင်းဢၼ်ၶဝ်တၵ်းလႆႈႁၢပ်ႇလႆႈပႃး ၸွမ်းလူၺ်ႈတၢင်းဢၼ်ၶဝ်ပႂ်ႉလူပႂ်ႉတူၺ်းၵႃႈတီႈ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉၸမ်ႉ၊ ပဵၼ်ပႅၼ်ႈသုမ်ႉထဵင်ၸဝ်ႈလႂ်၊ သႄႈမၼ်းလႂ်၊ သဝ်မၼ်းလႂ်၊-

32တီႈသုပ်းတိၼ်မၼ်းလႂ် ဢိၵ်ႇတင်းသဝ်ႁူဝ်ႉဝၢင်းဢၼ်လဵပ်ႈႁွပ်ႈၼၼ်ႉလႂ်၊ တီႈသုပ်းတိၼ်မၼ်းလႂ်၊ လၵ်းမၼ်းလႂ်၊ ၸိူၵ်ႈမၼ်းလႂ်၊ တင်းၶိူင်ႈပိူင်ၵႃႈဢၼ်ၸၢပ်ႈသႅင်ႇၵၼ်တင်းၸိူဝ်းၼၼ်ႉလႄႈ ပဵၼ်ပုၼ်ႈဢၼ်တၵ်းႁၢပ်ႇဢမူႉၸဝ်ႈ တင်းသဵင်ႈတင်းလူင်ၼၼ်ႉဢေႃႈ။ သူတၵ်းလႆႈမၢတ်ႈမၢႆၸိုဝ်ႈသဵင်ၶိူင်ႈပိူင်ဢၼ်ၶဝ်တၵ်းလႆႈလူတူၺ်းႁၢပ်ႇၵႂႃႇၸိူဝ်းၼၼ်ႉသေလႄႈ ၼပ်ႉဢၢၼ်ႇဢေႃႈ။-

33ဢၼ်ၼႆႉၸမ်ႉ၊ ပဵၼ်ဢမူႉဢၼ်ၵူၼ်းၸိူဝ်ႉၶိူဝ်း မေႇရႃႇရီႉ တင်းလၢႆ တၵ်းလႆႈပွင်လႆႈႁဵတ်းၵႃႈတီႈ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉလႄႈ ဢီႉသမႃႇ လုၵ်ႈၸၢႆးယိတ်ႈပရေႃးႁဵၵ်ႈ ဢႃႇရုၼ်ႇ ၼၼ်ႉ၊ တၵ်းလႆႈဢုပ်ႉဢေႃႈ၊ ဝႃႈၼင်ႇၼႆဢေႃႈ။

34မူဝ်းသေႇ ဢိၵ်ႇတင်း ဢႃႇရုၼ်ႇ တင်းၵူၼ်းလူင်ပရဵၵ်ႈသၢတ်ႈတင်းလၢႆ ဢွၼ်ၵၼ်ၼပ်ႉဢၢၼ်ႇဢဝ်ၸရၢင်းၵူၼ်းၸိူဝ်ႉၶိူဝ်း ၵေႃႇႁတ်ႉ ၊-

35ဢၼ်ဢသၢၵ်ႈလႆႈ သၢမ်သိပ်းၶိုၼ်ႈၵႂႃႇတေႃႇထိုင်ႁွတ်ႈႁႃႈသိပ်း၊ ၵႃႈဢၼ်ၶဝ်ႈၵႃႈၼႂ်းမုၵ်ႉၼႂ်းၸိူဝ်း ႁႂ်ႈလႆႈပွင်ႁဵတ်းဢမူႉ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉ ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်၊ မဵဝ်းပူႇမဵဝ်းပေႃႈၶဝ်ၼၼ်ႉဢေႃႈ။-

36ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးၼႂ်းၸရၢင်းၼၼ်ႉၸမ်ႉ၊ မီးသွင်ႁဵင်ၸဵတ်းပၢၵ်ႇပၢႆႁႃႈသိပ်းဢေႃႈ။-

37ၶဝ်ၸိူဝ်းၼႆႉပဵၼ်ၵူၼ်းၸိူဝ်ႉၶိူဝ်း ၵေႃႇႁတ်ႉ ဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇ၊ ၵႃႈဢၼ်တၵ်းလႆႈပွင်လႆႈႁဵတ်း ဢမူႉမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈလႄႈ၊ မူဝ်းသေႇ ဢိၵ်ႇတင်း ဢႃႇရုၼ်ႇ ၼပ်ႉဢၢၼ်ႇၸွမ်းၵႃႈၼင်ႇဢၼ် ထႃႇဝရႃႉၽြႃးဢဝ် မူဝ်းသေႇ သင်ႇလၢတ်ႈဝႆႉၼၼ်ႉဢေႃႈ။-

38ၼႂ်းၵူၼ်းၸိူဝ်ႉၶိူဝ်း ၵေႇရသုၼ်ႇ တင်းလၢႆၼၼ်ႉ၊ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇ ၸွမ်းလူၺ်ႈမဵဝ်းပီႈမဵဝ်းၼွင်ႉၶဝ်၊ မဵဝ်းပူႇမဵဝ်းပေႃႈၶဝ်လႄႈ၊-

39ဢသၢၵ်ႈလႆႈ သၢမ်သိပ်းၶိုၼ်ႈၵႂႃႇတေႃႇထိုင်ႁွတ်ႈႁႃႈသိပ်း၊ ၵႃႈဢၼ်ၶဝ်ႈၵႃႈၼႂ်းမုၵ်ႉၼႂ်းၸိူဝ်း ႁႂ်ႈလႆႈပွင်ႁဵတ်းဢမူႉမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈ၊-

40ဢၼ်ဝႃႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ် ၶဝ်ႈပႃးၼႂ်းၸရၢင်းၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်၊ မဵဝ်းပူႇမဵဝ်းပေႃႈၶဝ်ၼၼ်ႉၸမ်ႉ၊ မီးသွင်ႁဵင်ႁူၵ်းပၢၵ်ႇပၢႆသၢမ်သိပ်းဢေႃႈ။-

41ၶဝ်ၸိူဝ်းၼႆႉပဵၼ်ၵူၼ်းၸိူဝ်ႉၶိူဝ်း ၵေႇရသုၼ်ႇ ဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇ၊ ၵႃႈဢၼ်တၵ်းလႆႈပွင်လႆႈႁဵတ်းဢမူႉ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈလႄႈ၊ မူဝ်းသေႇ တင်း ဢႃႇရုၼ်ႇ ၼပ်ႉဢၢၼ်ႇၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉ ၼၼ်ႉဢေႃႈ။

42ၼႂ်းၵူၼ်းၸိူဝ်ႉၶိူဝ်း မေႇရႃႇရီႉ တင်းလၢႆၼၼ်ႉ၊ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်၊ မဵဝ်းပူႇမဵဝ်းပေႃႈၶဝ်လႄႈ၊-

43ဢသၢၵ်ႈလႆႈသၢမ်သိပ်းၶိုၼ်ႈၵႂႃႇတေႃႇထိုင်ႁွတ်ႈႁႃႈသိပ်း၊ ၵႃႈဢၼ်ၶဝ်ႈၵႃႈၼႂ်းမုၵ်ႉၼႂ်းၸိူဝ်း ႁႂ်ႈလႆႈပွင်ႁဵတ်းဢမူႉမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈ၊-

44ဢၼ်ဝႃႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၶဝ်ႈပႃးၼႂ်းၸရၢင်း ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်ၼၼ်ႉၸမ်ႉ၊ မီးသၢမ်ႁဵင်ပၢႆသွင်ပၢၵ်ႇဢေႃႈ။-

45ၶဝ်ၸိူဝ်းၼႆႉပဵၼ်ၵူၼ်းၸိူဝ်ႉၶိူဝ်း မေႇရႃႇရီႉ ဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇ ၸွမ်းလူၺ်ႈမဵဝ်းပီႈမဵဝ်းၼွင်ႉၶဝ် ဢၼ် မူဝ်းသေႇ တင်း ဢႃႇရုၼ်ႇ ၼပ်ႉဢၢၼ်ႇၸွမ်းၵႃႈၼင်ႇဢၼ်ထႃႇဝရႃႉၽြႃးဢဝ် မူဝ်းသေႇ သင်ႇလၢတ်ႈဝႆႉၼၼ်ႉဢေႃႈ။

46ၼင်ႇၼၼ်လႄႈ ၼႂ်းၵူၼ်းမဵဝ်း လေႇဝီႉ တင်းလၢႆၼၼ်ႉ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼပ်ႉဢၼ်ဢၢၼ်ႇ မူဝ်းသေႇ တင်း ဢႃႇရုၼ်ႇ ၼပ်ႉဢၢၼ်ႇၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်၊ မဵဝ်းပူႇမဵဝ်းပေႃႈၶဝ်၊-

47ဢၼ်ဢသၢၵ်ႈလႆႈ သၢမ်သိပ်းၶိုၼ်ႈၵႂႃႇတေႃႇထိုင်ႁွတ်ႈႁႃႈသိပ်း၊ ၵႃႈဢၼ်ၶဝ်ႁႂ်ႈလႆႈပွင်လႆႈႁဵတ်း၊ လႆႈႁၢပ်ႇလႆႈပႃးဢမူႉၸဝ်ႈ တီႈၸူႉတီႈတုမ်ပရဵၵ်ႈသၢတ်ႈ၊-

48ဢၼ်ဝႃႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၶဝ်ႈပႃးၼႂ်းၸရၢင်းၼၼ်ႉၸမ်ႉ၊ မီးပႅတ်ႇႁဵင်ႁႃႈပၢၵ်ႇပၢႆပႅတ်ႇသိပ်းဢေႃႈ။-

49မႅၼ်ႈၸွမ်းၼင်ႇဢမိင်ႉထႃႇဝရႃႉၽြႃးၼၼ်ႉ၊ ၶဝ်လႆႈၶၢမ်ႇတၢင်းဢၼ် မူဝ်းသေႇ ထွၵ်ႈလူၺ်ႈဢမူႉဢၼ်ၵူၼ်းတၵ်းလႆႈ ပွင်လႆႈႁဵတ်းႁင်းၽႂ်ႁင်းမၼ်း၊ ၶူဝ်းႁၢပ်ႇဢၼ်တၵ်းလႆႈႁၢပ်ႇႁင်းၽႂ်ႁင်းမၼ်းသေလႄႈ ၼပ်ႉဢၢၼ်ႇၼၼ်ႉဢေႃႈ။ ၼင်ႇၼၼ်လႄႈ ၶဝ်လႆႈၶၢမ်ႇတၢင်းဢၼ် မူဝ်းသေႇ ၼပ်ႉဢၢၼ်ႇၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမၼ်းၼၼ်ႉဢေႃႈ။