Numbers 8

Shan

← Chapter 7 Jump to: Chapter 9 →

1ထႃႇဝရႃႉၽြႃးမီးဢမိင်ႉတီႈ မူဝ်းသေႇ လႄႈဝႃႈၸမ်ႉ၊-

2သင်ႇလၢတ်ႈတီႈ ဢႃႇရုၼ်ႇ လႄႈဝႃႈ၊ မိူဝ်ႈဢၼ်မႂ်းတႆႈဝၢၼ်ႇတႆႈၽႆးၸိူဝ်းၼၼ်ႉၸိုင်၊ ဝၢၼ်ႇတႆႈၽႆးၸဵတ်းလုၵ်ႈၸိူဝ်းၼၼ်ႉ တၵ်းလႆႈလႅင်းထွင်ႇၵႂႃႇသိုဝ်ႈၽၢႆႇၼႃႈၶူင်ႇတီႈတႆႈၽႆးဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

3ဢႃႇရုၼ်ႇ ႁဵတ်းၸိူဝ်ႉၼင်ႇၼၼ်လႄႈ တႆႈဝၢၼ်ႇတႆႈၽႆးၸိူဝ်းၼၼ်ႉ ႁႂ်ႈလႅင်းထွင်ႇၵႂႃႇသိုဝ်ႈၽၢႆႇၼႃႈၶူင်ႇတီႈတႆႈၽႆးၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉတီႈ မူဝ်းသေႇ ၼၼ်ႉဢေႃႈ။-

4ၶူင်ႇတီႈတႆႈၽႆးၼၼ်ႉၸမ်ႉ၊ ဢဝ်ၶမ်းတွင်ႈႁဵတ်းဢေႃႈ။ ၸႃႉၸဵမ်တိၼ်မၼ်းတေႃႇထိုင်ႁွတ်ႈမွၵ်ႇမူဝ်မၼ်းၸိူဝ်းၼၼ်ႉလႄႈ ဢဝ်တွင်ႈႁဵတ်းပဵၼ်ၼိူဝ်ႉလဵဝ်ၵၼ်ဢေႃႈ။ မႅၼ်ႈၸွမ်းၵႃႈၼင်ႇပုင်ႇဢၼ်ထႃႇဝရႃႉၽြႃး ၼႄပျႃးတီႈ မူဝ်းသေႇ ၼၼ်ႉ၊ မၼ်းႁဵတ်းၶူင်ႇတီႈတႆႈၽႆးၼၼ်ႉၸွမ်းၸိူဝ်ႉၼင်ႇၼၼ်ဢေႃႈ။

5ထႃႇဝရႃႉၽြႃးမီးဢမိင်ႉတီႈ မူဝ်းသေႇ လႄႈဝႃႈ၊-

6ၼုၵ်ႈဢဝ်ၵူၼ်းမဵဝ်း လေႇဝီႉ ၸိူဝ်းၼၼ်ႉဢွၵ်ႇသေၵႃႈၼႂ်းၵူၼ်းမဵဝ်း ဢီႉသရေႇလႃႉ တင်းလၢႆလႄႈ ႁႂ်ႈၶဝ်မူတ်းသႂ်တႃႉ။-

7လွင်ႈတၢင်းဢၼ်တၵ်းလႆႈႁဵတ်းတီႈၶဝ်ႁႂ်ႈၶဝ်လႆႈမူတ်းသႂ်ၸမ်ႉ၊ မႂ်းတၵ်းလႆႈဢဝ်ၼမ်ႉမင်ႇၵလႃႇတၢင်းဢၼ်မူတ်းသႂ်ၼၼ်ႉ ၽႅတ်းသႂ်ႇၵႃႈၼိူဝ်ၶဝ်လႄႈ ႁႂ်ႈၶဝ်ႁဵတ်းတၢင်းဢၼ်ထႃၶူၼ်တင်းတူဝ်တင်းၶိင်း၊ တၢင်းဢၼ်သၵ်ႉၶူဝ်းသၵ်ႉလဵင်းလႄႈ ႁႂ်ႈတူဝ်ၸဝ်ႈၵဝ်ႇမူတ်းသႂ်ဢေႃႈ။-

8ၶဝ်တၵ်းလႆႈဢဝ်ဝူဝ်းပေႃႈဢၼ်ဢသၢၵ်ႈၼုမ်ႇ ဢိၵ်ႇတင်းတၢင်းပုၵ်ႈၸေႃႇၽေႃးၸဵၼ်ႇဢၼ်ဝႃႈ ၽွင်ၶဝ်ႈမုၼ်းဢၼ်ဢဝ်ၼမ်ႉမၼ်းသႂ်ႇလေႃးၼၼ်ႉလႄႈ မႂ်းတၵ်းလႆႈဢဝ်ဝူဝ်းပေႃႈဢၼ်ဢသၢၵ်ႈၼုမ်ႇထႅင်ႈတူဝ်ၼိုင်ႈ ပုၼ်ႈယိတ်ႈဢၼ်ၽေႇဢပႅတ်ႈၼၼ်ႉသေလႄႈ၊-

9ႁွင်ႉဢဝ်ၵူၼ်းမဵဝ်း လေႇဝီႉ ၸိူဝ်းၼၼ်ႉ မႃးၵႃႈတီႈၽၢႆႇၼႃႈမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈလႄႈ ႁႂ်ႈပရဵၵ်ႈသၢတ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၸူႉၵၼ်တုမ်ၵၼ်သေယဝ်ႉ၊-

10ဢဝ်ၵူၼ်းမဵဝ်း လေႇဝီႉ ၸိူဝ်းၼၼ်ႉ မႃးၵႃႈတီႈၽၢႆႇၼႃႈထႃႇဝရႃႉၽြႃးလႄႈ၊ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်ဢဝ်မိုဝ်းတၢင်ႇသေလႄႈ၊-

11ဢႃႇရုၼ်ႇ တၵ်းလႆႈဢဝ်ၵူၼ်းမဵဝ်း လေႇဝီႉ ၸိူဝ်းၼၼ်ႉ သၢၵ်ႈၵၢပ်ႈတီႈထႃႇဝရႃႉၽြႃးပုၼ်ႈတၢင်းပုၵ်ႈၸေႃႇ ဢၼ်ယွင်ႈၵႂႆ တၢင်တူဝ်ၵူၼ်းမဵဝ်း ဢီႉသရေႇလႃႉ တင်းလၢႆ ပုၼ်ႈလွင်ႈၼင်ႇႁိုဝ်ၶဝ်တၵ်းပွင်ႁဵတ်းဢမူႉထႃႇဝရႃႉၽြႃးဢေႃႈ။-

12ၵူၼ်းမဵဝ်း လေႇဝီႉ ၸိူဝ်းၼၼ်ႉၵေႃႈ တၵ်းလႆႈဢွၼ်ၵၼ်ဢဝ်မိုဝ်းတူဝ်ၸဝ်ႈၵဝ်ႇ တၢင်ႇၵႃႈၼိူဝ်ႁူဝ်ဝူဝ်းၸိူဝ်းၼၼ်ႉလႄႈ၊ မႂ်းတၵ်းလႆႈဢဝ်ဝူဝ်းတူဝ်ၼိုင်ႈ ႁဵတ်းယိတ်ႈဢၼ်ၽေႇဢပႅတ်ႈ၊ ဢဝ်တူဝ်ၼိုင်ႈႁဵတ်းယိတ်ႈဢၼ်တုတ်ႇၽႆးလႄႈ ပုၵ်ႈၸေႃႇတီႈထႃႇဝရႃႉၽြႃး ႁႂ်ႈလႆႈႁဵတ်းတၢင်းဢၼ်ၽေႇဢပႅတ်ႈ ပုၼ်ႈၵူၼ်းမဵဝ်း လေႇဝီႉ ၸိူဝ်းၼၼ်ႉဢေႃႈ။-

13မႂ်းတၵ်းလႆႈဢဝ်ၵူၼ်းမဵဝ်း လေႇဝီႉ ၸိူဝ်းၼၼ်ႉ ဝႆႉၵႃႈတီႈၽၢႆႇၼႃႈ ဢႃႇရုၼ်ႇ ဢိၵ်ႇတင်းလုၵ်ႈၸၢႆးမၼ်းတင်းလၢႆလႄႈ ႁဵတ်းတၢင်းပုၵ်ႈၸေႃႇဢၼ်ယွင်ႈၵႂႆ တီႈထႃႇဝရႃႉၽြႃးဢေႃႈ။-

14ၼင်ႇၼၼ်လႄႈ မႂ်းတၵ်းလႆႈၽႄဢဝ်ၵူၼ်းမဵဝ်း လေႇဝီႉ ၸိူဝ်းၼၼ်ႉ ၵႃႈၼႂ်းၵူၼ်းမဵဝ်း ဢီႉသရေႇလႃႉ တင်းလၢႆဝႆႉ ႁင်းၽႂ်ႁင်းမၼ်းသေလႄႈ ၵူၼ်းမဵဝ်း လေႇဝီႉ ၸိူဝ်းၼၼ်ႉ တၵ်းလႆႈပဵၼ်ၵူၼ်းၵဝ်ဢေႃႈ။-

15လိုၼ်းၼၼ်ႉၸင်ႇ၊ ၵူၼ်းမဵဝ်း လေႇဝီႉ ၸိူဝ်းၼၼ်ႉ တၵ်းလႆႈၶဝ်ႈႁႂ်ႈလႆႈပွင်လႆႈႁဵတ်းဢမူႉမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈဢေႃႈ။ မႂ်းတၵ်းလႆႈႁႂ်ႈၶဝ်မူတ်းသႂ်လႄႈ ဢဝ်ၶဝ်ႁဵတ်းတၢင်းပုၵ်ႈၸေႃႇ ဢၼ်ယွင်ႈၵႂႆၼၼ်ႉဢေႃႈ။-

16ၶဝ်ၼၼ်ႉပဵၼ်ဢၼ်ၼုၵ်ႈဢွၵ်ႇသေၵႃႈၼႂ်းၵူၼ်းမဵဝ်း ဢီႉသရေႇလႃႉ တင်းလၢႆလႄႈ ပၼ်တီႈၵဝ်လုမ်းလုမ်းဢေႃႈ။ ၵဝ်သိမ်းဢဝ်ၶဝ် ပုၼ်ႈတၢင်တူဝ်လုၵ်ႈၸၢႆးတူၼ်ႈ ဢၼ်ၵိူတ်ႇလဵင်ႉဢွၼ်တၢင်း ၼႂ်းၵူၼ်းမဵဝ်း ဢီႉသရေႇလႃႉ တင်းလၢႆဢေႃႈ။-

17လွင်ႈမၼ်းၸမ်ႉ ၼႂ်းၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉ၊ ပဵၼ်ၵူၼ်းသေဢမ်ႇဝႃႈ၊ ပဵၼ်တရိၵ်ႈသၢၼ်ႇသေဢမ်ႇဝႃႈ၊ လုၵ်ႈၸၢႆးတူၼ်ႈတင်းသဵင်ႈတင်းလူင် ပဵၼ်ဢုၵ်ႉၸႃႇၵဝ်ဢေႃႈ။ ၼႂ်းဝၼ်းဢၼ်ၵဝ်ပၼ်တၢမ်ႇတီႈလုၵ်ႈၸၢႆးတူၼ်ႈတင်းလၢႆၵႃႈၼႂ်းမိူင်း ဢေႇၵိပ်ႉတူႉ ၼၼ်ႉ၊ ၵဝ်ႁႂ်ႈၶဝ်မူတ်းၸၢင်ႇပုၼ်ႈၵဝ်ဢေႃႈ။-

18ၵဝ်ဢဝ်ၵူၼ်းမဵဝ်း လေႇဝီႉ ၸိူဝ်းၼၼ်ႉ ပုၼ်ႈတၢင်တူဝ်လုၵ်ႈၸၢႆးတူၼ်ႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ဢေႃႈ။-

19ၵဝ်ဢဝ်ၵူၼ်းမဵဝ်း လေႇဝီႉ ၸိူဝ်းၼၼ်ႉ သေၵႃႈၼႂ်းၵူၼ်းမဵဝ်း ဢီႉသရေႇလႃႉ တင်းလၢႆဢၢပ်ႈပၼ်တီႈ ဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉပိူင်ႇ ႁႂ်ႈၶဝ်လႆႈပွင်လႆႈႁဵတ်းဢမူႉ ဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ တၵ်းလႆႈပွင်လႆႈႁဵတ်းၵႃႈတီႈမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ ဢိၵ်ႇတင်းႁႂ်ႈၶဝ်လႆႈႁဵတ်းတၢင်းဢၼ် ၽေႇဢပႅတ်ႈပုၼ်ႈၵူၼ်းမဵဝ်း ဢီႉသရေႇလႃႉ တင်းလၢႆ ႁႂ်ႈၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ လႆႈၵၢင်းလွတ်ႈတင်းၽေးတၢမ်ႇ ၼႂ်းမိူဝ်ႈဢၼ်ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ သုတ်ႉၸပ်းသုတ်ႉၸူးၵႃႈတီႈထႃႇၼႃႉတီႈမူတ်းၸၢင်ႇၸဝ်ႈဢေႃႈ။-

20ၼင်ႇၼၼ်လႄႈ မူဝ်းသေႇ တင်း ဢႃႇရုၼ်ႇ ဢိၵ်ႇတင်းပရဵၵ်ႈသၢတ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ႁဵတ်းတီႈၵူၼ်းမဵဝ်း လေႇဝီႉ ၸိူဝ်းၼၼ်ႉဢေႃႈ။ မႅၼ်ႈၸွမ်းၵႃႈၼင်ႇဢၼ်ထႃႇဝရႃႉၽြႃး သင်ႇလၢတ်ႈဝႆႉတီႈ မူဝ်းသေႇ လူၺ်ႈလွင်ႈဢမူႉၵူၼ်းမဵဝ်း လေႇဝီႉ ၸိူဝ်းၼၼ်ႉၼၼ်ႉ၊ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်ႁဵတ်းတီႈၶဝ်ၸိူဝ်ႉၼင်ႇၼၼ်ဢေႃႈ။-

21ၵူၼ်းမဵဝ်း လေႇဝီႉ ၸိူဝ်းၼၼ်ႉ ႁဵတ်းႁႂ်ႈတူဝ်ၸဝ်ႈၵဝ်ႇမူတ်းသႂ်လႄႈ သၵ်ႉလွႆးၶူဝ်းၼုင်ႈၶဝ်ဢေႃႈ။ ဢႃႇရုၼ်ႇ ၵေႃႈ ဢဝ်ၶဝ်သၢၵ်ႈၵၢပ်ႈတီႈထႃႇဝရႃႉၽြႃး ပုၼ်ႈတၢင်းပုၵ်ႈၸေႃႇဢၼ်ယွင်ႈၵႂႆသေလႄႈ ႁဵတ်းတၢင်းဢၼ်ၽေႇဢပႅတ်ႈပုၼ်ႈၶဝ်လႄႈ ႁႂ်ႈၶဝ်မူတ်းသႂ်ဢေႃႈ။-

22လိုၼ်းၼၼ်ႉၸင်ႇ၊ ၵူၼ်းမဵဝ်း လေႇဝီႉ ၸိူဝ်းၼၼ်ႉ ၶဝ်ႈၵႃႈၼႂ်းႁႂ်ႈလႆႈပွင်လႆႈႁဵတ်းဢမူႉ ၵႃႈၼႂ်းမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ ၵႃႈတီႈၽၢႆႇၼႃႈ ဢႃႇရုၼ်ႇ ၊ဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉဢေႃႈ။ မႅၼ်ႈၵႃႈၼင်ႇဢၼ်ထႃႇဝရႃႉၽြႃး သင်ႇလၢတ်ႈဝႆႉတီႈ မူဝ်းသေႇ လူၺ်ႈလွင်ႈ ၵူၼ်းမဵဝ်း လေႇဝီႉ ၸိူဝ်းၼၼ်ႉ၊ ၶဝ်ႁဵတ်းတီႈၶဝ်ၸိူဝ်ႉၼင်ႇၼၼ်ဢေႃႈ။

23ထႃႇဝရႃႉၽြႃး သမ်ႉမီးဢမိင်ႉတီႈ မူဝ်းသေႇ လႄႈဝႃႈ၊-

24လွင်ႈတၢင်းဢၼ်ၸၢပ်ႈသႅင်ႇၵၼ်တင်းၵူၼ်းမဵဝ်း လေႇဝီႉ ၸိူဝ်းၼၼ်ႉၸမ်ႉ၊ ၶဝ်ၸိူဝ်းဢၼ်ဢသၢၵ်ႈလႆႈသၢဝ်းႁႃႈလႄႈ ဢသၢၵ်ႈလိူဝ်သၢဝ်းႁႃႈၵႂႃႇၼၼ်ႉ တၵ်းလႆႈၶဝ်ႈၼႂ်းမုၵ်ႉၼႂ်းၸိူဝ်း ႁႂ်ႈလႆႈပွင်လႆႈႁဵတ်းဢမူႉၼႂ်းမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ ဢေႃႈ။-

25ၶဝ်ၸိူဝ်းဢၼ်ဢသၢၵ်ႈလိူဝ်ႁႃႈသိပ်းၵႂႃႇၼၼ်ႉ တၵ်းလႆႈလွတ်ႈတင်းမုၵ်ႉတင်းၸိူဝ်း ႁႂ်ႈလႆႈပွင်လႆႈႁဵတ်းဢမူႉၼၼ်ႉလႄႈ၊ ၵမ်းလိုၼ်းဢမ်ႇလႆႈပွင်လႆႈႁဵတ်းဢမူႉ။-

26ၶဝ်တၵ်းလႆႈၸွႆႈထႅမ်လူၺ်ႈၵၼ်တင်း ပီႈၼွင်ႉၶဝ်ၵႃႈၼႂ်းမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈလႄႈ၊ ယင်းဢမ်ႇလႆႈပွင်လႆႈႁဵတ်းဢမူႉထႅင်ႈလႄႈ တၵ်းလႆႈလူတူၺ်းလုမ်းလႃးယူႇဢေႃႈ။ ၼင်ႇၼၼ်လႄႈ မႂ်းတၵ်းလႆႈၸီႇယၢင်ႇတီႈၵူၼ်းမဵဝ်း လေႇဝီႉ ၸိူဝ်းၼၼ်ႉ လူၺ်ႈလွင်ႈဢမူႉဢၼ်ၶဝ်တၵ်းလႆႈပႂ်ႉၼၼ်ႉဢေႃႈ၊ ဝႃႈၼင်ႇၼႆဢေႃႈ။

← Chapter 7 Jump to: Chapter 9 →