Numbers 27

Shan

← Chapter 26 Jump to: Chapter 28 →

1မိူဝ်ႈၼၼ်ႉ လုၵ်ႈယိင်း ၸလေႃးၽတ်ႉ ဢၼ်ပဵၼ်လုၵ်ႈၸၢႆး ၽေႇရႃႉ ၊ ဢၼ်ပဵၼ်လုၵ်ႈၸၢႆး ၵီႉလတ်ႉ ၊ ဢၼ်ပဵၼ်လုၵ်ႈၸၢႆး မႃႇၶီႉရႃႉ ဢၼ်ပဵၼ်လုၵ်ႈၸၢႆး မၼႃႇသေႇ လႄႈ ၶဝ်ႈပႃးၼႂ်းပီႈၼွင်ႉၸိူဝ်ႉၶိူဝ်း မၼႃႇသေႇ လုၵ်ႈၸၢႆး ယူဝ်းသႅပ်ႈ ၼၼ်ႉ ၸိူဝ်းၼၼ်ႉဢွၼ်ၵၼ်မႃးဢေႃႈ။ ၸိုဝ်ႈသဵင်လုၵ်ႈယိင်းၸိူဝ်းၼၼ်ႉၸမ်ႉ၊ ပဵၼ် မႃႇလႃႇ၊ ၼေႃႇဢႃႇ၊ ႁေႃႇၵလႃႇ၊ မီႉၵလႃႇ၊ တီႉရၸႃႉ ဢေႃႈ။-

2ၶဝ်ဢွၼ်ၵၼ်ၸုၵ်းယူႇၵႃႈတီႈၽၢႆႇၼႃႈ မူဝ်းသေႇ တင်းယိတ်ႈပရေႃးႁဵၵ်ႈ ဢေးလႃႇၸႃႇ တင်းၶုၼ်တင်းလၢႆ ဢိၵ်ႇတင်းပရဵၵ်ႈသၢတ်ႈတင်းသဵင်ႈတင်းလူင် ၵႃႈတီႈႁိမ်းၽၵ်းတူ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈသေယဝ်ႉ။-

3လဝ်ႊလၢတ်ႈလႄႈဝႃႈ၊ ပေႃႈႁဝ်းၶႃႈတၢႆၵႃႈၼႂ်းထိူၼ်ႇၶႃႈဢေႃႈ။ မၼ်းဢမ်ႇၶဝ်ႈပႃးၼႂ်းမုၵ်ႉၼႂ်းၸိူဝ်း ၶဝ်ၸိူဝ်းဢၼ်ၸူႉၵၼ်တုမ်ၵၼ်ယူႇၽၢႆႇၼိုင်ႈတင်းထႃႇဝရႃႉၽြႃး ဢၼ်ဝႃႈမုၵ်ႉၸိူဝ်း ၵေႃးရႃႉ ၼၼ်ႉၶႃႈ၊ မၼ်းတၢႆၵွပ်ႈပိူဝ်ႈဢပႅတ်ႈမၼ်းၶႃႈဢေႃႈ။ မၼ်းဢမ်ႇမီးလုၵ်ႈၸၢႆးၶႃႈ။-

4ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸိုဝ်ႈသဵင်ပေႃႈႁဝ်းၶႃႈၼၼ်ႉ တၵ်းလႆႈႁၢႆသေၵႃႈတီႈပီႈၼွင်ႉၸိူဝ်ႉၶိူဝ်းႁဝ်းၶႃႈ၊ ၵွပ်ႈပိူဝ်ႈဢၼ်မၼ်းဢမ်ႇမီးလုၵ်ႈၸၢႆးၼၼ်ႉ ၼင်ႇႁိုဝ်ၶႃႈ၊ ပၼ်ဢမူၺ်ႇတီႈႁဝ်းၶႃႈ လူၺ်ႈၵၼ်တင်းပီႈၸၢႆးၼွင်ႉၸၢႆးပေႃႈႁဝ်းၶႃႈတင်းလၢႆၼၼ်ႉသေၵမ်းၶႃႈ၊ ဝႃႈၼင်ႇၼႆဢေႃႈ။-

5ဢမူႉၶဝ်ၼၼ်ႉၸိုင်၊ မူဝ်းသေႇ ဢဝ်ဝႆႉၵႃႈတီႈၽၢႆႇၼႃႈ ထႃႇဝရႃႉၽြႃးဢေႃႈ။

6ထႃႇဝရႃႉၽြႃးမီးဢမိင်ႉတီႈ မူဝ်းသေႇ လႄႈဝႃႈ၊-

7လုၵ်ႈယိင်း ၸလေႃးၽတ်ႉ ၸိူဝ်းၼၼ်ႉ လၢတ်ႈသေႇၶျႃႇထုၵ်ႇလီဢေႃႈ။ မႂ်းတၵ်းလႆႈပၼ်ဢၶႂၢင်ႉ ဢၼ်လႆႈၶၢမ်ႇဢမူၺ်ႇလူၺ်ႈၵၼ်တင်းပီႈၸၢႆးၼွင်ႉၸၢႆးပေႃႈၶဝ်ၸိူဝ်းၼၼ်ႉ တီႈၶဝ်ဢမၢၼ်ႇၶၼ်ပဵၼ်ဢေႃႈ။ မႂ်းတၵ်းလႆႈႁႂ်ႈဢုၵ်ႉၸႃႇဢမူၺ်ႇပေႃႈၶဝ်ႁွတ်ႈထိုင်ၵႃႈၼႂ်းမိုဝ်းၶဝ်ဢေႃႈ။-

8မႂ်းတၵ်းလႆႈသင်ႇလၢတ်ႈတီႈၵူၼ်းမဵဝ်း ဢီႉသရေႇလႃႉ တင်းလၢႆလႄႈဝႃႈ၊ ပေႃးၵူၼ်းယင်းဢမ်ႇမီးလုၵ်ႈၸၢႆးလႄႈတၢႆၵႂႃႇၸိုင်၊ သူတၵ်းလႆႈႁႂ်ႈဢုၵ်ႉၸႃႇဢမူၺ်ႇမၼ်း ႁွတ်ႈထိုင်ၵႃႈၼႂ်းမိုဝ်းလုၵ်ႈယိင်းမၼ်းဢေႃႈ။-

9ပေႃးမၼ်းဢမ်ႇမီးလုၵ်ႈယိင်းၸိုင်၊ သူတၵ်းလႆႈဢဝ်ဢုၵ်ႉၸႃႇဢမူၺ်ႇမၼ်း ပၼ်တီႈပီႈၸၢႆးၼွင်ႉၸၢႆးမၼ်းဢေႃႈ။-

10ပေႃးမၼ်းဢမ်ႇမီးပီႈၸၢႆးၼွင်ႉၸၢႆးၸိုင်၊ သူတၵ်းလႆႈဢဝ်ဢုၵ်ႉၸႃႇဢမူၺ်ႇမၼ်း ပၼ်တီႈပီႈၸၢႆးၼွင်ႉၸၢႆးပေႃႈမၼ်းဢေႃႈ၊-

11ပေႃးပေႃႈမၼ်းဢမ်ႇမီးပီႈၸၢႆးၼွင်ႉၸၢႆးၸိုင်၊ သူတၵ်းလႆႈဢဝ်ဢုၵ်ႉၸႃႇဢမူၺ်ႇမၼ်း ပၼ်တီႈပီႈၼွင်ႉဢွၵ်ႇဢၼ်ၸၢပ်ႈၸမ်ၸိူဝ်ႉၶိူဝ်းမၼ်းလႄႈ ၵေႃႉၼၼ်ႉတၵ်းလႆႈဢုပ်ႉပိူင်ႇဢေႃႈ။ ဢၼ်ၼႆႉၸမ်ႉ၊ ၵႃႈၼင်ႇဢၼ်ထႃႇဝရႃႉၽြႃး သင်ႇလၢတ်ႈဝႆႉတီႈ မူဝ်းသေႇ ၼၼ်ႉ၊ တၵ်းလႆႈပဵၼ်ထုင်းၽိင်ႈတြႃး ဢၼ်ၸီႇယၢင်ႇဝႆႉၼၼ်ႉ တီႈၵူၼ်းမဵဝ်း ဢီႉသရေႇလႃႉ တင်းလၢႆဢေႃႈ၊ ဝႃႈၼင်ႇၼႆဢေႃႈ။

12ထႃႇဝရႃႉၽြႃးသမ်ႉမီးဢမိင်ႉတီႈ မူဝ်းသေႇ လႄႈဝႃႈ၊ မႂ်းၶိုၼ်ႈၵႃႈတီႈၼိူဝ်လွႆ ဢပႃႇရိမ်ႇ ၼႆႉတႃႉ။ လူတူၺ်းမိူင်းဢၼ်ၵဝ်ပၼ် တီႈၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉတႃႉ။-

13မႂ်းႁၼ်သေယဝ်ႉ၊ မႂ်းတၵ်းလႆႈႁွတ်ႈထိုင်ၵႃႈတီႈၵူၼ်းမဵဝ်းမႂ်းၸူႉတုမ်ၼၼ်ႉ မိူၼ်ၸိူဝ်ႉၼင်ႇဢၼ်ပီႈၸၢႆးမႂ်း ဢႃႇရုၼ်ႇ လႆႈႁွတ်ႈထိုင်ယဝ်ႉၼၼ်ႉဢေႃႈ။-

14လွင်ႈမၼ်းၸမ်ႉ သူလႆႈႁဵတ်းၶတ်းၵၼ်တင်းၵႂၢမ်းၵဝ်ၵႃႈတီႈထိူၼ်ႇ ၸီႉၼႃႉ ၼႂ်းမိူဝ်ႈဢၼ်ပရဵၵ်ႈသၢတ်ႈတင်းလၢႆ ႁဵတ်းဢူၼ်ဢဵၼ်ႁူၼ်ႈမေႃးၼၼ်ႉလႄႈ ဢမ်ႇႁဵတ်းႁႂ်ႈတၢင်းဢၼ်ၵဝ်မူတ်းၸၢင်ႇၼၼ်ႉ ထၢင်ႇသႃးသိုဝ်ႈၼႃႈတႂ်ႈတႃၶဝ် ၵႃႈတီႈၼမ်ႉၼၼ်ႉမႃးယဝ်ႉ၊ ၼမ်ႉၼၼ်ႉၸိုင် ပဵၼ်ၼမ်ႉဢွၵ်ႇႁူး မေႇရီႇၽႃႉ တီႈ ၵႃႇတေႇသႃႉ ၼႂ်းထိူၼ်ႇ ၸီႉၼႃႉ ၼၼ်ႉဢေႃႈ၊ ဝႃႈၼင်ႇၼႆဢေႃႈ။

15မူဝ်းသေႇ ၵေႃႈ လဝ်ႊလၢတ်ႈတီႈထႃႇဝရႃႉၽြႃးလႄႈဝႃႈ၊-

16ၶႅၼ်းတေႃႈႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈ ဢၼ်ဢုပ်ႉပိူင်ႇဢသၢၵ်ႈဝီႉၺိၺ်ႇသတ်ႉတဝႃႇတင်းလၢႆ၊-

17ၶၢၼ်းၵေႃႉဢၼ်ၶဝ်ႈဢွၵ်ႇၵႃႈတီႈၽၢႆႇၼႃႈၶဝ်လႆႈ ၵေႃႉဢၼ်ၼုၵ်ႈဢဝ်ၶဝ်ဢွၵ်ႇ ဢဝ်ၶဝ်သႂၢင်းၶဝ်ႈလႆႈၼၼ်ႉ သေၵေႃႉသေၵူၼ်းဝႆႉၵႃႈၼိူဝ်ပရဵၵ်ႈသၢတ်ႈတင်းလၢႆ ႁႂ်ႈပရဵၵ်ႈသၢတ်ႈထႃႇဝရႃႉၽြႃး ဢမ်ႇလႆႈပဵၼ်ၸိူဝ်ႉၼင်ႇသူဝ်း ဢၼ်ဢမ်ႇမီးၵေႃႉဢၼ်ပႂ်ႉဢၼ်ထိင်းၼၼ်ႉသေၵမ်းလူၺ်ႈတီႈၶႃႈ၊ ဝႃႈၼင်ႇၼႆဢေႃႈ။

18ထႃႇဝရႃႉၽြႃးမီးဢမိင်ႉတီႈ မူဝ်းသေႇ လႄႈဝႃႈ၊ ႁွင်ႉဢဝ် ယေႃးသူႉ လုၵ်ႈၸၢႆး ၼုၼ်ႇ ဢၼ်လႆႈဝီႉၺိၺ်ႇၸဝ်ႈၼၼ်ႉလႄႈ ဢဝ်မိုဝ်းမႂ်းတၢင်ႇၵႃႈၼိူဝ်မၼ်းတႃႉ။-

19ဢဝ်မၼ်းဝႆႉၵႃႈတီႈၽၢႆႇၼႃႈ ယိတ်ႈပရေႃးႁဵၵ်ႈ ဢေးလႃႇၸႃႇ ဢိၵ်ႇတင်းပရဵၵ်ႈသၢတ်ႈ တင်းသဵင်ႈတင်းလူင်လႄႈ သင်ႇလၢတ်ႈဝႆႉတီႈမၼ်း ၵႃႈတီႈသိုဝ်ႈၼႃႈတႂ်ႈတႃၶဝ်တႃႉ။-

20ဢဝ်မုၼ်ၽုင်းမႂ်းၵမ်ႈၽွင်ႈ တၢင်ႇသႂ်ႇပၼ်ၵႃႈၼိူဝ်မၼ်း ႁႂ်ႈပရဵၵ်ႈသၢတ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ထွမ်ႇဢဝ်ၵႂၢမ်းမၼ်းတႃႉ။-

21မၼ်းၼၼ်ႉ တၵ်းလႆႈၸုၵ်းယူႇၵႃႈတီႈၽၢႆႇၼႃႈ ယိတ်ႈပရေႃးႁဵၵ်ႈ ဢေးလႃႇၸႃႇ လႄႈ၊ ယိတ်ႈပရေႃးႁဵၵ်ႈၼၼ်ႉ တၵ်းလႆႈၸွမ်းၼင်ႇ တြႃးဢၼ် ဢူႉရိမ်း ၸီႇယၢင်ႇႁဵတ်းထုင်းဝႆႉ ၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉသေလႄႈ တွင်ႈထၢမ်ပုၼ်ႈမၼ်းဢေႃႈ။ ၵႃႈၼင်ႇဢၼ် မၼ်းၸီႇယၢင်ႇၼၼ်ႉ၊ ၸႃႉၸဵမ်မၼ်းလႄႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢၼ်ဝႃႈ ပရဵၵ်ႈသၢတ်ႈတင်းသဵင်ႈတင်းလူင် တၵ်းလႆႈဢွၼ်ၵၼ်ၸွမ်းလူၺ်ႈၵႂၢမ်းမၼ်းသေလႄႈဢွၵ်ႇ၊ တၵ်းလႆႈဢွၼ်ၵၼ်ၸွမ်းလူၺ်ႈၵႂၢမ်းမၼ်းသေလႄႈၶဝ်ႈဢေႃႈ၊ ဝႃႈၼင်ႇၼႆသေယဝ်ႉ၊ မူဝ်းသေႇ ႁဵတ်းၵႃႈၼင်ႇဢၼ် ထႃႇဝရႃႉၽြႃးဝႃႈၼၼ်ႉလႄႈ၊-

22ႁွင်ႉဢဝ် ယေႃးသူႉ ဝႆႉ ၵႃႈတီႈၽၢႆႇၼႃႈယိတ်ႈပရေႃးႁဵၵ်ႈ ဢေးလႃႇၸႃႇ ဢိၵ်ႇတင်းၵႃႈတီႈၽၢႆႇၼႃႈ ပရဵၵ်ႈသၢတ်ႈတင်းသဵင်ႈတင်းလူင်သေလႄႈ၊-

23ဢဝ်မိုဝ်းတၢင်ႇၵႃႈၼိူဝ်မၼ်းလႄႈ သင်ႇလၢတ်ႈဝႆႉတီႈမၼ်း ၵႃႈၼင်ႇဢၼ်ထႃႇဝရႃႉၽြႃး ဢဝ်တင်း မူဝ်းသေႇ ပိင်းၺၢပ်ႈဝႆႉၼၼ်ႉဢေႃႈ။

← Chapter 26 Jump to: Chapter 28 →