Numbers 3 — Shan

1ဢထုၵ်ႉပတ်ႈတီႉၸိူဝ်ႉၶိူဝ်း ဢႃႇရုၼ်ႇ တင်း မူဝ်းသေႇ ၼႂ်းမိုဝ်ႉဝၼ်းဢၼ်ထႃႇဝရႃႉၽြႃးပၼ်ပျႃႇတိၵ်ႈတီႈ မူဝ်းသေႇ ၼိူဝ်လွႆ သီႉၼႃႉ ၼၼ်ႉၸမ်ႉ၊-

2လုၵ်ႈၸၢႆး ဢႃႇရုၼ်ႇ ၼၼ်ႉ ပဵၼ် ၼႃႇတပ်ႉ ဢၼ်ပဵၼ်လုၵ်ႈတူၼ်ႈ၊ ဢၽီႉႁူႉ၊ ဢေးလႃႇၸႃႇ၊ ဢီႉသမႃႇ ဢေႃႈ။-

3ဢၼ်ၼႆႉၸမ်ႉ၊ ပဵၼ်ၸိုဝ်ႈသဵင်လုၵ်ႈၸၢႆး ဢႃႇရုၼ်ႇ ဢၼ်လႆႈၶၢမ်ႇၽိၵ်ႈသိၵ်ႈလႄႈ မၼ်းၶၢၼ်းဝႆႉၼႂ်းဢရႃႇယိတ်ႈပရေႃးႁဵၵ်ႈ ႁႂ်ႈၶဝ်လႆႈပွင်ႁဵတ်းဢမူႉယိတ်ႈပရေႃးႁဵၵ်ႈၼၼ်ႉဢေႃႈ။-

4ၼႃႇတပ်ႉ တင်း ဢၽီႉႁူႉ ၼၼ်ႉ၊ မိူဝ်ႈဢၼ်ပုၵ်ႈၸေႃႇၽႆးတၢင်ႇမဵဝ်း ဢၼ်ဢမ်ႇၸၢပ်ႈဢမ်ႇသႅင်ႇၼၼ်ႉ ၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉၸိုင်၊ တၢႆၵႃႈတီႈၽၢႆႇၼႃႈထႃႇဝရႃႉၽြႃး ၵႃႈၼႂ်းထိူၼ်ႇ သီႉၼႃႉ ဢေႃႈ။ ၵႃႈတီႈသွင်ၶႃဢမ်ႇမီးလုၵ်ႈမီးလၢင်းလႄႈ၊ ဢေးလႃႇၸႃႇ တင်း ဢီႉသမႃႇ ပွင်ႁဵတ်းဢမူႉယိတ်ႈပရေႃးႁဵၵ်ႈၵႃႈတီႈၽၢႆႇၼႃႈပေႃႈၶဝ် ဢႃႇရုၼ်ႇ ဢေႃႈ။

5ထႃႇဝရႃႉၽြႃးမီးဢမိင်ႉတီႈ မူဝ်းသေႇ လႄႈဝႃႈ၊-

6မႂ်းႁွင်ႉဢဝ်ၵူၼ်းမဵဝ်း လေႇဝီႉ တင်းလၢႆမႃးသေလႄႈ ၶျႃးတီႈယူႇၶဝ်ပၼ်ၵႃႈတီႈႁိမ်း ဢႃႇရုၼ်ႇ ႁႂ်ႈၶဝ်လႆႈပွင်ႁဵတ်းဢမူႉ ယိတ်ႈပရေႃးႁဵၵ်ႈမၼ်းၼၼ်ႉတႃႉ။-

7ၶဝ်ၼၼ်ႉတၵ်းလႆႈပႂ်ႉဢမူႉမၼ်း ဢိၵ်ႇတင်းဢမူႉပရဵၵ်ႈသၢတ်ႈတင်းသဵင်ႈတင်းလူင် ၵႃႈတီႈၽၢႆႇၼႃႈမူဝ်းၵႃႇၸဝ်ႈ ႁႂ်ႈလႆႈၵိုတ်ႉႁၢပ်ႇဢမူႉသုမ်ႉထဵင်ၸဝ်ႈဢေႃႈ။-

8ၶဝ်တၵ်းလႆႈပွင်ႁဵတ်းဢမူႉ ဢၼ်လူတူၺ်းလုမ်းလႃးၶိူင်ႈပိူင်ႈ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ ဢိၵ်ႇတင်းဢမူႉၵူၼ်းမဵဝ်း ဢီႉသရေႇလႃႉ တင်းလၢႆ ႁႂ်ႈလႆႈၵိုတ်ႉႁၢပ်ႇဢမူႉသုမ်ႉထဵင်ၸဝ်ႈဢေႃႈ။-

9မႂ်းတၵ်းလႆႈဢဝ်ၵူၼ်းမဵဝ်း လေႇဝီႉ တင်းလၢႆဢၢပ်ႈပၼ်တီႈ ဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉဢေႃႈ။ ၶဝ်ၼၼ်ႉပဵၼ်ဢၼ်ၼုၵ်ႈဢွၵ်ႇသေၵႃႈၼႂ်း ၵူၼ်းမဵဝ်း ဢီႉသရေႇလႃႉ တင်းလၢႆလႄႈ ပၼ်တီႈမၼ်းလုမ်းလုမ်းဢေႃႈ။-

10ဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉၵေႃႈ မႂ်းတၵ်းလႆႈၶၢၼ်းဝႆႉလႄႈ ၶဝ်ၼၼ်ႉတၵ်းလႆႈပႂ်ႉဢမူႉယိတ်ႈပရေႃးႁဵၵ်ႈယူႇ ဢေႃႈ။ ၵေႃႉဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းလႄႈ သုတ်ႉၸပ်းသုတ်ႉၸူးၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ၊ ဝႃႈၼင်ႇၼႆဢေႃႈ။-

11ထႃႇဝရႃႉၽြႃးမီးဢမိင်ႉတီႈ မူဝ်းသေႇ လႄႈဝႃႈ၊-

12ၵွပ်ႈပိူဝ်ႈဢၼ်ၵဝ် ၼုၵ်ႈဢဝ်ၵူၼ်းမဵဝ်း လေႇဝီႉ ၸိူဝ်းၼၼ်ႉ ဢွၵ်ႇသေၵႃႈၼႂ်းၵူၼ်းမဵဝ်း ဢီႉသရေႇလႃႉ တင်းလၢႆပုၼ်ႈတၢင်တူဝ်လုၵ်ႈတူၼ်ႈ ဢၼ်ၵိူတ်ႇလဵင်ႉမႃးဢွၼ်တၢင်း ၵႃႈတီႈၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉလႄႈ ၵူၼ်းမဵဝ်း လေႇဝီႉ ၸိူဝ်းၼၼ်ႉ ပဵၼ်ၵူၼ်းၵဝ်ဢေႃႈ။-

13လွင်ႈမၼ်းၸမ်ႉ လုၵ်ႈၸၢႆးတူၼ်ႈတင်းလၢႆပဵၼ်ၵူၼ်းၵဝ်ဢေႃႈ။ မိုဝ်ႉဝၼ်းဢၼ်ၵဝ်ပၼ်တၢမ်ႇတီႈလုၵ်ႈၸၢႆးတူၼ်ႈၵႃႈမီး ၵႃႈၼႂ်းမိူင်း ဢေႇၵိပ်ႉတူႉ ၼၼ်ႉၸိုင်၊ ၵႃႈၼႂ်းၵူၼ်းမဵဝ်း ဢီႉသရေႇလႃႉ တင်းလၢႆ ပဵၼ်ၵူၼ်းၸၢႆးသေဢမ်ႇဝႃႈ၊ ပဵၼ်တရိၵ်ႈသၢၼ်ႇသေဢမ်ႇဝႃႈ၊ ၵဝ်ႁႂ်ႈလုၵ်ႈၸၢႆးတူၼ်ႈတင်းသဵင်ႈတင်းလူင် မူတ်းၸၢင်ႇဝႆႉပုၼ်ႈၵဝ်ဢေႃႈ။ ၶဝ်ၼၼ်ႉပဵၼ်ဢုၵ်ႉၸႃႇၵဝ်ဢေႃႈ။ ၵဝ်ပဵၼ်ထႃႇဝရႃႉၽြႃးဢေႃႈ၊ ဝႃႈၼင်ႇၼႆဢေႃႈ။

14ထႃႇဝရႃႉၽြႃးသမ်ႉမီးဢမိင်ႉတီႈ မူဝ်းသေႇ ၵႃႈၼႂ်းထိူၼ်ႇ သီႉၼႃႉ လႄႈဝႃႈ၊-

15ၼပ်ႉဢၢၼ်ႇၵူၼ်းမဵဝ်း လေႇဝီႉ တင်းလၢႆ ၸွမ်းလူၺ်ႈမဵဝ်းပူႇမဵဝ်းပေႃႈၶဝ်၊ မဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်ၼၼ်ႉတႃႉ။ မႂ်းတၵ်းလႆႈ ၼပ်ႉဢၢၼ်ႇ ၵူၼ်းၸၢႆးၵႃႈဢၼ်ဢသၢၵ်ႈလႆႈလိူၼ်ၼိုင်ႈလႄႈ လိူၼ်လိူဝ်ၵႂႃႇၸိူဝ်းၼၼ်ႉဢေႃႈ၊ ဝႃႈၼင်ႇၼႆလႄႈ၊-

16မူဝ်းသေႇ ၸွမ်းၼင်ႇၵႂၢမ်းထႃႇဝရႃႉၽြႃးၼၼ်ႉသေလႄႈ ၼပ်ႉဢၢၼ်ႇၶဝ်ၵႃႈၼင်ႇဢၼ်မၼ်းၸဝ်ႈသင်ႇလၢတ်ႈဝႆႉၼၼ်ႉဢေႃႈ။-

17ၸိုဝ်ႈသဵင်လုၵ်ႈၸၢႆး လေႇဝီႉ ၼၼ်ႉၸိူဝ်းၼၼ်ႉၸမ်ႉ၊ ပဵၼ် ၵေႇရသုၼ်ႇ၊ ၵေႃႇႁတ်ႉ၊ မေႇရႃႇရီႉ ဢေႃႈ။-

18ၸိုဝ်ႈသဵင်လုၵ်ႈၸၢႆး ၵေႇရသုၼ်ႇ ဢၼ်ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်ၼၼ်ႉၸမ်ႉ၊ ပဵၼ် လီႉပၼီႉ တင်း သီႉမီႉ ဢေႃႈ။-

19ၸိုဝ်ႈသဵင်လုၵ်ႈၸၢႆး ၵေႃႇႁတ်ႉ ဢၼ်ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်ၼၼ်ႉၸမ်ႉ၊ ပဵၼ် ဢႃႇမရမ်ႇ၊ ဢီႉၸႁႃႇ၊ ႁေႇပြုၼ်ႇ၊ ဢေႃးၸေႇလႃႉ ဢေႃႈ။-

20ၸိုဝ်ႈသဵင်လုၵ်ႈၸၢႆး မေႇရႃႇရီႉ ဢၼ်ၸွမ်းလူၺ်ႈ မဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်ၼၼ်ႉၸမ်ႉ၊ ပဵၼ် မႁႃႇလီႉ တင်း မူႉသီႉ ဢေႃႈ။ ၶဝ်ၸိူဝ်းၼႆႉပဵၼ်မဵဝ်းပီႈမဵဝ်းၼွင်ႉၸိူဝ်ႉၶိူဝ်း လေႇဝီႉ ၸွမ်းလူၺ်ႈမဵဝ်းပူႇမဵဝ်းပေႃႈၶဝ်ဢေႃႈ။

21မဵဝ်းပီႈမဵဝ်းၼွင်ႉၸိူဝ်ႉၶိူဝ်း လီႉပၼီႉ တင်းမဵဝ်းပီႈမဵဝ်းၼွင်ႉၸိူဝ်ႉၶိူဝ်း သီႉမီႉ ဢၼ်သိုပ်ႇလူင်းမႃးၵႃႈတီႈ ၵေႇရသုၼ်ႇ ၸိူဝ်းၼၼ်ႉ ပဵၼ်မဵဝ်းပီႈမဵဝ်းၼွင်ႉၸိူဝ်ႉၶိူဝ်း ၵေႇရသုၼ်ႇ ဢေႃႈ။-

22ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၸွမ်းလူၺ်ႈတၢင်းဢၼ်ၼပ်ႉဢၢၼ်ႇၵူၼ်းၸၢႆး ဢၼ်ဢသၢၵ်ႈလႆႈလိူၼ်ၼိုင်ႈလႄႈ လိူၼ်လိူဝ်ၵႂႃႇၼၼ်ႉတင်းသဵင်ႈတင်းလူင် ဢၼ်ဝႃႈၵႃႈဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၸိူဝ်းၼၼ်ႉၸမ်ႉ၊ မီးၸဵတ်းႁဵင်ပၢႆႁႃႈပၢၵ်ႇဢေႃႈ။-

23မဵဝ်းပီႈမဵဝ်းၼွင်ႉၸိူဝ်ႉၶိူဝ်း ၵေႇရသုၼ်ႇ ၸိူဝ်းၼၼ်ႉ တၵ်းလႆႈၶျႃးတီႈယူႇၽၢႆႇတၢင်းလင်သုမ်ႉထဵင်ၸဝ်ႈၵႃႈတီႈၼႃႈဝၼ်းတူၵ်းဢေႃႈ။-

24ၵူၼ်းလူင်ဢၼ်ပဵၼ်ငဝ်ႈမဵဝ်းၸိူဝ်ႉၶိူဝ်း ၵေႇရသုၼ်ႇ ၼၼ်ႉၸမ်ႉ၊ ပဵၼ် ဢေးလျႃႇသပ်ႉ လုၵ်ႈၸၢႆး လေးလႃႉ ဢေႃႈ။-

25ပုၼ်ႈတႃႇဢၼ်ၵူၼ်းမဵဝ်း ၵေႇရသုၼ်ႇ တင်းလၢႆတၵ်းလႆႈလူတူၺ်းလုမ်းလႃး ၵႃႈတီႈသုမ်ႉထဵင်မူဝ်းၵႃႇၸဝ်ႈတီႈၸူႉတီႈတုမ် ပရဵၵ်ႈသၢတ်ႈၼၼ်ႉၸမ်ႉ၊ ပဵၼ်သုမ်ႉထဵင်ၸဝ်ႈဢိၵ်ႇတင်းမူဝ်းၵႃႇမၼ်း ဢၼ်ႁူမ်ႇသုမ်ႇမၼ်း၊ ၽႃႈၵင်ႈဢၼ်ၵင်ႈၵႃႈတီႈႁူးၽၵ်းတူမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ၊-

26ၽႃႈၵင်ႈႁူဝ်ႉဝၢင်း တင်းၽႃႈၵင်ႈဢၼ်ၵင်ႈၵႃႈတီႈႁူးၽၵ်းတူႁူဝ်ႉဝၢင်း ဢၼ်လဵပ်ႈႁွပ်ႈသုမ်ႉထဵင်ၸဝ်ႈ တင်းယိတ်ႈပလၢင်ႇၼၼ်ႉ တင်းၸိူၵ်ႈတင်းလၢႆ ပုၼ်ႈဢၼ်တၵ်းဢဝ်ပွင်ဢဝ်ႁဵတ်းဢမူႉမၼ်း ၵူႈၸိူဝ်ႉၵူႈပိူင်ဢေႃႈ။

27မဵဝ်းပီႈမဵဝ်းၼွင်ႉၸိူဝ်ႉၶိူဝ်း ဢႃႇမရမ်ႇ ဢိၵ်ႇတင်းမဵဝ်းပီႈမဵဝ်းၼွင်ႉၸိူဝ်ႉၶိူဝ်း ဢီႉၸႁႃႇ တင်းမဵဝ်းပီႈမဵဝ်းၼွင်ႉၸိူဝ်ႉၶိူဝ်း ႁေႇပြုၼ်ႇ ၊ တင်းမဵဝ်းပီႈမဵဝ်းၼွင်ႉၸိူဝ်ႉၶိူဝ်း ဢေႃးၸေလႃႉ ဢၼ်သိုပ်ႇလူင်းမႃးၵႃႈတီႈ ၵေႃႇႁတ်ႉ ၸိူဝ်းၼၼ်ႉ ပဵၼ်မဵဝ်းပီႈမဵဝ်းၼွင်ႉၸိူဝ်ႉၶိူဝ်း ၵေႃႇႁတ်ႉ ဢေႃႈ။

28ၸွမ်းလူၺ်ႈတၢင်းဢၼ်ၼပ်ႉဢၢၼ်ႇၵူၼ်းၸၢႆးဢၼ်ဢသၢၵ်ႈလႆႈလိူၼ်ၼိုင်ႈလႄႈ လိူၼ်လိူဝ်ၵႂႃႇတင်းသဵင်ႈတင်းလူင်ၼၼ်ႉသေလႄႈ ၶဝ်ၸိူဝ်းဢၼ်လႆႈလူတူၺ်းလုမ်းလႃးထႃႇၼႃႉတီႈမူတ်းၸၢင်ႇၸဝ်ႈၼၼ်ႉၸမ်ႉ၊ မီးပႅတ်ႇႁဵင်ပၢႆႁူၵ်းပၢၵ်ႇဢေႃႈ။-

29မဵဝ်းပီႈမဵဝ်းၼွင်ႉၸိူဝ်ႉၶိူဝ်း ၵေႃႇႁတ်ႉ ၸိူဝ်းၼၼ်ႉ တၵ်းလႆႈၶျႃးတီႈယူႇၶဝ် ၵႃႈတီႈၽၢႆႇၼႃႈတၢင်းၸၢၼ်းသုမ်ႉထဵင်ၸဝ်ႈဢေႃႈ။-

30ၵူၼ်းလူင်ဢၼ်ပဵၼ်ငဝ်ႈမဵဝ်းၸိူဝ်ႉၶိူဝ်း ၵေႃႇႁတ်ႉ ၸမ်ႉ၊ ပဵၼ် ဢေးလီႉၸပၢၼ်ႇ လုၵ်ႈၸၢႆး ဢေႃးၸေႇလႃႉ ဢေႃႈ။-

31ပုၼ်ႈတႃႇဢၼ်ၶဝ်တၵ်းလႆႈလူတူၺ်းလုမ်းလႃးၼၼ်ႉၸမ်ႉ၊ ပဵၼ်တိူၵ်ႈတႃႇၸဝ်ႈ၊ ၶူင်ႇတီႈၵိၼ်၊ ၶူင်ႇတီႈတႆႈၽႆး၊ ယိတ်ႈပလၢင်ႇတင်းလၢႆ၊ ၶိူင်ႈပိူင်ထႃႇၼႃႉတီႈမူတ်းၸၢင်ႇၸဝ်ႈ ပုၼ်ႈဢၼ်တၵ်းၵိုတ်ႉႁၢပ်ႇဢမူႉၼၼ်ႉၸိူဝ်းၼၼ်ႉ၊ ၽႃႈၵင်ႈတၢင်းၼႂ်း ၵႃႈဢၼ်ဢဝ်ပွင်ဢဝ်ႁဵတ်းဢမူႉၸိူဝ်းၼၼ်ႉဢေႃႈ။-

32ဢေးလႃႇၸႃႇ ဢၼ်ပဵၼ်လုၵ်ႈၸၢႆးယိတ်ႈပရေႃးႁဵၵ်ႈ ဢႃႇရုၼ်ႇ ၼၼ်ႉ တၵ်းလႆႈပဵၼ်ၵူၼ်းလူင်ဢၼ်ဢုပ်ႉၵႃႈၼိူဝ်ၵူၼ်းလူင် ဢၼ်ပဵၼ်ငဝ်ႈမဵဝ်းၸိူဝ်ႉၶိူဝ်း လေႇဝီႉ ၸိူဝ်းၼၼ်ႉလႄႈ လူတူၺ်းၸီႇယၢင်ႇၶဝ်ၸိူဝ်းဢၼ် လူတူၺ်းလုမ်းလႃးထႃႇၼႃႉတီႈမူတ်းၸၢင်ႇၸဝ်ႈဢေႃႈ။

33မဵဝ်းပီႈမဵဝ်းၼွင်ႉၸိူဝ်ႉၶိူဝ်း မႁႃႇလီႉ တင်းမဵဝ်းပီႈမဵဝ်းၼွင်ႉၸိူဝ်ႉၶိူဝ်း မူႉသီႉ ဢၼ်သိုပ်ႇလူင်းမႃးၵႃႈတီႈ မေႇရႃႇရီႉ ၸိူဝ်းၼၼ်ႉ ပဵၼ်မဵဝ်းပီႈမဵဝ်းၼွင်ႉၸိူဝ်ႉၶိူဝ်း မေႇရႃႇရီႉ ဢေႃႈ။-

34ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၸွမ်းလူၺ်ႈတၢင်းဢၼ်ၼပ်ႉဢၢၼ်ႇၵူၼ်းၸၢႆးဢၼ် ဢသၢၵ်ႈလႆႈလိူၼ်ၼိုင်ႈလႄႈ လိူၼ်လိူဝ်ၵႂႃႇၼၼ်ႉတင်းသဵင်ႈတင်းလူင်ၸမ်ႉ၊ မီးႁူၵ်းႁဵင်ပၢႆသွင်ပၢၵ်ႇဢေႃႈ။-

35ၵူၼ်းလူင်ဢၼ်ပဵၼ်ငဝ်ႈမဵဝ်းၸိူဝ်ႉၶိူဝ်း မေႇရႃႇရီႉ ၼၼ်ႉၸမ်ႉ၊ ပဵၼ် ၸူႉရေးလႃႉ လုၵ်ႈၸၢႆး ဢၽီႉႁေးလႃႉ ဢေႃႈ။ ၶဝ်ၸိူဝ်းၼႆႉ တၵ်းလႆႈၶျႃးတီႈယူႇၶဝ်ၵႃႈတီႈၽၢႆႇၼႃႈတၢင်းႁွင်ႇသုမ်ႉထဵင်ၸဝ်ႈဢေႃႈ။-

36ပုၼ်ႈတႃႇဢၼ်ၵူၼ်း မေႇရႃႇရီႉ ၸိူဝ်းၼၼ်ႉ တၵ်းလႆႈပႂ်ႉလူပႂ်ႉတူၺ်းလုမ်းလႃးၼၼ်ႉၸမ်ႉ၊ ပဵၼ်ပႅၼ်ႈသုမ်ႉထဵင်ၸဝ်ႈလႂ်၊ သႄႈမၼ်းလႂ်၊ သဝ်မၼ်းလႂ်၊ တီႈသုပ်းတိၼ်မၼ်းလႂ်၊ ၶိူင်ႈပိူင်မၼ်းလႂ်၊ ဢၼ်ဢဝ်ပွင်ဢဝ်ႁဵတ်းဢမူႉမၼ်း ၵူႈၸိူဝ်ႉၵူႈပိူင်လႂ်၊-

37ဢိၵ်ႇတင်းသဝ်ႁူဝ်ႉဝၢင်းဢၼ်လဵပ်ႈႁွပ်ႈၼၼ်ႉလႂ်၊ တီႈသုပ်းတိၼ်မၼ်းလႂ်၊ လၵ်းမၼ်းလႂ်တင်းၸိူၵ်ႈမၼ်းလႂ် ၸိူဝ်းၼၼ်ႉဢေႃႈ။

38ၶဝ်ၸိူဝ်းဢၼ် တၵ်းလႆႈလူတူၺ်းလုမ်းလႃးထႃႇၼႃႉတီႈမူတ်းၸၢင်ႇ ပုၼ်ႈတၢင်းဢၼ်ၵူၼ်းမဵဝ်း ဢီႉသရေႇလႃႉ ထုၵ်ႇလီလူတူၺ်းလုမ်းလႃးၼၼ်ႉသေလႄႈ ၶျႃးတီႈယူႇၶဝ်ယူႇၵႃႈတီႈၽၢႆႇၼႃႈသုမ်ႉထဵင်ၸဝ်ႈ ၽၢႆႇၼႃႈဝၼ်းဢွၵ်ႇၵႃႈတီႈၽၢႆႇၼႃႈမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ ၽၢႆႇဢၼ်ၵၢင်ဝၼ်းဢွၵ်ႇၼၼ်ႉၸမ်ႉ၊ ပဵၼ် မူဝ်းသေႇ ဢိၵ်ႇတင်း ဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉဢေႃႈ။ ၵေႃႉဢၼ်ပဵၼ်ၵူၼ်း တၢင်ႇၸိူဝ်ႉတၢင်ႇၶိူဝ်းလႄႈ သုတ်ႉၸပ်းသုတ်ႉၸူးၸိုင်၊ တၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။-

39ၵူၼ်းမဵဝ်း လေႇဝီႉ ၵႃႈဢၼ်လႆႈၶၢမ်ႇတၢင်းဢၼ်ၼပ်ႉဢၼ်ဢၢၼ်ႇ မူဝ်းသေႇ တင်း ဢႃႇရုၼ်ႇ ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်သေလႄႈ ၼပ်ႉဢၢၼ်ႇၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၼၼ်ႉ ဢၼ်ဝႃႈၵူၼ်းၸၢႆးဢၼ်ဢသၢၵ်ႈလႆႈလိူၼ်ၼိုင်ႈလႄႈ လိူၼ်လိူဝ်ၵႂႃႇၼၼ်ႉတင်းသဵင်ႈတင်းလူင်ၼၼ်ႉၸမ်ႉ၊ မီးသွင်မိုၼ်ႇပၢႆသွင်ႁဵင်ဢေႃႈ။

40ထႃႇဝရႃႉၽြႃးသမ်ႉမီးဢမိင်ႉတီႈ မူဝ်းသေႇ လႄႈဝႃႈ၊ ၼပ်ႉဢၢၼ်ႇလုၵ်ႈၸၢႆးတူၼ်ႈဢၼ်ဢသၢၵ်ႈလႆႈလိူၼ်ၼိုင်ႈလႄႈ လိူၼ်လိူဝ်ၵႂႃႇၼၼ်ႉၵႃႈၼႂ်းၵူၼ်းမဵဝ်း ဢီႉသရေႇလႃႉ တင်းလၢႆသေလႄႈ ဢဝ်ၸရၢင်းတႃႉ။-

41ဢဝ်ၵူၼ်းမဵဝ်း လေႇဝီႉ ၸိူဝ်းၼၼ်ႉတၢင်တူဝ်လုၵ်ႈၸၢႆးတူၼ်ႈ ၵူၼ်းမဵဝ်း ဢီႉသရေႇလႃႉ တင်းလၢႆဢိၵ်ႇတင်း တရိၵ်ႈသၢၼ်ႇဢၼ်မီးၵႃႈတီႈၵူၼ်းမဵဝ်း လေႇဝီႉ ၸိူဝ်းၼၼ်ႉ တၢင်တူဝ်လုၵ်ႈၸၢႆးတူၼ်ႈတရိၵ်ႈသၢၼ်ႇဢၼ်မီးၵႃႈတီႈၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉပုၼ်ႈၵဝ်တႃႉ။ ၵဝ်ပဵၼ်ထႃႇဝရႃႉၽြႃးဢေႃႈ၊ ဝႃႈၼင်ႇၼႆလႄႈ၊-

42မူဝ်းသေႇ ၼပ်ႉဢၢၼ်ႇလုၵ်ႈၸၢႆးတူၼ်ႈ ၵူၼ်းမဵဝ်း ဢီႉသရေႇလႃႉ တင်းလၢႆၸွမ်းၵႃႈၼင်ႇဢၼ်ထႃႇဝရႃႉၽြႃး သင်ႇလၢတ်ႈဝႆႉၼၼ်ႉလႄႈ၊-

43ၸွမ်းၸိုဝ်ႈၸွမ်းသဵင်သေလႄႈ လုၵ်ႈၸၢႆးတူၼ်ႈၵႃႈဢၼ်ဢသၢၵ်ႈလႆႈလိူၼ်ၼိုင်ႈလႄႈ လိူၼ်လိူဝ်ၵႂႃႇဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၼၼ်ႉၸမ်ႉ၊ မီးသွင်မိုၼ်ႇသွင်ႁဵင်သွင်ပၢၵ်ႇၸဵတ်းသိပ်းပၢႆသၢမ်ဢေႃႈ။

44ထႃႇဝရႃႉၽြႃးသမ်ႉမီးဢမိင်ႉတီႈ မူဝ်းသေႇ လႄႈဝႃႈ၊-

45ဢဝ်ၵူၼ်းမဵဝ်း လေႇဝီႉ တင်းလၢႆ တၢင်တူဝ်လုၵ်ႈၸၢႆးတူၼ်ႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢိၵ်ႇတင်းတရိၵ်ႈသၢၼ်ႇ ဢၼ်မီးၵႃႈတီႈၵူၼ်းမဵဝ်း လေႇဝီႉ ၸိူဝ်းၼၼ်ႉ တၢင်တူဝ်တရိၵ်ႈသၢၼ်ႇ ဢၼ်မီးၵႃႈတီႈ ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉတႃႉ။ ၵူၼ်းမဵဝ်း လေႇဝီႉ ၸိူဝ်းၼၼ်ႉတၵ်းလႆႈပဵၼ်ဢုၵ်ႉၸႃႇၵဝ်ဢေႃႈ။ ၵဝ်ပဵၼ်ထႃႇဝရႃႉၽြႃးဢေႃႈ။-

46လွင်ႈဢၼ်တၵ်းလႆႈထုတ်ႇဢဝ်လုၵ်ႈၸၢႆးတူၼ်ႈ ၵူၼ်းမဵဝ်း ဢီႉသရေႇလႃႉ သွင်ပၢၵ်ႇၸဵတ်းသိပ်းပၢႆသၢမ်ၵေႃႉ ဢၼ်လိူဝ်တွၼ်းသေၵူၼ်းမဵဝ်း လေႇဝီႉ ၵႂႃႇၸိူဝ်းၼၼ်ႉၸမ်ႉ၊-

47မႂ်းတၵ်းလႆႈၶၢမ်ႇဢဝ်တီႈ ယေႈၵေႃႉၵျၢပ်ႈ သၶေးလႃႉ ႁႃႈၵျၢပ်ႈဢေႃႈ။ ၸွမ်းလူၺ်ႈၼမ်ႉၼၵ်းငိုၼ်းၸဝ်ႈၵျၢပ်ႈ သၶေးလႃႉ ၼၼ်ႉသေလႄႈ မႂ်းတၵ်းလႆႈၶၢမ်ႇဢေႃႈ။ ၵျၢပ်ႈၼိုင်ႈၼၼ်ႉၸမ်ႉ၊ မီးသၢဝ်း ၵေးရႃႉ ဢေႃႈ။-

48မႂ်းတၵ်းလႆႈဢဝ်ငိုၼ်းၵႃႈၶၼ်ဢၼ်ဢဝ်ထုတ်ႇဢဝ်ၶဝ်ၸိူဝ်းဢၼ် လိူဝ်တွၼ်းၵႂႃႇတင်းလၢႆၼၼ်ႉလႄႈ ပၼ်တီႈ ဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉဢေႃႈ၊ ဝႃႈၼင်ႇၼႆလႄႈ၊-

49မူဝ်းသေႇ ဢဝ်ငိုၼ်းၵႃႈၶၼ်ဢၼ်ထုတ်ႇဢဝ်ၼၼ်ႉ တီႈၶဝ်ၸိူဝ်းဢၼ်လိူဝ်တွၼ်းသေ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ် ၵူၼ်းမဵဝ်း လေႇဝီႉ ၸိူဝ်းၼၼ်ႉ လႆႈထုတ်ႇဢဝ်ၼၼ်ႉဢေႃႈ။-

50မၼ်းဢဝ်ငိုၼ်းၼၼ်ႉ တီႈလုၵ်ႈၸၢႆးတူၼ်ႈ ၵူၼ်းမဵဝ်း ဢီႉသရေႇလႃႉ တင်းလၢႆၸိူဝ်းၼၼ်ႉဢၼ်ဝႃႈ ၵျၢပ်ႈ သၶေးလႃႉ ႁဵင်ၼိုင်ႈသၢမ်ပၢၵ်ႇႁူၵ်းသိပ်းပၢႆႁႃႈၵျၢပ်ႈ ၸွမ်းလူၺ်ႈၼမ်ႉၼၵ်းငိုၼ်းၸဝ်ႈၵျၢပ်ႈ သၶေးလႃႉ ၼၼ်ႉသေယဝ်ႉ၊-

51မူဝ်းသေႇ ၼၼ်ႉ ဢဝ်ငိုၼ်းၵႃႈၶၼ်ဢၼ်ထုတ်ႇဢဝ်ၼၼ်ႉ ပၼ်တီႈ ဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉၸွမ်းၼင်ႇၵႂၢမ်းထႃႇဝရႃႉၽြႃး ၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၼၼ်ႉဢေႃႈ။