Numbers 32 — Shan

1မဵဝ်း ရူႉပိၼ်ႇ ဢိၵ်ႇတင်းၵူၼ်းမဵဝ်း ၵၢတ်ႉ တင်းလၢႆ မၢၵ်ႈမီးတရိၵ်ႈသၢၼ်ႇၼမ်ၼႃႇလႄႈ မိူဝ်ႈဢၼ်ၶဝ်ႁၼ်မိူင်း ယႃႇၸႃႇ တင်းမိူင်း ၵီႉလတ်ႉ ပဵၼ်တီႈဢၼ်တရိၵ်ႈသၢၼ်ႇတၵ်းၵိၼ်လီၼႃႇၼၼ်ႉၸိုင်၊-

2ၵူၼ်းမဵဝ်း ၵၢတ်ႉ ဢိၵ်ႇတင်းၵူၼ်းမဵဝ်း ရူႉပိၼ်ႇ ၸိူဝ်းၼၼ်ႉဢွၼ်ၵၼ်မႃးၵႃႈတီႈ မူဝ်းသေႇ တင်းယိတ်ႈပရေႃးႁဵၵ်ႈ ဢေးလႃႇၸႃႇ ဢိၵ်ႇတင်းၶုၼ်ၵႃႈၼႂ်းပရဵၵ်ႈသၢတ်ႈတင်းလၢႆၼၼ်ႉလႄႈ လဝ်ႊလၢတ်ႈဝႃႈ၊-

3ဢႃႇတရုတ်ႉ၊ တီႉၽုၼ်ႇ၊ ယႃႇၸႃႇ၊ ၼီႉမရႃႉ၊ ႁေႇသၽုၼ်ႇ၊ ဢေးလႃႇလေး၊ သေးၽမ်ႇ၊ ၼေႇပေႃႇ၊ ပေႃးၼႃႉ ၊-

4ဢၼ်ဝႃႈမိူင်းဢၼ်ထႃႇဝရႃႉၽြႃး တိုၵ်းတေႃးယႃႉပႅတ်ႈ ၵႃႈတီႈၽၢႆႇၼႃႈပရဵၵ်ႈသၢတ်ႈၵူၼ်းမဵဝ်း ဢီႉသရေႇလႃႉ ၸိူဝ်းၼႆႉၼႆႉၸိုင် ထုၵ်ႇၵၼ်တင်းတရိၵ်ႈသၢၼ်ႇတီႈၶႃႈဢေႃႈ။ ၶႃႈၸဝ်ႈႁဝ်းၸိူဝ်းၼႆႉၵေႃႈ မီးတရိၵ်ႈသၢၼ်ႇၼမ်ၼႃႇတီႈၶႃႈဢေႃႈ၊ ဝႃႈၼင်ႇၼႆလႄႈ၊-

5ၶဝ်သမ်ႉလၢတ်ႈလႄႈဝႃႈ၊ ပေႃးၶႃႈၸဝ်ႈႁဝ်းၸိူဝ်းၼႆႉ လႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းၸိုင်၊ ၶႅၼ်းတေႃႈပၼ်တီႈၶႃႈၸဝ်ႈႁဝ်းၸိူဝ်းၼႆႉ ႁႂ်ႈလႆႈပိူင်ႇသေၵမ်းတီႈၶႃႈ၊ ယႃႇပေဢဝ်ၶႃႈၸဝ်ႈႁဝ်းၸိူဝ်းၼႆႉၵႂႃႇၵႃႈတီႈၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ သေၵမ်းတီႈၶႃႈ၊ ဝႃႈၼင်ႇၼႆဢေႃႈ။

6မူဝ်းသေႇ ၶိုၼ်းလၢတ်ႈတီႈၵူၼ်းမဵဝ်း ၵၢတ်ႉ ဢိၵ်ႇတင်းၵူၼ်းမဵဝ်း ရူႉပိၼ်ႇ ၸိူဝ်းၼၼ်ႉလႄႈဝႃႈ၊ ပီႈၼွင်ႉသူၸိူဝ်းၼၼ်ႉ တၵ်းလႆႈၵႂႃႇတိုၵ်းသိုၵ်းလႄႈ သူတၵ်းလႆႈၵိုတ်းသဝ်းယူႇၵႃႈတီႈၼႆႈႁိုဝ်။-

7ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူယႃႉၸႂ်ၵူၼ်းမဵဝ်း ဢီႉသရေႇလႃႉ တင်းလၢႆ ႁႂ်ႈၶဝ်ဢမ်ႇၶၢမ်ႈဢမ်ႇၵႂႃႇ ၵႃႈတီႈမိူင်းဢၼ် ထႃႇဝရႃႉၽြႃးပၼ်ၼၼ်ႉၼင်ႇႁိုဝ်။-

8ပေႃးသူၸိူဝ်းၼၼ်ႉႁဵတ်းၸိူဝ်ႉၼင်ႇၼႆ ၼႂ်းမိူဝ်ႈဢၼ်ၵဝ်ပွႆႇၸႂ်ႉၶဝ်လုၵ်ႉသေၵႃႈတီႈ ၵႃႇတေႇသပႃႇၼႃႇ ၵႂႃႇႁႂ်ႈလႆႈလွမ်တူၺ်း မိူင်းၸဝ်ႈၼၼ်ႉဢေႃႈ။-

9ၶဝ်ၼၼ်ႉဢွၼ်ၵၼ်ၵႂႃႇတီႈပၢင်ႇႁူၺ်ႈ ဢေႇသၵေႃးလႃႉ လႄႈ တူၺ်းႁၼ်မိူင်းသေယဝ်ႉ၊ ယႃႉၸႂ်ၵူၼ်းမဵဝ်း ဢီႉသရေႇလႃႉ တင်းလၢႆ ႁႂ်ႈၶဝ်ဢမ်ႇၵႂႃႇၵႃႈတီႈမိူင်းဢၼ်ထႃႇဝရႃႉၽြႃးပၼ်ၼၼ်ႉဢေႃႈ။-

10မိူဝ်ႈၼၼ်ႉ တၢင်းၸႂ်မႆႈၶႆႈၸႃႉထႃႇဝရႃႉၽြႃးဢွၵ်ႇသေလႄႈ မၼ်းၸဝ်ႈၵိၼ်ႇလႄႈဝႃႈ၊- လိူဝ်သေၵႃႇလႅပ်ႉလုၵ်ႈၸၢႆးယေႇၽုၼ်ႇၼႃႉ ဢၼ်ပဵၼ်ၵူၼ်းမဵဝ်းၵေးၼိတ်ႉ ဢိၵ်ႇတင်းယေႃးသူႉ လုၵ်ႈၸၢႆးၼုၼ်ႇၸိူဝ်းၼၼ်ႉ၊ ၵႃႈၼႂ်းၶဝ်ၸိူဝ်းဢၼ်ဢွၵ်ႇသေၵႃႈၼႂ်းမိူင်းဢေႇၵိပ်ႉတူႉ မႃးၼၼ်ႉလႄႈ ဢသၢၵ်ႈလႆႈသၢဝ်းၼိုင်ႈလႄႈ လိူဝ်သၢဝ်းၵႂႃႇၸိူဝ်းၼၼ်ႉ ၽူႈလႂ်ဢမ်ႇလႆႈႁၼ် မိူင်းဢၼ်ၵဝ်တိူင်ႇဝႃႈတီႈဢႃႇပြႃႇႁၢမ်ႇ၊ ဢီႉၸၢၵ်ႈ၊ ယႃႇၵုပ်ႈၸိူဝ်းၼၼ်ႉလႄႈ ပၼ်ၼၼ်ႉသေၵေႃႉသေၵူၼ်း ၵွပ်ႈပိူဝ်ႈဢၼ်ၶဝ်ဢမ်ႇၸွမ်းလင်ၵဝ်မူတ်းမူတ်းၼၼ်ႉ၊ လွင်ႈမၼ်းၸမ်ႉ သွင်ၶႃၸိုင် ၸွမ်းလင်ထႃႇဝရႃႉၽြႃးမူတ်းမူတ်းယဝ်ႉ၊ ဝႃႈၼင်ႇၼႆဢေႃႈ။-

13ၼင်ႇၼၼ်လႄႈ တၢင်းၸႂ်မႆႈၶႆႈၸႃႉထႃႇဝရႃႉၽြႃး ဢွၵ်ႇတီႈၵူၼ်းမဵဝ်း ဢီႉသရေႇလႃႉ တင်းလၢႆလႄႈ မၼ်းၸဝ်ႈႁႂ်ႈၶဝ်လႄႇၵႂႃႇလႄႇမႃးယူႇၵႃႈၼႂ်းထိူၼ်ႇ သီႇသိပ်းပီႊတဵမ်တဵမ်တေႃႇထိုင်ႁွတ်ႈၵူၼ်းၵႃႈဢၼ်ႁဵတ်းဢမူႉ ဢၼ်ႁၢႆႉယုတ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးၸိူဝ်းၼၼ်ႉ ထၼ်ႈပေႃးလူႉလႅဝ်ပႅတ်ႈၼၼ်ႉဢေႃႈ။-

14တေႃႈလဵဝ်ၼႆႉၸမ်ႉ၊ သူဢၼ်ပဵၼ်ၵေႃႉဢၼ် ယဵင်ႈၶႅၼ်းႁၢႆႉယုတ်ႈၸိူဝ်းၼႆႉ သမ်ႉပေႃႇဢွၵ်ႇမႃး တၢင်တူဝ်ပေႃႈသူၸိူဝ်းၼၼ်ႉ ႁႂ်ႈတၢင်းၸႂ်မႆႈၶႆႈၸႃႉထႃႇဝရႃႉၽြႃး လႆႈယဵင်ႈၶႅၼ်းဢွၵ်ႇတီႈ ၵူၼ်းမဵဝ်း ဢီႉသရေႇလႃႉ တင်းလၢႆယဝ်ႉလူင်ပႄႇ။-

15ပေႃးသူယင်းဢမ်ႇၸွမ်းလင်မၼ်းၸဝ်ႈလႄႈ ဝႄႈပိူင်ႈၵႂႃႇၸိုင်၊ မၼ်းၸဝ်ႈတၵ်းသမ်ႉၶိုၼ်းၸုၼ်ႉပႅတ်ႈၵူၼ်းမဵဝ်းၼႆႉ ၵႃႈၼႂ်းထိူၼ်ႇလႄႈ၊ သူၼႆႉတၵ်းယႃႉၵူၼ်းမဵဝ်းၼႆႉ တင်းသဵင်ႈတင်းလူင်ပႅတ်ႈလူင်ပႄႇ၊ ဝႃႈၼင်ႇၼႆဢေႃႈ။

16ၶဝ်ၼၼ်ႉဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈမၼ်းသေလႄႈ လဝ်ႊလၢတ်ႈလႄႈဝႃႈ၊ ၶႃႈၸဝ်ႈႁဝ်းၸိူဝ်းၼႆႉ၊ တၵ်းတႄႇႁဵတ်းၶွၵ်ႈသူဝ်း ပုၼ်ႈတရိၵ်ႈသၢၼ်ႇၶႃႈၸဝ်ႈႁဝ်းၸိူဝ်းၼႆႉ ဢိၵ်ႇတင်းဝဵင်းပုၼ်ႈလုၵ်ႈဢွၼ်ႇလၢင်းဢွၼ်ႇၶႃႈၸဝ်ႈႁဝ်းၸိူဝ်းၼႆႉဝႆႉၵႃႈတီႈၼႆႈတီႈၶႃႈဢေႃႈ။-

17ၵူၺ်းၵႃႈ ၶႃႈၸဝ်ႈႁဝ်းၸိူဝ်းၼႆႉ တၵ်းယိပ်းၵမ်ဢဝ်လၢၵ်ႈၼၢၵ်ႈသေလႄႈ ပႃးၵႂႃႇၵႃႈတီႈၽၢႆႇၼႃႈ ၵူၼ်းမဵဝ်း ဢီႉသရေႇလႃႉ တင်းလၢႆ တေႃႇထိုင်ႁွတ်ႈၶႃႈၸဝ်ႈႁဝ်းၸိူဝ်းၼႆႉထၼ်ႈပေႃး လႆႈဢဝ်ၶဝ်ၵႂႃႇသူင်ႇႁွတ်ႈၵႃႈတီႈ တီႈယူႇၶဝ်ၼၼ်ႉတီႈၶႃႈဢေႃႈ။ ၵွပ်ႈပိူဝ်ႈၵူၼ်းဢၼ် ယင်းၵိုတ်းယင်းၵျၢၼ်ႇမီးယူႇ ၵႃႈတီႈၼႂ်းမိူင်းၼႆႉၸိူဝ်းၼၼ်ႉလႄႈ လုၵ်ႈဢွၼ်ႇလၢင်းဢွၼ်ႇၶႃႈၸဝ်ႈႁဝ်းတင်းလၢႆၼႆႉၸိူဝ်းၼၼ်ႉ တၵ်းလႆႈယူႇၵႃႈတီႈဝဵင်းဢၼ်မၼ်ႈလီၶိူင်ႇလီတီႈၶႃႈဢေႃႈ၊-

18ၶႃႈၸဝ်ႈႁဝ်းၸိူဝ်းၼႆႉ တၵ်းဢမ်ႇၶိုၼ်းဢမ်ႇမႃးၵႃႈတီႈႁိူၼ်းတူဝ်ၸဝ်ႈၵဝ်ႇ တေႃႇထိုင်ႁွတ်ႈၵူၼ်းမဵဝ်း ဢီႉသရေႇလႃႉ တင်းလၢႆ ထၼ်ႈပေႃးၶဝ်လႆႈၶဝ်ႈၶၢမ်ႇဢမူၺ်ႇႁင်းၽႂ်ႁင်းမၼ်းၼၼ်ႉတီႈၶႃႈ၊-

19ၶႃႈၸဝ်ႈႁဝ်းၸိူဝ်းၼႆႉ ဢမ်ႇၶႂ်ႈၶၢမ်ႇဢမူၺ်ႇလူၺ်ႈၵၼ်တင်းၶဝ် ၵႃႈတီႈၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ ပုၼ်ႉၸိူဝ်းၼၼ်ႉတီႈၶႃႈ၊ လိၼ်တီႈဢၼ်ၶႃႈၸဝ်ႈႁဝ်းၸိူဝ်းၼႆႉ ၶၢမ်ႇဢမူၺ်ႇၼၼ်ႉ တူၵ်းၵႃႈတီႈၽၢႆႇၼႆႉၼမ်ႉႁွင်ႈ ယေႃးတၢၼ်ႇ ၊ ၵႃႈတီႈၽၢႆႇဝၼ်းဢွၵ်ႇၼႆႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။

20မူဝ်းသေႇ ၵေႃႈလၢတ်ႈတီႈၶဝ်လႄႈဝႃႈ၊ ပေႃးသူတၵ်းႁဵတ်းၸိူဝ်ႉၼင်ႇၼၼ် ဢၼ်ဝႃႈပေႃးသူတၵ်းယိပ်းၵမ်ဢဝ်လၢၵ်ႈၼၢၵ်ႈသေလႄႈ ၵႂႃႇတိုၵ်းသိုၵ်းၵႃႈတီႈၽၢႆႇၼႃႈထႃႇဝရႃႉၽြႃးလႄႈ၊-

21သူၵႃႈဢၼ်ယိပ်းၵမ်ဢဝ်လၢၵ်ႈၼၢၵ်ႈၸိူဝ်းၼႆႉ တၵ်းၶၢမ်ႈၵႂႃႇၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ ၵႃႈတီႈၽၢႆႇၼႃႈထႃႇဝရႃႉၽြႃး တေႃႇထိုင်ႁွတ်ႈထၼ်ႈပေႃး ႁေႃႈရၢၼ်ႇသူႇထႃႇဝရႃႉၽြႃးတင်းလၢႆဢွၵ်ႇသေၵႃႈတီႈၽၢႆႇၼႃႈမၼ်းၸဝ်ႈလႄႈ၊-

22ပႄႉၼႅင်ႇမိူင်းၼၼ်ႉၵႃႈတီႈၽၢႆႇၼႃႈထႃႇဝရႃႉၽြႃး ၼၼ်ႉၸိုင်၊ လိုၼ်းၼၼ်ႉ သူၼႆႉတၵ်းၵၢင်းလွတ်ႈတင်းဢပႅတ်ႈၵႃႈတီႈၽၢႆႇၼႃႈထႃႇဝရႃႉၽြႃး ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းလၢႆသေလႄႈ ၶိုၼ်းမႃးၵႃႈတီႈၼႆႈဢေႃႈ။ မိူင်းၼႆႉ တၵ်းလႆႈပဵၼ်တီႈဢၼ်သူ ပႃးတင်းဢၶႂၢင်ႉထႃႇဝရႃႉၽြႃးသေလႄႈပိူင်ႇဢေႃႈ။-

23ပေႃးသူတၵ်းဢမ်ႇႁဵတ်းၸိူဝ်ႉၼင်ႇၼၼ်ၸမ်ႉ၊ သူတၵ်းလႆႈမီးတၢင်းဢၼ်ၽိတ်းပိူင်ႈထႃႇဝရႃႉၽြႃးဢေႃႈ။ သူႁူႉၸႅင်ႈလွင်ႈဢၼ်ဢပႅတ်ႈသူၼၼ်ႉ တၵ်းၸွမ်းလႄႈၶိုတ်းသူၼၼ်ႉတႃႉ။-

24ဢွၼ်ၵၼ်တႄႇႁဵတ်းဝဵင်း ပုၼ်ႈလုၵ်ႈဢွၼ်ႇလၢင်းဢွၼ်ႇသူ ဢိၵ်ႇတင်းၶွၵ်ႈသူဝ်းပုၼ်ႈသူဝ်းသူဝႆႉတႃႉ။ ဢွၼ်ၵၼ်ႁဵတ်းၸွမ်းၼင်ႇၵႃႈဢၼ်သူပ်းသူဝႃႈၼၼ်ႉတႃႉ၊ ဝႃႈၼင်ႇၼႆသေယဝ်ႉ၊-

25ၵူၼ်းမဵဝ်း ၵၢတ်ႉ ဢိၵ်ႇတင်း ၵူၼ်းမဵဝ်း ရူႉပိၼ်ႇ တင်းလၢႆ လဝ်ႊလၢတ်ႈတီႈ မူဝ်းသေႇ လႄႈဝႃႈ၊ ၶႃႈၸဝ်ႈႁဝ်းၸိူဝ်းၼႆႉ တၵ်းႁဵတ်းၸွမ်းၵႃႈၼင်ႇဢၼ် ၸဝ်ႈႁဝ်းမီးဢမိင်ႉၼၼ်ႉတီႈၶႃႈဢေႃႈ။-

26မေးဢိၵ်ႇတင်းလုၵ်ႈဢွၼ်ႇလၢင်းဢွၼ်ႇၶႃႈၸဝ်ႈႁဝ်းတင်းလၢႆ တင်းၽုင်သူဝ်းၽုင်ဝူဝ်းၶႃႈၸဝ်ႈႁဝ်းတင်းသဵင်ႈတင်းလူင် တၵ်းလႆႈၵိုတ်းယူႇၵႃႈတီႈၼႆႈ ၵႃႈၼႂ်းဝဵင်းတင်းလၢႆ မိူင်း ၵီႉလတ်ႉ ၼႆႉတီႈၶႃႈဢေႃႈ။-

27ၶႃႈၸဝ်ႈႁဝ်းၸိူဝ်းၼႆႉၸမ်ႉ၊ ၼင်ႇၵႃႈဢၼ်ၸဝ်ႈႁဝ်းမီးဢမိင်ႉၼၼ်ႉ တၵ်းယိပ်းၵမ်ဢဝ်လၢၵ်ႈၼၢၵ်ႈသေလႄႈ ၶၢမ်ႈၵႂႃႇႁႂ်ႈလႆႈတိုၵ်းသိုၵ်းၵႃႈတီႈၽၢႆႇၼႃႈထႃႇဝရႃႉၽြႃး တီႈၶႃႈဢေႃႈ၊ ဝႃႈၼင်ႇၼႆဢေႃႈ။

28ၵွပ်ႈႁွႆးၼႆႉလႄႈ မူဝ်းသေႇ ဢဝ်လွင်ႈၶဝ်သင်ႇလၢတ်ႈတီႈယိတ်ႈပရေႃးႁဵၵ်ႈ ဢေးလႃႇၸႃႇ၊ ယေႃးသူႉ လုၵ်ႈၸၢႆး ၼုၼ်ႇ ဢိၵ်ႇတင်းၵူၼ်းယႂ်ႇၵူၼ်းလူင် မဵဝ်းပူႇမဵဝ်းပေႃႈၶဝ် ၵႃႈတီႈၼႂ်းမဵဝ်းတင်းလၢႆ ၵႃႈၼႂ်းၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉလႄႈ၊-

29မူဝ်းသေႇ လၢတ်ႈလႄႈဝႃႈ၊ ပေႃးၵူၼ်းမဵဝ်း ၵၢတ်ႉ ဢိၵ်ႇတင်းၵူၼ်းမဵဝ်း ရူႉပိၼ်ႇ ႁင်းၽႂ်ႁင်းမၼ်း ယိပ်းၵမ်ဢဝ်လၢၵ်ႈၼၢၵ်ႈ ႁႂ်ႈလႆႈတိုၵ်းသိုၵ်းသေလႄႈ ဢွၼ်ၵၼ်ၶၢမ်ႈၵႂႃႇၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ လူၺ်ႈၵၼ်တင်းသူ ၵႃႈတီႈၽၢႆႇၼႃႈထႃႇဝရႃႉၽြႃးလႄႈ သူပႄႉၼႅင်ႇမိူင်းၼၼ်ႉယဝ်ႉၸိုင်၊ သူတၵ်းလႆႈဢဝ်မိူင်း ၵီႉလတ်ႉ ပၼ်တီႈၶဝ် ႁႂ်ႈၶဝ်လႆႈပိူင်ႇဢေႃႈ။-

30ပေႃးဢမ်ႇၼၼ် ပေႃးၶဝ်ဢမ်ႇယိပ်းၵမ်ဢဝ်လၢၵ်ႈၼၢၵ်ႈသေလႄႈ ၶၢမ်ႈၵႂႃႇလူၺ်ႈၵၼ်တင်းသူၸိုင်၊ ၶဝ်တၵ်းလႆႈၶၢမ်ႇဢဝ်တီႈဢၼ် တူဝ်ၸဝ်ႈၵဝ်ႇလႆႈပိူင်ႇၵႃႈၼႂ်းသူ ၵႃႈတီႈမိူင်း ၶႃႇၼၢၼ်ႇ ပုၼ်ႉဢေႃႈ၊ ဝႃႈၼင်ႇၼႆဢေႃႈ။-

31ၵူၼ်းမဵဝ်း ၵၢတ်ႉ ဢိၵ်ႇတင်းၵူၼ်းမဵဝ်း ရူႉပိၼ်ႇ ၸိူဝ်းၼၼ်ႉ ဢွၼ်ၵၼ်ၶိုၼ်းလၢတ်ႈလႄႈဝႃႈ၊ ၶႃႈၸဝ်ႈႁဝ်းၸိူဝ်းၼႆႉ တၵ်းႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃးမီးဢမိင်ႉတီႈၶႃႈၸဝ်ႈႁဝ်းၸိူဝ်းၼႆႉၼၼ်ႉတီႈၶႃႈဢေႃႈ။-

32ၶႃႈၸဝ်ႈႁဝ်းၸိူဝ်းၼႆႉတၵ်းယိပ်းၵမ်ဢဝ်လၢၵ်ႈၼၢၵ်ႈသေလႄႈ ၶၢမ်ႈၵႂႃႇတီႈမိူင်း ၶႃႇၼၢၼ်ႇ ၵႃႈတီႈၽၢႆႇၼႃႈထႃႇဝရႃႉၽြႃးသေယဝ်ႉ၊ ဢမူၺ်ႇတီႈဢၼ်ၶႃႈၸဝ်ႈႁဝ်းၸိူဝ်းၼႆႉတၵ်းပိူင်ႇၼၼ်ႉ တၵ်းမီးၵႃႈတီႈၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ တီႈၶႃႈဢေႃႈ၊ ဝႃႈၼင်ႇၼႆဢေႃႈ။-

33မိူဝ်ႈၼၼ်ႉ မူဝ်းသေႇ ဢဝ်သိုင်ႇၸိုင်ႈဝၢၼ်ႈမိူင်း သီႉႁုၼ်ႇ ၶုၼ်ႁေႃၶမ်း ဢႃႇမေႃးရီႉ ၊ သိုင်ႇၸိုင်ႈဝၢၼ်ႈမိူင်း ဢေႃႇၶႃႉ ၊ ၶုၼ်ႁေႃၶမ်း ပႃႇသၢၼ်ႇ ၊ ဢၼ်ဝႃႈလိၼ်မၼ်းဢၼ်ၸွမ်းလူၺ်ႈဝဵင်းမၼ်း ဢိၵ်ႇတင်းဝၢၼ်ႈၼွၵ်ႈၼႃးပၢင်ႇမၼ်းတင်းလၢႆ ဢၼ်ဝႃႈဝဵင်းဢၼ်မီးၵူႈတီႈၵူႈလႅၼ်၊ ၼႂ်းၼမ်ႉၼႂ်းလိၼ်မၼ်းၸိူဝ်းၼၼ်ႉ ဢၢပ်ႈပၼ်တီႈၵူၼ်းမဵဝ်း ၵၢတ်ႉ ဢိၵ်ႇတင်းၵူၼ်းမဵဝ်း ရူႉပိၼ်ႇ တင်း ၵူၼ်းမဵဝ်း မၼႃႇသေႇ လုၵ်ႈၸၢႆး ယူဝ်းသႅပ်ႈ ၼၼ်ႉ ၶိုင်ႈၼိုင်ႈၼၼ်ႉၸိူဝ်းၼၼ်ႉဢေႃႈ။

34ၵူၼ်းမဵဝ်း ၵၢတ်ႉ ၸိူဝ်းၼၼ်ႉ ဢွၼ်ၵၼ်တႄႇႁဵတ်း တီႉပုၼ်ႇ၊ ဢႃႇတရုတ်ႉ၊ ဢႃႇရေႃႇ ၊-

35ဢႃႇတရုတ်ႉသေႃႇၽၢၼ်ႇ၊ ယႃႇၸႃႇ၊ ယူဝ်းၽေႇႁႃႉ ၊-

36ပႅတ်ႉၼီႉမရႃႉ၊ ပေႇသႃႇရၼ်ႇ ဢၼ်ဝႃႈ ဝဵင်းဢၼ်မၼ်ႈလီၶိူင်ႇလီၸိူဝ်းၼၼ်ႉ ဢိၵ်ႇတင်းၶွၵ်ႈသူဝ်းတင်းလၢႆဢေႃႈ။-

37ၵူၼ်းမဵဝ်း ရူႉပိၼ်ႇ တင်းလၢႆ ဢွၼ်ၵၼ်တႄႇႁဵတ်း ႁေႇသၽုၼ်ႇ၊ ဢေးလႃႇလေး၊ ၵီႉရီႉယသိမ်း ၊-

38ၼေႇပေႃႇ၊ ပႃႇလႃႉမေႃးၼႃႉ၊ ၸီႉပမႃႇ လႄႈ ဝဵင်းၸိူဝ်းၼၼ်ႉ လၢႆႈၸိုဝ်ႈမႂ်ႇသဵင်မႂ်ႇဢေႃႈ။-

39ၵူၼ်းမဵဝ်း မႃႇၶီႉရႃႉ ဢၼ်ပဵၼ်လုၵ်ႈၸၢႆး မၼႃႇသေႇ ၸိူဝ်းၼၼ်ႉ ဢွၼ်ၵၼ်ၵႂႃႇၵႃႈတီႈဝဵင်း ၵီႉလတ်ႉ လႄႈ သိမ်းဢဝ်သေယဝ်ႉ၊ ႁေႃႈၵူၼ်းမဵဝ်း ဢႃႇမေႃးရီႉ ဢၼ်မီးယူႇၵႃႈၼႂ်းမိူင်းၼၼ်ႉၸိူဝ်းၼၼ်ႉဢွၵ်ႇပႅတ်ႈသေဢေႃႈ။-

40မူဝ်းသေႇ ဢဝ်မိူင်း ၵီႉလတ်ႉ ၼၼ်ႉ ဢၢပ်ႈပၼ်တီႈၵူၼ်းမဵဝ်း မႃႇၶီႉရႃႉ ၸိူဝ်းၼၼ်ႉလႄႈ ၶဝ်ၼၼ်ႉယူႇၵႃႈတီႈၼၼ်ႈဢေႃႈ။-

41ယႃႇဢီႉရႃႉ ၵူၼ်းမဵဝ်း မၼႃႇသေႇ ၼၼ်ႉၵေႃႈ ၵႂႃႇလႄႈသိမ်းဢဝ်ဝၢၼ်ႈမၼ်းဝဵင်းမၼ်းတင်းလၢႆၼၼ်ႉသေယဝ်ႉ၊ ႁွင်ႉႁဵၵ်ႈၸိုဝ်ႈ ႁႃႇဝုတ်ႉယႃႇဢီႉရႃႉ ဢေႃႈ။-

42ၼေႃႇပႃႉ ၵေႃႈ ၵႂႃႇလႄႈသိမ်းဢဝ်ဝဵင်း ၵေးၼတ်ႉ ဢိၵ်ႇတင်းဝၢၼ်ႈမၼ်းတင်းလၢႆသေယဝ်ႉ၊ ဢဝ်ၸိုဝ်ႈသဵင်တူဝ်ၸဝ်ႈၵဝ်ႇ ႁွင်ႉႁဵၵ်ႈၸိုဝ်ႈ ၼေႃႇပႃႉ ဢေႃႈ။