1 Kings 12

Sotho 1951 (BIBELE)

← Chapter 11 Jump to: Chapter 13 →

1Rehabeama a tla Sikeme; gobane moo Sikeme go be go tlile Baisiraele ka moka gore ba mmee kgoši.

2Gomme Jerobeama morwa wa Nebata o be a di kwele a le kua Egipita, mo a bego a tšhabetše ntshe mola a tšhaba kgoši Salomo a yo dula kua Egipita.

3Bjale ba be ba romile motho a mmitša. Jerobeama le phuthego ka moka ya Isiraele ba tla ba bolela le Rehabeama ba re:

4Tatago o thatafišitše joko ya rena; wena bjalo fokotša mediro ye ya tatago le boima bja joko ye a bego a re rwadiša yona; ke mo re tlogo ba bahlanka ba gago.

5Rehabeama a re: Yang le fetše matšatši a mararo, mme le boele fa go nna. Gomme setšhaba sa ya.

6Bjale kgoši Rehabeama a eletšana le ba bagolo ba e bego e le bahlanka ba Salomo tatagwe mola a sa phela, a re: Lena le reng? Setšhaba se re ka se fetola ra reng?

7Ba fetola ba re: Ge batho ba lehono o ka ba dumelela, wa kwa se ba se bolelago, wa fetola wa bolela mantšu a mabotse le bona, gona ba tlo ba bahlanka ba gago ka mehla.

8Rehabeama a nyatša keletšo yeo ya ba bagolo; a ya a eletšana le ba bafsa ba thaka ya gagwe ba ba bego ba šika le yena;

9a ba botšiša a re: Lena le reng ge le nkeletša gore re fetole setšhaba se se rego: Fokotša joko ye tatago a bego a re rwadiša yona.

10Ba bafsa ba thaka ya gagwe ba fetola ba re: Setšhaba se se boletšego le wena sa re: Tatago o thatafaditše joko ya rena, ba botše o re: Monwana wa ka o monyenyane o feta letheka la tate ka bokoto.

11Tate o le rwadišitše joko e boima; gomme nna ke tlo napa ke e imetša. Tate o be a le otla ka kgati; gomme nna ke tlo le otla ka tshelane.

12Ka tšatši la boraro Jerobeama le setšhaba ka moka ba tla go kgoši Rehabeama, ka mo a ba boditšego ka gona, a re: Le boeleng fa go nna ka letšatši la boraro.

13Kgoši ya fetola setšhaba ka thata, ya lahla keletšo e boletšwego ke ba bagolo,

14ya fetola ka mo go boletšego ba bafsa, ya re: Tate o thatafaditše joko ya lena; nna ke tlo napa ke e imetša. Tate o be a le otla ka kgati; nna ke tlo le otla ka tshelane.

15Kgoši ya gana go kwa se se bolelwago ke setšhaba. Ge di tla ka tsela ye, di tšwile go Morena, gore go phethege se a se boditšego Jerobeama morwa wa Nebata ka Ahia wa Silo.

16Bjalo, ge Baisiraele ka moka ba bona kgoši e gana go ba kwa, setšhaba sa bolela le kgoši sa re: Re na le taba mang le Dafida? Go morwa wa Isai ga go na kagišano. Isiraele, ikele magaeng a gago! Bjale Dafida a ka no itlhapeletša ngwako wa gagwe. Ke moka Baisiraele ba ikela magaeng a bona.

17Ge e le Baisiraele ba ba bego ba dutše metseng ya Juda, bona ba bušwe ke Rehabeama.

18Ya re ge kgoši Rehabeama a roma Adorama molaodi wa sepalo, Baisiraele ka moka ba mo thuma ka maswika, a hwa. Ke mo kgoši Rehabeama a hlaganetšego a namela koloi, a tšhabela Jerusalema.

19Ke gona moo Baisiraele ba hlanogetšego leloko la Dafida; le lehono go sa eme ka mokgwa woo.

20Ba Isiraele ka moka ge ba ekwa gore Jerobeama o tšwa go boa, ba roma lentšu ba mmiletša pitšong; ba mmea kgoši ya Isiraele ka moka; gwa hlokwa wa go ema le ba leloko la Dafida, ge e se ba leloko la Juda fela.

21Rehabeama ge a fihlile Jerusalema, a rapa ba leloko la Juda le ba dilete tša Benyamini; ya ba bahlabani ba dikete tše lekgolo le masome a seswai, a re ke yo hlabana le setšhaba sa Isiraele, gore a se bušetše go yena Rehabeama morwa wa Salomo.

22Fela, Lentšu la Modimo la tlela Semaya monna wa Modimo, la re:

23Botša Rehabeama morwa wa Salomo kgoši ya Juda, le ba leloko la Juda ka moka, le ba Benyamini, le batho ba ba šetšego, o re:

24Morena o re: Le se ke la tšwa la yo hlabana le bana ba bolena Baisiraele. Ka moka boelang magaeng a lena; ka gobane taba ye e diregile e etšwa go nna. Ya re ge ba ekwa lentšu leo, ba dira se Morena a se boletšego, ba boela magaeng.

25Jerobeama a aga motseng wa Sikeme dithabeng tša Efuraimi a dula ntshe; a tloga moo a yo aga Penuele.

26Mo pelong ya gagwe Jerobeama a tla a re: Bogoši bo ka se diege go boela go leloko la Dafida.

27Ge batho ba fela ba rotogela Jerusalema ba iša didimo Ngwakong wa Morena, pelo ya bona e tlo boela go mong wa bona Rehabeama kgoši ya Juda; mme mohla ba tlogo boela go yena kgoši ya Juda, nna ba tlo mpolaya.

28Bjale ge kgoši e eleletša ka mokgwa wo, ya dira mamame a mabedi a gauta, ya bolela le batho ya re: Go rotogela Jerusalema go tlo le tena. Hee Isiraele! Se medimo ya gago e go ntšhitšego nageng ya Egipita!

29E nngwe namane a e bea Bethele; e nngwe a e bea Dani.

30Gomme modiro woo o ba išitše sebeng; batho ba tloga le namane e nngwe ba e iša Dani.

31Jerobeama a dira le ngwako wa mmotong, a bea baperisita ba a bego a fo ba hlaola mo dileteng tša setšhaba, bao e sego ba leloko la Lefi.

32Le gona Jerobeama a bea letšatši la lesome le metšo e mehlano la kgwedi ya seswai, ya ba la monyanya o swanago le wa Bajuda, a tliša didimo aletareng. Ke tše a di dirilego Bethele, a hlabela mamane a a a dirilego; gona moo Bethele a bea baperisita ba mmoto wo a o dirilego.

33A tliša dihlabelo mo aletareng ye a e dirilego moo Bethele ka lona tšatši leo la lesome le metšo e mehlano la kgwedi ya seswai, le a bego a le beile ka go ithatela a direla Baisiraele monyanya, a tliša dihlabelo le diorelo;

← Chapter 11 Jump to: Chapter 13 →