1 Kings 14

Sotho 1951 (BIBELE)

← Chapter 13 Jump to: Chapter 15 →

1Mehleng yeo gwa babja Abia morwa wa Jerobeama.

2Jerobeama a botša mosadi wa gagwe a re: A ko tsoge o ikgakantšhe, o se tsebje ge o le mosadi wa Jerobeama; o ye kua Silo o tlo hwetša Ahia moporofeta yola wa go mpotša gore ke tlo ba kgoši ya Isiraele a le ntshe.

3O ye o swere dinkgwa tše lesome, le dinkgwana, le legapa la dinose. O ye go yena a go tsebiše se se tlogo diregela mošimanyana yo.

4Mosadi wa Jerobeama a dira ka mokgwa woo, a tsoga a ya Silo, a tla ngwakong wa Ahia. Gomme Ahia o be a sa bone, mahlo a gagwe a šetše a pompetše ka ge a tšofetše.

5Gomme Morena o be a šetše a mmoditše a re: Tseba gore mosadi wa Jerobeama o tla go go botšiša ka baka la ngwana wa gagwe, gobane o a babja. O mo fetole ka la gore le la gore. Ya ba gona mosadi ela a tsenago a ikgakantšhitše.

6Ahia ge a ekwa mešito mojakong, a re: Tsena, mohumagadi wa Jerobeama; o reng o itira o šele? Nna ke laetšwe go go botša taba e thata.

7Goma o yo botša Jerobeama o re: Morena Modimo wa Isiraele o re: Ke go hlaotše ka go godiša mo setšhabeng, ka go bea wa ba moetapele wa setšhaba sa ka sa Isiraele.

8Leloko la Dafida ke le amogile mmušo ka nea wena; gomme wena wa se ke wa etša Dafida mohlanka wa ka e a bego a hlokomela ditaelo tša ka, e a bego a swere ka tsela ya go latela nna ka pelo ya gagwe ka moka, a fela a dira tše nna ke rego di lokile.

9Wena o dirile tše mpe wa fetiša bohle ba ba bego ba le gona pele ga gago, wa itirela medimo e šele ya diswantšho, wa nthumola, wa ntahla wa fulara.

10Bjale nna, leloko la Jerobeama ke tlo le tlišetša bošula ka ba ka fediša banna ka moka ba gaJerobeama, ba e sa lego magokgolana le ba ba fahlogilego. Bana ba leloko la Jerobeama ke tlo ba kgola boka maudi gwa se šale le o tee.

11Wa gaJerobeama e a tlogo hwela motseng, o tlo lewa ke dimpša; e a tlogo hwela nageng, o tlo lewa ke dinong tša godimo; ka gobane Morena o realo.

12Bjale tsoga o boele gae; e tlo re ge dinao tša gago di tsena motseng, ya ba mo ngwana a hwago.

13Baisiraele ka moka ba tlo mo llela, ba mmoloka lebitleng. Gomme mo go ba leloko la Jerobeama ke yena fela a tlogo bolokwa lebitleng; ka gobane mo go ba gaJerobeama ke yena fela a hweditšwego a na le tše di kgahlago Morena Modimo wa Isiraele.

14Gomme Morena o tlo itsemela kgoši go Isiraele, ye e tlogo fediša leloko la Jerobeama ka lona tšatši leo; mme le bjale go sa šetše eng?

15Morena o tlo otla Isiraele a tlo etša lehlakanoka ge le roromela mo nokeng, a be a rake Isiraele mo nageng e botse ye a e neilego botatabo, a ba gašanyetša kua mošola wa noka, molato e le dikokwane tše ba itiretšego tšona ba rumola Morena.

16Baisiraele o tlo ba lahla ka baka la dibe tša Jerobeama tše a di dirilego a ruta Isiraele go dira dibe.

17Mosadi wa Jerobeama a tsoga, a sepela, a tla Thiritsa. Ya re ge a fihla serepoding sa ngwako, mošimanyana a hwa.

18Ba mmoloka; Baisiraele ka moka ba mo llela; gwa phethega se Morena a se boletšego ka mohlanka wa gagwe Ahia moporofeta.

19Ditaba tše dingwe tša Jerobeama, tša go hlabana le tša go buša ga gagwe di ngwadilwe mo pukung ya ditaba tša kgale tša dikgoši tša Isiraele.

20Nywaga ye Jerobeama a e feditšego a le kgoši ke masome a mabedi a metšo e mebedi; a ithobalela le botatagwe. Gomme Nadaba morwa wa gagwe a buša legatong la gagwe.

21Rehabeama morwa wa Salomo o be a buša Juda. Mola Rehabeama a tšea bogoši o be a na le nywaga e masome a mane a motšo o tee, a fetša nywaga e lesome le metšo e šupago a le kgoši Jerusalema motseng wo Morena a o kgethilego dileteng ka moka tša Isiraele gore a bee leina la gagwe ntshe. Leina la mmagwe e be e le Naama wa Moamoni.

22Le ba Juda ba dira tše di befelago Morena, ba tsoša kgalefo ya Morena go fetiša botatabo ka dibe tše ba bego ba di dira.

23Le bona ba ikagela meboto, ba itirela diswantšho le dikokwane mo mebotong ka moka le mo dihlareng tše di teteanego.

24Le gona go be go na le dihlotlolo, ba dira makgapa ka moka a ditšhaba tše Morena a di rakilego mola Baisiraele ba fihla.

25Ka ngwaga wa bohlano wa mmušo wa Rehabeama gwa rotoga Sisaka kgoši ya Egipita, a lwa le Jerusalema.

26A tšea mahumo a ngwako wa Morena, le mahumo a ngwako wa kgoši; a tšea tšohle, le dikotse tšela tša gauta tše Salomo a di dirilego.

27'Bakeng sa tšona kgoši Rehabeama a dira dikotse tša mphiri; a di laelela seatleng sa molaodi wa dikala tša go leta kgoro ya mošate.

28E be e re ka mehla ge kgoši e eya ngwakong wa Morena, dikala di rwala dikotse tšeo, ka morago di di bušetše ngwakong wa dikala.

29Tše dingwe ditaba tša Rehabeama, le tšohle tše a di dirilego, naa ga di a ngwalwa mo pukung ya ditaba tša kgale tša dikgoši tša Juda?

30Ge e le ntwa yela ya ge Rehabeama a elwa le Jerobeama, yona e be e le gona ka mehla.

31Rehabeama o ithobaletse le botatagwe; o bolokilwe le botatagwe motseng wa Dafida. Leina la mmagwe e be e le Naama wa Moamoni. Legatong la gagwe gwa buša Abiama morwa wa gagwe.

← Chapter 13 Jump to: Chapter 15 →