1 Kings 4

Sotho 1951 (BIBELE)

← Chapter 3 Jump to: Chapter 5 →

1Kgoši Salomo o be a buša Isiraele ka moka.

2Bakgoma ba gagwe e be e le Asaria morwa wa Tsadoko moperisita,

3le Elihorefe le Ahia barwa ba Sisa, bona e be e le bangwadi, le Josafate morwa wa Alihudi, yena e be e le letona le legolo,

4le Benaya morwa wa Joyada, yena e be e le molaodi wa madira, le Tsadoko le Abyathara, bona e be e le baperisita.

5Asaria morwa wa Nathane e be e le molaodi wa balaki; Sabudi morwa wa Nathane e be e le moperisita le mogwera wa kgoši.

6Ahisara e be e le molaki wa ngwako; Adonirama morwa wa Abida e be e le molaki wa makgetho.

7Le gona Salomo o be a na le balaki ba lesome le metšo e mebedi ba go laka Isiraele ka moka. E be e le ba go nyakela kgoši le ngwako wa gagwe tša go phela. Ba be ba beetšwe kgwedi e tee e tee ka ngwaga.

8Maina a bona šea: Bene Huri wa dithabeng tša Efuraimi,

9Bene-Dekere wa Makatse le Salabima le Bethe-Semese le Elone le Bethe-Hanana,

10Bene-Hesede wa Arubothe le Soko le naga ka moka ya Hefere,

11Bene-Abinadaba wa molala ka moka wa Doro, mosadi wa gagwe e be e le Tafate morwedi wa Salomo,

12Baana morwa wa Alihudi wa Thaanake le Megido le Betheseana ka moka go bataganego le Tharathane, le la ka tlase ga Jeseriele go tloga ka Betheseana go fihla ka Abele-Mehola le go fetela kua pele ga Jokoneama,

13Bene-Gebere wa kua Ramothe go la Gideada le la metsana ya Jairi morwa wa Manase a lego gona kua Gileada, le meboto ya Arigobo ya kua Basani; e be e le metse e megolo e masome a selelago e nago le merako le dipheko tša tshipi,

14Abinadaba morwa wa Ido wa Mahanaime,

15Ahimaatse wa Nafutali, le yena o be a tšere morwedi wa Salomo, Basimatha, ya ba mosadi wa gagwe,

16Baana morwa wa Husai wa naga ya Asere le Bealothe,

17Josafate morwa wa Parua wa naga ya Isashara,

18Simei morwa wa Ela wa naga ya Benyamini,

19Gebere morwa wa Uri wa naga ya Gileada e bego e le ya Sihoni kgoši ya Ba-Amoro le ya Ogo kgoši ya Basani. Molaki mo nageng yeo e be e le yena a nnoši.

20Batho ba Juda le ba Isiraele e be e le ba bantši boka lešabašaba la lewatleng; ba be ba eja ba enwa ba thabile.

21Gomme Salomo o be a buša mebušo ka moka go goma ka noka ya Forate le ka mellwane ya Bafilisita le ya Egipita; ba be ba ntšha dibego, ya ba balata ba Salomo ka mehla a sa phela.

22Dijo tša Salomo tša letšatši letee e be e le kgetsi tše masome a mararo tša bupi bjo bo tokilwego, le kgetsi tše masome a selelago tša bupi bjo bongwe.

23Le dikgomo tše lesome tše di nontšhitšwego, le dikgomo tše masome a mabedi tša mafulong, le dinku tše lekgolo, go sa balwe diphala, le dikome, le matlabo, le tše e kego dikgogo tše di nontšhitšwego.

24Gobane o be a buša mo go fela mošono wa noka go goma ka Tifisa le ka Gatsa, a buša dikgoši ka moka tša mošono wa noka; mme o be a kwana le bohle ba ba neanego mellwane le yena.

25Gomme Bajuda le Baisiraele ba be ba dutše ba iketlile moriting wa merara ya bona le wa mego ya bona, go tloga ka Dani go fihla ka Bereseba mehla yohle ya go phela ga Salomo.

26O be a na le dipitsi tša dikoloi tše dikete tše seswai, le banamedi ba dipitsi ba dikete tše lesome le metšo e mebedi.

27Balaki bala ba be ba nyaka dijo tša kgoši le tša bohle ba ba jago tša meruswing ya gagwe: e mongwe le e mongwe a dira ka kgwedi ya gagwe, mme ba se hlokafatše selo.

28E mongwe a tliša mabele le mahlaka a dipitsi le a dikamela, a di bea felo ga tšona ka mo ba laetšwego ka gona.

29Gomme Modimo a nea Salomo bohlale le tsebo e kgolo ka kudu. Pelo ya gagwe e be e akaretša dilo tše bontši boka lešabašaba la lewatleng.

30Bohlale bja Salomo bja gola bja feta bohlale bja ba bohlabela, le mahlale ka moka a Baegipita.

31A ba le bohlale bjo bo fetago bja batho ka moka, le bja Ethane wa Esere, le bja Hemane, le bja Kalakolo, le bja Dareda barwa ba Mahole. Leina la gagwe la tuma ditšhabeng tšohle tše di bego di agile mathokong a go fela.

32A bolela ka diema tše dikete tše tharo; mme difela tša gagwe e be e le tše sekete le metšo e fetšago seatla.

33O be a tseba go bolela tša dihlare tša merokwana tša Libanoni le tša semelanyana se se hlogago morakong, le tša diphoofolo le tša dinonyana, le tša digagabi le tša dihlapi.

34Batho ba be ba etšwa ditšhabeng ka moka ba tla go kwa bohlale bja Salomo; ba tla ba etšwa go magoši a lefase ka moka a kwelego bohlale bja gagwe bo bolelwa.

← Chapter 3 Jump to: Chapter 5 →