1 Kings 3

Sotho 1951 (BIBELE)

← Chapter 2 Jump to: Chapter 4 →

1Gomme Salomo a itswalanya le Farao kgoši ya Egipita ka go tšea morwedi wa Farao, a mo tliša motseng wa Dafida; a dula moo go fihla ge Salomo a feditše go aga ngwako wa gagwe, le Ngwako wa Morena, le morako wa go agelela Jerusalema.

2Setšhaba mehleng yeo se be se sa iša didimo mo mebotong, gobane leina la Morena le be le sešo la agelwa ngwako.

3Salomo o be a rata Morena, a phela ka mokgwa wa Dafida tatagwe; fela, o be a sa iša didimo le diorelo kwa mebotong.

4Kgoši e kile ya ya Gibeoni go iša didimo ntshe, ka gobane mmoto wa gona e be e le o mogolo; Salomo a hlaba dihlabelo tše sekete mo aletareng ya ntshe.

5Bošego bjoo a le Gibeoni a bona Morena ka diloro, mme Modimo a re: Kgopela se nkago go nea.

6Salomo a re: Dafida tate mohlanka wa gago o be o mo dira ka botho bjo bogolo, ka mo a bego a phela pele ga gago, a go botegetše, a lokile, a le pelobolo a na nago; gomme botho bjo bogolo bjoo wa nama nabjo, wa ba wa mo nea morwa wa go dula sedulong sa gagwe ka mokgwa wo wa mehla yeno.

7Bjalo Morena Modimo wa ka, nna mohlanka wa gago o ntirile kgoši legatong la Dafida tate. Fela, ke sa le lesogana, mme ga ke ešo ka tseba go tšwa le go tsena.

8Nna mohlanka wa gago ke mo gare ga setšhaba se segolo sa gago se o se kgethilego, se se sa balwego sa tsebja bontši bja sona.

9Nea mohlanka wa gago pelo e kwago, gore a kgone go buša setšhaba sa gago, a hlaologanye botse le bobe; ka gobane setšhaba sa gago se sekaakaa se ka bušwa ke mang?

10Gomme Morena a kgahlwa ke polelo ye, ge Salomo a kgopela sona seo.

11Modimo a fetola a re: Ke fetola kgopelo ya gago, ge o sa ikgopelele go phela galelele, o sa ikgopelele mahumo, o sa ikgopelele gore manaba a gago a bolawe; wa ikgopelela bohlale gore o kgone go kwa ditaba,

12bjalo šedi, ke dira se o se boletšego. Tseba gore ke go nea pelo e bohlale ya temogo, ye o tlogo phala ba kgale ka yona; mme ga go sa tlo tsoga e a swanago nago.

13Gomme le tše o sa kago wa di kgopela ke tlo go nea, lehumo le bogolo. Mo go magoši ohle a mehleng ya gago go ka se ke gwa ba le e a lekanago nago.

14Le gona, ge o ka swara ka ditsela tša ka, wa hlokomela melao ya ka, le ditaelo tša ka boka Dafida tatago, ka mo e bego e le mokgwa wa gagwe, gona ke tlo lelefatša bophelo bja gago.

15Ke mo Salomo a phafogilego a bona e le diloro. A boela Jerusalema, a ema pele ga polokelo ya kgwerano ya Morena, a tliša dihlabelo le dileboga, gomme bahlanka ba gagwe ka moka a ba direla monyanya.

16Mehleng yeo go kile gwa tla basadi ba ba babedi ba diotswa, ba bega taba.

17E mongwe wa bona a re: Joo mongaka! Nna le mosadi e re dula ngwakong o tee; nna ka belega ke le nae ngwakong woo.

18Ke itše go belega, ya re ka la boraro le yena a belega. Re be re dutše moo, go se motho e mongwe ka ngwakong ge e se rena ba babedi fela.

19Bjalo ngwana wa mosadi e a hwa bošego ka gobane a mo gatile malaong.

20A tsoga e sa le bošego, a tšea ngwana wa ka lehlakoreng la ka, nna molata wa gago ke sa ile le boroko, a mo gokarela, nna a nkgokarišitše e a hwilego.

21Ka moswana ge ke phafoga, ke ge re ke amuša ngwanake, ka bona a hwile. Ge go sele ka mo lebeleša ka bona e se ngwanake yo ke mmelegego.

22Mosadi ela e mongwe a re: Aowa, e a phelago ke ngwanake; wa gago ke eo a hwilego. Yena a re: Aowa, wa gago ke yo a hwilego, wa ka ke eo a phelago. Ba bolela ka mokgwa wo pele ga kgoši.

23Kgoši ya re: Yono o re: Ngwanake ke e a phelago, gomme e a hwilego ke wa gago! Yola o re: Aowa, wa gago ke e a hwilego; nna ngwanake ke e a phelago e!

24Kgoši ya re: Tlišang tšhoša! Ba tliša tšhoša gona moo pele ga kgoši.

25Kgoši ya re: Ripaganyang ngwana eo a phelago, le dire diripa tše pedi; yo le mo nee mphapa; le yola le mo nee mphapa.

26Ke mo mosadi eo e bego e le yena mmago ngwana e a phelago a šoketšwego ngwana wa gagwe, a re: Hle mong wa ka! Mo neele ngwana a sa phela; o se ke wa mmolaya! Yola e mongwe a re: A se ke a ba wa ka le ge e le wa gago; a ripaganywe!

27Ke mo kgoši e fetotšego ya re: Neelang yo ngwana e a phelago; le se ke la mmolaya; ke yena mmagwe.

28Baisiraele ka moka ge ba ekwa tša kahlolo ye, ka mo kgoši e ripilego kgang ka gona, ba boifa kgoši ge mo go yona go le bohlale bja Modimo bja go ahlola.

← Chapter 2 Jump to: Chapter 4 →