1 Kings 5

Sotho 1951 (BIBELE)

← Chapter 4 Jump to: Chapter 6 →

1Le Hirama kgoši ya Tiro a roma batseta ba gagwe ba tla go Salomo. Gobane o be a kwele ge ba mo tloditše a ba kgoši legatong la tatagwe; ka gobane o be a rata Dafida ka mehla.

2Salomo a iša lentšu go Hirama a re:

3Le wena o a di tseba, ge Dafida tate a sa ka a kgona go agela leina la Morena Modimo wa gagwe ngwako, ka baka la dintwa tše ba bego ba mo dikile ka tšona, go fihla ge Morena a ba bea ka tlase ga dinao tša gagwe.

4Bjale nna, Morena Modimo wa ka o mphile khutšo thoko tšohle; ga go sa le lenaba, ga go sa na se se boifišago.

5Ke gona ke ratago go agela Morena Modimo wa ka Ngwako wo Morena a o boletšego, a botša Dafida tate a re: Morwa wa gago yo ke tlogo mmea sedulong sa gago legatong la gago, ke yena a tlogo agela leina la ka Ngwako.

6A nke o laele hle gore ba nthemele dikota tša morokwana dithabeng tša Libanoni. Bahlanka ba ka ba tlo dirišana le bahlanka ba gago; mme nna ke tlo go ntšhetša meputso ya bahlanka ba gago ka mo o tlogo bolela ka gona; ka gobane o a tseba, mo go rena ga go motho e a tsebago go rema dihlare a etša Basidone.

7Hirama a re go kwa ge Salomo a realo, a thaba gagolo, a re: Lehono Morena a a lebogwe ge a file Dafida morwa yo bohlale bja go buša setšhaba se segolo seo.

8A iša lentšu go Salomo a re: Lentšu le o nthometšego lona ke le kwele. Ke tlo dira se o se ratago, ka go remela dihlare tša morokana le tša megobogobo.

9Bahlanka ba ka ba tlo di ntšha dithabeng tša Libanoni, ba di fološa ba di tliša lewatleng. Mo lewatleng di tlo tlemaganywa tša ruthišwa, tša išwa mo o tlogo ntaela gona, mo wene o tlogo tla wa di tšea. Se wene o tlogo se dira wa thabiša nna, ke go tliša dijo motseng wa ka.

10Ke moka Hirama a nea Salomo dihlare tša morokwana le tša megobogobo, ka mo a ratago ka gona.

11Salomo a nea Hirama dikgetsi tša mabele tše dikete tše masome a mabedi, le meeta e dikete tše masome a mabedi tša makhura a mehlware; a di ntšha ka ngwaga o mongwe le o mongwe.

12Gomme Morena a fa Salomo bohlale ka mo a mmoditšego, Salomo le Hirama ba ba le leago, ba ba ba dira kgwerano.

13Go Isiraele ka moka kgoši ya ntšha sepalo. Batho ba sepalo ya ba banna ba dikete tše masome a mararo.

14A ba roma ba ya dithabeng tša Libanoni ka go šielana sebaka ka ba dikete tše lesome. Ba ya ba fetša kgwedi e tee ba le dithabeng tša Libanoni, ba boa ba fetša dikgwedi tše pedi ba le magaeng. Mohlapetši wa ba dipalo e be e le Adonrirama.

15Le gona Salomo o be a na le banna ba dikete tše masome a šupago ba go rwala dikago, le babetli ba maswika dithabeng ba dikete tše masome a seswai,

16go sa balwe bahlapetši ba dikete tše tharo le makgolo a mararo, ba Salomo a bego a ba beile gore ba hlapetše badiri ba mediro.

17Kgoši e be e laetše gore go tlišwe maswika a magolo a boima, gore motheo wa Ngwako o agiwe ka maswika a a betlilwego.

18Gomme baagi ba Salomo, le baagi ba Hirama, le ba Gebala, ba betla dikota le maswika a go aga ngwako.

← Chapter 4 Jump to: Chapter 6 →