1 Kings 9

Sotho 1951 (BIBELE)

← Chapter 8 Jump to: Chapter 10 →

1Mehleng yeo ya ge Salomo a feditše go aga Ngwako wa Morena, le ngwako wa mošate, a phethile tšohle tše a bego a belaela a duma go di dira,

2Morena a buša a iponagatša go Salomo, bjalo ka mola a iponagatša go yena a le kua Gibeoni.

3Gomme Morena a mo rera a re: Thapelo ya gago ke e kwile, le topo ya gago ye o e tlišitšego pele gaka. Ngwako wo o o agilego ke o kgethile ka go bea leina la ka ntshe ka go sa felego; gomme mahlo a ka le pelo ya ka di tlo ba gona mo ka mehla le mehla.

4Ge le wena o ka sepela pele ga sefahlogo sa ka wa etša Dafida tatago ka pelobolo le ka go loka, wa dira tšohle tše ke go laetšego tšona, wa hlokomela melao ya ka le mekgwa ya ka,

5ke mo ke tlogo tiiša sedulo sa bogoši bja gago bja go buša Isiraele ka go sa felego, ka mo ke boditšego Dafida tatago ka re: O ka se ke wa hlokišwa monna mo sedulong sa gago sa go buša Isiraele.

6Fela, ge le ka ntlhanogela, lena le bana ba lena, ge le sa hlokomele ditaelo tša ka le melao ya ka ye ke e beilego pele ga lena, mme la ya la hlankela medimo e šele la e khunamela,

7gona ke tlo fediša Baisiraele mo nageng ye ke ba neilego yona. Le Ngwako wo ke o kgethetšego leina la ka, nka se hlwe ke o lebelela; gomme Isiraele o tlo ba wa go nyefolwa le wa go kwerwa ditšhabeng ka moka.

8Gomme Ngwako wono e tlo ba wa matlawa, e a fetago a tlo tlabega a letša molodi, a re: Ke ka baka lang ge Morena a dirile naga ye le Ngwako wo ka mokgwa wo?

9Ke mo ba tlogo re: Ke ka gobane ba lahlile Morena Modimo wa bona e a ntšhitšego botatabo nageng ya Egipita, ba gomarela medimo e šele ba e khunamela. Ke ka baka leo Morena a tlišitšego bošula bjo ka moka godimo ga bona.

10Go fedile nywaga e masome a mabedi ge Salomo a aga nywako e mebedi yeo, e lego Ngwako wa Morena le ngwako wa kgoši.

11Hirama kgoši ya Tiro o thušitše Salomo ka dihlare tša morokwana, le ka digauta, le ka tšohle tše Salomo a bego a di rata. Kgoši Salomo a tsebo nea Hirama metse e masome a mabedi nageng ya Galilea.

12Hirama a tla a etšwa Tiro, a bona metse ye Salomo a mo neetšego yona; fela, ga ya ka ya mo kgahla.

13A ba a re: Ngwanešo, metse ye o nneetšego yona ke e mebjang? Ke mo go tšwago leina la naga yeo ge le lehono ba sa re ke ya Kabulu.

14Ge e le Hirama o be a rometše kgoši gauta ya ditalente tše lekgolo le masome a mabedi.

15Se taba ya dipalo tše kgoši Salomo a di ntšhitšego ge a aga Ngwako wa Morena, le ngwako wa gagwe, le sebo sa Milo, le morako wa Jerusalema, le Hatsora, le Megido, le Gesere.

16Farao kgoši ya Egipita o kile a rotoga a hula motse wa Gesere, a bolaya Bakanana ba motseng woo, mme a o neela morwedi wa gagwe e bego e le mosadi wa Salomo, ya ba neo.

17Gomme Salomo a aga motse woo wa Gesere, le wa Bethehoroni wa ka tlase,

18le wa Baalathe, le wa Thamara o lego lešokeng la nageng yeo,

19le metse ka moka ya dišego ye Salomo a bego a na nayo, le metse ya dikoloi, le metse ya banamedi ba dipitsi, le tše Salomo a ratilego go di aga Jerusalema le Libanoni le mo go fela nageng ya mmušo wa gagwe.

20Batho ka moka ba mašalela a Baamora le a Bahethe, le a Baperesi, le a Bahefi, le a Bajebusi, bohle ba e bego e se Baisiraele,

21bana ba bona bao ba ba šetšego mo nageng mola Baisiraele ba fihla, le bao Baisiraele ba šitilwego go ba raka, ke bona bao Salomo a ba išitšego dipalong; le lehono e sa le bahlanka.

22Ge e le Baisiraele bona Salomo ga a ka a ba dira bahlanka; bona e be e le bahlabani, le ba dikala tša gagwe, le balaodi ba dikoloi tša gagwe le banamedi ba dipitsi.

23Ke bona ba e bego e le bagolo le bahlapetši ba mediro ya Salomo e le ba makgolo a mahlano le masome a mahlano; e be e le ba go buša batho ba ba dirago mediro.

24Sebo sa Milo Salomo o thomile go se aga mohla morwedi wa Farao a tšwilego motseng wa Dafida a khudugela ngwakong wa gagwe wo a o agetšego ke Salomo.

25Salomo o be a hlaba dihlabelo gararo ka ngwaga, a tliša le dileboga mo aletareng ye a e agetšego Morena a thuntšha diorelo mo go yona mola a feditše go aga Ngwako.

26Kgoši Salomo o agile le maselawatle motseng wa Etsionegebere o lego kgauswi le Elathe Lewatleng la Mahlaka nageng ya Edomo.

27Gomme Hirama a roma bahlanka ba gagwe ba ba hlalefetšego maselawatle mme ba tseba lewatle, ba sepediša maselawatle ba na le bahlanka ba Salomo.

28Ba ya Ofira, ba boa le digauta tša ditalente tše makgolo a mane le masome a mabedi, ba di tliša go Salomo.

← Chapter 8 Jump to: Chapter 10 →