1 Samuel 1

Sotho 1951 (BIBELE)

Jump to: Chapter 2 →

1Go be go na la monna e mongwe wa Ramathaima-Tsofima wa dithabeng tša Efuraimi; leina la gagwe e be e le Elikana morwa wa Jerohama, morwa wa Elihu, morwa wa Thohu, morwa wa Tsufi wa ga Efuraimi.

2Monna e o be a na le basadi ba babedi; leina la e mongwe e be e le Hanna, la wa bobedi e be e le Penina. Penina o be a na le bana; Hanna yena o be a se na bana.

3Monna e o be a fela a etšwa ga gabo ka ngwaga, a rotogela Silo go yo rapela Morena wa Mašaba, le go iša didimo. Gona moo baperisita ba Morena e be e le barwa ba babedi ba Eli, Hofini le Pinehase.

4Elikana, mohla a hlabilego sedimo, o be a nea mosadi wa gagwe Penina, le barwa ba gagwe, le barwedi ba gagwe ka moka dikabelo.

5Hanna a mo nea kabelo ye e lekanago le tše pedi, ka gobane o be a mo rata, le ge Morena a sa ka a mo nea bana.

6Mogaditšong wa gagwe a lwa lehufa nae, gore a mo hlohle ka ge Morena a sa ka a mo nea bana.

7A dira ka mokgwa woo ka ngwaga o mongwe le o mongwe ge ba rotogetše Ngwakong wa Morena, a lwa lehufa nae. Hanna a lla, a lesa le go ja.

8Elikana monna wa gagwe a mo rera a re: Hanna, o llelang? O reng o sa je selo? Pelo ya gago e šulafetšeng? A nna ga ke a go lekana ka fetiša barwa ba lesome?

9Ya re ge ba lle ba nwele, ba le gona moo Silo, Hanna a tsoga. Ke ge mojakong wa Ngwako wa Morena go dutše Eli moperisita mo sedulong.

10Hanna a tla a nyamile pelo, a rapela Morena, a lla ka kudu.

11A ba a ena ka keno a re: Morena wa Mašaba, ge o ka lebelela bobotlana bja nna molata wa gago, wa nkgopola, wa se ntebale, nna molata wa gago, wa nnea ngwana wa mošimanyana, gona ke tlo mo gafela Morena bophelo bja gagwe ka moka; gomme mo hlogong ya gagwe go ka se ke gwa batamela legare.

12Eitše ge a fela a rapela a le pele ga Morena, Eli a šetša molomo wa gagwe.

13Gobane Hanna o be a bolela ka pelo, melomo ya gagwe e benyabenya fela, a sa kwatše lentšu. Eli a ba a re o tagilwe.

14A mo rera a re: O tlo kgaotša neng go dira tša botagwa? Thoma go tlogwa ke kgang.

15Hanna a fetola a re: Aowa, mongaka; nna ke mosadi e a nyamilego pelo; ga nka ka nwa morara le ge e le sedila. Nna ke tšholotše tša pelong ya ka fa pele ga Morena.

16Nna molata wa gago o se ke wa ntshema sehlola. Ke diegile mo ke boledišwa ke bonntši bja manyami le masetlapelo a ka.

17Eli a fetola a re: Sepela o rotše pelo; Modimo wa Isiraele o tlo go nea tše o di kgopetšego go yena.

18Hanna a re: A mahlo a gago a ntebelele ka botho, nna molata wa gago. Gomme mosadi eo a ikela ka tsela ya gagwe, a ja; gomme sefahlogo sa gagwe sa se ke sa etša sa bomaloba.

19Ka la ka moswana ba tsoga e sa le bošego, ba bea thapelo pele ga Morena, ba tsebo boela gae kua Rama. Elikana a tseba Hanna mosadi wa gagwe; gomme Morena a mo gopola.

20Ge go fetile lebakanyana ke ge Hanna a ithwele, a belega ngwana wa mošimanyana, a mo rea leina la Samuele, ka gobane a re: Ke mo kgopetše go Morena ka fiwa.

21Bjale ge monna eo Elikana le ba lapeng la gagwe ba rotogela go išetša Morena didimo tša ka mehla le tša dikeno,

22Hanna a se ke a rotoga nabo; a botša monna wa gagwe a re: E tlo re ge mošimanyana a tshwele, ke mo ke tlogo mo iša gore a bonale pele ga Morena, a dule ntshe ka mehla le mehla.

23Elikana monna wa gagwe a re: Dira ka mo o ratago. Dula mo gae, o be o mo tshweše. Tabakgolo ke ge Morena a phetha se a se boletšego. Ke moka mosadi a šala a amuša ngwana wa gagwe, a ba a mo tshweša.

24Ya re ge a mo tshwešitše a rotoga a tla nae, a na le dipowana tše tharo, le seroto sa bupi, le sebjana se se tletšego morara, a mo iša Ngwakong wa Morena kua Silo; gomme mohlankana yo e be e sa le e monyenyane.

25Ba hlaba powana, ba iša mošimanyana go Eli.

26Hanna a re: Hle mongaka! Ka bophelo bja gago, ke nna mosadi yola e nkilego ka ema gona fa ke rapela Morena.

27Ke be ke mo kgopela gore a mphe mošimanyana e; gomme Morena o mphile se ke se kgopetšego go yena.

28Bjale le nna ke mo gafela Morena gore e be wa gagwe ka mehla yohle ya go phela ga gagwe, ka gobane o kgopetšwe go Morena. Gomme ba khunamela Morena ba le gona moo.

Jump to: Chapter 2 →