1 Samuel 6

Sotho 1951 (BIBELE)

← Chapter 5 Jump to: Chapter 7 →

1Polokelo ya Morena ya dula nageng ya Bafilisita, gwa ba gwa fela dikgwedi tše di šupago.

2Bafilisita ba bitša bomphamodimo le dingaka, ba re: Re tlo dira bjang ka polokelo ya Morena Modimo wa Isiraele? Re botšeng mokgwa wa go bušetša kua ga gayo.

3Banna bao ba re: Ge le rata go gomiša polokelo ye ya Modimo wa Isiraele, le se ke la e romela e le fela. Le e gomiše ka seloba; gona le tlo fola, la tlo tseba gore seatla sa gagwe se be se reng se sa le lese.

4Ba re: E ka ba seloba mang seo re kago loba ka sona? Bala ba re: Yang ka palo ya dikgošana tša Bafilisita, le bope diswantšho tše tlhano tša dišo, le tše tlhano tša magotlo; ka gobane kotlo e wetšego lena le dikgošana tša lena ke ya mohuta o tee.

5Dirang diswantšho gee tša dišo tša lena le tša magotlo a sentšego naga ye, le lobe Modimo wa Isiraele ka tšona. Mohlomong a ka gomiša seatla sa gagwe mo go lena le go modimo wa lena le go naga ya lena.

6Le reng le thatafatša dipelo tša lena la etša Baegipita le Farao, mola ba thatafatša dipelo tša bona? A ga a ka a ba swara ka maatla, ba ba ba lesa Baisiraele ba sepela!

7Bjale napang le dire koloi e mpsha, le tšee kgomotswetši tše pedi tše di sešogo tša rwešwa joko, le di tleme koloing; ga e le mamane a tšona le a šadiše gae.

8Le tšee polokelo ya Morena, le e bee koloing yeo; le dilwana tšeo tša gauta, tše le lobago ka tšona, le di tsenye mo polokelwaneng ya tšona; le di lese di ikele.

9Gomme le lebelele: Ge e ka tšea tsela ya go ya ga gayo, ya rotogela Bethe-Semese, gona e tlo ba e le yena e a re dirilego bošula bjo bokaakaa. Ge e sa boele gona kua, gona re tlo tseba gobane ga se seatla sa gagwe se se re otlilego, di filo re tlela fela.

10Gomme batho ba dira ka mokgwa woo, ba tšea kgomotswetši tše pedi, ba di tlema koloing, ba tswallela mamane a tšona ka šakeng.

11Polokelo ya Morena ba e bea koloing, le polokelwana e swerego diswantšho tša magotlo le tša dišo tša bona, tše ba di dirilego ka gauta.

12Bjale dikgomo tšeo tša swara tsela ye e yago Bethe-Semese; tša tloga ka mmila di tšama di lla, tša se ke tša fapogela thoko. Gomme dikgošana tša Bafilisita tša e felegetša go fihla mollwaneng wa Bethe-Semese.

13Ba Bethe-Semese ba be ba buna mabele moeding. Ge ba gadia ba bona polokelo; gomme ba thaba ge ba e bona.

14Koloi ya tla tšhemong ya Jošua wa Bethe-Semese, ya ema ntshe. Gona fao go be go na le lwala le legolo. Gomme ba phapha diphata tša koloi, ba hlaba dikgomo tšeo, ba direla Morena sehlabelo.

15Balefi ba rwala polokelo ya Morena, le polokelwana e swerego dilwana tšela tša gauta, ba di bea lwaleng le legolo leo. Gomme batho ba Bethe-Semese ba tlišetša Morena dihlabelo, ba tliša didimo ka lona tšatši leo.

16Dikgošana tše tlhano tša Bafilisita tša di bona tša tsebo boela Ekironi ka lona tšatši leo.

17Ge e le dilwana tšela tša gauta tše di bego di swantšha dišo, tše Bafilisita ba lobilego Morena ka tšona, se sengwe e be e le sa Asidodo, se sengwe e le sa Gasa, se sengwe e le sa Asikaloni, se sengwe e le sa Gathe, se sengwe e le sa Ekironi.

18Le diswantšho tšela tša magotlo, tše di dirilwego ka gauta, di be di eya ka palo ya metse ya Bafilisita e bego e bušwa ke dikgošana tše tlhano; e mengwe e be e le metse ya dibo, e mengwe e le metsana ya naga. Lwala le legolo, le go kilego gwa bewa polokelo ya Morena go lona kua tšhemong ya Jošua wa Bethe-Semese, le bjale e sa le hlatse ya taba ye.

19Batho ba bangwe ba Bethe-Semese ba bolailwe ka gobane ba hlola tše di lego polokelong ya Morena; a bolaya banna ba masome a šupago go ba dikete tše masome a mahlano. Batho ba lla ka baka la ge Morena a ba bolaile gakaakaa.

20Batho ba Bethe-Semese ba re: Go ka kgona mang go ema pele ga Morena Modimo yo e mokgethwa? A ka tloga mo a yo gorogela kae?

21Ba roma batseta ba yo botša ba Kiryathe-Jearima ba re: Bafilisita ba bušitše polokelo ya Morena. Theogang, le e rotošetšo go lena.

← Chapter 5 Jump to: Chapter 7 →