1 Samuel 22

Sotho 1951 (BIBELE)

← Chapter 21 Jump to: Chapter 23 →

1Dafida a tloga moo a tšhabela mphomeng wa Adullama. Bjale bana babo le ba leloko la tatagwe ka moka, ge ba ekwa fao, ba fologela go yena gona moo.

2A kgobokanelwa ke banna ka moka ba ba bego ba pateletšwe, le ba ba bego ba na le molato, le ba ba bego ba senyegile dipelo; yena a ba molaodi wa bona, ba dula le yena, e nyakile go ba banna ba makgolo a mane.

3Gomme Dafida a tloga moo a ya motseng wa Mitsipa wa Moaba, a kgopela kgoši ya Moaba a re: A tate le mme ba khudugele mono, ba dule mo go lena go fihla ge ke bona mo Modimo a tlogo ntira ka gona.

4A ba tliša go kgoši ya Moaba, ba dula ntshe lebaka ka moka la ge Dafida a sa le sebong.

5Moporofeta Gada a bolela le Dafida a re: O se ke wa dula mo sebong; tloga o ye nageng ya Juda. Dafida a tloga a ya sekgweng sa Herethe.

6Saulo a botšwa gore Dafida o kwetše le banna ba ba nago nae. Ke mola Saulo a dutše Gibea mohloping o lego kua mmotong, a swere lerumo ka seatla, bahlanka ba gagwe ka moka ba eme mo go yena.

7Saulo a bolela le bahlanka ba gagwe ba ba bego ba eme mo go yena, a re: Hle kwang, lena barwa ba Benyamini! Afa morwa wa Isai o tlo le enetša ka mašemo le ka dirapa tša merara? A o tlo le dira ka moka balaodi ba dikete le ba makgolo?

8Lena ka moka le ntakane, gwa hlokwa le wa go ntshebela ge morwa wa ka a gwerane le morwa wa Isai. Le gona ga go e a nkwetšego bohloko a ntsebiša ge morwa wa ka a hlohleletša mohlanka yo wa ka a ntsogela ka mokgwa wo re o bonago lehono.

9Gwa fetola Doege, Moedomo yola, a eme le bahlanka ba Saulo a re: Nkile ka bona morwa wa Isai a etla kua Nobe go Ahimeleke morwa wa Ahitobo.

10Yena eo a mo rerelela go Morena, a mo fa le mefago, a ba a mo nea le tšhoša ya Goliata Mofilisita ela.

11Kgoši ya napa ya roma bahlanka ba bitša Ahimeleke morwa wa Ahitobo moperisita, le bohle ba leloko la tatagwe, baperisita ba Nobe; ba tla go kgoši ka moka ga bona.

12Saulo a re: A o a nkwa, morwa wa Ahitobo? Yena a re: Ke nna e, Mongaka!

13Saulo a re: Le reng le ntakana ka moka, wena le morwa wa Isai, ge o mo neetše dinkgwa le tšhoša, wa mo rerelela go Modimo, e le gore a ntsogele a ntalele ka mokgwa wo re o bonago lehono?

14Ahimeleke a fetola a re: Gomme ke mang mo go bahlanka ba gago ka moka e a botegago bjalo ka Dafida mokgonyana wa kgoši, yena a phalago bohle ba ba go kwago, moretwa mo motseng wa gago?

15A o re ke mathomo lehono ge ke mo rerelela go Modimo? Aowaa hle! Kgoši a se ke a bea nna molato le ba leloko la gešo ka moka; ka gobane nna mohlanka wa gago ke be ke sa tsebe ditaba tše ka moka, goba ke tše kgolo, goba ke tše nyenyane.

16Kgoši ya re: O tlo hwela sa ruri, wena Ahimeleke le ba leloko la geno ka moka.

17Kgoši ya laela bahlanka ba ba bego ba eme moo, ya re: Batamelang le bolayeng baperisita ba Morena, ka gobane le tša bona diatla di ema le Dafida, le ka gobane ba be ba tseba gore o a tšhaba, mme ba lesa go ntsebiša. Fela, bahlanka ba kgoši ba gana go iša matsogo le go bolaya baperisita ba Morena.

18Ke mo kgoši e laetšego Doege ya re: Batamela wena, o bolaye baperisita ba! Doege a batamela a bolaya baperisita bao. Ka lona tšatši leo a bolaye banna ba masome a seswai le banna ba bahlano ba ba bego ba apere kobo ya baperisita.

19Gomme Saulo a bolaya ba Nobe, ba motse woo wa baperisita, ka bogale bja lerumo, banna le basadi le bana le masea, le dipholo le dipokolo le dinku, a di fetša ka bogale bja lerumo.

20Gwa phonyokga morwa o tee wa Ahimeleke morwa wa Ahitobo; leina la gagwe e be e le Abyathara. Yena eo a tšhaba a latela Dafida.

21Abyathara a tsebiša Dafida ge Saulo a bolaile baperisita ba Morena.

22Dafida a bolela le Abyathara a re: Mohla wola ge Doege Moedomo a le ntshe, ke tsebile gobane o tlo botša Saulo. Molato ke wa ka ge go bolawa bohle ba moloko weno.

23Dula le nna, o se boife; gobane e a tsomago bophelo bja ka, o tsoma le bja gago. O khutile, ge o le fa go nna.

← Chapter 21 Jump to: Chapter 23 →