1 Samuel 13

Sotho 1951 (BIBELE)

← Chapter 12 Jump to: Chapter 14 →

1Saulo e be e le monna e a godilego. Ya re ge a feditše nywaga e mebedi a buša Isiraele

2a ikgethela banna ba dikete tše tharo go Isiraele. Ba dikete tše pedi ba dula le yena Saulo motseng wa Mikimasa dithabeng tša Bethele. Ba sekete setee ba dula le Jonathane motseng wa Gibea wa Benyamini. Banna ba bangwe o be a ba gomišitše ba boela magaeng.

3Jonathane o kile a fenya bahlometši ba Bafilisita motseng wa Gibea. Bafilisita ba di kwa. Saulo a letša phalafala mo nageng ka moka, a re le Bahebere ba di kwe.

4Baisiraele ka moka ba kwa gore Saulo o fentše bahlometši ba Bafilisita, le gore Baisiraele ba rumotše Bafilisita; gomme setšhaba ka moka sa rapiwa sa latela Saulo sa tla Giligala.

5Le Bafilisita ba epša gore ba yo hlabana le Baisiraele ba na le dikoloi tše dikete tše masome a mararo, le banamedi ba dipitsi ba dikete tše di selelago, le madira a mantšintši a kakago lešabašaba la lebotong la lewatle. Ba rotoga ba bokana Mikimasa ka thoko ya bohlabela go Bethe-Abena.

6Banna ba Isiraele ge ba bona ba le tlalelong, le gobane batho ba gakanegile, ba utama mo mefomeng, le mo masoding, le mo matšibeng, le mo mabitleng, le mo meleteng.

7Bahebere ba bangwe ba sela noka ya Jorodane, ba ya nageng ya Gada le ya Gileada. Saulo yena o be a sa le kua Giligala; gomme setšhaba se be se mo latela se boifa.

8Gomme o be a letela Samuele, gwa fela matšatši a a šupago a a bego a beilwe ke Samuele. Bjale ge Samuele a sa tle gona moo Giligala, batho ba phatlala ba ba tloga.

9Saulo a ba a re: Ntlišetšeng sehlabelo sa sebego. A dira sehlabelo.

10A re a sa tšo se dira, Samuele šo, o a fihla. Saulo a mo gahlanetša, a mo dumediša.

11Samuele a re: O dirile bjang? Saulo a re: Ke bone ge setšhaba se phatlalala se ntlogela; mme wena o sa tle ka lebaka le le beilwego, mola Bafilisita ba bokane Mikimasa,

12ka re: Bjale Bafilisita ba tlo fologela mono Giligala ke sešo ka rapela Morena; mme ka napa ka beta pelo, ka dira sehlabelo.

13Samuele a bolela le Saulo a re: O dirile tša bošilo, ge o sa ka wa dira ka taelo ye Morena Modimo wa gago a go laetšego yona; gobane Morena o be a tlo tiiša bogoši bja gago go Isiraele ka go sa felego.

14Bjale bogoši bja gago bo ka se ke bja tia. Morena o inyaketše monna e a kwanago le pelo ya gagwe. Yena eo Morena o mo hlaotše gore a be ketapele ya setšhaba sa gagwe; ka gobane wena ga wa ka wa hlokomela se Morena a go laetšego sona.

15Samuele a tsoga a tloga Giligala. Kua Gibea Benyamini Saulo a bala batho ba a bego a na nabo, a hwetša e le ba e ka bago ba makgolo a selelago.

16Saulo a dula gona moo Gibea-Benyamini a na le Jonathane morwa wa gagwe le setšhaba se se bego se na nae. Bafilisita ba be ba sa bokane Mikimasa.

17Bjale Bafilisita ba arogana dihlopha tše tharo, ba tlogela mešaša ya bona ba yo senya naga. Sehlopha se sengwe sa leba Ofura nageng ya Suali;

18se sengwe sa leba Bethe-Horoni; sa boraro sa leba thoko ya Tseboima go bataganego le lešoka.

19Gomme mo nageng ka moka ya Isiraele go be go sa hwetšwe morudi; gobane Bafilisita ba be ba re: Bahebere ba se ke ba itirela ditšhoša le marumo.

20Mo go Baisiraele ka moka, ge motho a rata go batolelwa petlo, le ge e le mogoma, goba selepe, le ge e le letsolo, o be a swanetše go fologela go Bafilisita.

21Gomme ge go kukubane mogoma, goba kepo, goba petlo, goba selepe, goba ge go otlollwa letsolo, ba be ba eya gona.

22Bjale ge go tsoga ntwa ye, gwa hlokwa e a swerego tšhoša goba lerumo mo madireng a bego a na le Saulo le Jonathane; di be di swerwe ke Saulo le Jonathane morwa wa gagwe fela.

23Bahlometši ba bangwe ba Bafilisita ba be ba tšwetše mo sefateng sa Mikimasa.

← Chapter 12 Jump to: Chapter 14 →