1 Samuel 4

Sotho 1951 (BIBELE)

← Chapter 3 Jump to: Chapter 5 →

1Gomme lentšu la Samuele le be le fihla go Baisiraele ka moka. -- Baisiraele ba tšwela Bafilisita dira, gore ba hlabane le bona, ba bokana Ebenesere; Bafilisita ba bokana Afeke.

2Bafilisita ba laya dira ba lwa le Baisiraele, ya ba tlhabano e kgolo; mme Baisiraele ba fenywa ke Bafilisita, gwa bolawa banna ba e ka bago ba dikete tše nne mo tlhabanong molaleng woo.

3Ge setšhaba se boela mešašeng, ba bagolo ba Isiraele ba re: Ke ka baka lang ge Morena lehono a re bolaišitše Bafilisita? A re yo tšea polokelo ya Morena kua Silo; e tle mo go rena, e re namolele diatleng tša manaba a rena.

4Setšhaba sa roma batho ba ya Silo, ba yo tšea polokelo ya kgwerano ya Morena wa Mašaba, Modula le Bakerube. Hofini le Pinease, barwa bala ba babedi ba Eli, ba tla le polokelo ya kgwerano ya Modimo.

5Ya re ge polokelo ya kgwerano ya Morena e fihla mešašeng, Baisiraele ka moka ba tšhela legoa le legolo, lefase la ba la duma.

6Bafilisita ge ba ekwa lešata la legoa leo, ba re: Lešata leo la legoa le legolo kua mešašeng ke la go reng? Gomme ge ba ekwa gore polokelo ya Morena e tlile mešašeng,

7ba boifa ba re: Modimo o tlile mešašeng! Ba re: Re fedile; ka gobane maabane le maloba go be go se bjalo.

8Re fedile! Re tlo namolelwa ke mang diatleng tša Modimo yo maatla yo? Ke yena Modimo ela e a kilego a otla Baegipita ka dikotlo tša mehutahuta lešokeng.

9Hee lena Bafilisita! Tiišang maatla, le eme senna, gore le se tlo loba Bahebere bjalo ka ge bona ba be ba le loba. Emang senna, le hlabane!

10Bafilisita ba na ba hlabana; Baisiraele ba fenywa ba tšhaba, bohle ba tšhabela magaeng a bona. Polao ya ba e kgolo ka kudu; gwa bolawa banna ba Isiraele ba dikete tše masome a mararo ba bahlabani.

11Gomme polokelo ya Modimo ya thopiwa; Hofini le Pinease, barwa bala ba babedi ba Eli, ba bolawa.

12Monna e mongwe wa ga Benyamini a tšhaba direng, a tla Silo ka lona tšatši leo. A fihla a gagotše diaparo, a tšhetše mmu hlogong.

13Ge a tsena ke ge Eli a dutše sedulong hleng ga tsela, a lebeletše tsela, ka gobane pelo ya gagwe e be e boifela polokelo ya Modimo. Bjale ge monna eo a fihla a kwatša taba yeo motseng, motse ka moka wa lla.

14Eli ge a ekwa lešata la sello, a botšisa a re: Lešata le lekaakaa ke la go reng? Monna eo a kitima a mmotša.

15Eli o be a šetše a na le nywaga e masome a senyane le metšo e seswai, mahlo a gagwe a šetše a pompetše, a sa hlwe a bona.

16Monna eo a mo anegela a re: Nna ke tšo tšhaba direng. Nna ke tšhabile direng lehono. Eli a re: Gomme di reng, ngwanaka?

17Motlalefoko a fetola a re: Baisiraele ba lelekilwe ke Bafilisita; polao ya ba e kgolo setšhabeng. Le barwa ba gago Hofini le Pinease ba bolailwe bobedi bja bona. Gomme polokelo ya Modimo e thopilwe.

18Ya re ge Eli a botšwa tša polokelo, a wa a kwaelela nthago sedulong sa gagwe, a robega molala a hwa; ka gobane o be a tšofetše gomme e be e le monna e mokoto. O be a feditše nywaga e masome a mane a ahlolela Isiraele.

19Gomme ngwetši wa gagwe mosadi wa Pinease e be e le moima, a šetše a le kgauswi le go belega. Ya re ge a ekwa ba re: Polokelo ya Modimo e thopilwe, le gore ratswalagwe le monna wa gagwe ba bolailwe, a kudupana a belega, mašoko a mo swara.

20A le sekgatheng sa go hwa, basadi ba ba bego ba mmelegiša ba re: O se boife! O swere ngwana wa mošimanyana. Yena a se fetole selo, a se šetše se ba se bolelago.

21Ngwana eo wa mošimanyana a mo reela leina a re ke Ikabodi, a re: Letago la Isiraele le ile, e le gobane polokelo ya Morena e thopilwe, mme go hwile ratswalagwe le monna wa gagwe.

22O be a era tšona ge a re: Letago la Isiraele le ile, gobane polokelo ya Modimo e be e thopilwe.

← Chapter 3 Jump to: Chapter 5 →