1 Samuel 25

Sotho 1951 (BIBELE)

← Chapter 24 Jump to: Chapter 26 →

1Gomme Samuele a hwa; Baisiraele ka moka ba kgobokana ba mo hloboga, ba mmoloka mo lebitleng la gabo motseng wa Rama. Dafida a tsoga a fologela lešokeng la Parana.

2Kua Maone go be go na le monna e mongwe a bego a na le mediro ya gagwe mo motseng wa Karamele. E be e le monna wa lehumagadi le legolo ka kudu. O be a na le dinku tše dikete tše tharo, le dipudi tše sekete; a ya go kuta dinku tša gagwe mo motseng wa Karamele.

3Leina la monna eo e be e le Nabala; la mosadi wa gagwe e be e le Abigaile, mosadi yo bohlale wa sefahlogo se sebotse. Monna yena e be e le e mothata, wa mekgwa e mebe; gomme e be e le wa leloko la Kalebe.

4Dafida, a le kua lešokeng, a kwa gore Nabala o kuta dinku tša gagwe.

5A roma masogana a lesome a re: Yang kua Karamele. Ge le etla go Nabala, le mpotšišetše maphelo.

6Le re: A phele; a letlege; go letlege le ba motse wa gagwe; go letlege le tšohle tše a nago natšo.

7Le re: Ke kwele gore o na le bakuti ba dinku. Le re: Badiši ba gago ba be ba dula le rena, ra se ke ra ba dira bošula; ba se ke ba timelelwa ke selo lebakeng ka moka la ge ba le mo Karamele.

8Le re a botšiše bahlanka ba gagwe, ba tlo mmotša. Le re: A masogana a ka a hwetše mahlo e le a mašweu, ka gobane re tla ka tšatši le lebotse. Ako hlallele bahlanka ba gago le morwa wa gago Dafida se seatla sa gago se se swerego.

9Masogana a Dafida a tla, a bolela le Nabala ka mo Dafida a ba laetšego ka gona ba bolela mme ba homola.

10Nabala a fetola, a bolela le bahlanka ba Dafida, a re: Dafida ke mang? -- Morwa wa Isai ke mang? -- Bahlanka ba go hlanogela beng ba bona mehleng yeno ba atile.

11Afa le re nka tšea bogobe bja ka, le meetse a ka, le dinama tša ka, tše ke di hlabetšego bakuti ba ka ba dinku, ka di nea banna ba ke sa tsebego mo ba tšwago ntshe?

12Ke moka masogana a Dafida a wela tsela a goma; ba boela go Dafida ba mo anegela ditaba tšeo ka moka.

13Dafida a napa a lalela banna ba gagwe a re: Ka moka swarang ditšhoša! Ka moka ba swara ditšhoša; Dafida a swara ya gagwe; ba tšwa ba šetše Dafida nthago. Mo diphahlong gwa šala ba e ka bago ba makgolo a mabedi.

14Bjale e mongwe wa masogana a Nabala o be a sebetše Abigaile mosadi wa Nabala a re: O ko tsebe gore Dafida o be a romile batseta a le kua lešokeng, a dumediša mong wa rena; gomme mong wa rena o ba fotletše,

15etšwe e le banna ba ba bego ba re dira ka botho ruri. Ga ba ka ba re tshwenya; gomme ga ra lahlegelwa ke selo lebaka ka moka re na nabo nageng.

16Ba be ba re gora bjalo ka morako bošego le mosegare, lebaka ka moka la ge re diša re na nabo.

17Bjale o ko eletše o bone se o ka se dirago, ka gobane mong wa rena o ukametšwe ke kotsi le ba motse wa gagwe; gomme yena ke motho wa dintwa, e a sa bolelwego nae.

18Abigaile a napa a akgofa a tšea dinkgwa tše makgolo a mabedi le makuka a mabedi a morara, le dinku tše di budulego tše tlhano, le diroto tše tlhano tša dipabe, le mekwape e lekgolo ya morara, le dinkgwana tša mago tše makgolo a mabedi, a di beleša dipokolo.

19A laela masogana a gagwe a re: Nketeng pele; ge e le nna ke tlo tla ke le latela. Gomme Nabala monna wa gagwe a se ke a mmotša selo.

20Ya re ge a sa ya a nametše pokolo, a sa theoga a širilwe ke thaba, Dafida le banna ba gagwe ba ba ba fihlile ba gahlana nabo.

21Ge e le Dafida o be a itše: Ke diretše lefela mola ke leta dilo tša monna e lešokeng, a se ke a timelelwa ke selo sa gagwe; gomme bjale o mpušetša bobe bakeng sa tše botse.

22Modimo a a dire manaba a Dafida ka go re le ka go re, ge nka lesa o tee wa bona e lego monna a phela ge go hlaba la bosasa.

23Abigaile ge a bona Dafida a akgofa a fologa pokolo, a phuhlama a lotšha Dafida.

24A phuhlama maotong a Dafida a re: Molato a e be wa ka, mong wa ka! A molata wa gago a bolele ditsebeng tša gago; o kwe se nna molata wa gago ke se bolelago.

25A pelo ya gago, mong wa ka, e se ke ya šetša monna eo wa dintwa, Nabala; ke lešilo, leina la gagwe le šupa se a lego sona, gomme o dirile tša bošilo. Ge e le nna molata wa gago ga nka ka bona masogana ao a o bego o a romile, mong wa ka.

26Gomme bjale, mong wa ka, -- ka bophelo bja Morena le ka bophelo bja gago, -- Morena o go šegetše wa se ke wa oba molato wa madi ka go itefeletša ka seatla sa gago. Bjale manaba a gago le bohle ba ba go lakanago, a ba be bjalo ka Nabala.

27Gomme bjale dibego tše, tše nna molata wa gago ke di ntšhetšago wena mong wa ka, a di newe masogana a nago le wena mong wa ka.

28A ko ntebalele bošaedi, nna molata wa gago. Ka kgonthe, wena mong wa ka, Morena o tlogo agela ngwako o tlogo tia, ge wena mong wa ka o elwa dintwa tša Morena, go sa hwetšwe bokgopo go wena bophelong bja gago ka moka.

29Ge go ka tsoga motho a go hlomara a tsoma bophelo bja gago, gona moya wa gago, mong wa ka, a o bolokege o phuthetšwe le ba ba phelago le Morena Modimo wa gago. Gomme meoya ya manaba a gago o tlo e lahla wa go betšwa ka seragambje.

30Mohla Morena a tlogo tšweletša tše botse tšohle tše a go boletšego ka tšona, wena mong wa ka, a go bea wa ba moetapele wa Isiraele,

31gona pelong ya mong wa ka go ka se be le sekgopi le ge e le moetlo, ge a sa ka a fo thula madi a itwela. Gomme ge Morena a tlo direla mong wa ka tše dibotse, gona a se ke a lebala nna molata wa gagwe.

32Dafida a fetola a re: A Morena Modimo wa Isiraele a lebogwe, ge a go romile wa gahlana le nna lehono.

33A go lebogwe le kelelo ya gago, go lebogwe wena ge o ntšhegetše lehono ka se obe molato wa madi ka go itwela ka seatla sa ka.

34Gobane ruri, ka bophelo bja Morena Modimo wa Isiraele e a nthibetšego go go dira bošula, mola o se akgofe go gahlana le nna, Nabala o be a ka se ke a šalelwa ke o tee e lego monna a sa phela ge go hlaba la bosasa.

35Dafida a amogela diatleng tša Abigaile tše a mo tlišeditšego tšona, a mo rera a re: Boela gae o rotše pelo, o tsebe gore se o se boletšego ke se kwele ka ge ke bone sefahlogo sa gago.

36Bjale Abigaile ge a fihla go Nabala, a hwetša a dirile monyanya ngwakong wa gagwe, e nkego ke monyanya wa kgoši. Pelo ya Nabala e be e thabile, a tagilwe gagolo. Gomme Abigaile a se ke a mmotša selo, gwa ba gwa sa.

37Ka moswana ge Nabala a tlogilwe ke kgang, mosadi wa gagwe a mmotša ditaba tšeo. Ke moka pelo ya gagwe ya kgaoga, a oma bjalo ka leswika.

38Ge go fetile matšatši a lesome, Morena a otla Nabala, a hwa.

39Dafida ge a ekwa gore Nabala o hwile, a re: A go lebogwe Morena ge a ntefeletša go Nabala ka baka la ge a nkgobošitše; mme nna mohlanka wa gagwe a nthibela ka se dire bokgopo; ya ba yena Morena a bušeditšego bokgopo bja Nabala hlogong ya gagwe. Gomme Dafida a iša lentšu go Abigaile a mmeeletša gore a mo tšee e be mosadi wa gagwe.

40Bahlanka ba Dafida ba tla go Abigaile kua Karamele, ba bolela le yena ba re: Re romilwe ke Dafida; o re a go tšee, o be mosadi wa gagwe.

41Abigaile a tsoga a lotšha a re: Ke nna e; ke molata wa gago le modiredi wa gago wa go hlapiša bahlanka ba mong wa ka maoto.

42Abigaile a akgofa a tsoga, a namela pokolo, a tloga le basetsana ba gagwe ba bahlano, a latela batseta ba Dafida, mme a ba mosadi wa gagwe.

43Ge e le Dafida o tšere le Ahinoama wa Jeseriele; ya ba basadi ba gagwe ka babedi.

44Ge e le Mikala morwedi ela wa Saulo, e bego e le mosadi wa Dafida, Saulo o mo neetše Phaliti morwa wa Laise wa Galime.

← Chapter 24 Jump to: Chapter 26 →