1 Samuel 14 — Sotho 1951 (BIBELE)

1Ka tšatši le lengwe Jonathane a bolela le lesogana la go mo rwalela marumo, a re: Tlaa, re yo selela kua go lego bahlometši ba Bafilisita. A lesa go botša tatagwe.

2Saulo yena o be a le kua mollwaneng wa Gibea, a dutše sehlareng sa morapa se se lego kua Migirone, a na le batho ba makgolo a selelago.

3Gomme kobo ya boperisita e be e aperwe ke Ahia morwa wa Ahitobo ngwana Boikabodi morwa wa Pinease morwa wa Eli moperisita wa Silo. Batho bona ba be ba sa tsebe ge Jonathane a tšwile.

4Mo sefateng seo se Jonathane a bego a rata go selela go bahlometši ba Bafilisita ka sona, go be go na le mantswe a mabedi a dintlha, le lengwe le le ka mošono, le lengwe le le ka mošola. Le lengwe ba be ba re ke Botsetse, le lengwe ba re ke Sene.

5Le lengwe le ukametše Mikimasa ka thoko ya leboa; le lengwe le ukametše Geba ka thoko ya borwa.

6Jonathane o be a boditše morwadi wa marumo a gagwe, a re: Tlaa, re yo selela fala go lego bahlometši bao ba mašoboro. Mohlomong Morena a ka re diriša selo; ka gobane go Morena ga go se se kago mo šitiša go namolela ka ba bantši goba ka ba sego nene.

7Morwadi wa marumo a re: Dira se o ratago go se dira. E re yeng! Nna ke ya nago mo o ratago.

8Jonathane a re: O ko bone! A re seleleng go banna bao; mme a ba re bone.

9E tlo re ge ba ka re: Emang re tle go lena, gona re tlo ema moo, ra se ke ra rotogela go bona.

10Gomme ge ba ka re: Rotogelang mono, gona re tlo rotoga; gobane Morena o tlo ba a ba gafetše diatleng tša rena. Re tlo bona ka tšona tšeo.

11Bjale ge bahlometši ba Bafilisita ba bona banna ba babedi bao, ba re: Bonang, Bahebere ba tšwile meleteng ye ba utamago go yona.

12Ba biletša Jonathane le morwadi wa marumo a gagwe ba re: Rotogelang mono; le tlo re hwetša. Ke mo Jonathane a re: Ntšhale nthago, re rotoge. Morena o ba gafetše diatleng tša Baisiraele.

13Jonathane a namela ka go abula; morwadi wa marumo a gagwe a mo šala nthago. Ge Jonathane a fihla, a ba fenya; morwadi wa marumo a latela a fofotša.

14Mo tlhabanong ye ya pele Jonathane le morwadi wa marumo a gagwe ba bolaile banna ba masome a mabedi mo felwaneng go lekanago le tema e tee ya tšhemo.

15Madira ka moka a Bafilisita a a bego a le mošašeng wa kua molaleng, a welwa ke tšhogo e kgolo; ba bahlometši le ba ba bego ba thosanya naga, ba thothomela; naga ya šišinyega, ya ba tšhogo e tšwilego go Modimo.

16Dihlodi tša Saulo tše di bego di le kua Gibea-Benyamini, ge di lebelela, tša bona makoko a ferekane, a eya kua le kua.

17Saulo a laela batho ba ba bego ba na nae, a re: Balang, re bone e a re tšwilego. Ba bala ba hwetša go hlokega Jonathane le morwadi wa marumo a gagwe.

18Saulo a botša Ahia a re: Tliša polokelo ya Morena e tle fa; gobane polokelo ya Morena e be e le moo go Baisiraele mohlang woo.

19Ya re ge Saulo a sa bolela, moferefere wa mešašeng ya Bafilisita wa ba o godile. Saulo a botša moperisita a re: Gomiša letsogo la gago.

20Saulo le batho ba ba bego ba na nae ba hlaba mokgoši, ba tšwa dira, ba hwetša bala ba hlabana seng sa bona, e le moferefere o mogologolo.

21Gomme Bahebere ba ba bego ba rapilwe ke Bafilisita ba tšwa le bona ba tla mešašeng, ba hlanoga ba ema le Baisiraele, ba ba bego ba na le Saulo le Jonathane.

22Gwa phalala, le Baisiraele ba ba bego ba tšhabetše dithabeng tša Efuraimi, ge ba ekwa gore Bafilisita ba a tšhaba, ba ba kwatakwatiša.

23Mohlang woo Morena a namolela Isiraele ka mokgwa woo. Tlhabano ya ba e kgolo, ya fihla Bethe-Abene.

24Ka tšatši leo banna ba Isiraele ba lapa ka gobane Saulo o be a tlemile setšhaba ka keno, mola a re: Monna e a kago ja le sešo la dikela, ke sešo ka otla manaba a ka, o rogilwe! Gomme batho ba ila sejo.

25Ba tla nageng ye e bego e tletše dihlare; ba hwetša go le dinose di le kgakala.

26Batho ge ba tsena sekgweng, ba bona dinose di ela. Fela, gwa se be le e a di tšeago a di iša molomong, ka go boifa keno yela.

27Bjale Jonathane o be a sešo a kwa gore tatagwe o tlemile setšhaba ka keno; a iša ntlha ya molamo wo a bego a o swere, a rafa lemapo la dinose, a iša seatla ganong; ke mo mahlo a gagwe a nago a apoga.

28A bonwa ke e mongwe wa batho bao; yena eo a mo rera a re: Tatago o tlemile setšhaba ka keno, a re: E a kago ja bogobe lehono, o rogilwe! Gomme setšhaba se be se lapile.

29Jonathane a re: Tate o hlolela lefase le bothata. Bonang nna; mahlo a ka a apogile ke lekile nose ye ka gonyane.

30A batho ba ka be ba dumeletšwe lehono go ja tše ba di thopilego, tše ba di bonego di le gona go manaba a bona! Bjale gomme polao go Bafilisita e ka se be e kgolo.

31Mohla woo ba be ba bolaile Bafilisita go tloga Mikimasa ba ba fihliša Ajoloni; fela, setšhaba se be se lapile gagolo.

32Batho ba tla ba wela dithebola godimo, ba tšea dinku le dikgomo le mamane, ba fo di hlabela fase, ba di ja di sa na le madi.

33Ba botša Saulo ba re: Seba batho ba senyetša Morena ka go ja tše di nago le madi. Saulo a re: Le oba molato. Napang le kgokološe leswika le legolo le tle fa.

34A buša a re: Phatlalalelang bathong le ba botše le re: Bohle tlišang dinku le dipholo tša lena fa go nna, le di hlabele gona mo, gore le sa tlo senyetša Morena ka go ja madi. Batho ka moka ba tliša dipholo tša bona bošego bjoo, ba di hlabela gona moo.

35Saulo a agele Morena aletare; ya ba yona ya pele ye a e agetšego Morena.

36Bjale Saulo a re: A re hlomareleng Bafilisita bošego bjo, re ba hlakole go sešo gwa sa; mme re se ke ra šadiša motho wa bona. Ba re: Dira ka mo go ratago pelo ya gago. Moperisita yena a re: A re batameleng Modimo re sa le fa.

37Gomme Saulo a botšiša Modimo a re: A nka hlomarela Bafilisita? A o tlo ba gafela seatleng sa ka? Gomme mohla woo Morena a se ke a fetola.

38Ke moka Saulo a re: Batamelang lena balaodi ba setšhaba, le latišiši le bone gore molato wo wa lehono o go mang.

39Ka bophelo bja Morena Monamolelaisiraele, le ge molato o ka hwetšwa go Jonathane morwa wa ka, o tlo bolawa. Gwa se ke gwa fetola motho.

40A laela Isiraele ka moka a re: Lena emelang mola; nna le Jonathane morwa wa ka re eme mono. Batho ba re: Dira ka mo o ratago.

41Saulo a rapela Morena a re: Modimo wa Isiraele, ako tšweletše therešo! Gomme gwa tanywa Jonathane le Saulo; batho bona ba tšwa.

42Saulo a re: A go tleke nna le Jonathane morwa wa ka. Gomme tlekane ya tšwa le Jonathane.

43Saulo a re: Jonathane, mpotše se o se dirilego. Jonathane a mmotša a re: Ke latswitše nosana ka ntlha ya molamo wo ke bego ke o swere. A fa ke tlo bolawa ka baka la yona?

44Saulo a re: Modimo o dira ka mokgwa woo; o tlo ba a boeletša. O a bolawa, Jonathane.

45Ke mo batho ba boletšego le Saulo ba re: Afa o re Jonathane a bolawe, yena e a namoletšego Isiraele ka tše kaakaa? Aowa! Ka bophelo bja Morena! Le ntsa e tee ya moriri wa hlogo ya gagwe e ka se ke ya wela fase; ka gobane se a se dirilego se, o se dirile Modimo a na nae. Setšhaba sa emela Jonathane ka mokgwa woo; mme a se ke a bolawa.

46Saulo a gomela Bafilisita; Bafilisita ba boela ga gabo.

47Saulo ge a tšere bogoši bja Isiraele o hlabane le manaba a gagwe ka moka thoko tše go fela. E be e le: Bamoaba, le Baamoni, le Baedomo, le dikgoši tša Tsoba, le Bafilisita. Gomme mo gohle mo a tšwetšego ntshe, o fentše.

48A tiiša maatla a fenya Baamaleke; a namolela Isiraele mo diatleng tša ba ba bego ba ba hlakola.

49Saulo o be a na le barwa, e le Jonathane, le Jesibi, le Malakisua. Maina a barwedi ba gagwe, la wa pele e be e le Merabe, la e monyenyane e be e le Mikala.

50Leina la mosadi wa Saulo e be e le Ahinoama, morwedi wa Ahimaatse. Leina la molaodi wa madira e be e le Abenere, morwa wa Nere, morwa rangwana Saulo.

51Gobane Kisi tatago Saulo, le Nere tatago Abenere, e be e le barwa ba Abiele.

52Mehla ka moka ya mmušo wa Saulo go be go lwewa ntwa e thata le Bafilisita. Gomme monna ofe le ofe, yo Saulo a mmonego e le seoka le mogale, o be a mo dira wa gagwe.